༼ བོད་
ད་ལོ་བཙན་བྱོལ་བོད་མིའི་འོས་བསྡུ་ཆེན་མོར་ཕྲད་པའི་འགལ་རྐྱེན་དེས་གནད་དོན་གསུམ་གསལ་འདེབས་བྱས་ཡོད། དང་པོ། “མི་ཡུལ་ཅི་ཙམ་སྐྱིད་ཀྱང་རང་ཡུལ་མ་བརྗེད” ཟེར་བ་དེ་ལ་དྲན་སྐུལ་བྱས་ཡོད་ལ། གཉིས་པ། “རེ་བ་བཟང་ས་དང་གྲ་སྒྲིག་སྡུག་ས” ཟེར་བ་དེར་སྐུལ་འདེད། གསུམ་པ། “རྒྱ་སྒོར་གྱིས་འཛམ་གླིང་བསྒུལ་སོང” ཟེར་བ་དེར་བདེན་དཔང་བཅས་བྱུང་ཡོད།
དང་པོ། མི་ཡུལ་ཅི་ཙམ་སྐྱིད་ཀྱང་རང་ཡུལ་མ་བརྗེད་ཟེར་བ་དེ་ནི། ཐེངས་འདིར་བལ་གཞུང་གིས་བོད་མིའི་འོས་སྒམ་རྐུ་འཁྱེར་བྱས་པ་དེས་ང་ཚོར་མིའི་ལུང་པ་ན། དུས་ནམ་ཡང་སེམས་ལྷོད་ནས་འདུག་ས་ཞིག་དང་། ཞེ་བདེ་ནས་ཉལ་ས་ཞིག་མེད་པ་དྲན་གསོ་བསླངས་ཡོད། རྒྱ་གར་རང་དབང་ལུང་པ་ཟེར་ནས་མ་ཎི་བགྲང་བགྲང་བྱེད་ཀྱི་ཡོད་པ་འདིས་ང་ཚོ་ལང་ཤོར་བཏང་ཡོད་ཅིང་། ཡང་དག་པའི་དམངས་གཙོའི་རིང་ལུགས་ཟེར་ནས་ངོམ་སོ་བྱེད་ཀྱིན་པ་འདིས་ང་ཚོ་སྒྱིད་ལུག་བཟོས་ཡོད། མིའི་ལུང་པ་ན་ང་ཚོར་ཡང་དག་པའི་དམངས་གཙོའི་ལམ་སྲོལ་ཞིག་ཡོད་པ་བདེན་དུ་ཆིག་ཀྱང་། མིའི་ལུང་པ་ན་ང་ཚོར་རང་སྐྱ་ཐུབ་པའི་ཁྲིམས་ལུགས་དབང་འཛིན་ཞིག་མེད་པ་སྙོན་དུ་མེད་ལ། ང་ཚོ་སྡོད་ས་རང་དབང་ལུང་པ་ཡིན་ཡང་། ང་ཚོ་སྡོད་སྟངས་གཞན་དབང་སྟབས་བསྟུན་འོག་ཡིན། མཐར་གཏུགས་ན་ང་ཚོར་མིའི་ལུང་པ་ན་དམངས་གཙོ་མེད་ལ། མིའི་ལུང་པ་ན་རང་དབང་ཡང་མེད།
གཉིས་པ། རེ་བ་བཟང་ས་དང་གྲ་སྒྲིག་སྡུག་ས་ནས་བྱ་དགོས། ང་ཚོས་ད་བར་བྱ་འགུལ་དང་ལས་དོན་གང་ཞིག་སྒྲུབ་ཀྱང་གྲ་སྒྲིག་དང་འཆར་གཞིས་འདང་གི་མེད་པ་གསལ་བོ་ཡིན། ཞན་ཆ་འདིའི་འོག་ནས་སྔོན་མ་ཡང་འཐུས་ཤོར་དང་ནོར་འཁྲུལ་བཟོས་པ་བགྲང་གིས་མི་ལང་། ཐེངས་འདིར་ཡང་བལ་ཡུལ་གཞུང་གི་ཆོག་མཆན་ཡོད་ཟེར་བཞིན་དོན་རྐྱེན་དེ་བྱུང་པ་ནི་ང་ཚོར་འཆར་གཞི་འཐུས་ཚང་མེད་པ་གསལ་སྟོན་བྱས་ཡོད་ཅིང་། ས་གནས་གཉིས་ཀྱི་འོས་སྒམ་སྔ་རྗེས་སུ་ཤོར་བ་དེས་ང་ཚོར་སྡུག་ས་ནས་གྲ་སྒྲིག་མེད་པའི་བདེན་དཔང་བྱས་ཡོད། བསམ་བློ་སྔོན་ལ་བཏང་ན་མཁས་པ་དང་། འགྱོད་པ་རྗེས་ནས་སྐྱེས་ན་བླུན་པོ། ཟེར་བའི་དཔེ་བཞིན། དོན་རྐྱེན་དེ་བྱུང་མ་ཐག་དབུས་འོས་བསྡུ་ལྷན་ཁང་གིས་ས་གནས་ལ་ཛ་དྲག་གི་ལམ་སྟོན་ཞིག་ཕེབས་པ་ནི་ “ཐུགས་གཟབ་བྱོས” ཟེར་བ་འདི་རེད། འོས་བསྡུ་ཆེན་མོ་འདི་གལ་ཆེན་གལ་ཆེན་འགངས་ཆེན་ཡིན་ཚུལ་ཁ་ཐོགས་ཚད་ཚང་མས་བརྗོད་ཀྱང་། སྔར་འོས་བསྡུ་དང་འབྲེལ་བའི་དཀའ་རྙོག་ཕྲད་པ་ཐེངས་གཅིག་གཉིས་མིན།
གསུམ་པ། རྒྱ་སྒོར་གྱིས་འཛམ་གླིང་བསྒུལ་སོང་། ཐེངས་འདིར་བལ་ཡུལ་ནང་སྲིད་ལྷན་ཁང་བརྒྱུད་རྒྱ་ནག་གི་འདྲེ་ལག་བརྐྱངས་པའི་བཤད་སྲོལ་ཡོད་ཅིང་། མཐར་གཏུགས་ན་དེ་ནི་རྒྱ་ནག་གི་རྒྱུ་ཤུགས་ཀྱིས་གངས་ཅན་དཀྱིལ་གཤོངས་ཐེངས་གཅིག་བསྒུལ་སོང་བ་དེ་རེད། དོན་དངོས་ཐོག་ནས་ཀྱང་རྒྱ་ནག་གི་རྒྱུ་ཤུགས་ཀྱིས་བལ་ཡུལ་དང་། ལྷོ་ཨ་ཧྥི་རི་ཀ་ལྟ་བུའི་ཉམས་ཆུང་འཁོས་ཞན་གྱི་རྒྱལ་ཁབ་མང་པོ་ཞིག་སྔ་མོ་ནས་ཧམ་བཟའ་བྱས་ཡོད་ལ། ད་ཆར་རྒྱ་གར་དང་ཨ་རི་སོགས་ཀྱིས་ཀྱང་རྒྱ་སྒོར་སིམ་འཛུལ་གྱི་ཤུགས་རྐྱེན་འགོག་ཐབས་བྲལ་ཡོད། དེར་བརྟེན། ང་ཚོས་ཀྱང་རྒྱ་སྒོར་གྱི་འཇབ་སྟངས་ལ་ངོས་ཟིན་གསལ་བོ་མ་བྱུང་ན། རྒྱ་སྒོར་ངྷ་སའི་ཚོགས་པ་སྒྲིག་འཛུགས་ནང་འཛུལ་སྲིད་ལ། རྒྱ་སྒོར་སྤྱི་འཐུས་གྲོས་ཚོགས་དང་། ཐ་ན་བཀའ་ཤག་ལའང་འཛུལ་མི་སྲིད་པའི་ངེས་པ་མེད། ཉིན་ཤས་གོང་ཨ་རིའི་ནེའུ་ཡོག་དོན་གཅོད་བློ་བཟང་སྙན་གྲགས་མཆོག་གིས་རྒྱ་ནག་གི་ཇུས་གཞི་ཞིག་གསལ་སྟོན་བྱས་པའི་ནང་། “ཏཱ་ལའི་ཉེ་འགྲམ་དུ་ལས་ཀ་བྱེད་མཁན་ཚོའི་འགུལ་སྐྱོད་ལ་མྱུལ་ཞིབ་བྱས་ཏེ་ནུས་པ་རྩ་མེད་བཟོ་རྒྱུ་དང་། ཏཱ་ལའི་རུ་ཚོགས་ལ་མཐོང་ཚུལ་ཡོད་པའི་མི་ཚོར་ལྐོག་ནས་མཐུན་རྐྱེན་གང་ལེགས་སྦྱར་ཏེ་རྒྱབ་འགལ་གྱི་ནུས་པ་ཆེ་རུ་གཏོང་དགོས” ཞེས་བརྗོད་ཡོད་པ་དེ་ནི་རྒྱ་སྒོར་ངྷ་སར་འཇབ་སྟངས་ཤིག་ཆགས་ཡོད།
