བཙན་བྱོལ་སྤྱི་ཚོགས་ནང་བཀའ་ཁྲི་དང་། སྤྱི་འཐུས་ལོ་ལེགས་འདུག
ཀོ་ལེ་གྷ་གཞིས་ཆཊ། གཞུང་པ་ཚེ་དབང་བསོད་ནམས།
༄༅། རང་རེ་བཙན་བྱོལ་བོད་མིའི་སྤྱི་ཚོགས་ཆུང་ཆུང་འདིའི་མང་གཙོའི་ལམ་ལགས་སུ་ཁ་ཕྱོགས་ནས་མི་ལོ་ ༥༠ འགྲོ་བཞིན་པ་དང་། ཁྲིམས་ཡིག་གི་ལམ་སྟོན་འོག་གོམ་གང་མདུན་སྤོས་བྱས་ནས་མི་ལོ་ ༡༩ ཙམ་འགྲོ་བཞིན་པ། བཀའ་ཁྲི་མི་མང་ནས་ཐད་ཀར་འོས་འདེམས་གནང་ནས་མི་ལོ་ ༩ ལས་ཕྱིན་མེད་ནའང་འདི་ལོ་བཀའ་ཁྲི་དང་སྤྱི་འཐུས་ལོ་ལེགས་ནས་ཚང་ཁ་ཤིག་ཤིག་བྱེད་བཞིན་པའི་ལམ་ལུགས་འདིས་མ་འོངས་བོད་ཀྱི་མང་གཙོའི་འཕེལ་རིམ་ནང་བཟང་སྤྱོད་ཀྱི་ལེགས་སྐྱེས་འཇོག་ཐུབ་པའི་ཡག་རྟགས་ཤིག་ཡིན་ན་དགའ་བསུ་ཞུ་འོས་པ་དང་། སྔོན་འགྲོའི་འོས་གཞི་མ་བསྡུའི་གོང་ལ་འོས་དམིགས་ལས་འོས་གཞི་ཡོང་རྒྱུ་མེད་པར་སོང་། ཚོགས་སྐྱིད་ཁག་ནས་བཀའ་སྤྱིའི་འོས་གཞི་གསལ་བསྒྲགས་བྱེད་བཞིན་པའི་ལམ་ལུགས་འདི་དག སྒྲིག་མཐུན་ཅི་ཆགས་སྐོར་ལ་འོས་བསྡུ་ལས་ཁང་ལ་དོགས་གཅོད་ཀྱི་སྙན་ཞུ་ ༢༠༡༠ ཟླ་ ༥ ཚེས་ ༢༨ དང་ ༢༠༡༠ ཟླ་ ༧ ཚེས་ ༢ བཅས་སོ་སོར་ཕུལ་བའི་ངོ་བཤུས་འབྲེལ་ཡོད་ཀྱི་སྤྱི་འཐུས་རྒྱུན་ལས་དང་བཀའ་ཤག ཆེས་མཐོའི་ཁྲིམས་ཞིབ་ཁང་བཅས་ལ་ཕུལ་བར་ད་བར་བཀའ་ལན་ལྟ་ཅི། འབྱོར་ལན་ཙམ་ཡང་མེད་པའི་གནས་བབ་ལ་བསམས་ཚེ་སྒྲིག་འགལ་དང་ཁྲིམས་འགལ་ལ་རྒྱབ་སྐྱོར་གནང་མཁན་གྱི་གྲངས་ཚད་དེ་མང་དུ་འགྲོ་བཞིན་པ་འདིས་བཙན་བྱོལ་བོད་མིའི་མང་གཙོའི་འཕེལ་རིམ་ནང་ཡག་རྟགས་ཤིག་གང་ནས་ཡིན།
དེ་སྔོན་གྱི་སྤྱི་འཐུས་སྐབས་བཅུ་བཞི་པ་འདི་ལ་ཚོགས་གཙོ་གཉིས་ནས་རེ་མོས་བྱ་རྒྱུའི་ལམ་ངན་གསར་གཏོད་གནང་བ་དེ་དག་བཅའ་ཁྲིམས་དང་ལྷག་དོན་དུ་བཟང་སྤྱོད་ཀྱི་འགན་འཁུར་དང་ཡོངས་སུ་འགལ་བར་ངོས་འཛིན་བྱས་ན་མ་འགྲིག་པའི་ཉེས་པ་གང་ན་ཡོད་ལ། འོས་བསྡུ་ལས་ཁང་དང་འབྲེལ་ཡོད་ལྷན་ཁང་ཁག་ནས་འོས་གཞི་དང་། འོས་དམིགས་གཉིས་དོན་གཅིག་མིང་གི་རྣམ་གྲངས་ལ་ངོས་འཛིན་གནང་གི་ཡོད་ན་ལས། དེ་མིན་འོས་བསྡུ་ལས་ཁང་ནས་དངོས་ཞིའི་འོས་གཞི་གསལ་བསྒྲགས་མ་གནང་གོང་ལ་འོས་གཞི་ཡོང་རྒྱུ་མེད་པར་སོང་ཚོགས་སྐྱིད་ཁག་གི་བྱེད་བབ་འདི་དག་སྒྲིག་འགལ་ནས་ཁྲིམས་འགལ་དུ་ཁ་ཕྱོགས་ནས་གཞི་རིམ་མང་གཙོའི་སྤྱི་ཚོགས་ཀྱི་བསམ་བློའི་རང་དབང་དང་། རྣམ་དཔྱོད་ཀྱི་འགན་འཁུར་ལ་ཆེད་དུ་འགོག་རྐྱེན་བཟོས་པར་ངོས་འཛིན་དང་བཅས། བཀའ་ཁྲིའི་འོས་གཞིའི་ནང་ཡོད་པའི་མི་འགྲོ་འགའ་ཤས་ནས་རྟེན་འབྲེལ་མཚོན་བྱེད་ཀྱི་ངོ་བོར་བཀའ་ཁྲི་ལ་ལངས་པའང་ཡོད་སྲིད་ལ། འགའ་ཤས་ནི་ཕྱོགས་གཏོགས་ཆབ་སྲིད་དང་། ལུང་ཚན་ཤོག་སྒྲིལ་གྱི་གནོས་ཤུགས་འོག་ཏུ་ཚུད་ནས་བཀའ་ཁྲི་ལ་ལངས་པའང་ཡོད་སྲིད། ཁག་གཅིག་ནི་མིང་དང་དོན་ལ་རྔམ་ནས་བཀའ་ཁྲི་ལ་ལངས་པ་ཡོད་སྲིད་ལ། རྒྱ་འབྲེལ་ཆབ་སྲིད་ལ་འགན་འཁུར་ནས་ལྷག་བསམ་དང་། ཆོད་སེམས། གདེང་སྤོབས་ཅན་འགའ་ཤས་ཀྱང་ཡོད་སྲིད།
དོན་དངོས་ཐོག་བཀའ་ཁྲི་དེ་ཆོལ་ཁ་དང་ལུང་ཚན་ལ་བགོ་བཤའ་རྒྱག་རྒྱུའི་ནུབ་ཕྱོགས་འབྱོར་ལྡན་རྒྱལ་ཁབ་ཀྱི་དངོས་པོའི་རོགས་རམ་ལྟ་བུ་ཞིག་གང་ནས་ཡིན་ལ་ཕྱོགས་གཏོཊ་ཆབ་སྲིད་དང་། ལུང་ཚན་ཤོག་སྒྲིལ་ལ་འགན་འཁུར་ནས་བཀའ་ཁྲི་འོས་བསྡུ་བྱ་རྒྱུ་དེ་བས་ཀྱང་གང་ནས་ཡིན་ན། བོད་རྒྱལ་ཁབ་དང་བོད་མི་རིགས་ཀྱི་ཆབ་སྲིད་འཕེལ་རིམ་ལ་འགན་འཁུར་ངང་བཀའ་ཁྲི་འདེམས་དགོས་པར་སོང་། འདས་པའི་བཙན་བྱོལ་བོད་མིའི་ཆབ་སྲིད་འཕེལ་རིམ་གྱི་ལོ་རྒྱུས་ལ་ཕྱི་མིག་ལྟ་སྐབས་དེ་སྔོན་བཀའ་ཁྲི་མི་མང་ནས་འོས་བསྡུ་བྱ་རྒྱུའི་ལམ་ལུགས་མ་དར་གོང་། སྐྱ་བོ་ལྔ་ནས་བཀའ་ཁྲི་གནང་བ་དང་། མི་མང་ནས་བཀའ་ཁྲི་ཐད་ཀར་འོས་འདེམས་གནང་ནས་སེར་མོ་བའི་བཀའ་ཁྲི་སྐབས་གཉིས་བསྟུད་མར་གནང་བ་དང་། དེང་སྐབས་ཤར་ནུབ་ལུང་པ་མང་པོའི་ནང་ཕོ་མོ་འདྲ་མཉམ་གྱི་ཐོབ་ཐང་དང་། འགན་འཁུར་གྱི་སྲིད་བྱུས་གལ་ཆེར་བརྩི་བཞིན་པ་དང་། མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་གསལ་སྒྲགས་གནང་བའི་འགྲོ་བ་མིའི་ཐོབ་ཐང་གི་ཡིག་ཆའི་ནང་དུའང་བུད་མེད་ཀྱི་ཐོབ་ཐང་དང་འགན་འཁུར་གྱི་ནུས་པ་རྩལ་དུ་བཏོན་ཡོད་པ་དང་། ང་ཚོའི་དགྲ་བོ་རྒྱ་ནག་གི་ངོས་ནས་ཀྱང་བོད་པའི་སྤྱི་ཚོགས་ནང་ཕོ་མོ་འདྲ་མཉམ་མེད་པའི་རྗེས་ལུས་ཀྱི་སྤྱི་ཚོགས་ཤིག་ཡིན་པའི་འགྲེལ་བརྗོད་འཛམ་གླིང་གང་སར་སྤེལ་བཞིན་པ་སོགས་ལ་ཞིབ་ཏུ་དཔྱད་སྐབས། ང་ཚོའི་སྤྱི་ཚོགས་ནང་ཕོ་མོ་འདྲ་མཉམ་གྱི་ཐོབ་ཐང་དང་འགན་འཁུར་གྱི་སྲིད་ཇུས་ལ་ཆེ་མཐོང་དང་བརྩི་བཀུར་ཞུ་མཁན་ཡོད།
ཡོང་རྒྱུའི་བཀའ་ཁྲི་དང་སྤྱི་འཐུས་ཀྱི་ཚོགས་གཙོ་ལ་བུད་མེད་ངེས་པར་འདེམས་དགོས་པ་ལས་སླར་ཡང་སྐྱ་སེར་གང་རུང་ཞིག་ཕྱོགས་གཏོགས་ཆབ་སྲིད་དང་ལུང་ཚན་ཤོག་སྒྲིལ་ལ་འགན་འཁུར་ནས་འཚང་ཁ་རྒྱག་ཏུ་བཅུག་ནས། བཀའ་ཁྲི་དང་སྤྱི་འཐུས་ཀྱི་ཚོགས་གཙོ་ལ་ཕེབས་དགོས་པའི་རྒྱལ་སྲུང་ཆབ་སྲིད་ཀྱི་གནད་དོན་དང་། སྤྱི་ཚོགས་འཚོ་བའི་དགོས་མཁོ། གྲལ་རིམ་གྱི་རྒྱུ་མཚན་སོགས་གང་ཡང་མཐོང་གི་མེད་ན་གནས་ཡུལ་རྒྱལ་ཁབ་ཀྱི་སྲིད་འཛིན་དང་། གྲོས་ཚོགས་ཀྱི་ཚོགས་གཙོ་ལ་བུད་མེད་བསྐོ་བཞག་གནང་བ་འདིའང་རྒྱལ་འབྲེལ་ཆབ་སྲིད་ལ་འགན་འཁུར་ནས་མཉམ་སྦྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་གནང་བའི་འགྲོ་བ་མིའི་ཐོབ་ཐང་གི་ཡིག་ཆ་ལ་བརྩི་བཀུར་དང་། ཆེ་མཐོང་ཞུས་ཏེ་བུད་མེད་ཀྱི་ཐོབ་ཐང་དང་འགན་འཁུར་གྱི་ནུས་པ་རྩལ་དུ་བཏོན་པར་ངོས་འཛིན་དང་བཅས་བདེན་པ་དང་འཚེ་བ་མེད་པ། འདྲ་མཉམ། ཡང་དག་པའི་མང་གཙོའི་ལམ་ལུགས་ནང་གོམ་གང་མདུན་སྤོས་ཐུབ་པའི་ནུས་པ་དང་བློ་ཁོག ཆོད་སེམས་བཅས་བོད་མི་མང་ལ་ཡོད་ན། ཕོ་མོ་འདྲ་མཉམ་གྱི་ཐོབ་ཐང་བརྒྱུད་ནས་འགན་འཁུར་གྱི་ནུས་པ་ཆ་ཚང་ཡོད་པའི་སྔོན་བརྡ་དེ་འཛམ་གླིང་རྒྱལ་དམངས་ལ་སྟོན་དགོས་པ་དང་། རྒྱ་ནག་གི་འཁྱོག་བཤད་ལ་ཆབ་སྲིད་ཀྱི་བརྡ་ལན་ཞིག་ཀྱང་རྒྱལ་སྤྱིའི་མདུན་སར་སྤྲོད་ཐུབ་པའི་ཆེད་དུ་བོད་རྒྱལ་ཁབ་དང་། བོད་མི་རིགས་ཀྱི་ཆབ་སྲིད་འཕེལ་རིམ་གྱི་ལོ་རྒྱུས་ལ་འགན་འཁུར་ནས་ཡོང་རྒྱུའི་བཀའ་ཁྲི་དང་། སྤྱི་འཐུས་ཀྱི་ཚོགས་གཙོ་ལ་བུད་མེད་བསླེབ་ཐུབ་པའི་འགན་འཁུར་ཆེ་ཙམ་བཞེས་དགོས་པའི་འབོད་སྐུལ་འདི་བཞིན་ཕྱོགས་གཏོགས་ཆབ་སྲིད་དང་། ལུང་ཚན་ཤོག་སྒྲིལ་གྱི་རྗེས་སུ་ཁ་མ་ཕྱོགས་པར་ཆོལ་གསུམ་བོད་མིའི་ཆིག་སྒྲིལ་གྱི་གོང་བུ་གལ་ཆེར་བརྩིས་ནས་བདེན་པ་དང་། འཚེ་བ་མེད་པ། ཡང་དག་པའི་མང་གཙོིའི་ལྟ་གྲུབ་ལ་ཡིད་ཆེས་དང་། བརྩི་བཀུར་ཉམས་ལེན་དང་རྒྱལ་སྲུང་ཆབ་སྲིད་ལ་འགན་འཁུར་ནས་གང་ཟག་སྒེར་གྱི་བསམ་འཆར་ཞུ་བཞིན་ཡོད་ན། རྒྱལ་གཅེས་ལྷག་བསམ་ཅན་གྱི་བློ་ལྡན་རྒྱ་ཆེ་མང་ཚོགས་ཀྱི་དགོངས་པའི་དཔྱད་གཞི་རུ་མངའ་བ་མཁྱེན།
ཚེ་དབང་བསོད་ནམས་ལགས་ཀྱིས་རཟོམ་ཡིག་འདི་ལྟར་སྤེལབ་ལ་དགའ་བསུ་ཡོད་ ཐུགས་རྗེ་ཆེ་
བོད་པའི་རྩ་དོན་དང་རང་དབང་སླར་གསོའི་ལས་འགུལ་ཡང་དག་ཅིག་ལ་ཐུགས་བསམ་བཞེས་དགོས་པའི་དུས་སྐབས་ཤིག་ཡིན་པ་མ་ཚད་ང་ཚོ་བཙན་བྱོལ་དུ་གྱལ་དགོས་དོན་ཡང་རང་དབང་སླར་གསོ་ཆེད་དུ་ཡིན་པ་ལས་ཕོ་མོ་འདྲ་མཉམ་རྩོད་ཆེད་དུ་བཙན་བྱོལ་དུ་ཡོང་བ་ཞིག་གཏན་ནས་མ་ཡིན།བསོད་ནམས་ལགས་ཀྱིས་གསུང་སྟངས་ལ་བལྟས་པ་ཡིན་ན།སོ་སོ་ལ་རང་དབང་རང་བཙན་ཡོན་མཁན་གྱི་ནུབ་ཕྱོགས་པའི་རྒྱལ་ཁབ་དང་འདྲ་བའི་ཕོ་མོ་འདྲ་མཉམ་དང་བྱིས་པའི་ཐོབ་ཐང་རྩོད་རྒྱུའི་དུས་ཚོད་ཞིག་ལ་ངོས་འཛིན་བྱེད་ཀྱི་ཡོད་ན།ཤེས་འཇོན་ལ་མ་ལྟ་བ་ཞེས་བཙན་བྱོལ་བོད་གཞུང་གི་བཀའ་ཁྲི་དེར་བུད་མེད་ཅིག་དང་སྤྱི་འཐུས་ཚོགས་གཙོ་དེར་བྱིས་པ་ལོ་ན་མ་སོན་པ་ཞིག་བཀོ་གཞག་བྱེད་པ་ཡིན་ན་འཛམ་གླིང་མི་མང་ཚང་མས་ང་ཚོ་བཙན་བྱོལ་བོད་གཞུང་ལ་མཚན་སྙན་ཡག་པོ་ཞིག་ཐོབ་མདོག་ཁ་པོ་ཞིག་རེད་མ་གཏོགས་གཞན་འགྲུབ་འབྲས་གང་ཡང་ཐོབ་མདོག་ཁ་པོ་མ་རེད།ཧ་གོ་སོང་ངམ།
སྐུ་ཞབས་ཚེ་དབང་བསོད་ནམས་ལགས།
སྐུ་ཉིད་ནས་དེ་འདྲའི་བསམ་ཚུལ་བཏོན་པ་ལེགས། འོན་ཀྱང་རྩི་རྩི་མེད་པར་བཟོ་བའི་ཆེད་དུ་ཁང་པ་མེར་བསྲེགས་ན་ལྐུག་པ་མིན་ན་གང་རེད། ངའི་དོན་ནི། རྒྱ་གཞུང་དང་མཉམ་སྦྲེལ་རྒྱལ་ཚོགས་ལ་ལན་འདེབས་པའི་ཆེད་དུ་ང་ཚོས་ཆ་རྐྱེན་ལ་བསམ་བློ་སྣེ་གཅིག་ཀྱང་མ་བཏང་བར་བཀའབློན་ཁྲི་པ་ཡིན་ཅིག་མིན་ཅིག་བེུད་འདེམས་དགོས་བྱུང་ན་དཔེ་བསག་གི་མ་རེདཔས། བེུད་སུ་ལའང་འཇོན་ཐང་ཡོད་ན་མི་དམངས་ཀྱི་ངོས་འཛིན་བྱེད་ཀྱང་ལས་བཀག་འགོག་ནམ་ཡང་བྱེད་མི་སྲིད། ད་བར་དུ་བེུད་ནང་ནས་རྒྱ་རི་སྒྲོལ་མ་རེད། འོན་ཀྱང་ཁོང་མོ་བཀའ་ཁྲིར་ལངས་པར་ངེས་པར་དུ་དགོས་པའི་ཆ་རྐྱེན་ཁ་ཤས་ཚང་མིན་འདུག
བོད་ཀྱི་བདེན་མཐའ་སེལ་རྒྱུ་ནི་སྐབས་གསུམ་པའི་བཀའ་ཁྲི་དང་སྐབས་བཅོ་ལྔའི་སྤྱི་མཐུས་ཚོགས་གཙོ་བུད་མེད་སླེབས་ན་བོད་ལ་རང་བཙན་ཐོབ་པར་མི་ཁྱབ།
བཙན་བྱོལ་སྤྱི་ཚོགས་ནང་ཕོ་མོའི་འདྲ་མཉམ་གྱི་ཐོབ་ཐང་དང་འགན་འཁུར་གྱི་སྲིད་ཇུས་ལ་ཆེ་མཐོང་དང་བརྩེ་བཀུར་ཞུ་བཞིན་ཡོད།
༢༠༠༨ཟླ་༡༠ཚེས་༡༤ཉིན་བཀའ་ཤག་གིས་བུད་མེད་ནུས་ཤུགས་གོང་འཕེལ་ཆེད་སྲིད་ཇུས་གཏན་འབེབས་དོན་ཚན་བརྒྱད་བཞག་ཡོད།
