སོག་རིཊ་ཚོར་བཀའ་ཆོས།

ཟླ་སྔོན་མའི་ཕྱི་ཚེས་ ༣༠ ནས་དེ་རིང་ཕྱི་ཚེས་ ༢ བར་གྱི་ཉིན་གྲངས་གསུམ་རིང་༸གོང་ས་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཨུ་རུ་སའི་ནང་པའི་དད་ལྡན་པ་གཙོས་བཞུགས་སྒར་སེར་སྐྱ་མི་མང་སྟོང་ཕྲག་བརྒལ་བར་རྒྱལ་སྲས་ཐོགས་མེད་ཀྱིས་མཛད་པའི་རྒྱལ་སྲས་ལག་ལེན་སོ་བདུན་མའི་བཀའ་ཆོས་གནང་ཡོད་པ་ལྟར། དེ་རིང་སྔ་དྲོར་དཔལ་གསང་བ་འདུས་པའི་བཀའ་དབང་གནང་ཡོད།  

སྐབས་དེར་༸གོང་ས་མཆོག་གིས་གསུངས་དོན། དེ་རིང་དཔལ་གསང་བ་འདུས་པའི་བཀའ་དབང་ཆ་ཚང་གནང་ཚར་བ་རེད། དབང་འདི་ཐོབ་པའི་རྗེས་ལ་ཁྱེད་རང་ཚོའི་ཁྲོད་གསང་བ་འདུས་པའི་བསྐྱེད་རིམ་གྱིས་ཐོག་ལ་གང་ཐུབ་ཀྱིས་ཨུ་ཚུགས་ཏོག་ཙམ་རྒྱག་འདོད་ཡོད་རིགས་ཀྱིས། རྫོགས་རིམ་གྱི་རྟོགས་པ་སྐྱེ་རྒྱུ་མེད་པ་ཞིག་དང་ཉམས་ལེན་བྱ་ཐུབ་ཐབས་མེད་པ་ཞིག་བཤད་བསྡད་པ་ལས། ཁ་ཡོད་ལག་ཡོད་ཀྱིས་བསྐྱེད་རིམ་སྲུང་ཐུབ་ན་ཡག་པོ་ཡོང་གི་རེད།  དེའི་ནང་ནས་ཀྱང་སྙིང་དོན་གཙོ་བོ་དེ་སྐུ་གསུམ་ལམ་འཁྱེར་དེ་གལ་ཆེ་ཤོས་རེད།  དེར་ག་ཚོད་ཀྱིས་བློ་སྦྱོང་ཐུབ་ན་ཡག་པོ་ཡོང་གི་རེད། ང་རང་ཚོ་ཚང་མ་རྒན་པ་ཆགས་ཏེ་རིམ་གྱིས་ཤི་དགོས་པ་རེད། ཡིན་ནའང་། ཤི་བའི་དུས་དེ་ལ་རེ་བ་ཏོག་ཙམ་རྒྱག་ས་ཡོད་པ་ཞིག་དགོས་པ་རེད། དེ་ཡང་བྱང་ཆུབ་སེམས་དང་སྟོང་ཉིད་ཀྱི་ལྟ་བ་གཉིས་ལས་བྱང་ཆུབ་ཀྱི་སེམས་ལ་འཆི་བའི་སྐད་ཅིག་གི་དུས་ཡུན་ནང་བློ་སེམས་རྩེ་གཅིག་གིས་སྒོམ་ཐུབ་པ་ཡིན་ན།  སྐྱེ་བ་ཕྱི་མར་རྐྱེན་བཟང་པོ་ཞིག་ཐོབ་རྒྱུ་དེ་བརྒྱ་ཆའི་བརྒྱ་ཐག་གཅོད་ཐུབ་པ་རེད། འཆི་བའི་དུས་སུ་བླ་མ་གམ་དུ་ཕེབས་ཏེ་སྐྱབས་འཇུག་ཞུ་བ་ལས་སོ་སོ་རང་ཉིད་ཀྱིས་བློ་སེམས་བརྩེ་གཅིག་གིས་བྱང་ཆུབ་སེམས་སྒོམ་པ་དེ་ལས་ལྷག་པ་གང་ཡང་མེད། ཅེས་གསུངས་སོང་།  

