༼ ཕྱི་ལོ་ ༡༩༧༩ ནས་ ༡༩༩༣ བར་རྫོང་ཞིག་གི་མི་རིགས་སློབ་འབྲིང་གི་བོད་ཡིག་དགེ་རྒན་བྱས་པའི་མཐོང་ཐོས་ཟུར་ཙམ་གླེང་བ།༽
འགུ་ལོག་དམ་ཆོས་དཔལ་བཟང༌།
ཕྱི་ལོ་ ༡༩༥༨ ལོར་མདོ་སྟོད་སྨད་ས་ཁུལ་དུ་དུས་འགྱུར་བྱུང་བ་ནས་བཟུང༌། འདོད་པ་མེད་བཞིན་དུ་མི་མང་སྤྱི་ཁང་གསར་འཛུགས་བྱས་པ་དང༌། ཞིང་འབྲོག་ཚང་མས་ཐབ་ཆེན་ནང་མཉམ་ཟ་མཉམ་འཐུང་བྱེད་དགོས་བྱུང༌། ས་གནས་ཁག་ལ་སློབ་ཆུང་གི་སྒོ་བྱང་ཡོད་པ་ནས་དགེ་རྒན་དང་སློབ་དེབ་མེད་པའི་གནས་སྟངས་འོག ༡༩༦༢ ལོའི་བར་སློབ་ཆུང་སློབ་གྲྭ་མིང་ཙམ་ལས་མེད་པ་ནི་ཞིང་ཆེན་ནང་ཁུལ་གྱི་ཡིག་ཆ་ཁག་ལ་གསལ་བོ་ཡིན། ༡༩༦༤ ལོར་ཡང་བསྐྱར་དམངས་སྒྲུབ་སྦྲ་གུར་སློབ་ཆུང་བཙུགས་ན་ཡང་། ཞིང་འབྲོག་གི་ས་ཁུལ་ལ་མུ་གེའི་འཇིགས་པ་ཆེན་པོ་བྱུང་སྟེ། སློབ་ལོ་རན་པའི་སློབ་མ་བརྒྱ་ཆ་ ༢༥ ཡང་ཟིན་མེད་པ་དང༌། ཡོད་པ་ཚོས་ཀྱང་ཀ་ཁ་ཀློག་ཤེས་པ་ཙམ་ཡིན།
༡༩༦༦ ལོའི་ཟླ་ ༥ ཙམ་ནས་རྒྱལ་ཁབ་ཀྱི་ཀྲུའུ་ཞི་མའོ་ཙེ་ཏུང་གིས་མགོ་ཁྲིད་དེ་རིག་གནས་གསར་བརྗེའི་ཆེན་པོའི་རླུང་འཚུབ་དེ་ལྡིང་བ་རེད། རྒྱ་ནག་རྒྱལ་ཡོངས་ཀྱི་སློབ་གསོའི་ཁ་ཕྱོགས་ལ་འགྱུར་བ་ཕྱིན་ཞིང་། ཏང་ནང་གི་མ་རྩ་རིང་ལུགས་ཀྱི་དབང་འཛིན་པ་རྩ་གཏོར་བྱ་རྒྱུ་དམིགས་ཡུལ་ཏུ་བཟུང་སྟེ། ཏང་སྲིད་དང༌། བཟོ་ཞིང་དམག་གསུམ། སློབ་གྲྭ་ཆེ་འབྲིང་བཅས་ཀྱི་ཁ་ཕྱོགས་རིག་གནས་གསར་བརྗེ་ཆེན་པོས་རྙིང་བཞི་རྩ་གཏོར་བྱེད་བའི་ལས་འགུལ་ལ་བསྒྱུར། དེ་མ་ཐག་མི་རིགས་སློབ་གསོ་མུན་ནག་གི་གཟེབ་ཏུ་ལྷ་འདྲེ་གདོན་བགེགས་ཀྱི་གྲས་སུ་དགག་པ་རྒྱག་ཡུལ་ལྟེ་བར་གྱུར། སྐབས་དེའི་སློབ་གྲྭ་ཆེན་མོའི་མིང་ཡོད་ཀྱང་སློབ་གསོའི་ལས་དོན་གྲལ་རིམ་འཐབ་རྩོད་རེད། མཐར་ཕྱིན་སློབ་མའི་ལག་འཁྱེར་ཡང་རིག་གནས་གསར་བརྗེའི་སློབ་ཆེན་ལག་འཁྱེར་ཡིན། སྐབས་དེར་རྒྱལ་ཡོངས་ཀྱིས་གྲལ་རིམ་འཐབ་རྩོད་རུས་རྐང་དང༌། ཐོན་སྐྱེད་དང་མི་རིགས་སློབ་གསོ་ཡན་ལག་ཏུ་བཟུང་བ་རེད། ༡༩༦༦ ལོ་ནས་ ༡༩༧༦ བར་ལོ་བཅུའི་རིང་གི་རིག་གནས་གསར་བརྗེ་ཆེན་པའི་སྐབས། སློབ་གྲྭ་བ་རྣམས་ཀྱིས་མའོ་ཙེ་ཏུང་གི་གསུང་བཏུས་རྐྱང་རྐྱང་བློ་འཛིན་བྱེད་རྒྱུ་དང༌། གྲལ་རིམ་འཐབ་རྩོད་རྩ་གནད་དུ་བཟུང་ནས། དཔལ་ཡོན་ལྡན་པའི་མི་རིགས་སློབ་གསོའི་ལྟེ་གནས། རྡུང་བཅོམ་འཕྲོག་གསུམ་གྱི་གཡུལ་ས་ཞིག་ཏུ་གྱུར་བ་རེད།
ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ཚོགས་པ་དང༌། ༡༩༨༠ ལོ་ནས་མཚོ་སྔོན་ཞིང་ཆེན་གྱི་ཁུལ་སོ་སོའི་རྫོང་ཁག་རྣམས་ལ་བཅའ་སྡོད་མི་རིགས་སློབ་འབྲིང་གསར་འཛུགས་བྱེད་པའི་མགོ་ཚུགས། དེ་ནས་བཟུང་ལོ་ལྔའི་ནང་ཧ་ལམ་ཆ་ཚང་ལག་ལེན་ཐོབ་པ་བྱས། ཞིང་ལྗོངས་ལྔའི་མཉམ་སྒྲིག་བྱས་པའི་སློབ་ཚན་བོད་ཡིག་ཐོག་སློབ་ཁྲིད་བྱེད་མགོ་བཙུགས་ཏེ། བོད་ཡིག་དང་རྒྱ་ཡིག་རྨང་གཞི་བྱས་ཤིང་། གཞན་རྩིས་རིག དངོས་ཁམས། རྫས་འགྱུར། ས་རྒྱུས། ལོ་རྒྱུས། ཆབ་སྲིད་རྒྱུན་ཤེས་སོགས་བོད་ཡིག་སློབ་དེབ་ཐོག་སློབ་ཁྲིད་བྱས་ཡོད། དེ་དང་ཆབས་ཅིག་ཁུལ་སོ་སོར་ཆེད་ལས་མི་རིགས་དང་དགེ་འོས་མཐོ་འབྲིང་སློབ་གྲྭ་དང་འཕྲོད་བསྟེན་མཐོ་འབྲིང་སློབ་གྲྭ་བཙུགས། ༡༩༨༠ ལོ་ནས་ ༢༠༡༠ ལོའི་བར་མཚོ་སྔོན་ཞིང་ཆེན་གྱི་མི་རིགས་སློབ་གསོ་ལ་རྩ་བའི་འགྱུར་བ་ཆེན་པོ་བཏང་མེད་པར་མ་ཟད། བོད་རྒྱ་སྐད་གཉིས་ཐོག་མཁས་དབང་དང་ཤེས་ལྡན་མི་སྣ་མང་པོ་ཞིག་སྐྱེད་སྲིང་བྱས་ཡོད།
དཔྱད་གཞིའི་ཡིག་ཆ་མགོ་ལོག་ཁུལ་གྱི་མི་རིགས་སློབ་གསོའི་སྐོར་ཡིན་ཡང་། ལག་ལེན་ཐོག་མཚོ་སྔོན་ཞིང་ཆེན་གྱི་བོད་རྒྱ་སྐད་གཉིས་མཉམ་སྤྱོད་བྱེད་པའི་ས་ཁུལ་ཚང་མར་ཧ་ལམ་གཅིག་མཚུངས་སུ་ཁྱབ་ཡོད་པ་ཞིག་ལ་ངོས་འཛིན་བྱས་ཆོག
