རྒྱལ་ས་ལྡི་ལི་ཁུལ་གྱི་མཛད་འཕྲིན།

ཉི་ཧོང་ནང་གི་༧གོང་ས་མཆོག་གི་མཛད་འཕྲིན་ལེགས་པར་གྲུབ་རྗེས་ཕྱིར་རྒྱ་གར་གྱི་རྒྱལ་ས་ལྡི་ལིར་ཞབས་སོར་བཀོད་ཡོད་པ་དང་། ཁ་སང་ཕྱི་ཚེས་ ༡༨ ཉིན་རྒྱལ་ས་ལྡི་ལི་རུ་རྟེན་གཞི་བྱས་པའི་མཐུན་སྒྲིལ་ཐེབས་རྩ་ཁང་གིས་ ༢༠༡༠ ལོའི་ལོའི་མཱ་ངྷིར་ཁྲི་རེ་སཱའི་ Mother Teresa དྲན་རྟེན་གྱི་རྒྱལ་སྤྱིའི་དྲང་བདེན་སྤྱི་ཚོགས་ཞབས་ཞུའི་གཟེངས་རྟགས་ཐེངས་ ༤ དེ་༸གོང་ས་མཆོག་ལ་ཕུལ་ཡོད་ཅིང་། ཐེངས་འདིའི་མཛད་སྒོའི་སྟེང་རྒྱ་གར་གྱི་ཆེས་མཐོད་ཁྲིམས་དཔོན་ཟུར་པ་སྐུ་ཞབས་བྷོལ་མ་མཆོག་གཙོས། བྷར་ཛིལ་དང་པོ་ལན་ཌི་བཅས་རྒྱལ་ཁབ་ཁག་གི་གནད་ཡོད་མི་སྣ་དང་། ཀ་ལི་ཀ་ཏའི་ཡུ་ཤུ་དགེ་རྩ་ཚོགས་པའི་བཙུན་མ་དང་རྒྱ་གར་གྱི་འཁྲབ་སྟོན་པ་གྲགས་ཅན་རཱ་ནེ་མོའུ་གྷི་བཅས་ཕེབས་ཡོད་འདུག

གཟེངས་རྟགས་འབུལ་བཞེས་སྐབས་༸གོང་ས་མཆོག་གིས། ཆོས་ལུགས་འདྲ་མིན་ཁག་ཚང་མར་མིའི་རིན་ཐང་གོང་མཐོ་རུ་གཏོང་བའི་ནུས་པ་ཞིག་ཡོད་པ་དེ་བྱམས་བརྩེ་དང་མི་ཚེར་བདེ་སྐྱིད་སྐྲུན་ཐབས་ཀྱི་སྐོར་ཡིན། འདས་པའི་མི་ལོ་དུ་མའི་རིང་ཡུ་ཤུ་ཨ་ནེ་གྲགས་ཅན་མཱ་ངྷིར་ཁྲི་རེ་སྰ་ཡིས་དེའི་ཐོག་ལ་རླབས་ཆེན་གྱི་ཕྱག་ལས་གནང་སྟེ། སྐྱེ་བོ་ཁྲི་ཕྲག་མང་པོའི་སྡུག་བསྔལ་སེལ་ཡོད། མ་འོངས་པར་ཡུ་ཤུ་ཨ་ནེ་རྣམས་པས་ཀྱང་མཱ་ངྷི་ཁྲི་རེ་སཱ་ཡིས་སྙིང་སྟོབས་མིག་དཔེར་བཟུང་སྟེ། དབུལ་ཞིང་ཕོངས་པའི་མི་མང་ལ་ཞབས་ཞུ་གང་ཡོང་བསྒྲུབ་དགོས་པའི་ལམ་སྟོན་བཀའ་སློབ་གནང་ཡོད་པ་རེད།

དེ་རིང་ཕྱི་ཚེས་ ༡༩ ཉིན་ནས་ཉིན་གྲངས་ལྔའི་རིང་༸གོང་ས་མཆོག་གིས། རྒྱ་གར་རྒྱལ་ཡོངས་ཀྱི་གསར་ཁང་གྲགས་ཅན་ཧིན་རྡུ་སི་ཐན་དུས་བབ་ (Hindustan Times) ཀྱི་སྐབས་བརྒྱད་པའི་དབུ་ཁྲིད་ལྷན་ཚོགས་ཀྱི་དབུ་འབྱེད་མཛད་སྒོར་ཆིབས་བསྒྱུར་གྱིས་ ༼དཀའ་རྙོག་ཅན་གྱི་དུས་ཚོད་ནང་བདེ་སྐྱིད་ཀྱི་ཐབས་ལམ༽ ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་དང་། ལྡི་ལི་གསར་པའི་སྤྱི་ཚོགས་ཚན་རིག་སློབ་གཉེར་ཁང་དབུ་བརྙེས་ཏེ་ལོ་ངོ་ ༢༥ འཁོར་བའི་དུས་དྲན་མཛད་སྒོར་ཆིབས་སྒྱུར་གྱིས་༼ འགྲོ་བ་མིས་འཛམ་གླིང་གི་ཞི་བདེ་བསྐྲུན་ཐབས ༽ ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ། དེ་བཞིན། ཕྱི་ཚེས་ ༢༠ ནས་ ༢༣ བར་ཉིན་གྲངས་བཞི་རིང་སེམས་དང་སྲོག་གི་ཚན་རིག་པའི་ཚོགས་འདུ་ཐེངས་ཉེར་གཉིས་པའི་ཐོག་མཉམ་ཞུགས་གནང་འཆར་ཡོད་པ་དང་། སྐབས་དེ་དག་དང་སྟབས་བསྟུན་ཏེ་ཇ་མི་ཡ་མི་ལི་ཡ་ཨི་སི་ལ་མི་ཡ Jamia Millia Islamia ཞེས་པའི་ཁ་ཆེའི་གཙུག་ལག་སློབ་གཉེར་ཁང་གིས་༸གོང་ས་མཆོག་ལ་མཁས་དབང་གི་ཆེ་བསྟོད་ཀྱི་ཕྱག་འཁྱེར་ཞིག་ཀྱང་འབུལ་འཆར་ཡོད་འདུག 

གསར་འགོད་པ་དོན་གོས་བསྡུ་སྒྲིག་བྱས།