༧གོང་ས་མཆོག་གིས་ཁེ་ན་ཌའི་ནང་ཉིན་ ༣ རིང་གི་མཛད་འཕྲིན་ཁག་བསྐྱངས་གྲུབ་ཅིང་། བོད་རིགས་ཚོ་གཙོས་པའི་ཕྱི་རྒྱལ་བ་དང་། རྒྱ་རིགས་རྣམས་བཅས་ལ་ཆོས་དང་འཇིག་རྟེན་གང་ཐད་ནས་བཀའ་སློབ་རྒྱ་ཆེར་བསྩལ་ཡོད་པ་རེད།
ཕྱི་ཚེས་ ༢༢ ཉིན་ཊོ་རོན་ཊོ་དང་མངའ་སྡེ་གཞན་ཁག་ནས་ཡོང་བའི་བོད་རིགས་རྣམས། དེ་བཞིན་ཕྱི་རྒྱལ་གྱི་དད་ལྡན་སྟོང་ཕྲག་འགའ་རེ་བཅས་ཀྱི་ཕེབས་བསུའི་འོག་༧གོང་ས་མཆོག་ཊོ་རོན་ཊོར་ཞབས་སོར་བཀོད་ཡོད་ལ། ཉིན་དང་པོའི་མཛད་འཕྲིན་ཐོག་མར། ༧གོང་ས་མཆོག་ཊོ་རོན་ཊོ་གཙུག་ལག་སློབ་གླིང་དུ་ཕེབས་ཏེ། མིའི་འདུ་ཤེས་དང་ཚན་རིག་གི་ངེས་རྟོགས་ཀྱི་སྐོར་ལ་གསུང་བཤད་གནང་ཡོད་པ་དང་། ཉིན་རྒྱབ་དེར་ཁོང་གིས་ཊོ་རོན་ཊོ་ཡི་རོ་རྗར་སི་བསྟི་གནས་ཞེས་པ་དེར་མི་དམངས་ ༡༥༠༠༠ ལྷག་ལ་འགྲོ་བ་མི་ཞིག་གི་ངོས་ནས་འཛམ་གླིང་ཞི་བདེ་སྐྲུན་ཐབས་ཞེས་པའི་བརྗོད་གཞིའི་སྟེང་གསུང་བཤད་གནང་ཡོད་པ་རེད། ཉིན་དེར་ཁོང་གིས་ཁོང་ཉིད་ནི་ཏཱ་ལའི་བླ་མའི་སྐུ་ཕྲེང་རིམ་བྱོན་ ༡༤ ཁྲོད་ནས་ཡག་ཤོས་དེ་མིན་ལ། སྡུག་ཤོས་དེ་ཡང་མིན་ངེས། ཡིན་ཡང་ཁོང་ཉིད་ནི་ཏཱ་ལའི་བླ་མ་སྐད་གྲགས་ཆེ་ཤོས་དེ་ཡིན་སྲིད་ཅེས་གསུངས་ཡོད་ལ། དེ་བཞིན་ཁོང་གིས། བདེ་སྐྱིད་ནི་གནམ་ནས་ཟགས་ཡོང་གི་མ་རེད། ང་ཚོས་བདེ་ཐང་གི་འཇིག་རྟེན་ཞིག་སྐྲུན་པར་རང་གི་རྣམ་དཔྱོད་འདོན་དགོས་པ་རེད། ཞི་བདེ་ནི་གྲོས་མོལ་ལཁོ་ནའི་ལམ་ནས་ཡོང་ཐུབ་པ་ཞིག་རེད་ཅེས་དང་། ཁོང་ཉིད་དགུང་ལོ་ ༡༦ གི་སྟེང་ནས་རང་དབང་བརླག་སོང་ལ། དགུང་ལོ་ ༢༤ ཡི་སྟེང་ནས་རང་གི་རྒྱལ་ཁབ་ཤོར་སོང་། དེང་སྐབས་དགུང་ལོ་ ༧༥ ལ་ཕེབས་སྐབས་ཁོང་གིས་གསལ་བོར་མཁྱེན་པ་ནི་བཀའ་མོལ་གྱི་ནུས་པ་ཡིན་ལ། གྲོས་མོལ་གྱི་ལམ་དུ་ཕྱིན་པ་ཡིན་ན་ཕྱོགས་གཅིག་རྒྱལ་བ་དང་ཕྱོགས་གཅིག་ཤོར་བ་དེ་འདྲ་མེད། སོ་སོའི་སེམས་རྒྱ་བསྐྱེད་ནས་གཞན་ལ་བསམ་བློ་གཏོང་དགོས་པ་རེད་ཅེས་གསུངས་ཡོད།