མཚོ་སྔོན་ཞིང་ཆེན་ཏང་ཨུ་དང་སྲིད་གཞུང་གིས་ ༢༠༡༠ ལོའི་ཟླ་ ༩ ཚེས་ ༡༢ ཉིན། ཕྱི་ལོ་ ༢༠༡༠ ནས་ ༢༠༢༠ བར་གྱི་མཚོ་སྔོན་ཞིང་ཆེན་དུས་ཡུན་འབྲིང་རིང་གི་སློབ་གསོའི་བཅོས་བསྒྱུར་དང་འཕེལ་རྒྱས་འཆར་འགོད་རྩ་གནད་ཟེར་བའི་ཡིག་ཆ་ཞིག་འགྲེམས་སྤེལ་བྱས་པའི་ནང༌། ཐོད་རྒལ་བཞི་དང༌། རྨང་གཞི་དྲུག མཐོར་འདེགས་གཉིས་མངོན་འགྱུར་བྱེད་པ་བརྗོད་བྱ་གཙོ་བོར་བཟུང་ཡོད། དེའི་ནང་དོན་མདོར་བསྡུས་ན། སློབ་གྲྭ་ཆུང་འབྲིང་གི་སློབ་གསོའི་སྒྲིག་གཞི་སྙོམས་སྒྲིག་ལ་སྐུལ་འདེད་བྱེད་པ་ཇེ་མགྱོགས་སུ་གཏོང་རྒྱུ་ཐོད་རྒལ། སྐད་གཉིས་སློབ་གསོར་བཅོས་བསྒྱུར་དང་ཤུགས་སྣོན་ཐོད་རྒལ། སྟོབས་ཤུགས་ཞན་སར་ཤུགས་སྣོན་བྱེད་རྒྱུ་ཐོད་རྒལ། དགེ་རྒན་གྱི་དཔུང་ཁག་འཛུགས་སྐྲུན་ལ་ཤུགས་སྣོན་ཐོད་རྒལ་བྱ་དགོས་པ་བཅས། དེ་ཡང་ ༢༠༡༢ ལོའི་བར་སློབ་གྲྭ་ཆུང་འབྲིང་གི་སྒྲིག་གཞི་སྙོམས་སྒྲིག་རྨང་གཞིའི་སྟེང་ཡོངས་འགྲུབ་བྱ་རྒྱུ། རྨང་གཞིའི་སློབ་མའི་ཉལ་ཁང་གི་བདེ་འཇགས་དང་རྐྱེན་ངན་མེད་པར་བཟོ་རྒྱུ་མ་ཟད། རྨང་གཞིའི་སྟེང་རྫོང་ནང་ཁུལ་གྱི་འོས་འགན་སློབ་གསོ་ཐོག་མའི་དོ་མཉམ་མངོན་གྱུར་བྱ་རྒྱུ། ༢༠༡༥ ལོའི་བར་དུ་རོང་འབྲོག་དགེ་རྒན་འཁོར་རྒྱུག་གི་གནད་དོན་ཕལ་ཆེ་བ་ཐག་གཅོད་པ་དང༌། ལོ་གཅིག་རྨང་གཞིའི་སློབ་གསོ་དང༌། མཐོ་འབྲིང་དུས་རིམ་གྱི་སློབ་གསོའི་རྨང་གཞིའི་དུས་རིམ་སྟེང་ཁྱབ་བརྡལ་གཏོང་རྒྱུ། མཐོ་རིམ་སློབ་གསོ་མང་ཚོགས་ཅན་གྱི་ཆུ་ཚད་གོམ་གང་མདུན་སྤོས་ཀྱིས་མཐོར་འདེགས་དང༌། ལོ་བཅོ་ལྔའི་ཡན་གྱི་མི་རྣམས་སློབ་གསོ་མྱོང་ཚད་ལོ་ལྟར་མཐོར་འདེགས་གཏོང་རྒྱུ། ཞིང་ཆེན་ཡོངས་ཀྱི་སློབ་གསོའི་འཕེལ་རྒྱས་སྤྱི་ཡོངས་ནས་ནུབ་རྒྱུད་ཀྱི་ཆུ་ཚད་ལ་སླེབས་སུ་འཇུག་རྒྱུ། ༢༠༢༠ ལོར་རྒྱལ་ཡོངས་ཀྱི་ཆ་སྙོམས་ཆུ་ཚད་དུ་སླེབས་པར་བརྩོན་ལེན་བྱས་ཏེ། སློབ་གསོ་དེང་རབས་ཅན་དང༌། སློབ་སྦྱོང་ཅན་གྱི་སྤྱི་ཚོགས་འགྲུབ་པའི་ཐོག་མའི་ཆ་རྐྱེན་མངོན་འགྱུར་བྱ་རྒྱུ་བཅས་རེད།
