ཝར་ཎ་མཐོ་སློབ་ཀྱི་སློབ་བུ་སྤེན་པ།
དྲི་བ། བཙན་བྱོལ་བོད་མིའི་སློབ་གྲྭ་ཁག་ཏུ་དབྱིན་ཡིག་དང་པོ་དང་བོད་ཡིག་ཕལ་བར་བཞག་ཏེ་སློབ་ཁྲིད་བྱེད་ཀྱིན་པའི་ཐད་ཁྱེད་རང་ལ་བསམ་འཆར་གང་འདྲ་ཡོད་དམ།
ལན། བཙན་བྱོལ་བོད་མིའི་ཤེས་ཡོན་སྲིད་བྱུས་ཐོག་མར་གཏན་འབེབས་བྱེད་སྐབས་རྒྱུ་མཚན་གང་མང་ཞིག་ལ་བལྟས་ཡོད་རྒྱུ་རེད། ད་ལྟའི་གནས་སྟངས་ལ་བལྟས་ན། ང་ཚོས་ངེས་པར་དུ་ཤེས་ཡོན་སྲིད་བྱུས་གསར་བ་གཏན་འབེབས་དང་ལག་བསྟར་བྱས་ཏེ། སོ་སོའི་སྐད་ཡིག་དང་རིག་གཞུང་སྲུང་སྐྱོབ་བྱ་རྒྱུ་དང་པོར་འཇོག་རྒྱུ་ཧ་ཅང་གལ་ཆེན་པོ་རེད། ང་ཚོས་ད་དུང་སྔོན་མ་གཏན་འབེབས་བྱས་པའི་ཤེས་ཡོན་སྲིད་བྱུས་རྙིང་པ་དེ་ལག་བསྟར་བྱས་པ་ཡིན་ན། དུས་ཡུན་རིང་པོ་ཞིག་མ་འགོར་བར་བཙན་བྱོལ་ནང་བོད་པའི་སྐད་དང་ཡི་གེ་བརླག་པ་དང་ཉམས་ཆག་སུ་འགྲོ་བའི་ཉེན་ཁ་ཆེན་པོ་ཞིག་མཐོང་གི་འདུག
དྲི་བ། ཝར་ཎ་མཐོ་སློབ་ཀྱི་སློབ་མ་ཚོས་ནམ་རྒྱུན་གྱི་བྱེད་སྒོའི་ཁྲོད་མི་རིགས་དང་རིག་གཞུང་ལ་འགན་འཁྲི་གང་འདྲ་ཞིག་འཁྱེར་གྱི་ཡོད་དམ།
ལན། ང་ཚོའི་མཐོ་སློབ་ལ་མཚོན་ན་བོད་པ་གཅིག་པུ་མིན་པར་རྒྱལ་བལ་འབྲུག་གསུམ་དང་ཧི་མ་ལ་ཡའི་རི་རྒྱུད། དེ་བཞིན་བོད་ཕྱི་ནང་གཉིས་ནས་འཚར་ལོངས་བྱུང་བའི་སློབ་མ་བཅས་མང་པོ་ཞིག་འདུ་འཛོམས་བྱུང་ཡོད་པ་རེད། ཕྱོགས་ཡོངས་ནས་བལྟས་ན་ང་ཚོ་བོད་རིགས་སློབ་མ་ཚོར་བོད་སྐད་དང་བོད་ཡིག་གི་ཐོག་ལ་དོ་སྣང་ཆེན་པོ་འདུག ཧི་མ་ལ་ཡའི་རི་རྒྱུད་ཀྱི་སློབ་མ་ཚོར་མཚོན་ནའང་ཧིན་རྡུ་དང་ལེགས་སྦྱར་སྐད་ཡིག་སོགས་ཀྱི་ཐད་ལ་དོ་སྣང་བྱེད་ཀྱི་ཡོད་ཀྱང་། སེམས་པའི་གཏིང་རུམ་དུ་བོད་ཀྱི་སྐད་ཡིག་ལ་དགའ་ཞེན་ཆེན་པོ་རེད། སློབ་གྲྭའི་བྱེད་སྒོའི་ཐད་ནས་རིག་སློབ་རྩོམ་སྒྲིག་ཁང་གིས་ལོ་རེར་དུས་དེབ་ཐེངས་གཉིས་རེར་འགྲེམས་སྤེལ་བྱེད་ཀྱི་ཡོད་ལ། དེའི་སྟེང་སློབ་མ་མང་པོ་མཉམ་ཞུགས་གནང་གི་ཡོད་པ་རེད། དེ་དང་འབྲེལ་རྩོམ་རིག་དང་རིག་གནས་ཁོ་ནའི་སྟེང་ཟབ་སྦྱོང་སྤྲོད་ཀྱི་ཡོད་པ་རེད། ང་ཚོར་བདེ་དོན་ལྷན་ཚོགས་ཟེར་བ་ཞིག་ཡོད་པ་རེད། སློབ་མ་གསར་ཞུགས་གནང་མཁན་ཚོར་ཆོས་བརྒྱུད་ཆེན་པོ་བཞི་ངོ་སྤྲོད་དང་སློབ་མཐར་ཕྱིན་མཁན་རྣམས་ལ་དམིགས་ཏེ་ནང་ཆོས་ངོ་སྤྲོད་ཀྱི་ལས་རིམ་ཞིག་འགྲོ་བཞིན་ཡོད་པ་རེད། དེ་བཞིན་ཚོགས་པ་གཞན་པ་མང་པོ་ཞིག་གིས་ཀྱང་བོད་སྐད་ཡིག་རང་གི་ཐོག་ལ་ལས་འགུལ་འདྲ་མིན་སྤེལ་གྱི་འདུག
དྲི་བ། བོད་ནང་གི་སྐད་ཡིག་རིག་གཞུང་གི་ཛ་དྲག་གནས་བབ་ཐད། བཙན་བྱོལ་དུ་ཡོད་པའི་བོད་མི་ཚོས་ལས་འཆར་གང་འདྲ་ཞིག་བསྒྲིག་དགོས་པར་མཐོང་གི་འདུག་གམ།
