༧གོང་ས་མཆོག་སྐུ་འཚོ་བཞུགས་རིང་བོད་གཞིས་བྱེས་མཉམ་འཛོམས་བྱུང་སྟེ། བོད་ལ་བདེ་སྐྱིད་ཀྱི་ཉི་མ་ཞིག་ཤར་ཡོང་རྒྱུར་རེ་བ་བརྒྱབ་བསྡད་ཡོད་པ་རེད། ལྷག་པར་དུ་བོད་རྒྱའི་གནད་དོན་སྐོར་དེ་ཙམ་ཤེས་ཀྱི་མེད་ཀྱང་། ༧གོང་ས་མཆོག་གང་མགྱོགས་བོད་དུ་ཕེབས་རྒྱུར་ཉིན་སྒུག་མཚན་སྒུག་བྱས་ཡོད་པ་རེད་ཟེར།
ས་བྱིའི་ཞི་རྒོལ་ཆེན་མོ་ནས་བཟུང་རྒྱ་ནག་གཞུང་གིས་བོད་ས་སྟོད་སྨད་བར་གསུམ་ནང་རྒན་གཞོན་སྐྱ་སེར་དབྱེར་མེད་ཀྱིས་དམར་གསོད་དང་བཙོན་འཇུག མནར་གཅོད་དང་དྲག་གནོན་རབ་དང་རིམ་པ་བྱས་དང་བྱེད་མུས་ལྟར། ཡུན་ནན་བདེ་ཆེན་ས་ཁུལ་གྱི་བོད་མི་ཚོར་རྒྱ་ནག་གཞུང་གིས་དམ་དྲག་གང་འདྲ་བྱེད་ཀྱིན་ཡོད་མེད་སྐོར་དེ་ཙམ་ཤེས་རྟོགས་ཐུབ་ཀྱི་མེད་སྟབས། འདི་གའི་གསར་འགོད་པས་ཆེད་དུ་ཉེ་ཆར་བོད་ནས་གསར་དུ་ཕེབས་པའི་རང་ལོ་ ༣༣ ཡིན་པའི་བདེ་ཆེན་བོད་རིགས་རང་སྐྱོང་ཁུལ་དོན་འགྲུབ་གླིང་དགོན་པའི་གྲྭ་བསམ་འགྲུབ་རྒྱ་མཚོ་ལགས་སུ་བཅར་འདྲི་བྱས་ཡོད།
གྲྭ་བསམ་འགྲུབ་རྒྱ་མཚོ་ལགས་ཀྱིས་ཐོག་མར་ཞི་རྒོལ་ཆེན་མོའི་རྗེས་ཀྱི་དགོན་པའི་གནས་སྟངས་སྐོར་བརྗོད་དོན། ང་ཚོ་བདེ་ཆེན་བོད་རིགས་རང་སྐྱོང་ཁུལ་དོན་འགྲུབ་གླིང་དགོན་པར་མཚོན་ན། ༢༠༠༨ ལོའི་ཞི་རྒོལ་གྱི་རྗེས་ནས་རྒྱ་གཞུང་གིས་དམ་དྲག་ཆེ་རུ་བཏང་སྟེ། རྒྱ་ནག་གི་དམག་མི་མང་པོ་ཡོང་སྟེ་དགོན་པའི་འདུ་ཁང་དང་གྲྭ་ཤག་ལས་༸གོང་ས་མཆོག་གི་སྐུ་པར་ཚང་མ་བཙན་འཁྱེར་བྱས་སོང་ལ། རྗེས་ཕྱོགས་༧གོང་ས་མཆོག་གི་སྐུ་པར་གཅིག་ཀྱང་བཤམ་མི་ཆོག་པའི་འཇིགས་སྐུལ་བྱས་ཏེ། ད་ལྟའི་ཆར་དགོན་པའི་ནང་༧གོང་ས་མཆོག་གི་སྐུ་པར་གཅིག་ཀྱང་མཐོང་རྒྱུ་མེད་པ་བཟོས་ཡོད། ལོ་དེ་ནས་བཟུང་དགོན་པའི་ཉེ་འགྲམ་དུ་གཏན་འཇགས་ཀྱི་དམག་སྒར་ཞིག་བརྒྱབ་ཏེ། ད་ལྟའི་ཆར་ཉིན་མཚན་མེད་པར་ལྟ་རྟོག་དང་། དགོན་པའི་འདུ་ཁང་དང་བྱམས་ཁང་། གྲྭ་ཤག་བཅས་སུ་རྒྱང་ཤེད་གློག་སྒྲོན་བཙུགས་ཏེ། དགེ་འདུན་པ་རྣམས་ཀྱི་འགྲོ་འོང་དང་ལབ་གླེང་སོགས་ལ་ལྟ་རྟོག་བྱེད་ཀྱི་འདུག
