ཨུ་རུ་སུ་རྒྱལ་ཁོངས་ཀྱི་ཁལ་མུག་སྤྱི་མཐུན་རྒྱལ་ཁབ་ཀྱི་ནང་པའི་དབུ་ཁྲིད་ཏེ་ལོ་རིན་པོ་ཆེས་སྣེ་ཁྲིད་འོག ཁལ་མུག་དང་བྷོ་རི་ཡ། ཐོ་བ་བཅས་ཀྱི་སོག་རིགས་སྟོང་ཕྲག་གཅིག་ལྷག་བཞུགས་སྒར་ངྷ་རམ་ས་ལར་ཆེད་ཕེབས་ཀྱིས་༧གོང་ས་མཆོག་གི་མདུན་ནས་གསུང་ཆོས་ཞུས་ཡོད་པ་ལྟར། ཕྱི་ཚེས་ ༢ ཉིན་བླ་མ་ཏེ་ལོ་རིན་པོ་ཆེ་མཆོག་གངས་སྐྱིད་སྤྱི་ཐབ་ཐོག་ཁང་དུ་བོད་པའི་གསར་འགོད་པ་ཚོར་ཐུག་འཕྲད་ཀྱིས་ཐེངས་འདིའི་གསུང་ཆོས་ཀྱི་སྔ་གཞུག་དང་། བོད་སོག་བར་གྱི་མཛའ་འབྲེལ་གནས་སྟངས་སྐོར་ངོ་སྤྲོད་དང་གསར་འགོད་པའི་དྲི་བར་ལན་འདེབས་གནང་སོང་།
ཏེ་ལོ་རིན་པོ་ཆེ་མཆོག་གིས་ཐེངས་འདིར་སོག་རིགས་ཚོས་༧གོང་ས་མཆོག་གི་མདུན་ནས་གསུང་ཆོས་ཞུས་པའི་དགོས་པ་རྒྱུ་མཚན་ངོ་སྤྲོད་གནང་དོན། ང་ཚོས་༧གོང་ས་མཆོག་གི་མདུན་ནས་གསུང་ཆོས་ཞུ་བ་དེ་དམིགས་བསལ་གྱི་གནད་འགག་ཆེན་པོ་ཞིག་ཏུ་མཐོང་གི་ཡོད། བོད་སོག་བར་རྒྱལ་རབས་མང་པོའི་འབྲེལ་བ་ཡོད་པ་ལོ་རྒྱུས་དག་ཏུ་བཀོད་ཡོད་པ་མཁྱེན་གསལ་རེད། དང་པོ། ཨུ་རུ་སུ་དང་སོག་པོའི་ནང་སངས་རྒྱས་བསྟན་པ་དར་སྤེལ་བྱ་རྒྱུར་ཤེས་ཡོན་དང་སློབ་སྦྱོང་། ཉམས་མྱོང་བཅས་དགོས་པ་རེད། འདི་ལ་དཔེ་བལྟ་ས་ཡག་ཤོས་དེ་བོད་པའི་སྤྱི་ཚོགས་ཆགས་ཡོད་པར་བརྟེན། འདི་གའི་རིག་གཞུང་ལྟེ་གནས་ཁང་དང་། དགོན་སྡེ་དང་སློབ་གྲྭ་ཁག་བཅས་བཙན་བྱོལ་གཞུང་དང་སྐྱབས་བཅོལ་བོད་མིའི་གནས་སྟངས་ག་འདྲ་ཡོད་མེད་ཤེས་རྟོགས་ཡོང་ཆེན་ཡིན། གཉིས་པ། ངྷ་རམ་ས་ལ་ནི་གནས་རྩ་ཆེན་ཞིག་ཆགས་བསྡད་ཡོད་པ་དང་། མང་པོ་ཞིག་གི་སེམས་ནང་དུ་༸རྒྱལ་བ་རིན་པོ་ཆེ་ནི་བོད་མི་གཅིག་པུའི་ཐོབ་ཐང་རེད་