ནོར་གླིང་། སྨན་སྐོར་སྐལ་བཟང་རྡོ་རྗེ།
ད་ནི་བོད་མི་མང་སྤྱི་འཐུས་ཀྱི་སྔོན་འགྲོའི་འོས་ཁྱབ་བསྒྲགས་བྱས་ནས་ཉིན་བཅུ་ལྷག་ལས་འགོར་མེད་ལ། སྐབས་འདིར་ས་གནས་གང་ས་ན་སོ་སོའི་ཆོལ་ཁའི་ཁུངས་ཀྱི་སྤྱི་འཐུས་ལ་སུ་འོས་ཀྱི་གླེང་སློང་བྱེད་བཞིན་པའི་སྒང་རེད། ཡིན་ན་ཡང། གླེང་སློང་དེ་དག་ནི་ཕག་ལ་འོག་གི་གཏམ་ཞིག་ཡིན་པ་ལས་སྤྱི་ཚོགས་ཀྱིས་གོ་ཐུབ་པ་དང་སྤྱི་ཡོངས་ལ་ཕན་ཐོགས་པ་ཞིག་མ་རེད། ངས་ནི་དེ་ལས་ལྡོག་སྟེ་རང་སེམས་ཀྱི་སྐད་ཆ་དག་མངོན་བསྒྲགས་བྱེད་འདོད། འདི་ནི་ངས་སྤྱི་དོན་གྱི་ཆེད་དུ་རང་ཕྱོགས་ཀྱི་ཉེས་སྐྱོན་ལ་མཛུབ་མོ་བཙུགས་ཏེ་དོན་གནས་གླེང་རྒྱུ་ལས་མི་སྒེར་གྱི་བསམ་ཚུལ་གླེང་རྒྱུ་མིན།
སྣེ་ཁྲིད་དུ་སུ་འོས་སམ།
སྤྱི་ཚོགས་ཀྱི་དཀའ་རྙོག་ཁྲོད་དུ་དཀའ་ངལ་གདོང་གཏོད་མཁན་ཚོ་ནི་མི་རིགས་ཀྱི་སྣེ་ཁྲིད་པ་བྱེད་འོས། དང་བོ། སྤེན་པ་ཚེ་རིང་། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འགན་འཛིན་དུ་ལོ་མང་བཞུགས་ཏེ། ས་གནས་ཁག་ལ་གྲོས་ཚོགས་ཀྱི་འགྲོ་ལུགས་དང་དམངས་གཙོའི་འཕེལ་རིམ་སོགས་ཀྱི་ཟབ་སྦྱོང་སྤྲད་པ་སོགས་ཕྱག་ལས་མང་བོ་གནང་ཡོད་ལ། སྤྱི་འཐུས་སུ་བསྡད་པའི་རིང་ལ་ཡང་གང་འཇོན་གྱིས་ཕྱག་ལས་མང་བོ་ཞིག་གནང་ཡོད། ༢༠༠༨ ལོའི་འོས་ལངས་ཀྱི་སྐབས་ལ་མཚོན་ཏེ་བཤད་ནའང། མདོ་སྨད་སྤྱི་འཐུས་ཀྱི་ཁྲོད་དུ་ཁོ་ལས་ལྷག་ཅིག་སུས་ཀྱང་འཇོན་མེད། ཁོ་ད་དུང་ཡང་སྤྱི་འཐུས་སུ་འདུག་ངེས་ཡིན་ལ། མི་མང་གིས་ཀྱང་ཁོ་སྤྱི་འཐུས་སུ་ལྡུག་ངེས་རེད། དེ་ལྟ་ན་ཡང་སྤྱི་འཐུས་ལ་བཞུགས་རྒྱུ་དེ་ཙམ་གྱིས་འོས་འཚམས་མིན། ཁོའི་སློབ་སྦྱོང་གི་བརྒྱུད་རིམ་ལ་གཞིགས་ན་དཔལ་འབྱོར་བཀའ་བློན་ལྟ་བུར་བཞུགས་ན་ཧ་ཅང་འོས་ཤིང་འཚམས།
གཉིས་པ། གསེར་རྟ་ཚུལ་ཁྲིམས་འོད་ཟེར། ཁོང་སྤྱི་འཐུས་སུ་སླེབས་པ་དགོས་དབང་ཞིག་ཡིན་ལ། དོན་དངོས་སྟེང་གླེངས་ནའང་ཁོང་ནི་ལྷག་བསམ་གྱིས་ཕྱུག་ཅིང་སྤྱི་དོན་ལ་འབད་བརྩོན་གནང་མཁན་ཞིག་རེེད། ཁོང་གིས་སློབ་གྲྭ་ཁག་གི་གནས་སྟངས་དང། ས་གནས་མི་མང་གི་གནས་སྟངས། ད་དུང་ས་གནས་རྒན་གསོ་ཁང་གི་གནས་སྟངས་བཅས་ལ་ཞིབ་འཇུག་བྱས་ཏེ། ས་གནས་ཀྱི་ལྐོག་ཟ་རུལ་སུངས་ཀྱི་ཚང་གཏོར་ཡོད། སྐབས་དེར་ས་གནས་སུ་ཁོའི་རྒྱབ་རྩ་ན་རྒན་གསོ་ཁང་གི་རྒས་འཁོགས་འགའ་མ་གཏོགས་སུ་ཡང་མེད་ལ། ད་དུང་ཅུང་མིན་ན་ཁོ་མོན་གྷོ་ཌི་ནས་རྒྱང་ཕུད་ཀྱང་བཏང་བྱུང། ཁོང་ནི་དཀའ་ངལ་ལ་མ་འཛེམ་པར་སྤྱི་དོན་སྒྲུབ་མཁན་ཞིག་ཡིན་ཡང། སྔོན་འགྲོའི་འོས་བསྡུའི་ཁྲོད་འོས་མི་བཅུའི་ནང་དུ་ཚུད་ཙམ་ལས་ཡང་རྩེ་རུ་མ་བསླེབས་པ་ནི་ཅི་འདྲའི་ཡིད་སྐྱོ་བ་ཞིག་རེད་ཨང། འདི་ནི་ཕལ་ཆེར་ཁ་ལ་ཚོད་འཛིན་མེད་པར་གྲྭ་བ་ཚོ་སྤྱི་འཐུས་ལ་མི་དགོས་ཞེས་སྟོང་སྐད་རྒྱག་མཁན་ཚོའི་ངན་ཤུགས་ཡིན་ངེས། དྲང་མོར་བཤད་ན་དེ་ལྟར་འཆད་མཁན་དེ་ཚོའང་གྲྭ་བའི་ཁོར་ཡུག་ནས་ཟོས་འཐུངས་ཏེ་འཚར་ལོངས་བྱུང་བ་རྐྱང་རྐྱང་རེད། ད་སྐབས་ཀྱི་དུས་ཚོད་འདི་ལྟ་བུའི་ནང་གྲྭ་བ་དང་གྲོང་བ་བཅས་ལ་དབྱེ་འབྱེད་མེད་པར་མཉམ་རུབ་བྱེད་རྒྱུ་ནི་ཧ་ཅང་གལ་ཆེ་བར་མངོན།
གསུམ་པ། ཚེ་རིང་གཡུ་སྒྲོན། ཁོ་མོ་ནི་ད་རེབས་བརྩིས་ན་སྤྱི་འཐུས་སྐབས་གཉིས་ཆགས་ཡོད་ལ། སྐབས་བཅོ་ལྔ་བའི་སྤྱི་འཐུས་སུ་འཐོབ་འོས་པ་ཞིག་ཀྱང་རེད། དེར་མ་ཟད་མོ་ས་གནས་མི་མང་གི་བདེ་སྡུག་ཞུ་མཁན་ཞིག་དང། སྤྱི་ཚོགས་ལ་དང་བླངས་ཀྱིས་ཞབས་ཕྱི་སྒྲུབ་མཁན་ཞིག་ཀྱང་ཡིན། མོའི་ལོ་རྒྱུས་ཁྲོད་མི་རིགས་ལ་ཕན་པའི་ལས་འགན་གང་མང་ཁུར་ཡོད། དཔེར་ན། ས་གནས་བུད་མེད་ཚོགས་པའི་ཚོགས་གཙོ་དང་། ས་གནས་མཉམ་འབྲེལ་ཚོགས་གཙོ་བཅས་ཀྱི་ལས་འགན་ཁུར་ཏེ། མི་ཚེའི་ཕྱེད་ཀ་མི་རིགས་ཀྱི་ཆེད་དུ་ཕུལ་ཡོད།
བཞི་བ། སྒྲོལ་མ་མཚོ་མོ། ཁོ་མོ་ལ་སྤྱི་ཚོགས་ཁྲོད་གླེང་ཕྱོགས་འདྲ་མིན་ཞིག་ཡོང་གི་ཡོད། དུས་རྒྱུན་ཁ་མིི་གྲག་ཅིང་གྲགས་ན་རྙོག་སློང་གི་གཞི་མ་རེད་ཅེས་ཟེར། དེ་ནི་རྣལ་དུ་ཐིངས་པ་ཞིག་རེད་མི་འདུག། དོན་དངོས་ཐོག་ཁོ་མོ་ནི་རང་ནུས་གང་ཡོད་འདོན་མཁན་ཞིག་རེད། བལ་ཡུལ་དུའང་མོས་སྒེར་བཙུགས་སློབ་གྲྭ་ཞིག་ལ་འཛིན་སྐྱོང་བྱས་ཏེ། རིག་གཞུང་དང་མི་རིགས་གཉིས་ལ་ཞབས་ཕྱི་མཉམ་སྒྲུབ་བྱེད་ཀྱིན་ཡོད་ལ། མོ་ད་དུང་བལ་ཡུལ་བོད་མིའི་ཚབ་མཚོན་ཡང་བྱེད་ཐུབ་ཀྱི་ཡོད་པས། ང་ཚོའི་འོས་མིའི་ཁྲོད་དུ་མོ་ལས་ལྷག་པའི་འཇོན་ཐང་ཆེ་བའི་བུད་མེད་གསར་བ་འདྲ་མ་བསླེབས་ཚེ། ད་ལྟའི་སྔོན་འགྲོའི་ནང་གི་བུད་མེད་ཚོའི་གྲས་ནས་མོ་ནི་སྤྱི་འཐུས་ལ་བདམས་ཆོག་ཆོག་ཏུ་འདུག་གོ།
འགན་མི་འཁུར་བའི་འཐུས་མི་འགའ།
མི་སུ་ཡིན་ཡང་རང་གི་ལས་གནས་ལ་དཔག་པའི་འཇོན་ཐང་དང་ལྷག་བསམ་མེད་ན། མིང་ནི་ཇི་ཙམ་ཆེ་ཡང་དོན་ནི་སྟོང་བ་ཉིད་ཡིན།
དང་བོ། བསྟན་འཛིན་མགོན་པོ། ཁོ་ལ་སེལ་མི་ཐུབ་པའི་དོགས་པ་མང་པོ་ཞིག་དང་། སངས་མི་ཐུབ་པའི་ན་ཟུག་རྙིང་པ་ཞིག་ཡོད་ལ། དེ་ནི་མི་རིགས་ཀྱི་གནད་དོན་ལས་མི་སྒེར་གྱི་གནད་དོན་ཤས་ཆེ། དེའི་ཆེད་ད་བར་དུ་གྲོས་ཚོགས་སོགས་སུ་རྙོག་དྲ་ཅི་བསླངས་པ་ནི་ཚང་མས་སེམས་སུ་གསལ་བོ་ཡིན། ད་ནི་ཁོས་ངལ་གསོས་ན་འོས་པ་མ་གཏོགས་གྲོས་ཚོགས་སུ་ཉོག་གཏམ་གླེང་བར་མ་བསླེབས་ན་འོས་སོ།།
གཉིས་པ། བསྟན་འཛིན་མཁས་གྲུབ། སྤྱི་འཐུས་ཀྱི་ལས་འགན་ཁུར་ནས་མི་ལོ་ཉི་ཤུ་འགྲོ་བཞིན་ཡོད། དེ་ལྟ་ནའང་། ཁོང་ནི་འཐུས་མིའི་ཁོངས་སུ་ཡོད་ཀྱང་། ཚོགས་འདུའི་ནང་དུ་མེད་མཁན་གཙོ་གྲས་ཤིག་ཡིན། ལོ་ངོ་འདི་དག་གི་རིང་ལ་བོད་མི་ཚོས་ཁོ་ཐེ་ཝན་གྱི་སྤྱི་འཐུས་སུ་བླུགས་པ་ལྟར། ཁོ་ཐེ་ཝན་དང་སྒང་ཏོག་བར་ན་བྲེལ་ཟིང་ཆེ་བ་ལས་གངས་སྐྱིད་ཀྱི་གྲོས་ཚོགས་མེ་ལ་ཤོར་ཡང་ཕལ་ཆེར་གོ་ཚོད་མ་རེད། སྟབས་ལེགས་པ་ཞིག་ལ་ད་ལོ་ནི་མི་མང་གིས་ཁོ་ལ་ཕམ་ཁ་ཆེན་པོ་ཞིག་བྱིན་ཡོད། གསུམ་པ། རྒྱལ་རུང་ཟླ་བ་ཚེ་རིང། ཁོ་ཡང་ལོ་ངོ་གང་མང་འགོར་ཡོད། ཁོ་ལ་ད་ལྟའི་བར་དུ་གྲོས་འཆར་འདི་བཏོན་ནས་གྲོས་ཆོད་འདི་བཞག་ཟེར་བའི་ལག་རྗེས་འདྲ་མེད་ལ། དཀྲུག་ཤིང་འདི་འཕངས་ནས་རྙོག་དྲ་འདི་བྱུང་ཟེར་བའི་ནག་ཉེས་འདྲ་ཡང་མེད། ཡིན་ན་ཡང། ལོ་ངོ་འདི་ཚོར་ཁོས་ཁ་རོག་གེར་རྐུབ་སྟེགས་བསྲུངས་ནས་བསྡད་ཅིང། མི་མང་གིས་ཀྱང་ཁ་རོག་གེར་ཁོ་ལ་རྐུབ་སྟེགས་སྲུང་དུ་བཅུག་པ་ནི་ཅི་འདྲའི་ཡ་མཚར་ཞིག་རེད་ཨང།
བཞི་བ། ཡེ་ཤེས་སྒྲོལ་མ། མོ་ནི་སྤྱི་འཐུས་ལ་བསྡད་ནས་སྐབས་གཅིག་མ་གཏོགས་འགོར་མེད། དེའི་རིང་འགན་དམིགས་བསལ་བ་ཅི་ཡང་ཁུར་མེད་ལ། མ་འོངས་པར་ནུས་པ་ཐོན་པའི་རེ་བའང་ཅི་ཡང་མངོན་མེད། མོ་ཚོང་ལས་ལ་མ་གཏོགས་ཆབ་སྲིད་ལ་དེ་ཙམ་གྱིས་འཚམས་པོ་རང་མི་འདུག ད་དུང་མོོ་གྲོས་ཚོགས་སུ་སླེབས་ན་ཡང་ཁ་གྲགས་ཀྱི་མེད་སྟབས། ལ་ལས་ཡེ་ཤེས་སྒྲོལ་མ་ནི་གྲོས་ཚོགས་སུ་བཤམ་རྒྱུའི་སྒྲོལ་མ་རེད་ཅེས་ཀུ་རེ་རྩེད་ཀྱིན་ཡོད་ལ། དོན་དངོས་ལ་ཉེ་བ་ཞིག་ཀྱང་རེད་འདུག།
ལྔ་བ། སྒྲོལ་དཀར་ལྷ་མོ། ཁོ་མོ་ནི་སྤྱི་འཐུས་རྒན་གྲས་ཤིག་ཡིན། ཡང་བསྐྱར་སྐབས་བཅོ་ལྔ་བའི་སྤྱི་འཐུས་ལ་བསྡད་ཚེ་མི་ལོ་ཉེར་ལྔ་འགོར་ཡོད། ཡིན་ན་ཡང། མོ་ལ་འདི་ཡིན་གྱི་ལག་རྗེས་གང་ཡང་གླེང་རྒྱུ་མེད། ད་ནི་རང་འགུལ་གྱིས་སེམས་རྒྱ་ཆེ་རུ་བསྐྱེད་ནས་བུད་མེད་གཞོན་སྐྱེས་ཚོར་ལམ་ཁ་ཞིག་ཕྱེ་རྒྱུ་ནི་མོའི་ལས་འགན་གཙོ་བོ་དེ་ཆགས་ཡོད།
འོག་ནས་གྱེན་ལ་བརྩིས་པ།
ཐེངས་འདིའི་སྔོན་འགྲོའི་འོས་བསྡུ་ལ་བསམ་བློ་ཅུང་ཙམ་ཞིག་བཏང་ན། ཆེས་ཡ་མཚར་བ་འདི་འདྲ་ཞིག་འདུག། སྤེལ་པ་ཚེ་རིང་དང་ཐུབ་བསྟན་ལུང་རིགས་སོགས་མགོ་ནས་ཐུར་དུ་བརྩིས་པའི་ཨང་དང་བོ་དང་གསུམ་པར་བསླེབས་པ་ནི་ལུགས་མཐུན་ཞིག་ཡིན། འོན་ཀྱང། ཨ་མཆོག་རིན་པོ་ཆེ་ནི་སྔོན་ཆད་ཤར་རྩེའི་མཁན་པོར་བཞུགས་པ་སོགས་ཀྱིས་མཚོན་ཆོས་ཕྱོགས་ཀྱི་ཕྱག་ལས་གང་འཚམ་གནང་ཡོད་ལ། ད་ལྟ་ཁོང་གིས་དོན་འགུབ་གླིང་དུ་བླ་བྲང་བཞེངས་ནས་ཁུ་སུམ་དུ་བཞུགས་འཆར་ཡོད་མོད། ད་ཐེངས་འོག་ནས་གྱེན་དུ་བརྩིས་པའི་ཨང་གཉིས་པར་བསླེབས་ཡོད། རྡོ་རྗེ་དབང་ཕྱུག་ནི་ཤེས་འཇོན་གང་གི་ཆ་ནས་ཀྱང་ཀུན་ལ་གསལ་བཤད་མི་དགོས་པ་ཞིག་ཡིན། ཁོང་གིས་ལོ་མང་རིང་ནོར་གླིང་ཉམས་ཞིབ་ཁང་གིས་འགན་འཛིན་གནང་སྟེ་བོད་མི་ཡོོངས་ལ་ཅི་ཙམ་གྱིས་ཞབས་ཕྱི་གནང་བ་བདག་གིས་སྨྲ་ག་ལ་དགོས། སྤྱིར་ཁོང་ལ་རླབས་ཆེ་བའི་བྱ་བཞག་འདི་མུ་མཐུད་གནང་འཇུག་རྒྱུའམ། ཡང་ན་གོང་ནས་ཐུར་ལ་བརྩིས་པའི་ཨང་རིམ་མཐོ་གྲས་ཤིག་ཡིན་དགོས་མོད། ད་ཐེངས་འོག་ནས་གྱེན་ལ་བརྩིས་པའི་ཨང་བཞི་བར་བསླེབས་འདུག། ཨ་ལགས་འཇིགས་མེད་ནི་སྔོན་ཆད་བདེ་སྲུང་བཀའ་བློན་དུ་བཞུགས་ཏེ་སྲིད་ཕྱོགས་ཀྱི་ཕྱག་ལས་གང་མང་གནང་ཡོད་པ་ནི་ཀུན་གྱིས་མཁྱེན་གསལ་ལྟར་རེད། ད་ལྟ་བགྲེས་སོང་ཆགས་ཡོད་པས་འུ་ཚོས་དམ་པ་ཁོང་གི་སྐུའི་ཚེ་མཇུག་ལ་སྐུ་ངལ་ཞིག་གསོ་རུ་བཅུག་ན་བཟང་མོད། ད་ཐེངས་འོག་ནས་གྱེན་ལ་བརྩིས་པའི་ཨང་དགུ་བར་བསླེབས་ཡོད།
