སྐད་དང་ཡི་གེ་རྒྱུན་འཛིན་བྱས་ཏེ་རང་སྲུང་བྱ་དགོས་ཟེར།

བོད་ནང་གི་སློབ་ཕྲུག་ཚོའི་ལས་འགུལ་ལ་གདུང་སེམས་མཉམ་སྐྱེད་མཚོན་ཆེད། རང་བཙན་འཐབ་རྩོད་པ་བསྟན་འཛིན་བརྩོན་འགྲུས་དང་སྒྱུ་རྩལ་པ་མགོ་ལོག་ངྷ་བྷེ་སོགས་གཙོས་པའི་རྩོམ་པ་པོ་དང་སྙན་ངག་པ་སྐོར་ཞིག་གིས་བོད་དབྱིན་གཉིས་ཐོག་ནས་སྙན་ངག་གྱེར་འདོན་དང་གླུ་གཞས་གཏོང་བ་སོགས་ཀྱི་འདུ་འཛོམས་ཤིག་གནང་ཡོད།

ངྷ་སའི་དཔེ་མཛོད་ཁང་དང་ན་གཞོན་དང་བླང་རུ་ཁག་བཅས་ཀྱི་གོ་སྒྲིག་འོག ཁ་སང་ཕྱི་ཚེས་ ༡༤ ཉིན་ངྷ་ས་དོམ་ཁྲ་གསོལ་མགྲོན་ཁང་དུ་ངྷ་ས་ཁུལ་གྱི་རྩོམ་པ་པོ་དང་སྒྱུ་རྩལ་པ་སྐོར་ཞིག་གིས་བོད་ནང་གི་སློབ་ཕྲུག་ཚོའི་སྐད་ཡིག་སྲུང་སྐྱོབ་ཀྱི་ལས་འགུལ་ལ་རྒྱབ་དཔུང་མཚོན་པའི་སྙན་ངག་གྱེར་འདོན་གྱི་འདུ་འཛོམས་ཤིག་གནང་ཡོད། ལས་རིམ་གྱི་ཐོག་མར་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཀླུ་མཁར་བྱམས་ལགས་ཀྱིས་ལོ་རྒྱུས་དང་འབྲེལ་བོད་སྐད་ཡིག་ལ་ཕྱི་ཕྱོགས་ཀྱི་ཤུགས་རྐྱེན་ཐེབས་ཚུལ་བརྗོད་དོན། བོད་བཙན་པོའི་སྲིད་དབང་ཐོར་ཏེ་ས་སྐྱས་བོད་ཀྱི་སྲིད་དབང་བཟུང་སྐབས། སོག་པོའི་དབང་ཤུགས་བོད་དང་ཨེ་ཤ་ཡའི་ས་ཁུལ་མང་པོར་བསླེབས་ཀྱང་། དབང་སྒྱུར་བྱེད་ཡུལ་གྱི་ཆོས་རིག་གཞུང་། གྱོན་གོས། སྐད་ཡིག་སོགས་ལ་སློབ་སྦྱོང་བྱས་ཏེ། སོག་པོ་རང་གི་སྐད་ཡིག་དང་ཆོས་རིག་གི་ཆུ་ཚད་གོང་མཐོར་བཏང་བ་ལས་གཞན་གྱི་སྐད་ཡིག་རིག་གནས་རྩ་མེད་བཟོ་བའི་སྲིད་ཇུས་བཟུང་མེད། དེ་བཞིན། མན་ཇུའི་མི་རིགས་ཀྱིས་རྒྱ་ནག་ལ་དབང་སྒྱུར་བྱས་ཀྱང་། རྒྱ་ནག་གི་སྐད་ཡིག་དང་གོམས་སྲོལ། ཟ་སྟངས་སྡོད་སྟངས་སོགས་སྦྱང་སྟེ་རྒྱ་ནག་གི་སྐད་ཡིག་དང་རིག་གཞུང་རྩ་མེད་བཟོ་བའི་སྲིད་ཇུས་སྤེལ་མེད། ཅེས་དང་།

