ཕ་
དེ་རིང་སྔ་དྲོར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོ་སྒྲིག་འོག བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་ཉེ་ཆར་བོད་ནས་གསར་དུ་འབྱོར་ཞིང་། ༢༠༠༩ ལོའི་ཕྱི་ཟླ་ ༡༡ པའི་ཚེས་ ༡༠ ཉིན་ཁམས་དཀར་མཛེས་ཁུལ་སྡེ་དགེ་རྫ་ཁོག་དགོན་གསར་དུ་བོད་ཀྱི་རྒྱལ་དར་དང་སྤྱར་ཡིག་བཀྲམས་མཁན་གྱི་དགེ་འདུན་པ་བློ་བཟང་ནོར་བུ་དང་མཁས་གྲུབ་རྒྱ་མཚོ། ཀུན་དགའ་རིན་ཆེན་གསུམ་གྱིས་ཞི་རྒོལ་གྱི་སྔ་ཕྱིའི་གནས་ཚུལ་དང་། ད་ལྟའི་བོད་ནང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་སྐོར་གྱི་གནས་ཚུལ་ཁག་ཅིག་གི་ཐད། གསར་འགོད་གསལ་བསྒྲགས་གནང་ཡོད།
གསར་འགོད་གསལ་བསྒྲགས་ཐོག་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་བོད་མི་ཞི་རྒོལ་བ་གསུམ་གྱི་ལོ་རྒྱུས་ངོ་སྤྲོད་གནང་རྗེས། གྲྭ་བློ་བཟང་ནོར་བུ་ལགས་ཀྱིས་འདས་པའི་ལས་འགུལ་གྱི་བྱུང་རིམ་སྐོར་ནས་བརྗོད་དོན། བོད་ནང་ལ་མཚོན་ན་འདས་པའི་ལོ་ངོ་དུ་མའི་རིང་ནས་བཟུང་རྒྱ་གཞུང་གིས་དམ་དྲག་འོག་བོད་ས་ཁྱོན་ཡོངས་སུ་འགྲོ་བ་མིའི་ཐོབ་ཐང་དང་ཆོས་ལུགས་དད་མོས། སྨྲ་བརྗོད་རང་དབང་སོགས་ཕྱོགས་ཡོངས་ལ་དམ་དྲག་དང་རང་དབང་རྩ་བ་ནས་མེད་པ་ལྟར། ང་ཚོ་དགེ་འདུན་པ་ ༢༠༠ ལྷག་ཡོད་པའི་དགོན་གསར་དགོན་པར་མཚོན་ནའང་། རྒྱལ་བའི་ཞབས་རྟེན་དང་ཁོང་གི་སྐུ་པར་བཤམ་པ་སོགས་ཀྱི་ཐད་ལ་དམ་དྲག་དང་བྱས་པར་མ་ཟད། དགོན་པའི་གྲྭ་བ་ ༦༠ ལྷག་དགོན་པ་ནས་ཕྱིར་ཕུད་བཏང་སྟེ་རང་ཡུལ་དུ་ལོག་བཅུག་པ་སོགས་སུན་གཙེར་དང་དྲག་གནོན་རབ་དང་རིམ་པ་བྱས་པ་རེད།
ཐབས་གདུག་གི་གནས་སྟངས་དེ་དག་གི་ཐད། ང་ཚོའི་དགོན་པའི་རྒན་བློ་བཟང་མཐའ་ཡས་དང་ཁྲི་ཟུར་བཀྲ་རྒྱ་གཉིས་གཙོས་དགེ་འདུན་པ་ཁག་ཅིག་གིས་ངོ་རྒོལ་སྐད་འབོད་བྱས་པར་བརྟེན། ཁོང་གཉིས་ལ་ལོ་ ༦ དང་ལོ་ ༢ ཀྱི་ཁྲིམས་ཐག་བཅད་པ་དང་། ཕྱིས་སུ་དགོན་པའི་གྲྭ་བ་ཡོངས་ཀྱིས་ངོ་རྒོལ་སྐད་འབོད་བྱས་པའི་སྐབས་སུ་འང་གྲྭ་བ་ ༡༡ འཛིན་བཟུང་བྱས་ཏེ་ལོ ༥ ནས་ལོ་ ༣ བར་གྱི་ཁྲིམས་ཐག་བཅད་པ་སོགས་ཡ་ང་བའི་གནས་ཚུལ་མང་དག་ཅིག་བྱུང་བ་རེད། གནས་སྟངས་དེ་དག་ལ་གཞིགས་ཏེ། ང་ཚོ་གསུམ་མཉམ་རུབ་ཀྱིས་ང་ཚོ་ལ་འགྲོ་བ་མིའི་ཐོབ་ཐང་དང་ཆོས་དད། སྨྲ་བརྗོད་རང་དབང་། ༸གོང་ས་མཆོག་བོད་ལ་ཕེབས་ཏུ་འཇུག་དགོས། བོད་ལ་རང་དབང་དགོས་ཞེས་བྲིས་ཏེ་སྤྱར་ཡིག་བཀྲམས་པར་མ་ཟད། བོད་ཀྱི་རྒྱལ་དར་ ༤༠ དཔར་བསྐྲུན་བྱས་ཏེ་སྦྱར་ཡིག་དང་མཉམ་དུ་ཞང་སྲིད་གཞུང་ནང་རྒྱ་དར་གཉིས་དང་དགོན་གསར་དགོན་པའི་ནང་རྒྱ་དར་གཅིག་བཅས་བསྒྲེངས་འཛུགས་བྱས་པ་ཡིན་ལ། དགོན་པའི་གྲྭ་གཞན་ལ་སུན་གཙེར་དང་མནར་གཅོད་མི་ཡོང་ཆེད་མཇུག་ཏུ་ངེད་གསུམ་གྱི་མིང་ཡང་བཀོད་དེ། སྦྱར་ཡིག་དང་རྒྱ་དར་བསྒྲེངས་འཛུགས་བྱས་པ་ཡིན། ཞེས་ལས་འགུལ་གྱི་བརྒྱུད་རིམ་ངོ་སྤྲོད་གནང་བྱུང་ལ།
ཡང་ཁོང་གིས། ༢༠༠༩ ལོའི་ཕྱི་ཟླ་ ༡༡ པའི་ཚེས་ ༡༠ ཉིན་སྤྱར་ཡིག་དང་རྒྱ་དར་བསྒྲེངས་རྗེས་ངེད་གསུམ་གྱིས་རང་ཡུལ་ནས་འདུག་ཐབས་མེད་པ་ཤེས་ཏེ་རི་བྱོལ་དུ་ཕྱིན་པ་ཡིན། ཕྱིས་སུ་རྒྱ་ནག་གཞུང་གིས་ངེད་གསུམ་འཛིན་བཟུང་བྱས་ཏེ་རྩིས་སྤྲོད་བྱེད་མཁན་གྱི་མི་ཡོད་ཚེ་རྒྱ་སྒོར་ཁྲི་ ༢ སྤྲོད་རྒྱུའི་ཁྱབ་བསྒྲགས་བྱས་འདུག་ལ། རྗེས་སུ་ང་ཚོ་གར་ཡོད་ཀྱི་གནས་ཚུལ་ཅི་ཡང་མ་ཤེས་བར་ཡུན་རིང་ཕྱིན་རྗེས་རྒྱ་སྒོར་ཁྲི་ ༥ སྤར་ཏེ་བྱ་དགའ་སྤྲོད་རྒྱུའི་ཁྱབ་བསྒྲགས་བྱས་ཡོད་པའི་གནས་ཚུལ་ངེད་གསུམ་རི་བྱོལ་བྱེད་སའི་འབྲོག་ཁུལ་གྱི་འབྲེལ་ཡོད་བོད་མི་ཞིག་གིས་བརྗོད་བྱུང་། རྗེས་སུ་ང་ཚོ་གར་ཡོད་ཀྱི་གནས་ཚུལ་མ་ཤེས་སྟབས། རྒྱ་གཞུང་གིས། ངའི་ཕ་རྒན་དང་ཁོང་གཉིས་ཀྱི་གཅིག་གི་ཕ་དང་གཅིག་གི་མ་བཅས་རང་ཁྱིམ་ནས་བཙན་འཁྲིད་བྱས་ཏེ། ཟླ་ ༢ ལྷག་གི་རིང་དམག་མི་ ༣༠༠ ལྷག་ལ་འབུད་ཤིང་འཐུ་བ་དང་ཆུ་ལེན་པ། ཟས་གཡོར་སྦྱོར་སོགས་ཀྱི་གཡོག་པོར་བཀོད་སྦྱོད་བྱས་པར་མ་ཟད། ཕ་རྒན་ལ་མནར་གཅོད་དང་སུན་གཙེར་འདྲ་མིན་བཟོས་ཏེ་རྨས་སྐྱོན་ཕོག་རྗེས་ཀློད་གྲོལ་བཏང་འདུག་ལ། ཕྱིར་རང་ཁྱིམ་དུ་ལོག་ཏེ་ཉིན་ ༢ འགོར་རྗེས་ངའི་ཕ་རྒན་འདས་གྲོངས་སུ་ཕྱིན་འདུག གནས་ཚུལ་དེ་དག་གོ་རྗེས་ང་ཚོ་ཕྱིར་ལོག་པའི་ལམ་ཁ་མེད་པ་གསལ་བོར་ཤེས་ཏེ་བལ་ཡུལ་སྣེ་ལེན་ཁང་དུ་མ་འབྱོར་བར་དུ་ལོ་གཅིག་མ་ཟིན་ཙམ་ལ་ལྟོགས་སྐོམ་དང་གྲང་ངར་སོགས་ཀྱི་དཀའ་སྡུག་མང་པོ་ཞིག་མྱངས་ཏེ། ནང་མི་སོགས་ལ་ཐུག་འཕྲད་ཀྱི་གོ་སྐབས་གཅིག་ཀྱང་མ་བྱུང་བར་རི་བྱོལ་བྱས་ནས་བསྡད་པ་ཡིན། ཞེས་བརྗོད་བྱུང་།
མཐའ་མར་ཁོང་གིས། འདི་ལོ་ཕྱི་ཟླ་ ༧ པའི་ནང་ངེད་གསུམ་གྱིས་སེམས་ཐག་གཙང་བཅད་ཀྱིས་རྒྱ་གར་ལ་ཡོང་རྒྱུ་བྱས་པ་ཡིན། ཟླ་ ༡༠ བའི་ཚེས་ ༧ ཉིན་ལྷ་སར་འབྱོར་རྗེས་ཕ་ཡུལ་དཀར་མཛེས་ནས་ཡིན་པའི་བོད་མི་ཞིག་གི་རོགས་རམ་ལ་བརྟེན་ནས་ཉིན་གྲངས་ ༢༣ རིང་ཤར་ཁམ་བུ་བརྒྱུད་དེ་བལ་ཡུལ་ལ་འབྱོར་སོང་། མ་འོངས་པར་ང་ཚོ་གདན་ས་ཁག་ཏུ་ཕྱིན་ཏེ་སློབ་གཉེར་བྱ་འཆར་ཡིན་ལ། དེ་དང་སྟབས་བསྟུན་ཏེ་བོད་ནང་གི་བོད་མི་ཚོའི་མངོན་འདོད་བསྒྲུབ་ཐབས་ལ་རང་ངོས་ནས་འབད་པ་བྱ་འཆར་ཡོད། ཅེས་བརྗོད་བྱུང་།
རང་ལོ་ ༣༠ ཡིན་པའི་གྲྭ་བློ་བཟང་ནོར་བུ་དང་རང་ལོ་ ༢༤ ཡིན་པའི་མཁས་གྲུབ་རྒྱ་མཚོ། རང་ལོ་ ༢༦ ཡིན་པའི་གྲྭ་ཀུན་དགའ་རིན་ཆེན་བཅས་གསུམ་ནི་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང་རྫ་ཁོག་ཤང་ཁོངས་སུ་ཡོད་པའི་དགོན་གསར་དགོན་པའི་གྲྭ་བ་ཡིན་ཞིང་། ༢༠༠༩ ལོར་སྦྱར་ཡིག་དང་བོད་ཀྱི་རྒྱལ་དར་བསྒྲེངས་འཛུགས་བྱས་པའི་དབང་གིས་ལོ་གཅིག་མ་ཟིན་ཙམ་གྱི་རིང་རི་བྱོལ་བྱས་མཐར་ད་ལོའི་ཟླ་ ༡༡ པའི་ཚེས་ ༡༥ ཉིན་བཞུགས་སྒར་དུ་འབྱོར་ཡོད་ལ། དེ་རིང་གསར་འགོད་གསལ་བསྒྲགས་ཀྱི་གོ་སྐབས་དང་སྟབས་བསྟུན་ཏེ་བོད་ཀྱི་གཞོན་ནུ་ལྷན་ཚོགས་དང་དགུ་བཅུ་གསུམ་ལས་འགུལ་ཚོགས་པ། བོད་ཀྱི་བུད་མེད་ལྷན་ཚོགས་བཅས་ཀྱིས་ཁོང་གསུམ་ལ་འཚམས་འདྲི་དང་སྦྲགས་ཁོང་ཅག་གི་སྙིང་སྟོབས་དང་ལྷག་བསམ་ལ་ཆེ་མཐོང་གི་ཁ་བཏགས་སྒྲོན་འབུལ་ཞུས་ཡོད།
གསར་འགོད་པ། དོན་གོ
སྙིང་ནས་བཀྲིས་བདེ་ལེགས་དཔའ་བོ་གསུམ་་་་་་་་་་་་་་་་་ཁྱོད་གསུམ་དང་ཁྱོད་གསུམ་འདྲ་བའི་བོད་རིགས་དཔའ་བོ་དང་དཔའ་མོ་ཀུན་སྐུ་ཚེ་རིང་ནད་མེད་བསམ་དོན་ལྷུན་གྱིས་འགྲུབ་པ་ཤོག