ལན། རྒྱ་གཞུང་གིས་ཉེ་ཆར་བཟོས་པའི་ཤེས་ཡོན་སྲིད་ཇུས་དེ་ལག་བསྟར་བྱས་པ་ཡིན་ན། བོད་སྐད་ཡིག་ཏན་ཏན་འཇིག་ཉེན་ཞིག་ལ་ཐུག་པ་རེད། བཙན་བྱོལ་བོད་གཞུང་དང་ཚོགས་པ་སྒྲིག་འཛུགས་ཁག དེ་བཞིན་སློབ་གྲྭ་སོ་སོའི་འཛིན་སྐྱོང་སྡེ་ཚན་བཅས་ཀྱིས་གཅིག་གྱུར་ཐོག ཤེས་ཡོན་སྲིད་བྱུས་གསར་བ་ལག་བསྟར་གྱི་ཐོག་ལ་གོམ་པ་བརྒྱབ་ཏེ། མ་འོངས་པར་བོད་ནང་ཉམས་ཆག་ཕྱིན་ཡང་། བཙན་བྱོལ་ནང་མི་ཉམས་པར་རྒྱུན་འཛིན་དར་སྤེལ་གཏོང་ཐུབ་པ་ཞིག་བྱ་དགོས་པ་རེད་དྲན་ཡོད། དེ་བཞིན་བཙན་བྱོལ་ནང་གི་སློབ་ཕྲུག་ཚོར་མཚོན་ན་ཡང་། མི་སྒེར་གྱི་ལྟོ་གོས་འཚོ་བ་ཙམ་དོན་དུ་མི་གཉེར་པར་རྒྱ་ཆེ་ས་ནས་མི་རིགས་ཤིག་གི་འབྱུང་འགྱུར་དང་། རྒྱལ་ཁབ་ཅིག་གི་ཆག་འཇིག་ལ་བསམ་བློ་བཏང་སྟེ། མི་རིགས་ཀྱི་བླ་སྲོག་ཏུ་གྱུར་བའི་སྐད་དང་ཡི་གེའི་ཐད་སྟོབས་ཤུགས་བསྒྲིལ་དགོས་པ་རེད་བསམ་གྱི་འདུག སོ་སོའི་སྒེར་དོན་དང་འཚོ་བའི་ཐད་འདས་པའི་ལོ་ངོ་ལྔ་བཅུ་ལྷག་རིང་བརྒྱུགས་ཀྱང་། ད་ལྟ་ད་དུང་བཙན་བྱོལ་སྤྱི་ཚོགས་ནང་རིགས་གཅིག་རྐང་འཛིན་པ་དང་འབུར་དུ་ཐོན་པའི་ཆེད་མཁས་པ་གཅིག་ཀྱང་སྟོན་རྒྱུ་མེད་པ་ཆགས་ཡོད། འདི་དག་ངོས་ཟིན་པའི་ཐོག་ནས་གཞུང་སྒེར་ཚང་མས་ངོས་ནས་བསམ་བློ་གཏོང་ཚད་རེད་དྲན་ཡོད།
ཝར་ཎ་མཐོ་སློབ་ཀྱི་སློབ་མ་བཀྲ་ཤིས་སྒྲོལ་མ།
དྲི་བ། ཝར་ཎ་མཐོ་སློབ་དུ་བོད་རིགས་སློབ་མ་ག་ཚོད་ཅིག་ཡོད་པ་དང་བོད་པའི་རིག་གཞུང་གི་ཁོར་ཡུག་དང་མཐུན་རྐྱེན་གང་འདྲ་ཡིན་ནམ།
ལན། ད་ལྟའི་ཆར་ཝར་ཎ་མཐོ་སློབ་དུ་ཁྱོན་བསྡོམས་སློབ་ཕྲུག་ ༥༠༠ མ་ཟིན་ཙམ་ཞིག་ཡོད་ལ། དེའི་ཁྲོད་བོད་པའི་སློབ་མ་ ༣༠༠ ལྷག་ཡོད། ང་ཚོས་ནང་ཆོས་ལྟ་གྲུབ་གཙོས་བོད་ཀྱི་བརྡ་སྤྲོད་དང་སྙན་ངག་སོགས་ཀྱི་ཐོག་ལ་སློབ་སྦྱོང་བྱས་ཏེ་བོད་ཡིག་གཙོ་བོ་བྱེད་ཀྱི་ཡོད་ལ། དེ་དང་མཉམ་དུ་དེང་དུས་ཤེས་ཡོན་ཐོག་ལ་སློབ་སྦྱོང་བྱེད་ཀྱི་ཡོད་པ་རེད། ཁོར་ཡུག་གི་ཐད་ནས་ང་ཚོ་བོད་པའི་སློབ་མ་གང་འཚམ་ཞིག་ཡོད་པའི་དབང་གིས་བོད་པའི་རིག་གཞུང་སློབ་སྦྱོང་གི་ཤུགས་ཆེ་བ་ཡོད་པ་རེད། ཡིན་ནའང་། ང་ཚོའི་སློབ་གྲྭའི་འཛིན་སྐྱོང་དེ་རྒྱ་གར་གཞུང་གིས་གནང་གི་ཡོད་སྟབས། ཕྱོགས་མང་པོ་ཞིག་ནས་རྒྱ་གར་གྱི་བྱེད་སྟངས་སྤྱོད་སྟངས་ཤུགས་ཆེན་པོ་རེད། དཔེར་ན། རྒྱ་གར་རང་གི་ལུགས་སྲོལ་དང་མཐུན་པའི་དུས་ཆེན་ཁག་སྲུང་བརྩི་བྱེད་ཀྱི་ཡོད། ཕྱིའི་འཛུགས་སྐྲུན་སྔོན་མ་ལས་ཡར་རྒྱས་ཆེན་པོ་འགྲོ་བཞིན་པའི་སྒང་རེད། སློབ་སྦྱོང་གི་ཕྱོགས་ནས། དབུ་མ་འོག་མ་ལོ་རིམ་དང་པོ་ནས་སློབ་དཔོན་ལོ་རིམ་གཉིས་པ། དེ་བཞིན་ཉམས་ཞིབ་དང་དགེ་རྒན་འོས་སྦྱོང་སོགས་ཀྱི་མཐུན་རྐྱེན་ཡོད་པར་མ་ཟད། དགེ་རྒན་མང་ཆེ་བ་བོད་པའི་དགེ་རྒན་ཡིན་ཞིང་། དགེ་སློབ་གཉིས་ཐད་ནས་བོད་ཡིག་རང་གི་ཐོག་ལ་ཧུར་བརྩོན་བྱེད་ཀྱིན་ཡོད་པ་རེད།
