བཀའ་ཁྲིའི་ཚོད་ལྟའི་འོས་བསྡུའི་སྐབས་ང་ཚོས་ཐེམ་ཐོ་རྒྱག་ས་དེ་ས་གནས་འོས་བསྡུའི་རྒྱན་ཤོག་ཅིག་ཡོད་པ་དེའི་ཐོག་བརྒྱབ་པ་རེད་མ་གཏོགས་དཔྱ་ཁྲལ་ལག་དེབ་ཐོག་ལ་རྩ་བ་ནས་བརྒྱབ་ཡོད་པ་རེད་ཟེར།
ཁ་སང་ཕྱི་ཚེས་ ༤ ཉིན་བོད་ཀྱི་བུད་མེད་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་གིས། ཕྱི་ལོ་ ༢༠༡༡ ལོའི་བཀའ་ཁྲིའི་ཚོད་ལྟའི་འོས་བསྡུ་སྐོར་གྱི་དཔེ་དེབ་ཅིག་དཔར་འགྲེམས་ཞུས་ཡོད་ཅིང་། དེ་ནི་ད་ལོའི་༧གོང་ས་མཆོག་གི་འཁྲུངས་སྐར་དང་བསྟུན་ཏེ། བུད་མེད་ལྷན་ཚོགས་ཀྱིས་བཞུགས་སྒར་དང་ཧི་མ་ཅལ་མངའ་སྡེ་གཙོས། ཨོ་རི་ས། ཀ་ན་ཊ་ཀ ཨ་རུ་ཎ་ཅལ་སོགས་མངའ་སྡེ་ཁག་ ༡༢ དང་། བལ་ཡུལ་དང་ཨ་རི། ཡུ་རོབ་བཅས་ཀྱི་ས་གནས་ཁག་ ༣༧ ཙམ་གྱི་ནང་འོས་བསྡུ་བྱས་གནས་ཚུལ་ཁག་ཕྱོགས་བསྡུས་བྱས་པ་ཞིག་ཡིན་ཞིང་། ཚོད་ལྟའི་འོས་བསྡུ་ལ་འཛམ་གླིང་རྒྱལ་ཁབ་ཁག་ ༣༧ ནས་བོད་རིགས་ ༩༨༧༠ ཙམ་གྱིས་ཆ་ཤས་བླངས་ཡོད་ཅིང་། དེའི་ཁྲོད་བུད་མེད་ཀྱིས་བརྒྱ་ཆ་ ༥༠།༩༠ དང་སྐྱེས་པའི་བརྒྱ་ཆ་ ༤༩།༡༠ ཙམ་ཟིན་འདུག
དེབ་དེའི་ནང་ས་གནས་ཁག་གི་གནས་སྟངས་སྐོར་ལ། ས་གནས་ཚང་མར་མང་ཚོགས་ཀྱི་འོས་བསྡུའི་གོ་རྟོགས་ཧ་ཅང་ཞན་པོ་འདུག དཔེར་ན། བྷན་ངྷ་ར་དང་ལ་དྭགས། མ་ན་ལི། དོན་གྲུབ་གླིང་ས་གནས་བཅས་ཀྱི་མི་མང་པོ་ཞིག་གིས། འོས་བསྡུའི་འགེངས་ཤོག་ནང་ཆ་རྐྱེན་མང་དྲགས་པའི་རྐྱེན་གྱིས་འགེངས་ཤོག་ཆ་ཚང་ཞིག་སྐོང་མ་ཐུབ་པར་རྩིས་མེད་གཏོང་དགོས་པ་གང་འཚམས་འདུག མང་ཚོགས་ལ་འོས་ཤོག་འགེངས་སྟངས་ཀྱི་སྦྱོང་བརྡར་སྤྲོད་དགོས་ཀྱི་འདུག ཁ་ན་ཊ་དང་དེ་མིན་གྱི་ས་ཁུལ་ཁག་ཅིག་ཏུ་འོས་ཤོག་འགེངས་སྐབས་གོ་རིམ་འཁྲུག་ཡོད་པར་མ་ཟད། ལྷག་པར་དུ་བུད་མེད་ལྷན་ཚོགས་ཀྱིས་གོ་སྒྲིག་ཞུས་པའི་ཚོད་ལྟའི་འོས་བསྡུ་དེ་བོད་རྒྱལ་ཡོངས་བཀའ་ཁྲིའི་འོས་འདེམས་ལ་གོ་ནོར་ཐེབས་མཁན་མང་པོ་ཞིག་བྱུང་ཡོད་སྐོར་སོགས་བཀོད་འདུག
