ཁྱེད་ཚོའི་ལག་ཏུ་བོད་རང་བཙན་གཙང་མ་བཞག་ཡོད།

ཉེ་ཆར་བླ་མ་ཏེ་ལོ་རིན་པོ་ཆེ་མཆོག་གི་སྣེ་ཁྲིད་འོག ཨུ་རུ་སུའི་མངའ་འོག་སོག་རིགས་དད་ལྡན་ཆོས་ཞུ་བ་ཆིག་སྟོང་ལྷག་གིས་༧གོང་ས་མཆོག་གི་མདུན་ནས་གསུང་ཆོས་ཞུས་པ་དང་བསྟུན། ཏེ་ལོ་རིན་པོ་ཆེ་ཁོང་སྒེར་གྱི་ལོ་རྒྱུས་དང་འབྲེལ་བོད་སོག་གི་འབྲེལ་བའི་སྐོར་ལ་བཅར་འདྲི་ཞུས་ཡོད།  

དྲི་བ། རིན་པོ་ཆེ་མཆོག་གིས་ཐོག་མར་སོ་སོའི་སྐྱེས་ཁུངས་དང་འབྲེལ་འཚར་ལོངས་དང་སློབ་སྦྱོང་གི་བརྒྱུད་རིམ་སྐོར་ངོ་སྤྲོད་ཅིག་གནང་རོགས། 

ལན། ང་རང་གི་མི་རྒྱུད་ད་ལྟའི་སོག་པའི་ཁལ་མུག་ཟེར་བའི་མི་རྒྱུད་རེད། ཁལ་མུག་ཟེར་བ་དེ་སྔོན་མའི་བོད་ཀྱི་ལོ་རྒྱུས་ལྟར་ན། སོག་པོ་ཨོ་རོད་ཟེར་བ་དེ་རེད། དེང་སྐབས་ཁལ་མུག་ཟེར་གྱི་འདུག ཁལ་མུག་ཟེར་བ་དེ་ཁ་ཆེའི་སྐད་ནང་ཏཱ་ཏར་སི་ཐན་ཟེར་བ་དེ་རེད། ང་རང་སྐྱེས་ས་དེ་ཨ་རི་ཡིན། འཛམ་གླིང་དམག་ཆེན་གཉིས་པའི་རྗེས་ངའི་ཕ་མ་གཉིས་ཨ་རིར་སྐྱབས་བཅོལ་དུ་ཡོང་འདུག ང་རང་ཆུང་དུས་ནས་ཆོས་ལ་དགའ་བོ་ཡོད། སྐུ་འདྲ་དང་ཐང་ཀ་སོགས་ལྷ་རྟེན་ཆོས་གསུམ་དང་། བླ་མ་གྲྭ་བ། དགོན་པ་དང་ལྷ་ཁང་སོགས་ལ་མཇལ་སྐབས་སེམས་ལ་དགའ་སྣང་ཆེན་པོ་འདུག ཕ་མ་གཉིས་ལ་ང་རང་གྲྭ་བ་བྱ་རྒྱུ་ཡིན་ཟེར་ནས་རྙོག་དྲ་བཤད་ཡོད་ས་རེད། ༡༩༧༩ ལོར་༧གོང་ས་མཆོག་བྱང་ཨ་རི་ཁུལ་དུ་ཆིབས་སྒྱུར་བསྐྱངས་སྐབས། རྒྱལ་ས་ནེའུ་ཡོག་ཏུ་ངེད་ཚང་གི་ནང་མིར་མཇལ་ཁ་གནང་འདུག སྐབས་དེར་ངའི་ཕ་མ་གཉིས་ཀྱིས་༧གོང་ས་མཆོག་ལ་ཕྲུ་གུ་འདིར་གྲྭ་བ་བྱ་འདོད་འདུག་སྟབས། ག་འདྲ་བྱས་ན་ལེགས་ཚུལ་བཀའ་འདྲི་དགོངས་སྐོར་ཞུས་སྐབས། ༧གོང་ས་མཆོག་གིས་གྲྭ་བ་བྱ་མིན་གཙོ་བོ་ཁྱེད་རང་གཉིས་ཀྱིས་ལྟོས། གལ་སྲིད་གྲྭ་བ་བྱ་རྒྱུ་ཡིན་ན་ཨ་རི་ནས་ཡོང་གི་མ་རེད། དེ་བས་རྒྱ་གར་ནང་བསྐྱལ་ན་དགའ་རྒྱུ་རེད་ཅེས་ལམ་སྟོན་གནང་འདུག དེ་ནས་ ༡༩༨༠ ལོར་ང་རང་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་ལ་བསྐྱལ་ཏེ་གྲྭ་བ་བྱེད་དུ་བཅུག་ཀྱང་། ཟླ་བ་ལྔ་དྲུག་ཕྱིན་མ་ཐག་ཏེ་ལོ་པའི་ཡང་སྲིད་རེད་ཟེར་ནས་ངོས་འཛིན་གནང་བ་རེད།