ཡང་ཁོང་གིས། རྩ་བ་བྱང་ཆུབ་སེམས་སྒོམ་རྒྱུ་དེ་རེད། དེ་ལ་ཁག་པོ་ཞེ་དྲག་ཡོད་པ་མ་རེད། གཙོ་བོ་སྤྱོད་འཇུག་སོགས་ལ་བལྟས་ཏེ་ཡང་དང་ཡང་དུ་བསམ་བློ་བཏང་བ་ཡིན་ན། བློ་གོམས་པའི་རྗེས་སུ་ཞུགས་པ་རྟེན་འབྲེལ་གྱི་ཆོས་ཉིད་ཡིན་པའི་ཕྱིར་རོ་ཞེས་པ་དང་། སྤྱོད་འཇུག་ཏུ་གོམས་ན་སླ་བ་མ་ཡིན་པའི་དངོས་དེ་གང་ཡང་ཡོད་མ་ཡིན་ཞེས་པ་ལྟར། གོམས་པར་གྱུར་ཚེ་རིམ་བཞིན་བློ་ལ་འགྱུར་བ་ཞིག་ཏན་ཏན་ཡོང་གི་ཡོད། གཙོ་བོ་བྱང་ཆུབ་སེམས་ནས་མགོ་བརྩམས་ཏེ། བྱང་ཆུབ་སེམས་ཀྱི་རྟོག་པ་སླེབས་པར་བྱ་རྒྱུ་དང་བྱང་ཆུབ་དང་མཐར་པ་ཞེས་པ་ཞིག་ཡོད་པ་དེ་སྟོང་ཉིད་ཀྱི་བསམ་བློ་གཏོང་རྒྱུ་མ་གཏོགས་ཁག་པོ་རེད། དེར་བརྟེན། བྱང་ཆུབ་སེམས་ཀྱི་སྨོན་ལམ་ཡག་པོ་ཞིག་ཡོང་བ་ལ་རྒྱབ་རྟེན་གཙོ་བོ་སྟོང་ཉིད་ཀྱི་ལྟ་བ་ཆགས་ཡོད་ལ། དེ་དག་ལ་གང་ཐུབ་ཀྱིས་ད་ལྟ་ནས་གོམས་ཤིང་འདྲིས་པར་གྱུར་ཚེ་སྟོན་པ་གསུམ་ལྡན་གྱི་རིག་པ་འཛིན་པ་ཟེར་བ་ཞིག་ཆགས་ཐུབ་ཀྱི་རེད། ཅེས་གསུངས་བྱུང་།

ཐེངས་འདིའི་གསུང་ཆོས་ཐོག་ཨུ་རུ་སུའི་གྲོས་ཚོགས་འཐུས་མི་གསུམ་དང་ཏེ་ལོ་རིན་པོ་ཆེ་མཆོག ཀ་ཛག་སི་ཐན་རྒྱལ་ཁབ་ཀྱི་དཔལ་འབྱོར་བློན་ཆེན་གཙོས། སོག་པོ་ཁལ་མུག་དང་ཐུ་ཝ། སྦི་རི་ཡཱ་བཅས་ནས་ཡིན་པའི་ནང་པའི་དད་ལྡན་ཆོས་ཞུ་བ་ ༡༠༣༤ ལྷག་བཅར་ཡོད་པར་མ་ཟད། ལྷོ་ཀོ་རི་ཡ་དང་ཝེ་ཐི་ནམ། ཐེ་ཝན་སོགས་རྒྱལ་ཁབ་ ༥༥ ལྷག་གི་དད་ལྡན་ཆོས་ཞུ་བ་སྟོང་ཕྲག་ཁ ཤས་བཀའ་ཆོས་ཞུ་བར་བཅར་ཡོད་ལ། དེ་རིང་ཕྱི་དྲོ་༧གོང་ས་མཆོག་གིས་ཨུ་རུ་སུ་ནས་ཕེབས་པའི་ཆོས་ཞུ་བ་ཚོར་དམིགས་བསལ་མཇལ་ཁ་ཡང་བསྩལ་ཡོད།

གསར་འགོད་པ། དོན་གོ