ཐེངས་འདིར་ཡང་ཁོང་གིས་དེང་སྐབས་ཁོང་གིས་བགྲེས་ཡོལ་ཆ་ཚང་ལ་སྒུག་བསྡད་ཡོད། གལ་སྲིད་ངོས་རང་ལ་འགྲོ་བ་མིའི་ཐོབ་ཐང་ཞིག་ཡོད་ན། བགྲེས་ཡོལ་གྱི་ཐོབ་ཐང་ཡོད་ཀྱི་ེརེད་ཅེས་གསུངས་ཡོད་པ་རེད།
ཕྱི་ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༩ དང་ཕྱེད་ཀའི་སྟེང་༧གོང་ས་མཆོག་གིས་ཊོ་རོན་ཊོ་བོད་རིགས་མི་དམངས་ཀྱི་ཚོགས་ཁང་གསར་པ་སྒོ་འབྱེད་དང་བཅས་གངས་ལྗོངས་ཆོས་ལྡན་གླིང་ཅེས་མཚན་གསོལ་ཞིང་། ཚོགས་ཁང་ནང་གི་སྟོན་པ་དང་གུ་རུ་རིན་པོ་ཆེ། སྤྱན་རས་གཟིགས་ཀྱི་སྐུ་བཅས་ལ་རབ་གནས་གནང་ཡོད་པ་རེད། ཕྱི་དྲོ་དུས་ཚོད་ ༢ པའི་སྟེང་ཁོང་གིས་ཚོགས་ཁང་གསར་པ་དེའི་ནང་ཡོད་བོད་རིགས་ ༥༠༠༠ ལྷག་ལ་བཀའ་སློབ་བསྩལ་ཡོད་པ་རེད། ༧གོང་ས་མཆོག་གིས་བོད་མི་རིགས་འདི་ནི་རྣམ་དཔྱོད་བེད་སྤྱོད་གཏོང་བའི་ཐད་ནས་ཞེ་དྲག་གི་ཡག་པོ་རེད། དེ་ནི་འདས་པའི་ལོ་ ༢༠༠༠ ལྷག་གི་རིང་དར་བའི་ནང་བའི་ལྟ་གྲུབ་གཏིང་ཟབ་མོ་དེ་ཚོར་ཡིད་འཇོག་བྱས་པའི་དབང་གིས་མིན་འགྲོ་བསམ་བསྡད་ཡོད། སངས་རྒྱས་ཀྱི་ཆོས་དང་ལྷག་པར་དུ་བྱང་ཆུབ་སེམས་དཔའི་སྡེ་སྣོད་དར་ཡོང་དུས་བོད་པའི་སྤྱི་ཚོགས་ནང་དུ་བྱམས་པ་དང་བརྩེ་བ་ཟེར་བ་དེར་རང་བཞིན་གྱིས་བག་ཆགས་ཡོང་བསྡད་པ་ཞིག་རེད། བྱས་ཙང་འཛམ་བུའི་གླིང་འདིར་བོད་པ་ཞེས་ལབ་དུས་མི་དྲང་པོ་དང་སེམས་པ་བཟང་པོ། ཡ་རབས་ཀྱི་སྤྱོད་པ་ཡོད་མཁན་ཞིག་ལ་ངོས་འཛིན་བྱས་བསྡད་ཡོད་པ་རེད། ངོས་རང་རྒྱ་ནག་གི་མི་མང་པོ་ཞིག་ལ་ཐུག་བསྡད་གི་ཡོད་ལ། རྒྱ་རིགས་མང་པོ་ཞིག་གིས་ཀྱང་བོད་མི་རིགས་ཟེར་དུས་ཞི་བདེ་དང་ཡ་རབས་ཡིན་པ་འདིར་དོ་སྣང་ཡོང་གི་འདུག