ཉེ་ཆར་མཚོ་སྔོན་ཞིང་ཆེན་མང་ར་བོད་རིགས་རང་སྐྱོང་རྫོང་དུ་ཡོད་པའི་མཐོ་ལས་དགོན་རྣམ་རྒྱལ་ཕུན་ཚོགས་ཆོས་རྫོང་གླིང་གི་དགེ་འདུན་པ་མཐོ་ལས་ཕུན་ཚོགས་གཙོས་དགེ་འདུན་པ་ཁག་ཅིག་གིས། ༼ ཕ་སྐད་གཙང་མ ༽ ཞེས་པའི་བོད་རྒྱ་ཤན་སྦྱར་གྱི་རྣམ་པའི་ཐོག་ནས་བསྡུ་སྒྲིག་བྱས་པའི་རྒྱུན་བཀོལ་ཐ་སྙད་དང་གསར་བྱུང་ཐ་སྙད་དག་བསྒྲིགས་བྱས་པའི་དཔེ་དེབ་གསུམ་པར་སྐྲུན་བྱས་ཡོད་འདུག
ཕྱི་ལོ་ ༢༠༠༨ ལོའི་ཕྱི་ཟླ་ ༤ བའི་ནང་དགེ་འདུན་པ་ཚོས་ཐོག་མར་དགོན་པའི་ཁོར་ཡུག་ལ་དམིགས་ཏེ་ཕ་སྐད་གཙང་མ་ཞེས་པའི་སྐྱ་དཔར་དཔེ་དེབ་ཅིག་བསྒྲིགས་ཡོད་པ་དེ་ལ། ས་གནས་མང་ཚོགས་ཀྱིས་དགའ་བསུ་དང་སློབ་གྲྭ་ཁག་གི་སློབ་ཕྲུག་ཚོས་ཆ་འཇོག་ཆེན་པོ་གནང་ཡོད་སྟབས། ཕྱིས་སུ་ཁོང་ཚོས་དཔེ་དེབ་དེ་ཇེ་རྒྱས་སུ་བཏང་སྟེ་ ༢༠༠༨ ལོའི་ལོ་མཇུག་ཏུ་ཕ་སྐད་གཙང་མ་ཞེས་པའི་དཔེ་དེབ་གཉིས་པ་གྲངས་ ༤༠༠༠ ཙམ་པར་བསྐྲུན་བྱས་ཏེ་རིན་མེད་ཐོག་དགོན་སྡེ་དང་སློབ་གྲྭ་ཁག མང་ཚོགས་ཁྲོད་བཅས་སུ་བཀྲམས་ཏེ་ནུས་པ་ཆེན་པོ་ཐོན་ཡོད་པ་དང་། རྗེས་སུ་དགོན་སྡེ་གཞན་དག་ནས་ནང་བསྟན་སྐོར་གྱི་ཐ་སྙད་དང་སློབ་གྲྭ་ཁག་གི་རྒྱུན་བཀོལ་ཐ་སྙད་སོགས་སྐུར་ཡོང་སྟེ་དཔར་སྐྲུན་གྱི་རེ་བ་ཞུས་དོན་ལྟར། མཐོ་ལས་དགོན་རྣམ་རྒྱལ་ཕུན་ཚོགས་ཆོས་རྫོང་གླིང་གིས་དགེ་འདུན་པ་ཁག་ཅིག་གི་སྣེ་ཁྲིད་འོག ཕ་སྐད་གཙང་མ་ཞེས་པའི་དེབ་གསུམ་པ་པར་སྐྲུན་བྱས་ཏེ། དཔེ་དེབ་ ༦༠༠༠ ལྷག་རིན་མེད་ཐོག་མང་ཚོགས་དང་སློབ་གྲྭ་ཁག་ཏུ་འགྲེམ་སྤེལ་བྱེད་བཞིན་ཡོད་འདུག
གསར་འགོད་པ། དོན་གོ
ཕ་སྐད་གཙང་མ་དེ་དྲ་ཐོག་ཏུ་གཟིགས་ཐུབ་གི་ཨེ་ཡོད།
དེབ་དེ་མཐོང་ན་མ་གཏོགས་རིག་པ་འདོན་ཐུབ་ས་མ་རེད།
