རྒྱལ་ཁབ་ ༢༢ ཙམ་སྦག་སྦག་གིས་བསྐོར་ཏེ་ངྷ་སར་འབྱོར།
ང་ཚོའི་མི་མང་པོ་ཞིག་དཔལ་འབྱོར་ཁོ་ནའི་ཕྱོགས་སུ་བརྒྱུགས་ཏེ་ལས་ཀ་བྱེད་ཀྱིན་ཡོད་པ་རེད། རྒྱལ་ཁབ་མེད་ཚེ་དཔལ་འབྱོར་ཇི་འདྲ་ཡོད་ཀྱང་ཧ་ལས་དགོས་པ་གང་ཡང་ཡོད་པ་མ་རེད། ད་ལྟ་ང་ཚོ་བཙན་བྱོལ་མིའི་ལུང་པར་བསྡད་ཡོད། ས་འདི་ནས་ང་ཚོ་ཡུན་རིང་འདུག་ཐབས་ཡོད་པ་མ་རེད། མི་གཞན་གྱིས་ང་ཚོའི་རྩ་དོན་འཐབ་རྩོད་བྱས་ཏེ་རྒྱལ་ཁབ་ང་ཚོར་སྤྲོད་སྲིད་ཀྱི་མ་རེད་ཟེར།
འཛམ་གླིང་རྒྱལ་ཁབ་ ༢༢ ནང་སྦག་སྦག་བཞོན་ཏེ་བོད་དོན་དྲིལ་བསྒྲགས་སྐོར་སྐྱོད་པ་བོད་རིགས་ན་གཞོན་ལྷག་པ་ཚེ་རིང་ལག ཟླ་ ༡༠ ཕྱི་ཚེས་ ༢༨ ཉིན་བཞུགས་སྒར་ཁུལ་གྱི་མི་མང་སྟོང་ཕྲག་མང་པོའི་དགའ་འབོད་དང་ཕེབས་བསུའི་ཁྲོད་བཞུགས་སྒར་ངྷ་རམ་ས་ལར་འབྱོར་ཡོད། ཉིན་རྒྱབ་ཆུ་ཚོད་ ༢ ཙམ་ལ་ཀཱང་ར་རྫོང་དུ་སླེབས་སྐབས་བོད་ཀྱི་གཞོན་ནུ་ལྷན་ཚོགས་ཀྱི་དབུས་ས་གཉིས་དང་བཞུགས་སྒར་ཁུལ་གྱི་གཞོན་སྐྱེས་མང་པོ་ཞིག་སྔོན་བསུར་ཕྱིན་ཏེ་ཁ་བཏགས་སྒྲོན་འབུལ་ཞུས་ཡོད་ཅིང་། དེ་ནས་ས་རཱ་མཐོ་སློབ་དང་ངྷ་སྟེང་བོད་ཁྱིམ་སློབ་གྲྭ་བཅས་བརྒྱུད་དེ། ཕྱི་དྲོའི་ཆུ་ཚོད་ ༥ དང་ཕྱེད་ཀ་ཙམ་ལ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་མིན་པའི་ཚོགས་པ་ཁག་གི་ཕེབས་བསུའི་མཛད་སྒོ་ཐོག་འབྱོར་ཡོད།
སྐབས་དེར་ལྷག་པ་ཚེ་རིང་ལགས་ཀྱིས་རང་ཉིད་ངོ་སྤྲོད་དང་སྦྲགས་འཛམ་གླིང་སྐོར་སྐྱོད་ཀྱི་ལས་འགུལ་དེའི་དམིགས་ཡུལ་སྐོར་བརྗོད་དོན། ང་རང་ཆུང་དུས་ནས་བུ་གསོ་ཁང་གིས་གསོ་སྐྱོང་འོག་ཤེས་ཡོན་སློབ་སྦྱོང་གི་གོ་སྐབས་ཐོབ་མྱོང་མཁན་ཞིག་ཡིན་ལ། ད་ལྟ་རང་ཉིད་ཀྱི་རྐང་པའི་སྒང་ལངས་ཐུབ་པ་དེ་ཡང་བུ་གསོ་ཁང་གི་བཀའ་དྲིན་ཡིན། ཆུང་དུས་བུ་གསོ་ཁང་དུ་འགྲོ་སྐབས་ངྷ་ས་ནས་ཕྱི་གླིང་བ་སྦག་སྦག་སྐོར་མཁན་མང་པོ་མཐོང་བྱུང་ལ། སྐབས་དེར་མ་འོངས་པར་ང་ཡང་སྤྲོད་འཆམ་ཙམ་མིན་པར་བོད་དོན་དྲིལ་བསྒྲགས་ཀྱི་ཆེད་དུ་འཛམ་གླིང་གང་སར་འགྲོ་ཐུབ་ན་བསམ་པའི་འཆར་སྣང་སྐྱེས་མྱོང་། ཕྱིས་སུ་སློབ་གྲྭ་ཐོན་པ་དང་བལ་ཡུལ་ནང་ལོ་ཁ་ཤས་བསྡད་རྗེས་ཨ་རིའི་གྲོང་ཁྱེར་ནེའུ་ཡོག་ཏུ་ཕྱིན་ཏེ། ༡༩༩༦ ལོར་ཆེས་ཐོག་མར་སྐུའི་གཅེན་པོ་སྟག་འཚེར་རིན་པོ་ཆེ་མཆོག་གིས་གོ་སྒྲིག་གནང་བའི་ཞི་བའི་གོམ་བགྲོད་ཐེངས་དང་པོའི་ནང་མཉམ་ཞུགས་བྱས་ཏེ། ཟླ་གསུམ་རིང་ཨ་རིའི་ཝ་ཤིན་ཊོན་ཌེ་སེ་ནས་ནེའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་བར་ཞི་བའི་གོམ་བགྲོད་དང་། ༡༩༩༨ ལོར་གོམ་བགྲོད་ཐེངས་གཉིས་པའི་ནང་མཉམ་ཞུགས་གནང་སྟེ་ཨ་རིའི་ཕོར་ལན་ཌི་ཨོར་གྷན་ནས་ཁེ་ན་ཌའི་གྲོང་ཁྱེར་ཝན་ཁེལ་ཝོར་བར་ཕྱིན་པ་ཡིན། སྐབས་དེར་ཨ་རི་དང་ཁེ་ན་ཌའི་མང་ཚོགས་ཀྱིས་བོད་དོན་སྐོར་ཤེས་རྟོགས་ཐུབ་ཀྱི་མི་འདུག ང་ཚོས་བོད་རང་བཙན་ཞེས་པའི་དབྱིན་ཡིག་གི་འཕྲེད་དར་འཕྱར་འགྲོ་དུས་ཅ་ལག་སྤྲོད་མཁན་ཡིན་པར་བསམ་ཏེ་ལེན་དུ་ཡོང་མཁན་དེ་འདྲ་ཡང་བྱུང་སོང་། གོམ་བགྲོད་དེ་དག་ལས་ང་ལ་ཉམས་མྱོང་མི་དམན་པ་ཞིག་ཐོབ་སོང་། ཞེས་ངོ་སྤྲོད་གནང་བྱུང་།
ལྷག་པ་ལགས་ཀྱིས་ཐེངས་འདིའི་ལས་འགུལ་གྱི་ཐོག་མའི་མགོ་འཛུགས་སྐོར་བརྗོད་དོན། བོད་ནང་གི་བོད་མི་ཚོར་རྒྱ་ནག་གིས་སྡུག་སྦྱོང་མནར་གཅོད་འོག་དཀའ་ངལ་འཕྲད་ཀྱིན་ཡོད་པ་དང་། ཁོང་ཚོས་ང་ཚོ་རྒྱ་གར་དང་ཕྱི་རྒྱལ་དུ་ཡོད་པའི་བོད་པ་ཚོར་རེ་བ་བཅངས་ཡོད་སྟབས། ༢༠༠༡ ལོར་ངས་བཟའ་ཟླ་དང་ལྷན་དུ་ང་རང་གིས་འཛམ་གླིང་ནང་སྦག་སྦག་སྐོར་བསྐྱོད་ཀྱི་ལས་འགུལ་ཞིག་སྤེལ་རྒྱུའི་སྐོར་ལ་གྲོས་བསྡུར་ཙམ་བྱས་པ་ཡིན། ༢༠༠༨ ལོའི་བོད་ནང་གི་བོད་མི་ཚོས་རྒྱ་ནག་གཞུང་གི་སྲིད་བྱུས་ལ་མི་འདོད་པའི་རྣམ་འགྱུར་བསྟན་ཏེ་ངོ་རྒོལ་སྐད་འབོད་བྱས་པ་རེད། སྐབས་དེར་ང་ནེའུ་ཡོག་ཏུ་ཡོད་ལ། ནེའུ་ཡོག་གི་གནམ་གཤིས་སོགས་ཧ་ཅང་སྐྱིད་པོ་འདུག གནམ་གཤིས་གྲང་དུས་ཚ་གློག་ཚ་དུས་གྲང་རླུང་གཏོང་རྒྱུ་སོགས་རང་ཉིད་ལ་དགོས་ཞིང་མཁོ་བའི་མཐུན་རྐྱེན་ཡང་ཧ་ཅང་འཛོམས་པོ་ཡོད་ཀྱང་། བོད་ནང་གི་བོད་མི་ཚོའི་གནས་སྟངས་དྲན་ཡོང་སྐབས་སེམས་པ་སྐྱིད་པོ་མི་འདུག རང་དང་ཤ་ཁྲག་གཅིག་པའི་སྤུན་ཟླ་དག་རང་ཡུལ་ན་གཞན་གྱིས་དམར་གསོད་གཏོང་གིན་ཡོད་ཀྱང་། རང་གིས་གཞན་ཡུལ་ནས་སྐྱིད་པོ་བཏང་བསྡད་ན་འགྲིག་གི་མི་འདུག་སྙམ་སྟེ། ད་ལོའི་ཕྱི་ཟླ་ ༣ པའི་ཚེས་ ༡༠ ཉིན་མགོ་འཛུགས་ཀྱིས་འཛམ་གླིང་རྒྱལ་ཁབ་ ༢༢ ནང་སྦག་སྦག་སྐོར་སྐྱོད་ཀྱིས་བོད་དོན་དྲིལ་བསྒྲགས་ཀྱི་ལས་འགུལ་འདི་སྤེལ་བ་ཡིན། འདི་ལོའི་ཕྱི་ཟླ་ ༣ པའི་ཚེས་མགོ་ནས་ཨ་རི་དང་ཁེ་ན་ཌའི་མངའ་སྡེ་ཡོངས་ལ་ཟླ་གཉིས་རིང་སྐོར་བསྐྱོད་བྱས་པ་ཡིན་ལ། ཕྱིས་སུ་ཡུ་རོབ་ཀྱི་རྒྱལ་ཁབ་ཡོངས་དང་ཨོ་སི་ཁྲོ་རི་ཡ་བཅས་སུ་སྐོར་བསྐྱོད་དང་འབྲེལ་རྒྱལ་ཁབ་དེ་དག་གི་ཚགས་པ་དང་རླུང་འཕྲིན། དེ་བཞིན་ཚོགས་པ་ཁག་དང་མི་སྒེར་སོགས་ལ་ང་རང་གི་ངོས་ནས་གང་ཐུབ་ཀྱིས་བོད་ནང་གི་གནས་སྟངས་དང་བོད་དོན་དྲིལ་བསྒྲགས་བྱས་པ་ཡིན། དེ་རིང་ང་བཞུགས་སྒར་ངྷ་རམ་ས་ལར་འབྱོར་ཏེ་ཐེངས་འདིའི་ངའི་སྦག་སྦག་སྐོར་སྐྱོད་ཀྱི་ལས་འགུལ་མཇུག་སྒྲིལ་བ་ཡིན། ཞེས་ལས་འགུལ་གྱི་བརྒྱུད་རིམ་དང་དམིགས་ཡུལ་ངོ་སྤྲོད་གནང་བྱུང་།