རྔ་བ་ཚེ་རྒྱམ་ནི་སྔོན་ཆད་ཐེ་ཝན་གྱི་སྐུ་ཚབ་དོན་གཅོད་དུ་བཞུགས་ནས་ཕྱག་ལས་གང་མང་གནང་ཡོད་པ་དང། ད་ལྟ་ཁོང་སྐུ་སྒེར་གྱི་རྒྱ་ཡིག་དྲུང་ཆེ་ཡི་འགན་གནང་སྟེ་མུ་མཐུད་དུ་རྒྱ་ཆེ་བའི་ཕྱག་ལས་གནང་བཞིན་ཡོད་ལ། ཁོང་ནི་བཀའ་ཁྲི་ལའང་འོས་པའི་ཤེས་འཇོན་གཉིས་ལྡན་ཞིག་ཡིན། ཁོང་ནི་བཀའ་ཁྲིའི་འོས་བསྡུའི་ཁྲོད་མགོ་ནས་ཐུར་དུ་བརྩིས་པའི་ཨང་རིམ་ག་གེ་མོ་ཞིག་ཡིན་དགོས་མོད། ད་ཐེངས་ཁོང་སྤྱི་འཐུས་ཀྱི་འོས་མིའི་འོག་ནས་གྱེན་ལ་བརྩིས་པའི་ཨང་བཅུ་བཞི་བར་བསླེབས་ཡོད།
སྤྱིར་འོས་མི་ཁྱབ་བསྒྲགས་ཀྱི་སྐབས་སུ་བདག་མེད་ཀྱི་ཡིག་འཁྱམ་ཡང་གང་མང་ཞིག་ཡོང་གི་ཡོད་ལ། ད་ཐེངས་ཀྱི་འོས་བསྡུའི་ཁྲོད་མི་སྣ་གལ་ཆེན་མང་བོ་ཞིག་འོག་ནས་གྱེན་དུ་བརྩི་དགོས་པའང་བདག་མེད་ཀྱི་ཡིག་འཁྱམ་ཞིག་ལ་གཞི་བཅོལ་བ་གདོན་མི་ཟའོ།།
ཕྱི་ལོ་ ༢༠༡༠ ཟླ་ ༡༡ ཚེས་ ༢༢ ཉིན་ལ།
དྲ་མཁན་རི་བོང་ལགས། ངས་མི་ལ་སྐད་ཆ་དྲིས་པ་གཞིར་བཞག་ཡོད་པ་མ་གཏོགས་ངས་ཤེས་ཀྱི་ཡོད་ཅེས་བཤད་མེད་ཀྱང་དོན་དག་དེ་ཁྱོད་རང་ཚོ་ཨ་མདོ་ནང་ཁུལ་གྱི་དོན་དག་ཅིག་ཡིན་པས། རང་ཚོས་རྩོད་པ་བརྒྱོབ། ང་ཚོ་ཀློག་མཁན་དང་ཉན་མཁན་བྱེད་ཆོག སྤྱི་འཐུས་བཅུ་བོ་ཁམས་དང་དབུས་གཙང་ནས་གདམ་ག་བྱེད་ཀྱི་ཡིན་ཟེར་ནའང་བསམ་འཆར་མེད། མ་གཞི་མངོན་ལྐོག་མེད་མཁན་ཞིག་གཙོ་བོ་ཡིན་པ་ལས་ཁ་ཞེ་མི་མཐུན་པ་ཚོ་ནམ་ཡང་གྱོད་དང་ཁ་མཆུའི་སྣེ་འདྲེན་ཡིན་པ་མ་བརྗེད་རོགས།
དྲ་གྲོགས་གནས་ཚང་མིང་ཅན་ལགས།
ཁྱེད་ཀྱིས་མི་ཤེས་ཤེས་ཁུལ་བྱས་ནས་དྲ་ལམ་དུ་རྫུན་གཏམ་འཆད་ཀྱིན་འདུག ཅིའི་ཕྱིར་ཞེ་ན། དགའ་ལྡན་དུ་ཀླུ་མཁར་བྱམས་ཀྱི་ཞང་བོ་རྒན་ཉི་མ་ཟེར་བ་ཞིག་གཏན་ནས་ཡོད་པ་མ་རེད་ཁྱོད་ལ་དགའ་ལྡན་དགོན་པའི་དགེ་བཤེས་རྒན་པ་སུས་དེ་འདྲ་ལབ་སོང་། ཀླུ་མཁར་བྱམས་ཀྱི་ཞང་བོ་ནི་རྒན་བློ་བཟང་རེད། ཁོང་ནི་ཉམས་རྟོགས་མཐོན་པོར་སླེབས་པའི་རྒན་བསམ་གྱིས་མི་ཁྱབ་པ་ཞིག་རེད། དགའ་ལྡན་དགོན་པའི་དགེ་བཤེས་རྒན་པ་ཞིག་ཡིན་ན་ཁོང་མི་ཤེས་མཁན་ཡོད་པ་མ་རེད། ཡོངས་གྲགས་སུ་ཁོང་གི་མཚན་ལ་ཀླུ་འབུམ་རྒན་བློ་བཟང་ཞུ་བ་རེད། དྲ་ལམ་དུ་རྫུན་གཏམ་རིགས་བཀོད་ན་ཡག་པོ་མི་འདུག ཁོང་རྒན་བསམ་གྱིས་མི་ཁྱབ་པ་ཡིན་པས། ཀླུ་མཁར་བྱམས་ཡག་པོ་ཡོད་པ་ཇི་ལྟར་བསྒྲུབ་རྔ་མོང་མཐོ་ན་རིལ་མ་མཐོ་དགོས་པའི་རྒྱུ་མཚན་ཅི་ཡོད།
བོད་ནང་གི་འོད་ཟེར་ལགས་དང་ཀླུ་མཁར་བྱམས་ཀྱི་གནས་སྟངས་གཅིག་མཚུངས་སུ་འཇོག་ཐབས་གཏན་ནས་མེད་འོད་ཟེར་ལགས་ཀྱིས་གདུག་རྩུབ་ཆེ་བའི་རྒྱ་དམར་གྱི་ཁ་གཏད་དུ་ལང་ཏེ་རང་སྲོག་དམར་མོ་འབེན་ལ་བཙུགས་ཡོད་པ་རེད། ཀླུ་མཁར་བྱམས་ཀྱིས་བྱམས་བརྩེ་དང་ཞི་བདེས་སེམས་རྒྱུད་བརླན་པའི་དགེ་སློང་སྲིན་འབུ་མི་གསོད་མཁན། ཕར་ལ་གཤེ་ཡང་ཚུར་མི་གཤེ་མཁན་ཞིག་ལ་དཔའ་སྐད་འཐེན་གྱིན་ཡོད་པ་རེད། དེ་ལྟར་བྱེད་པ་ལ་ངོ་མ་ཚ་ན་ཞེད་སྣང་བྱེད་དགོས་པ་ཅི་ཡང་ཡོད་པ་མ་རེད།
མདོ་སྨད་སྤྱི་འཐུས་ལ་ལང་ན་ཆོས་ཁས་ལེན་དགོས་པ་ཅི་ཡང་ཡོད་པ་མ་རེད་དེ་བདེན་པ་རེད། ཡིན་ནའང་བཀའ་དྲིན་གཞལ་བར་དཀའ་བའི་༸སྤྱི་ནོར་གོང་ས་མཆོག་ལ་མཚན་སྨད་ཞུ་བཞིན་པ་ནི་ཡག་རྟགས་ཅི་ཡང་མ་རེད་དེ་འདྲའི་དྲིན་ལན་ལོག་འཇལ་བྱེད་མཁན་ཞིག་བོད་མི་དམངས་ཀྱི་སྤྱི་འཐུས་ལ་དུས་ནམ་ཡང་མི་འོས་པ་རེད།
ཀླུ་མཁར་བྱམས་ནི་སྨྲ་བརྗོད་རང་དབང་གི་སླད་དུ་ཕོར་བ་བློས་གཏོང་ཕོད་མཁན་རེད་ཟེར་བ་ནི་ཁྱོད་རང་ནོར་འདུག བཙན་བྱོལ་བོད་གཞུང་གི་རང་ཁ་སོས་མི་སོས་ཙམ་གྱི་གསོལ་ཕོག་དེ་བཙན་བྱོལ་བ་ཞིག་གི་ཁ
ཐབས་ལ་ལྟོས་པའི་ཡག་པོ་ཡོད་པ་བདེན་ཡང་། དེ་ཙམ་གྱིས་བློས་གཏོང་མི་ཐུབ་རྒྱུ་ཅི་ཡང་ཡོད་པ་མ་རེད། དེ་བློས་གཏོང་ཕོད་ནའང་སྤྱི་བའི་ཆེད་དུ་བློས་མ་བཏང་བར་བསྡད་ཡོད་མཁན་ཡང་མང་བོ་ཞིག་ཡོད་པ་རེད། ཀླུ་མཁར་བྱམས་ལ་སྨྲ་ལྕེ་བདེ་མོ་ཞིག་ཡོད་པ་བདེན་པས་བོད་ནང་གི་ཉན་མཁན་ཚོས་ཁོས་བཤད་པར་གོ་རྒྱུ་འདུག་ཟེར་བ་བདེན་ལས་ཆེ་ཡང་དེ་ཙམ་ཞིག་སྤྱི་འཐུས་ལ་འོས་པའི་འོས་ཆོས་ཅང་མ་རེད།