དེ་རིང་འདི་གའི་གསར་འགོད་པས་དབུས་བུད་མེད་ལྷན་ཚོགས་ཀྱི་དྲུང་ཆེ་རིང་གཡང་འཛོམས་ལགས་སུ་ཚོད་ལྟའི་འོས་བསྡུའི་དཔེ་དེབ་དང་འབྲེལ་གནད་དོན་ཁག་ཅིག་གི་ཐད་བཅར་འདྲི་ཞུས་པར་ཁོང་མོས་བརྗོད་དོན། དམངས་གཙོའི་འཕེལ་རིམ་ནང་ཐུགས་ཕན་གསོ་ཐུབ་ན་བསམས་ཏེ། ང་ཚོས་ཚོད་ལྟའི་འོས་བསྡུ་དང་འབྲེལ་བའི་དཔེ་དེབ་དང་བརྙན་ཕབ་ཅིག་འགྲེམས་སྤེལ་ཞུས་ཡོད་ལ། ས་གནས་ཁག་ཏུ་འོས་བསྡུའི་གོ་རྟོགས་མཐོ་རུ་གཏོང་ཆེད་སྐད་མ་བཅུ་ཙམ་ཡོད་པའི་བརྙན་ཕབ་ཅིག་ཀྱང་བཟོས་ཡོད། དེ་ནི་ཚོད་ལྟའི་འོས་བསྡུའི་སྐབས་ས་གནས་ཁག་ཏུ་དཀའ་ངལ་ཅི་ཙམ་འཕྲད་ཡོད་མེད་དང་། མ་འོངས་པར་ཡར་རྒྱས་ཇི་ལྟར་གཏོང་དགོས་མིན་བཅས་ཀྱི་ཆེད་ཡིན། ཞེས་བརྗོད་བྱུང་།
ཡང་ཁོ་མོར་ད་བར་ཚོད་ལྟའི་འོས་བསྡུའི་གྲུབ་འབྲས་ཕྱིར་བསྒྲགས་མ་བྱས་པའི་རྒྱུ་མཚན་གང་ཡིན་སྐོར་དྲིས་པར་ལན་བསྐྱོན་དོན། བུད་མེད་ལྷན་ཚོགས་ཀྱིས་ཚོད་ལྟའི་འོས་བསྡུའི་གྲུབ་འབྲས་དུས་ཐོག་གསལ་བསྒྲགས་མ་བྱས་པར་སྤྱི་ཚོགས་ནང་གླེང་སློང་ཤུགས་ཆེར་བྱུང་ཡོད་ཀྱང་། ང་ཚོས་དགོས་པ་རྒྱུ་མཚན་ཞིག་ལ་བལྟས་ཏེ་ཕྱིར་བསྒྲགས་མ་བྱས་པ་ཡིན། བོད་གཞུང་འོས་བསྡུ་ལྷན་ཁང་གིས་སྔོན་འགྲོའི་འོས་བསྡུ་མ་གནང་གོང་ལ་ང་ཚོའི་ཚོད་ལྟའི་འོས་གྲངས་གསལ་བསྒྲགས་བྱས་ན། མི་མང་པོ་ཞིག་གི་བསམ་བློར་འགྱུར་བ་ཐེབས་རྒྱུ་ཡིན་པ་དང་། གལ་སྲིད་འགྱུར་བ་ཐེབས་ན་མང་གཙོའི་འཕེལ་རིམ་ནང་ཏག་ཏག་ཅིག་བསྡད་མེད་སྟབས། ང་ཚོས་ཕྱིར་འགྱངས་བྱ་དགོས་བྱུང་སོང་། བོད་གཞུང་དབུས་འོས་བསྡུ་ལྷན་ཁང་གིས་སྔོན་འགྲོའི་འོས་གྲངས་གསལ་བསྒྲགས་མ་གནང་སྔོན་ལ། ང་ཚོས་གསར་འགོད་གསལ་བསྒྲགས་ཤིག་བསྐྱང་འཆར་ཡོད། ཅེས་བརྗོད་བྱུང་།