ཡང་ཁོང་གིས། བོད་ནང་གི་བོད་མི་ཚོ་དང་བསྡུར་ན་ང་ཚོ་རང་དབང་ལུང་པའི་བོད་མི་ཚོར་ཕྱོགས་ཡོངས་ནས་རང་དབང་ཡོད། བོད་ནང་གི་བོད་མི་ཚོས་རྒྱ་གར་དང་ཕྱི་རྒྱལ་ཡུལ་གྲུ་ཁག་ནང་ཡོད་པའི་བོད་མི་ཚོར་རེ་བ་བཅིངས་ཡོད། ཁོང་ཚོར་སེམས་ཤུགས་དང་སྤོབས་པ་ཆེན་པོ་ཡོད་སྐབས། ང་ཚོ་སེམས་ཤུགས་ཆགས་ཏེ་སྡོད་པ་དང་། ལས་འགུལ་གྱི་ནུས་པ་ཆུང་དུ་ཕྱིན་པ་ཡིན་ན་ང་ཚོར་བཅིངས་བའི་ཡིད་ཆེས་དང་རེ་བ་བརླག་པའི་ཉེན་ཁ་འདུག ང་ཚོའི་མི་མང་པོ་ཞིག་དཔལ་འབྱོར་ཁོ་ནའི་ཕྱོགས་སུ་བརྒྱུགས་ཏེ་ལས་ཀ་བྱེད་ཀྱིན་ཡོད་པ་རེད། རྒྱལ་ཁབ་མེད་ཚེ་དཔལ་འབྱོར་ཇི་འདྲ་ཡོད་ཀྱང་ཧ་ལས་དགོས་པ་གང་ཡང་ཡོད་པ་མ་རེད། ད་ལྟ་ང་ཚོ་བཙན་བྱོལ་མིའི་ལུང་པར་བསྡད་ཡོད། ས་འདི་ནས་ང་ཚོ་ཡུན་རིང་འདུག་ཐབས་ཡོད་པ་མ་རེད། མི་གཞན་གྱིས་ང་ཚོའི་རྩ་དོན་འཐབ་རྩོད་བྱས་ཏེ་རྒྱལ་ཁབ་ང་ཚོར་སྤྲོད་སྲིད་ཀྱི་མ་རེད། དེར་བརྟེན། མ་འོངས་པར་ང་ཚོ་བོད་པ་རྣམས་རྡོག་རྩ་གཅིག་སྒྲིལ་གྱིས་རྒན་རབས་པས་གཞོན་པ་རྣམས་ལ་འདས་པའི་ལོ་རྒྱུས་ངོ་སྤྲོད་དང་། གཞོན་པ་རྣམས་ཀྱིས་རང་ངོས་འགན་བླངས་ཏེ། བོད་དོན་དང་འབྲེལ་བའི་ལས་འགུལ་གཞི་རྒྱ་ཆེ་རུ་གཏོང་དགོས་པ་རེད། ཅེས་རེ་བ་བཏོན་བྱུང་།
མཇུག་མཐར། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་འགྲུབ་ལྷ་དར་ལགས་ཀྱིས། དོ་ནུབ་ང་ཚོ་འདིར་འཛོམས་དོན་ལྷག་པ་ཚེ་རིང་སྒེར་ལ་ཐུག་འཕྲད་དང་རྒྱབ་སྐྱོར་གནང་རྒྱུའི་ཆེད་དུ་མིན་པར། ཁོང་གི་བོད་རྒྱལ་ཁབ་དང་མི་རིགས་ཀྱི་རྩ་དོན་ཆེད་དཀའ་ལས་རྒྱག་རྒྱུའི་སྙིང་སྟོབས་དང་ཆོད་སེམས་ལ་གུས་བཀུར་དང་ཡི་རངས་ཞུ་ཆེད་འཛོམས་པ་རེད། བོད་རྒྱལ་ཁབ་འདི་ཉིད་ ༡༩༤༩ ལོར་འཛམ་གླིང་ཐོག་མི་འབོར་མང་ཤོས་ཡིན་པའི་བཙན་རྒྱལ་རིང་ལུགས་ཀྱི་རྒྱལ་ཁབ་ཅིག་གི་འོག་ཏུ་བཅུག་ཡོད་ཀྱང་། ང་ཚོར་མི་འབོར་ས་ཡ་ ༦ ཙམ་ལས་མེད་ཀྱང་བོད་པ་མི་ངོ་རེ་ནས་འཐབ་རྩོད་ལ་འགན་བླངས་སྟབས། ད་བར་མི་ལོ་ ༦༡ ཕྱིན་ཀྱང་བོད་ཀྱི་འཐབ་རྩོད་གསོན་པོར་གནས་ཡོད་ལ། འཐབ་རྩོད་དེ་གསོན་པར་གནས་པ་ཙམ་དུ་མ་ཟད། ལྷག་པ་ཚེ་རིང་ལགས་ཀྱི་མི་གཅིག་གི་སྙིང་སྟོབས་དེས་རྒྱ་གཞུང་ལ་བོད་ཀྱི་འཐབ་རྩོད་ཤི་མེད་པ་དང་། གཞོན་སྐྱེས་ཚོས་མི་རྒྱུ་གཉིས་ཐོག་ནས་རང་གི་ཡོད་ཚད་བློས་གཏོང་བྱ་ཐུབ་པའི་བརྡ་ལན་སྤྲད་ཡོད། ཅེས་བརྗོད་བྱུང་།