དྲི་བ། སྐུ་ཉིད་ཏེ་ལོ་རིན་པོ་ཆེའི་ཡང་སྲིད་དུ་ངོས་འཛིན་གནང་ལུགས་གང་འདྲ་ཡིན་ནམ། 

ལན། དེའི་བརྒྱུད་རིམ་གང་འདྲ་རེད་ཟེར་ན། ང་ཆུང་དུས་ཨ་རིར་སྡོད་སྐབས་ནས་ཆོས་ལ་དད་པ་དང་། སྐུ་གསུང་ཐུགས་རྟེན་རིགས་མཐོང་སྐབས་དགའ་བོ་བྱེད་མཁན་ཞིག་ཡིན་རབས་འདུག རྗེས་སུ་འབྲས་སྤུངས་ཀྱི་ཆོས་སྒོར་ཞུགས་སྐབས། གྲྭ་ཚང་གི་བླ་མ་མཁན་པོ་དང་། དགེ་བཤེས་ཚོས་ང་ཕྲུ་གུ་གཞན་དང་ཅུང་མ་འདྲ་བ་ཞིག་ཏུ་མཐོང་སྟེ། ༡༩༨༠ ལོའི་དབྱར་ཁར་༧གོང་ས་མཆོག་ལྷོ་ཕྱོགས་མོན་གྷོ་ཊིར་ཕེབས་ཏེ་གྲུབ་མཐའ་ཆེན་མོའི་བཀའ་ཁྲིད་གནང་སྐབས། གྲྭ་ཚང་གི་མཁན་རིན་པོ་ཆེ་ཡིས་༧གོང་ས་མཆོག་ལ་གནས་ཚུལ་ཞུས་འདུག སྐབས་དེར་༧གོང་ས་མཆོག་གིས་འདས་པའི་ལོ་བཅོ་ལྔ་ཡས་མས་ནང་སོག་པོའི་བླ་མ་མཁན་པོ་དང་། མཁས་པ་དགོངས་པ་རྫོགས་ཟིན་པ་དག་གི་མཚན་གཞུང་ཞིག་འཁྱེར་ཤོག་གསུངས་ཏེ་མི་ ༡༥ ཡི་མཚན་ཐོ་ཞིག་ཕུལ་འདུག ༧གོང་ས་མཆོག་གིས་མཚན་ཐོ་དེ་དག་ལ་གཟིགས་པའི་རྗེས་སུ་ཏེ་ལོ་རིན་པོ་ཆེ་ཡི་ཡང་སྲིད་དུ་ངོས་འཛིན་བྱས་པ་རེད།

དྲི་བ། ཨུ་རུ་སུའི་འོག་གི་སོག་རིགས་ཁྲོད་རིན་པོ་ཆེ་མཆོག་ལ་མཚན་གནས་གང་འདྲ་ཞིག་ཡོད་པ་དང་། ད་ཆར་རིན་པོ་ཆེ་མཆོག་གིས་ཁལ་མུག་ནང་ཕྱག་ལས་གཙོ་བོ་ག་རེ་གནང་གི་ཡོད་དམ། 

