ཟླ་འདིའི་ཕྱི་ཚེས་ ༡༠ ཉིན་རྒྱ་ནག་གི་འོག་ཏུ་ཡོད་པའི་སོག་རིགས་མི་མང་གི་ཐོབ་ཐང་རྩོད་ལེན་གནང་མཁན་ཧཱ་ཏ་ཟེར་བ་ཁོང་རྒྱའི་བཙོན་འོག་ནས་ལོ་ ༡༥ ཡི་དུས་བཀག་བཙོན་འཇུག་གི་ཡུན་ཚད་རྫོགས་ཏེ་ཀློད་གྲོལ་གཏོང་དགོས་པའི་ཉིན་མོར་འཁེལ་ཡོད་ཀྱང་། རྒྱ་གཞུང་གིས་ཁོང་ཀློད་གྲོལ་གཏོང་རྒྱུ་ཕར་ཟད། ཉེ་ལམ་རྒྱ་ནག་ཉེན་རྟོག་པས་ཧཱ་ཏ་ལགས་ཀྱི་གཟའ་ཟླ་ཞིན་ནཱ་དང་། བུ་ཝེ་ཁི་སི་གཉིས་ཀྱང་འཛིན་བཟུང་བཙན་ཁྲིད་ཀྱིས་ད་ཆར་གར་སོང་ཆ་མེད་དུ་གྱུར་ཡོད་འདུག་ལ། ཁོང་ཚང་ལ་དཔེ་ཚོང་ཁང་ཞིག་ཡོད་པ་དེ་ཡང་ཕྱི་ཚེས་༣ ཉིན་ནས་སྒོ་བརྒྱབ་ཡོད་འདུག
ཕྱི་ཚེས་ ༡༠ ཉིན་ཧཱ་ཏ་ལགས་ཀྱི་ནང་མི་གཉེན་འབྲེལ་ཚོས་རེ་སྒུག་བྱས་པ་ལྟར། ཉིན་དེར་ཧཱ་ཏ་ཁྱིམ་དུ་འབྱོར་མེད་སྟབས། ཕྱི་ཚེས་ ༡༢ ཉིན་གཉེན་ཉེ་འགའ་ཡེ་ཧྥུན་བཙོན་ཁང་དུ་ཕྱིན་ཏེ་སྐད་ཆ་དྲིས་སྐབས། བཙོན་སྲུང་བས་ཧཱ་ཏ་ལགས་ཕྱི་ཚེས་ ༡༠ ཉིན་ཀློད་གྲོལ་བཏང་ཟིན་སྐོར་བརྗོད་འདུག་ཀྱང་། ད་སྔ་ཁོང་ནང་དུ་བསླེབས་མེད་པ་མ་ཟད། མི་གཞན་སུ་གང་གིས་ཀྱང་མཐོང་ཐོས་བྱུང་ཡོད་མི་འདུག ཉིན་དེའི་ཕྱི་དྲོར་ཆ་རྒྱུས་མེད་པའི་མི་ཞིག་ཧཱ་ཏའི་ཁྱིམ་ལ་ཡོང་སྟེ། ལོ་ན་ ༨༥ ལ་སོན་པའི་ཞིན་ནཱ་ཡི་ཨ་མའི་ལག་ཏུ་འོད་སྡེར་ཞིག་བཞག་ཡོད་འདུག་ལ། འོད་སྡེར་དེའི་ནང་། ཕྱི་ཚེས་ ༡༠ ཉིན་བླངས་པའི་ཧཱ་ཏ་དང་ཁོང་གི་གཟའ་ཟླ་ཞིན་ནཱ། བུ་ཝེ་ཁི་སི་གསུམ་ཀྱིས་མཉམ་དུ་ཟ་མ་བཟའ་བཞིན་པའི་འདྲ་པར་ ༥ ཙམ་བཞག་ཡོད་འདུག པར་དེ་དག་པའོ་ཞོན་རྒྱ་ཡིག་དྲ་ཚིགས་སུ་ཡང་བཏང་ཡོད་ཀྱང་། པར་དེ་དག་ས་གནས་གང་དུ་མི་སུ་ཞིག་གིས་བླངས་པ་དང་། དྲ་ཐོག་ལ་འཇོག་མཁན་སུ་ཡིན་སོགས་ཀྱི་གནས་ཚུལ་ཤེས་རྟོགས་ཐུབ་མི་འདུག