དོན་འགྲུབ་ལྷ་དར་གྱིས་མུ་མཐུད་དུ་བརྗོད་དོན། བཙན་བྱོལ་བོད་མི་མང་པོ་ཞིག་གིས་ཨ་རིའི་དངུལ་ལོའི་ཆེད་དུ་དུས་ཚོད་སྐར་མ་རེ་རེ་རྩིས་རྒྱག་གི་ཡོད་ཀྱང་། ལྷག་པ་ཚེ་རིང་གིས་དུས་ཚོད་དང་ཁོར་ཡུག རང་གི་ཁྱིམ་ཚང་བཅས་བློས་བཏང་སྟེ། ཟླ་དང་ཟླ་བསྟུད་དེ་དཀའ་ལས་བརྒྱབ་པ་རེད། རྒྱལ་ཁབ་མེད་པའི་ཆབ་སྲིད་སྐྱབས་བཅོལ་བ་ཞིག་དང་ཕ་མ་མེད་པའི་དྭ་ཕྲུག་ཅིག་ཡིན་པའི་ཚོར་བའི་ཐོག་ནས། རྒྱ་ནག་གིས་ང་ཚོའི་ལུང་པ་བཙན་བཟུང་བྱས་པའི་སེམས་ཚོར་འོག ཁོང་གིས་རླབས་ཆེ་བའི་ལས་འགུལ་འདི་འདྲ་ཞིག་མགོ་བརྩམས་པ་རེད། བཙན་བྱོལ་སྤྱི་ཚོགས་ཀྱི་གཞོན་སྐྱེས་ཞིག་གི་བརྡ་ལན་གྱི་སྙིང་སྟོབས་དེ་ནི། གཞིས་ལུས་མི་དམངས་ཚོའི་ཡར་ལངས་ཀྱི་སྙིང་སྟོབས་ལས་བྱུང་བ་ཞིག་རེད། གོང་དུ་ལྷག་པ་ཚེ་རིང་ལགས་ཀྱིས་ཁོང་གི་ཁྱིམ་དུ་ལོ་ ༤ ཅན་གྱི་བྱིས་པ་ཆུང་ཆུང་ཞིག་གིས་པ་ལགས་ཕྱིར་ལོག་རྒྱུར་སྒུག་བསྡད་ཡོད་ཅེས་གསུངས་སོང་། ཁོང་གི་སྐད་ཆ་འདི་འདྲ་འདྲ་བར། བོད་ནང་དུ་ཕ་མ་མང་པོ་ཞིག་རྒྱའི་བཙོན་དུ་ལྷག་པ་དང་། བོད་གཞིས་དང་བྱེས་སུ་གྱར་བ་སོགས་ཀྱིས་ཕ་མ་དང་བཟའ་ཚང་མང་པོ་ཡ་བྲལ་དུ་སོང་ཡོད། འདི་ལ་བཙན་བྱོལ་སྤྱི་ཚོགས་ཀྱི་གཞོན་སྐྱེས་ཚོར་ཚོར་བ་རྣོན་པོ་ཞིག་དགོས་ཀྱི་འདུག ཅེས་བརྗོད་བྱུང་།
གསར་འགོད་པ། དོན་གོ་དང་དཔལ་ལྡན།
དགོན་
རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཡུལ་མི་རྣམས་ལ་ཆོས་དད་རང་དབང་གཏན་ནས་མེད་པ་དང་། རྒྱ་ནག་ནང་ཁྲིམས་ཀྱི་དབང་སྒྱུར་མེད་པར་གང་ཟག་གི་དབང་སྒྱུར་ཡིན་པའི་གནད་དོན་གསལ་སྟོན་བྱས་འདུག་ཟེར།
ཕྱི་ཟླ་ ༡༠ ཚེས་ ༢༧ ཉིན་གྱི་སྔ་དྲོ་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་གསར་འགོད་གསལ་བསྒྲགས་ཤིག་བསྐྱངས་ཡོད། དེ་ནི་འདི་ལོའི་ཕྱི་ཟླ་ ༩ པའི་ཚེས་ ༣༠ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆོས་ལུགས་ལས་དོན་སྡེ་ཁག་གིས་༼ བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས ༽ཞེས་པའི་སྐོར་ཡིག་ཆ་ཞིག་བཀྲམས་ཡོད་ལ། ཕྱི་ཟླ་ ༡༡ ཚེས་ ༡ ཉིན་ནས་དངོས་སུ་ལག་བསྟར་བྱ་རྒྱུ་ཡིན་ཚུལ་བསྒྲགས་ཡོད་སྟབས། དེ་ལ་བོད་བརྒྱུད་ནང་བསྟན་གྱི་བླ་ཆེན་ཁག་དང་དགོན་སྡེ་ཁག་གི་མཁན་སློབ། འདུས་མང་། མང་ཚོགས་བཅས་ནས་ངོས་ལེན་རྩ་བ་ནས་མེད་པར་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད་པ་ཞིག་ཡིན་འདུག