གསར་འགོད་པས་བུད་མེད་ལྷ་ཚོགས་ཀྱི་ཚོད་ལྟའི་འོས་བསྡུའི་སྐབས། བོད་གཞུང་འོས་བསྡུ་ལྷན་ཁང་ལ་ཆོག་མཆན་ཞུས་ཡོད་མེད་དྲིས་སྐབས། ང་ཚོས་ཐོག་མར་དབུས་འོས་བསྡུ་ལས་ཁུངས་དང་བཀའ་བསྡུར་བྱས་ཏེ་ཚོད་ལྟའི་འོས་བསྡུ་བྱེད་ཐུབ་པ་བྱུང་ཡོད་ཀྱང་། བུད་མེད་ལྷན་ཚོགས་ཀྱིས་དཔྱ་ཁྲལ་ལག་དེབ་ཐོག་སྒེར་གྱི་ཐེམ་ཐོ་བརྒྱབ་པ་རེད་ཅེས་སྤྱི་ཚོགས་ནང་གླེང་ཕྱོགས་ཤིག་བཟོས་ཡོད་སྟབས། དབུས་འོས་བསྡུ་ལས་ཁུངས་ནས་ང་ཚོར་དེ་ག་རེ་རེད་ཅེས་བཀའ་གནང་སོང་། སྐབས་དེར་ང་ཚོས་གནས་སྟངས་དེ་ས་གནས་གང་དུ་བྱུང་ཡོད་ན་གསལ་པོ་བཟོ་རོགས་ཞུས་སྐབས། དེ་ནས་ཁོང་ཚོར་དམིགས་བསལ་ཞུ་རྒྱུ་གང་ཡང་མི་འདུག ཚོད་ལྟའི་འོས་བསྡུའི་སྐབས་ང་ཚོས་ཐེམ་ཐོ་རྒྱག་ས་དེ་ས་གནས་འོས་བསྡུའི་རྒྱན་ཤོག་ཅིག་ཡོད་པ་དེའི་ཐོག་བརྒྱབ་པ་རེད་མ་གཏོགས་དཔྱ་ཁྲལ་ལག་དེབ་ཐོག་ལ་རྩ་བ་ནས་བརྒྱབ་ཡོད་པ་རེད། ཅེས་བརྗོད་བྱུང་།
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བེུད་ལྷན་ཚོགས་ཀྱི་བཀའ་ཁྲི་ཚོད་བལྟའི་འོས་བསྡུ་ཟེར་བ་དེས་མི་མང་པོ་ཞིག་ལ་དོགས་པ་གསར་པ་མང་པོ་ཞིག་བསྐྲུན་ཡོད་པ་དང་། བེུད་ལྷན་ཚོགས་ཀྱི་ཕྱག་ལས་གནང་ཕྱོགས་ལའང་སྐྱོན་བརྗོད་མང་པོ་ཞིག་བྱེད་མཁན་བྱུང་ཡོད། ལས་འགུལ་དེས་བེུད་ལྷན་ཚོགས་ཀྱི་ཆེས་མཐོང་ལ་གནོད་སྐྱོན་ཞེ་དྲག་བཏང་ཡོད། མ་འཽངས་པར་བེུད་ལྷན་ཚོགས་ནས་ལས་འགུལ་གང་ཞིག་བརྩམ་རུང་གཟབ་གཟབ་དང་བློ་གཟུ་བོར་གནས་ཏེ་བརྩམ་དགོས།། །།
ཕལ་ཆེར་གོང་གི་ཚིག་དེ་”དཔྱ་ཁྲལ་ལག་དེབ་ཐོག་རྩ་བ་ནས་བརྒྱབ་ཡོད་པ་མ་རེད་ཟེར”ཡིན་རྒྱུ་རེད། གངས་ཕྲུག་གི་དྲི་བ་ཡང་དེའི་སྟེང་ཡིན་པ་འདྲ། ལན་དུ་དམིགས་བསལ་ཚོགས་ཆེན་གྱི་ཚིག་ཅིག་ལུང་འདྲེན་བྱས་པ་དེ་ལན་འཁྱོལ་མི་འདུག་སྙམ།