རྒྱ་གར་ལྟ་བུ་ཡིན་ནའང་མང་ཆེ་བ་ཞིག་གིས་བོད་པ་ལ་དགའ་བོ་བྱེད་གི་འདུག འདི་ནི་ང་ཚོའི་མི་རིགས་ཀྱི་གཟི་བརྗིད་རེད། སོ་སོར་ཆོས་དང་རིག་གཞུང་ཕྱུག་པོ་ཡོད་པ་དང་། ཆོས་དང་རིག་གཞུང་ཕྱུག་པོ་ཡོད་པར་བརྟེན་ནས་མིའི་གཤིས་ཀ་ཡག་པོ་ཡོད་པ་ཞིག་ཆགས་བསྡད་ཡོད་པ་རེད། དེར་བརྟེན་ཁྱེད་རང་ཚོ་ས་གནས་གང་དུ་ཡོད་ནའང་སོ་སོ་བོད་པ་ཡིན་ཟེར་བའི་འདུ་ཤེས་དེ་མ་བརླག་པ་བྱེད་པ་དང་། འདུ་ཤེས་དེའི་སྟེང་ནས་སྤོབས་པ་བྱེད་པ་དེ་གལ་ཆེན་པོ་རེད་ཅེས་གསུངས་ཡོད་པ་རེད།
གཞན་ཡང་ཁོང་གིས། ང་ཚོའི་ཆབ་སྲིད་ཀྱི་ལམ་ལུགས་དེ་དམངས་གཙོའི་ནང་འགྲོ་བསྡད་ཡོད་པ་རེད། འདིའི་སྔོན་ལ་རིན་པོ་ཆེ་ཕེབས་པ་རེད། ད་ནི་རིན་པོ་ཆེ་རྒན་ཡོལ་ལ་ཕེབས་རན་པ་རེད། ལོ་རྗེས་མར་ང་ཚོས་ཆབ་སྲིད་ཀྱི་དབུ་ཁྲིད་གསར་པ་ཞིག་འདེམ་དགོས་པ་རེད། ད་ཕན་མི་དམངས་ཀྱི་ནང་དུ་ཁུགས་ཐུར་ཆེན་པོ་བཞེས་ཏེ། བགྲོ་གླེང་བྱས། གོ་བསྡུར་བྱས་སོང་། ཡག་པོ་ཞེ་དྲག་བྱས་སོང་། འདིའི་རིགས་ནི་སྤྱིར་བཏང་འཛམ་བུའི་གླིང་འདིའི་སྒང་ནས་སྤོབས་པ་སྐྱེ་དགོས་པ་ཞིག་དང་། ཡང་སྒོས་རྒྱ་ནག་གཞུང་གི་ཐོག་ལ་ང་ཚོས་འདི་ནས་རྗེས་ལུས་ཐེབས་པའི་ལམ་ལུགས་ཤིག་གི་སྟེང་བསྐྱར་ལོག་བྱེད་པ་དང་། སྤྱི་ཚོགས་རྙིང་བའི་ལམ་ལུགས་བསྐྱར་གསོ་བྱེད་པ་དེ་འདྲ་ཞིག་མིན་པ་ང་ཚོས་ཁ་ནས་བཤད་པ་ཙམ་མིན་པར། ལག་ལེན་གྱི་སྟེང་ནས་ལན་ཞིག་བསློགས་པ་རེད། འདི་ཚོ་ཡག་པོ་རེད། ངོས་ནས་རྟག་པར་བཤད་བསྡད་ཡོད། ༧རྒྱལ་བ་རིན་པོ་ཆེ་ལུགས་གཉིས་ཀྱི་དབུ་ཁྲིད་བྱས་ནས་མགོ་ཁྲིད་པ་དེ་རྒྱལ་དབང་ལྔ་བའི་སྐབས་ནས་བྱུང་བ་རེད། ད་ནི་ལོ་ ༤༠༠ ནས་ ༥༠༠ ཞིག་ཕྱིན་པ་རེད། དེ་མཇུག་རྫོགས་ཚར་བ་རེད་ཅེས་བཤད་བསྡད་ཡོད། དེ་རྣམ་རྟོག་སློང་བའི་སྐད་ཆ་མ་རེད། དངོས་ཡོད་གནས་ཚུལ་རེད། དེ་རྫོགས་དགོས་པ་རེད། དེ་འདྲ་ཡིན་དུས་ ༢༠༠༡ གི་ལོ་ནས་བཟུང་ང་ཚོའི་ཆབ་སྲིད་ཀྱི་དབུ་ཁྲིད་དེ་འོས་བསྡུའི་ལམ་ནས་ཕེབས་པ་ནས་བཟུང་ངོས་ཀྱི་གནས་སྟངས་དེ་རྒན་ཡོལ་བྱེ་བྲག་པ་ཞིག་གི་ནང་བསླེབས་བསྡད་ཡོད། དེ་ངོས་རང་སེམས་ཤུགས་ཆགས་པ་དང་། བོད་སྤྱི་བའི་ལས་དོན་ཐོག་སེམས་ཁུར་མེད་པ་དེ་འདྲ་མ་རེད། ཁྱེད་རང་ཚོ་ཚང་མས་མཁྱེན་གསལ་ལྟར་རེད། ངོས་ནས་འཛམ་བུའི་གླིང་སྤྱིའི་བདེ་དོན་ལ་བསམ་བློ་གཏོང་དགོས་པ་རེད། ང་ཚོས་ནམ་རྒྱུན་སེམས་ཅན་ཐམས་ཅད་ཅེས་བཤད་ཡོད་པ་མ་གཏོགས། བོད་པ་གཅིག་པུ་ཞེས་བཤད་གི་ཡོད་པ་མ་རེད། སེམས་ཅན་ཐམས་ཅད་ལ་བདེ་བ་བྱུང་བ་ཡིན་ན་བོད་པ་ལ་ཡང་རང་བཞིན་གྱིས་བདེ་སྐྱིད་ཐོབ་བསྡད་ཡོད་པ་རེད་ཅེས་ཁོང་གིས་འཛམ་བུའི་གླིང་གི་མི་སྤྱིའི་བདེ་དོན་ལ་སྨོན་ལབ་བརྒྱག་པ་དང་། ཐུགས་ཁུར་གནང་བཞིན་པའི་སྐོར་གསུངས་ཡོད་པ་རེད།
ཉིན་དེར་ཁོང་གིས་ཊོ་རོན་ཊོར་གནས་བཞུགས་རྒྱ་ནག་ནས་ཡོང་བའི་རྒྱ་རིགས་སློབ་ཕྲུག་དང་རྩོམ་པ་པོ། ཕྱི་སྡོད་རྒྱ་རིགས་བཅས་ལ་མཇལ་འཕྲད་ཀྱིས་བོད་རྒྱའི་འབྲེལ་བ་དང་། དཀའ་རྙོག་སེལ་ཐབས་བཅས་ཀྱི་ཐད་ཁོང་གི་དགོངས་གཞི་གསལ་བཤད་གནང་ཡོད་པ་རེད།
