དེ་རིང་གི་རྩེད་འགྲན་འདི་འགྲན་སེམས་མེད་པའི་འགྲན་བསྡུར་ཞིག་རེད། བར་ལམ་ཞིག་ནས་འགྲན་བསྡུར་དེ་ཡག་པོ་མི་འདུག་ལབ་ཡོད། དེ་ནི་ཕྲུ་གུ་ཚོར་ང་རྒྱལ་ཕྲག་དོག་སློང་བྱེད་ཀྱི་འགྲན་བསྡུར་དེ་ཡག་པོ་མི་འདུག་ཟེར་བ་ལས། སོ་སོར་བློ་ཁོག་སྐྱེད་བྱེད་དང་ཤེས་ཚད་མཐོ་རུ་གཏོང་བྱེད་ཀྱི་འགྲན་བསྡུར་དེ་ཡག་པོ་ཡོད་པ་རེད། དེ་རིགས་ཤེས་ཡོན་སྲིད་བྱུས་དང་འགལ་གྱི་མེད་ལ། ཕྲུ་གུའི་འཚར་ལོངས་ལ་ཡངས་ཕན་གྱི་ཡོད་ཟེར།
དེ་རིང་སྔ་དྲོ་གངས་སྐྱིད་བོད་གཞུང་སམ་བྷོ་ཊ་ཉིན་སློབ་ཀྱི་ལོ་འཁོར་རྩེད་འགྲན་བྱེད་སྒོ་དང་བསྟུན། ༧གོང་ས་མཆོག་དགོང་གྲངས་ ༧༥ བཞེས་པར་བཀའ་དྲིན་རྗེས་དྲན་གྱི་དུས་སྟོན་ཞིག་སློབ་གྲྭའི་རྩེད་ཐང་དུ་ཚོགས་ཡོད། མཛད་སྒོའི་སྐུ་མགྲོན་གཙོ་བོར་བོད་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་ཕེབས་འདུག་ལ། དེ་བཞིན་སམ་བྷོ་ཊའི་སྤྱི་ཁྱབ་ལས་དྲུང་དཔེ་སྟོན་སློབ་གྲྭའི་འགན་འཛིན། སློབ་ཕྲུག་སོ་སོའི་ནང་མི་བཅས་ཀྱང་མཉམ་ཞུགས་གནང་ཡོད་ཅིང། མཛད་སྒོ་དབུ་འཛུགས་ཀྱི་ཐོག་མར་སློབ་གྲྭའི་དགེ་ཆེ་མཆོག་གིས་ལས་བསྡོམས་སྙན་སྒྲོན་ཞུས་དོན་ལྟར་ན། ཉིན་སློབ་དེ་ནི་ཤེས་རིག་ལས་ཁུངས་ཀྱི་ཐད་ཀའི་འཛིན་སྐྱོང་འོག་ཡོད་པའི་སམ་བྷོ་གྲྭའི་ཁྱབ་ཁོངས་ཀྱི་གཞི་རིམ་འོག་མའི་སློབ་གྲྭ་ཞིག་ཡིན་ཞིང་། སློབ་གྲྭ་དེ་དབུ་བརྙེས་ཏེ་ད་བར་ལོ་ངོ་ ༣༢ དང་། སློབ་ཕྲུག་ ༡༡༧༤ ཙམ་བྱུང་ཡོད་འདུག ད་ཆར་སློབ་ཕྲུག་གྲངས་ ༨༦ དང་དགེ་ལས་ ༡༡ བཅས་ཡོད་ཅིང་། སྔོན་འགྲོ་མཐོ་དམའ་གསུམ་དང་དམའ་རིམ་འཛིན་གྲྭ་དང་པོ་ནས་གསུམ་པའི་བར་ཡོད་འདུག