དྲི་བ། ད་ལྟའི་མཐོ་སློབ་ཀྱི་སློབ་སྦྱོང་གི་བརྒྱུད་རིམ་ཁྲོད་སློབ་མ་རྣམས་ལ་འཕྲད་ཀྱིན་པའི་དཀའ་ངལ་ཆེ་ཤོས་གང་དག་རེད་དམ།
ལན། ང་རང་གི་ངོས་ནས་སློབ་སྦྱོང་གི་ཕྱོགས་ཀྱི་དཀའ་ངལ་ཆེ་ཤོས་དེ་ང་ཚོ་སློབ་གྲྭ་འདིར་ཡོང་བའི་ཐོག་མར་ལེགས་སྦྱར་གྱི་སྐད་སྦྱོང་དགོས་པའི་དབང་གིས་སློབ་མ་མང་པོ་ཞིག་ལ་དཀའ་ངལ་འཕྲད་ཀྱིན་པའི་རྣམ་པ་མཐོང་སོང་། དེ་བཞིན། དབྱིན་ཡིག་དང་ཧིན་རྡུ་སྐད་ཡིག་གཉིས་ལས་སྐད་ཡིག་གཅིག་གི་གདམ་ཀ་ལས་མེད་པའི་དབང་གིས། སྐད་རིགས་གཉིས་ཀ་སྦྱང་འདོད་ཡོད་རིགས་ལ་གོ་སྐབས་མེད་པ་དེ་དཀའ་ངལ་ཆེ་ཤོས་ཤིག་རེད། དེ་ལས་གཞན་པའི་དཀའ་ངལ་འདྲ་དམིགས་བསལ་མཐོང་མ་སོང་། དཔེ་མཛོད་དང་གློག་ཀླད། སྡོད་ཁང་། འཕྲོད་བསྟེན། ཟ་མ་སོགས་ཀྱི་མཐུན་རྐྱེན་ཡག་པོ་ཡོད་པ་རེད།
དྲི་བ། ད་ལྟའི་ཆར་ཝར་ཎ་ནི་བཙན་བྱོལ་ནང་གི་ཆེས་མཐོའི་སློབ་གྲྭ་དེ་ཆགས་ཡོད་པ་ལྟར། དགེ་རྒན་གྱི་སྤུས་ཚད་དང་སློབ་ཁྲིད་ཀྱི་ཐབས་ལམ། སློབ་མའི་བསམ་བློའི་གནས་ཚད་སོགས་ཀྱི་ཐད་མིང་དོན་མཚུངས་བ་ཞིག་ཡོང་གི་འདུག་གམ།
ལན། ང་ལ་མཚོན་ན་ཝར་ཎ་མཐོ་སློབ་ཀྱི་སྔོན་མའི་མཚན་སྙན་དང་སློབ་སྦྱོང་བྱེད་སྟངས་སོགས་དང་བསྡུར་བ་ཡིན་ན། ཕྱོགས་ཡོངས་ནས་བར་ཁྱད་དང་འགྱུར་བ་ཕྱིན་འདུག་བསམ་གྱི་ཡོད། སྔོན་མར་སློབ་གྲྭའི་ནང་མཁས་དབང་དང་དགེ་རྒན་དཔེ་ལེགས་ཅན་མང་པོ་ཞིག་བཞུགས་ཡོད་པ་རེད། ཕྱིས་སུ་མི་སྣ་དེ་དག་རང་ཉིད་ཀྱི་ཕྱག་ལས་ཀྱི་དབང་གིས་ཕྱིར་བུད་རྗེས་སློབ་གྲྭའི་ནང་བར་སྟོང་ཤོར་བ་ལྟ་བུའི་ཚོར་སྣང་འདུག སློབ་མའི་ཕྱོགས་ནས་མང་ཆེ་བ་བོད་པ་རང་གི་རིག་གཞུང་ཐོག་ཤུགས་ཆེན་པོ་ཡོད་པ་རེད་ལ། གནས་ཚད་ཀྱང་གང་ལ་གང་འཚམ་ཡག་པོ་འདུག་བསམ་གྱི་ཡོད། ཡིན་ནའང་། མཐོ་སློབ་གཞན་དང་བསྡུར་ན་ང་ཚོར་སློབ་ཚན་མང་པོ་ཡོད་པ་དང་། སྐད་ཡིག་གཞན་པའི་ཐོག་ལ་དུས་ཚོད་མང་པོ་གཏོང་དགོས་སྟབས། འདོད་བློ་ཁེངས་པ་ཞིག་དང་མིང་དོན་མཚུངས་པ་ཞིག་ཡོང་ཁག་པའི་ཚོར་སྣང་འདུག་ལ། སློབ་མ་ཚོར་མཚོན་ནའང་སེམས་ཤུགས་ཆེན་པོ་ཡོད་པ་ལས། ལག་ལེན་དངོས་ཀྱི་ཐོག་དེ་འདྲའི་ནུས་པ་ཐོན་གྱི་མེད་པའི་ཚོར་སྣང་རྒྱུན་དུ་འབྱུང་གི་འདུག
ས་རཱ་མཐོ་སློབ་ཀྱི་སློབ་བུ་ཚེ་རིང་འཕྲིན་ལས།
དྲི་བ། ཉེ་ཆར་བོད་ནང་གི་སློབ་ཕྲུག་ཚོས་བོད་སྐད་ཡིག་སྲུང་སྐྱོབ་ཆེད་རྒྱ་གཞུང་གི་ཤེས་ཡོན་སྲིད་བྱུས་གསར་པ་དེར་ངོ་རྒོལ་ཁྲོམ་སྐོར་བྱས་པའི་ཐད་ཁྱེད་རང་ལ་ཚོར་སྣང་གང་འདྲ་བྱུང་སོང་ངམ།