སློབ་གསོའི་བཅོས་བསྒྱུར་འཕེལ་རྒྱས་ཀྱི་དམིགས་ཡུལ་གཙོ་བོ་ནི། རྒྱལ་ཁབ་ཀྱིས་གཅིག་གྱུར་བཀོལ་སྤྱོད་བྱེད་བཞིན་པའི་སྐད་དང་ཡི་གེ་སློབ་ཁྲིད་རྒྱུན་འཁྱོངས་དང༌། དེ་དང་མཉམ་དུ་མི་རིགས་ཀྱི་སྐད་དང་ཡི་གེར་སློབ་སྦྱོང་བྱ་རྒྱུ་དང༌། གྲངས་ཉུང་མི་རིགས་ཀྱི་སློབ་མའི་རྩ་བའི་སྟེང༌། རྒྱལ་ཁབ་གཅིག་གྱུར་གྱིས་བཀོལ་སྤྱོད་བྱེད་བཞིན་པའི་སྐད་དང་ཡི་གེ་དང༌། རང་མི་རིགས་ཀྱི་སྐད་དང་ཡི་གེ་བྱང་ཆུབ་ཅིང་ཁོང་དུ་ཆུད་པ་བྱ་རྒྱུ་དེ་ཡིན་ཟེར། དཔེར་ལྟ་ས་ནི། འཛམ་གླིང་གི་མི་རིགས་མང་བའི་རྒྱལ་ཁབ་ཚང་མས་ཁྲིམས་ཐོག་ནས་གཞུང་ཕྱོགས་སྐད་ཡིག་དེ་རྒྱལ་ཁབ་ཀྱི་སྤྱི་སྐད་སྟེང་གཏན་འབེབས་བྱས་ཡོད་ལ། སློབ་གྲྭའི་སློབ་ཁྲིད་སྐད་ཡིག་དང་པོ་ཡིན་པ་དང༌། གྲངས་ཉུང་མི་རིགས་ཀྱི་སྐད་ཡིག་ཟུར་ཁྲིད་སྐད་ཡིག་ཡིན་པར་བཤད། དེར་བརྟེན་མཚོ་སྔོན་ས་ཁུལ་གྱི་སློབ་གསོ་བཅོས་བསྒྱུར་བྱས་པ་རྩ་ཁྲིམས་དང་བཅའ་ཁྲིམས་ཡོངས་སུ་མཐུན་ཡོད་པ་དང༌། མི་རིགས་སོ་སོའི་མང་ཚོགས་ཀྱི་རྩ་བའི་ཁེ་ཕན་དང༌། གྲངས་ཉུང་མི་རིགས་ཀྱི་མི་རབས་རྗེས་མ་འཚར་ལོངས་དང་གོང་འཕེལ་འབྱུང་བའི་དགོས་མཁོ་དང་ཡང་མཐུན། དེར་བརྟེན་རྒྱལ་ཁབ་གཅིག་གྱུར་དུ་བཀོལ་བའི་སྐད་ཡིག་སློབ་གསོའི་སྐད་ཡིག་ཏུ་གཏན་འཁེལ་བྱས་ཏེ། གྲངས་ཉུང་མི་རིགས་ཀྱི་སློབ་མས་རྒྱལ་ཁབ་ཀྱི་གཅིག་གྱུར་སྐད་ཡིག་དང༌། མི་རིགས་རང་གི་སྐད་ཡིག་ཅུང་སློབ་ཞོར་ལྟ་བུར་བྱང་ཆུབ་པ་བྱུང་ན། གྲངས་ཉུང་མི་རིགས་ཀྱི་སློབ་མ་དེང་རབས་སྤྱི་ཚོགས་ཀྱི་འཚོ་བར་ཞུགས་ཐུབ་པ་དང༌། སྤྱི་ཚོགས་རིང་ལུགས་ཁྲོམ་རའི་དཔལ་འབྱོར་གྱི་ཆ་རྐྱེན་འོག་གི་འགྲན་རྩོད་ནུས་པ་ཇེ་མཐོ་དང་གསོ་སྐྱོང་ལ་ཕན་པ། གྲངས་ཉུང་མི་རིགས་བྱིས་པའི་ལས་བགོས་ལ་ཕན་ཐོགས་ཆེ་བར་བཤད།
བསམ་ཡུལ་ལས་འདས་པ་ཞིག་ནི། ༢༠༡༠ ལོར་མཚོ་སྔོན་ཞིང་ཆེན་སློབ་གསོ་ཐིན་གྱིས་བོད་རྒྱའི་སྐད་ཡིག་ལ་གཙོ་ཕལ་དབྱེ་འབྱེད་ཀྱི་སློབ་དེབ་རྩོམ་སྒྲིག་དང་སློབ་ཁྲིད་བྱེད་རྒྱུའི་སྐོར་གྲོས་འཆམ་བྱུང་བ་ལ་རྨ་ལྷོ་ཁུལ་དང་མཚོ་ལྷོ་ཁུལ། མགོ་ལོག་ཁུལ་སོགས་ཀྱི་སློབ་གྲྭ་ཆེ་འབྲིང་གི་དགེ་སློབ་མང་དག་ཞིག་གིས་དེར་མོས་མཐུན་བྱས་མེད་པར་མ་ཟད། ཁུལ་གསུམ་གྱི་སློབ་གྲྭ་ཁག་དང་མཚོ་སྔོན་འཕྲོད་བསྟེན་སློབ་གྲྭ་ཆེན་མོ། ཀྲུང་དབྱང་མི་རིགས་སློབ་གྲྭ་ཆེན་མོ་སོགས་ཀྱིས་ཁྲོམ་སྐོར་སྐད་འབོད་བྱས་པའི་གནས་ཚུལ་རྒྱལ་སྤྱིའི་གསར་ལམ་ཁག་ལ་ཐོན་ཡོད། གཞིས་བྱེས་བོད་མི་ཡོངས་རྫོགས་བོད་མི་རིགས་ཀྱི་གྲུབ་ཆ་ཡིན་པ་དང༌། བོད་ཀྱི་སྐད་ཡིག་ལ་དུང་ཞེན་དང་དོ་སྣང་ཡོད་མཁན་ཡིན་པས་ན། བོད་ནང་གི་གནས་ཚུལ་ཐབས་སྐྱོ་བོ་དེ་ཐོས་མ་ཐག་ཧ་ཅང་བློ་ཕམ་སྐྱེས། མི་རིགས་སློབ་གསོ་ནི་རྒྱལ་ཁབ་ཀྱི་ཆབ་དཔལ་རིག་གསུམ་ལ་འབྲེལ་ཡོད་པ་དང༌། མེས་རྒྱལ་འཆམ་མཐུན་ལ་དེ་བས་ཀྱང་ནུས་པ་ཆེན་པོ་ཡོད། ཡིན་ནའང་ད་ལོའི་ཕྱི་ཟླ་ ༡༠ ཚེས་ ༢༠ ཉིན་གསར་ལམ་ཁག་ལ་ཐོན་གསལ་ལྟར་ན། བོད་ཡིག་ཕལ་བ་དང་རྒྱ་ཡིག་གཙོར་འཛིན་བྱེད་པའི་ལས་འཆར་ལ་དགེ་སློབ་མང་པོ་ཞིག་མོས་མཐུན་མ་བྱུང་ཁར། ཟླ་ ༡༠ ཚེས་ ༡༩ ནས་ ༢༢ བར་རྨ་ལྷོ་ཁུལ་གྱི་སློབ་གྲྭ་ནས་མགོ་བརྩམས་ཏེ། མཚོ་ལྷོ་ཁུལ་དང༌། མགོ་ལོག་ཁུལ་སོགས་ཀྱི་སློབ་མ་སྟོང་ཕྲག་འགས་མགྲིན་དབྱངས་གཅིག་འགྱུར་གྱིས་ “མི་རིགས་འདྲ་མཉམ། སྐད་རིགས་རང་དབང” ཞེས། སྐད་འབོད་ཁྲོམ་སྐོར་ཤུགས་ཆེན་བྱས་ཡོད། འདི་ལ་སློབ་མའི་ཁྱིམ་བདག་དང་དགེ་རྒན་ཚོས་ཀྱང་རྒྱབ་སྐྱོར་བྱས་ཡོད་ལ། དེ་འབྲེལ་སློབ་གསོའི་བྱ་བ་བྱེད་མཁན་མི་ཉུང་བ་ཞིག་གིས་གོང་རིམ་ལ་སྙན་ཞུ་