བསམ་གྱི་ཡོད། ཆོས་ཕྱོགས་ཀྱི་ཐད་ནས་བོད་པ་གཅིག་པུ་ཙམ་མ་ཡིན་པར། སོག་པོ་དང་ཧི་མ་ལ་ཡའི་རི་རྒྱུད་ཁག་ཚང་མའི་དབུ་ཁྲིད་ཆགས་ཡོད། ང་ཚོ་༸རྒྱལ་བ་རིན་པོ་ཆེ་ལ་དད་གུས་ག་ཚོད་ཡོད་མེད་དང་། རྒྱལ་བ་རིན་པོ་ཆེ་ང་ཚོའི་ཆོས་ཕྱོགས་ཀྱི་དབུ་ཁྲིད་ཡིན་པ་གསལ་སྟོན་བྱ་ཆེད་ཡིན། ཞེས་གསུངས་བྱུང་།
ཁོང་གིས་བོད་སོག་བར་གྱི་འབྲེལ་བ་སླར་གསོའི་བརྒྱུད་རིམ་ངོ་སྤྲོད་གནང་དོན། ངས་དྲན་སོས་པ་ཞིག་ལ། ལོ་བདུན་བརྒྱད་ཀྱི་སྔོན་དུ་ཨུ་རུ་སུའི་སོག་རིགས་གནས་མཇལ་བ་ལྔ་ངྷ་རམ་ས་ལར་ཕྱིན་པ་རེད། སྐབས་དེར་སོག་རིགས་ཚང་མ་ཧང་སང་ཞིང་། ཁོང་ཅག་ངྷ་རམ་ས་ལར་ཕྱིན་ཏེ་༧གོང་ས་མཆོག་ལ་དངོས་སུ་མཇལ་བར་གླེང་སློང་ཤུགས་ཆེན་པོ་བྱུང་བ་རེད། ལོ་རྗེས་མ་དེར་མི་ ༥ ནས་ ༤༠ འཕར་བ་རེད། ༢༠༠༦ ལོར་ཁལ་མུག་སྤྱི་མཐུན་རྒྱལ་ཁབ་ཀྱིས་༧གོང་ས་མཆོག་ལ་པདྨ་དཀར་པོའི་གཟེངས་རྟགས་འབུལ་བཞེས་སྐབས། མི་ ༡༠༠ ལྷག་འབྱོར་ཡོད། ༢༠༠༧ ལོར་༸གོང་ས་མཆོག་ལ་བརྟན་བཞུགས་ཕུལ་སྐབས། ཨུ་རུ་སུ་དང་སོག་པོའི་ནང་བའི་སྒྱུ་རྩལ་འགྲེམས་སྟོན་ཁང་ཟེར་བའི་གཞས་སྣ་འཁྲབ་སྟོན་དང་གློག་བརྙན་སོགས་སྤྱན་འབུལ་ཞུ་བར་མི་ ༥༠༠ ལྷག་དང་། ༢༠༠༩ ལོའི་གསུང་ཆོས་ཐེངས་དང་པོར་མི་ ༨༠༠ དང་། ད་ཐེངས་མི་ ༡༢༣༧ བཅས་ཡོང་ཡོད། ལོ་ལྔ་དྲུག་ཙམ་གྱི་རིང་ལ་མི་ལྔ་ནས་མགོ་བཙུགས་ཏེ་ད་ལྟའི་ཚད་འདིར་བསླེབས་པ་རེད། ཅེས་དང་།