རྒྱ་རྙི་ལགས། ཁྱེད་རང་གིས་མདོ་སྨད་ཡིན་ཁུལ་གྱིས་ང་ཚོ་མདོ་སྨད་མི་མང་གི་སྤྱི་འཐུས་ཁ་ཤས་ལ་སྐྱོན་བརྗོད་བྱས་འདུག་སྟེ། སྒྲོལ་དཀར་ལྷ་མོ་དང་། རྒྱལ་རོང་ཟླ་བ་ཚེ་རིང་གཉིས་སྐབས་སྔོན་མ་དག་གི་མདོ་སྨད་ཚོགས་གཙོ་དང་སྤྱི་འཐུས་ལ་མཚོན་ན་བྱས་རྗེས་ཅན་ལ་བརྩིས་ན་མ་འགྲིག་པ་མེད་སྙམ། སྒྲོལ་དཀར་ལྷ་མོ་ལ་བྱས་རྗེས་དང་འབྱོན་ཐང་ཤེས་ཡོན་ཡོད་་ནས་མདོ་སྨད་མི་མང་གི་སྤྱི་འཐུས་དང་བུད་མེད་ཚོགས་པའི་ཚོགས་གཙོར་བཞག་པ་མིན་ནམ། གལ་སྲིད་ཁྱེད་རང་མདོ་སྨད་པ་ཞིག་ཡིན་ན་སྐབས་སྔོན་མ་དག་གིས་མདོ་སྨད་ཚོགས་གཙོ་དག་གིས་བྱས་རྗེས་ག་རེ་བཞག་ཡོད། ཞབས་འདྲེན་ག་རེ་ཞུས་ཡོད། ཧ་ཨེ་གོ་མ་གོ་ན་ཁ་བཙུམ་ནས་བསྡད་ན་ཡག་གི་རེད་ལོ།
བསང་ཆུ་འབྲུག་བྷེ་བཤད་པ་བདེན། ཁ་དཔེར་ཡང་། ནག་མོ་མང་སར་ཇ་མི་ཁོལ་ཟེར་བ་སྲོལ་ཡོད། འོན་ཀྱང་། མདོ་སྨད་ཚང་ན་མོ་ངོ་འཚོལ་བའི་གྲྭ་འཁྱམས་དང་། ཕོ་འཁྱམས་མང་པས་དོན་དངོས་ལ་དབྱེ་ཞིབ་བྱེད་ཤེས་ཀྱིན་མེད་པ་རེད།
སྒྲོལ་དཀར་ལྷ་མོའི་ལོ་ངོ་ཉི་ཤུའི་རིང་བྱས་རྗེས་ག་རེ་བཞག་ཡོད་པ་རེད། བོད་སྤྱི་ལ་ག་རེ་ཡོད་རེད། མདོ་སྨད་ལ་ག་རེ་ཡོད་རེད། ངོ་མ་མི་མང་འདི་ཞ་ར་ལྟ་བུ་ཞིག་རེད།
ཁོ་མོ་དང་ཟླ་བ་རྒྱལ་རོང་སོགས་གཅིག་པ་རེད། ཁ་ནས་བོད་དོན་བཤད་ངེས་རེད། མི་རིགས་གླེང་ངེས་རེད། གཞོན་སྐྱེས་གླེང་ངེས་རེད། དོན་དངོས་རང་གི་ཁེ་ཕན་ཁོ་ནར་ལྟ་ངེས་རེད།
སྐབས་འཚོལ་བ་དག་ང་ཚོས་ཅི་ལྟར་འཕུད་རྒྱག་གཏོང་དགོས་མིན་ཐད་ཚང་མས་བསམ་གཞིགས་ཡག་པོ་གནང་རོགས།
རང་ཚོས་དེར་རྩོད་པ་མ་རྒྱག ཡེ་ཤེས་སྒྲོལ་མ་དང་། འཕེལ་རྒྱས་སྒྲོལ་མ་གཉིས་ལ་ཡག་མོ་སྒོ་དང་འཇོན་ཐང་ག་ཚད་ཡོད་ཀྱང་ཁམས་པའི་མནའ་མ་ཡིན་ཙང་ཁམས་རེད་མ་གཏོགས་མདོ་སྨད་ཀྱི་མི་མ་རེད། ཡིན་ནའི། མདོ་སྨད་ཀྱིས་ཁམས་ལ་མནའ་མ་འདི་འདྲ་གཉིས་གནང་བའི་ཁར་ད་དུང་སྤྱི་འཐུས་ཀྱང་གདམ་པ་ཡིན་ན། ཁམས་མི་མང་གིས་ཨ་མདོར་ཐུགས་རྗེ་ཆེ་ཞུ་རྒྱུ་ལས་ལྷག་ཡོག་མ་རེད་ཡ།
ཨ་རོགས་བསང་ཆུ་འབྲུག་བྷེ་ལགས། ཁྱེད་རང་གིས་མདོ་སྨད་ཀྱི་བུད་མེད་སྤྱི་འཐུས་ཁ་ཤས་ཕྱིར་འཐེན་བྱེད་དགོས་ཟེར་གྱི་འདུག་སྟེ། ཡེ་ཤེས་སྒྲོལ་མ་དང་། འཕེལ་རྒྱས་སྒྲོལ་མ་གཉིས་ཕྱིར་འཐེན་བྱེད་མི་ཆོག་ད། ཁོ་མོ་གཉིས་ལ་དེང་དུས་ཀྱི་ཤེས་ཡོན་དང་འཇོན་ཐང་ལྷག་བསམ་བཅས་ཡོད། དེར་མ་ཟད་ཁོ་མོ་གཉིས་ལ་ཡག་མོ་སྒོ་ཡང་ཡོད་པས་ང་ཚོ་མདོ་སྨད་པའི་རྒྱན་ཞིག་ཡིན་ཡ། ཁྱེད་རང་གིས་ཁོ་མོ་གཉིས་ལས་ལྷག་པའི་ཤེས་འཇོན་དང་ལྷག་བསམ་ཡག་མོ་སྒོ་ཚང་བའི་མདོ་སྨད་པའི་བུད་མེད་སྤྱི་འཐུས་གཉིས་ཀྱི་འོས་གཞི་ཞིག་ཐོན་དང་། དེ་ནས་ཁྱེད་རང་གི་བསམ་ཚུལ་ལ་ང་ཚོས་བསམ་བློ་བཏང་ཆོག
མདོ་སྨད་སྤྱི་འཐུས་དེ་ད་ལྟའི་ཆར་སྐབས་འཚོལ་བ་ཁ་ཤས་མ་གཏོགས་སླེབས་ཐུབ་ཀྱི་མེད་པ་དེ་མདོ་སྨད་ལ་འགན་འཁུར་ཅན་གྱི་མི་་རུས་པ་ཅན་མ་ཐོན་པའི་རེད།ད་རེས་སྐལ་མིང་ཅན་པས་དངོས་ཡོད་གནས་ཚུལ་འགའ་སྨྱུག་རྩེར་བླངས་ཏེ་བརྗོད་ཡོད་པར་བསྔགས་འོས་སུ་མཐོང་། ལྷག་པར་མདོ་སྨད་ཀྱི་བུད་མེད་སྤྱི་འཐུས་ཁ་ཤས་ཡོད་པ་དེ་ཚོ་ཕྱིར་འཐེན་བྱ་དགོས་པར་འདོད།
ཚུལ་ཁྲིམས་འོད་ཟེར་དང་། གསེར་རྟ་ཚུལ་ཁྲིམས་གཉིས་ཀྱི་སྐོར་ལ་སྤྱི་ཚོགས་ནང་ཡོངས་གྲགས་རྙོག་དྲ་ཆགས་ཚར་བ་ཡོད། དགའ་སྡུག་གི་ཕྱོགས་གཉིས་ཡོད་པ་ཆོས་ཉིད་རེད། ཆོལ་ཁའི་ཞེན་ཁོག་ཡིན་མདོག་གིས་ཁོ་གཉིས་ལ་ཁ་བརྡུང་མང་པོ་བཏང་སོང་། ཁོ་གཉིས་སུ་ཡིན་ཀྱང་དཀའ་ལས་རྒྱག་མཁན་ཞིག་རེད། མི་རིགས་ཀྱི་རིག་གནས་པ་ཞིག་རེད། ལོ་རྒྱུས་ཀྱི་འགན་འཁྲི་དེ་ཁོ་གཉིས་ལ་ཡོད་པ་རེད། དེའི་ཕྱིར། ཁམས་པ་རྫུན་མ་དང་ཨ་མདོ་རྫུན་མ་ཞེས་པའི་ཚིག་ཉོག་དང་རྩོད་དག་མཚམས་བཞག་ན་འགྲིག
རྩོད་རྙོག་ནི་རྙོག་དྲ་རང་ཡིན་པ་ལས་རྩ་དོན་དང་། མི་རིགས་གང་ལའང་མི་ཕན་པས་དེང་ནས་གསེར་རྟའི་རྙོག་གླེང་དེ་མི་གཉིས་ལ་ཕར་རྩིས་སྤྲད་དེ་ང་ཚོའི་ངོས་ཀྱི་ཕྱོགས་འཐེན་དེ་སྤངས་ཐུབ་ན་དགེ་བ་ཆེན་པོ་རེད་བསམ་གྱིན་འདུག
ཀླུ་མཁར་བྱམས་ནི་མི་དྲང་ཚུགས་ལྡན་པ་ཞིག་རེད། ལྷག་བསམ་རྣམ་དག་རེད། ཁོ་རང་གི་ལྟ་བ་དང་ལངས་ཕྱོགས་དེ་ལྡོག་ཕྱོགས་སུ་ཡོད་པ་དེའང་དངོས་འབྲེལ་རེད།