ལན། བོད་ནང་གི་སློབ་མ་ཚོས་བོད་སྐད་ཡིག་གི་བདག་དབང་ཐད་ངོ་རྒོལ་བྱས་པ་དེར་ཐོག་མར་ངས་ས་རཱ་མཐོ་སློབ་ཀྱི་སློབ་མ་ཚང་མའི་ཚབ་བྱས་ཏེ་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། བོད་ནང་གི་སློབ་མ་ཚོས་ད་ལྟའི་ཛ་དྲག་གི་དུས་འདིར་དམ་དྲག་དང་འཛིན་བཟུང་བྱེད་མིན་ལ་མ་ལྟོས་པར་བོད་སྐད་ཡིག་གི་ཕུགས་རྒྱང་རིང་བོའི་དགོས་མཁོར་དམིགས་ཏེ། གཞི་རྒྱ་ཆེ་བའི་ལས་འགུལ་དེ་འདྲ་ཞིག་སྤེལ་བ་དེ་བསྔགས་བརྗོད་དང་རྗེས་སུ་ཡི་རངས་ཞུ་འོས་པ་ཞིག་རེད། མ་འོངས་པར་ང་ཚོ་བཙན་བྱོལ་རང་དབང་ལུང་པར་ཡོད་པ་ཚོས་ཁོང་ཚོ་ལས་ལྷག་པའི་འགན་ཞིག་ཁུར་ཏེ། བོད་སྐད་བོད་ཡིག་དེ་རང་མི་རིགས་འདིའི་སྲོག་གི་རྒྱུན་ཐག་ལྟ་བུ་ཡིན་པ་ངོས་ཟིན་པའི་ཐོག་ནས་བདག་གཅེས་དང་རྒྱུན་འཛིན་བྱ་རྒྱུ་གལ་ཆེན་རེད།
དྲི་བ། བཙན་བྱོལ་གྱི་སློབ་གྲྭ་ཁག་ཏུ་དབྱིན་ཡིག་གཙོ་བོ་བྱས་ཏེ། བོད་སྐད་ཡིག་ལ་དེ་ཙམ་དོ་སྣང་མེད་པའི་གནས་སྟངས་འདིའི་ཐད་དགོངས་ཚུལ་ག་འདྲ་ཡོད་དམ།
ལན། སྤྱིར་བཙན་བྱོལ་ནང་འཚར་ལོངས་བྱེད་བཞིན་པའི་སློབ་མ་ཚོ་དབྱིན་ཡིག་ལ་དོ་སྣང་ཆེ་བ་ལས་བོད་ཡིག་ལ་དོ་སྣང་བྱེད་ཀྱིན་མེད་པ་དེ་དངོས་ཡོད་རེད། དེ་ཡང་ཕྱོགས་གཅིག་ནས་ཁོར་ཡུག་གི་གནས་སྟངས་མ་འདྲ་བའི་དབང་གིས་བྱུང་བ་རེད་བསམ་གྱི་ཡོད་ལ། ཕྱོགས་གཞན་ཞིག་ནས་ང་ཚོར་བོད་ཡིག་ཆེད་སྦྱོང་བྱེད་སའི་སློབ་གྲྭ་ཉུང་དྲགས་པ་རེད། རྒྱལ་སྤྱི་དང་ཐ་ན་རྒྱ་གར་གཞུང་གིས་ངོས་འཛིན་ཡོད་པའི་མཐོ་སློབ་དང་། སློབ་མཐར་ཕྱིན་སྐབས་ལས་ཀ་བྱེད་ས་བཅས་བོད་ཡིག་གི་ཁྱབ་ཁོངས་ཆུང་ཆུང་རེད། བོད་ཡིག་ཆེད་སྦྱོང་གི་མཐོ་སློབ་ཉུང་དྲགས་པའི་དབང་གིས་འཛིན་རིམ་བཅུ་གཉིས་ཐོན་རྗེས་སློབ་མ་མང་ཆེ་བ་རྒྱ་གར་གྱི་མཐོ་སློབ་ཏུ་འགྲོ་དགོས་བྱུང་ཡོད། སྐབས་དེ་དག་ཏུ་ཕར་ཚུར་གྱི་འགྲུལ་བཞུད་དང་ཚོང་འབྲེལ་སོགས་གཞན་སྐད་བེད་སྤྱོད་མི་གཏོང་ཐབས་མེད་བྱུང་སྟེ། རང་བཞིན་གྱིས་དབྱིན་ཡིག་ལ་དོ་སྣང་མི་བྱེད་རང་བྱེད་ཀྱི་གནས་སྟངས་ཆགས་པའི་དབང་གིས་རེད་བསམ་གྱི་འདུག
དྲི་བ། ས་རཱ་མཐོ་སློབ་ཀྱི་སློབ་མ་ཚོས་ནམ་རྒྱུན་བོད་སྐད་ཡིག་ལ་དོ་སྣང་བྱེད་སྟངས་དང་གང་འདྲ་འདུག་གམ།
ལན། ད་ལྟའི་ཆར་བོད་ཕྱི་ནང་གཉིས་སུ་བོད་ཀྱི་སྐད་ཡིག་རྒྱུན་འཛིན་དང་གོང་སྤེལ་བྱ་དགོས་པའི་སྐུལ་མ་བྱེད་ཀྱིན་ཡོད་པར་བརྟེན། ས་རཱ་མཐོ་སློབ་ཀྱི་ཁོར་ཡུག་འདིར་ཡང་སྐད་ཡིག་ལ་དོ་སྣང་དང་དོན་གཉེར་བྱེད་མཁན་མང་དུ་འགྲོ་བཞིན་འདུག