ཐེངས་འདིར་ཨུ་རུ་སུའི་གསར་འགོད་པ་ ༢༧ ཙམ་ང་ཚོ་དང་མཉམ་དུ་ཡོད་ལ། ཁོ་ཚོས་ངྷ་རམ་ས་ལ་ཁུལ་གྱི་སློབ་གྲྭ་དང་ལས་ཁུངས་ཁག་ལ་རྒྱུས་ལོན་བྱས་པ་དང་། ༧གོང་ས་མཆོག་དང་ལྷན་དུ་དྲི་བ་དྲིས་ལན་གནང་བ་སོགས་གསར་ལམ་ཁག་ཏུ་བཏང་ཡོད། ང་ཚོ་བོད་དང་སོག་རིགས་བར་འབྲེལ་བ་ཟབ་མོ་ཡོད། མ་འོངས་པར་ཡང་འབྲེལ་བ་དེར་བར་ཆད་རྩ་བ་ནས་ཡོང་གི་མ་རེད། ད་ལྟ་བོད་གཞུང་སྨན་རྩིས་ཁང་དང་། དཔེ་མཛོད་ཁང་། ལྷ་བྲིས་ཁང་། ནོར་བུ་གླིང་ག དེ་བཞིན་དགོན་སྡེ་ཁག་བཅས་སུ་ཕལ་ཆེར་སོག་རིགས་སློབ་གཉེར་བ་ ༤༠༠ ལྷག་ཡོད། ལྟེ་གནས་ཁང་དེ་དག་གིས་སྣེ་ལེན་བྱས་པའི་བཀའ་དྲིན་གྱིས་ང་ཚོར་སློབ་སྦྱོང་གི་གོ་སྐབས་ཤིག་རག་གི་ཡོད། ཅེས་གསུངས་བྱུང་།
བར་མཚམས་དེར་ར་ཤི་ཡའི་སྐུ་ཚབ་དོན་གཅོད་ཟུར་བ་བོད་གཞུང་དྲིལ་བསྒྲགས་དྲུང་འཕར་བཀྲ་ཤིས་ལགས་ཀྱིས་ཀྱང་། བོད་དང་སོག་རིགས་བར་གྱི་འབྲེལ་བ་ཚད་མཐོན་པོར་སླེབས་པ་དེ་རྒྱ་ནག་གཞུང་གིས་གསལ་བོར་ཤེས་ཡོད་པ་རེད། དེར་བརྟེན། ཨུ་རུ་སུའི་ནང་ལ་བོད་རང་སྐྱོང་ལྗོངས་ཀྱི་སྐུ་ཚབ་ཆེད་གཏོང་བྱས་ཏེ། ཆོས་དང་རིག་གཞུང་ཅི་ཞིག་དགོས་ཀྱང་བོད་ནང་ནས་རོགས་རམ་གནང་ཆོག་གི་རེད། ཏཱ་ལའི་བླ་མར་འབྲེལ་བ་མ་གནང་རོགས་ཞེས་བརྗོད་དེ། ང་ཚོའི་འབྲེལ་ལམ་ལ་དོ་ཕོག་གཏོང་བའི་ཐབས་ཤེས་སྣ་ཚོགས་བྱས་པ་རེད། ཡིན་ནའང་། སོག་རིགས་མི་མང་གིས་རྒྱལ་བ་རིན་པོ་ཆེར་འཛིན་པའི་དད་པ་དེ་རི་ལྟར་གཡོ་བ་མེད་པས་འགལ་བ་བཟོ་ཐུབ་བྱུང་ཡོད་པ་མ་རེད་ལ། མ་འོངས་པར་ཡང་གཏོང་ཐུབ་པ་མ་རེད། ཅེས་བརྗོད་བྱུང་།
གལ་སྲིད་མ་འོངས་པར་བོད་པ་རྒྱ་འོག་ཏུ་སྡོད་དགོས་བྱུང་ཚེ། དུས་ཀྱི་སྔ་གཞུག་ཙམ་མ་གཏོགས་བོད་མི་རིགས་བརླག་འགྲོ་རྒྱུ་ཉག་གཅིག་ཡིན། རིམ་པས་ཁལ་མུག་ལེའུ་གཉིས་པ་ལྟ་བུ་ཞིག་ཏུ་འགྱུར་ངེས་ཡིན། དེར་བརྟེན། ཕྱི་ནང་གི་བོད་རིགས་ཚང་མས་སེམས་ཤུགས་མ་ཆག་པ་ཞིག་དང་། རེ་བ་མ་ཡལ་བ་ཞིག