ཟླ་འདིའི་ཚེས་ ༢༥ ཉིན་གྱི་ཐོ་རངས་ཙམ་ལ་རྫ་སེར་ཤུལ་དགོན་ཐེག་ཆེན་དར་རྒྱས་གླིང་གི་དགོན་བདག་བླ་མ་སྨན་ཤུལ་བློ་བཟང་འཇམ་དབྱངས་བསྟན་འཛིན་ཆོས་ཀྱི་ཉི་མ་མཆོག་དགོངས་པ་ཆོས་དབྱིངས་སུ་གཤེགས་ཡོད་འདུག དེ་ནི་ཟླ་འདིའི་ཚེས་ ༧ ཉིན་ནས་བཟུང་སེར་ཤུལ་དགོན་གྱི་གྲྭ་བ་ཚོས་སྐད་ཡིག་རང་དབང་དགོས་པ་སོགས་ཀྱི་ལས་འགུལ་ཤུགས་ཆེན་སྤེལ་བ་ལ་བརྟེན་ཏེ། རྫོང་དང་ཞིང་རིམ་པའི་འབྲེལ་ཡོད་ལས་བྱེད་ཚོས་སེར་ཤུལ་དགོན་དུ་སློབ་གསོ་རྒྱག་པ་དང་། གྲྭ་རྒྱུན་ཡོད་ཚད་ཕྱིར་འཕུད་དགོས་པ། དགོན་བདག་བླ་མ་རང་དགོན་ལས་གཞན་དུ་ཕེབས་མི་ཆོག་ཚུལ་སོགས་ཀྱི་བཀའ་རྒྱ་བཏང་ཡོད་འདུག
གནད་དོན་དེ་དག་ཐད། དགོན་བདག་བླ་མ་སྨ་ཤུལ་རིན་པོ་ཆེས་སྐབས་དེར་གྲྭ་རྒྱུན་རྣམས་ཕྱིར་འཕུད་བཏང་ན་དགོན་པའི་སློབ་གཉེར་ལ་འཐུས་ཤོར་དང་། ཉམ་ཆག་ཆེན་པོ་འགྲོ་ངེས་ཡིན་པས་གྲྭ་རྒྱུན་རྣམས་མུ་མཐུད་སྡོད་ཆོག་པ་དང་སློབ་གཉེར་སྔར་རྒྱུན་བཞིན་ཡོང་ཐབས་ལ་འབད་བརྩོན་གྱིས་ཐུགས་ཁྲལ་ཆེན་པོ་གནང་ཡོད་ཅིང་། སྐབས་དེར་སྙུང་གཞི་ཅུང་ཙམ་བཞེས་ཡོད་ཀྱང་ཛ་དྲག་གི་གནས་སྟངས་མེད་མོད། ཟླ་འདིའི་ཕྱི་ཚེས་ ༢༥ ཉིན་གྱི་ཞོགས་པ་ཐོ་རངས་ཆུ་ཚོད་ལྔ་བ་ཙམ་ལ་གློ་བུར་དུ་སྙུང་གཞི་ཇེ་སྡུག་ཏུ་ཕྱིན་ཡོད་ཀྱང་། ཐག་རིང་ལ་ཕེབས་མི་ཆོག་པའི་བཙན་བཀའ་ཡོད་སྟབས། སྨན་ཁང་ལ་སྨན་བཅོས་ཆེད་ཕེབས་མ་ཐུབ་པར་དགོངས་པ་རྫོགས་ཡོད་འདུག
སྨན་ཤུལ་བློ་བཟང་འཇམ་དབྱངས་བསྟན་འཛིན་ཆོས་ཀྱི་ཉི་མ་མཆོག་ནི། རྫ་སེར་ཤུལ་དགོན་དང་བ་རོད་དགོན་སོགས་ཀྱི་དགོན་བདག་བླ་མ་ཡིན་པ་དང་། རྫ་ཆུ་ཁའི་སྡེ་དགོན་ཡོངས་ཀྱིས་དད་གུས་དང་བརྩི་བཀུར་ཞུ་སའི་བླ་ཆེན་ཞིག་ཀྱང་ཡིན། རྗེ་འདིའི་སྐུ་ཐོག་དང་པོ་རྗེ་བཙུན་བློ་བཟང་ཡེ་ཤེས་བསྟན་འཛིན་མཆོག་ནི་དབུས་ཀྱི་གདན་ས་ཆེན་པོ་སེ་ར་ཐེག་པ་ཆེན་པོའི་གླིང་དུ་ཕེབས་ནས་གཞུང་བཀའ་བོད་ལྔ་མདོ་སྔགས་རིག་གནས་དང་བཅས་པར་ཐུགས་བྱན་ཆུད་པའི་སྦྱང་པ་མཛད་དེ། ཕྱིར་ཁམས་ཕྱོགས་སུ་བྱོན་ནས་དགོན་འདིར་ཐོས་བསམ་གླིང་གྲྭ་ཚང་གསར་འཛུགས་མཛད་ཅིང་། གྲྭ་སའི་སྒྲིག་ལམ་བཞིན་གཏན་འབེབས་གནང་པ་སོགས་ཀྱི་རླབས་ཆེན་གྱི་མཛད་འཕྲིན་བསྐྱངས་པ་དང་དེ་ནས་བཟུང་དགོན་འདིའི་བསྟན་པའི་བདག་པོར་གྱུར་ཡོད་འདུག
