༧གོང་ས་མཆོག་ལ་གཟེངས་རྟཊ།

ཟླ་འདིའི་ཕྱི་ཚེས་ ༡༤ ཉིན་ཐེ་ཝན་གསར་འགྱུར་བརྒྱུད་ལམ་དུ་གནས་ཚུལ་སྤེལ་བ་ལྟར་ན། ཕྱི་ཚེས་ ༡༡ ཉིན་ཨ་རིའི་ནང་རྟེན་གཞི་བྱེད་པའི་འཛམ་གླིང་བྱམས་བརྩེ་དང་ཞི་བདེའི་ཚོགས་པ་ FOWPAL ཞེས་པ་དེས་  ༢༠༡༠ ལོའི་བྱམས་བརྩེ་དང་ཞི་བདེའི་མཛད་རྗེས་ཀྱི་གཟེངས་རྟགས་དེ་༸གོང་ས་མཆོག་ལ་ཕུལ་ཡོད་འདུག་ལ། དེ་ནི་༸གོང་ས་མཆོག་གིས་འཛམ་གླིང་ནང་བྱམས་བརྩེ་དང་ཞི་བདེ་བསྐྲུན་པའི་རླབས་ཆེན་གྱི་ཕྱག་ལས་གནང་བ་དང་། འཚེ་བ་མེད་པའི་ལམ་ནས་རྒྱལ་ཁབ་ཕན་ཚུན་གྱི་མཐུན་ལམ་གོང་མཐོར་བཏང་བ། འགྲོ་བ་མིའི་རིགས་ཀྱི་གཞི་རྩའི་རིན་ཐང་དང་ཁོར་ཡུག་སྲུང་སྐྱོབ།  ཆོས་ལུགས་ཕན་ཚུན་གྱི་མཐུན་ལམ་སོགས་རླབས་ཆེན་མཛད་འཕྲིན་ལ་བསྔགས་བརྗོད་དང་རྒྱབ་སྐྱོར་མཚོན་ཕྱིར་དུ་ཕུལ་བ་ཞིག་ཡིན་འདུག

ཨ་རིའི་ནང་རྟེན་གཞི་བྱེད་པའི་འཛམ་གླིང་བྱམས་བརྩེ་དང་ཞི་བདེའི་ཚོགས་པ་ཞེས་པ་དེ་ནི། ༢༠༠༠ ལོར་གསར་འཛུགས་བྱས་པའི་གཞུང་འབྲེལ་མིན་པའི་ཚོགས་པ་ཞིག་ཡིན་འདུག་ལ། ཚོགས་པ་འདིའི་ཡན་ལག་རྒྱལ་ཁབ་ཁག་ ༨༦ ཙམ་གྱི་ནང་ཡོད་པར་མ་ཟད། རྒྱལ་ཁབ་ ༦༩ ལྷག་གི་ཚོགས་མིའི་ཁྲོད་མཉམ་འབྲེལ་རྒྱལ་ཚོགས་ཀྱི་དཔོན་རིགས་དང་རྒྱལ་ཁབ་ཁག་གི་སྲིད་བློན་དང་སྲིད་འཛིན། ཨ་རིའི་གཞུང་ཚབ་ཆེན་མོ་དང་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་གྱི་མི་སྣ་ ༦ བཅས་གནད་ཡོད་མི་སྣ་ ༢༠༧ ལྷག་ཡོད་འདུག་ལ། ཚོགས་པའི་དམིགས་ཡུལ་གཙོ་བོ། འཛམ་གླིང་ནང་བྱམས་བརྩེ་དང་ཞི་བདེ་བསྐྲུན་མཁན་གྱི་མི་སྒེར་དང་ཚོགས་པ་ཁག་ལ་རྒྱབ་སྐྱོར་དང་སྐུལ་འདེད་བྱས་ཏེ། ད་ལྟའི་འཛམ་གླིང་གི་དཀའ་རྙོག་གང་མང་སེལ་ཐབས་ཀྱིས་མ་འོངས་པའི་མི་རབས་རྗེས་མར་ཞི་བདེ་དང་འཆམ་མཐུན་གྱི་འཛམ་གླིང་ཞིག་བསྐྲུན་ཆེད་ཡིན་འདུག  

གསར་འགོད་པ། དོན་གོ