ཡིད་ཆེས་མ་བརླག་པ་ཞིག་གི་ཐོག་ནས་ཤུགས་རྒྱག་དགོས། ༧གོང་ས་མཆོག་གི་བཀའ་དྲིན་ལ་བརྟེན་ཏེ། ཕྱི་རྒྱལ་གྱི་གཞུང་སྒེར་ཚོགས་སྡེ་ཁག་མང་པོ་བོད་ཀྱི་རྒྱབ་རྩར་ལངས་ཡོད། དེ་བཞིན་ཨུ་རུ་སུའི་གཞུང་ཕྱོགས་ཀྱི་བོད་པའི་སྐུབ་སྟེགས་གཅིག་ང་ཚོས་བཟུང་ཡོད་ཟེར་ན་ཆོག་གི་རེད། སྐུབ་སྟེགས་དེ་དུས་ནམ་ཡང་གློད་གི་མ་རེད། ཅེས་གསུངས་བྱུང་།
མཇུག་ཏུ་སོག་པོའི་གཞོན་སྐྱེས་མང་པོ་ཡེ་ཤུ་ཆོས་ལུགས་སུ་འགྱུར་བཞིན་ཡོད་པའི་ཐད་དྲི་བ་བཏང་བའི་ལན་དུ། སོག་པོ་ཟེར་དུས་ཕྱི་སོག་དང་ནང་སོག་ཁལ་མུག ཐོ་བ། བྷོ་རི་ཡ་བཅས་ཁག་མང་པོ་ཡོད། སོག་རིགས་དང་ཆེན་པོ་ཧོར་གྱི་ཡུལ་ཞེས་བརྗོད་དུས་ཚང་མ་ཚུད་ཡོད་པ་རེད། ད་ལྟ་ཁལ་མུག ཐོ་བ། བྷོ་རི་ཡ་གསུམ་ནི་ཨུ་རུ་སུའི་མངའ་འོག་ཏུ་ཡོད་པའི་སོག་རིགས་ཆགས་ཡོད། དཔེར་ན། ཁལ་མུག་ལ་དྭགས་རེད། བྷོ་རི་ཡ་འབྲས་ལྗོངས་རེད། ཐོ་བ་མོན་པ་རེད། ལ་དྭགས་དང་འབྲས་ལྗོངས། མོན་པ་གསུམ་གྱིས་བོད་མིན་བོད་རིགས་ཡིན་ཟེར་གྱི་ཡོད། ཁོ་ཚོ་རྒྱ་གར་མངའ་འོག་གནས་ཡོད་ཀྱང་། རྒྱ་གར་བ་མིན་རྒྱ་གར་མི་སེར་ཡིན་ཟེར་གྱི་ཡོད། ང་ཚོ་ཡང་དེ་དང་གཅིག་པ་རེད། སོག་རིགས་ཡིན་ཡང་ཨུ་རུ་སུའི་མི་སེར་རེད། ཁལ་མུག་ནང་ཡེ་ཤུ་ལ་འགྱུར་མཁན་ཧ་ཅང་ཉུང་ཉུང་རེད། མོང་གོལ་ལེ་ཡ་སྟེ་སོག་པོ་རྒྱལ་ཁབ་ཀྱི་ནང་དུ་ནང་པའི་ཆོས་ཚོགས་ལས་ཡེ་ཤུ་ཆོས་ཚོགས་མང་པོས་དེབ་སྐྱེལ་བྱས་ཡོད་པ་དང་། སོག་པོའི་རྒྱལ་ཁབ་ཀྱང་ཡེ་ཤུ་ཆོས་ལུགས་སུ་འགྱུར་རྒྱུའི་ཉེན་ཁ་ཆེན་པོ་ཡོད་པ་རེད། ཅེས་གསུངས་སོང་།
ཏེ་ལོ་རིན་པོ་ཆེ་ལ་ངའི་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན