ཕྱི་ཟླ་ ༡༢ ཚེས་ ༡ ཉིན་ནི་དགའ་ལྡན་ལྔ་མཆོད་ཆེན་མོ་ཞེས་བོད་པའི་སྲོལ་རྒྱུན་གྱི་དུས་ཆེན་ཞིག་ལ་འཁེལ་ཡོད་སྟབས། ཉིན་དེར་པེ་ཅིན་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིགས་སློབ་མ་རྣམས་ཀྱིས་༼ རྗེ་ཙོང་ཁ་པ་ཆེན་པོ་སྐུ་འཁྲུངས་ཏེ་ལོ་ངོ་ ༦༤༣ འཁོར་བའི་རྗེས་དྲན་བགྲོ་གླེང་རིག་པའི་མཆོད་སྤྲིན ༽ ཞེས་པའི་འདུ་འཛོམས་ཤིག་གནང་ཡོད་འདུག་ཅིང་། ཚོགས་འདུ་དེའི་སྟེང་བོད་རིག་པ་ཞིབ་འཇུག་གླིང་གི་ཆེད་མཁས་པ་རྣམ་པ་གཙོས་པའི་སློབ་གླིང་གི་དགེ་རྒན་བཀྲ་བྷ་དང་གོ་ཤུལ་གྲགས་པ་འབྱུང་གནས། འབྲུག་ལྷ། ཚེ་དབང་ལྷ་མོ། ཤར་གཞོན་ཚེ་རིང་ཟླ་བ་སོགས་མཉམ་ཞུགས་གནང་ཡོད་འདུག
ཚོགས་འདུ་དེའི་ཐོག་མི་རིགས་སློབ་གླིང་གི་འབུམ་རམས་བསོད་ནམས་དོན་གྲུབ་གཙོས་པའི་ཞིབ་འཇུག་པ་དང་དགེ་རྒན་སྐོར་ཞིག་གིས་གཏམ་བཤད་གནང་ཡོད་འདུག་ལ། ཞིབ་འཇུག་སློབ་མ་རྣམས་ཀྱིས་རྗེ་རིན་པོ་ཆེའི་མཛད་རྣམ་དང་འབྲེལ་ཏེ་རང་རང་གི་ཞིབ་འཇུག་དཔྱད་རྩོམ་སྙན་སྒྲོན་ཞུས་ཤིང་། ཚོགས་ཞུགས་པ་ཡོངས་དང་ལྷན་དུ་༼ ཤེས་རབ ༽ ༼ ཐོས་བསམ ༽ ༼ བརྩོན་འགྲུས ༽ གསུམ་གྱི་བརྗོད་གཞི་དང་འབྲེལ་ཏེ། རྗེ་བདག་ཉིད་ཆེན་པོའི་མཛད་འཕྲིན་ལ་བསྟོད་པའི་མཆོད་སྤྲིན་ཕུལ་ཞིང་། དྲན་པའི་གདུང་དབྱངས་གྱེར་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
ད་རིང་གོམ་སྟབས་གསར་གཏོད་འདྲ་བ་སྣང་། དེ་སྔོན་ཆོས་ལུགས་གཞན་་༼བཀའ་བརྒྱུད་་་ རྙིང་མ་་་་ ས་སྐྱ་་་་ བོན་དང་བཅས་པ་རྣམས་ལ་གོང་བཞིན་གནང་ཡོད་མེད????? གནང་ཡོད་ཚེ་དེར་ཟད་། ་ མེད་ཚེ་མུ་མཐུད་ནས་ཆོས་ལུགས་གཞན་ལ་ཡང་དེ་བཞིན་གནང་གི་རེད་པས་། མེན་ན་རྒྱུ་མཚན་གསལ་བཤད་གནང་ན་ཡག་པོ་འདུག་།
བཀྲིས་བདེ་ལེགས་ཞུཞུ
སྙིང་ཐག་པ་ནས་བཀྲ་ཤིས་བདེ་ལེགས་ཡོད། གསར་གནས་འདི་ནི་སྔར་ཐོས་མ་མྱོང་བའི་དོན་དག་གལ་ཆེན་ཞིག་དང་ང་ཚོ་སུ་ཞིག་ཡིན་ནའང་གལ་ཆེ་ཤོས་དེ་རྒྱུན་འཁྱོངས་བྱ་རྒྱུ་དེ་མ་ཡིན་ནམ།
བགྲོ་གླེང་རིག་པའི་མཆོད་སྤྲིན་འདི་ལྟ་བུ་ཞིག་གོ་སྒྲིག་གནང་ཐུབ་པར་ཤིན་ཏུ་ནས་བསྔགས་པའི་འོས་སུ་གྱུར། ནང་ཆོས་ལུགས་ཀྱི་སྟོན་པ་སངས་རྒྱས་འཇིག་རྟེན་འདིར་བྱོན་ནས་བདེན་བཞིའི་ཆོས་ཀྱིས་འཁོར་ལོ་སོགས་རིམ་པ་གསུམ་བསྐོར་ནས་བསྟན་དང་འགྲོ་བའི་དོན་ཆེན་བསམ་གྱིས་མི་ཁྱབ་པའི་མཛད་པ་བཅུ་གཉིས་བསྟན་ཡོད།
དེ་ནས་འོད་སྲུང་སོགས་བསྟན་པའི་གཏད་རབས་བདུན་དང་། མགོན་པོ་ཀླུ་སྒྲུབ། ཨརྱ་བེ་ཝ། ཟླ་བ་གྲགས་པ། རི་པའི་ཁུ་བྱུགས། སངས་རྒྱས་བསྐྱངས་སོགས་ཟབ་མོ་ལྟ་བའི་བརྒྱུད་དང་། ཐོགས་མེད། དབྱི་གཉེན། རྣམ་གྲོལ་སྡེ། མཆོག་སྡེ། འདུལ་སྡེ། གསེར་བཟང་ཀུ་ས་ལི་གཉིས། ཞི་བ་ལྷ་སོགས་རྒྱ་ཆེན་སྤྱོད་བརྒྱུད་དང་། དེ་ལས་བརྒྱུད་པའི་མཁན་སློབ་ཆོས་གསུམ། ས་པཎ་རྣམ་ལྔ། མར་མི་དགས་གསུམ།
དེ་ནས་ཉེ་བར་བརྒྱུད་པའི་བླ་མ་གསར་གླིང་པ། ཇོ་བོ་རྗེ། འབྲོམ་སྟོན་པ། པོ་ཏོ་བ། ཤ་ར་བ། ཕུག་ཆུང་བ་སོགས་ལས་བརྒྱུད་ནས་བོད་གངས་ཅན་དུ་བསམས་ཞིང་དུ་བྱོན་པའི་རྗེ་ཙོང་ཁ་པ་ཆེན་པོ་ལ་༸ རྒྱལ་བའི་མདོ་བསྔགས་ཡོངས་རྫོགས་ཀྱི་བདག་པོ་གྱུར་པ་དེ་རེད།
སྟོན་པ་སངས་རྒྱས། རྒྱལ་པོ་ཨིནྡྲ་བྷོ་ཏི། ཀླུ་མོ་རྣལ་འབྱོར་མ། རྒྱལ་པོ་བི་སུ་ཀ་མ། ས་ར་ཧ། ཀླུ་སྒྲུབ། མ་ཏངྐི་པ། ཏེ་ལོ་པ་། ན་རོ་པ། མར་པ་ལོ་ཙྰ་བ། མི་ལ་རས་པ་སོགས་གསང་བ་བསྔགས་ཀྱི་ཉམས་ལེན་བྱིན་རླབས་ཀྱི་བརྒྱུད་པ་ཡང་ཆ་ཚང་བ་རྗེ་ཙོང་པ་ལ་བརྒྱུད་ནས་བོད་དུ་སླར་ཡང་སངས་རྒྱས་མི་ཡུལ་དུ་བྱོན་པ་ལྟར་དར་ཞིང་རྒྱས་ཡོད།
རྗེ་ཙོང་པ་ཆེན་པོ་སྐབས་དེའི་རྒྱ་ནག་རྒྱལ་པོས་མཆོད་ཡོན་དུ་བཀུར་ནས་གདན་འདྲེན་ཞུས་ཀྱང་ཁོང་གིས་རྒྱལ་ཚབ་ཏུ་འཇམ་དབྱངས་ཆོས་རྗེ་གཏོང་གནང་མཛད་ཡོད།
རྗེ་ཙང་ཁ་པས་དང་པོར་ཇོས་བསམ་མཐར་ཕྱིན་གྱི་མཛད་པ་དང་། བར་དུ་གཞུངལུགས་མན་ངག་ཐམས་ཅད་གདམས་ངག་ཏུ་འཆར་བའི་མཛད་འཕྲིན་བསྐྱངས་པ། མཐར་མར་ཉིན་མཚན་ཀུན་ཏུ་ཇོས་དོན་ཉམས་སུ་བླངས་ནས་སྐུ་ཚེ་དེ་རང་དུ་རྒྱུད་ཡོངས་སུ་སྨིན་པར་མཛད་པའི་ཚུལ་བསྟན་ཡོད།