གལ་སྲིད་གྲྭ་དམངས་ཚོས་ནང་ཁུལ་ནས་བོད་དོན་དང་འབྲེལ་བའི་ལབ་གླེང་བྱེད་པ་དང་། ༧གོང་ས་མཆོག་གི་བཀའ་སློབ་དང་གསུང་ཆོས་ཀྱི་གློག་བརྙན་སོགས་ལ་བལྟས་ན། ལམ་སང་དམག་མི་བསླེབས་ཏེ་འདྲི་གཅོད་དང་གཅར་རྡུང་བྱེད་ཀྱི་འདུག དེ་ནང་ཁུལ་དུ་གསང་ཉུལ་བ་ཡོད་མེད་བཤད་དཀའ་ཡང་། ནང་ཁུལ་ནས་དོན་དག་ག་རེ་བྱས་ཀྱང་ལམ་སང་ཕྱི་ལོགས་ནས་ཤེས་འགྲོ་བཞིན་འདུག ཆོས་ཀྱི་བྱེད་སྒོ་ཁག་དང་དུས་ཆེན་ཁག་ཀྱང་ཁོང་ཚོས་བཀོད་སྒྲིག་ལྟར་བྱེད་པ་ལས་རང་དབང་སྣེ་གཅིག་ཀྱང་ཡོད་པ་མ་རེད། སྔོན་མ་དགོན་པའི་ནང་གཏན་སྡོད་གྲྭ་བ་ ༧༠༠ ལྷག་ཡོད་ཀྱང་། བསླབ་པ་སློབ་གཉེར་གྱི་མཐུན་རྐྱེན་ཞན་པ་དང་རྒྱ་གཞུང་གི་དམ་དྲག་སོགས་ལ་བརྟེན་ཏེ། ད་ཆར་མང་ཆེ་བ་རྒྱ་གར་སོགས་ཡུལ་གྲུ་གཞན་དུ་ཕྱིན་ཚར་བ་རེད། ཅེས་དབུགས་རིང་ནར་ནར་གྱིས་བརྗོད་བྱུང་།
ཡང་ཁོང་གིས་ཡུན་ནན་བདེ་ཆེན་ཁུལ་གྱི་ད་ལྟའི་གནས་བབ་སྐོར་བརྗོད་དོན། ཡུན་ནན་ ༼ བདེ་ཆེན་ནང་བསྟན་སློབ་གླིང་༽ དང་༼ བདེ་ཆེན་མི་རིགས་སློབ་འབྲིང་༽ གཞན་སློབ་ཆུང་འགའ་དང་། སྒེར་གཉེར་སློབ་གྲྭ་ཁ་ཤས་ལས་བོད་ཡིག་སློབ་ས་ཡོད་པ་མ་རེད། དེ་དག་ཀྱང་ས་ཁུལ་གཞན་གྱི་སློབ་གྲྭ་དང་བསྡུར་ན་བོད་ཡིག་གི་གནས་སྟངས་སྐྱོ་བོ་རེད། ང་ལ་མཚོན་ན། བདེ་ཆེན་ནང་བསྟན་སློབ་གླིང་ནང་ལོ་ལྔའི་རིང་སློབ་སྦྱོང་བྱས་པ་ཡིན། སྐབས་དེར་ལོ་རིམ་དང་པོ་དང་གཉིས་པའི་ནང་མཚན་ཉིད་དང་དབྱིན་ཡིག