ལན། ༡༩༩༣ ལོ་ཙམ་ནས་ང་རང་གིས་ཨུ་རུ་སུའི་མངའ་འོག་གི་ཁལ་མུག་སྤྱི་མཐུན་རྒྱལ་ཁབ་ཀྱི་ནང་པའི་དབུ་ཁྲིད་ཟེར་ན་འདྲ། ནང་པའི་ཆོས་ཀྱི་ཁྲི་པའི་མཚན་ཐོག་ནས་ལས་ཀ་བྱེད་ཀྱིན་ཡོད། ༡༩༩༡ ལོར་༧གོང་ས་མཆོག་ཐོག་མར་ཁལ་མུག་ལུང་པར་ཆིབས་བསྒྱུར་བསྐྱངས་སྐབས་ང་སྐུ་བཅར་དུ་ཁྲིད་བསྡད་ཡོད་པ་རེད། ༡༩༩༢ ལོར་ཐེངས་གཉིས་པ་ཕེབས་ཡོད། དུས་ཚོད་གང་འཚམ་རིང་དམར་པོའི་དབང་སྒྱུར་འོག་སོག་པོའི་ཆོས་ལུགས་ལ་ཉམས་ཆག་ཆེན་པོ་ཕྱིན་ཡོད་ཀྱང་། ༧གོང་ས་མཆོག་སྔ་ཕྱི་ཐེངས་གཉིས་ཕེབས་པ་ནས་བཟུང་ཁལ་མུག་ཏུ་ནང་ཆོས་ཉམས་པ་སླར་གསོ་བྱ་རྒྱུའི་གསོན་ཤུགས་རྒྱས་པ་རེད། སྐབས་དེར་ནང་ཆོས་སླར་གསོ་བྱེད་པར་མགོ་ཁྲིད་ཅིག་དགོས་པ་རེད་ཟེར་ནས་མང་མོས་ཐོག་ང་རང་བདམས་པ་རེད། དེ་ནི་ང་ལ་མཚོན་ན་ཧ་ཅང་གློ་བུར་བ་ཞིག་རེད། གང་ཡིན་ཟེར་ན། སྐབས་དེར་ངས་སློབ་སྦྱོང་བྱེད་བཞིན་པ་རེད། དགེ་བཤེས་གཏོང་རྒྱུ་ལྷག་བསྡད་ཡོད་ཀྱང་། བསམ་བློ་གཏོང་ལོང་ཙམ་ཡང་མ་བྱུང་བར་ལས་འགན་དེ་ཕྲག་ཏུ་བབས་སོང་། ད་ལྟའི་ཆར་ཁལ་མུག་ཡོངས་སུ་དགོན་པ་ཆེ་ཆུང་ ༢༨ ཙམ་གསར་བཞེངས་བྱས་ཡོད་ལ། སྔར་གྱི་ལོ་རྒྱུས་ཐོག་གི་དགོན་ཤུལ་དག་ལ་དྲན་རྟེན་གྱི་མཆོད་རྟེན་དང་མ་ཎི་ལྷ་ཁང་སོགས་བཞེངས་ཡོད། གཞན། རྒྱ་གར་ལ་ལོ་ལྟར་སློབ་ཕྲུག་མང་པོ་བཏང་སྟེ། གདན་ས་ཁག་གཙོས་པའི་ངྷ་རམ་ས་ལའི་སྨན་རྩིས་ཁང་དང་ཝ་རཱ་ན་སི། ནོར་གླིང་། ས་རཱ། ལྷ་བྲིས་སྡེ་ཚན་དང་དཔེ་མཛོད་སོགས་ཀྱི་བསྟི་གནས་མང་པོ་ཞིག་ཏུ་སློབ་གཉེར་གནང་གི་ཡོད། ཁོང་ཅག་བརྒྱུད་དེ་མ་འོངས་པར་བོད་པའི་ཆོས་དང་རིག་གཞུང་མང་པོ་ཞིག་ཡིག་བསྒྱུར་བྱ་རྒྱུར་འཆར་གཞི་འདིང་གི་ཡོད།