ཆེས་རྣམ་དཔྱོད་འགྲན་པའི་ཟླ་དང་བྲལ་བའི་རྗེ་ཙོང་པ་མཆོག་ནི་བོད་གངས་ཅན་གྱི་བསྟན་འགྲོའི་བསོད་ནམས་ཡིན་པ་ཙམ་མ་ཟད་ད་ཆ་འཛམ་གླིང་འགྲོ་བ་མའི་རིགས་ཡོངས་ཀྱིས་རྗེས་དྲན་མཆོད་སྤྲིན་བྱེད་དགོས་པའི་ཆེས་བོད་ཀྱི་ནོར་བུ་རྩ་ཆེ་ཞིག་ཀྱང་ཡིན།
ཚོགས་འདུ་བསྡུ་སྐོང་བྱེད་པ་ནི་ཤིན་ཏུ་ཡག་པོ་རེད། འོན་ཀྱང་ཞིབ་འཇུག་གི་ར་བའི་གནས་ཚུལ་དྲང་པོ་དང། རྒྱའི་ཤན་ཤུགས་མི་ཡོང་བའི་རེ་བ་ཡོད། ཕྱོགས་གཅིག་ནས་མི་སྣ་དེ་དག་ནི་རྒྱའི་ཁོར་ཡུག་གཅིག་ལས་འཚར་ལོངས་བྱུང་བ་རེད།
ངའི་ཕ་ཡུལ་གྱི་སྟག་ཕྲུག་ཚོ་ངོ་མ་ཤེས་ཡོན་དང་ལྷག་བསམ་གཉིས་ལྡན་གྱི་སྟག་ཕྲུག་ཤ་སྟག་རེད། ཧ་ཧ་མཆོད་པའི་མཆོག་ཟེར་ན་འདི་འདྲ་ཡིན་རྒྱུ་རེད།
སེམས་ཁུང་རུང་པའི་གཏིང་ནས་བཀའ་དྲིན་ཆེ་ཞུས་པ་ཡིན། རྗེ་ཙོང་ཁ་པ་ཁོང་ནི་བོད་མི་རིགས་ཀྱིས་གླེང་རིན་དང་ངོམས་རིན་ཡོད་པའི་བོད་ཀྱི་ནོར་བུ་ཞིག་རེད། འདི་ལ་ཆོས་ལུགས་དང་ཆོས་རྒྱུད་རུས་སུ་མེད་པར་གུས་བཀུར་དང་རྗེས་དྲན་བྱས་ན་འགྲིག་གི་འདུག དེ་མིན་གྱི་བོད་གངས་ཅན་གྱི་ཆོས་རྒྱུད་གྲུབ་མཐའ་གང་ཡིན་གྱི་མཁས་གྲུབ་ཚང་མར་སྤྱི་མཐུན་གྱི་གུས་བཀུར་རྗེས་དྲན་བྱེད་འོས་པ་ཞིག་རེད་འདོད།
ངོ་མ་གླེང་ན་གླེང་རིན་ཞིག་ཡོད་ནི་རེད།དེའི་ཕྱིར།གླེང་བ་གཅིག་པོ་ཡིན་པར་ཁ་ཞེ་གཉིས་མེ་ད་ཀྱིས་མི་རིགས་ཤིག་གི་ངོམ་ཆོག་ཆོག་གི་སྐྱེས་ཆེན་དམ་པ་དེ་འདྲ་ཞིག་མ་འོངས་འབྱུང་བར་སྐུལ་མ་དང་སྐྱེད་སྲིང་བྱེད་དགོས།འུ་ཚོ་རྗེས་རབས་པ་ཚོས་ཁོང་གི་མི་གཞི་དང་སྒམ་བརླིང་།བརྩོན་སེམས་ཀྱི་གོ་ཆར་སློབ་སྦྱོང་དོན་ལྡན་ཞིག་བྱེད་རྒྱུ་གལ་ཆེན་རེད།
འདི་ནི་ཆེས་ཐོག་མའི་པེ་ཅིང་བོད་རིགས་སློབ་མའི་གོམ་སྟབས་གསར་ཞིག་ཡིན་པས། བཀྲ་ཤིས་བདེ་ལེགས་ཡང་ཡང་ཞུ །།
བཀྲིས་པའི་བྱ་བ་ཞིག་རེད་་་་་དགའ་ནས་བསྡད་ཡོད
ཧ་ཅང་གི་དགའ་འོས་བ་ཞིག་རེད། རྗེ་ཙོང་ཁ་བའི་མཛད་རྗེས་སོགས་རྗེས་ནས་ཞིབ་འཇུག་བྱེད་དང་བྱེད་བཞིན་པ་འདི་ལེགས་པར་མཐོང་ངོ་།