དག་བཅོས་པ་ཁོ་རང་ཡང་ནོར་འདུག་བ།
དག་བཅོས་ཤིག་དགོས་༼ནས་༽འདུག་ཟེར་བ་སུ་ཡི་སྐད་རེད།
དག་བཅོས་ཤིག་དགོས་ཀྱི་འདུག་ཟེར་རྒྱུ་མིན་ནམ།
གསར་འགོད་པ་ལགས།
གཤམ་གྱི་འདི་ཚོ་ནོར་འདུག དག་བཅོས་ཤིག་དགོས་ནས་འདུག མཐོང་ཆུང་དང་ཁྱད་གསོད་ཞུས་པ་གང་ཡང་མིན། བོད་ཀྱི་དུས་བབ་འདི་བདེ་འཇགས་རྐང་ཚའི་རྗེས་སུ་མི་འགྲོ་བ་ཞིག་གི་རེ་བས་སྡོད་མ་ཚུགས་པར་ཟུར་འདོན་ཞུས་པ་ཙམ་ལགས་ཞུའོ།།
ངྷ་༼གསར༽་འབྱོར།
རྒྱལ་དར་དང་༼སྤྱར༽་ཡིག
རྒྱལ་བའི་ཞབས་༼རྟེན།༽
ཐབས་༼གདུག༽
༼སྤྱར༽་ཡིག་བཀྲམས།
༼སྤྱར༽་ཡིག་དང་༼རྒྱ༽་དར།
ཅི་ཡང་མ་ཤེས་༼བར༽་ཡུན་རིང་ཕྱིན།
ཟས་༼གཡོར༽་སྦྱོར།
གཡོག་པོར་༼བཀོད༽་སྦྱོད།
ཕྱིར་རང་ཁྱིམ་དུ་ལོག་༼ཏེ།༽
ཁོང་རྣམ་པ་གསུམ་བདེ་ཐང་ངང་རྡ་སར་འབྱོར་ཐུབ་པར་དགའ་བསུ་ཞུ།
བཀྲིས་བདེ་ལེགས་ཞུ
ཁྱེད་རྣམ་པ་བདེ་འབྱོར་བྱུང་བར་འཚམས་འདྲི་བཀྲིས་བདེ་ལེགས་ཞུ།
དེ་ནི་དངོས་ནས་དགའ་དགོས་པ་རེད་ལ་་བོད་མི་གསུམ་སྲོག་འཐར་བ་རེད་་་་་་་ཁྱོད་ཚོ་ནི་དཔའ་བོ་དངོས་ནས་རེད་་་་་་་་་བཀྲ་ཤིས་བདེ་ལེགས་ཞུ་་
ཡང་བོད་ཀྱི་དཔའ་བོ་གསུམ་ངྷ་་སར་འབྱོར་འདུག་་ཁྱེད་རྣམས་པ་བདེ་ལགས་ངང་རང་དབང་ལུང་བར་འབྱོར་བ་སྔགས་བརྗོད་དང་བཀྲ་ཤིས་བདེ་ལགས་ཞུ།
ཁྱེད་རྣམ་པ་གསུམ་ལབཀྲིས་བདེ་ལེགས་ཞུ
གྲི་རིང་པོ་རེ་འཕྲེད་ལ་བཏག་དེ་རང་ཉིད་དཔའ་རྒོད་ཡིན་པ་རློམ་པས་གླེན་པ་ཚོ་ངོ་ཚ་དགོས་ཚོད་ཡིན
ངོ་མ་དཔའ་རྒོད་རེད་་་་་་
ཁྱེད་རྣམ་པ་གསུམ་རང་དབང་གི་ཡུལ་དུ་བདེ་འབྱོར་བྱུང་བ་སྙིང་ནས་འཚམ་འདྲི་ཡོད། རང་དབང་ཡོད་ས་ནས་སྔར་ལས་ལྷག་པའི་ལས་འགུལ་གྱི་སྐོར་འདྲ་བྱེད་རྒྱུུའི་སྐོར་ལ་གོམ་པ་རེ་སྤོ་ཐུབ་པར་རེ་རྒྱགས་ཀྱི་ཡོད། རྣམ་པ་གསུམ་གཙོ་བའི་ཞི་རྒོལ་དབའ་བོའི་མིང་ཐོབ་མཁན་གྱི་བོད་རིགས་སྤུན་ཟླ་གང་ན་སུ་ཡོད་པ་དག་གིས་མུ་མཐུད་དུ་རང་ཉིད་གང་དུ་གནས་པའི་ཁོར་ཡུག་ནས་སྣེ་ཁྲིད་བྱེད་ཐུབ་པར་རེ་བ་རྒྱགས་ཀྱི་ཡོད།