སྐབས་དེར་ཆོས་རིག་བཀའ་བློན་མཆོག་གིས་གསལ་བསྒྲགས་སྒྲོག་སྦྱོང་གནང་དོན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སུ་”ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་ཆོས་དད་ཀྱི་རང་དབང་ཡོད། རྒྱལ་ཁབ་ཀྱི་ལས་ཁུངས་དང་། སྤྱི་ཚོགས་ཀྱི་ཚོགས་པ། མི་སྒེར་བཅས་གང་ཡིན་རུང་བཙན་ཤེད་ཀྱིས་སྤྱི་དམངས་ལ་ཆོས་ལ་དད་མོས་བྱེད་དུ་འཇུག་པའམ་ཆོས་ལ་དད་མོས་བྱེད་དུ་མི་འཇུག་པ་བྱས་མི་ཆོག ཆོས་ལ་དད་པ་ཡོད་པའི་སྤྱི་དམངས་དང་ཆོས་ལ་དད་པ་མེད་པའི་སྤྱི་དམངས་སུ་ལའང་མཐོང་ཆུང་བྱས་མི་ཆོག རྒྱལ་ཁབ་ཀྱི་ཆོས་ལུགས་ཀྱི་རྒྱུན་ལྡན་བྱེད་སྒོ་སྲུང་སྐྱོང་བྱེད་རྒྱུ། མི་སུ་ཡིན་རུང་ཆོས་ལུགས་ལ་བརྟེན་ནས་སྤྱི་ཚོགས་ཀྱི་སྒྲིག་ལམ་གཏོར་བཤིག་གཏོང་བ་དང་། སྤྱི་དམངས་ཀྱི་ལུས་ཁམས་བདེ་ཐང་ལ་གནོད་འཚེ་གཏོང་བ། རྒྱལ་ཁབ་ཀྱི་སློབ་གསོའི་ལམ་ལུགས་ལ་འགོག་རྐྱེན་བཟོ་བ་བཅས་ཀྱི་བྱ་བ་བྱེད་མི་ཆོག ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་ལས་དོན་ཐད་ཕྱི་རྒྱལ་གྱི་སྟོབས་ཤུགས་ཀྱི་བཀོད་པར་ཉན་མི་དགོས།” ཞེས་ཁ་གསལ་བསྟན་ཡང་། ཉེ་ཆར་ཟླ་ ༩ ཚེས་ ༣༠ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆོས་དོན་ལས་ཁུངས་ཀྱིས་བཀའ་ཡིག་ཨང་ ༨ པར་འབོད་པའི་ “བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས།” ཞེས་པའི་ཡིག་ཆ་ཞིག་ཁྱབ་སྤེལ་བྱས་ཏེ། འདི་ལོ་ཕྱི་ཟླ་ ༡༡ ཚེས་ ༡ ནས་ལག་བསྟར་བྱེད་རྒྱུ་ཡིན་ཚུལ་འཁོད་འདུག དེ་ནི་གོང་དུ་དྲངས་པའི་རྩ་ཁྲིམས་ཀྱི་ཆ་རྐྱེན་དང་རྩ་འགལ་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཡུལ་མི་རྣམས་ལ་ཆོས་དད་རང་དབང་གཏན་ནས་མེད་པ་དང་། རྒྱ་ནག་ནང་ཁྲིམས་ཀྱི་དབང་སྒྱུར་མེད་པར་གང་ཟག་གི་དབང་སྒྱུར་ཡིན་པའི་གནད་དོན་གསལ་སྟོན་བྱས་འདུག ཅེས་དང་།