རང་མི་རིགས་ཀྱི་ཆེད་དུ་ཡོད་ཚད་བློས་བཏང་བྱེད་ཕོད་པའི་བོད་ནང་གི་གྲ་བཙུན་རྣམས་ཀྱིས་སེམས་ཤུགས་དང་མཛད་རྗེས་ལ་སྙིང་ཐོགས་པ་ནས་ཡིད་རངས་བྱེད་རྒྱུ་དང་། བོད་པ་ཡིན་ཚད་གྱིས་དེ་ལ་ཁ་ཙམ་མིན་པར་སྙིང་ཐོག་པ་ནས་རྒྱབ་སྐྱོར་དང་གུས་བཀུར་ཞུ་འོས།།
བོད་ནང་གི་བོད་པ་འདི་དག་གི་སྙིང་སྟོབས་དང་ཤ་ཞེན་ལ་རྗེས་སུ་ཡི་རངས་ཞུ།
ཕ་སྐད་གཙང་མ། མ་སྐད་གཙང་མ། བོད་སྐད་གཙང་མ་གསུམ་གང་དག་གམ།
ཆོལ་ག་དང་ལུང་ཚན་གྱི་ཕྱོགས་སུ་མ་སོང་བ་བོད་སྤྱིའི་སྐད་དང་ཐ་སྙད་གཅིག་གྱུར་གྱི་ཕ་སྐད་ཅིག་བསྐྱོན་ཐུབ་ན་དགེ་ཚན་ཆེ།
གྲྭ་བ་ཚོ་ང་ཚོའི་སྤྱི་ཚོགས་ཀྱི་མུན་པའི་སྒྲོན་མེ་ཡིན། ནམ་རྒྱུན་ཡིད་སྨོན་བྱེད་ས་དགེ་འདུན་པ་ཚོ་ཡིན། ཕྱག་ལས་ཅི་ཞིག་གནང་ཡང་མི་རིགས་འདིའི་ཆགས་འཇིག་ལ་འབྲེལ་བ་ཡོད། དགེ་འདུན་པ་ཚོ། གུས་ཕྱག་འཚལ། ཕ་སྐད་གཙང་མར་བཤད་ཀྱི་ཡིན། ས་མཐའ་ནས་མཐོ་ལས་ཕུན་ཚོགས་གཙོས་དགེ་འདུན་པ་ཚོ་སྙིང་ཐག་པ་ནས་རྗེས་སུ་ཡིད་རིང་ཞུ། བོད་རྒྱལ་ལོ།།།།
རྗེས་སུ་ཡི་རིང་བྱད་བཞིན་ཡོད།་ཐུགས་རྗེ་ཆེ།
ཕ་སྐད་གཙང་མར་འགྱུར་པར་གཙོ་བོ་འཁོར་ཡུག་གཙང་མ་ཞིག་དགོས།
གཞན་གྱི་རྒྱ་རིགས་རང་རིགས་ནས་བསྲེ་གང་ཐུབ་བྱས། རང་གི་རིགས་ཕྱི་ཡུལ་དུ་གཏོར་གང་ཐུབ་བྱས་ན།
འཁོར་ཡུག་དེ་ནམ་ཡང་གཙང་མར་ཆགས་མི་ཐུབ་།
དེ་བརྟན་སྐྱབས་བཅོལ་གཞུང་ལ་ཕ་སྐད་གཙང་མ་སྤྱོད་སའི་འཁོར་ཡག་ཐད་འགན་ཡོད
འདི་ཡང་ཕ་སྐད་གཅིག་གྱུར་གྱི་ལག་རྗེས་ཆེན་པོ་ཞིག་ཏུ་ངོས་འཛིན་ཆོག་ལ། བཙན་བྱོལ་ནས་ཐ་སྙད་གསར་སྒྲིག་བྱེད་བཞིན་པ་དག་གིས་ཀྱང་དཔེ་དེབ་འདི་དག་དང་གཤིབ་བསྡུར་བྱས་ཏེ། མ་འོངས་པའི་ཐ་སྙད་གཅིག་གྱུར་ཕྱོགས་སུ་འབད་རྒྱུ་ཡང་གལ་ཆེ་བར་འདོད། དེ་མིན་མཁས་མདོག་གི་རང་ལུགས་རེ་རེ་དྲུད་ཡོང་ཚེ། མ་འོངས་པར་སྐད་ཡིག་ཉམས་རྒུད་ཀྱི་རྐྱེན་དུ་མི་འགྲོ་བའི་ཉེན་ཁ་ཡང་གཏན་དུ་མེད་པ་མིན་ནོ།།