ཕྱི་ལོ་ ༡༧༢༥ ནས་ ༡༩༡༠ བར་མན་ཇུའི་རྒྱལ་རབས་ཀྱི་མཇུག་ཏུ་བོད་མདོ་སྟོད་སྨད་ཁུལ་ལ་ཌོ་རོ་ཧྤིན་དང་མཱ་པུ་ཧྥིང་གིས་བཙན་འཛུལ་བྱས་སྐབས། ཆབ་སྲིད་དབང་ཤུགས་ཙམ་དུ་མ་ཟད་སྐད་ཡིག་རིག་གཞུང་རྩ་མེད་བཟོ་བའི་སྲིད་ཇུས་སྤེལ་འདུག དཔེར་ན། ཁམས་དང་ཨ་མདོའི་ས་ཁུལ་མང་པོར་རྒྱའི་སློབ་གྲྭ་བཙུགས་པ་དང་། རྒྱ་ཡིག་རྒྱ་སྐད་བེད་སྤྱོད་བྱེད་དུ་བཅུག་ཡོད་པ་མ་ཟད། ལྷ་ས་ཁུལ་ལའང་རྒྱའི་སློབ་གྲྭ་མགོ་འཛུགས་བྱས་ཡོད། རྗེས་སུ་གོ་མིན་ཏང་གི་དབང་ཤུགས་བོད་ལ་བསླེབས་སྐབས་ཀྱང་། ད་ལྟའི་རྒྱ་གཞུང་ལྟར་བོད་ཀྱི་སྐད་ཡིག་རྩ་མེད་བཟོ་བའི་སྲིད་ཇུས་ལག་བསྟར་བྱས་འདུག སྐབས་དེར་ལྷ་སར་རྒྱ་གར་བརྒྱུད་དབྱིན་ཇིའི་ཤུགས་རྐྱེན་ཕྲན་བུ་བསླེབས་ཡོད། དཔེར་ན། ཇ་ཕོར་ལ་གྷི་ལ་སི་དང་གོ་ལྷམ་ལ་འཇུར་ཏ་ཟེར་བ་འདྲ་བོ་རེད། ཨ་མདོ་ཁུལ་ལ་མཚོན་ནའང་རྒྱ་སྐད་ཀྱི་ཤན་ཞུགས་ཏེ། ཡང་ལཱ་དང་ཡང་ཧྭོ། ཡང་ཐཱང་ཟེར་བའི་ཐ་སྙད་མང་པོ་ཞིག་ཡོད།

ད་ང་ཚོས་ཧ་གོ་དགོས་བ་ཞིག་ནི། སྔོན་མ་ཌོ་རོ་ཧྤིན་དང་མཱ་པུ་ཧྥིང་། གོ་མིན་ཏང་། གུང་ཁྲན་ཏང་རིམ་པར་རྒྱ་ནག་གིས་བོད་ཀྱི་སྐད་ཡིག་རྩ་མེད་བཟོ་བའི་སྲིད་ཇུས་རིམ་བཞིན་ལག་བསྟར་བྱས་ཀྱང་། དེ་རིང་བོད་སྐད་ཡིག་གིས་དུས་རབས་ཉེར་གཅིག་པའི་དཔལ་ཡོན་གྱི་རྗེས་ཟིན་གྱི་ཡོད་མེད་གང་ལྟར་ཡང་། རྩ་བརླག་ཏུ་ཕྱིན་མེད་པ་འདི་བོད་སྐད་ཡིག་རང་གི་ནུས་པ་ལ་བརྟེན་ནས་གསོན་གནས་ཐུབ་པ་ཞིག་རེད་མ་གཏོགས་སྐད་ཡིག་གཞན་ཞིག་དང་། མི་རིགས་གཞན་གྱི་རོགས་རམ་ལ་བརྟེན་ནས་བྱུང་པ་ཞིག་རྩ་བ་ནས་མ་རེད། ད་མ་འོངས་པར་བོད་སྐད་ཡིག་འདི་འཚོ་གནས་ཐུབ་དང་མ་ཐུབ་ཟེར་བ་དེ་ལ་ང་ཚོས་ལྟ་སྟངས་གཉིས་འཛིན་དགོས་པ་ཞིག་རེད། གཅིག་མི་སེར་སྤེལ་ཡུལ་གྱིས་སོ་སོའི་ངོ་བོ་དམ་སྲུང་གིས་མི་སེར་སྤེལ་མཁན་གྱི་རིག་གནས་མ་ལག་དང་བཅས་བར་མཐའ་གཅིག་ཏུ་ངོ་རྒོལ་བྱ་རྒྱུ་དེ་དང་། ཆིག་ཤོས་དེ་སོ་སོ་མི་སེར་སྤེལ་མཁན་གྱི་ནང་དུ་འཛུལ་ཏེ་དེའི་རིག་གནས་དང་གོམས་སྲོལ་སོགས་སྦྱང་སྟེ་མི་སེར་སྤེལ་མཁན་ལ་དབང་སྒྱུ་བྱ་རྒྱུ་དེ་གཉིས་རེད། ཅེས་ངོ་སྤྲོད་གནང་བྱུང་།