ཡིན་ཡང་། ལྟ་བ་ཐམས་ཅད་གཅིག་པ་མ་རེད། ང་ཚོ་ཐུན་མོང་ལ་གཅིག་མཚུངས་ཀྱི་ལྟ་བ་ཞིག་ཡོད་པ་ནི་བོད་མི་རིགས་འདིའི་བདེ་སྡུག་དང་འགན་འཁུར་དེ་རེད།
འགན་འཁུར་དེ་གལ་ཆེན་པོ་རེད་མ་གཏོགས་ཆོས་ཁས་ལེན་དང་མི་ལེན་དང་། དཀོན་མཆོག་ཡོད་མེད་ནི་མི་སྒེར་གྱི་གནས་བབ་དང་འབྲེལ་བ་ཡོད་པ་ཞིག་ལས་ཡ་མཚར་བ་གང་ཡང་མ་རེད།
སངས་རྒྱས་མཁན་ཡོད་ན་རྗེས་སུ་ཡི་རང་ཡིན་ལ། དམྱལ་བར་འགྲོ་མཁན་ཡིན་ནའང་རང་དབང་རེད།
དེ་ལས་ཚབས་ཆེ་བ་དང་དོ་སྣང་བྱེད་རན་ཡོད་པ་ཞིག་ནི། དངོས་ཤུགས་བརྒྱུད་གསུམ་ནས་གྲྭ་བའི་ཆོས་སྲིད་གཉིས་ཀྱི་ཁེ་དབང་དང་ཐོབ་ཐང་ལ་དམའ་འབེབས་དང་། མཐོང་ཆུང་། ཁྱད་གསོད་ཀྱིས་བོད་དང་གྲྭ་བའི་བར་དུ་འགལ་རྐྱེན་བཟོ་བཞིན་པ་ཁག་ཅིག་ཡོད་པས་འདི་ང་ཚོས་དོགས་ཟོན་བྱེད་ཡུལ་དང་། བརྟག་དཔྱད་དུ་འཇོག་ཡུལ་རེད།
རྩོམ་སྒྲིག་པ་ལགས། སྤྱི་ཚོགས་ཀྱི་དགེ་སྐྱོན་གླེང་བའི་མཆན་རང་ཡིན་པས་རྩོམ་སྒྲིག་པའི་ལྟ་གྲུབ་དུ་བབ་མིན་ལ་མ་ལྟོས་པར་འགོད་རོགས་ཞུ་རྒྱུ་ཡིན།
ཀླུ་མཁར་སྐོར་མང་པོ་འགྲེལ་བཤད་དགོས་མི་འདུག གལ་སྲིད་དྷ་ས་གནས་སྡོད་བྱེད་མཁན་ཞིག་ཡིན་ན་ཁོའི་རྒྱུས་མངའ་ཡོད་ཤས་རེད། ཁོས་བཤད་བཞིན་པ་དེ་སྨྲ་བརྗོད་རང་དབང་ཟེར་གྱི་ཡོད་པ་རེད། དེ་ལ་སྨྱོན་པས་སྨྱོ་ལམ་རྒྱབ་པ་ཟེར་ཧ་གོ་སོང་ངམ། ཧམ་བཤད་བྱེད་མཁན་དེ་ང་ཚོའི་བོད་པའི་གོམས་གཤིས་ཡག་བ་གང་ཡང་མ་རེད། དངོས་མདོ་སྨད་པ་རྣམས་ཀྱིས་ཁོང་ལ་རྒྱབ་སྐྱོར་བྱས་ན་ཡག་པོ་མ་རེད།
སྐལ་བཟང་རྡོ་རྗེ་ལགས། ཁྱེད་རང་གི་བཤད་པ་ལྟར་ན་གྲོས་ཚོགས་ནང་རྙོག་དྲ་བཟོ་མཁན་ཞིག་ཡིན་ན་དེ་སྤྱི་འཐུས་ལ་འོས་པ་ཡིན་ནམ། གྲོས་ཚོགས་ནང་ཁ་གྲགས་པ་ཙམ་གྱིས་སྤྱི་འཐུས་འོས་པ་ཡིན་ན། གྲོས་ཚོགས་ནང་༸གོང་ས་མཆོག་དང་བོད་གཞུང་ལ་སྐྱོན་བརྗོད་དང་ཟུར་ཟ་བྱེད་མཁན་ཡོད་དེ་ཚོ་སྤྱི་འཐུས་ལ་འོས་པ་ཡིན་ནམ།་
ང་ཚོ་མདོ་སྨད་མི་མང་འདི་བཞིན་ཆོལ་ཁའི་ཕྱོགས་རིས་འཐེན་ཁྱེར་ལ་དགའ་བོ་མེད་ཙང་གསེར་རྟ་ཚུལ་ཁྲིམས་འོད་ཟེར་བ་མི་ངན་སྐབས་ཚོལ་བ་ཁོ་དུས་ནམ་ཡང་མདོ་སྨད་སྤྱི་འཐུས་ལ་འདེམས་མི་རུང་། གལ་ཏེ་ཁོ་་བདམས་པ་ཡིན་ན་བསམ་བཟུང་ཚད་བཙུགས་ཏེ་ཆོལ་ཁའི་དཀྲུགས་ཤིང་བྱེད་མཁན་ལ་རྒྱབ་སྐྱོར་བྱས་པ་ཡིན་པར་མི་མང་ཚོས་ཤེས་པར་གྱིས།
མི་སྒེར་བའི་སྒང་སྐད་ཆ་བཤད་ཡ་ལས་སླ་བོ་ཞིག་མིན་ནའང་། སྐུ་ཞབས་ཀླུ་མཁར་བྱམས་འདི་གླེང་རིན་ཡོད་པའི་མི་ཞིག་རེད་ལ། དྲང་ལྡོག་གཉིས་ནས་གླེང་ཡང་ཆོག་སྲིད། གང་ལྟར་གུས་པས་བསྟན་འཇམ་ལགས་ཀྱི་ཟིན་བྲིས་ཤིག་ཀློག་པ་བརྒྱུད་ནས་ཤེས་རྟོགས་བྱེད་འདུན་སྔ་ན་མེད་པ་ཞིག་བྱུང་བ་དང་། བོད་ཕྱི་ནང་གཉིས་ཀྱི་མི་ཁ་ཤས་སྐད་ཆའང་དྲིས་པ་ཡིན།
༡ བོད་ནང་དུ་ཀླུ་མཁར་བྱམས་ཀྱི་རླུང་འཕྲིན་དཔྱད་བརྗོད་ལ་གོ་རྒྱུ་འདུག་ལ། གཞན་མང་ཆེ་བས་ཅི་ཞིག་བཤད་འདོད་ཀྱི་ཡོད་པར་ཧ་གོ་གི་མི་འདུག་ལབ་སོང་།
༢ བཙན་བྱོལ་ནང་ཀླུ་མཁར་བྱམས་ནི་སྨྲ་བརྗོད་རང་དབང་སླད་ཕོར་བ་བློས་གཏོང་ཕོད་མཁན་ཐོག་མ་དེ་ཆགས་ཡོད་པ་དང་། བོད་ནང་གི་རྩོམ་པོ་འོད་ཟེར་ལགས་ཀྱི་གནས་སྟངས་དང་གཅིག་མཚུངས་སུ་བཤད་མཁན་ཡང་འདུག
༣ བོད་ནང་དུ་བཤད་ན། ཀླུ་མཁར་བྱམས་ཀྱིས་མི་ལོ ༡༧ བཙོན་ཆད་འོག་སྨན་བཅོས་གནང་སྐབས་བྲོས་བྱོལ་བྱེད་མཁན་ཞིག་ཡིན་པས། ཕྱིར་ལོག་ཚེ་བཙོན་ཆད་དེ་ལྡབ་གཉིས་འགྱུར་གྱིས་མགོར་ལྷུང་ངེས་པར་བཤད། འདི་ནི་བཙན་བྱོལ་ཁྲོད་ཀྱི་མི་སུས་ཀྱང་འགྲན་དུ་མེད་པ་ཞིག་རེད།
༤ གཞིས་བྱེས་གཉིས་ཀྱི་མི་རྒན་སྐོར་ཞིག་གིས་ཀླུ་མཁར་བྱམས་ལ་ཆོས་དད་མེད་པས། ཆོས་ལྡན་བོད་མིའི་སྤྱི་ཚོགས་ནང་རན་གྱི་མེད་ཚུལ་ཡང་གསུངས་སོང་།
༥ དགའ་ལྡན་དགོན་པའི་དགེ་བཤེས་རྒན་པ་འགས་གསུངས་རྒྱུར། ཀླུ་མཁར་བྱམས་ཀྱི་ཞང་བོ་ཉི་མ(རྒན་ཉི་མ་ཞེས་འབོད་ཀྱི་འདུག་ལ། སྐུ་གཤེགས་ཟིན་པ་དང་། སྐབས་ལ་ལར་གོང་ས་མཆོག་གིས་ཡང་དུ་བསྐྱར་དུ་གླེང་བཞིན་པ་ཞིག་རེད་ཟེར)བཙན་བྱོལ་ཆོས་པའི་ཁྲོད་ཀྱི་དང་རྩེ་དང་ཉམས་ལེན་པའི་ནང་གི་མིག་དཔེ་ཆགས་ཡོད་པས། མི་རྒྱུད་འདི་ལས་ཀ་གང་ལ་འཇུས་ཉིན་དེ་ལ་ཨུ་ཚུགས་མཐར་སྐྱེལ་བྱེད་མཁན་ཞིག་ཡིན་ཚོད་རེད་གསུངས་སོང་།
༦ བོད་ཀྱི་མཐོ་རིམ་སློབ་གྲྭ་བ་གཙོས་པའི་ན་གཞོན་ཁྲོད་ཀླུ་མཁར་བྱམས་ལགས་ནི་དྲང་བཤད་ཕོད་མཁན་དང་། མངོན་ལྐོག་མེད་མཁན་ཞིག་ཡིན་པར་མ་ཟད། གཞན་དག་གོང་ནས་བཤད་ཟིན་པ་ལྟར་དུ་མཐོང་གི་འདུག
