གླུ་བ་ཨ་མཆོག་མགོན་པོ་དོན་འགྲུབ་ལགས་ཀྱིས་སྒྲིག་སྦྱོར་དང་ཕབ་བསྐྲུན་བྱས་པའི་༼ ངེས་གཏན་མེད་པའི་མི་ཚེ ༽ཞེས་པའི་གློག་བརྙན་དེ་ཟླ་འདིའི་ཕྱི་ཚེས་ ༡༢ ཉིན་ཁེ་ན་ཌའི་ཁྲོ་རོན་ཁྲོ་སློབ་གྲྭ་ཆེན་མོ་ SESE/OISE University of Toronto སློབ་གསོ་ཞིབ་འཇུག་སྡེ་ཚན་དུ་དངོས་སུ་དབུ་འབྱེད་ཞུ་རྒྱུ་ཡིན་འདུག རིང་ཚད་ཆུ་ཚོད་ ༡ དང་སྐར་མ་ ༢༠ ཙམ་གྱི་གློག་བརྙན་འདིའི་ནང་བོད་པའི་ཁྱིམ་ཚང་དཀྱུས་མ་ཞིག་གི་ཉིན་རེའི་འཚོ་བ་སྐྱེལ་སྟངས་བརྒྱུད་དེ། བོད་པའི་ཁྱིམ་ཚང་ཞིག་ལ་བདེ་སྐྱིད་ག་ཚོད་ཅིག་ཡོད་པ་དང་། དཀའ་སྡུག་ག་ཚོད་ཅིག་མྱོང་གི་ཡོད་པ་སོགས་བཟང་ངན་གཉིས་ཀྱི་ཆ་མང་པོ་ཞིག་གསལ་བོར་བསྟན་ཡོད་ལ། གློག་བརྙན་འདིའི་དམིགས་ཡུལ་གཙོ་བོ་ཡང་བོད་མི་རིགས་ཀྱི་ཁྱད་དུ་འཕགས་པའི་རྣམ་དཔྱོད་དང་ཤེས་ཡོན། འཇོན་ཐང་། ཡ་རབས་སྤྱོད་བཟང་། མཛའ་སེམས་སོགས་ཐུན་མོང་མ་ཡིན་པའི་ཁྱད་ཆོས་དེ་དག་འཛམ་གླིང་མི་མང་ལ་སྟོན་ཆེད་དང་། བོད་མིའི་ཡོན་ཏན་དེ་དག་ལ་དེང་རབས་ཀྱི་གྲོང་ཁྱེར་ཅན་དང་། ནུབ་ཕྱོགས་ཀྱི་རྣམ་པ་འདི་དག་གིས་ཕོག་ཐུག་དང་གཏོར་བརླག་ཐེབས་ཀྱི་ཡོད་པ་དང་། ལྷག་པར་དུ་ནང་སེམས་ཀྱི་སྟེང་ལ་གནོན་ཤུགས་དང་བརྡབ་གསིག་ག་ཚོད་ཡོང་གི་ཡོད་པ་སོགས་མཚོན་པར་བྱས་ཡོད་འདུག
༼ ངེས་གཏན་མེད་པའི་མི་ཚེ ༽ ཞེས་པའི་གློག་བརྙན་འདིའི་འཁྲབ་གཞུང་རྩོམ་པ་པོ་དང་འཁྲབ་ཁྲིད་པ། བརྙན་ལེན་པ་དང་སྒྲིག་སྦྱོར་བ་ཚང་མ་ཨ་མཆོག་མགོན་པོ་དོན་འགྲུབ་ཁོང་རང་ཉིད་ཡིན་པ་དང་། དེ་ནི་ཁོ་བོས་ལོ་བཞིའི་རིང་ཁེ་ན་ཌར་གློག་བརྙན་ཆེད་སྦྱོང་བྱས་པའི་གྲུབ་འབྲས་ལ་ཚོད་ལྟའི་ཚུལ་དུ་བཟོས་པ་ཞིག་ཡིན་ཞིང་། གློག་བརྙན་འདིའི་འཁྲབ་སྟོན་ལས་རོགས་སུ་བོད་གཞུང་ཟློས་གར་ཚོགས་པའི་བསོད་ནམས་ཕུན་ཚོགས་དང་བསམ་གཏན། ནོར་གླིང་མཐོ་སློབ་ཀྱི་ཉམས་ཞིབ་པ་མེ་འོད་བཅས་དང་། འཁྲབ་སྟོན་པ་བོད་གཞུང་ཟློས་གར་ཚོགས་པའི་བསོད་ནམས་ཕུན་ཚོགས་དང་ཚུལ་ཁྲིམས་སྒྲོལ་མ། བསམ་གཏན། བསྟན་འཛིན་བུ་འབུམ། བསྟན་འཛིན་སྒྲོན་སེལ་བཅས་ཡིན་འདུག
གསར་འགོད་པ། དོན་གོ
ཚིག་དོན་དང་དག་ཆ་སོགས་རྩོམ་པ་པོ་རང་ཉིད་ལ་དབང་བས་དེ་རང་སོར་བཞག་ན་ལེགས་སྙམ།
བཀུར་འོས་རྩོམ་བསྒྲིགས་པ་ལགས། ནན་གྱིས་ཞུ་རྒྱུར། སྐུ་ཞབས་མགོན་པོ་ལགས་ཀྱིས་བྲིས་པའི་<<ངེས་གཏན་མེད་པའི་མི་ཚེ་>>ཞེས་པ་དེར་ཁྱེད་ཀྱིས་<<ངེས་བརྟན་མེད་པའི་མི་ཚེ་>>ཞེས་བཅོས་འདུག རྩོམ་པ་པོ་ཁོ་རང་ལ་མཚོན་ན་མིང་དེ་ལྟར་འདོགས་དགོས་པར་རྒྱུ་མཚན་ཡོད་ལ། གལ་ཏེ་དག་ཡིག་གསར་བསྒྲིགས་དང་བོད་རྒྱ་ཚིག་མཛོད་སོགས་སུ་མིང་འདོགས་སྟངས་དེ་ལྟ་བུ་ཞིག་མི་གསལ་ན་ཡང་། མིང་འདོགས་སྟངས་སོགས་ཡོད་ཚད་ཚིག་མཛོད་དུ་གསལ་དགོས་པའི་མ་ཁྱབ། མདོར་ན་གནས་ཚུལ་འདི་རིགས་དྲ་ཐོག་ཏུ་འགོད་མིན་ཁྱེད་རྩོམ་བསྒྲིགས་པ་དག་རགས་ལས་མོད། ཚིག་ལ་འགྱུར་བ་གཏོང་ཆོག་ཡིན་རྩོམ་པ་པོ་དང་ཞུ་དག་པ་བཅས་ལ་རགས་ལས་ཡོད། དེ་ལྟར་ན། གོང་གི་ནོར་བཅོས་བྱས་པ་དེ་མ་ཕྱི་རང་སོར་འཇོག་རོགས་ཞེས་ཞུ་དགོས་བྱུང་།
དྲ་གྲོགས་མིག་གསུམ་པ་ལགས་ཀྱིས་གོང་གི་གསར་འགྱུར་ནང་གི་ ༼ མཐོན་སློབ ༽ ཞེས་པར་ནོར་བཅོས་བཏང་བར་ཐུགས་རྗེ་ཆེ། འོན་ཀྱང་། གོང་གི་གློག་བརྙན་དེའི་རྒྱབ་ཤོང་ངོས་ཀྱི་ཁ་བྱང་ལ་ ༼ ངེས་གཏན་མེད་པའི་མི་ཚེ ༽ ཞེས་བཀོད་འདུག་མོད། དག་ཡིག་གསར་བསྒྲིགས་སོགས་ལག་སྣེར་ཡོད་པའི་ཚིག་མཛོད་དང་མིང་མཛོད་དག་ཏུ་གསལ་ཁ་མི་འདུག་ཀྱང་། བོད་རྒྱ་ཚིག་མཛོད་ཆེན་མོའི་ནང་། ” ངེས་བརྟན ” ངེས་པ་བརྟན་པོ། ཡོང་རྒྱུ་ངེས་བརྟན་ཡིན། ཞེས་བཀོད་འདུག་ལ། སྨོན་ལམ་གློག་རྡུལ་ཚིག་མཛོད་ནང་དུ་ཡང་། ” ངེས་བརྟན ” ངེས་པ་བརྟན་པོ་ཡོང་རྒྱུ་ངེས་བརྟན་ཡིན། ཞེས་གཅིག་མཚུངས་ཀྱི་བཀོད་འདུག
༼ངེས་བརྟན་མེད་པའི་མི་ཚེ༽དང་། ༼ནོར་གླིང་མཐོན་སློབ༽་འདི་གཉིས་ཀ་རྨས་སྐྱོན་ཕོག་ནས་ཁྲག་དམར་འཛར་འཛར་བྱེད་བཞིན་འདུག ཨེམ་རྗེ་ཕེབས་ནས་སྨན་བཅོས་བྱེད་རོགས་གནོངས།
ངོ་མ་ཡར་རྒྱས་ཀྱི་རྣམ་པ་ཞིག་རེད་པས།བོད་པ་མི་རེ་ངོ་རེ་ནས་འགན་ཁུར་བའི་རྟགས་ཤིག་རེད།དགའ་ནས་ཡོད།
གློག་བརྙན་དེ་མ་མཐོང་གོངནས་དེའི་ཁྱད་ཆོས་དང་མི་རིགས་ཀྱི་ལུགས་སྲོལ་བཟང་པོ་སོགས་དོན་དམ་དུ་བསྟན་ཡོད་མེད་ཁ་ཚོན་གཅོད་དཀའ་ཡང་།
གློག་བརྙན་དེར་ལྟ་འདོད་ཤིན་ཏུ་ཆེ། འོན་ཀྱང་དེ་ཇི་ལྟར་རག་མིན་དང་དེའི་གོང་ཚད་སོགས་མཁྱེན་མཁན་ཡོད་ན་གསལ་བོ་རེ་གསུངས་རོགས།
རེ་བ་ཞིག་ལ་་་་དེའི་གོང་ཚད་གནམ་ལ་མི་ཤོང་བ་ཞིག་མིན་པར་མི་སེར་དཀྱུས་མ་ང་ལྟ་བུ་ཚུན་ནས་ཉོ་ཐུབ་པའི་སྐྱབས་འཇུག་ཞུ་བཞིན་ཡོད།
ཨ་གཙང་ལགས་དེང་སང་གང་ན་ཡོད་མཛད་སྒོ་འདི་ལ་ཆིབས་བཞུགས་སྐྱོང་ཐུབ་པ་དགའ་ནས་ཡོད།
ངོ་མ་གློག་བརྙན་འཁྲམ་སྟོན་ཕུལ་བ་ཡག་པོ་རེད། ཁོང་ཚོ་རྣམས་ལ་ཐུགས་རྗེ་ཆེ་ཞུ་བཞིན་ཡོད།
འོ་ད་ངོ་འདི་འདྲ་རེ་བཏོན་ཐུབ་ན་བོད་མི་རིགས་གང་འདྲ་ཡིན་ལས་སླ་བོ་ར་སྤྲོད་བྱེད་ཐུབ་རྒྱ་རེད། དེ་ངོ་མ་ཡག་པོ་འདུག འདི་དབུ་འབྱེད་སྟོན་རེ་བྱེད་ཀྱིན་ཡོད་ན་ང་འགྲོ་དགོས། ཧ་ཧ་ཁ་དྲོ།