དྲི་བ། དེང་སྐབས་ཨུ་རུ་སུའི་འོག་སོག་རིགས་ག་ཚོད་ཡོད་པ་དང་། སྤྱི་ཡོངས་ནས་ནང་ཆོས་ཀྱི་ཁྱབ་ཤུགས་གང་འདྲ་ཡོད་དམ། 

ལན། སོག་རིགས་ཞེས་ལབ་པ་ཡིན་ན་རྒྱ་ཆེན་པོ་རེད། ད་ཆར་དབྱེ་བ་མང་པོ་ཞིག་ཆགས་ཡོད། སྤྱི་ཡོངས་ནས་སོག་པོ་ཟེར་ན་སོག་པོའི་རྒྱལ་ཁབ་ལ་གོ་དགོས་པ་རེད། དེ་ལ་སྐད་ལོགས་སུ་ཡོད་ཀྱང་། ཡི་གེ་ལ་འགྱུར་བ་ཐེབས་ཏེ། ཨུ་རུ་སུའི་ཡི་གེ་དང་གཅིག་པ་ཆགས་ཡོད། ཨུ་རུ་སུའི་འོག་ཡོད་པའི་སོག་རིགས་ནི་ཁལ་མུག་དང་བྷོ་རི་ཡ། ཐོ་བ་གསུམ་རེད། འདི་དག་གིས་སོ་སོའི་ཡི་གེ་བརླགས་ཟིན་པ་མ་ཟད་སྐད་ཀྱང་བརླགས་ཚར་བ་རེད། ཁལ་མུག་ལ་མཚོན་ན། ལོ་ན་བགྲེས་པོ་རེ་ཟུང་མ་གཏོགས་ཁལ་མུག་སྐད་ཤེས་མཁན་ཡོད་པ་མ་རེད། སྐད་ཡིག་ཇི་ལྟར་ཉམས་པ་རེད་ཟེར་ན། སྔར་ཨུ་རུ་སུ་དམར་པོའི་བཙན་གནོན་འོག་ཡུན་རིང་བསྡད་པ་དང་། རྒྱ་ནག་གི་འོག་ཏུ་ཡོད་པའི་སོག་པོ་དང་ཨུ་རུ་སུའི་འོག་ཏུ་ཡོད་པའི་སོག་པོ་གཉིས་ཕན་ཚུན་འབྲེལ་བ་ཆད་པ་བཅས་ལ་བརྟེན་ཏེ་ཉམས་སོང་བ་རེད། ཨུ་རུ་སུའི་མངའ་འོག་ཏུ་སོག་རིགས་ས་ཡ་གཅིག་མ་ཟིན་ཙམ་ཡོད། དེ་དག་ཁལ་མུག་ལ་མི་འབོར་འབུམ་གསུམ་ལྷག་ཡོད་ཀྱང་། དེའི་ཁྲོད་ཀྱི་བརྒྱ་ཆ་ ༦༥ ཙམ་ཁལ་མུག་མི་རིགས་གཙང་མ་ཡིན་ཡང་། བརྒྱ་ཆ་ ༣༠ ཙམ་ཨུ་རུ་སུའི་མི་རིགས་དང་། དེའི་འཕྲོས་མི་རིགས་ཁ་ཐོར་རེད། ཐོ་བ་ལ་ཡང་མི་འབོར་འབུམ་གསུམ་ཡས་མས་ཡོད་ལ། མི་འབོར་གྱི་བརྒྱ་ཆ་ ༧༠ ལྷག་ཙམ་ཁོ་རང་ཚོའི་མི་རིགས་གཙང་མ་རེད། བྷོ་རི་ཡ་ཆ་བཞག་ན་ཁོ་རང་ཚོའི་མི་རིགས་དེ་བརྒྱ་ཆ་ ༣༠ ལྷག་ལས་ཡོད་པ་མ་རེད། ཨུ་རུ་སུའི་མངའ་འོག་ཏུ་ཡོད་པའི་སོག་རིག་སྤྱི་མཐུན་རྒྱལ་ཁབ་གསུམ་ཆ་ནང་པའི་རྒྱལ་ཁབ་ཡིན་པར་ངོས་ལེན་བྱེད་ཀྱི་ཡོད་ཀྱང་། ཨུ་རུ་སུའི་རྩ་ཁྲིམས་ནང་ཆོས་ལུགས་ཆེན་པོ་བཞི་བཀོད་ཡོད། དེ་དག་ར་ཤུ་ཡའི་ཡེ་ཤུ་དང་ཁ་ཆེ། འཇིའུ། ནང་པ་བཅས་རེད།