རྒྱ་ཡིག་སོགས་བསླབས་པ་ཡིན། འཛིན་གྲྭ་མཐོ་རུ་ཕྱིན་སྐབས་རྒྱ་ནག་གི་རྩ་ཁྲིམས་དང་རྒྱལ་གཅེས་སློབ་གསོ། ༸གོང་ས་མཆོག་དང་ཕྱི་སྡོད་བོད་མིར་དགག་རྒྱག་གི་སློབ་གསོ་ཤུགས་ཆེ་རུ་བཏང་སོང་། ལོ་གཅིག་ལྷག་གི་ཡར་སྔོན་དུ་ང་ཚོ་ཕ་ཡུལ་གྱི་བོད་མི་ཁག་ཅིག་མཉམ་རུབ་ཀྱིས་བོད་ཡིག་ཁོ་ནའི་སྒེར་བཙུགས་སློབ་གྲྭ་ཞིག་བསྒྲུབས་པ་རེད། ཕྱིས་སུ་ས་གནས་འབྲེལ་ཡོད་མི་སྣས་སུན་གཙེར་དང་གནོན་ཤུགས་སྤྲད་དེ་སློབ་ཚན་མང་ཆེ་བ་རྒྱ་ཡིག་གི་ལམ་ནས་འཁྲིད་དགོས་བྱུང་འདུག ད་ལྟའི་ཆར་ཡུན་ནན་བདེ་ཆེན་ཁུལ་གྱི་སློབ་ཆུང་ཁག་ཏུ་སློབ་ཚན་ཚང་མ་རྒྱ་ཡིག་ཁོ་ནའི་སྟེང་འཁྲིད་བཞིན་འདུག ཅེས་བརྗོད་བྱུང་།
མཐའ་མར་ཁོང་ལ། ཡུན་ནན་བདེ་ཆེན་རྫོང་ས་ཁུལ་གྱི་བོད་རིགས་ཚོས་༧གོང་ས་མཆོག་དང་བཅན་བྱོལ་བོད་གཞུང་། དེ་བཞིན་ཕྱི་ལོགས་སུ་ཡོད་པའི་བོད་རིགས་ཚོར་རྒྱུས་མངའ་ག་ཚོད་ཡོད་མེད་དྲིས་པར། ཡུན་ནན་ས་ཆའི་བོད་རིགས་ཚོའི་གནས་སྟངས་ཧ་ཅང་ཉག་ཕྲ་བོ་ཞིག་ཆགས་འདུག བོད་མིའི་ཁྲོད་དུ་ཤེས་ཡོན་པ་དང་མི་རིགས་ཀྱི་ལར་ཞེན་ཧ་ཅང་སྐྱོ་བོ་རེད། དགོན་སྡེ་ཁག་ལ་མཚོན་ན་ཡང་སྲུང་མ་བསྟེན་ཕྱོགས་ཀྱི་དབང་གིས་ཕྱོགས་གཉིས་སུ་གྱེས་ཡོད། དོལ་རྒྱལ་སྟེན་མཁན་ཚོ་༸གོང་ས་མཆོག་ལ་མི་དགའ་བའི་དབང་གིས་བོད་པའི་འཐབ་རྩོད་ལ་ཡང་རྒྱབ་སྐྱོར་དེ་ཙམ་བྱེད་ཀྱི་མི་འདུག གནས་སྟངས་འདིའི་དབང་གིས་ནུས་ཤུགས་ཆིག་སྒྲིལ་ཡོང་གི་མི་འདུག བོད་པ་མང་ཆེ་བས་༧གོང་ས་མཆོག་སྐུ་འཚོ་བཞུགས་རིང་བོད་གཞིས་བྱེས་མཉམ་འཛོམས་བྱུང་སྟེ། བོད་ལ་བདེ་སྐྱིད་ཀྱི་ཉི་མ་ཞིག་ཤར་ཡོང་རྒྱུར་རེ་བ་བརྒྱབ་བསྡད་ཡོད་པ་རེད། ལྷག་པར་དུ་བོད་རྒྱའི་གནད་དོན་སྐོར་དེ་ཙམ་ཤེས་ཀྱི་མེད་ཀྱང་། ༧གོང་ས་མཆོག་གང་མགྱོགས་བོད་དུ་ཕེབས་རྒྱུར་ཉིན་སྒུག་མཚན་སྒུག་བྱས་ཡོད་པ་རེད། ཅེས་བརྗོད་བྱུང་།
གསར་འགོད་པ། དོན་གོ