མཐའ་བསྡོམས། ཀླུ་མཁར་བྱམས་ལགས་ལ་མཚོན་ན། གཅིག་བྱས་ན་མ་འོངས་པར་བོད་གཞུང་དེ་སྲ་བརྟན་དུ་གཏོང་མཁན་གཅིག་པུའང་ཡིན་སྲིད་པ་ཞིག་རེད། ཕྱོགས་གཞན་ཞིག་ནས་བཤད་ན། གུས་པའི་སྔར་བཤད་མྱོང་། ཨ་མདོར་མི་དྲག་མེད་པ་མིན་ཡང་མི་དྲག་མེད་པར་གཏོང་མཁན་ཨ་མདོ་རང་ཡིན་པས། དཀར་མཛེས་གསེར་རྟ་ཚུལ་ཁྲིམས་འོད་ཟེར་ལགས་དང་ཁམས་ཀྱི་མནའ་མ་གཉིས་ལའང་མདོ་སྨད་ཀྱིས་འོས་ལྡུག་ཞོར་དབུས་གཙང་དང་ཁམས་ལ་ལེ་བདའ་བྱེད་ས་ལྷག་ཡོད་པ་མ་རེད།
ཨ་རིག་དགེ་མཐོང་ཟེར་བའི་བླ་རྒན་འདིས་ག་རེ་ཡིན་ཀྱང་ཤེས་མདོག་དང་འཚང་ཁ་བྱེད་རྒྱུར་དགའ་གིན་འདུག དང་པོ་ཞིག་ཀྱང་ཡིན་མདོག་བྱེད། དོན་ངོ་མ་བླུན་པ་ལུག་ལྟ་བུ་ཞིག་རེད། མིའི་སྐད་ཆ་མགོ་མ་ཚོས་གོང་འུར་ཁོ་ན་རྒྱག་མཁན་ཞིག་རེད།
སྤྲེལ་ལབ་འཁྲབ་ཚོད་ལ་བལྟས་དང་། རྒྱལ་རོང་ཟླ་བ་ཚེ་རིང་ཆོལ་ཁ་གསུམ་ནང་མེད་ཚུལ་གླེང་། གྲོས་ཚོགས་ཀྱིས་འབྱོན་གྱིན་མི་འདུག འཐུས་ཀྱི་མི་འདུག་ཟེར་བའི་གཞི་རྩ་ཡང་ཁོ་ལྟ་བུ་མང་དྲགས་པས་རེད། རྩིས་ལ་ཡག་རབ་བཤད། སྤྱི་འཐུས་གྲོས་ཚོགས་རྩིས་ཞིབ་ལྷན་ཁང་མ་རེད། མདོ་སྨད་ཚོགས་གཙོའི་སྐབས་བྱས་རྗེས་ཆེ་བར་གླེང་། གནས་ལུགས་ལྡན་པའི་སྐད་ཆ་སྣ་གཅིག་གླེང་རྒྱུ་ཡོད་ན་ཁྱེད་ལ་ངོ་སོ་བསྟོད།
གང་ཡང་མེད། ཅི་ཡང་འབྱོན་མེད། སྐལ་བཟང་གིས་བཤད་པ་དངོས་འབྲེལ་རེད་འདུག མདོ་སྨད་སྤྱི་འཐུས་ཀྱི་འོས་གཞི་མི་ཉིས་བརྒྱ་ལྷག་ཅིག་མི་མང་གིས་འདོད་པར་བབ་འདུག སྤྱི་རྫས་སུ་གྱུར་བའི་རྐུབ་སྟེགས་འདི་ཚོ་གྲགས་མེད་ཚོར་མེད་ཀྱི་མི་ཚོས་ལྟོ་གོས་བརྒྱངས་ས་བྱས་ན་ག་ལ་འགྲིག
ཡེ་ཤེས་སྒྲོན་མའི་གདོང་གི་མཛེས་ཉམས་ཙམ་ལས་ཨ་རིག་དགེ་མཐོང་ལ་ཁོ་མོའི་ཁྱད་ཆོས་གང་ཡང་བགྲང་དུ་མེད། ཤོད་དང་། ཁོ་མོའི་ཤེས་ཚད། འབྱོན་ཐང་། ལྷག་བསམ། ཕྱིས་རྗེས། དམིགས་ཡུལ། འབྲེལ་ལམ། གྲོས་ཚོགས་སུ་དགོས་མཁོ་ཅི་ཡོད་སོགས་ལ་གསལ་བཤད་གནང་དང་། གནས་ལུགས་དང་རྒྱུ་མཚན་མ་མཐོང་བར་འོལ་སྤྱི་ཙམ་གྱིས་ཀུ་ཅོ་མ་འདོན། བླ་རྒན་ཞིག་ཡིན་པ་བརྗེད་དུ་མ་འཇུག འཛུལ་དགོས་ས་མི་དགོས་ས་ཚང་མར་འཛུལ། བཤད་དགོས་ས་མི་དགོས་ས་ཚང་མ་བཤད། བཅོམ་ལྡན་འདས་ཀྱི་འདུལ་བ་གང་ཞིག་ན་ཁྱེད་ཚོར་འདི་ལྟར་ཐོབ་ཐང་སྤྲད་ཡོད།
གང་ལྟར་དྲང་གཏམ་རེ་བཤད་དུས་མི་སེམས་འགའ་རེ་སྲེག་རྒྱུ་ཡིན་པ་ཆོས་ཉིད་རེད།
དེ་ལས་འདིར་བཤད་འདོད་པ་ནི་གསེར་རྟ་ཚུལ་ཁྲིམས་འོད་ཟེར་ཡིན
དེང་ཐོགས་ཁོང་སྤྱི་མཐུས་ལ་འོས་འདེམས་སྐབས་འདོད་པ་རྩ་བ་ནས་མེད་མཁན་ཞིག་ཡིན། རྒྱུ་མཚན་ནི་ཚང་མའི་མཁྱེན་གསལ་རེད།
ད་ལྟ་ངའི་སེམས་ཀྱང་ཅུང་འགྱུར་ནས་བསྡད་ཡོད
རྒྱུ་མཚན་་་་་༢༠༠༨་ལོའི་ལོ་གསར་ཚེས་གསུམ་ཉིན་སེར་སྨད་གྲྭ་ཚང་དུ་དོལ་རྒྱལ་སྐོར་བཀའ་སློབ་ཞིག་གནང་འདུག
དེ་གར་ཤར་བ་ཆོས་རྗེ་སྐུ་དངོས་མ་ཕེབས་པར་སྐུ་འཚབས་ཅིག་བཏང་འདུག
ཡིད་མ་ཆེས་ན་དེའི་སྐོར་ཀྱི་འོད་སྡེར་ལ་གཟིགས་དང་ད་བཟོད་གསེར་རྟ་ཁོང་ཅི་འདྲ་ཞིག་ཡིན་པ་མཁྱེན་ངེས།
ད་ཡིན་ན་འཐོམ་ཡ་རང་རེད། ངའི་སར་པ་ལེ་ཉོ་མཁན་དང་ཁ་བརྡ་ཐ་ཐོར་བྱེད་མཁན་གྱི་མཐོ་རིམ་སློབ་གྲྭ་བ་མང་བོས་བཤད་ན། ཨ་མདོ་ཀླུ་མཁར་བྱམས་ནི་སྤྱི་སེམས་ཆེ་བ་དང་ལུང་ཚན་གྱི་འཐེན་འཁྱེར་མེད་པ། སྤྱི་ལ་ཤ་ཚ་ཡོད་མཁན་ཞིག་ཡིན་པར་མ་ཟད། ལེགས་སྦྱར་གནང་བར་ནང་བྱན་ཆུབ་པ་ཞིག་ཀྱང་ཡིན་པས། མ་འོངས་སྐབས་བཅུ་དྲུག་པའི་བཀའ་བློན་ཁྲི་བར་ཁོང་ལས་ལྷག་ཅིག་མེད་ཚོད་རེད་ཅེས་བཤད་ཀྱི་འདུག ཡིན་ནའི། འདིར་ཨ་མདོ་ནང་ཁུལ་དུ་ཁ་ཤས་ཤིག་གིས་དགའ་བོ་བྱེད་ཀྱི་མེད་ཅེས་བཀོད་འདུག ཕྲག་དོག་ཡིན་ནམ་འཆར་གཞི་ལྡན་པའི་དྲིལ་བསྒྲགས་ཀྱིས་མི་མང་རྨོངས་འཐོམ་དུ་བསྒྱུར་བ་ཡིན་མིན་ཆ་མ་འཚལ་བས། ཨ་མདོ་ཚོས་འདིར་བགྲོ་གླེང་ཡག་པོ་གནང་རན་འདུག་སྙམ།
བོད་མི་རིགས་ཀྱི་མདུན་ལམ་ལ་བསམ་བློ་མི་གཏོང་བར།ཆོལ་ཁའི་འཐེན་འཁྱེར་ལ་གོམས་པའི་སྐད་ཆ་འདི་འུག་པའི་ཐན་སྐད་དང་མཚུངས།ཁྱོད་ཀྱི་སྐད་ཆ་འདི་བསམ་བློ་མ་བཏང་བའི་ཆོལ་ཆུང་གི་སྐད་ཆ་རང་རེད།མདོ་སྨད་ལ་མི་ཤེས་འཇོན་ཅན་མང་པོ་ཡོད་པ་དངོས་གནས་རེད་ལ་ཆོས་ཉིད་ཀྱང་རེད།འོན་ཀྱང་དཀར་མཛེས་རྡ་ཐ་མའི་ཚུལ་ཁྲིམས་འོད་ཟེར་མི་ག་འདྲ་ཞིག་ཡིན་པ་བསམ་པ་རྣལ་ཏུ་གནས་པའི་མི་ཚང་མས་ཤེས་གསལ་རེད།དེའི་ཕྱིར།ཝྭ་མོའི་དཔང་པོར་བྱང་གུ་ལངས་པ་ནི་ངན་པའི་རང་རྟགས་སྟོན་བྱེད་རང་ཡིན་པ་གོ་དགོས།སྐལ་བཟང་རྡོ་རྗེ་ངོ་མི་ཤེས་མོད།སྐད་ཆ་འདི་དག་ལ་བལྟས་ལ་ཆོལ་ཆུང་ཀླད་མེད་ཅིག་ཡིན་པར་གོར་མ་ཆག།