དྲི་བ། རིན་པོ་ཆེ་མཆོག་གིས་ལོ་རྒྱུས་ཐོག་གི་བོད་སོག་གི་འབྲེལ་བ་དེ་གང་འདྲ་ཞིག་ལ་ངོས་འཛིན་གནང་གི་ཡོད་དམ།

ལན། བོད་སོག་གཉིས་བར་གྱི་འབྲེལ་ལམ་དེ་ཐོག་མ་ཆོས་ཕྱོགས་ཀྱི་འབྲེལ་བ་མ་རེད། སོག་པོའི་ཇུན་གར་རྒྱལ་པོས་སྣེ་ཁྲིད་དེ་ཁོ་རང་གི་བུ་དང་ཚ་བོ་སོགས་ཀྱིས་འཛམ་གླིང་ལ་དབང་སྒྱུར་བྱ་རྒྱུའི་དམིགས་ཡུལ་ཆེན་པོ་བཟུང་ཡོད། འཆར་གཞི་དེའི་ཐོག་ནས་བོད་དུ་བསླེབས་པ་རེད། སྐབས་དེར་བོད་ནང་ཆོས་ལུགས་ཤུགས་ཆེན་པོ་རེད། བོད་པ་ཚང་མ་ཆོས་ཕྱོགས་ལ་རྒྱུག་བསྡད་ཡོད་པ་རེད། རིམ་གྱིས་ས་པཎ་སོག་ཡུལ་དུ་ཕེབས་ཏེ་སོག་ཡུལ་དུ་ནང་པའི་བསྟན་པ་ངོ་སྤྲོད་གནང་ཞིང་། སོག་རིགས་མང་པོ་ནང་པར་བསྒྱུར་ཏེ་ཆོས་ཕྱོགས་ཀྱི་འབྲེལ་བ་བྱུང་ཞིང་། རིམ་གྱིས་བླ་སློབ་གྱི་འབྲེལ་བ་གཏིང་ཟབ་ཏུ་ཕྱིན་པ་རེད། སྐབས་དེར་བོད་ནང་ཁུལ་དུ་འཐབ་འཁྲུག་དང་རྙོག་འཛིང་མང་པོ་བྱུང་སྟེ། བོད་པའི་སྤྱི་ཚོགས་ནང་འཚར་ལོངས་བྱུང་བའི་སོག་རིགས་ལྷ་བཟང་ཁཱང་གིས་བོད་པ་རྡོག་རྩ་གཅིག་སྒྲིལ་དང་། བོད་རང་བཙན་བཙང་མའི་རྒྱལ་ཁབ་ཅིག་བཟོས་ཤིང་། དེའི་རྗེས་བོད་པར་གཞུང་གསར་པ་དགའ་ལྡན་ཕོ་བྲང་ཕྱོགས་ནས་རྣམ་རྒྱལ་བཙུགས་ཏེ། ༧གོང་ས་ལྔ་བ་ཆེན་པོར་ཕུལ་བ་རེད། ཐོག་མའི་དབང་སྒྱུར་གྱི་ཧམ་སེམས་ནས་ཆོས་ཕྱོགས་ཀྱི་འབྲེལ་བ་ཆགས་ཤིང་། མཐར་བོད་སོག་གི་འབྲེལ་ལམ་དེ་ཆབ་སྲིད་ཀྱི་ངོ་བོར་གྱུར་བ་རེད། བོད་སོག་གི་འབྲེལ་བ་དེ་རྒྱལ་ཁབ་དང་མི་རིགས་གཞན་པའི་ཁེ་ཕན་གྱི་འབྲེལ་བ་དང་བསྡུར་ཐུབ་ཡོད་པ་མ་རེད།