ཕྱི་ཚེས་ ༡༠ ཉིན་ཉི་ཧོང་དང་ཕྱི་སོག་གི་རྒྱ་ནག་གཞུང་ཚབ་ཁང་གི་མདུན་དུ་སོག་རིག་གཙོས་པའི་རྒྱབ་སྐྱོར་བ་མང་པོ་འདུ་འཛོམ་གྱིས་༼ ཧཱ་ཏ་ཀློད་གྲོལ་གཏོང་རོགས ༽ ཞེས་ངོ་རྒོལ་སྐད་འབོད་བྱས་ཡོད་འདུག་ལ། ནང་སོག་མི་དམངས་ཚོགས་པའི་དྲུང་ཆེ་ཁེ་རེ་ཌི་ཁོ་ཝེ་སི་ཇེལ་ཋི་ལགས་ཀྱིས་གསར་ལམ་ཁག་ཏུ། ང་ཚོས་འཚེ་མེད་ཞི་བའི་ལམ་ནས་དམངས་གཙོར་འཐབ་རྩོད་བྱེད་ཀྱིན་ཡོད་ལ། ཧཱ་ཏ་ལགས་ནི་མ་འོངས་པར་ནང་སོག་མི་རིགས་ཀྱི་འཐབ་རྩོད་ཀུན་སྤྱོད་ཀྱི་ཚད་གཞི་ཡིན། ང་ཚོ་དུས་གཏན་དུ་ཁོང་དང་ལྷན་དུ་གནས་ཡོད། ཅེས་བརྗོད་ཅིང་། དགོས་མདུན་དོན་ཚན་གསུམ་བསྒྲགས་པའི་ནང་། དང་པོ། ཆ་རྐྱེན་ཅི་ཡང་མེད་པའི་ཐོག་རྒྱ་གཞུང་གིས་ཧཱ་ཏ་གང་མགྱོགས་ཀློད་གྲོལ་གཏོང་དགོས་པ། གཉིས་པ། ཧཱ་ཏ་ལགས་ཀྱི་མཚན་སྙན་དང་གོ་གནས་བསྐྱར་གསོ་བྱས་ཏེ། ཁོང་གི་མ་འོངས་པའི་འཚོ་གནས་ཐད་ཁག་ཐེག་བྱ་དགོས་པ། གསུམ་པ། ཧོ་ལེན་ཧྤུ་གཙོས་པའི་ནང་སོག་མི་རིགས་ཀྱི་ཐོབ་ཐང་དོན་གཉེར་བ་རྣམས་ལ་དྲག་གནོན་མཚམས་འཇོག་དགོས་པ་བཅས་བཀོད་འདུག
ནང་སོག་གི་ཐོབ་ཐང་རྩོད་ལེན་པ་སྐུ་ཞབས་ཧཱ་ཏ་ལགས་ནི། ནང་སོག་མི་རིགས་ཀྱི་དམངས་གཙོ་དང་འགྲོ་བ་མིའི་ཐོབ་ཐང་དོན་གཉེར་བྱེད་མཁན་ཞིག་ཡིན་ཞིང་། ཁོང་ལ་ནང་སོག་མི་རིགས་ཀྱིས་དགའ་མོས་དང་བརྩི་མཐོང་ཆེན་པོ་བྱེད་ཀྱི་ཡོད་པ་དང་། རྩྭ་ཐང་གི་གླག་རྒོད་དང་མི་རིགས་ཀྱི་དཔའ་བོ་ཞེས་པའི་མཚན་སྙན་ཡང་གནང་ཡོད་འདུག ཁོ་ད་ལྟ་རང་ལོ་ ༥༦ ཡིན་ཞིང་། ཕྱི་ལོ་ ༡༩༨༠ ལོར་ནང་སོག་ཐུང་ལེའོ་དགེ་ཐོན་སློབ་གྲྭ་ཆེན་མོ་རུ་སོག་ཡིག་ཆེད་སྦྱོང་གིས་སློབ་མཐར་ཕྱིན་རྗེས། ལོ་ ༦ རིང་ནང་སོག་མི་རིགས་པར་བསྐྲུན་ཁང་དུ་རྩོམ་སྒྲིག་པའི་ཕྱག་ལས་གནང་ཞིང་། ཞོར་དུ་ནུབ་ཕྱོགས་མཚན་ཉིད་རིག་པར་ཞིབ་འཇུག་གིས་ཨང་གཉིས་པའི་བྱ་དགའ་ཡང་ཐོབ་ཡོད།