འདས་པའི་དུས་ནས་བཟུང་དགེ་རྒན་རྣམ་པའི་བཀའ་དྲིན་ལ་བརྟེན་ནས་མཐོ་སློབ་འདིའི་སློབ་ཟུར་མང་པོ་ཞིག་བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཡིག་དགེ་རྒན་གྱི་ཕྱག་ལས་གནང་གི་ཡོད་པར་མ་ཟད། ཚགས་པར་དང་དུས་དེབ་ཆེད་དེབ་མང་པོ་ཞིག་སྒེར་ངོས་ནས་འདོན་སྤེལ་བྱེད་ཀྱི་ཡོད་པ་རེད། དེ་མ་ཡིན་པའི་ཕྱོགས་འདྲ་མིན་ནས་བོད་སྐད་ཡིག་ཡར་རྒྱས་ཀྱི་ཐད་ལ་ཕྱག་ལས་གནང་གི་འདུག་ལ། ས་རཱ་མཐོ་སློབ་ལ་མཚོན་ནའང་ལོ་རེའི་གུང་གསེང་དང་སྟབས་བསྟུན་ཏེ། རྒྱ་གར་གྱི་མཐོ་སློབ་འགྲིམ་བཞིན་པའི་བོད་པའི་སློབ་མ་ཚོར་དམིགས་བསལ་བོད་ཡིག་སློབ་ཁྲིད་བྱེད་ཀྱི་ཡོད་པ་རེད།
ས་རཱ་མཐོ་སློབ་ཀྱི་སློབ་མ་རྡོ་རྗེ་སྐྱིད།
དྲི་བ། ད་ལྟའི་ས་རཱ་མཐོ་སློབ་ཀྱི་སློབ་སྦྱོང་གི་མཁའ་དབུགས་དང་སྐད་ཡིག་སློབ་ཁྲིད་ཀྱི་གནས་སྟངས་འདིས་ཁྱེད་རང་གི་འདོད་བློ་སྐོང་ཐུབ་ཀྱི་འདུག་གམ།
ལན། བཙན་བྱོལ་གྱི་མཐོ་སློབ་གཞན་དག་དང་བསྡུར་ན་ས་རཱ་མཐོ་སློབ་ཀྱི་བོད་སྐད་ཡིག་གི་སློབ་གཉེར་བྱེད་སྟངས་ཡག་པོ་འདུག་བསམ་གྱི་ཡོད། ཡིན་ནའང་། མཐོ་སློབ་རང་དུ་སློབ་སྦྱོང་བྱེད་མཁན་ཞིག་གི་ངོས་ནས་བཤད་ན། ད་དུང་ཞན་ཆ་མང་པོ་མཐོང་གི་འདུག་ལ། མཐོ་སློབ་གསར་འཛུགས་ཀྱི་ཐོག་མའི་དམིགས་ཡུལ་ལྟར་འགྲུབ་ཀྱི་ཡོད་དམ་སྙམ་པའི་ཚོར་སྣང་ཡང་འདུག གང་ཡིན་ཞེ་ན། སློབ་མ་བསྡུ་སྐབས་གནས་ཚད་ཡོད་མེད་ལ་མ་ལྟོས་པར་འཛིན་རིམ་བཅུ་གཉིས་ཐོན་པའི་སློབ་མར་དམིགས་བསལ་སྤྲོད་ཀྱི་འདུག བྱེད་སྟངས་འདིས་སློབ་གྲྭ་སྤྱི་ཡོངས་ཀྱི་ཤེས་ཡོན་གནས་ཚད་སྔོན་མ་ལས་ཉམ་ཆགས་ཆེན་པོ་གཏོང་གི་ཡོད་པ་རེད། ཕྱོགས་གཞན་ཞིག་ནས་སློབ་ཕྲུག་མང་པོ་ཞིག་ལ་བོད་མི་རིགས་ཀྱི་ལར་ཞེན་དང་། བོད་སྐད་ཡིག་ལ་དུངས་བ་མེད་པར་འཛམ་གླིང་འགྱུར་འགྲོས་ཀྱི་རྗེས་སུ་བརྒྱུགས་ཏེ་དབྱིན་ཡིག་ལ་འབད་བརྩོན་བྱེད་པ་དང་། འཚོ་བའི་དགོས་མཁོ་སོགས་ཀྱི་དབང་གིས་བོད་སྐད་ཡིག་ལ་དོ་སྣང་སྤྲོད་ཀྱི་མེད་སོགས་ཡོང་གི་འདུག་མོད། འདི་དག་སློབ་གྲྭ་ཙམ་མ་ཡིན་པར་སྤྱི་ཚོགས་ཁྱོན་ཡོངས་ཀྱི་གནོན་ཤུགས་ལ་འབྲེལ་བ་ཤུགས་ཆེན་པོ་འདུག་དྲན་གྱི་ཡོད། གང་ལྟར། མ་འོངས་གནས་སྟངས་འདི་བསྒྱུར་བཅོས་བྱ་དགོས་ཚེ་ཐོག་མར་སློབ་མ་བསྡུ་སྟངས་དང་། སློབ་གཉེར་བྱེད་སྟངས་ལ་གཙོ་ཕལ་གྱི་དབྱེ་བ་བཀར་ཏེ་སློབ་སྦྱོང་སྤྲོད་རྒྱུ་གལ་ཆེན་པོ་རེད་བསམ།
དྲི་བ། བཙན་བྱོལ་གྱི་མཐོ་སློབ་ཁག་ཏུ་ཆེད་ལས་རང་བཞིན་གྱི་མི་སྣ་དང་འབུར་ཐོན་མི་སྣ་ཐོན་ཐུབ་ཀྱི་མེད་པའི་དཀའ་ངལ་གཙོ་བོ་གང་ལ་ངོས་འཛིན་བྱེད་ཀྱི་ཡོད་དམ།
