ཞཱི་ཅིན་ཕིན་སྲིད་འཛིན་དུ་བསླེབ་ན་བོད་དོན་ལ་རེ་བ་ཡོད།

ཨ་རིས་རྒྱ་ནག་ལ་ཚོད་དཔག་གང་འདྲ་བྱེད་ཀྱི་ཡོད་ཟེར་ན། རྒྱ་གཞུང་གིས་དམར་ཤོག་གི་ལྟ་བ་དོར་ཡོད་སྟབས། མ་རྩ་རིང་ལུགས་སུ་འགྲོ་ངེས་ཡིན་པ་དང་། མ་རྩ་རིང་ལུགས་སུ་སོང་སྟེ་སྔོན་ལ་དཔལ་འབྱོར་ལམ་ལུགས་ལ་འགྱུར་བ་བཏང་རྗེས་རིམ་གྱིས་ཆབ་སྲིད་ལམ་ལུགས་ལའང་འགྱུར་བ་གཏོང་ངེས་རེད་དྲན་ཡོད། འོན་ཀྱང་། ཚོད་དཔག་དེའི་མཇུག་འབྲས་ནི་ཤིན་ཏུ་ལྡོག་ཟླ་ཞིག་ཆགས་ཡོད། ད་ཆར་རྒྱ་ནག་ནི་འཛམ་གླིང་ཐོག་དཔལ་འབྱོར་ཨང་གཉིས་པའི་གྲས་སུ་བསླེབས་ཡོད་ཀྱང་། ཆབ་སྲིད་ལ་འགྱུར་བ་གང་ཡང་བཏང་མེད་པ་མ་ཟད། སྲིད་དབང་སྒེར་འཛིན་གྱི་ནུས་ཤུགས་ཆེ་རུ་གཏོང་བཞིན་ཡོད་ཟེར།

བོད་གཞུང་ཕྱི་དྲིལ་ལས་ཁུངས་ཀྱི་གོ་སྒྲིག་འོག་ཁ་སང་ཕྱི་དྲོའི་ཆུ་ཚོད་ ༤ པའི་སྟེང་གངས་སྐྱིད་སྤྱི་ཐབ་ཚོགས་ཁང་དུ། ཨ་རི་ནས་ཕེབས་པའི་རྒྱ་རིགས་བོད་དོན་རྒྱབ་སྐྱོར་བ་ཁག་ཅིག་གིས་བོད་དོན་དང་འབྲེལ་བའི་གཏམ་བཤད་བྱས་ཡོད་པར་མ་ཟད། མཇུག་ཏུ་བཙན་བྱོལ་བོད་གཞུང་གི་གཞུང་ཞབས་ལས་བྱེད་ཚོ་དང་དྲི་བ་དྲིས་ལན་བྱས་ཡོད་ཅིང་། བགྲོ་གླེང་དེའི་སྟེང་གཞུང་ཞབས་ ༣༠༠ ཙམ་མཉམ་ཞུགས་བྱས་འདུག རྒྱ་རིགས་དེ་དག་ནི་ཉེ་ཆར་རྒྱ་གར་གྱི་རྒྱལ་ས་ལྡི་ལིར་ཚོགས་པའི་རྒྱལ་སྤྱིའི་བོད་རྒྱབ་སྐྱོར་ཚོགས་འདུར་བཅར་མཁན་དག་ཡིན་ཞིང་། ཚོགས་འདུ་གྲུབ་རྗེས་ཨ་རིའི་བོད་གཞུང་སྐུ་ཚབ་དོན་གཅོད་ཁང་གི་ལས་བྱེད་ཀུན་དགའ་བཀྲ་ཤིས་ལགས་ཀྱི་སྣེ་ཁྲིད་འོག་བཞུགས་སྒར་དུ་ཡོང་བ་ཞིག་ཡིན་འདུག

བགྲོ་གླེང་མགོ་མ་བཙུགས་གོང་བོད་གཞུང་ཕྱི་དྲིལ་དྲུང་འཕར་བཀྲ་ཤིས་ལགས་ཀྱིས་བགྲོ་གླེང་གི་དམིགས་ཡུལ་སྐོར་ངོ་སྤྲོད་བྱས་དོན། ཉེ་ཆར་ཕྱི་དྲིལ་ལས་ཁུངས་ཀྱི་གོ་སྒྲིག་འོག་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐེངས་ ༦ པ་དེ་ཧ་རི་ཡ་ནར་ཉིན་གསུམ་རིང་ཚོགས་ཡོད་ཅིང་། ཚོགས་འདུའི་ཐོག་རྒྱལ་ཁབ་ཁག་ ༥༧ ནས་ཚོགས་ཞུགས་པ་ ༢༥༨ ཙམ་མཉམ་ཞུགས་བྱས་ཡོད། དེའི་ཁོངས་ཀྱི་རྒྱ་རིགས་གྲོགས་པོ་འགའ་དེ་རིང་འདིར་ཆེད་ཕེབས་གནང་བར་དགའ་བསུ་ཞུ་རྒྱུ་ཡིན། ཞེས་དང་། རྒྱ་ནག་གཞུང་གིས་ཐོག་མཐའ་བར་གསུམ་དུ་བོད་ཀྱི་གནད་དོན་ཐོག་འཁྱོག་བཤད་དང་ལོག་བཤད་རྒྱག་པ་དང་།  ༧གོང་ས་མཆོག་ལའང་མཚན་སྨད་སྣ་ཚོགས་ཞུས་དང་ཞུ་བཞིན་ཡོད་པར་བརྟེན། མང་གཙོའི་རྒྱལ་ཁབ་ཁག་ཏུ་གནས་སྡོད་བྱེད་མཁན་རྒྱ་རིགས་གྲོགས་པོ་ཚོར་བོད་དོན་ཐོག་བསམ་ཚུལ་དང་བོད་ཀྱི་དཀའ་རྙོག་སེལ་རྒྱུར་ཐབས་ལམ་ཇི་འདྲ་ཡོད་མེད་ཤེས་རྟོགས་ཐུབ་རྒྱུར་ང་ཚོ་འདིར་འཛོམས་པ་ཡིན། ཞེས་དང་།

དེའི་རྗེས་དངོས་ཁམས་རིག་པ་བ་དང་བོད་དོན་ཉམས་ཞིབ་པ་སྐུ་ཞབས་ཀྲོ་ཤོ་ཡན་ལགས་ཀྱིས་རྒྱལ་སྤྱིའི་ཆབ་སྲིད་ཀྱི་ཁོར་ཡུག་ཁྲོད་བོད་རྒྱ་གཉིས་ཀྱི་ཆབ་སྲིད་གནས་སྟངས་སྐོར་བརྗོད་དོན། བོད་རྒྱ་མི་རིགས་གཉིས་ཀྱིས་ད་བར་རྒྱ་གཞུང་གིས་དབང་སྒྱུར་འོག་དཀའ་ངལ་མང་པོ་ཞིག་མྱངས་བ་རེད། དཀའ་ངལ་འདི་འདྲ་ཞིག་མྱངས་དགོས་དོན་ཐད་ང་ཚོས་ངེས་པར་དུ་བསམ་བློ་གཏོང་དགོས། རྒྱ་ནག་དམར་ཤོག་ཚོགས་པའི་དབང་སྒྱུར་འོག་རྒྱ་མི་རིགས་ཀྱིས་མི་ལོ་ ༦༠ ཙམ་དཀའ་ངལ་མྱངས་ཏེ་སྡོད་དགོས་བྱུང་བ་དང་། བོད་རིགས་ཚོའང་བཙན་བྱོལ་དུ་འབྱོར་ཏེ་མི་ལོ་  ༥༠ ཕྱིན་ཡང་གནད་དོན་ད་དུང་ཡང་ཐག་གཅོད་བྱས་ཐུབ་མེད། ངས་བསམ་ན། དཀའ་ངལ་འདི་འཛམ་གླིང་དམག་ཆེན་གཉིས་པའི་རྗེས་ཀྱི་གྲང་དམག་ཟེར་བ་དེའི་མཇུག་ལ་འབྲེལ་བསྡད་པ་ཞིག་རེད།  