མཉམ་ལས་ཁང་གི“ཉུང་འཕྲི་གཉིས་དང་འཕར་སྣོན་གཉིས”

རྒྱ་ནག་གཞུང་གིས་ལོ་འགའི་སྔོན་ནས་བོད་ཁུལ་གྱི་འབྲོག་པ་མང་ཚོགས་གཅིག་སྡུད་བྱས་ཏེ། གྲོང་ཁྱེར་ཅན་དུ་སྒྱུར་བཞིན་ཡོད་པ་ལྟར། ད་ཆར་ཕྱུགས་ཟོག་ཀྱང་སྡེབ་བཙོང་དང་གཅིག་སྡུད་དང་མཉམ་ལས་ཀྱི་ངོ་བར་བསྒྱུར་ཏེ། བོད་པའི་འབྲོག་དམངས་ཚོར་སྔར་རིག་གནས་གསར་བརྗེ་སྐབས་ཀྱི་གཞུང་གཅིག་ལམ་ལུགས་ཀྱི་སྲིད་བྱུས་དེ་བསྐྱར་ལོག་རྒྱག་རྒྱར་སེམས་འཚབ་ཆེན་པོ་སྐྱེ་བཞིན་ཡོད་འདུག 

ཕྱི་ལོ་ ༢༠༠༧ ལོའི་ཟླ་ ༥ ནས་བཟུང་མཚོ་སྔོན་ཞིང་ཆེན་མངའ་ཁུལ་གྱི་མཚོ་ནུབ་ཐེམ་ཆེན་རྫོང་མེ་ལོང་སྡེ་བ་དང་། རྨ་ལྷོ་སོག་རྫོང་ཀྱི་རིམ་སྡེ་བ་སོགས་འབྲོག་སྡེ་ས་ཁུལ་ ༧ ཙམ་ལ་མ་རྐང་མཉམ་ལས་ཁང་གསར་འཛུགས་ཀྱི་ཚོད་ལྟ་བྱས་ཡོད་པ་དང་། ད་ལོའི་ཕྱི་ཟླ་དང་པོ་ནས་བཟུང་མཚོ་སྔོན་ཕྱོགས་ཀྱི་འབྲོག་ཁུལ་ཚང་མར་མ་རྐང་མཉམ་ལས་ཁང་གསར་འཛུགས་དང་འབྲོག་སྡེ་གྲོང་རྡལ་ཅན་དུ་བསྒྱུར་མགོ་བརྩམས་ཏེ། གཞུང་ཞབས་མི་སྣ་མང་པོ་འབྲོག་ཁུལ་དུ་ཆེད་གཏོང་གིས་དེ་སྔ་འབྲོག་པ་མང་ཚོགས་རང་ཉིད་ལ་དབང་བའི་རྩྭ་ས་དང་ཕྱུགས་ཟོག་རྣམས་མཉམ་ལས་ཁང་གསར་འཛུགས་ཀྱི་མ་རྐང་དུ་བཞག་ཏེ། མི་དམངས་མཉམ་ལས་ཀྱི་སྒྲོམ་གཞི་འདིའི་ནང་ཞུགས་དགོས་པའི་སྐུལ་སློང་ཚོགས་འདུ་རབས་དང་རིམ་པ་སྐོང་བཞིན་ཡོད་འདུགསྲིད་ཇུས་འདིའི་ཐད་རྒྱལ་ཁབ་ཀྱིས་རོགས་དངུལ་ཕོན་ཆེན་གཏོང་རྒྱུ་ཡིན་ལུགས་དང་། གལ་སྲིད་ཐུན་མོང་གི་རྩ་འཛུགས་འདིར་མ་ཞུགས་ན་རྗེས་ཕྱོགས་མི་སྒེར་དང་ཁྱིམ་ཚང་སུ་ཡིན་ཡང་རྒྱལ་ཁབ་ཀྱི་རོགས་སྐྱོར་ལྟ་རྟོགས་གནང་རྒྱུ་མིན་ཚུལ་སོགས་ཀྱི་ཉེན་བརྡ་ཡང་གཏོང་བཞིན་ཡོད་འདུག ད་ཆར་འབྲོག་པ་མ་ཚོགས་ཚོས་ལོ་ངོ་བཅུ་ཕྲག་འགའི་རིང་རང་ཉིད་ཀྱི་འབད་འབུངས་ལ་བརྟེན་ཏེ་འཕེལ་རྒྱས་སུ་བཏང་བའི་ཕྱུགས་རང་ཉིད་ལ་དབང་རྒྱུ་མིན་པའི་བློ་འཚབ་ཆེན་པོ་སྐྱེས་བཞིན་ཡོད་པ་དང་། འབྲོག་ཁུལ་འགའ་ཞིག་གིས་ཕྱུགས་ཟོག་ཡོངས་རྫོགས་སྡེབ་བཙོང་བྱས་ཏེ་སྒོ་ཕྱུགས་རྩ་མེད་བཟོ་བཞིན་ཡོད་འདུག 

སྲིད་ཇུས་འདིའི་སྐོར་གྱི་རྒྱ་གཞུང་གི་ཡིག་ཆ་དག་ཏུ། “ཉུང་འཕྲི་གཉིས་དང་འཕར་སྣོན་གཉིས” ཟེར་བ་སྟེ། འབྲོག་ཁུལ་གྱི་མི་གྲངས་དང་ཕྱུགས་གྲངས་ཉུང་འཕྲི་དང་།  ཐོན་སྐྱེད་དང་ཡོང་འབབ་འཕར་སྣོན་བཅས་དམིགས་ཡུལ་དུ་བཟུང་ནས་སྐྱེས་ཁམས་ཕྱུག་ལས་འཛུགས་སྐྲུན་བྱས་ཏེ་རང་བྱུང་སྐྱེས་ཁམས་སྲུང་སྐྱོབ་བྱ་རྒྱུ་ནི་རྒྱལ་ཡོངས་རང་བཞིན་གྱི་སྲིད་ཇུས་ཤིག་ཡིན་ལུགས་གཞི་རིམ་མང་ཚོགས་ལ་འགྲེལ་བརྗོད་བྱེད་བཞིན་ཡོད་འདུག

འདི་གའི་གསར་འགོད་པས་གནད་དོན་དེའི་ཐད། བོད་མི་མང་སྤྱི་འཐུས་བསྟན་འཛིན་མགོན་པོ་ལགས་སུ་བཅར་འདྲི་ཞུས་པར་ཁོང་གིས་བརྗོད་དོན། བོད་མི་རིགས་ཀྱི་སྲོལ་རྒྱུན་འཚོ་བ་རོལ་སྟངས་ཀྱི་ཆ་ནས་བཤད་ན་སྐྱེས་ཁམས་ལ་གནོད་པའི་དཀའ་ངལ་ཡོད་པ་མ་རེད། རྒྱ་ནག་གཞུང་གིས་བོད་ཁུལ་འཛུགས་བསྐྲུན་བྱ་རྒྱུ་ཡིན་ལུགས་བརྗོད་དེ། བོད་མི་རིགས་ཀྱི་འཚོ་བའི་དགོས་མཁོ་དང་རང་བྱུང་ཁོར་ཡུག་གི་གནས་བབ་ལ་མ་བསྟུན་པར། བོད་ཀྱི་ས་ཐོག་ནས་རྒྱ་མི་རིགས་ལ་ཅི་ཞིག་དགོས་པ་དེར་དམིགས་ཏེ་གཏེར་ཁ་སྔོག་འདོན་དང་། ཆུ་གློག་འཛུགས་སྐྲུན་སོགས་བྱས་པ་འདིས་བོད་ཀྱི་སྐྱེས་ཁམས་ཉམས་ཆག་ཆེན་པོ་བཏང་ཡོད། ཐ་ན་ད་ལྟ་རྒྱ་ནག་གིས་ལག་བསྟར་བྱེད་བཞིན་པའི་མ་རྐང་མཉམ་ལས་ཁང་དང་འབྲོག་པ་གྲོང་རྡལ་ཅན་དུ་བསྒྱུར་བའི་སྲིད་ཇུས་དེའང་སྐྱེས་ཁམས་སྲུང་སྐྱོབ་དང་འགལ་བ་ལྟག་སྤྲོད་དུ་གྱུར་ཡོད་པ་རེད། འཛམ་གླིང་རང་བཞིན་གྱི་སྐྱེས་ཁམས་ཁོར་ཡུག་གི་དཀའ་ངལ་དེ་ཡང་། སྔར་གྱི་གྲོང་གསེབ་ཀྱི་རྣམ་པ་ཡལ་ཏེ་མི་ཚོགས་འདུས་སྡོད་ཀྱི་གྲོང་ཁྱེར་ཇེ་མང་དུ་གྱུར་བ་ལ་བརྟེན་ནས་བྱུང་པ་རེད། ད་ལྟ་རྒྱ་ནག་ནང་ལོགས་སུའང་མ་འོངས་པའི་ལོ་ལྔའི་ནང་གྲོང་ཁྱེར་ཉུང་དུ་གཏོང་འཆར་ཡོད་པ་རེད། བོད་ཁུལ་ནི་དེ་ལས་ལྡོག་སྟེ་གྲོང་ཁྱེར་ཅན་དུ་སྒྱུར་བཞིན་པར་མ་ཟད། རྒྱ་ནག་ནང་ལོགས་ནས་སྒོ་བརྒྱབ་ཟིན་པའི་དུག་རླངས་ཅན་གྱི་བཟོ་གྲྭ་མང་པོ་བོད་དང་སོག་པོ་ས་ཁུལ་དུ་སྤོར་བཞིན་ཡོད། འདི་ལས་ཀྱང་རྒྱ་ནག་གཞུང་གིས་བོད་ཀྱི་སྐྱེས་ཁམས་སྲུང་སྐྱོབ་ཐད་བསམ་བློ་གཏན་ནས་གཏོང་གི་མེད་པ་དེ་མངོན་གསལ་དོད་པོ་རེད། ཡིན་ནའང་། རྒྱ་ནག་གཞུང་གིས་སྐྱེས་ཁམས་སྲུང་སྐྱོབ་ཞེས་པའི་སྐད་ཆ་སྙན་པོ་དེ་འཛམ་གླིང་ལ་སྒྲོག་བཞིན་འབྲོག་པ་རྣམས་རི་ལས་ཕབ་སྟེ་གྲོང་རྡལ་ཅན་ལ་བསྒྱུར་དོན་ནི། འབྲོག་ཁུལ་ནི་བོད་མི་རིགས་རང་གི་ངོ་བོ་དང་འདུ་ཤེས་སྲུང་འཛིན་བྱེད་མཁན་གཙོ་གྲས་ཆགས་ཡོད་སྟབས། འབྲོག་སྡེ་རྣམས་རྩ་གཏོར་བྱས་ཏེ་དབང་བསྒྱུར་བྱ་རྒྱ་རྒྱུའི་འཆར་གཞི་འདིང་གི་ཡོད་པ་རེད་ཟེར། 

སྔོན་ཆད་ཀྱི་རིག་གནས་གསར་བརྗེ་དང་མཉམ་ལས་ཁང་གི་དཀའ་སྡུག་གི་འཚོ་བ་དངོས་སུ་བརྒྱུད་མྱོང་བའི་འབྲོག་ཁུལ་གྱི་རྒན་རབས་པ་མང་པོ་ཞིག་ལ་སྔར་གྱི་ལྟོག་སྐོམ་གྱི་སྲིད་ཇུས་དེ་བསྐྱར་ལོག་ཡོང་རྒྱུར་བློ་དོགས་ཆེན་པོ་སྐྱེས་བཞིན་ཡོད་པ་དང་། དེ་བཞིན་འབྲོག་ཁུལ་ཁ་ཤས་ལ་སྔ་ས་ནས་ཕྱུགས་ཟོག་རྣམས་རིན་གོང་དམའ་བོས་ཐོག་ནས་སྡེབ་འཚོང་བྱས་ཟིན་སྟབས། དེ་སྔ་མཉམ་ལས་ཁང་གི་སྲིད་ཇུས་ནང་དོན་ལྟར། མཉམ་ལས་ཁང་རེ་འགར་ས་མུ་ ༨ ཀྱི་སྟེང་ལུག་གཅིག་དང་། མུ་ ༣༢ གྱི་སྟེང་ནོར་གཅིག་རེ་འདང་གི་མེད་པའི་དཀའ་ངལ་བྱུང་ཡོད།

སྔར་གྱི་མཉམ་ལས་ཁང་དང་ད་ལྟའི་མ་རྐང་མཉམ་ལས་ཁང་གཉིས་ཀྱི་འདྲ་ས་དང་མི་འདྲ་ས་གང་ཡོད་སྐོར་ལ་སྤྱི་འཐུས་བསྟན་འཛིན་མགོན་པོ་ལགས་ཀྱིས་བརྗོད་དོན། འདི་གཉིས་ཀྱི་མི་འདྲ་བའི་ཆ་ནི་སྔར་གྱི་མི་དམངས་སྤྱི་ཁང་སྐབས་མི་དམངས་ལ་དཔལ་འབྱོར་གྱི་ཁེ་ཕན་ཅི་ཡང་ཡོད་པ་མ་རེད། དཀའ་ལས་ཅི་ལྟར་བརྒྱབ་ཀྱང་ཚང་མ་གཞུང་གི་རེད། ད་ལྟའི་མ་རྐང་མཉམ་ལས་ཁང་དེ་འབྲོག་པ་མི་མང་གི་དཔལ་འབྱོར་ཁེ་ཕན་དང་འབྲེལ་ནས་ཡོད་པ་རེད། མ་རྐང་དང་ངལ་རྩོལ་ལྟར་འབྲོག་པ་མང་ཚོགས་ལའང་དཔལ་འབྱོར་གྱི་ཡོང་འབབ་ཏོག་ཙམ་ཡོད་པ་རེད། དེ་གཉིས་ཀྱི་འདྲ་ས་ནི་བོད་མི་རིགས་ཀྱི་རིག་གཞུང་དང་འདུ་ཤེས་ལ་གནོད་ཚབས་ཆེན་པོ་ཡོད་པ་དེ་རེད། འབྲོག་པ་མང་ཚོགས་རྣམས་ཞེད་སྣང་སྐྱེ་བཞིན་པ་དང་། མཉམ་ལས་ཁང་འདིར་ཞུགས་འདོད་མེད་པའི་གནད་གཙོ་བོ་གཅིག་ཀྱང་འདི་རེད། མི་དམངས་སྤྱི་ཁང་གི་སྐབས་སུ་བོད་མི་རྣམས་ཀྱི་སེམས་སུ་ད་ནི་ཆོས་མེད་པ་ཆགས་འགྲོ་གི་རེད་བསམ་པའི་སེམས་ཁྲལ་ཡོད་པ་རེད། ད་ལྟའི་སྲིད་ཇུས་འདི་ལ་མཚོན་ནའང་ཁྲིམས་དང་སྒྲིག་གཞི་ཚང་མར་རྒྱ་ཡིག་རྒྱ་སྐད་གཙོ་བོར་སྤྱོད་ཀྱིན་ཡོད་པ་དང་། ཐ་ན་རྒྱ་ཡིག་གཅིག་ཀྱང་མི་ཤེས་པའི་འབྲོག་ཁུལ་གྱི་གྱང་ལྡེབས་སུའང་རྒྱ་ཡིག་སྦྱར་འགྲེམས་བྱས་ཡོད་པ་རེད། དེར་བརྟེན། བོད་མི་རིགས་ཀྱི་ཡུལ་སྲོལ་རིག་གནས་དང་འགལ་ཟླ་ཆགས་འོང་དུས་བོད་མི་རྣམས་ལ་རང་བཞིན་ཀྱིས་ཞེད་སྣང་ཞིག་འོང་གི་ཡོད་པ་རེད་ཟེར།