ལན། གཙོ་བོ་ང་ཚོའི་གཞུང་གིས་ཆེད་དུ་ས་མིག་བསྐྲུན་ཐུབ་ཀྱི་མེད་པ་དང་། སློབ་མ་ཚོར་མཚོན་ནའང་གཞས་དང་རི་མོ་སོགས་ལ་དམིགས་བསལ་གྱི་ཆེད་སྦྱོང་བྱས་ཏེ། རང་ཉིད་ལ་ཁེ་ཕན་ཡོད་པ་ཞིག་དང་། རིག་གནས་རིན་ཐང་གི་ལྟ་བ་མེད་པ་སོགས་ཀྱི་དབང་གིས་རེད། དེ་བཞིན། སྤྱི་ཚོགས་ཁྲོད་དུའང་རྩོམ་པ་པོ་དང་མཁས་དབང་སོགས་ལ་གནས་རིམ་དང་ཚད་བཀག་མེད་པར། སྨྱུ་གུ་འཛིན་ཤེས་པ་ཙམ་གྱིས་རྩོམ་པ་པོ་དང་མཁས་དབང་སོགས་ཀྱི་ཆོ་ལོ་སྤྲོད་ཀྱི་ཡོད་པ་དེ་དག་གིས་སྤྱི་ཚོགས་ཁྱོན་ཡོངས་ཀྱི་རིག་གནས་འཚོ་བའི་ཚད་གཞི་དམའ་རུ་བཏང་ཞིང་། རིག་གནས་དངོས་ཀྱི་འཕེལ་རྒྱས་ལ་གཏོར་བརླག་བཏང་བ་རེད། གནད་དོན་འདིའི་དབང་གིས་སློབ་གཉེར་བ་ཞིག་ལ་མཚོན་ན་ཡང་། ཁ་ཕྱོགས་མེད་པ་དང་། སེམས་ཤུགས་མེད་པ། རིགས་གཅིག་ཆེད་སྦྱོང་གི་མྱོང་གོམས་མེད་པ་སོགས་ཡོང་གི་ཡོད།
དྲི་བ། མ་འོངས་པར་བོད་གཞུང་དང་སློབ་གྲྭའི་འཛིན་སྐྱོང་གི་ངོས་ནས་སློབ་ཕྲུག་ཚོར་བོད་སྐད་ཡིག་གོང་སྤེལ་ཆེད་ལས་དོན་གང་འདྲ་ཞིག་རྩོམ་དགོས་པར་མཐོང་གི་འདུག་གམ།
ལན། ས་རཱ་མཐོ་སློབ་ལ་མཚོན་ན་ཉམས་ཞིབ་སྡེ་ཚན་གསར་འཛུགས་ཐད་ལ་དཀའ་ངལ་འཕྲད་ཀྱི་ཡོད་པ་རེད། ང་ཚོའི་གཞུང་ཕྱོགས་ནས་ཀྱང་འདི་ལ་ལྟ་རྟོགས་དང་། ད་ལྟའི་སློབ་ཚན་དང་འབྲེལ་བའི་ཐོག་ཆེད་སྦྱོང་འཛིན་གྲྭ་འཛུགས་རྒྱུ་དང་དེ་དག་ལ་ཚད་ལྡན་གྱི་དགེ་རྒན་གོ་སྒྲིག་བྱ་རྒྱུ་གལ་ཆེན་པོ་རེད། འདི་དང་འདི་ལྟ་བུའི་ལས་གཞི་དག་ལ་གཞུང་ཕྱོགས་ནས་ཐུགས་འཁུར་དང་རྒྱབ་སྐྱོར་གནང་ཐུབ་པ་ཡིན་ན། མ་འོངས་པར་བོད་སྐད་ཡིག་ཡར་རྒྱས་དང་ཤེས་ཡོན་པ་སྐྱེད་སྲིང་ཐུབ་པར་ཕན་ཐོགས་ཆེན་པོ་འདུག་ལ། རྩོམ་རིག་དང་རྒྱལ་རབས་སོགས་ཀྱི་ཐད་ཆེད་སྦྱོང་བྱ་མཁན་རིགས་ལའང་ཕན་པ་ཆེ་པོ་འདུག དེ་བཞིན། རྒྱ་ནག་གཞུང་གིས་འདི་ལོ་ནས་བོད་སྐད་ཡིག་གི་ཁྱབ་རྒྱ་ཆུང་དུ་གཏོང་ཆེད་ཕྱོགས་ཡོངས་ནས་ཐབས་ཤེས་ཡོད་རྒུ་འདོན་བཞིན་པ་རེད་ལ། མ་འོངས་པར་སྲིད་ཇུས་དེ་ལག་ལེན་བསྟར་ངེས་རེད། ང་ཚོའི་གཞུང་དང་ཚོགས་སྡེ་ཁག དེ་བཞིན་སློབ་གྲྭ་སོ་སོ་བཅས་ནས་ཀྱང་། རྒྱ་ནག་གི་བྱེད་སྟངས་ལ་གཞིགས་ཏེ་བོད་རང་གི་སྐད་ཡིག་གི་ཁྱབ་རྒྱ་ཆེ་རུ་བཏང་སྟེ། ཕྱོགས་ཡོངས་ནས་ཐབས་ལམ་བསྐྲུན་པ་ཡིན་ན་མ་འོངས་པར་བོད་སྐད་ཡིག་ཡུན་གནས་དང་འཕེལ་རྒྱས་ལ་ནུས་པ་ཆེན་པོ་ཐོན་རྒྱུ་རེད་བསམ།
བོད་ཡིག་ལ་མཚོན་ན་ལོ་ངོ་སྟོང་ཕྲག་གི་ལོ་རྒྱུས་ལྡན་པར་མ་ཟད། ཡི་གེའི་རིན་ཐང་གི་ཆ་ནས་ཀྱང་ཚད་མཐོན་པོར་བསླེབ་པ་ནི། འཛམ་གླིང་སྟེང་ཚད་མཐོན་པོར་བརྩི་བའི་ལེགས་སྦྱར་ཡི་གེ་དང་དཔུང་པ་མཉམ་གཤིབ་ཀྱིས་འགྲོ་ཐུབ་པ་དང་། བརྟག་སོགས་ལ་མ་གཏོས་པར་ཡིག་འབྲུ་རང་གི་སྟེང་ནས་དོན་དག་མ་འདྲེས་པར་གསལ་བར་བསྟོན་ནུས་པ་སོགས་ཀྱིས་མཚོན་ནུས། དེས་ན་ནོར་བུ་རང་ལ་ཡོད་དུས་ནོར་བུའི་ནོར་ཉམ་ཆོད་པར་བྱས་ཏེ་ང་ཚོ་བོད་རིགས་ཚོས་རང་གི་སྐད་ཡིག་རྒྱུན་འཛིན་དང་དར་སྤེལ་གཏང་ཐུབ་ན། བོད་རྒྱུད་ནང་ཆོས་བཛམ་གླིང་སྟེང་དར་ཁྱབ་ཆེན་པོ་འགྲོ་བཞིན་པ་དང་བསྟུན་ནས་བོད་སྐད་བོད་ཡིག་འདི་ཡང་ད་ལྟའི་དབྱིན་འཇིའི་སྐད་ཡིག་བཞིན་དུ་མ་འོང་པར་འཛམ་གླིང་སྟེང་སྤྱོད་སྒོ་ཆེ་བའི་སྐད་ཡིག་ཞིག་ཏུ་འགྱུར་སྲིད། བོད་ཡིག་སྦྱང་ན་ཁ་ལག་མི་རག་པའི་བལྟ་ཚུལ་དེ་ནི་ཡང་དག་པའི་བལྟ་ཚུལ་ཞིག་མ་རེད། གང་ལག་ཞེ་ན། བོད་ནས་གསར་དུ་འབྱོར་བའི་དབྱིན་ཡིག་ཚིག་གཅིག་ཀྱང་མི་ཤེས་མཁན་དེ་ཚོ་ཡང་ཁ་ལག་མ་རག་པར་སུ་ཡང་རྟོག་གྲིར་ཤི་མི་འདུག་པར་མ་ཟད། བོད་ཡིག་གི་གནས་ཚད་ཡག་པོ་ཡོད་མཁན་དེ་ཚོ་གཞན་ལས་ལྷག་པའི་འཚོ་བ་སྐྱེལ་བཞིན་ཡོད་པ་མཐོང་ཆོས་རེད། གཞན་ཡང་ བརྩན་བྱོལ་བོད་མི་ཚོའི་དམིག་ཡུལ་གཙོ་བོ་གཅིག་ཕྱི་རྒྱལ་ལ་འགྲོ་རྒྱུ་དེ་རེད་ལ། ཕྱི་རྒྱལ་ལ་བསླེབ་སྐབས་འདིར་དབྱིན་ཡིག་ཇི་ལྟར་སྦྱང་ཀྱང་ལས་ཀ་ཡག་པོ་ཞིག་རག་མི་ཐུབ་པ་མ་ཟད། གསར་འབྱོར་ཚོས་པད་ཤག་མང་བ་བསག་ཐུབ་བཞིན་ཡོད་པ་ཡོང་གྲག་རེད། དེས་ན་བོད་ཡིག་སྦྱང་ན་ཁ་ལག་མི་རག་པ་དང་། དབྱིན་ཡིག་སྦྱང་ན་ཁ་ལག་རག་པའི་བཤད་ཚུལ་དེ་བདེན་པ་མ་ཡིན་པ་ཤེས་ཐུབ། བོད་ཡིག་སྦྱང་བ་ཙམ་གྱིས་དབྱིན་ཡིག་མི་ཤེས་པ་ཆག་འགྲོ་བའི་ངེས་པ་ཡང་མེད་པར་མ་ཟད། བོད་ཡིག་གི་རྨང་གཞི་ཡག་པོ་ཡོད་ན་དབྱིན་ཡིག་ཤེས་རྒྱུར་ཕན་ཐོག་ཡོད། དཔེར་ན་དགོན་སྡེ་ཁག་གི་གྲྭ་བཙུན་རྣམས་ནས་གཙོ་བོ་བོད་ཡིག་གི་སྟེང་ནས་སློབ་སྦྱོང་གནང་བཞིན་ཡོད་ཀྱང་། ཞོར་དུ་དབྱིན་ཡིག་ཟུར་སྦྱོང་བྱེད་པ་ལ་གཏེན་ནས། འཛིན་རིམ་བཅུ་གཉིས་ཐོན་པའི་སློབ་ཕྲུག་རྣམས་ལས་ལྷག་པ་མེད་ཀྱང་ཞན་པ་མེད་པ་མང་པོ་ཐོན་བཞིན་པའི་གནས་སྟང་འདིས། སློབ་གསོའི་ཆད་མཁས་པ་ཚོས་རང་གི་ཕ་མེས་སྐད་ཡིག་གི་གཞི་རྩ་ཡག་པོ་ཡོད་པའི་ཐོག་ནས་སྐད་ཡིག་གཞན་དག་སྦྱང་ན་སྦྱང་འབྲས་ཡག་པོ་ཡོང་ཞིང་། ཕ་མེས་ཀྱི་སྐད་ཡིག་མ་ཤེས་པར་སྐད་ཡིག་གཞན་དག་སྦྱང་ན་སྦྱང་འབྲས་ཡག་པོ་མི་ཡོང་བར་བཤད་པའི་བདེན་སྤང་དུ་གྱུར་ཡོད། བོད་ཡིག་མ་ཤེས་རུང་བོད་ལ་ཤ་ཞེན་ཡོད་མཁན་མང་པོ་ཡོད་པས་བོད་ཡིག་སྦྱང་མི་དགོས་པར་བཤད་པ་ཡང་ཡང་དག་མ་རེད། གང་ལགས་ཞེ་ན། བོད་ཡིག་སྦྱང་རྒྱུ་ནི་བོད་ཀྱི་ཆོས་དང་རིག་གཞུང་བསྲུང་བསྐྱོབ་ཆད་དུ་ཡིན་པ་ལས་བོད་ལ་ཤ་ཞེན་བསླེབ་རྒྱུའི་ཆེད་དུ་མིན། མཐའ་དོན། མི་རིགས་གི་ཚེ་སྲོག་ནི་རིག་གཞུང་ཡིན་ལ། རིག་གཞུང་གི་ཚེ་སྲོག་ནི་སྐད་ཡིག་ཡིན། དེས་ན་སྐད་ཡིག་མ་གནས་པར་རིག་གཞུང་གནས་ཐབས་མེད་ལ། རིག་གཞུང་མ་གནས་པར་མི་རིགས་གནས་ཐབས་མེད།