ངས་པོའི་ལྷ་སྲས་ལགས་ཁྱེད་ཀྱིས་ལྷ་ས་གཡག་མགྲོན་ཁང་གི་སྦྱིན་བདག་གིས་ཕྱི་ལོ་༢༠༠༦ལོར་ཚོགས་པ་ག་གེ་མོ་ཞིག་ལ་གསང་བའི་ཐོབ་ནས་ཞལ་འདེབས་བརྒྱབ་པ་དེ་རྒྱ་ནག་དབུས་གཞུང་གི་ཧ་གོ་ཡོད་ཞེས་བརྗོད་འདུག། དེ་ནི་རྒྱ་ནག་གི་བོད་མི་ནུས་ལྡན་རྣམས་ནུས་མེད་བཟོ་བྱེད་ཀྱི་ཆབ་སྲིད་ཀྱི་ཞྭ་མོ་གཡོག་པ་ཞིག་ལས་ཁུང་ལུང་གང་ཡང་མེད། རྒྱུ་མཚན་ནི་ཁུང་ལུང་དང་དཔང་རྟགས་ཡོད་ན་དྲང་བདེན་ཀྱིས་ལམ་ནས་ཁྲིམས་རྭ་མཚོགས་ནས་རང་དབང་ཐོག་ཁྲིམས་བརྩོད་པ་རང་མོས་ལྟར་རང་ཉིད་ནས་འདེམས་ཆོག་པ་ལས། གོ་མེད་ཚོ་མེད་ངང་ཁྲིམས་ཆད་བཅོད་དོན་གང་ཡང་མེད། དེས་ན་ཁྱེད་ཀྱིས་རྒྱ་གཞུང་གི་བཤད་པ་དེ་བདེན་དཔང་བྱེད་པའང་ཡང་ན་ངོས་ལེན་བྱེད་ཀྱི་ཡོད་དམ། དེ་ལྟ་མིན་ན་ཚིགས་དེ་དག་བེད་སྤྱོད་གཏང་ཐད་བཟབ་དགོས་པ་གལ་ཆེ་མཐོང།
རྩོམ་སྒྲིག་པ་ལགས། ཇི་འདྲའི་རྣོ་ངར་ལྡན་ཞིང་། གནད་དུ་འཁེལ་བའི་དཔྱད་བརྗོད་ཅིག་བྱས་འདུག ཁྱེད་ཀྱི་དཔྱད་སྟོབས་ཀྱི་རིག་པ་འདིས་བསམ་བློ་མེད་པའི་སྒང་ལ་ཤེས་ཡོན་ཡང་མེད་པའི་བཙན་བྱོལ་བོད་མིའི་སྤྱི་ཚོགས་འདུ་སྒུལ་སོང་།
རྩོམ་སྒྲིག་པས་གནས་ལུགས་ཅན་ཞིག་བཤད་འདུག
རྒྱ་སྒོར་ངྷ་སའི་ཚོགས་པ་སྒྲིག་འཛུགས་ནང་འཛུལ་ཚར་ཡོད་དཔེར་ན་ལྷ་ས་གཡག་མགྲོན་ཁང་གི་སྦྱིན་བདག་གིས་ཕྱི་ལོ་༢༠༠༦ལོར་ཚོགས་པ་ག་གེ་མོ་ཞིག་ལ་གསང་བའི་ཐོབ་ནས་ཞལ་འདེབས་བརྒྱབ་པ་དེ་དགྱ་ནག་དབུས་གཞུང་གི་ཧ་གོ་ཡོད།