མི་ལོ་བཅུ་ཕྲག་འགའི་གོང་དུ་འཛམ་གླིང་འདིའི་ཐོག་དམར་ཤོག་གི་རྒྱལ་ཁབ་ཆེ་ཤོས་ཤིག་བྱུང་ཡོད་ཅིང་། རྒྱལ་ཁབ་དེ་ནི་རྒྱ་ནག་དམར་ཤོག་མིན་པར་ཨུ་རུ་སུའི་དམར་ཤོག་ཡིན། དམར་ཤོག་གི་སྲིད་དབང་མེད་པར་བཟོ་དགོས་ན་ཨ་རིའི་རྒྱབ་སྐྱོར་མེད་ན་ཐབས་ཤེས་གཞན་གང་ཡང་མེད། དེ་སྔོན་མའོ་ཙེ་ཏུང་གི་རྒྱ་ནག་དམར་ཤོག་གི་རྒྱལ་ཁབ་བཙུགས་རྗེས། ཨུ་རུ་སུའི་དམར་ཤོག་དང་མཉམ་འབྲེལ་གྱིས་ཨ་རིར་ཁ་གཏད་གཅོག་ཐབས་བྱས་ཀྱང་། རྗེས་སུ་རྒྱ་ནག་དམར་ཤོག་དང་ཨུ་རུ་སུའི་དམར་ཤོག་གཉིས་བར་མཐུན་པོ་མ་བྱུང་བར་འབྲེལ་ལམ་ཇེ་སྡུག་ཏུ་ཕྱིན་སྟབས། རྒྱ་ནག་དམར་ཤོག་གིས་ཨ་རིའི་སྲིད་གཞུང་དང་མཉམ་འབྲེལ་བྱས་ཏེ། མཐར་ཨུ་རུ་སུའི་དམར་ཤོག་སྲིད་དབང་ལ་ཁ་གཏད་བཅག་པ་རེད། ཅེས་བརྗོད་བྱུང་།

ཁོང་གིས་མུ་མཐུད་དོན། དེ་སྔོན་ཨ་རིའི་གཞུང་གིས་བོད་པར་རྒྱབ་སྐྱོར་ཆེན་པོ་བྱེད་ཀྱིན་ཡོད། དཔེ་མཚོན་གཅིག་ནི། ཨ་རིས་ཆུ་བཞི་སྒང་དྲུག་ཚོགས་པར་སྦྱོང་བརྡར་རོགས་རམ་བྱས་པ་ལྟ་བུ་རེད། ཨ་རྒྱ་གཉིས་ཀྱིས་ཐུན་མོང་ཐོག་ཨུ་རུ་སུར་ཁ་གཏད་བཅག་པ་ནས་བཟུང་། བོད་པར་རྒྱབ་སྐྱོར་བྱེད་ཤུགས་སྔོན་མ་ལས་རྦད་དེ་ཆུང་དུ་སོང་ཡོད། ཡུལ་གཉིས་མཉམ་འབྲེལ་བྱས་པ་དེས་ཨུ་རུ་སུའི་སྲིད་དབང་རྩ་མེད་དུ་གཏོང་ཐུབ་ཡོད་སྟབས་ཏན་ཏན་རྒྱལ་ཁ་ཆེན་པོ་ཞིག་ཐོབ་ཡོད། སྐབས་དེའི་ཨ་རིའི་སྤྱི་མཐུན་ཚོགས་པའི་ངོས་ནས་རྒྱུན་དུ་རྒྱ་གཞུང་ལ་གུ་ཡངས་ཀྱི་རྣམ་འགྱུར་ཞིག་བསྟན་ཡོད། མའོ་ཙེ་ཏུང་འདས་རྗེས་རྒྱ་ནག་གིས་དམར་ཤོག་ལྟ་བ་གཡུགས་དགོས་བྱུང་བ་རེད། འགྲོ་ལུགས་ལྟར་ན། ཨུ་རུ་སུའི་སྲིད་དབང་རྩ་མེད་དུ་བཏང་རྗེས། རྒྱ་ནག་དམར་ཤོག་སྲིད་གཞུང་ནི་ཨ་རིས་རྩ་མེད་བཟོ་ཡུལ་གྱི་རྒྱལ་ཁབ་ཅིག་ཆགས་དགོས་ཀྱང་། ལོ་རྒྱུས་ཐོག་གི་ཨ་རྒྱ་གཉིས་ཀྱི་འབྲེལ་བ་དེ་སྔར་བཞིན་ལྷག་ཡོད་སྟབས། ཨ་རིས་རྒྱ་ནག་ལ་ནུས་ལྡན་ཀྱི་ཁ་གཏད་གཅོག་རྒྱུའི་ལས་གཞི་གང་ཡང་སྤེལ་ཐུབ་མེད། མའོ་ཙེ་ཏུང་ཚེ་ལས་འདས་རྗེས། ཏུན་ཞོ་ཕིན་ཡར་ལངས་ཡོང་བ་རེད།  