གངས་སྐྱིད་སམ་བྷོ་ཊ་ཉིན་སློབ་ཀྱིས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་འཐུས་ཚང་ལག་བསྟར་བྱེད་ཀྱིན་ཡོད་ཅིང་། སློབ་ཕྲུག་ཚོར་ལོ་ཚོད་ལ་འབབ་པའི་བློ་སྤོབས་དང་སྒེར་ཚུགས། རྣམ་དཔྱོད། ཉམས་མྱོང་སོགས་ལ་གོམས་འདྲིས་དང་བྱང་ཆ་ཡོང་སླད། དམིགས་བསལ་སློབ་ཁྲིད་དང་སྦྱོང་བརྡར་སྣ་ཚོགས་སྤྲོད་ཀྱིན་ཡོད་པ་མ་ཟད། ཡ་རབས་བཟང་སྦྱོད་དང་གཙང་སྦྲ་འཕྲོད་བསྟེན། ཁོར་ཡུག་བདག་གཅེས་དང་ལག་ཤེས་བཟོ་ལས། བོད་ཡིག་བོད་སྐད་གསལ་དག་སྙན་གསུམ་ཡོང་བ་བཅས་ཀྱི་ཐད་ཤུགས་སྣོན་བྱེད་ཀྱིན་ཡོད་འདུག
སློབ་གྲྭ་དེའི་མ་འོངས་པའི་ལས་འཆར་གྱི་ཁོངས་སུ། ཕྱི་ལོ་ ༢༠༡༡ ལོ་ནས་ངྷ་ཤོད་མེས་དཔོན་གཙུག་ལག་དཔེ་སྟོན་སློབ་གྲྭའི་སྔོན་འགྲོ་དང་པོ་ནས་འཛིན་རིམ་ལྔ་བའི་བར་གངས་སྐྱིད་སམ་བྷོ་གྲྭ་ཉིན་སློབ་དང་ཟླ་སྒྲིལ་བཏང་སྟེ། སློབ་གྲྭའི་མིང་ལ་༼ གངས་སྐྱིད་མེས་དཔོན་གཙུག་ལག་དཔེ་སྟོན་སློབ་གྲྭ ༽ ཞེས་བསྒྱུར་རྒྱུ་ཡིན་པ་མ་ཟད། སྐབས་དེ་ནས་བཟུང་སློབ་ཕྲུག་ཚོས་སྒྲིག་ཆས་གྱོན་མི་དགོས་པར་ཤེས་ཡོན་སྲིད་བྱུས་གསར་པའི་དགོངས་དོན་ལག་ལེན་གཙང་མ་བྱ་འཆར་ཡོད་འདུག
མཛད་སྒོའི་སྟེང་སློབ་ཕྲུག་ཚོས་གཞས་སྣ་འཁྲབ་སྟོན་དང་། རིག་རྩལ་སྣ་ཚོགས་འགྲན་བསྡུར་མཇུག་བསྒྲིལ་རྗེས་སྐུ་མགྲོན་གཙོ་བོ་ཤེས་རིག་དྲུང་ཆེ་ཀརྨ་དགེ་ལེགས་མཆོག་གིས་གསུངས་བཤད་གནང་དོན། དེ་རིང་འདིར་སློབ་ཕྲུག་ཚོའི་རྩེད་འགྲན་དང་བསྟུན་༧གོང་ས་མཆོག་དགོང་གྲངས་ ༧༥ ལ་ཕེབས་པར་རྟེན་འབྲེལ་ཞུ་བཞིན་ཡོད་པ་རེད། ༧གོང་ས་མཆོག་ལ་བཀའ་དྲིན་རྗེས་དྲན་ཡག་ཤོས་དེ་སློབ་ཕྲུག་ཚོས་སློབ་གཉེར་ཡག་པོ་གནང་རྒྱུ་དང་ཀུན་སྤྱོད་ཡག་པོ་འཁྱེར་རྒྱུ། སློབ་གྲོགས་ཕན་ཚུན་མཐུན་པོ་གནང་རྒྱུ་དེ་རེད། དགེ་ལས་ཚོར་མཚོན་ན། སྐབས་བབ་ཀྱི་ལས་དོན་ལ་ཧུར་ཐག་གནང་རྒྱུ་དང་། འདས་པའི་ཉམས་མྱོང་གཞི་ལ་བཞག་སྟེ་ལྷག་བསམ་རྣམ་དག་གིས་ནུས་པ་འདོན་དགོས། སློབ་ཕྲུག་གི་ཕ་མ་ཚོས་༧གོང་ས་མཆོག་གི་བཀའ་སློབ་ལམ་སྟོན་ཁག་ལ་སློབ་སྦྱོང་བྱས་ཏེ་བཀའ་ཚུལ་བཞིན་བསྒྲུབ་རྒྱུ་དང་སོ་སོའི་བྱིས་པར་ལམ་སྟོན་ཡག་པོ་གནང་རྒྱུ་དེ་རེད། ཅེས་དང་།
དེ་རིང་གི་སློབ་ཕྲུག་ཚོའི་རིག་གཞས་སྣ་འཁྲབ་སྟོན་དང་རིག་རྩལ་འགྲན་བསྡུར་ཞེ་དྲག་ཡག་པོ་འདུག ཐུགས་རྗེ་ཆེ་ཞུ་རྒྱུ་ཡིན། བར་ལམ་ཞིག་གནས་ཤེས་ཡོན་སྲིད་བྱུས་དང་འབྲེལ་བའི་ཐོག་ནས་མང་པོ་ཞིག་ལ་ཡོ་བསྲང་དང་བསྒྱུར་བཅོས་མགོ་བཙུགས་པ་རེད་ལ། སམ་བྷོ་ཊའི་སློབ་གྲྭ་ཁག་གིས་དམིགས་བསལ་ཐུགས་འགན་འཁྱེར་ཡོད། དེ་དག་ལ་གྲུབ་འབྲས་གང་འཚམ་མཐོང་ཡོང་གི་འདུག་སྟབས། ཐུགས་རྗེ་ཆེ་ཞུ་རྒྱུ་ཡིན། ཤེས་ཡོན་སྲིད་བྱུས་ནང་གལ་ཆེན་དུ་རྩིས་ཏེ་བཤད་བཞག་པའི་སྦྱོང་ཚན་སློབ་སྟངས་སོགས་རིགས་ཁ་ཤས་ཡོད། དེ་དག་ཐོག་ཤུགས་རྒྱག་དགོས་པ་རེད། དཔེར་ན། དམའ་རིམ་ནས་བོད་པའི་སྐད་ཡིག་དེ་ཡག་པོ་ཞིག་བསླབ་ཐུབ་དགོས། ད་ལྟའི་སློབ་ཕྲུག་ཙམ་དུ་མ་ཟད་ང་ཚོ་མགོ་འཁྲིད་མཁན་ཚོའི་ནང་དུ་ཡང་སྣང་བ་དག་དྲགས་ཏེ། ཕྲན་བུ་འགྱུར་བསྡད་པ་མང་པོ་མཐོང་གི་འདུག མགོ་ཀ་མད་སུམ་ཅུ་ནས་སྒྲ་དག་པོ་དགོས་པ་གལ་ཆེན་པོ་རེད། དེང་སང་ཡི་གེ་རེ་རེའི་སྒྲ་ཉམས་འགྲོ་བཞིན་འདུག