སྐབས་དེར་འདི་གའི་གསར་འགོད་པས་སྒྱུ་རྩལ་པ་མགོ་ལོག་ངྷ་བྷེ་ལགས་སུ་སྐད་ཡིག་དང་མི་རིགས་བར་གྱི་འབྲེལ་བའི་སྐོར་ལ་བཅར་འདྲི་ཞུས་སྐབས་ཁོང་གིས། ང་ཚོའི་སྤྱི་ཚོགས་ནང་ཤ་དང་ཁྲག་རྒྱུན་གཅིག་པའི་བརྩེ་དུང་ཞིག་དང་། མི་རིགས་ཀྱི་ལ་རྒྱ་བརྟན་པོ་ཞིག་ཡོད་ན། ཆོས་དང་རིགས་གཞུང་། སྐད་ཡིག་སོགས་ཉམས་ཀྱང་དེ་ཙམ་གནད་འགག་མ་རེད་ཟེར་མཁན་དང་བསམ་མཁན་ཡོད་པ་དེ་ཚོ་ནོར་བ་རེད། མན་ཇུའི་མི་རིགས་ཉམས་སོང་ཟེར་བ་དེ་ཡང་སྐད་ཡིག་རིག་གཞུང་ལ་ཐུག་ཡོད། རྒྱ་ནག་གི་ཐོབ་ཐང་ལག་འཁྱེར་ལྟར་ན། ད་ཆར་མན་ཇུའི་མི་རིགས་འཕེལ་བཞིན་ཡོད་ཀྱང་། མན་ཇུའི་མི་རིགས་ཀྱི་སྐད་དང་ཡི་གེ་ཉམས་སོང་བས་དབང་གིས་མན་ཇུའི་མི་རིགས་ཚར་སོང་ཟེར་གྱི་ཡོད། བོད་པའི་ཆོས་དང་རིག་གཞུང་། སྐད་དང་ཡི་གེ་སོགས་ནི་ད་ཆར་གོ་ལའི་ཁྱོན་ཡོངས་ལ་ཕན་ཐོགས་ཡོད་པ་ཞིག་ཆགས་ཡོད། མི་རིགས་ཤིག་གི་རྩ་དོན་དང་འཚོ་གནས་ལ་འཐབ་རྩོད་བྱ་དགོས་ན། དམག་དཔུང་གི་སྟོབས་ཤུགས་དང་། ཡང་ན་དཔལ་འབྱོར་གྱི་སྟོབས་ཤུགས་ལ་བརྟེན་དགོས། དེ་གཉིས་ཀ་མེད་པའི་ང་ཚོ་ལྟ་བུར་མཚོན་ན། མི་རིགས་ཀྱི་ཁྱད་ཆོས་འབུར་དུ་ཐོན་པའི་ཆོས་དང་རིག་གཞུང་། སྐད་དང་ཡི་གེ་རྒྱུན་འཛིན་བྱས་ཏེ་རང་སྲུང་བྱ་དགོས། ཞེས་བརྗོད་བྱུང་།

ཡང་གསར་འགོད་པས་ཨ་ཚོགས་ཀླུ་མཁར་བྱམས་ལགས་སུ་བོད་པའི་སྐད་ཡིག་དང་བོད་པའི་རྩ་དོན་གཉིས་བར་གྱི་འབྲེལ་བའི་སྐོར་ལ་བཅར་འདྲི་ཞུས་པར་ཁོང་གིས། མི་རིགས་ཤིག་ལ་མཚོན་ན། དེའི་བདག་དབང་དང་འཚོ་གནས་ཀྱི་འཐབ་རྩོད་ཁྲོད་སྐད་ཡིག་དང་རིག་གཞུང་གལ་ཆེན་པོ་རེད། ཡིན་ནའང་སོ་སོའི་མི་རིགས་ལ་འཛིན་པའི་ཤ་དང་རུས་པའི་བརྩེ་དུང་ཆ་རྐྱེན་ཨང་དང་པོ་རེད་དྲན་གྱི་ཡོད། དཔེར་ན། བོད་ཡིག་བོད་སྐད་ཤེས་པ། མཐའ་ན་བོད་ཀྱི་བླ་མ་དང་ཆོས་གཟུགས་གྲྭ་གཟུགས་ཡིན་མཁན་མང་པོ་ཞིག་རྒྱ་ནག་གི་ལག་ཆར་གྱུར་ཡོད་པ་དེ་ཚོ་རེད། དེ་ལས་བོད་ཡིག་བོད་སྐད་དེ་ཙམ་མི་ཤེས་རུང་བོད་ལ་ཤ་ཁྲག་རུས་གསུམ་གྱི་གཏིང་ནས་བརྩེ་དུང་དང་ལ་ཞེན་ཡོད་མཁན་དེ་ཚོ་ལྡབ་འགྱུར་གྱིས་རྩ་དོན་ཐད་ནས་བཤད་ན་ཡག་པ་ཡོད་རེད། རྩོམ་པ་པོ་འོད་ཟེར་ལགས་དང་ཨ་ཁུ་ཡིད་དམ་ཚེ་རིང་སོགས་ཀྱིས་རྒྱ་ཡིག་རྒྱ་སྐད་ལས་བོད་ཡིག་དེ་ཙམ་ཤེས་ཀྱི་མེད་པ་དང་། དེ་བཞིན། ཟླ་བ་ནོར་བུ་དང་འཇམ་དབྱངས་ནོར་བུ་སོགས་དབྱིན་ཡིག་ལས་བོད་ཡིག་ལ་ཚད་མཐོ་བོ་མ་རེད། ཁོང་ཚོས་བོད་མི་རིགས་ཀྱི་རྩ་དོན་ལ་འཛིན་པའི་འདུ་ཤེས་དང་མི་རིགས་ཀྱི་འཚོ་གནས་ཐད་ནས་འཐབ་རྩོད་བྱེད་སྟངས་ཡོངས་གྲགས་ཀྱིས་གུས་བཀུར་ཞུ་འོས་པ་ཞིག་རེད། ཅེས་བརྗོད་བྱུང་།

གསར་འགོད་པ། བནྡེ་སྐྱབས།