དྲ་གྲོགས་སྐལ་བཟང་ལགས་ཀྱིས་སྤེལ་བ་འདི་འོས་ཤིང་མཚམས་པ་ཞིག་རེད།
ངའི་ཞེན་ཁོག་སྐད་ཆ་དཀོན་མཆོག་མིན། སྔོན་ནས་ད་བར་དུ་མདོ་སྨད་ཀྱི་སྤྱི་མཐུས་ཚོ་ཕལ་ཆེར་ཁ་ཞེ་གཉིས་མེད་ཀྱིས་༸གོང་ས་མཆོག་དང་བོད་གཞུང་གི་སྲིད་ཞིའི་ལངས་ཕྱོགས་ལ་ཤར་བསྐྱོད་བྱེད་ཐུབ་ཡོད། འདི་ནི་ཧ་ཅང་གཟི་བརྗིད་ཆེན་པོ་རེད། མ་འོངས་བ་ཡིན་ན་ཡང་སྤྱི་མཐུས་ཕྱོགས་ལ་རང་ལ་བློ་འཚུབ་མེད།
ས་ཐག་རིང་ས་ཞིག་ནས་སྐྲགས་ས་འཇིགས་ས་མེད་དུས་ད་ཀི་བཏབ་ནས་ལབ་རྒྱག་ཤེས་ཀ རྗེས་ནས་ལོག་ཡོང་ཁར་མིག་ཤེལ་གཉིས་ཀ་བདག་པོ་རྒྱོབས་མ་གཏོགས་ཅིག་གི་ལག་ཏུ་ཤོར་ཡོང་། ཧཧཧཧ རྩེད་མོ་ཡིན་ཡག་པོ་བྲིས་འདུག ཡིན་ན་ཡང་། རང་དབང་ཕོ་ཉ་ཟེར་བ་དེས་་དོན་དངོས་ཅི་ཡིན་མ་ཤེས་བར་བྲིས་འདུག་འདུག་པས་ཅུངབདེ་མ་སོང་། ཁོམས་དུས་ཡོང་གི་ཡིན་གོ
མདོ་སྨད་མི་མང་ལ་ཕྱོགས་རིས་མེད་ན་ཚུལ་ཁྲིམས་འོད་ཟེར་བདག་པོ་མ་བྱེད། གལ་ཏེ་ཚུལ་ཁྲིམས་འོད་ཟེར་ལ་བདག་པོ་རྒྱག་མཁན་ཚོས་ངོས་ནས་ག་དུས་ཡིན་ན་ཡང་ཆོལ་ཁའི་ཕྱོགས་བྱས་ན་མི་འགྲིག་པའི་སྐད་ཆ་མ་བཤད། རང་གི་ཐོག་ལ་བབ་དུས་ཕྱོགས་རིས་རྐྱང་རྐྱང་བྱས། མི་གཞན་ལ་ཕྱོགས་རིས་མ་བྱེད་ཟེར་གི་མ་འདུག
མཆན་དང་རྩོམ་ཡིག་ཚང་མ་བཀླགས་ཚར་ཡིན། འདི་ཚོའི་ནང་ཨ་རིག་དགེ་མཐོང་གིས་རྩོམ་ཡིག་འདིའི་ནང་དོན་གོ་མེད་པ་འདྲ། སྐལ་བཟང་རྡོ་རྗེ་ལ་འོག་གི་རྒན་པ་དེ་ཚོ་སྤྱི་མཐུས་སུ་བསླེབ་རྒྱུའི་བསམ་བློ་མི་འདུག ཁོས་མདོ་སྨད་མི་མང་གིས་ང་ཚོའི་ཤེས་འཇོན་གཉིས་ལྡན་གྱི་རྒན་པ་དེ་ཚོར་ངལ་གསོ་རུ་མ་བཅུག་པར་འཁང་ར་བྱས་པ་གསལ་བོར་བྲིས་མི་འདུག་གམ།
ཨོ་རེད་མོན་གྷོའི་རྒན་གསོ་ཁང་གི་རྒན་ཁོག་ཚོའི་ཆེད་ཚུལ་ཁྲིམས་འོད་ཟེར་གྱིས་དཀའ་ལས་གང་འཚམ་རྒྱབ་ཡོད་པ་ས་གནས་དེའི་མི་མང་པོས་བཤད་ཀྱི་འདུག།
དེ་འདྲའི་ཉམ་ཆུང་ཚོའི་ཆེད་དུ་གདོང་ལེན་ཤུགས་ཆེར་བྱས་པས་སྐུ་ཤོག་ཁོ་རང་ཁེ་བཟང་ག་ཚོད་འདུག། ཅིག་བྱས་ནས་གྱོང་རག་ཉེན་ཆེ། འོན་ཀྱང་རང་ཉིད་བློས་བཏང་ནས་ཉམ་ཆུང་གི་ཆེད་དུ་དཀའ་ལས་རྒྱབ་པ་ལ་སྙིང་ནས་དགའ་བསུ་ཡོད།
དེང་སེང་དེ་འདྲ་དཀོན་པོ་རེད།
སྐལ་བཟང་རྡོ་རྗེ་ལགས་ཀྱིས་བཤད་པར་རྒྱུ་མཚན་འདུག གསེར་རྟ་ཚུལ་ཁྲིམས་འོད་ཟེར་ལ་མཚོན་ན་བླ་རྒན་ལ་ཤེས་ཡོན་གྱིས་འདང་ན་ལྷག་བསམ་དང་སེམས་ཤུགས་ལ་ཞན་ཆ་ཅི་ཡང་མེད་པས་རང་དབང་ཕོ་ཉས་བཤད་པ་ནི་རང་དབང་གི་སྒྲོགས་གཏམ་ཙམ་རེད། མི་མཁོ་ངོ་མ་དེ་བསྟན་འཛིན་མགོན་པོ་ཟེར་བའི་སྤོ་རྒན་དེ་རེད། མང་པོ་བཤད་ཀྱི་ཡོད་ཀྱང་དུས་ཚོད་མི་འདུག དེ་རིང་དེ་ཙམ་ཡིན། བཀྲ་ཤིས་བདེ་ལེགས།
མ་གཞི་གྲོགས་པོ་འདིས་བདེན་པ་ཁ་ཤས་བཤད་འདུག་ཀྱང་། རང་གི་དམིགས་ཡུལ་དེའི་ཆེད་དུ་བཤད་སྟངས་ནོར་ཡོད་ས་མང་གི འོན་ཀྱང་མདོ་སྨད་ཚང་གི་ནང་ན་རྒྱལ་རོང་ཟླ་བ་ཚེ་རིང་ལས་ལྷག་དཀོན་ཚོད་ཡིན། ཁོས་རྙོག་དྲ་བཟོ་མ་ཐུབ་པ་ནི་གནད་དོན་མིན་ལ། འུར་མ་བརྒྱབས་པ་ནི་དེ་བས་ཀྱང་གནདདོན་ཞིག་མིན་པར་ཆ རྐྱེན་ལེགས་ཤོས་ཤིག་ཏུ་བགྲང་ཆོག ཁོང་ནི་མདོ་སྨད་ཙམ་མ་ཟད་བོད་ཀྱི་སྤྱི་འཐུས་ནང་དུ་མ་སླེབས་ན་ཅུང་ཡོད། རྒྱུ་མཚན་ནི། གྲོས་ཚོགས་ནང་གི་ཆོལ་གསུམ་གྱི་མི་རྒན་པ་ཚོ་དྲིས་དང་ཧ་གོ་ཡོང་། གཙོ་བོ་རྩིས་རིག་ཕྱོགས་དང་ལངས་ཕྱོགས་ཐད་ནས་ཧ་ཅང་བཟང་ངོ་། མདོ་སྨད་ཆོལ་ཁའི་ཚོགས་གཙོ་གནང་སྐབས་ཕྱི་རྗེས་ཧ་ལས་བ་བཞག་ཡོད། མི་ཤེས་ན་ཡར་མར་ལ་དྲིས། ཡེ་ཤེས་སྒྲོལ་མ་བུད་མེད་ཅིག་དགོས་ན་འདེམས་ན་འོས་ཤིང་འཚམས་པ་ཡིན། གནས་སྐབས་དེ་ཙམ་བྱོས། རྒན་པ་འགའ་རེ་ལ་རྐུབ་སྟེགས་མ་སྲུང་རོགས་ཞེས་མགོ་ནས་བྲིས་པ་དང་། མཇུག་ཏུ་རྒན་པ་ཁག་ཅིག་ཨུ་ཚུགས་ཀྱིས་ཡར་བཅུག་ཨེ་ཐུབ་ཏུ་འབད་པ་ནང་འགལ་དུ་མཐོང་ངོ་།།
རང་དབང་གི་ཕོ་ཉས་བཤད་པ་ཙམ་ལས་བདེན་པ་བཤད་མི་འདུག
རྩོམ་པ་པོ་དང་། ཟིན་བྲིས་པ་ཚོ་ཀྱོག་ཀྱོག་ཆགས་ན་ངེས་པར་མི་མང་འཐོམ་དུ་འཇུག་ངེས་ཤིག་རེད།