ཕྱི་ཚེས་ ༢༤ ཉིན་༧གོང་ས་མཆོག་གིས་བོད་རིགས་ཚོར་སྒྲོལ་དཀར་གྱི་ཚེ་དབང་གནང་བ་དང་། དེ་རྗེས་ཁེ་ན་ཌའི་ཝན་ཁོ་ཝར་དུ་གནས་བཞུགས་མཚན་སྒྲོགས་དགོན་པ་དང་། འོན་ཊ་རོ་བོད་རིགས་མི་དམངས་གཉིས་མཉམ་འབྲེལ་གྱིས་༧གོང་ས་མཆོག་ལ་བརྟན་བཞུགས་ཕུལ་ཡོད་པ་རེད། འདིའི་ཐད་དགའ་ལྡན་བྱང་རྩེ་ཀླུ་འབུམ་ཁང་ཚན་མཚན་སྒྲོགས་མཁན་ཆེན་ཧོ་ཐོག་ཐུ་སྐུ་ཕྲེང་ ༧ པ་བསྟན་འཛིན་ཆོས་ཀྱི་རྒྱལ་མཚན་མཆོག་གིས་གསུངས་དོན། ཐེངས་འདིའི་བརྟན་བཞུགས་ནི་༧གོང་ས་མཆོག་ལ་བྱང་ཨ་རིའི་ཁུལ་ནས་བརྟན་བཞུགས་ཕུལ་ཐེངས་ ༢ པ་རེད་བསམ། ༧གོང་ས་མཆོག་གི་སྐུ་ཚེ་མཛད་འཕྲིན་རྒྱས་བཞིན་པའི་སྐབས་སུ་ཁོང་གི་སྐུ་ཚེ་ཞབས་པད་བརྟན་རྒྱུ་ནི་དེ་བས་ཀྱང་གལ་ཆེན་པོ་རེད། དེ་བས་ཐེངས་འདིར་ཁོང་ཁེ་ན་ཌར་ཕེབས་པའི་སྐབས་དང་བསྟུན་ནས་མཚན་སྒྲོགས་དགོན་པས་འོན་ཊ་རོ་བོད་རིགས་མི་དམངས་དང་མཉམ་འབྲེལ་ཐོག་ཁོང་ལ་བརྟན་བཞུགས་ཕུལ་ཐུབ་པ་འདི་ནི་གཅིག་ནས་ཁོང་གི་སྐུ་ཚེ་ཞབས་པད་བརྟན་པའི་ཆེད་དང་། ཕྱོགས་གཞན་ནས་བཤད་ན། སོ་སོའི་ངོས་ནས་ཚོགས་དང་བསོད་ནམས་བསགས་པ་ཡང་རེད་ཟེར་ལ། མཚན་སྒྲོགས་དགོན་པའི་ངོས་ནས་བརྟན་བཞུགས་ཀྱི་སྐབས་འདིར་ཚེ་མདོ་གསེར་བྲིས་མ་ཞིག་དང་སྒྲོལ་དཀར་ཞལ་ཐང་ ༡༠༠ བཅས་ཕུལ་ཡོད་པ་རེད།
མཐའ་མ་དེར་༧གོང་ས་མཆོག་གིས་དད་ལྡན་མང་ཚོགས་ལ་བློ་སྦྱོང་ཚིགས་བརྒྱད་མའི་བཀའ་ཆོས་ཀྱང་གསུངས་ཡོད་པ་རེད།
མཆན། གསར་འགྱུར་འདིའི་ནང་གི་པར་རྣམས་ནི་དྲ་ངོས་འདྲ་མིན་ནས་བླངས་པ་ཡིན་ལ། པར་དབང་ཡང་དྲ་ངོས་དེ་དག་གི་པར་པ་ཚོར་ཡོད།
གསར་འགོད་པ། ལུང་རིགས་རྒྱལ།
གསར་འགོད་པ་ལུང་རིགས་རྒྱལ་ལགས།
༼༧རྒྱལ་བ་རིན་པོ་ཆེ་ལུགས་གཉིས་ཀྱི་དབུ་ཁྲིད་བྱས་ནས་མགོ་ཁྲིད་པ་དེ་རྒྱལ་དབང་ལྔ་བའི་སྐབས་ནས་བྱུང་བ་རེད། ད་ནི་ལོ་ ༤༠༠ ནས་ ༥༠༠ ཞིག་ཕྱིན་པ་རེད།༽ ཅེས་པར་དྭོགས་གཞི་ཞིག་འདུག ༸རྒྱལ་དབང་ལྔ་བ་ཆེན་པོས་སྤྱི་ལོ་ ༡༦༤༢ ལོར་བོད་གཞུང་དགའ་ལྡན་ཕོ་བྲང་དབུ་བརྙེས་པ་ཡོངས་གྲགས་ཡིན་པས་ད་བར་ལ་ལོ་ངོ་ ༣༠༠ ལྷག་ཙམ་ཞིག་ཕྱིན་པ་གསལ་པོ་རེད། དེར་བརྟེན་ད་ནི་ལོ་ ༤༠༠ ནས་ ༥༠༠ ཞིག་ཕྱིན་པ་རེད་ཅེས་པར་གོ་རྒྱུ་དམིགས་བསལ་ག་རེ་ཡོད་མེད་བཀའ་སློབ་ལ་ཡང་བསྐྱར་ཉམ་ཞིབ་ཞིག་གནང་རོགས།
༼ད་ཕན་མི་དམངས་ཀྱི་ནང་དུ་ཁུགས་ཐུར་ཆེན་པོ་བཞེས་ཏེ། བགྲོ་གླེང་བྱས། གོ་བསྡུར་བྱས་སོང་།༽ ཁུགས་ཐུར་ཞེས་པ་ཐུགས་ཁུར་ཞེས་བཅོས་རོགས།
༼ཞི་བདེ་ནི་གྲོས་མོལ་ལཁོ་ནའི་ལམ་ནས་ཡོང་ཐུབ་པ་ཞིག་རེད་ཅེས་དང་། ༽ ལཁོ་ནའི་ཞེས་པའི་ལ་ཡིག་ལྷག་མ་ཤོར་བ་ཡིན་ས་རེད།
༸མགོན་པོ་མཆོག་གི་བཀའ་སློབ་ནི་འཛམ་གླིང་སྐྱེ་འགྲོ་ཀུན་ལ་མེད་དུ་མི་རུང་བའི་གཅེས་ནོར་ཞིག་དང་། ཚིག་གཅིག་གིས་ཀྱང་གོ་བ་མི་འདྲ་བ་སྣ་ཚོགས་སྟེར་གྱི་ཡོད་པས་ཡིག་ནོར་ལ་གཟབ་གཟབ་གནང་རྒྱུ་ཤིན་ཏུ་གལ་ཆེ།
༼གལ་སྲིད་ངོས་རང་ལ་འགྲོ་བ་མིའི་ཐོབ་ཐང་ཞིག་ཡོད་ན། བགྲེས་ཡོལ་གྱི་ཐོབ་ཐང་ཡོད་ཀྱི་རེད།༽ ཅེས་པའི་བཀའ་སློབ་དང་འབྲེལ་ནས་བསམ་ཚུལ་ཐུང་ཙམ་བརྗོད་འདོད་བྱུང་། རིང་མིན་དེ་དང་ཕྱོགས་མཚུངས་པ་ཞིག་བརྩལ་བར་ཆབ་སྲིད་ལ་ཁས་ཆེ་བའི་གང་ཟག་ཞིག་གིས་དུས་བབ་ཀྱི་མཆན་ཞིག་ནང་བཀའ་སློབ་འདི་གསར་འགྱུར་ཙམ་ལས་གལ་ཆེན་པོ་མ་ཡིན་པའི་གཏམ་འཆལ་མང་པོ་ཞིག་སྤེལ་འདུག ཕྱིས་སུ་དེ་དུས་བབ་ཚང་གིས་བསུབས་སོང་།
དེར་ཕྲན་གྱིས་གལ་ཆེན་པོ་ཡིན་པའི་རྒྱུ་མཚན་མང་དག་ཅིག་བརྗོད་ཀྱང་དུས་བབ་ཀྱི་དགག་སྒོ་ནས་ཐར་མ་སོང་།