དམའ་རིམ་ནས་སྒྲ་དག་པོ་ཞིག་མ་གོམས་པ་ཡིན་ན། བོད་པའི་སྐད་ཡིག་གི་ཁྱད་ཆོས་མང་པོ་ཞིག་ཉམས་རྒྱུའི་ཉེན་ཁ་འདུག་སྟབས། དེ་དག་ཐོག་དགེ་རྒན་ཚོས་ཆེད་དུ་སྦྱོང་བརྡར་གནང་རྒྱུ་གལ་ཆེན་པོ་རེད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། དེ་རིང་གི་རྩེད་འགྲན་འདི་ལ་འགྲན་བསྡུར་ཟེར་ཡང་འགྲན་སེམས་མེད་པའི་འགྲན་བསྡུར་ཞིག་རེད། བར་ལམ་ཞིག་ནས་ང་ཚོས་འགྲན་བསྡུར་དེ་ཡག་པོ་མི་འདུག་ལབ་ཡོད་ཀྱང་། དེ་ནི་ཕྲུ་གུ་ཚོར་ང་རྒྱལ་ཕྲག་དོག་སློང་བྱེད་ཀྱི་འགྲན་བསྡུར་དེ་ཡག་པོ་མི་འདུག་ཟེར་གྱི་ཡོད། སོ་སོར་བློ་ཁོག་སྐྱེད་བྱེད་དང་ཤེས་ཚད་མཐོ་རུ་གཏོང་བྱེད་ཀྱི་འགྲན་བསྡུར་དེ་ཡག་པོ་ཡོད་པ་རེད། དེ་རིགས་ཤེས་ཡོན་སྲིད་བྱུས་དང་འགལ་གྱི་མེད་ལ། ཕྲུ་གུའི་འཚར་ལོངས་ལ་ཡངས་ཕན་གྱི་ཡོད། ཅེས་གསུངས་སོང་།
མཇུག་ཏུ་དྲུང་ཆེ་མཆོག་གིས་སློབ་ཕྲུག་ཚོར་རེ་སྐུལ་ཞུས་དོན། སློབ་ཕྲུག་ཚོ་ཁྱིམ་དུ་བཞུགས་སྐབས་ཕ་མའི་ཁ་ལ་ཉན་པོ་བྱ་རྒྱུ་དང་། སློབ་གྲྭར་ཡོད་སྐབས་དགེ་རྒན་གྱི་གསུང་ལ་ཡག་པོ་གསན་རྒྱུ། དུས་རྟག་ཏུ་སློབ་སྦྱོང་ལ་ཧུར་བརྩོན་དང་། མ་གོ་ས་དང་མ་ཤེས་ས་ཡོད་ན་དགེ་རྒན་ཚོར་ཡང་ཡང་བཀའ་འདྲི་ཞུ་རྒྱུ་གལ་ཆེན་པོ་རེད། ང་ཚོ་བོད་མི་རིགས་ཀྱི་རྩ་དོན་ནང་གལ་ཆེ་བའི་དོན་དག་མང་པོ་ཞིག་ཡོད་ཀྱང་། སྟབས་མ་ལེགས་པ་ཞིག་ལ་ལོ་ངོ་ལྔ་བཅུ་ལྷག་འགོར་ཡང་། ད་དུང་བཟོ་ལྟ་ཐོན་པ་ཞིག་ཆགས་ཐུབ་ཀྱི་ཡོད་པ་མ་རེད། ཁྱེད་ཅག་སློབ་ཕྲུག་ཚོ་སོ་སོའི་ཕ་མའི་རེ་བ་བཅོལ་ས་ཡིན་ལ། བོད་གཞུང་དང་བོད་མི་དམངས་ཀྱིས་རེ་ལྟོས་བཅའ་ས་ཡང་ཁྱེད་རང་ཚོ་ཆགས་ཡོད་སྟབས། དགེ་རྒན་དང་ཕ་མ་སློབ་ཕྲུག་ཚང་མའི་ནུས་པ་མཉམ་དུ་སྤུངས་ཏེ་ཤུགས་རྒྱག་དགོས་པ་རེད། ཅེས་གསུངས་སོང་།
གསར་འགོད་པ། དོན་འགྲུབ་བཀྲ་ཤིས།