དྲི་བ། ཐེངས་འདིར་ཁྱེད་ཅག་སོག་རིགས་ཆིག་སྟོང་ལྷག་བཞུགས་སྒར་ངྷ་རམ་ས་ལར་བཅར་ཏེ། ༧གོང་ས་མཆོག་གི་མདུན་ནས་བཀའ་ཆོས་ཞུས་པའི་སྐོར་ངོ་སྤྲོད་ཅིག་གནང་རོགས། 

ལན། ང་ཚོའི་ལུང་པར་སངས་རྒྱས་བསྟན་པ་སླར་གསོ་དང་གོང་འཕེལ་ཏུ་གཏོང་བར་ཆོས་ཀྱི་ཤེས་ཡོན་དང་། ཆོས་ལུགས་འཛིན་སྐྱོང་གི་ཉམས་མྱོང་མང་པོ་ཞིག་དགོས་པ་རེད། དེར་བརྟེན། ༧གོང་ས་མཆོག་སྐུ་འཚོ་བཞུགས་རིང་ང་ཚོས་གང་ཐུབ་ཐུབ་ཀྱིས་དབང་ལུང་མན་ངག་གི་གདམས་པ་མང་པོ་ཞིག་ལེན་ཐུབ་རྒྱུའི་གོ་སྐབས་ལེན་དགོས་པ་རེད། འདས་པའི་ལོ་མང་རིང་༧གོང་ས་མཆོག་ཨུ་རུ་སུར་གདན་འདྲེན་ཞུ་རྒྱུར་ཐབས་ཤེས་མང་པོ་བྱས་ཀྱང་། ཆབ་སྲིད་ཀྱི་དཀའ་ངལ་འོག་ང་ཚོས་འདོད་དོན་འགྲུབ་ཀྱི་ཡོད་པ་མ་རེད། དེར་བརྟེན། ལོ་རེ་བཞིན་ང་ཚོའི་ཆོས་ཞུ་བ་མང་པོ་ཞིག་རྒྱ་གར་ནང་ཚུར་གདན་འདྲེན་ཞུས་ཏེ་གོ་སྐབས་ལེན་བཞིན་ཡོད། སྔར་ལོ་མི་ ༨༠༠ ཙམ་འདིར་ཡོང་བ་རེད། ད་ལོ་མི་ཆིག་སྟོང་ཉིན་བརྒྱ་ལྷག་ཡོང་ཡོད། དེ་དག་ཁལ་མུག་དང་བྷོ་རི་ཡ། ཐོ་བ་གཙོ་བྱས་ཏེ་སོག་རིགས་ཙམ་མ་ཡིན་པར། ཨུ་རུ་སུའི་ལུང་པ་མང་པོ་ནས་སླེབས་འདུག ལོ་རྗེས་མར་ཡང་༧གོང་ས་མཆོག་ལ་གསུང་ཆོས་ཞུས་པ་ལྟར་ཞལ་བཞེས་ཐོབ་སོང་། ཐེངས་འདིར་གསུང་ཆོས་ཙམ་དུ་མ་ཟད་ཟུར་དུ་དྲི་བ་དྲིས་ལན་གྱི་གོ་སྐབས་ཀྱང་གནང་སྟེ་ཆོས་ཞུ་བ་རྣམས་ཧ་ཅང་དགའ་བོ་བྱུང་འདུག 