ཕུལ་ཡོད། སློབ་གྲྭ་ཆེ་འབྲིང་གིས་སྐད་འབོད་ཁྲོམ་སྐོར་བྱེད་པ་ནི། སྤྱིར་བཏང་ཞིག་མིན་པར་རྒྱལ་ཁབ་དང་གྲངས་ཉུང་མི་རིགས་ཀྱི་སློབ་གསོ་ལ་ཤ་ཚ་བ་ཞིག་དང༌། གྲངས་ཉུང་མི་རིགས་ཀྱི་རིག་གནས་སྲུང་སྐྱོབ་ཆེད་རེད། སློབ་མ་རྣམས་ཀྱི་དམིགས་ཡུལ་ནི། མི་རིགས་ལ་འདྲ་མཉམ་ཡོང་རྒྱུ་དང་། སྐད་རིགས་ལ་རང་དབང་དགོས་པ་དེ་ཡིན། འདི་ནི་དངོས་ཡོད་གནས་ཚུལ་ཡིན་ལ། དེ་ལ་སྲིད་གཞུང་གིས་ཀྱང་ངོས་ལེན་བྱ་དགོས། བོད་མི་རིགས་འདི་ཀྲུང་གོའི་རྒྱལ་ཁབ་ནས་ཁ་བྲལ་ཏུ་འཇུག་འདོད་མེད་ན། རྩ་ཁྲིམས་དོན་ཚན་བཅུ་བའི་ནང་བཀོད་པ་བཞིན་མི་རིགས་སོ་སོའི་སྐད་ཡིག་ལ་བརྩི་བཀུར་དང་འདྲ་མཉམ་གྱི་ལྟ་ཚུལ་འཛིན་དགོས། སྐད་ཡིག་གཙོ་ཕལ་གྱི་སྲིད་ཇུས་ལག་ལེན་མཚམས་འཇོག་དང་ཕྱིར་འཐེན་མ་བྱས་ཚེ། མེས་རྒྱལ་གོང་བུ་གཅིག་གྱུར་ཡོང་བའི་ཚབ་ལ་རྒྱལ་ཁབ་དང་མི་རིགས་ཁ་བྲལ་རྒྱུ་ཉག་གཅིག་ཡིན་ལ། དེ་དང་བསྟུན་ཏེ་ཏང་དང་རྒྱལ་ཁབ་ལ་ཡིད་ཆེས་བརླག་འགྲོ་བ་ཆོས་ཉིད་དོ།
ཏང་དང་སྲིད་གཞུང་ལ་ཡིད་ཆེས་མ་བརླག་པ་ཞིག་དགོས་ན། མི་མང་གི་བསམ་འཆར་ལ་ཉན་དགོས། མི་མང་གི་བསམ་བློ་དང་བསྟུན་དགོས། མི་མང་གི་སྟོབས་ཤུགས་མེད་ན། ད་ལྟའི་རླབས་ཆེན་གྱི་ཏང་དང་རྒྱལ་ཁབ་མེད་ཅེས། མའོ་ཙེ་ཏུང་གིས་གསུངས་ཡོད། བོད་རྒྱའི་སྐད་ཡིག་གི་སློབ་ཚན་དང་སློབ་ཁྲིད། བཀོལ་སྤྱོད་བྱེད་པའི་ཁ་ཕྱོགས་ལ་གཙོ་ཕལ་བྱེད་པ་ནི། མའོ་ཙེ་ཏུང་གི་གསུང་དང་འགལ་བ། ཏང་གི་སྲིད་ཇུས་དང་འགལ་བ། རྒྱལ་ཁབ་ཀྱི་རྩ་ཁྲིམས་དང་མི་རིགས་རང་སྐྱོང་གི་བཅའ་ཁྲིམས་དང་འགལ་བ། གྲངས་ཉུང་མི་རིགས་ཀྱི་མངོན་འདོད་དང་འགལ་བ་ཡིན། རྒྱ་སྐད་གཅིག་པུས་བོད་སྐད་ཚབ་ནམ་ཡང་ཡོང་ཐབས་མེད་པས་ན། སྐད་གཉིས་ཟུང་འབྲེལ་དང་འདྲ་མཉམ་ནི་མི་རིགས་ཀྱི་རྩ་བའི་ཐོབ་ཐང་ཡིན། རྒྱལ་ཁབ་ཀྱི་རྩ་ཁྲིམས་དང་གྲངས་ཉུང་མི