ཧཱ་ཏ་ལགས་ཀྱིས་ནང་སོག་དགེ་ཐོན་སློབ་ཆེན་ནས་མཱ་ཁི་སི་མཚན་ཉིད་པའི་འབུམ་རམས་ཐོན་རྗེས། ཁོ་རང་གི་གྲོགས་པོ་བློས་ཐུབ་འགའ་དང་ཤེས་ལྡན་མི་སྣ་སྐོར་ཞིག་མཉམ་འབྲེལ་ཐོག་ ༡༩༩༢ ལོའི་ཟླ་ ༥ པར་ནང་སོག་རང་སྐྱོང་ལྗོངས་ཧི་ཧོ་ཐི་གྲོང་ཁྱེར་དུ་གསང་བའི་སྒོ་ནས་“ནང་སོག་དམངས་གཙོའི་མཐུན་ཚོགས་”(SMDA) ཞེས་པ་དེ་གསར་འཛུགས་བྱས་ཤིང་། ཁོང་གིས་ཚོགས་པ་དེའི་ཚོགས་གཙོའི་འགན་བཞེས་ཏེ་༼ སོག་པོའི་འབོད་སྒྲ༽ ཞེས་པའི་དུས་དེབ་དཔར་སྐྲུན་བྱས་ཤིང་། རིམ་གྱིས་དུས་དེབ་དེ་༼ སོག་པོའི་བཞུད་ལམ ༽ ཞེས་པའི་དཔེ་དེབ་ཏུ་བསྒྱུར་ཏེ་མུ་མཐུད་དཔར་འགྲེམས་བྱས་ཡོད་འདུག
དེབ་དེའི་ནང་རྒྱ་ནག་གིས་ནང་སོག་ལ་དབང་བསྒྱུར་བྱས་པའི་ལོ་བཅུ་ཕྲག་འགའི་རིང་གི་ལོ་རྒྱུས་དང་དངོས་ཡོད་གནས་ཚུལ། དེ་བཞིན། ནང་སོག་མི་མང་ལ་འཕྲད་བཞིན་པའི་དཀའ་ངལ་དང་། གནད་དོན་དེ་དག་སེལ་བའི་ཐབས་ཤེས་སྐོར་གྱི་དཔྱད་བརྗོད་སྤེལ་ཡོད་པ་དང་། ལྷག་པར་དུ་ཁོང་གིས་སོག་རིགས་མི་མང་ལ་རྒྱ་ནག་གི་རྩ་ཁྲིམས་ནང་གཏན་ལ་ཕབ་པའི་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་ལ་བརྩོན་ལེན་བྱ་དགོས་པའི་སྐུལ་མ་བྱས་ཤིང་། སོག་རིགས་མི་མང་ལ་རང་ཐག་རང་གཅོད་ཀྱི་ཐོབ་ཐང་སྤྲོད་དགོས་པའི་རེ་འདུན་བཏོན་པ་སོགས་ལ་བརྟེན་ཏེ། རྒྱ་གཞུང་གིས་ཁོང་འཛིན་བཟུང་བྱས་ཤིང་། ཕྱི་ལོ་ ༡༩༩༥ ལོའི་ ༡༢ པའི་ཚེས་ ༡༠ ཉིན་རྒྱལ་ཁབ་ཁ་བྲལ་དང་གསང་མྱུལ་བའི་ཉེས་མིང་བཏགས་ཏེ་ལོ་ ༡༥ ཡི་བཙོན་འཇུག་ཁྲིམས་ཐག་བཅད་ཡོད།