གདོན་འདྲེ་ཁ་ལ་འཁྱེར་ནས་རྒྱ་དམར་གྱི་ལག་གཡོག་རྒྱུག་མཁན་རྒྱུན་མཁན་དེ་ཚོར་བོད་ཞེན་ཡོད་ཟེར་མཁན་དེ་ཡང་དོལ་རྒྱལ་བ་ལས་གཞན་ཅང་མ་རེད། ལལྷན་རྒྱས་ཚོས་ཤེས་དགོས་པ་ཞིག་ལ། འདོན་འདྲེ་བསྟེན་མཁན་དེ་ཚོས་དོལ་རྒྱལ་དང་ཆོས་ལུགས་ཀྱི་རང་དབང་བེད་སྤྱད་དེ་བོད་པའི་སྤྱི་ཚོགས་ནང་ཆེས་ཐབས་སྡུག་གི་ལས་ངན་ལས་པ་མ་བརྗེད་རོགས། ཤེས་གསལ་ལུས་ལ་གྲྭ་ཆས་གྱོན་ནས་ཚུལ་ལྡན་དགེ་སློང་དམར་བསོད་བྱེད་མཁན་ཡང་དོལ་རྒྱལ་བ་ཚོ་རེད། དེ་ཙམ་ཡིན་དོན་མེད་འདྲེ་དང་འཆམས་མཐུན་ཡོང་ཐབས་མེད་ལ་མི་ཡོང་བའི་གསོལ་འདེབས་ཀྱང་ཞུ།
དྲྭ་གྲོགས་ཚོ་ཤུགས་ལྡན་བསྟེན་མི་རྣམས་ལ་བོད་དོན་ཐད་སེམས་ཤུགས་མེད་པ་ནི་རྩ་བ་ནས་མ་རེད། ཡིན་ན་ཡང་བཙན་བྱོལ་གཞུང་ནས་ཤུགས་ལྡན་བསྟེན་མི་རྣམས་ནི་བོད་ཀྱི་རྩ་དོན་ལ་གནོད་གི་ཡོད་པ་གསུང་ཡོད་པས། དེར་བརྟེན་ཁོ་ཚོས་གནས་ཚུལ་དེར་ལག་པ་འཆང་མི་བདེ་བ་ཞིག་ཡོད་རེད། གལ་སྲིད་ཁོང་རྣམས་ནས་གནས་ཚུལ་དེར་ལག་པ་འཆང་ནས་གནས་ཚུལ་དེ་འཁྲུ་ལོག་བྱུང་ཚེ་ཡང་བསྐྱར་བཙན་བྱོལ་གཞུང་ནས་ལྷ་ཡི་གནོད་པ་རེད་ཞེས་མ་ཉེས་ཁ་ཡོག་བྱུང་ན་བསམ་པའི་སེམས་དོག་ཡོད་པ་རེད། དེ་ལས་རབས་བྱུང་ན་ལྷ་སྲུང་བསྟེན་ཕྱོགས་གི་གནས་ཚུལ་དེ་ཡང་བསྐྱར་མ་བསླང་རོགས། ཐུགས་རྗེ་གཟིགས།།། བོད་པ་སྤར་མོ་གང་དེ་འཆམ་མཐུན་ངང་གནས་ཐུབ་པའི་རེ་བ་བཞུ་རྒྱུ་ཡིན། རྗེས་སུ་གཞིས་བྱེས་བོད་མི་ཡོང་ལ་ ཡི་ཤུ་འཁྲུངས་སྐར་དང་སྤྱི་ལོའི་ལོ་གསར་ལ་བཀྲ་ཤིས་བདེ་ལེགས་དང་ཁྱིམ་ཚང་འཆམ་མཐུན་དང་ སྐུ་གཟུགས་གསལ་ཐང་ བོད་དོན་ལེགས་འགྲུབ་ཡོང་བའི་སྨོན་འདུན་བཞུ་རྒྱུ་ཡིན།།།
ཤུགས་ལྡན་བསྟན་མཁན་ཚོའི་སེམས་ནང་རང་ཉིད་བོད་པ་ཞིག་ཡིན་པ་འདུ་ཤེས་ཡོད་ཀྱང་༸གོང་ས་མཆོག་དང་བོད་གཞུང་ལ་ཡིད་ཆེད་མེད་པས་་རྗེས་སུ་གཞིས་བྱེས་མཉམ་འཛོམས་ཡོང་བའི་སྐབས་ཁོང་ཚོ་ཐབས་ལམ་གང་གི་ཐོག་ནས་བོད་མི་མཉམ་དུ་ཞུགས་ཀྱི་ཡིན་ནམ