་རིགས་རང་སྐྱོང་གི་བཅའ་ཁྲིམས་ནང་མི་རིགས་རང་གི་སྐད་ཡིག་རྩ་འཛིན་དང་སྲུང་སྐྱོབ་བྱེད་པའི་འོས་འགན་ཡོད། རྒྱལ་ཁབ་གཅིག་གྱུར་དང་མི་རིགས་འཆམ་མཐུན་བྱེད་པ་ལ། མི་རིགས་གང་གི་སྐད་ཡིག་མི་རིགས་དེས་བེད་སྤྱོད་ཆ་ཚང་ཆོག་པ་འཛམ་གླིང་སྤྱི་མཚུངས་རེད། མི་རིགས་རང་གི་སྐད་ཡིག་དང་རྒྱལ་ཁབ་ཀྱི་རྩ་འཛིན་སྐད་ཡིག་གཉིས་ཀྱི་ཆུ་ཚད་འདྲ་མཉམ་གོང་མཐོར་སོང་ན། རྒྱལ་ཁབ་དེའི་གཟི་བརྗིད་དང་སྔོན་ཐོན་ཡིན་པའི་མཚོན་རྟགས་ལས། སྔོན་ཐོན་རྒྱལ་ཁབ་ཀྱི་རྗེས་མི་ཟིན་པ་ནམ་ཡང་ཡིན་མི་སྲིད།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དོན་ཚན་བཞི་བའི་ནང༌། མི་རིགས་ཚང་མར་རང་ཉིད་ཀྱི་སྐད་དང་ཡི་གེ་སྤྱོད་པ་དང་གོང་དུ་སྤེལ་རྒྱུའི་རང་དབང་དང་འགན་སྲུང་ཡོད། ཅེས་དང༌། མི་རིགས་ས་གནས་རང་སྐྱོང་བཅའ་ཁྲིམས་ཀྱི་དོན་ཚན་བཅུ་བའི་ནང༌། ས་གནས་དེ་གའི་མི་རིགས་ཁག་ཚང་མར་རང་ཉིད་ཀྱི་སྐད་ཡིག་བེད་སྤྱོད་དང་དར་རྒྱས་སུ་གཏོང་བའི་རང་དབང་དང་འགན་སྲུང་བྱ་རྒྱུ། ཞེས་གསལ་བ་ལྟར་གཞུང་སྒེར་ཚང་མས་བརྩི་བཀུར་དང་ལག་ལེན་བྱེད་དགོས། ཆེ་བས་ཆུང་བཙུར་མི་བྱེད་པར་རྒྱལ་བཀུར་དམངས་གཅེས་བྱ་རྒྱུ་ནི་ཀྲུང་ཧྭ་མི་རིགས་ཀྱི་སྲོལ་བཟང་ཡིན་ཟེར་བཞིན་དུ། རྩ་ཁྲིམས་ལ་ལོག་འགྲེལ་རྒྱག་ན། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་འཛམ་གླིང་གི་སྟོབས་ལྡན་རྒྱལ་ཁབ་ཡིན་ཟེར་བ་དོན་གྱིས་སྟོང་ཡོད། འདི་ནི་ཁྲིམས་ཀྱིས་རྒྱལ་ཁབ་དབང་བསྒྱུར་མ་ཡིན་པར་གང་ཟག་གིས་གྲངས་ཉུང་མི་རིགས་དབང་བསྒྱུར་བྱས་པ་ཡིན།
ངས་ཁ་སང་འདིར་མཆན་ཞིག་བྲིས་པ་ཡིན་མོད། ད་དུང་སླེབས་མི་འདུག ག་རེ་ཡིན་ནམ། བླ་རྒན་འདིའི་ཀློས་གཏམ་ལ་རྒྱབ་སྐྱོར་མ་བྱས་པས་ཡིན་ནམ། དེ་ཡིན་ན་དུས་བབ་ཚང་གིས་བོད་ཀྱི་དུས་བབ་ནི་ཁྱེད་ཀྱི་དུས་བབ་ཡིན་ཟེར་བ་དང་འགལ་ལ། ཡག་བཤད་རྐྱང་མ་གཏོགས་ཁ་གཏད་གཅོག་མི་ཆོག་པའི་བགྲོ་གླེང་བྱེད་ས་ཞིག་མང་གཙོའི་སྤྱི་ཚོགས་ཁྲོད་མི་མཛེས་པས། དྲ་ཞུགས་པ་རྣམས་ཀྱིས་དོར་བར་བྱོས་ཤིག
རྩོམ་ཡིག་ག་རེ་ཡིན་ན་ཡག་ན་ཡག་གི་དང་། བཙོག་ན་བཙོག་གི་ཟེར་བ་འདི་མིའི་མི་ཚེའི་གྲུབ་ཆ་ཞིག་ཡིན་པ་མ་ཟད། མང་གཙོའི་ཁེ་དབང་གལ་ཆེན་ཡིན། ཡིན་ན་ཡང་ཨུ་ཚང་གི་དུས་བབ་ཚང་ལ་འདི་མི་འགྲོ་བ་འདྲ། གལ་ཏེ་མཆན་འདི་ཡང་བཀག་རྒྱུ་ཡིན་ན། ཅི་དགར་བྱོས། དེའི་དབང་ཆ་ཁྱོད་ཚོར་ཡོད་པ་རེད།
འགུ་ལོག་དམ་ཆོས་དཔལ་བཟང་ལགས་ཀྱིས་རང་ཉིད་ཀྱི་མྱོང་རྒྱུས་གཞི་ལ་བཞག་ནས་འཕེལ་རིམ་ཞིག་གླེང་བ་འདི་བཀླགས་པས། བོད་ཀྱི་ཤེས་ཡོན་རིག་གནས་སློབ་གཉེར་གྱི་འཕེལ་རིམ་ལ་བལྟ་བར་དཔྱད་གཞི་འགངས་ཆེན་ཞིག་བཞེངས་སྐྲུན་གནང་འདུག་པའི་ཚོར་ཤུགས་སྤྲད།
ཁོང་ལ་འབོད་སྐུལ་ཞུ་རྒྱུ་གཅིག་ཡོད། ཁྱེད་ཅག་རྒན་རབས་པ་དག་གིས་རང་སོ་སོའི་མྱོང་རྒྱུས་འདི་སྐོར་གཙོ་གནད་དུ་བཟུང་བའི་ཡིག་འཇོག་རེ་གནང་རྒྱུ་གལ་ཆེན་པོར་མཐོང་གི་ཡོད། ལྷག་ཏུ་ཁྱེད་རྣམ་པ་སྤྱི་ཚོགས་གསར་རྙིང་གཉིས་ཀ་དང་། བོད་ཕྱི་ནང་གཉིས་ཀར་མྱོང་རྒྱུས་ལྡན་པའི་ཆ་ནས། ངེས་པར་དུའང་གནད་འགག་མང་པོ་ཞིག་མཁྱེན་རྟོགས་ཡོད་པ་དེ་བས་ན། ཡིག་འཇོག་གི་ཐད་ལ་དགོངས་པ་རྒྱ་ཆེན་པོ་རེ་བཞེས་གནང་རོགས་ཞེས་སྙིང་ཁོང་རུས་པའི་གཏིང་ནས་ཞུ་བ་འབུལ་བ་ལགས།
ཁྱེད་ཅག་རྒན་རབས་པ་དག་གིས་ང་ཚོ་གཞོན་རབས་པར་ལམ་སྟོན་དང་ཆབས་ཅིག དྲ་ངོས་ཀྱི་མི་ཚོགས་ཁྲོད་འདིར་ཡང་སེ་ཡང་སེར་ཕེབས་ནས། ང་ཚོར་གོ་བསྐོན་རེ་ཐུགས་ལ་འདོགས་རོགས།
རྒན་རབས་པ་ཁྱེད་ཅག་འདི་ལྟར་ཕེབས་གནང་བ་ལ། ཀློག་མཁན་བདག་དང་བདག་འདྲ་བ་དག་གི་ཚབ་ཞུས་ཏེ། གུས་བརྩི་དང་རྗེས་སུ་ཡི་རང་། ཡང་ཡང་ཕེབས་གནང་ཡོང་བའི་འབོད་སྐུལ་བཅས་སྟབས་གཅིག་ཏུ་ཞུ་བ་ལགས་སོ།།