དྲི་བ། སྐུ་ཉིད་ཀྱིས་བོད་པའི་རྩ་དོན་འཐབ་རྩོད་ཀྱི་ལངས་ཕྱོགས་ཐད། བོད་རང་བཙན་ཐོག་འབད་བརྩོན་གནང་དགོས་སྐོར་གསུང་གི་ཡོད་པའི་རྒྱུ་མཚན་གང་ཡིན་ནམ། 

ལན། ང་རང་གིས་བོད་རང་བཙན་ཐོག་བསྐྱོད་དགོས་ཀྱི་འདུག་ཟེར་དོན་གང་ཡིན་ཟེར་ན། ང་ཚོའི་ཁལ་མུག་གཙོས་པའི་སོག་པོའི་ལུང་པའི་ལོ་རྒྱུས་ལ་བལྟས་ཏེ་བཤད་ཀྱི་ཡོད། འདས་པའི་ཉམས་མྱོང་གཞི་ལ་བཞག་སྟེ་ཁ་སང་དེ་རིང་གི་གནས་སྟངས་དངོས་བཤད་ཀྱི་ཡོད། གནས་བབ་དེ་གཉིས་ལ་བལྟས་ཏེ་བོད་ཀྱི་མ་འོངས་པ་དེ་གང་འདྲ་ཞིག་ཆགས་ཡོང་ངམ་སྙམ་པའི་སེམས་འཚབ་ཅིག་གི་ཐོག་ནས་བཤད་ཀྱི་ཡོད། སྤྱིར་བཏང་༧གོང་ས་མཆོག་གི་དགོངས་པ་བཞེས་ཕྱོགས་དང་། དབུ་མའི་ལམ་གྱི་དགོངས་དོན་དེ་རྒྱ་ཆེན་པོ་ཞིག་དང་གཏིང་ཟབ་པོ་ཞིག་ཡིན་ཡང་། ལམ་ཁ་འདི་ལ་ཕྱིན་པ་ཡིན་ན་བོད་པའི་ཆོས་དང་རིག་གཞུང་། སྐད་ཡིག་གོམས་སྲོལ་སོགས་སྲུང་སྐྱོབ་བྱ་རྒྱུ་ཡིན་ཟེར་བ་དེ་ཕལ་ཆེར་ཁག་པོ་རེད། ད་ལྟ་ཁལ་མུག་ལུང་པ་ཡང་རང་སྲིད་རང་སྐྱོང་ཡིན་ཡང་། རྒྱལ་ཁབ་གཞན་ཞིག་གི་སྒྲོམ་གཞིའི་ནང་སྡོད་དགོས་དུས་སོ་སོའི་སྐད་ཡིག་རིག་གཞུང་ལ་འཛིན་སྐྱོང་གཙང་མ་ཞིག་ཡོང་རྒྱུ་དེ་རྨི་ལམ་ཙམ་རེད། རྒྱུ་མཚན་འདི་དག་ལ་གཞིགས་ཏེ་ངས་བོད་རང་བཙན་ཐོག་འབད་བརྩོན་གནང་རོགས་ཟེར་གྱི་ཡོད། ལོ་རྒྱུས་ཀྱི་ཐད་ནས་ཀྱང་ང་ཚོས་བོད་རང་བཙན་ལ་རྒྱབ་སྐྱོར་བྱེད་འོས་པ་ཞིག་ཆགས་ཡོད། གང་ཡིན་ཟེར་ན། སྔར་སོག་པོས་བོད་རང་བཙན་གཙང་མ་ཞིག་༧གོང་ས་ལྔ་བ་ཆེན་པོར་ཕུལ་བ་རེད། ང་ཚོས་མཉམ་རུབ་ཐོག་དེ་ལ་རྩོད་ལེན་བྱ་དགོས་པ་ཞིག་ཆགས་ཡོད།

གསར་འགོད་པ། དོན་འགྲུབ་བཀྲ་ཤིས།