“ཏཱ་ལའི་ཉེ་འགྲམ་དུ་ལས་ཀ་བྱེད་མཁན་ཚོའི་འགུལ་སྐྱོད་ལ་མྱུལ་ཞིབ་བྱས་ཏེ་ནུས་པ་རྩ་མེད་བཟོ་རྒྱུ་དང་། ཏཱ་ལའི་རུ་ཚོགས་ལ་མཐོང་ཚུལ་ཡོད་པའི་མི་ཚོར་ལྐོག་ནས་མཐུན་རྐྱེན་གང་ལེགས་སྦྱར་ཏེ་རྒྱབ་འགལ་གྱི་ནུས་པ་ཆེ་རུ་གཏོང་དགོས”
ང་ཚོས་ངེས་པར་དུ་གཟབ་གཟབ་བྱེད་དགོས།
བདེན་དུ་ཆིག་ཀྱང་། བདེན་དུ་ཆཱུག་ཀྱང་།
གངས་ཅན་དཀྱིལ་གཤོངས། གངས་ཅན་སྐྱིད་གཤོངས།
གསལ་འདེབས་ཚིག་གསུམ་ལ་བཏགས་པའི་མཆན།
ྲརྒྱ་སྒོར་གྱི་འཇབ་རྒོལ་དེ་འཇིགས་སུ་རུང་བ་ཞིག་རེད་ལ། དེ་མིན་གྱི་དངུལ་སྒོར་ཡང་འཇིགས་སུ་རུང་བ་ཞིག་ཅིས་མ་ཡིན། ད་བར་སྔ་ལྟས་ཕྱི་བལྟས་ཤིག་བྱས་ན། ང་ཚོའི་མཁས་པ་དང་། ཤེས་ཡོན་ཅན། དགེ་རྒན། ལས་བྱེད། བཀའ་ཟུར་དང་། དྲུང་ཟུར་སོགས་མདོར་ན་ཉམས་མྱོང་ཅན་གྱི་ལས་སྣེ་བ་མང་པོ་ཞིག་དངུལ་སྒོར་གྱི་འཇབ་རྒོལ་ལ་བརྟེན་ནས་རང་ཉིད་ཀྱིས་སྤྱི་ཚོགས་འདིར་འདོན་ཐུབ་པ་དང་འདོན་ནུས་པའི་ནུས་པ་མང་པོ་ཞིག་དངུལ་སྒོར་གྱི་འཇབ་རྒོལ་དེས་བཅོམ་ཟིན་འདུག ད་དུང་ང་དང་རྩོམ་སྒྲིག་པ་ཁྱེད་ལྟ་བུའང་རྒྱ་སྒོར་གྱི་འཇབ་རྒོལ་འོག་ཏུ་ཤོར་མི་སྲིད་པ་བདེན་དུ་ཆཱུག་ཀྱང་། དངུལ་སྒོར་གཞན་གྱི་འཇབ་རྒོལ་འོག་མི་ཚུད་པའི་བདེན་དཔང་སུས་ཀྱང་བྱེད་མི་ཐུབ་ལ། དེ་ལྟར་མི་ཡོང་བའི་དམ་བཅའ་དང་ཁས་ལེན་སུ་ཞིག་གིས་བྱེད་ནུས་སམ། དེ་ནི་སྤམ་མདོག་སྒམ་མདོག་ངང་གནས་པའི་ལས་སྣེ་བ་མང་པོ་ཞིག་གི་ཐུགས་ཁར་བདེན་པའི་མདའ་མོ་འདི་ཕོག་ན་བཟོད་པར་འཚལ། འདི་ནི་རང་ཉིད་ཀྱིས་རང་ཉིད་ལ་འཕངས་པའི་མདའ་མོ་ཞིག་ཡིན་ནའང་། ང་ཡང་སྤྱི་ཚོགས་འདིའི་ནང་གནས་པའི་མི་སྣ་ཞིག་ཡིན་སྟབས། སྤྱི་ཚོགས་འདིར་འཕངས་པའི་ཚིག་མདའ་རྣོན་པོ་ཞིག་ཀྱང་ཡིན་སྲིད། འདི་ནི་དྲ་ཐོག་ནས་ཤར་བའི་ཐལ་བའི་སེམས་ཀྱི་ཚོར་འདུ་ངོ་མ་ཞིག་རེད་ལ། སྤྱི་ཚོགས་འདིའི་དོན་དངོས་ཀྱི་སྣང་ཚུལ་རྗེན་པ་ཞིག་ཀྱང་ཅི་ལ་མིན། །