རྒྱ་གཞུང་ལ་སྲིད་ཇུས་གསར་པ་དེ་ལག་བསྟར་བྱེད་ཕྱོགས་ཐད། གཅིག་གྱུར་གྱི་ལམ་ལུགས་དང་སྒྲིག་གཞི་ཞིག་མེད་པར་ས་གནས་འབྲེལ་ཡོད་ཚོས་རང་འདོད་ལྟར་ལག་བསྟར་ཙམ་བྱེད་ཀྱི་ཡོད་སྟབས། འབྲོག་དམངས་ལ་དཀའ་ངལ་སྣ་ཚོགས་འཕྲད་བཞིན་ཡོད་འདུག དེའི་ཐད་སྤྱི་འཐུས་བསྟན་འཛིན་མགོན་པོ་ལགས་ཀྱིས་བརྗོད་རྒྱུར།  རྒྱ་ནག་གཞུང་ལ་དམིགས་ཡུལ་གཅིག་ཡོད་པ་རེད། དེ་ནི་བོད་མི་རིགས་ཀྱི་ངོ་བོ་བསྒྱུར་རྒྱུ་དེ་རེད། སྔོན་ཆད་བཙན་པོ་དབང་ཡོད་བྱས་ཏེ་ཐེངས་གཅིག་བསྒྱུར་ཐབས་བྱས་ཀྱང་མ་འགྱུར་བ་རེད། དེ་རྗེས་དཔལ་འབྱོར་གྱི་བསླུ་བྲིད་སྤྱད་དེ་བསྒྱུར་ཐབས་བྱས་པ་རེད། ཡིན་ནའང་། ༢༠༠༨ ལོར་དེས་ཀྱང་ནུས་བ་ཐོན་ཀྱིན་མེད་པ་ཧ་གོ་སོང་བ་རེད། ད་ཁོ་ཚོས་ལམ་ཁ་གསར་བ་ཞིག་བཙལ་གྱི་ཡོད་ཀྱང་། ལེགས་འགྲུབ་ཡོང་མིན་གྱི་གདང་ཚོད་བསླེབ་ཐུབ་ཀྱི་ཡོད་པ་མ་རེད། འོན་ཀྱང་། བོད་པ་ཚོ་དཔལ་འབྱོར་གྱི་ཁེ་ཕན་ཐོག་ལ་མགོ་འཁོར་ཏེ། རང་ཉིད་ཀྱི་སྐད་ཡིག་དང་རིག་གཞུང་། ཆོས་ལུགས་སོགས་ལ་ཞེན་ཁོག་དང་ཤ་ཚ་ཆུང་དུ་འགྲོ་མིན་ཚོད་ལྟ་བརྒྱུད་ཉམས་མྱོང་གསོག་གི་ཡོད་པ་རེད། བོད་ཁུལ་གྱི་ས་ཆ་གང་རུང་ཞིག་ཏུ་སྤྱད་པའི་ཐབས་ཤེས་དེར་བོད་མི་རྣམས་མགོ་འཁོར་བ་ཡིན་ན། ཐབས་ལམ་དེ་བོད་ཆོལ་ཁ་གསུམ་ལ་ཁྱབ་བརྡལ་དུ་བཏང་སྟེ། མཐར་བོད་མི་ཡོངས་ཀྱིས་རྒྱ་ཡིག་རྒྱ་སྐད་མ་བཤད་ན་མི་ཚེ་བསྐྱལ་ཐབས་མེད་པ་ཞིག་བཟོ་བསམ་པ་རེད། འོན་ཀྱང་ཐབས་ལམ་ཡག་པོ་ཞིག་དང་སྒྲིག་གཞི་ངེས་གཏན་ཞིག་ཡོང་གི་ཡོད་པ་མ་རེད། ཅེས་བརྗོད་བྱུང་། 

གསར་འགོད་པ། ཚེ་རིང་རྒྱལ།