དོན་ཚན་གསུམ་པ། གཞིས་ཆགས་ཁག་ཏུ་ས་གནས་འགན་འཛིན་བུད་མེད་གང་མང་གཏོང་ཐབས་བྱ་རྒྱུ།
ཉེ་བའི་འཆར་དཔལ་འབྱོར་ལས་ཁུངས་གོ་སྒྲིག་འོག་གཞུང་ཞབས་བུད་མེད་དྲུང་ལས་ཡན་ལ་མ་འོངས་པའི་འགོ་ཁྲིད་ཟབ་སྦྱོང་ཉིན་གསུམ་རིང་གངས་སྐྱིད་ཚོགས་ཁང་སྟེང་དུ་སྤྲད་ཡོད།
བུད་མེད་བཀའ་ཁྲི་དང་སྤྱི་མཐུས་ཚོགས་གཙོ་འོས་དང་མི་འོས་སོ་སོའི་ཤེས་ཡོན་དང་འཇོན་ཐང་རྣམ་སྤྱོད་སོགས་བལྟས་ནས་འདེམས་དགོས་པ་ལས།
གང་བྱུང་གདམ་པ་ཡིན་ན་ལྐུག་པ་ཡིན་པར་སྨོས་མི་དགོས།
ཁྱི་ལ་སེང་གེའི་མིང་བཏགས་ནས་རྫིག་པོ་མ་ཏོག་དོན་དངོས་ཁྱི་རྒན་རང་རེད།
དྲ་གྲོགས་ལགས།
མཉམ་སྦྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་ལ་བརྩི་འཇོག་དང་། རྒྱ་ནག་གི་འཁྱོགས་བརྗོད་ཀྱི་རྫུན་གཏམ་ལ་ལན་འདེབས་ཙམ་གྱི་ཆེད་དུ་བཀའ་ཁྲི་དང་སྤྱི་འཐུས་ཚོགས་གཙོ་ལ་བུད་མེད་འདེམས་དགོས་ལབ་ན། རྒྱུ་མཚན་མེད་པའི་རི་བོང་ཅལ་འདྲོག་རང་རེད། དེ་ལྟར་བུད་མེད་ཅིག་འདེམས་ནའང་ཁྱེད་ཀྱི་དགོས་དོན་དེ་གཉིས་འགྲུབ་པའི་ངེས་པའང་གཏན་ནས་མེད།
བཙན་བྱོལ་སྤྱི་ཚོགས་ཀྱི་ལས་གནས་མཐོ་ཤོས་དང་འགན་དབང་ཆེ་ཤོས་བཀའ་ཁྲི་དང་སྤྱི་འཐུས་ཚོགས་གཙོ་དེ་སུ་ལ་འོས་ཆོས་ཚང་མིན་དང་སུ་ལ་འཇོན་ཐང་ཡོད་མེད་ལ་བལྟས་ནས་འདེམས་དགོས་པ་ལས། འཇོན་ཐང་ཅན་གྱི་ཕོ་སར་ཚོ་ཟུར་དུ་བཞག་ནས་བུད་མེད་ཅིག་ཨེ་རེག་མི་རེག་བལྟས་ན་དེ་ལྐུགས་པའི་ལས་ཀ་མ་རེད་དམ།
བཙན་བྱོལ་སྤྱི་ཚོགས་འདིར་བཀའ་ཁྲི་དང་སྤྱི་འཐུས་ཚོགས་གཙོ་ལྟ་ཅི་བཀའ་བློན་ཙམ་གྱི་འོས་ཚང་བའི་བུད་མེད་ཀྱང་མེད་པ་གསལ་ཐང་ཐང་ཡིན་བཞིན་དུ་ད་དུང་བཀའ་ཁྲི་དང་སྤྱི་འཐུས་ཚོགས་གཙོ་ལ་ངེས་པར་དུ་བུད་དགོས་ཞེས་ཨུ་ཚུགས་བྱས་ན་དེ་ནི་ལྐུགས་པའི་ཨུ་ཚུགས་མིན་ན་ཅི་རེད།