ཁོང་གིས་མུ་མཐུད་དུ་སྒྲོག་སྦྱོང་གནང་དོན། བོད་བརྒྱུད་ནང་བསྟན་སྤྱི་དང་བྱེ་བྲག་ཆོས་བརྒྱུད་སོ་སོའི་བླ་ན་མེད་པའི་དབུ་ཁྲིད་བླ་ཆེན་དང་། མཁས་དབང་རྣམ་པ་བོད་ཀྱི་ཕྱི་ལ་བཙན་བྱོལ་དུ་བཞུགས་བཞིན་པ་ཡིན་ཞིང་། ཆོས་ཕྱོགས་ཀྱི་ལམ་སྟོན་དང་། དཔེ་ཁྲིད། དབང་ལུང་མན་ངག་གི་བརྒྱུད་པ་སོགས་བཙན་བྱོལ་དུ་བོད་མིའི་ཁྲོད་དུ་ཡོད་པ་རྣམས་”བྱེད་ཐབས་”འདིའི་ལྐོག་གཡོའི་འོག་བོད་དུ་བཀག་སྡོམ་བྱ་རྒྱུར་དམིགས་པ་ཞིག་དང་། དགོན་སྡེ་སོ་སོའི་ཆོས་ཕྱོགས་ཀྱི་གལ་ཆེའི་བྱེད་སྒོ་ཁག་བྱེད་མི་ཐུབ་པའམ། བྱེད་ཐབས་ཧ་ཅང་དཀའ་བར་བཟོས་ཏེ་བོད་བརྒྱུད་ནང་བསྟན་གྱི་སྲོལ་རྒྱུན་དང་སློབ་གསོ་རྩ་མེད་གཏོང་རྒྱུ་མ་ཟད། བོད་བརྒྱུད་ནང་ཆོས་ཀྱི་སྙིང་དོན་བླ་སློབ་ཀྱི་འབྲེལ་བ་ཡང་བཅད་དེ། དགོན་སྡེ་ཁག་དང་ཆོས་རྒྱུན་རྩ་མེད་བཟོ་རྒྱུའི་ཐབས་ལམ་ཉག་ཅིག་ཡིན་འདུག་ན།“བྱེད་ཐབས་” འདི་ལ་གཞིས་བྱེས་བོད་བརྒྱུད་ནང་བསྟན་གྱི་བསྟན་བདག་བླ་ཆེན་ཁག་དང་། དགོན་སྡེ་ཁག་གི་མཁན་སློབ། འདུས་མང་། མང་ཚོགས་བཅས་ནས་ངོས་ལེན་རྩ་བ་ནས་མེད་པ་མ་ཟད། མཐའ་གཅིག་ཏུ་ངོ་རྒོལ་བྱེད་ཀྱིན་ཡོད། ཅེས་བསྒྲགས་སོང་།
རྒྱ་གཞུང་གིས་ཁྱབ་བསྒྲགས་བྱས་པའི་ ༼ བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས ༽ ཞེས་པའི་ཡིག་ཆ་དེར། བོད་ནང་གི་དགོན་སྡེ་ཁག་གི་ལས་དོན་ལ་ཕྱི་རོལ་གྱི་སྒྲིག་འཛུགས་དང་། མི་སྒེར་སོགས་ཀྱི་ཐེ་གཏོགས་དང་བཀོལ་སྤྱོད་མི་ཆོག་པ་མ་ཟད། རྩ་འཛུགས་དང་མི་སྒེར་སུ་འདྲ་ཞིག་ཡིན་རུང་བོད་བརྒྱུད་ནང་བསྟན་ལ་བརྟེན་ཏེ། སྤྱི་ཚོགས་ཀྱི་སྒྲིག་ལམ་ལ་གཏོར་བརླག་དང་། མང་ཚོགས་ཀྱི་བདེ་ཐང་ལ་གནོད་འཚེ་བྱེད་མི་ཆོག་ཅིང་། རྒྱལ་ཁབ་ཀྱི་སློབ་གསོའི་ལམ་ལུགས་ལ་བར་ཆད་དང་། རྒྱལ་ཁབ་ཀྱི་ཁེ་ཕན་དང་སྤྱི་ཚོགས་ཀྱི་ཁེ་ཕན། སྤྱི་དམངས་ཀྱི་ཁྲིམས་མཐུན་ཁེ་དབང་སོགས་ལ་གནོད་པའི་ལས་འགུལ་སྤེལ་མི་ཆོག ཅེས་དང་།
དེ་སྔ་བོད་པའི་དགོན་སྡེ་མང་དག་ཅིག་གི་སྒྲིལ་སྲོལ་འཐུས་ཚང་མིན་པ་དང་། གང་འདོད་དུ་དགོན་པ་རྒྱ་བསྐྱེད་པ། དགོན་པའི་དགེ་རྒན་དང་ལས་སྣེ་ཚོར་རྒྱལ་གཅེས་ཁྲིམས་སྲུང་གི་འདུ་ཤེས་ཆུང་སྟབས། ཕྱི་ནང་གི་ཁ་བྲལ་སྟོབས་ཤུགས་ནང་དུ་འཛུལ་ཏེ། མི་རིགས་མཐུན་སྒྲིལ་དང་མེས་རྒྱལ་གཅིག་རྒྱུར་ལ་གཏོར་བརླག་ཐེབས་བཞིན་ཡོད་པ་དང་། ཏཱ་ལའི་རུ་ཚོགས་ཀྱིས་བོད་ཁུལ་དུ་ཟིང་ཆ་སློང་བ་དང་། ཁ་བྲལ་དུ་གཏོང་བའི་ངན་ཇུས་སྤེལ་བར་གོ་སྐབས་སྐྲུན་བཞིན་ཡོད་སྐོར་སོགས་བཀོད་འདུག
གསར་འགོད་པ། དཔལ་ལྡན།