འཇམ་དབྱངས་ཀྱིས་བཤད་པ་དེ་ངོ་མ་རེད་བསམ། རྡ་སའི་བོད་ཡིག་གི་དཔེ་སྟོན་ཆེ་ཤོས་དེ་ཝར་ཎ་མཐོ་སློབ་ཡིན། སྔོན་ཆད་ཝར་ཎའི་སློབ་ཐོན་པ་ཚོའི་བོད་ཡིག་གི་རྨང་གཞི་ལ་གཞི་བཅོལ་ནས་བཤད་ཀྱིན་ཡོད། དེ་ཚོའི་བོད་ཡིག་གི་གནས་སྟངས་བོད་ནང་ལ་བསྡུར་ན་ཐབས་སྐྱོ་པོ་ཡོད་པ་ང་ཚོས་མཐོང་གསལ་ཡིན། དེང་གི་ཝར་ཎའི་མཐོ་སློབ་བོད་ཡིག་གི་གནས་སྟངས་སྔར་ལས་ཧ་ཅང་ཐབས་སྡུག་པོ་རེད། གང་ལ་ཟེར་ན་གཞི་རིམ་སློབ་གྲྭ་ཁག་ནས་ཡིག་རྒྱུག་མ་ལོན་པ་ཚོ་དང་བོད་ཡིག་རྩ་བ་ནས་མི་ཤེས་པའི་རྒྱ་གར་དང་ནེ་པལ་མཐའ་མཚམས་ཀྱི་མི་རིགས་ཚོ་སློབ་གྲྭ་འདི་ནང་བཅུག་བཞིན་ཡོད་དུས་བོད་ཡིག་གི་རྨང་གཞི་ག་འདྲ་ཞིག་ཡར་རྒྱས་ཡོང་། རྡ་སའི་བཙན་བྱོལ་མི་ལོ་ལྔ་བཅུའི་ནང་བོད་ཡིག་གི་རང་ཚུགས་ཐུབ་པའི་བོད་མིའི་གྲངས་ཀ་ད་དུང་ཀླད་ཀོར་ཡིན། དེ་ནི་རྒྱལ་བ་རིན་པོ་ཆེའི་ཕྱག་གིས་ནང་སྐྱངས་བའི་འབྲས་བུ་ཡིན། གྲྭ་སའི་གྲྭ་པ་བཤད་གི་རེད།
གོང་གི་སློབ་ཕྲུག་ཚོའི་འཁྲབ་སྟོན་གྱི་གྱོན་ཆས་དེ་རིགས་དངོས་གནས་ལེགས་པོ་འདུག་པས་དགེ་སློབ་ཡོངས་ལ་ཐུགས་རྗེ་ཆེ་ཞུའོ།།
བཙན་བྱོལ་བོད་གཞུང་གི་ཤེས་ཡོན་སྲིད་ཇུས་འདི་བོད་ཀྱི་ཤེས་ཡོན་སྲུང་སྐྱོབ་ཀྱི་ཞབས་འདེགས་སུ་འགྲོ་ཡི་ཡོད་དམ་གཏོར་བཤིག་ཏུ་འགྲོ་ཡི་ཡོད་ཆ་མ་འཚལ། བོད་གཞུང་གིས་དགྲ་བཅོམ་པ་རྐྱང་རྐྱང་སྐྱེད་སྲིང་བྱེད་འདོད་ཡོད་པ་འདྲ། དགོས་སར་ཆད་འགྲོ་བ་དང་མི་དགོས་པར་ལྷུག་གཏོང་བྱེད་པ་འདི་བོད་གཞུང་གི་རང་མཐོངས་ཆེ་བའི་སྐུ་ངོ་ཚོའི་གཤིས་ཀ་རེད། ཉོན་མོངས་རྒྱུད་ལྡན་གྱི་གང་ཟག་ཅིག་ཡིན་ཚེ་”འགྲན་བསྡུར”བྱེད་སྐབས་ང་རྒྱལ་དང་ཕྲག་དོག་མེད་མཁན་སུ་འདུག