དྲ་ཐོག་ཏུ་ཡོད་པའི་སྤུན་ཟླ་ཚོ།
ད་ནས་བཟུང་དོལ་རྒྲལ་བ་ཞེས་ཟུར་ཟ་དང། དམའ་འདེབས་མ་བྱེད་རོགས།
ག་ཚོད་ཐུབ་ཐུབ་མཐུན་ལམ་བྱེད་རོགས།
ཤ་ཁྲག་གཅིག་པའི་བོད་རིགས་སྤུན་ཟླ་ཚོར།
དོལ་རྒྱལ་བསྟེན་ཕྱིན་ཆད་དངོས་ཤུགས་རྒྱུད་གསུམ་ནས་༸གོང་ས་མཆོག་དང་བོད་དོན་བདེན་མཐའ་གསལ་བར་གནོད་བཞིན་ཡིན་པའི་དོལ་རྒྱལ་བསྟེན་མཁན་ཚོར་རེ་བསྐུལ་དང་སྦྲགས་དོལ་རྒྱལ་མཚམས་འཇོག་གནང་རོགས་ཞེས་འབོད་བསྐུལ་ཞུ་བཞིན་ཡོད་པས་ཁྱེད་རྣམ་པས་ཀྱང་འབོད་བསྐུལ་གནང་རོགས།
བོད་རྒྱལ་ལོ།
རྒྱལ་སྲས་ཐོགས་མེད་ཀྱི་གསུང་རྒྱལ་སྲས་ལག་ལེན་ལས།
གཉེན་གྱི་ཕྱོགས་ལ་འདོད་ཆགས་ཆུ་ལྟར་གཡོ།
དགྲ་ཡི་ཕྱོགས་ལ་ཞེ་སྡང་མེ་ལྟར་འབར།
བླང་དོར་བརྗེད་པའི་གཏེ་མུག་མུན་ནག་ཅན།
ཕ་ཡུལ་སྤོང་བ་རྒྱལ་སྲས་ལག་ལེན་ཡིན།
ཞེས་དང་།
ནང་གི་ཞེ་སྡང་དགྲ་བོ་མ་ཐུབ་ན།
ཕྱི་རོལ་དགྲ་བོ་བཏུལ་ཤིང་འཕེལ་བར་འགྱུར།
དེ་ཕྱིར་བྱམས་དང་སྙིང་རྗེའི་དམག་དཔུང་གིས།
རང་རྒྱུད་འདུལ་བ་རྒྱས་སྲས་ལག་ལེན་ཡིན།
ཞེས་དང་།
ཉོན་མོངས་དབང་གིས་རྒྱས་སྲས་གཞན་དག་གི
ཉེས་པ་གླིང་ན་བདག་ཉིད་ཉམས་གྱུར་པས།
ཐེག་པ་ཆེ་ལ་ཞུགས་པའི་གང་ཟག་གི
ཉེས་པ་མི་སྨྲ་རྒྱལ་སྲས་ལག་ལེན་ཡིན།
ཞེས་དང་།
རྩུབ་པོའི་ཚིག་གིས་གཞན་སེམས་འཁྲག་འགྱུར་ཞིང་།
རྒྱལ་བའི་སྲས་ཀྱི་སྤྱོད་ཚུལ་ཉམས་འགྱུར་བས།
དེ་ཕྱིར་གཞན་གྱི་ཡིད་དུ་མི་འོང་བའི།
ཚིག་རྩུབ་སྤོང་བ་རྒྱས་སྲས་ལག་ལེན་ཡིན།
ཞེས་སོགས་གསུང་པ་ལྟར། ཉམས་བཞེས་ཀྱིས་རང་རྒྱུད་བཏུད་བའི་ཆོས་པ་ཚུལ་ལྡན་ཞིག་ཡིན་ཕྱིན་ཆོས་སྲུང་ལ་སྙད་ནས་རང་གི་རྩ་བརྒྱུད་ཀྱི་བླ་མ་ལྷ་སྲུང་ལ་སྐུར་འདེབས་དང་དགེ་འདུན་དབྱིན་འབྱེད་ཀྱི་བདུད་ལས་འདི་འདྲ་འབྱུང་ག་ལ་སྲིད།
ལྕགས་ཞྭ་ཅན་ལ་སྐྱབས་བཅོལ་བ་ཚོ་ལ་གཞུང་ཕྱོགས་དང་༸གོང་ས་མཆོག་ནས་ལྟ་ཚུལ་གང་ཞིག་ཡོད་པ་རེད
གསལ་བཤད་ཞིག་བྱས་ན་ཅི་འདྲ་འདུག
ཆོས་ལུགས་དད་པ་རང་མོས་རེད ཟེར་རྒྱུ་ལས་མེད་ན་་་་་་་་ད་ཁྱོད་ཀྱི་ཅི་ཡང་ཤེས་མི་འདུག་སེམས།
ཁོ་བ་ཚོ་བོད་པ་ཡིན་ཐག་ཆོད་རེད་་་་ནམ་ཞིག་ཡག་པོ་ཆགས་ཡོང་གི་རེད་་་་་་་འོན་ཀྱང་དེ་མ་འོང་བ་རེད་་་་ངའི་དེ་ལྟར་མོ་དད་བྱེད་ཁོམས་མེད
ད་ལྟའི་དཀའ་ཚེགས་གི་དུས་ངན་འདི་ལ་ཁོ་བ་ཚོའི་བྱེད་སྟངས་འདི་ལས་མེད་པས་བོད་མིའི་ནང་གི་བོད་མི་ཐ་ཤལ་ཞིག་རེད་འདོད
ཁ་དང་ཁ་སྤུ་དབྱེ་འབྱེད་ཡིན་པས་གྷ་པར་སིང་བསྟེན་མཁན་དེ་ཚོ་ནམ་ཡང་ཆམ་ལ་ཕབ་དགོས་ལ་སྐད་ཆ་དེ་གཙང་སེལ་མ་བྱུང་བར་ནམ་ཡང་མཚམས་འཇོག་བྱེད་རྒྱུ་མེད་པས་དུས་ནས་དུས་སུ་གླེང་དགོས། མགོ་བརྗོད་དེ་འདྲ་ཞིག་བྲིས་པ་ཡག་པོ་དཔེ་མེད་བྱུང་འདུག ཐུགས་རྗེ་ཆེ།
ཁོང་ཚོས་ཤུགས་བསྟན་དང་མ་བསྟན་ཁྱད་པར་མེད་
བོ་རིགས་སྤུན་ཟླ་ཡིན་པ་དོར་ཐབས་མེད་
ཁོང་ཚོ་འདྲེ་རེད་ཟེར་དུས་སུ་ཡིན་ཡང་ཐུགས་ཁག་མེད་
མ་འོང་པ་ཡག་པོ་ཡོང་བའི་རེ་བ་ཡོད་
ཤུགས་ལྡན་བསྟན་མཁན་ཚོས་བོད་པ་རེད་མ་རེད་
བོད་པ་ཡིན་ན་ང་བོད་པ་ཡིན་མཉམ་པའི་འདུ་ཤེས་དེ་ཡོད་རེད་
གཞུང་ཕྱོགས་ནས་ལྟ་སྟངས་གང་འདྲ་ཡོད་མེད་གསལ་པོ་རེད་
ཤུགས་ལྡན་བསྟེན་མཁན་ཚང་མ་ལ་ རྒྱུག་པ་ལེབ་རྡུང་བྱས་པའི་སྐྱོན་རེད་།
རེ་ཟུང་གི་ཤུགས་ལྡན་ཁ་ལ་ཁྱེར་ནས་ཆབ་སྲིད་འཁྲབ་། སོ་སོའི་ཁེ་ཕན་ལེན་གྱི་ཡོད་རེད་མ་གཏོགས་། མང་ཆེ་བས་༧གོང་ས་མཆོག་ལ་དད་པ་ཡོད་ཀྱི་རེད་འདོད་
སྲུང་མ་བསྟེན་མཁན་ཚོས་༧གོང་ས་མཆོག་ལ་བཅག་བཅག་བྱས་ནས་བསྟེན་པ་མ་རེད་འདོད
༧གོང་ས་མཆོག་གི་བཀའ་སྲུང་ལྕི་སྒྲུབ་ཟེར་ཡ་དེ་། སྲུང་མ་བསྟེན་དང་མི་བསྟེན་གཅིག་པོར་མ་རེད་འདོད་ བཀའ་སློབ་གཞན་མང་པོ་གནང་ཡོད་རེད