སློབ་ཕྲུག་ཚོར་ཤེས་ཡོན་བསླབ་རྒྱུའི་ཚབ་ལ་ཚོང་སློབ་ཀྱི་ཡོད།
ཕྲུ་གུའི་ཀུན་སྤྱོད་དང་སྦྱངས་འབྲས་ཐད་ནས་ཕྲུ་གུ་གཞན་དང་འགྲན་བསྡུར་ནམ་ཡང་མ་གནང་རོགས། དཔེར་ན། ཁྱིམ་མཚེ་ཚང་གི་བུ་དེ་ཡག་པོ་ཡོད་ལུགས་དང་དེའི་སྦྱངས་འབྲས་ལེགས་ཚུལ། ཁྱོད་རང་ག་རེ་བྱས་པ་རེད་སོགས་ལབ་སྟེ་ཁ་རྡོང་བཏང་ན། ཕྲུ་གུའི་ཀུན་སྤྱོད་དང་སློབ་སྦྱོང་ཡག་ཏུ་འགྲོ་རྒྱུའི་ཚབ་ལ། ཕྲུ་གུའི་སེམས་ལ་དཀའ་ངལ་འཕྲད་ཀྱི་ཡོད་པ་མ་ཟད། སེམས་པ་ཐང་ཐང་མེད་པ་ཆགས་རྒྱུའི་ཉེན་ཁ་ཡོད་ཟེར།
ཕྱི་ཟླ་ ༡༠ ཚེས་ ༢༧ ཉིན་གྱི་ཞོགས་པར་ངྷ་ས་ཡོངས་གླིང་སློབ་གྲྭ་དབུ་བརྙེས་ཏེ་ལོ་ ༢༦ འཁོར་པའི་མཛད་དེ་སྲུང་གཙི་བྱས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བོད་གཞུང་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་ཕེབས་འདུག སྐབས་དེར་སློབ་གྲྭའི་འགན་འཛིན་ཟླ་བ་ཚེ་རིང་ལགས་ཀྱིས་སློབ་གྲྭའི་ལས་བསྡོམས་དང་འབྲེལ་སློབ་ཕྲུག་གི་ཕ་མ་ཚོར་རེ་སྐུལ་འགའ་ཞུས་དོན། ཕ་མ་ཕལ་ཆེ་པས་སོ་སོའི་ཕྲུ་གུ་སྔ་དགོང་སློབ་གྲྭར་ཕར་བསྐྱལ་ཚུར་ལེན་ཙམ་ལས། ཕྲུ་གུས་ཉིན་རེར་ཚིག་གསར་པ་གང་ཚོད་ཤེས་ཀྱི་ཡོད་པ་དང་། ཀུན་སྤྱོད་ཡར་རྒྱས་ཡོད་མེད་སོགས་ལ་བལྟ་རྟོག་བྱེད་ཀྱི་མེད་པ་མ་ཟད། ཕ་མ་རེ་ཟུང་གིས། ཕྲུ་གུའི་མདུན་དུ་ཚུལ་མིན་གྱི་གློག་བརྙན་ལ་ལྟ་བ་དང་རྒྱན་འགུག་ཤོ་རྒྱག་བྱེད་པ། ཕྲུ་གུའི་མཐོང་ས་ནས་ཐྭ་མག་དང་ཆག་རག་སྤྱོད་པ། ཕྲུ་གུར་རྡོང་རྡེག་དང་ཚིག་རྩུབ་བཤད་པ། ཁྱིམ་ནས་སྐད་ཡིག་བསྲེས་ལྷད་ཅན་བཤད་པ། ཕྲུ་གུའི་མདུན་ནས་ཁྱོ་ཤུག་འཁོན་རྩོད་དང་ཁ་འཛིང་བྱེད་པ་སོགས་ཀྱིས་ཕྲུ་གུའི་སློབ་སྦྱོང་དང་བསམ་བློ། ཀུན་སྤྱོད་བཅས་ལ་ཤུགས་རྐྱེན་ངན་པ་ཐེབས་ཀྱི་འདུག ཕ་མ་ཚོས་དེ་རིགས་ལ་ཐུགས་གཟབ་གནང་དགོས་ཀྱི་འདུག ཅེས་དང་བརྗོད་བྱུང་།
ཁོང་གིས་མ་འོངས་པའི་ལས་འཆར་སྐོར་ལ། བུ་ཕྲུག་ཚོར་དཔལ་འབྱོར་གྱི་དཀའ་ངལ་དང་ལོ་ཚད་ཀྱི་རྐྱེན་པས་མུ་མཐུད་སློབ་སྦྱོང་བྱེད་མ་ཐུབ་པའི་རིགས་ལ་དམིགས་བསལ་སློབ་སྦྱོང་གི་གོ་སྐབས་ཤིག་སྐྲུན་རྒྱུ་ཡིན། ལས་གཞི་དེ་རིགས་ ༢༠༡༡ ལོའི་ཕྱི་ཟླ་ ༡ ནང་དངོས་སུ་མགོ་འཛུགས་བྱ་རྒྱུར་རྒྱ་གར་གཞུང་ནས་ཆོག་མཆན་ཐོབ་ཡོད། ཅེས་བསྒྲགས་སོང་།