དགའ་ལྡན་གྱི་གྲྭ་ཚུལ་ཁྲིམས་འོད་ཟེར་ལ་ཚོགས་སྡེ་ཚང་མས་མཚན་རྟགས་བརྒྱབ་པ་བདེན་པ་རེད། ཡིན་ཡང་། དེ་ནི་ཕྱོགས་འཐེན་དང་། ངོ་སྲུང་། གཅིག་རྒྱབ་གཅིག་ལངས་ཤིག་ཡིན་པ་ལས་ཚུལ་ཁྲིམས་འོད་ཟེར་ལ་ནག་ཉེས་ཡོད་པ་ཞིག་མ་རེད།
བེ་རུ་དགེ་བཤེས་འཇིགས་མེད་དབང་རྒྱལ་དང་། རྙིང་མའི་སྤྱི་འཐུས་བསོད་ནམས་བསྟན་འཕེལ་གཉིས་གཞུང་འབྲེལ་གྱི་ཐོག་ནས་གནད་དོན་དེའི་ཐད་ཉམས་ཞིབ་ཕྱིན་པ་རེད། ཚུལ་ཁྲིམས་འོད་ཟེར་དཀར་པོ་ཆགས་པ་མ་ཟད། ས་མཚན་ཚང་མ་ཕྱིར་འཐེན་བརྒྱབ་པ་རེད།
འདི་ནི་ས་གནས་མོན་གྷོའི་དབང་འཛིན་ཚོགས་ཁག་དེས་རང་ཉིད་ཀྱི་སྐྱུག་བྲོ་བའི་བྱ་སྤྱོད་ངོས་འཛིན་ཐུབ་པ་རེད་མ་གཏོགས། རྒན་བེ་རུ་དང་སྐུ་ངོ་བསོད་ནམས་བསྟན་འཕེལ་གཉིས་ཀྱི་ལག་ཏུ་མཚོན་ཆ་དང་། རྒྱབ་ཏུ་དམག་རོགས་གང་ཡང་མེད་པ་རེད། འདིའི་ཐད་ལ་སྤྱི་འཐུས་རྣམ་པ་གཉིས་ཀྱིས་དྲང་ཚུགས་ལྡན་པའི་ཕྱིས་རྗེས་ཆེན་པོ་ཆགས་པ་རེད།
ཕྱིས་སུ་རྒན་བེ་རུ་ལགས་ནས་དེའི་སྐོར་ལ་གསལ་བཤད་བྱས་པ་བོད་ཀྱི་ཚགས་ཤོག་ཞིག་ཏུའང་མཐོང་སོང་།
རྒན་ཚུལ་ཁྲིམས་འོད་ཟེར་ལགས་ཀྱིས་བཀའ་དྲིན་ལ་དེང་སང་མོན་གྷོའི་རྒན་གསོ་ཁང་ཡག་ཐག་ཆོད་འདུག་ཟེར། ཚོགས་ཁང་དེ་ཡང་ཉམས་གསོ་ཡག་པོ་བཏང་འདུག་ཟེར།
འདི་ཚང་མ་རྒན་ཁོང་གི་ཕྱིས་རྗེས་དང་བཀའ་དྲིན་རེད་བསམ་གྱིན་འདུག
ཡིན་ནའང་། རྒན་ཚུལ་ཁྲིམས་འོད་ཟེར་གྱི་གཏམ་བཤད་ལ་མི་ཚང་མས་སུན་སྣང་བྱེད་པ་རེད། དེ་ནི་ཁོང་གིས་གཏམ་བཤད་ཉོག་རིང་མ་བྱེད་ངེས་རེད།
འདི་ཁོང་གི་སྐྱོན་ཆ་ཟེར་ཆོག་ལ། ཚང་མས་ཉོབ་སྣང་བྱེད་ས་དེ་རེད།
ཀླུ་མཁར་བྱམས་ལ་འདོད་པ་མེད་མདོ་སྨད་ལ་ལྷག་བསམ་རྣམ་དག་ཅན་ཞིག་ལས་གཞུང་དང་གོང་ས་མཆོག་ལ་ཟུར་བྱེད་མཁན་ཞིག་དགོས་དོན་མེད།
བདེན་པ་རེད་ད་དུང་མང་པོ་ཞིག་ལྷག་འདུག་དེ་ཚོ་ནང་དུ་མ་ཚུད་པ་གང་ཡིན་ནམ།
བསམ་ཚུལ་ཡག་པོ་འདུག ཡིན་ཡང་གསེར་རྟ་ཚུལ་ཁྲིམས་མི་ལྷག་བསམ་ཅན་དང་ཡག་པོ་རེད་ཟེར་ན་ཅུང་ཐལ་དྲགས་འདུག གང་ཡིན་ཟེར་ན་ཁོ་རིང་རྙོག་དྲ་མང་པོ་བཟོ་མཁན་ཞིག་དང་དེ་དག་ལ་ཐད་ཀར་འབྲེལ་བ་ཡོད་མཁན་ཆགས་ཡོད། དཔེར་ན་ལོ་སྔོན་མ་ལྷོ་ཕྱོགས་མོན་གྷོ་ས་ཁུལ་ལ་ཛ་དྲག་ཆེ་བའི་རྙོག་དྲ་མང་པོ་བཟོས་ཏེ་མཐར་གྲྭ་ཚང་དྲུག་དང༌། ས་གནས་གཞིས་འགོ། རང་བཙན་ཚོགས་ཆུང༌། ས་གནས་གཞོན་ནུ་དང་བུད་མེད་སོགས་ཚོགས་སྐྱིད་གཞན་བཅས་ཀྱིས་མཉམ་འབྲེལ་གྱིས་སྤྱི་འཐུས་ནས་ཕྱིར་ཕུད་གཏོང་དགོས་པའི་ཡིག་གེ་བོད་མི་མང་སྤྱི་འཐུས་ལྷན་ཚོགས་ལ་བཏང་ཡོད་ཅིང༌། སྤྱི་འཐུས་ལྷན་ཚོགས་ཀྱི་ཚོགས་གཞོན་ས་གནས་ཆེད་ཕེབས་ཀྱིས་དཀའ་རྙོག་དེ་སེལ་ཐབས་བྱས་ཡོད། དེ་རྗེས་ནས་ཅུང་ཞི་འཇམ་སོང་བ་ཡིན། དེ་ལྟའུ་གནད་དོན་ནི་བཙན་བྱོལ་གཞུང་གི་གྲོས་ཚོགས་འཐུས་མི་ཞིག་ལ་འཕྲད་པའི་དཀའ་རྙོག་ཐོགས་མ་དེ་ཆགས་ཡོད་པ་རེད། དེ་ལྟར་ཡིན་བཞིན་དུ་མདོ་སྨད་མི་མང་གིས་ཡང་བསྐྱར་ཁོང་ལ་རྒྱབ་སྐྱོར་བྱས་ན་འོས་པོ་རང་མི་འདུག ཁོ་ལས་ལྷག་པའི་མདོ་སྨད་ལ་ཤེས་འཇོན་གཉིས་ཀྱི་མི་སྣ་གང་མང་ཡོད་པ་རེད།
སྐལ་བཟང་རྡོ་རྗེའི་བཤད་པར་དགའ་བསུ་སྙིང་ནས་ཡོད། དངོས་གནས་མདོ་སྨད་པ་ཚོས་བསམ་བློ་གཏོང་རན། ཀིརྟི་སྒྲོལ་དཀར་ལྷ་མོ་ནི་ནམ་རྒྱུན་གྲོས་ཚོགས་ནང་ཤི་མ་གསོན་གྱི་སྐད་ཆ་རྐྱང་བ་ལབ་ནས་དུས་ཚོད་བསྐྱལ་ཡོད་པ་དེ་རེད།ཡེ་ཤེས་སྒྲོལ་མ་ནི་བཤམས་རྒྱུ་ཞིག་ཡིན་འགྲིགས་པ་ལས། དེ་མིན་མི་དམངས་ཀྱི་བདེ་སྡུག་འདོན་མཁན་ཞིན་མིན་པ་གསལ་བོར་ཡིན།སྒྲོལ་མ་མཚོ་མོ་ནི་ན་ཟུག་ཞིག་ཆེས་ཡོད། ལོ་སྔོན་མ་ལུག་རྫི་སྤེན་པའི་ལག་ཆ་ཞིག་ལས་ཅི་ཉན། དེ་ལས་ཀླུ་མཁར་བྱམས་དང་རྡོ་རྗེ་དབང་ཕྱུག་སོགས་རུས་པ་ཅན་འགའ་བདམས་ཐོན་བྱུང་ན་མདོ་སྨད་ཀྱི་གཟི་བརྗིད་ཡིན་ནོ།
ཨོ་ཨོ། བཤད་རྒྱུ་ཞིག་མི་འདུག
ད་དུང་འགའ་ཞིག་ལྷག་བསྡད་འདུག་ན་དེ་ཚོ་ཡང་དབྱེ་འབྱེད་ཞིག་གནང་རོགས
ད་རུང་གསལ་ག་ཕྱེས་མེད་པའི་སྤྱི་འཐུས་འོས་མི་འགའ་ཤས་འདུག་དེ་ཚོ་ཡང་དགེ་སྐྱོན་གྱི་གསལ་བཤད་རེ་བྱས་ན་ཕན་པ་ཆེ་ཙམ་ཡོད །
དངོས་གནས་མ་རེད་ཟེར་རྒྱུ་མི་འདུག རྩོམ་ཡིག་འདི་འདྲ་བྲིས་ན་ཀློག་སྤྲོ་གི
ཁྱེད་ཀྱི་དབྱེ་ཞིབ་ལས་འགའ་ཞིག་ལག་འཐེན་དང་། ཁ་ཤས་མར་གཡུག་གི་རྣམ་པ་ལྟ་བུར་མངོན་མོད་ཞིབ་ཚགས་མོ་ཞིག་བལྟས་རྗེས་དཀར་ནག་གི་དབྱེ་བ་ངོས་འཛིན་དྲང་མོ་ཞིག་བྱེད་རྒྱུ་ཡིན།