དམ་པ་འདི་ནི་ ༡༩༤༧ ལོར་སྐུ་འཁྲུངས་ཤིང་ ༡༩༤༩ ལོར་རྫ་ཆོས་རྗེ་བློ་བཟང་དཔལ་ལྡན་ཆོས་ཀྱི་གྲགས་པས་སྨན་ཤུལ་སྐུ་ཕྲེང་གཉིས་པ་ངག་དབང་ཆོས་ཀྱི་ཉི་མའི་ཡང་སྲིད་དུ་ངོས་འཛིན་གནང་ཡོད་བ་དང་། ༡༩༥༣ ལོར་དགོན་འདིའི་བསྟན་པའི་བདག་པོར་བཀུར་ཏེ་སྡེ་དགོན་ཡོངས་ཀྱི་མགོན་དཔུང་དམ་པར་མངའ་གསོལ་མཛད། དགུང་ལོ་ ༡༦ བཞེས་པ་རབ་བྱུང་བཅུ་དྲུག་པའི་ཆུ་སྟག་ ༡༩༥༩ ལོར་བླ་ཆེན་དང་མི་ཆེན་གཞན་དང་འདྲ་བར་བཙོན་ཁང་དུ་ཡུན་རིང་བཞུགས་དགོས་བྱུང་། ༡༩༨༠ ལོ་ནས་དགོན་འདིའི་ཆོས་སྒོ་འབྱེད་ཐབས་ལ་ཐུགས་ཁུར་ལྷུར་བཞེས་མཛད་དེ་ལོ་དེར་ཆོས་སྒོ་ཕྱེ་ཐུབ་པ་བྱུང་ཡོད། ༡༩༨༦ ལོར་རྗེ་འདིས་༸ཀུན་གཟིགས་པཎ་ཆེན་ཐམས་ཅད་མཁྱེན་པ་མཆོག་དགོན་འདིར་གདན་ཞུས་གནང་བ་དང་། རྒྱུན་ལྡན་དགོན་འདིའི་ཆོས་སྲིད་ཀྱི་བྱ་བ་ཡོངས་སུ་རྫོགས་པའི་ཐུགས་འགན་བཞེས་ཏེ། ད་སྐབས་དགོན་འདི་མདོ་ཁམས་ས་ཡི་བཤད་སྒྲུབ་ཀྱི་བསྟི་གནས་ཆེན་པོ་ཞིག་ཏུ་གྱུར་ཡོད་པ་འདི་ཡང་ཁོང་གི་མཛད་རྗེས་བླ་ན་མེད་པ་ཞིག་ཡིན།
གོང་གི་གནས་ཚུལ་དེ་སེར་ཤུལ་རིན་ཆེན་དོན་གྲུབ་ཀྱིས་མཁོ་སྤྲོད་བྱུང་།
བསྟན་འགྲོ་ལ་སྨན་པའི་སྐྱེས་ཆེན་ཡང་སྤྲུལ་གསར་པའི་ཟླ་གཞོན་མྱུར་དུ་འཆར་བའི་སྨོན་འདུན་ཞུ།
རྫ་སེར་ཤུལ་དགོན་ཐེག་ཆེན་དར་རྒྱས་གླིང་ལབ་ན། དེང་སང་བོད་ཆོལ་ཁ་གསུམ་ན་མིང་དུ་གྲགས་ཡོད་ནི་རེད། དེའི་དགོན་བདག་ཞིང་ཁམས་གཞན་དུ་ཕེབས་སོང་ན། ཅུང་ཡོད་པ་མ་བཤད་དགོས་པ་རེད། སླར་ཡང་དགོན་ཆེན་དེ་ལ་ཕན་པའི་སྐྱེས་ཆེན་ཞིག་བྱོན་པར་སྨོན།
བསྟན་པ་དང་འགྲོ་བ་ལ་ཕན་ཐོག་བཞིན་པའི་བླ་མ་ཞིག་ཡིན་ས་རེད།
ང་ཚོས་ངོས་ནས་གདུང་སེམས་མཉམ་བསྐྱེད་བྱེད་ཀྱི་ཡོད།
དྲ་གྲོགས་སེར་ཤུལ་རིན་ཆེན་དོན་འགྲུབ་ལ་ཐུགས་རྗེ་ཆེ་ཞུ་བཞིན་ཡོད།
བསྟན་པའི་མེ་རོ་གསོས་གནང་བར་བསྔགས་བརྗོད་ང༌། སྐུ་མྱ་ངན་ལས་འདས་ཀྱང་བཞག་པའི་མཛད་རྗེས་ལ་རྗེས་དྲན་བྱེད།
འདིའི་སྐོར་གྱི་གནས་ཚུལ་ཤེས་འདོད་ཡོད་པ་རྣམས་ཀྱིས་བདག་ལ་འབྲེལ་བ་བྱེད་རོགས། འབྲེལ་མཐུད། 0091-9980654163-sershulrinchen@yahoo.inསེར་ཤུལ་རིན་ཆེན་དོན་གྲུབ་ཀྱིས།