སློབ་ཕྲུག་བྱིས་པ་ཚོར་མགོ་སྐོར་མ་གཏོང་། མི་ཤེས་ན་ཤེས་མདོག་མ་བྱེད། རྒྱལ་བ་རིན་པོ་ཆེ་ལ་ཀྱལ་ཀ་མ་བྱེད། དྲང་བདེན་གྱིས་དེ་སྔོན་བོད་ཕྲུག་ཁྱིམ་སྡེའི་མཛད་སྒོ་སོགས་སུ་བསྩལ་བའི་བཀའ་སློབ་དེ་ཚོ་སེམས་ལ་ཉར་ནས་འཐུས་ཤོར་ལ་མི་འགྲོ་བར་བརྩོན་ན་ལེགས། བསམ་བློ་ཞིབ་ཏུ་ཐོངས་དང་། དགོན་པ་གྲྭ་ཚང་ཁག་དང་བཤད་གྲྭ་ཁག་ཕུད། བོད་གཞུང་གིས་གསོ་སྐྱོང་བྱས་པའི་སློབ་གྲྭ་ཁག་ནས་བོད་ཀྱི་ཤེས་ཡོན་ཐད་བྱས་རྗེས་འཇོག་ཐུབ་པའི་སློབ་ཕྲུག་ཇི་ཙམ་ཐོན་ཡོད། བོད་ཡིག་རང་རྐྱ་འཕེར་བ་གཅིག་སྟོན་རྒྱུ་ཡོད་དམ། སྐུ་ངོ་ཚོ།
ཤེས་རིག་དྲངས་ཆེན་མཆོག་གིས་གསུངས་པ་དེ་བདེན་པ་རེད།དེང་སང་དགེ་རྒན་དང་སློབ་ཕྲུག་མང་པོས་དབྱངས་ཀྱི་སྒྲ་གདངས་ཐོན་པ་དང་རྗེས་འཇུག་སྒྲ་དེ་ཡང་ཐོན་ཡོང་གིན་འདུག།གཅིག་བྱས་ན་དབུས་སྐད་ཐོག་དེ་ལྟར་སློབ་སྲོལ་ཞིག་མིན་འགྲོ་དྲན་ནས་དབུས་པ་ཚོ་ལ་དྲིས་ཀྱང་དེ་ཡང་རེད་མི་འདུག།ད་བྱེད་དུས་བཙན་བྱོལ་བའི་ཐུ་མི་སམ་བྷ་ཊ་གསར་པ་ཞིག་གིས་སློབ་སྟངས་ཡིན་པ་འདྲ།
སྐུ་ངོ་གཡུ་ཐོག་ཀརྨ་དགེ་ལེགས་མཆོག་གིས ( ད་ལྟའི་སློབ་ཕྲུག་ཙམ་དུ་མ་ཟད་ང་ཚོ་མགོ་འཁྲིད་མཁན་ཚོའི་ནང་དུ་ཡང་སྣང་བ་དག་དྲགས་ཏེ། ཕྲན་བུ་འགྱུར་བསྡད་པ་མང་པོ་མཐོང་གི་འདུག མགོ་ཀ་མད་སུམ་ཅུ་ནས་སྒྲ་དག་པོ་དགོས་པ་གལ་ཆེན་པོ་རེད། དེང་སང་ཡི་གེ་རེ་རེའི་སྒྲ་ཉམས་འགྲོ་བཞིན་འདུག དམའ་རིམ་ནས་སྒྲ་དག་པོ་ཞིག་མ་གོམས་པ་ཡིན་ན། བོད་པའི་སྐད་ཡིག་གི་ཁྱད་ཆོས་མང་པོ་ཞིག་ཉམས་རྒྱུའི་ཉེན་ཁ་འདུག ) ཞེས་གསུངས་པ་འདིར་རྒྱུ་མཚན་ཆེན་པོ་འདུག དཀའ་ངལ་འདི་སློབ་ཕྲུག་དང་བོད་གཞུང་གི་ལས་བྱེད། དགེ་རྒན། གྲྭ་ས་ཁག་གི་གྲྭ་བ་ཡོངས་རྫོགས་ལ་འདུག