འོས་བསྡུའི་ཆ་རྐྱེན་མང་དྲགས་ནས་འགེངས་ཤོག་འཐུས་ཚང་བཀང་མ་ཐུབ་པའི་གནས་ཚུལ་འདི་ནི། ང་ཚོ་བཙན་བྱོལ་བོད་མིའི་གཞི་ཆགས་ཀྱི་མི་མང་སྤྱིའི་ཤེས་ཡོན་གྱི་གནས་སྟངས་དང་། མང་གཙོའི་གོ་རྟོགས་ངོ་མ་དེ་ཡིན་པ་རེད། གལ་སྲིད་བེུད་ལྷན་ཚོགས་ནས་གནས་ཚུལ་དེ་དག་མ་བྱུང་བའི་སྔོན་ཉམས་ཞིབ་ཕྲན་བུ་ཞིག་གནང་ནས་སྔོན་འགྲོའི་སྔོན་དུ་ཟབ་་སྦྱོང་སྟབས་བདེ་ཞིག་སྤྲད་ཐུབ་ཡོད་ན་ཇི་ལྟར་དགེ་བའི་ལས་འགུལ་ཞིག་ཡོང་ངེས་རེད། དེ་ན་དགོངས་བཞེས་ཀྱིས་མ་འོངས་ཕྱག་ལས་གནང་ཕྱོགས་ལ་ཡར་རྒྱས་ཀྱི་གོམ་པ་གནང་གལ། ལས་འགུལ་དེ་ནི་མང་གཙོ་འཕེལ་རིམ་ལ་ཧ་ཅང་ཕན་ཐོགས་ཆེ་བས་ཐུགས་རྗེ་ཆེ།
དྲ་གྲོགས་གངས་ཕྲུག་ལགས། ཁྱེད་ཀྱི་དྲི་བ་དེའི་ལན་འདི་ཡིན་པ་འདྲ། ད་ལོའི་སྐུའི་འཁྲུངས་སྐར་དང་བསྟུན་བུད་མེད་ཚོགས་པས་ཚོད་ལྟའི་འོས་བསྡུ་ཞིག་གནང་ཡོད། སྐབས་དེར་འོས་འཕེན་པ་དག་གི་རང་བཙན་ལག་དེབ་ཐོག་ཐམ་ག་ཞིག་བརྒྱབ་ཡོད་རབས་གོ་སོང་། དེའི་ཐད་སྤྱི་ཚོགས་ནང་གླེང་སློང་གང་འཚམ་བྱུང་ཡོད། ད་ལོའི་ལྷོ་ཕྱོགས་ཀྱི་དམིགས་བསལ་ཚོགས་ཆེན་སྟེང་། ” ཉེ་ཆར་བཀའ་བློན་ཁྲི་པའི་ཚོད་ལྟའི་འོས་བསྡུ་ཞེས་པའི་སྐབས། དང་བླངས་དཔྱ་དངུལ་ལག་དེབ་ཐོག་གཞུང་འབྲེལ་མིན་པའི་ཚོགས་སྡེ་ཞིག་གི་རྟགས་ཐམ་ཕབ་པ་བྱུང་ཡོད་པའི་གནས་ཚུལ་འདུག་པའི་ཐད། ཚང་མས་ཤེས་རྟོགས་དགོས་ཀྱི་འདུག་པ་དང་། མ་འོངས་པར་དེ་རིགས་མི་འབྱུང་བའི་དམ་དོན་གལ་ཆེན་གནང་དགོས” ཞེས་སྤྱི་མོས་བྱུང་ཡོད།
ཕལ་ཆེར་འདི་འདྲ་ཞིག་ཡིན་པ་འདྲ།
གསར་འགོད་པ་དཔལ་ལྡན་ལགས།
གོང་གི་ཚིག་བཅད་འདིའི་དོན་ཧ་གོ་མ་སོང་
༼བཀའ་ཁྲིའི་ཚོད་ལྟའི་འོས་བསྡུའི་སྐབས་ང་ཚོས་ཐེམ་ཐོ་རྒྱག་ས་དེ་ས་གནས་འོས་བསྡུའི་རྒྱན་ཤོག་ཅིག་ཡོད་པ་དེའི་ཐོག་བརྒྱབ་པ་རེད་མ་གཏོགས་དཔྱ་ཁྲལ་ལག་དེབ་ཐོག་ལ་རྩ་བ་ནས་བརྒྱབ་ཡོད་པ་རེད་ཟེར། ༽
གསལ་བཤད་ཞིག་གནང་རོགས