ཏུན་ཞོ་ཕིན་ལ་ཆབ་སྲིད་ཀྱི་ཉམས་མྱོང་ཕུན་སུན་ཚོགས་པ་ཞིག་ཡོད་སྟབས། ཁོང་གིས་ཕྱི་ཚུལ་ནས་ཆབ་སྲིད་ལ་འགྱུར་བ་གཏོང་གི་ཡོད་ཚུལ་བརྗོད་དེ་ནུབ་ཕྱོགས་པ་མང་པོ་ཞིག་ལ་མགོ་སྐོར་གཏོང་ཐུབ་པ་བྱུང་ཡོད།  ཅེས་བརྗོད་བྱུང་།

མཇུག་ཏུ་སྐུ་ཞབས་ཀྲོ་ཤོ་ཡན་གྱིས་འབྱུང་འགྱུར་ ༢༠༡༢ ལོར་རྒྱ་ནག་གི་སྲིད་འཛིན་དུ་ད་ལྟའི་སྲིད་བློན་གཞོན་པ་ཞི་ཅིན་ཕིན་བསླེབ་པ་ཡིན་ན། བོད་རྒྱ་གཉིས་ཀྱི་གནད་དོན་ཐོག་བཟང་ཕྱོགས་ཀྱི་འགྱུར་བ་འགྲོ་སྲིད་སྐོར་བརྗོད་དོན། ཨ་རིས་རྒྱ་ནག་ལ་ཚོད་དཔག་ཅི་ཞིག་བྱེད་ཀྱི་ཡོད་ཟེར་ན། རྒྱ་གཞུང་གིས་དམར་ཤོག་གི་ལྟ་བ་དོར་ཡོད་སྟབས། མ་རྩ་རིང་ལུགས་སུ་འགྲོ་ངེས་ཡིན་པ་དང་། མ་རྩ་རིང་ལུགས་སུ་སོང་སྟེ་དཔལ་འབྱོར་ལམ་ལུགས་ལ་འགྱུར་བ་བཏང་རྗེས། ཉིན་ཞིག་ཆབ་སྲིད་ལམ་ལུགས་ལའང་འགྱུར་བ་གཏོང་ངེས་རེད་དྲན་ཡོད། འོན་ཀྱང་། ཚོད་དཔག་དེའི་མཇུག་འབྲས་ནི་ཤིན་ཏུ་ལྡོག་ཟླ་ཞིག་ཆགས་ཡོད། ད་ཆར་རྒྱ་ནག་ནི་འཛམ་གླིང་ཐོག་དཔལ་འབྱོར་ཨང་གཉིས་པའི་གྲས་སུ་བསླེབས་ཡོད་ཀྱང་། ཁོང་ཚོས་ཆབ་སྲིད་ལ་འགྱུར་བ་ཅི་ཡང་བཏང་མེད་པ་མ་ཟད། སྲིད་དབང་སྒེར་འཛིན་གྱི་ནུས་ཤུགས་ཆེ་རུ་གཏོང་བཞིན་ཡོད། གནས་སྟངས་དེར་བལྟས་ན། ཨ་རིའི་གཞུང་གིས་རྒྱ་ནག་ལ་འཛིན་པའི་རེ་བ་དང་འཆར་སྣང་དེ་ནོར་འཁྲུལ་ཞིག་ཆགས་ཡོད།  དེའི་ཕྱིར། ཨ་རྒྱ་གཉིས་ཀྱི་ད་ལྟའི་འབྲེལ་ལམ་དེ་སུས་ཀྱང་གཏོར་སྐྱོན་གཏོང་མི་ཐུབ་པར་མཁྲེགས་པོ་ཞིག་ཏུ་གྱུར་ཡོད། ཅེས་དང་།  མཐར་ཁོང་གིས་ད་ལྟའི་སྲིད་འཛིན་གཞོན་པ་ཞི་ཅིན་ཕིན་ནི ༢༠༡༢ ལོའི་རྒྱ་ནག་སྲིད་འཛིན་དུ་འདེམས་ཐོན་བྱུང་ཚེ། བོད་དོན་ཐད་སྔར་ལས་ལྷག་པའི་གནས་སྟངས་ཞིག་འབྱུང་རྒྱུའི་རེ་བ་ཡོད། རྒྱུ་མཚན་ནི་ཞི་ཅིན་ཕིན་སྒེར་ངོས་ནས་མི་ཡག་པོ་ཡོད་པ་ཙམ་དུ་མ་ཟད། ཁོང་གི་ཕ་ལགས་༧གོང་ས་མཆོག་གི་ནང་མི་དང་བོད་ཀྱི་མཐོ་རིམ་མི་སྣར་འབྲེལ་བ་གཏིང་ཟབ་ཅིག་ཡོད། རྒྱུ་མཚན་མང་པོ་ཞིག་ལ་བརྟེན་ཏེ་བོད་དོན་ཐོག་རེ་བ་གང་འཚམ་ཡོད། གནས་སྟངས་གང་འདྲ་ཞིག་ཡིན་རུང་། ད་ལྟ་ང་ཚོས་བསྒྲུབ་དགོས་རྒྱུ་ནི་བོད་རྒྱ་མི་རིགས་བར་གྲོགས་པོ་མང་པོ་བཟོ་དགོས་ཀྱི་འདུག ངོ་ཤེས་མང་དུ་སོང་ཚེ་བོད་ཀྱི་གནད་དོན་ཐད་གོ་རྟོགས་ཆེ་རུ་འགྲོ་གི་རེད། ཅེས་བརྗོད་བྱུང་།

འདི་གའི་གསར་འགོད་པས་ཕྱི་དྲིལ་རྒྱ་ཡིག་སྡེ་ཚན་གྱི་འགན་འཛིན་སངས་རྒྱས་སྐྱབས་ལགས་སུ་ཐེངས་འདིའི་བགྲོ་གླེང་སྐོར་བཅར་འདྲི་ཞུས་པར་ཁོང་གིས་གསུངས་དོན། རྒྱ་རིགས་དེ་ཚོ་བོད་དོན་རྒྱབ་སྐྱོར་བ་ཆགས་ཡོད་ཀྱང་སྔོན་ཆད་ངྷ་སར་ཕེབས་མྱོེང་མེད་སྟབས། བཙན་བྱོལ་གཞུང་གི་འཛིན་སྐྱོང་སྒྲིག་འཛུགས་དང་། ༧གོང་ས་མཆོག་གི་དགོངས་གཞི། དེ་བཞིན། བོད་པ་སྐྱབས་བཅོལ་བའི་གནས་སྟངས་བཅས་ངོ་སྤྲོད་བྱ་རྒྱུ་གལ་ཆེན་དུ་མཐོང་ནས་བགྲོ་གླེང་འདི་གོ་སྒྲིག་ཞུས་པ་ཡིན་ཞེས་དང་། རྒྱ་རིགས་བོད་དོན་རྒྱབ་སྐྱོར་བས་གཞུང་ཞབས་ལས་བྱེད་ཚོར་བོད་དོན་བགྲོ་གླེང་གནང་བ་འདིས་འབྱུང་འགྱུར་བོད་རྒྱ་མི་རིགས་ཀྱི་འབྲེལ་བའི་ཐད་ཤུགས་རྐྱེན་འབྱུང་མིན་སྐོར་དྲིས་སྐབས་ཁོང་གིས། དེ་རིང་གི་བགྲོ་གླེང་འདི་ཁོ་ན་ཙམ་གྱིས་བོད་དོན་ཐོག་ཤུགས་རྐྱེན་ཆེན་པོ་འཇོག་རྒྱུར་ཁག་པོ་རེད། ཡིན་ནའང་། འབྲེལ་བ་འདི་བརྒྱུད་མ་འོངས་པར་བོད་རྒྱ་མི་རིགས་བར་འབྲེལ་བ་ཡག་ཏུ་འགྲོ་རྒྱུ་དང་། ལྷག་པར་དུ་ཁོང་ཚོའི་བོད་དོན་སྐོར་གྱི་ལས་འགུལ་ཕྱག་འདིས་རྒྱ་ནག་ནང་དུའང་ཕན་ཐོགས་ཡོད་ངེས་རེད། ཅེས་གསུངས་སོང་།

གསར་འགོད་པ། དཔལ་ལྡན།