མཇུག་ཏུ་སྐུ་མགྲོན་གཙོ་བོ་བཀའ་བློན་ཐུབ་བསྟན་ལུང་རིགས་མཆོག་གིས་གསུངས་བཤད་གནང་དོན། གོང་དུ་སློབ་ཕྲུག་ཚོའི་གཞས་སྣ་འཁྲབ་སྟོན་སྐབས་ང་ཚོ་བོད་ཀྱི་སོན་རྩ་ཞེས་བཏང་པ་ལྟར། མ་འོངས་པའི་བོད་དེ་ཁོང་ཅག་རེད། ང་ཚོས་གཅིག་གིས་གཅིག་ལ་རྩིས་སྤྲད་ནས་འགྲོ་དགོས་པ་ཡིན་དུས། ད་ལྟའི་ཕྲུ་གུ་ཚོར་ཕྱོགས་ཡོངས་ནས་གསོ་སྐྱོང་གང་ལེགས་བྱ་དགོས་པ་རེད། དགེ་རྒན་དང་པོ་ཕ་མ་ཡིན་སྟབས། མི་རིགས་གྲུང་པོ་དང་ཤེས་འཇོན་ཅན་གྱི་མི་རབས་ཤིག་གསོ་སྐྱོང་ཡོང་རྒྱུར་ཕྲུ་གུ་སོ་སོའི་ཕ་མ་ཚོས་ངེས་པར་གཟབ་ནན་དང་ནུས་ཤུགས་འདོན་དགོས། མིའི་ཀུན་སྤྱོད་ནི་འཛིན་གྲྭ་ཁོ་ནའི་ནང་བསླབ་ན་འགྲིག་འགྲོ་བ་ཞིག་མ་རེད། དེ་ཉིན་རེའི་འཚོ་བའི་ཁྲོད་ཕྲུ་གུ་ཚོའི་གཤིས་རྒྱུད་ལ་འཇགས་ཐབས་བྱ་དགོས་པ་ཞིག་དང་། མཚམས་རེར་ཕ་མ་གཉིས་ཀྱིས་ཕན་ཚན་ཁ་འཛངས་འཁྲུག་རྩོད་བྱེད་པ། དཔེར་ན། ཕ་མ་ཚོས་ཁྱིམ་ནས “ཨ་ཕའི་རོ་དང་ཨ་མའི་མགོ” ལྟ་བུའི་སྡིག་མོལ་བྱེད་སྡོད་མཁན་ཞིག་ཡིན་ན། ཕྲུ་གུ་དེར་རང་བཞིན་གྱིས་གཤིས་ཀ་ངན་པ་ཞིག་རྒྱུད་ལ་འཇགས་ཏེ། ཕྱི་ལོགས་སུའང་མི་གཞན་དང་ཕྲུ་གུ་གཞན་དང་མཉམ་དུ་འགྲོ་སྐབས། ཨ་ཕའི་རོ་དང་ཨ་མའི་མགོ་སོགས་ལབ་ཀྱི་རེད། ཅེས་དང་།
ད་ལྟའི་སློབ་ཕྲུག་ཚོར་ཤེས་ཡོན་བསླབ་རྒྱུའི་ཚབ་ལ་ཚོང་སློབ་ཀྱིན་ཡོད་པ་རེད་ཅེས་ངས་ལབ་བསྡད་ཡོད། འཛིན་ཁང་དུ་སློབ་སྦྱོང་ག་རེ་བྱེད་ན་ལས་ཀ་གང་འདྲ་རག་གི་ཡོད་མེད་དང་། གླ་ཕོགས་ཡག་པོ་རག་རྒྱུའི་ཆེད་དུ་སློབ་ཚན་ག་རེའི་སྟེང་སློབ་སྦྱོང་བྱ་དགོས་པ་སོགས་ཀྱི་སློབ་གསོ་སྐྱོན་གྱི་ཡོད་པ་རེད། འདི་དགེ་རྒན་ཚོའི་སློབ་གསོ་སྤྲོད་སྟངས་འགྲིག་གི་མེད། ངས་ཕ་མ་ཚོར་ནན་གྱིས་ཞུ་འདོད་པ་ཞིག་ལ། ཕྲུ་གུའི་ཀུན་སྤྱོད་དང་སྦྱངས་འབྲས་ཐད་ནས་ཕྲུ་གུ་གཞན་དང་འགྲན་བསྡུར་ནམ་ཡང་མ་གནང་རོགས། འདི་བྱེད་ཐབས་ཡག་པོ་མ་རེད། དཔེར་ན། ཁྱིམ་མཚེ་ཚང་གི་བུ་དེ་ཡག་པོ་ཡོད་ལུགས་དང་དེའི་སྦྱངས་འབྲས་ལེགས་ཚུལ། ཁྱོད་རང་ག་རེ་བྱས་པ་རེད་སོགས་ལབ་སྟེ་ཁ་རྡོང་བཏང་ན། ཕྲུ་གུའི་ཀུན་སྤྱོད་དང་སློབ་སྦྱོང་ཡག་ཏུ་འགྲོ་རྒྱུའི་ཚབ་ལ། ཕྲུ་གུའི་སེམས་ལ་དཀའ་ངལ་འཕྲད་ཀྱི་ཡོད་པ་མ་ཟད། སེམས་པ་ཐང་ཐང་མེད་པ་ཆགས་རྒྱུའི་ཉེན་ཁ་ཡོད། དེ་ལས། སློབ་སྦྱོང་གི་ངོ་བོ། ཤེས་ཡོན་གྱི་དགོས་པ། ཤེས་ཡོན་མེད་པའི་དཀའ་ངལ།སློབ་སྦྱོང་ཡར་རྒྱས་འགྲོ་པའི་ཐབས་ལམ་སོགས་བཤད་དེ། ཕྲུ་གུའི་བློ་འགུག་ཐབས་བྱ་རྒྱུ་དེ་གལ་ཆེན་པོ་རེད། ཅེས་གསུངས་སོང་།
གསར་འགོད་པ། བནྡེ་སྐྱབས།