གསར་འགོད་པ། ཚེ་རིང་རྒྱལ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
གསར་འགྱུར་འདི་ལྟ་བུ་ནི་རྩ་ཆེན་པོ་རེད། གསར་འགོད་པ་ལགས། ནང་སོག་གི་དམངས་གཙོའི་འཐབ་རྩོད་སྐོར་གྱི་གནས་ཚུལ་དང་ལོ་རྒྱུས་སྙིང་བསྡུས་ཤིག་གསལ་བཤད་ཡོང་ཐུབ་ན་ཡག་པོ་འདུག ཐུགས་རྗེ་ཆེ།
གསར་འགོད་པ་ཚེ་རིང་རྒྱལ་ལགས་སུ་ཐུགས་རྗེ་ཆེ་ཞུ། གནས་ཚུལ་འདི་ནི་དེ་སྔོན་བོད་པའི་གསར་འགྱུར་བརྒྱུད་ལམ་ཁག་ཏུ་ཡོངས་སུ་མ་གྲགས་པའི་གནས་ཚུལ་གལ་ཆེན་པོ་ཞིག་ཡིན་ལ། རྒྱ་བོད་གནད་དོན་ལ་འཐབ་འཛིང་བྱེད་པར་མི་རིགས་གཞན་དང་རྒྱལ་ཁབ་གཞན། ཡུལ་ལུང་གཞན་གྱི་རྒྱུ་ཆ་དང་སློབ་སྦྱོང་མང་པོ་འཚོལ་བསྡུ་བྱ་དགོས།
གསར་འགྱུར་འདིའི་ནང་གི་ཞན་ཆ་ཞིག་ནི། ནང་སོག་མི་དམངས་ཚོགས་པ་ཟེར་བ་དེ་ག་འདྲ་ཡོད་མེད་དང་། ནང་སོག་གི་རང་དབང་དམངས་གཙོའི་འཐབ་རྩོད་ཀྱི་གནས་བབ་དང་ངོ་བོ་སོགས་ལ་འགྲེལ་བརྗོད་ཅིག་ཡོད་པ་ཡིན་ན། ཡག་ཐོག་ཡག་བརྩེགས་རེད། གང་ཞེ་ན། བོད་མི་ཚོས་སོག་པའི་འཐབ་རྩོད་ཀྱི་གནས་སྟངས་དང་ངོ་བོ་སོགས་ལ་ཆ་རྒྱུས་ཞེ་དྲག་ཡོད་པ་མ་རེད།
ད་དུང་མུ་མཐུད་དུ་འདི་ལྟ་བུའི་གནས་ཚུལ་དེ་ཁྱབ་བསྒྲགས་བྱས་ཏེ། རྒྱ་ནག་གི་བཙན་འོག་ཏུ་ཡོད་པ་བོད་མི་གཅིག་པོ་མིན་པ་དང་། རང་དབང་འཐབ་རྩོད་བྱེད་མཁན་ཡང་བོད་རིགས་གཅིག་པོ་མིན་པར་ནང་སོག་དང་ཡུ་གུར། ཉེན་ཞཱ་སོགས་མི་རིགས་ཁ་ཤས་ཡོད་པ་དེ་དག་ཀྱང་གདུང་སེམས་མཉམ་སྐྱེད་དང་། དཀའ་སྡུག་མཉམ་མྱོང་གི་ཁུངས་སུ་ཚུད་པར་བྱ་རྒྱུར་རེ་སྐུལ་དང་རྒྱང་ལྟ་བྱས་ཡོད།