ད་རེས་འདི་ཐར་ཐུབ་པའི་རེ་བ་དང་འབོད་སྐུལ་ཞུ་རྒྱུ་ཡིན། བཀའ་སློབ་འདི་ཡིས་ཉུང་མཐར་ཡང་བོད་མི་ཚོར་སྙིང་ལ་རུས་པ་བཅུག་ན་མ་གཏོགས་རྒན་རབ་པ་རིམ་གྱིས་བགྲེས་ཡོལ་ཆགས་པས་གཞོན་སྐྱེས་རྣམས་ཀྱིས་རྒྱུན་འཛིན་ཐུབ་པ་དགོས་ཞེས་གདམས་པ་དང་། རྒྱ་ནག་གུང་ཁྲན་གྱིས་བཤད་པ་ལྟར་བོད་དོན་རྩོད་པ་དང་༸གོང་ས་མཆོག་གི་ཐོབ་ཐང་རྩོད་པ་གཅིག་པ་མ་རེད་ཅེས་ལན་འདེབས་གནང་པ་ཞིག་ཀྱང་རེད་སྙམ།།
གོང་ས་༸མཆོག་གིས། གལ་སྲིད་ངོས་རང་ལ་འགྲོ་བ་མིའི་ཐོབ་ཐང་དང་བགྲེས་ཡོལ་གྱི་ཐོབ་ཐང་ཞིག་ཡོད་ན་བགྲེས་ཡོལ་ཆ་ཚང་ལ་བསྒུགས་ནས་བཞུགས་ཡོད་གསུངས་པ་ལ་དགོངས་པ་ཡོད་དེ། ཁོང་གིས་དགུང་ལོ་བཅུ་དྲུག་ནས་བདུན་ཅུ་དོན་ལྔའི་བར་དུ་བོད་སྤྱི་བའི་དོན་དུ་སྐུ་ངལ་དང་ཐུགས་ངལ་ལ་མ་འཛེམས་པར་འཛམ་གླིང་ཁྱོན་ཡོངས་སུ་མཛད་འཕྲིན་ལེགས་པར་བསྐྱངས་པས་ད་ལྟ་སྐུ་ངལ་ཆེན་པོ་ཞིག་བྱུང་གི་ཡོད་པར་བརྟེན། བོད་མི་དམངས་ཀྱིས་ཁོང་ལ་སྐུ་ངལ་གསོ་བར་བཞུགས་སུ་གསོལ་བ་དང་ཆབ་སྲིད་ཀྱི་ལས་འགན་མཐའ་དག་ལ་ཚང་མས་སྔར་ལས་ལྷག་པའི་ཧུར་བརྩོན་གནང་དགོས་པར་བསྟན་ཡོད། །
༧གོང་ས་མཆོག་གིས་རྒན་ཡོལ་ལ་ཕེབས་དགོས་དོན་ལ་བསམས་ནས་བོད་རིགས་རྣམས་སེམས་ཤུགས་ཆེ་རུ་འགྲོ་མི་དགོས་སམ། ཡང་འདིར་ཚར་གཅིག་ཀློག་གནོངས་དང་།
་་་་་ དེ་ངོས་རང་སེམས་ཤུགས་ཆགས་པ་དང་། བོད་སྤྱི་བའི་ལས་དོན་ཐོག་སེམས་ཁུར་མེད་པ་དེ་འདྲ་མ་རེད། ཁྱེད་རང་ཚོ་ཚང་མས་མཁྱེན་གསལ་ལྟར་རེད། ངོས་ནས་འཛམ་བུའི་གླིང་སྤྱིའི་བདེ་དོན་ལ་བསམ་བློ་གཏོང་དགོས་པ་རེད། ་་་་་
གནས་ཚུལ་ཞིབ་པར་ཞིབ་ཀློག་སྐལ་དུ་གྱུར་སོང་། ཐུགས་རྗེ་ཆེ།
སྐུ་ཡི་མཚན་དཔེ་གངས་ཅན་ཡུལ་ནས་བཞད།།
གསུང་གི་གདུལ་བྱ་གོ་ལའི་ཁྱོན་ལ་ཁྱབ།།
ཐུགས་ཀྱི་བརྩེ་བ་འགྲོ་བའི་སྙིང་ལ་སིམ།།
བོད་ཀྱི་སྐྱབས་མགོན་འཛམ་གླིང་ཉི་མ་ཡིན།།