ངས་བཤད་འདོད་པའི་ཚིག་ནི་ཁྱོད་ཚོས་ཉན་འདོད་པ་དེ་མིན་པ་ཤེས་མོད་ཀྱང་། ནམ་རྒྱུན་བཤད་མི་ཐུབ་པའི་ན་ཚ་འདིའི་དབང་གིས་ང་ཚོའི་བྱ་བ་ཐ་དག་གི་འབྲས་བུ་འདི་ལྟར་ཁྱེད་ཀྱི་ཁ་དང་ངའི་ལག་ནས་ཤོར་འགྲོ་གི་ཡོད་པ་འདྲ། དཔེར་ན། སྐད་ཡིག་རྒྱུན་འཛིན་དར་སྤེལ་ཟེར་བ་དེ་ཁྱེད་ཀྱི་བསམ་ཚུལ་བཤད་པས་འགྲུབ་མི་ཡོང་ལ། ངས་སྡུག་གཏམ་བཤད་ནས་ཀྱང་འགྲུབ་འགྲོ་བ་ཞིག་གཏན་ནས་མིན། དེ་ལས་ཁྱེད་ཀྱིས་སྐད་ཡིག་ཆེད་དུ་ཅི་ཞིག་སྒྲུབ་ཐུབ་མིན་ལས་གཞན་གནས་ལུགས་དང་རྒྱུ་མཚན་གང་ཡང་མེད། བཤད་སྟངས་ལ་བཙན་བྱོལ་དུ་དུས་དེབ་དང་ཚགས་པར་ཉུང་དྲགས་པ་དང་སློབ་སྦྱོང་བྱེད་ས་མེད་པ་ལྟ་བུ་བཤད་མཁན་དྲ་ཐོག་ནས་ནམ་རྒྱུན་མཐོང་རྒྱུ་ཡོད། ཡིན་ན་ཡང་བོད་ཡིག་གི་དུས་དེབ་དང་ཚགས་པར་བཙོང་མཁན་རྣམས་ཀྱི་བཙན་བྱོལ་ལ་བོད་ཡིག་གི་ཚགས་པར་དང་དུས་དེབ་ཉོ་མཁན་ཅི་ཙམ་ཡོད་པ་གསལ་ཐག་ཆོད་ཤེས་ངེས། དེ་བས་ཡོད་ཡིག་ལ་དུང་པ་ཡོད་མཁན་ཚོས་ཁ་ནས་བཤད་མི་འདུག་པར་རང་གིས་ཅི་ཞིག་སྒྲུབ་ཐུབ་མིན་ལ་བསམ་བློ་བཏང་ན་ཡག་པོ་འདུག་སྙམ། དྲ་ཐོག་ནས་ཁ་རྒྱག་པ་རེ་བཤད་ནས་ཅི་ཡོང་།
བཙན་བྱོལ་ནང་གི་སློབ་ཕྲུག་རྣམས་ཀྱིས་བཙན་བྱོལ་གཞུང་དང་།
རྒན་རབས་པ་མཁས་དབང་རྣམས་ལ་བོད་ཀྱི་སྐད་ཡིག་ཡར་རྒྱས་གཏོང་ཕྱོགས་སྐོར་ལ་ངོ་རྒོལ་བྱེད་དགོས་ལ།
ལྷག་པར་དུ་བཙན་བྱོལ་ནང་འཚར་བའི་གཞོན་སྐྱེས་རྣམས་ཀྱིས་བོད་ཡིག་ཐོག་དོ་སྣང་གི་མི་འདུག་པ་འདི་ལའང་ངོ་རྒོལ་ཞུ་རན་ཡིན/
བསམ་ཚུ་ཡག་པོ་གསུངས་འདུག དངོས་ཡོད་དང་ཡང་མཐུན་པ་འདུག
གཙོ་བོ་དེ་ཤེས་རིག་ནས་བྱེད་དགོས་པ་དང་དགེ་རྒན་རྣམས་པའི་སློབ་བུ་ཚོར་བསམ་བློའི་སློབ་གསོ་བཏང་པས་མ་འདང་པ་གསལ་བོ་ཞེ་གྲགས་རེད
དགའ་འཁྱིལ་དྲག་རྩལ་སྦྱངས་ཚར་མ་ཐག་ཨ་ཞང་ལ་རྒྱུགས་དགོས་པ་རེད། རྩོམ་ཡིག་བྲིས་ནས་གང་ཡོང་། ཧ ཧཧ ཧ ཧ
ང་ས་བསམ་ཚུལ་ཞིག་ཡོད། འདི་ནི་བོད་པའི་མཐོ་སློབ་ཁག་ལ་ཞིབ་འཇུག་རྩོམ་ཡིག་འབྲི་བའི་འགོ་ཞིག་འཛུགས་དགོས་ཀྱི་འདུག རྒྱ་གར་གྱི་མཐོ་སློབ་ཁག་ན་ཡང་ཞིབ་འཇུག་རྩོམ་ཡིག་འབྲི་བའི་ལུགས་སྲོལ་ཆེན་པོ་ཡོད་པ་མ་རེད། འོན་ཀྱང། ཨ་རིའི་མཐོ་སློབ་ཁག་ལ་མཚོན་ན་སློབ་ཚན་ཕལ་ཆེ་བར་ཆེ་ཆུང་ལ་མ་བལྟས་པའི་ཞིབ་འཇུག་རྩོམ་ཡིག་འབྲི་དགོས་པ་རེད། ཞིབ་འཇུག་རྩོམ་ཡིག་འབྲི་བ་འདིས་སློབ་ཚན་དེའི་གནད་འཇུ་བ་དང་གནད་ཤེས་པར་ཕན་ཐོགས་ཆེན་པོ་འདུག དཔེར་ན། ངས་ལུས་རྩལ་༼དགའ་འཁྱིལ་དྲག་རྩལ༽ གྱི་སློབ་ཚན་ཞིག་བླངས་བ་ཡིན། སློབ་འཇུག་ལ་སླེབས་དུས་སློབ་ཚན་འདིས་རང་ཉིད་ཀྱི་ལུས་སེམས་ལ་ཕན་ཅི་ཞིག་ཐོགས་ཡོད་པའི་སྐོར་ལ་རྩོམ་ཡིག་ཅིག་འབྲི་དགོས་བར་འདུག རྩོམ་ཡིག་འདི་ཡིག་རྒྱུགས་དང་གཅིག་པ་རེད། འདིའི་ཐད་ལ་བསམ་བློ་གཏོང་ངེས་པར་དུ་གཏོང་དགོས་པར་གདའ།