དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཉེ་ཆར་བོད་ཨ་མདོ་མཚོ་སྔོན་ས་ཁུལ་གྱི་བོད་རིགས་སློབ་ཕྲུག་ཚོས་བོད་ཀྱི་སྐད་ཡིག་སྲུང་སྐྱོབ་ཆེད། གཞི་རྒྱ་ཆེ་བའི་རྔམ་སྟོན་ཁྲོམ་སྐོར་བྱེད་ཀྱིན་ཡོད་པའི་གནད་དོན་དང་འབྲེལ། མཚོ་སྔོན་ཞིང་ཆེན་སློབ་གསོ་ཐིན་གྱིས་ཕྱི་ལོ་ ༢༠༡༠ ནས་ ༢༠༢༠ བར་གྱི་ཤེས་ཡོན་སྲིད་བྱུས་གསར་པ་ཞིག་གཏན་འབེབས་བྱས་ཡོད་པ་དེ་འཕྲལ་དུ་མཚམས་འཇོག་དགོས་པའི་བསྒྲགས་གཏམ་ཞིག་སྤེལ་འདུག
བསྒྲགས་གཏམ་དེའི་མཇུག་ཏུ་བཀོད་དོན། སློབ་གསོ་བསྒྱུར་བཅོས་གཏན་འབེབས་ཡིག་ཆ་འདི་དག་ས་གནས་ཁག་གི་སློབ་གསོ་ཚན་ཁག་ཏུ་ལག་བསྟར་གྱི་དུས་མཚམས་ལ་འགྱུར་ཡོད་པ་དང༌། བསྒྱུར་བཅོས་ཆེན་པོ་འདིས་བོད་ཁུལ་གྱི་སློབ་གསོའི་མ་ལག་ཤུགས་རྐྱེན་ཆེན་པོ་ཆགས་ཡོད་པ་དང༌། ད་ལྟ་འགྲོ་བཞིན་པའི་སྐད་གཉིས་ལམ་ལུགས་ནང་བོད་ཡིག་གནས་བབས་དེ་མེད་པ་ཆགས་རྒྱུ་དང༌། སློབ་ཚན་ཁག་རྒྱ་སྐད་དུ་འཁྲིད་སྟོན་བྱས་རྗེས་བོད་ཡིག་དེ་བཞིན་བོད་ཀྱི་སྐད་ཡིག་ཁོ་ན་སྦྱོང་ཆེད་ལས་བེད་སྤྱོད་ཁོར་ཡུག་ཇེ་ཉུང་དུ་འགྲོ་རྒྱུ་དང༌། བོད་ཁུལ་དུ་བོད་ཀྱི་སྐད་ཡིག་རྒྱུན་སྤྱོད་གནས་བབས་རིམ་པས་མེད་པ་ཆགས་ཏེ་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱེད་རྒྱུར་ཤུགས་རྐྱེན་ངན་པ་ཐེབས་རྒྱུ་དང་རིམ་བཞིན་གསོན་གནས་ཀྱི་ནུས་སྟོབས་ཉམས་ཉེས་སུ་འགྱུར་ཉེན་ཆེན་པོ་ཆགས་ཡོད། ཅེས་དང་།
དེ་བཞིན་སྐད་གཉིས་ཀྱི་སློབ་གསོའི་ལམ་ལུགས་ལ་བསྒྱུར་བཅོས་བྱེད་པ་འདིས་བོད་ཁུལ་གྱི་ས་གནས་དངོས་ཡོད་གནས་སྟངས་དང་མི་འཚམས་ཤིང༌། བོད་ཀྱི་སྐད་ཡིག་ཁྱབ་སྤེལ་དང་ཡུན་གནས་ཐུབ་རྒྱུར་གནོད་སྐྱོན་ཆེན་པོ་ཞིག་ཆགས་ཡོད་པ་དང༌། རྒྱ་གཞུང་གི་རྒྱུན་དུ་བོད་ཀྱི་སྐད་ཡིག་རྒྱུན་འཛིན་དང་གོང་འཕེལ་གཏོང་ལུགས་རྒྱུན་དུ་དྲིལ་བསྒྲགས་བྱེད་པ་དང༌། རྒྱ་ནག་གི་རྩ་ཁྲིམས། དེ་བཞིན། མི་རིགས་ས་ཁོངས་རང་སྐྱོང་བཅའ་ཁྲིམས་དང་ཡོངས་སུ་རྒྱབ་འགལ་ཆགས་ཡོད་ལ་མི་རིགས་ས་ཁུལ་གྱི་སློབ་གསོ་འཕེལ་རྒྱས་གཏོང་བ་དང༌། མི་རིགས་ས་ཁུལ་གྱི་སྤྱི་ཚོགས་ཡར་རྒྱས་དང༌། དཔལ་འབྱོར། རིག་གནས་སོགས་རྒྱུན་འཛིན་དང་གོང་འཕེལ་ཡོང་བར་ཤུགས་རྐྱེན་ངན་པ་ཕོགས་རྒྱུ་རེད། ཅེས་བཀོད་འདུག
བསྒྲགས་གཏམ་ནང་མུ་མཐུད་དུ་བསྟན་དོན། མཚོ་སྔོན་ཞིང་ཆེན་གྱི་འབྲེལ་ཡོད་མགོ་འཁྲིད་རྣམས་པས་བོད་ཁུལ་གྱི་དངོས་ཡོད་གནས་སྟངས་དང༌། དེ་བཞིན་སློབ་ཕྲུག་དང་དགེ་རྒན་སོགས་ཀྱི་རེ་འབོད་ལ་གསན་བཞེས་ཀྱིས་མཚོ་སྔོན་ཞིང་ཆེན་གྱི་སྐད་གཉིས་ཀྱི་སློབ་གསོའི་ལམ་ལུགས་ལ་བསྒྱུར་བཅོས་བྱེད་པའི་གཏན་འབེབས་ལག་བསྟར་བྱེད་རྒྱུ་མཚམས་འཇོག་ཡོང་བ་དང༌། རྒྱ་ཆེའི་དགེ་སློབ་ཚོ་དང་དེ་བཞིན་ལས་བྱེད་དང་དགེ་རྒན་ཟུར་པ་སོགས་ཀྱི་ལུགས་མཐུན་རེ་ཞུར་བརྩི་བཀུར་དང་གུས་བཀུར་ཡོང་བའི་འབོད་བསྐུལ་ནན་པོ་ཞུ་རྒྱུ་ཡིན། ཞེས་བཀོད་འདུག