༸གོང་ས་མཆོག་ལ་དད་མོས་དང་། བཙན་བྱོལ་སྒྲིག་འཛུགས་ལ་རེ་གུས་མེད་ན་ཡང་། བོད་ཡུལ་དང་བོད་མིའི་བདེ་དོན་ཡལ་བར་དོར་བ་ནི། མི་འོས་པ་མ་རེད་དམ།
དོ་རྒྱལ་སྟེན་མཁན་ཚོས་བོད་དོན་ལ་རྒྱབ་སྐྱོར་མ་བྱས་པ་རེད་དམ། དོ་རྒྱལ་སྟེན་མཁན་རྣམས་འདྲེ་རུ་བརྩིས་ཏེ་བོད་དོན་བྱེད་རྒྱུ་ཕར་ཞོག་རང་མགོ་ཡང་སྤྱི་ཚོགས་སུ་འགྱོག་མི་ཐུབ་པ་འབའ་ཞིག་ཏུ་བཟོས་པ་རེད། བསམ་བློ་ཐོངས།
གསར་འགོད་པ་དོན་ཁོས།
གནས་ཚུལ་རྙིང་པ་འདི་བསྐྱར་ལངས་བྱས་ན་དགོས་ཕན་གང་ཡང་མི་འདུག་བསམ། གང་ཡིན་ཟེར་ན། དོན་དག་འདི་ནི་ཧ་ཅང་གི་རྙིང་པ་དང་།
དོན་ངན་འདིའི་རིགས་ཀྱི་མཇུག་སྒྲིལ་ཟིན་པ་རེད། སླར་ཡང་དྲན་གསོ་བྱེད་ཆེད་སྐད་ཆ་འདི་ཚོ་བླངས་པ་ཡིན་ན་ཡག་པོ་ཡོད་ན་བསམ་པའི་འདུ་ཤེས་ཀྱི་ཚོར་བ་ཞིག་ངང་གིས་སླེབས་འོང་གི་འདུག
རབ་ཡིན་ན་དོ་རྒྱལ་གྱི་སྐོར་གི་སྐད་ཆ་འདི་ཚོ་མ་བླངས་ན་ཡག་པོ་འདུག་སྙམ།་ གནས་ཚུལ་འདི་ནི་འཇགས་ཚར་བའི་སྐད་ཆ་ཞིག་རེད། ཁ་ལག་རྙིང་པ་ཟས་ན་གྲོད་ཁོག་ན༎ དུ་ལོག་རྙིང་པ་གྱོན་ན་གཟི་བརྗིད་མེད༎
གཏམ་རྙོག་བསྐྱར་སློག་བྱས་ན་རྙོག་དྲའི་གཞི༎
དེ་བས་ཁ་རོགས་བཞགས་ན་མི་བཟང་ངམ༎
སྔོན་ཆད་མཚོན་ན་དོ་རྒྱལ་བསྟན་མཁན་ཧ་ཅང་མང་ན་འང་། གནས་ཚུལ་དེའི་རིགས་དེ་འདྲའི་འཚབ་ཆེན་པོ་ཡིན་པ་མ་ཤེས་པར་བྱས་པ་ཤ་སྟག་རེད། ཕྱིས་སུ་དེ་བསྟན་མཁན་ཚང་མས་༸གོང་ས་མཆོག་གི་བཀའ་བཞིན་དོ་རྒྱལ་བསྟན་མཚམས་བཞགས་པ་རེད། དེང་སང་དེའི་སྐོར་ལ་རྙོག་དྲ་གང་ཡང་མེད་དུས་སླར་ཡང་ཁྱེད་ཀྱི་རྙོག་གཞི་བསྐྱར་སློགས་མ་བྱས་ན་མི་བཟང་ངམ།
དོ་རྒྱལ་ཞེས་པའི་མིང་དེས་མ་བོས་ན་ཡག་པོ་འདུག་སྙམ། མིང་དེས་བོད་པ་ཚང་གི་སྤྱི་ཚོགས་ནང་ལ་བརྡབ་གསིག་ཤུགས་ཆེན་པོ་བཏང་ཡོད་པ་བོད་པ་ཀུན་ཀྱི་མཁྱེན་གསལ་རེད། དེ་འདྲ་སོང་ཙང་།
ཚིག་ངན་དེའི་མགོ་མ་བླངས་ན་ཡག་པོ་འདུག་བསམ་པའི་གོ་བརྡ་ཞིག་སྤྲད་པ་ཡིན།