ཟླ་འདིའི་ཕྱི་ཚེས་ ༡༣ ཉིན་པེ་ཅིན་ཀྲུང་དབྱང་མི་རིགས་སློབ་ཆེན་དུ་༼ བོད་རིག་པ་ཞིབ་འཇུག་གླིང་གི་སྐབས་གསུམ་པའི་ཡུལ་སྐད་འགྲན་བསྡུར། ༽ ཞེས་པའི་མཛད་སྒོ་ཞིག་བསྡུས་ཡོད་འདུག་ལ། མཛད་སྒོ་དེའི་སྟེང་སློབ་གླིང་དེ་གའི་འཛིན་རིམ་དང་པོ་དང་གཉིས་པའི་ནང་གི་མདོ་དབུས་ཁམས་གསུམ་གྱི་གསར་ཞུགས་སློབ་མ་རྣམས་མཉམ་ཞུགས་བྱས་ཡོད་ཅིང་། དེ་ནི་འགྲན་བསྡུར་གྱི་རྣམ་པའི་ཐོག་ནས་ཆོལ་ཁ་ཕན་ཚུན་གྱི་ཡུལ་སྐད་ལ་སློབ་སྦྱོང་དང་། མཛའ་བརྩེའི་རྡོག་རྩ་གཅིག་སྒྲིལ་གཏིང་ཇེ་ཟབ་ཏུ་གཏོང་བའི་ཐབས་ལམ་ཞིག་ཡིན་འདུག
ཐེངས་འདིའི་མཛད་སྒོའི་སྟེང་དབུས་པའི་སློབ་ཕྲུག་ཚོས་ཁམས་དང་ཨ་མདོའི་ཡུལ་སྐད་བཤད་པ་དང་། ཁམས་པའི་སློབ་ཕྲུག་ཚོས་དབུས་དང་ཨ་མདོའི་ཡུལ་སྐད་བཤད་པ། ཨ་མདོའི་སློབ་ཕྲུག་ཚོས་དབུས་དང་ཁམས་པའི་ཡུལ་སྐད་བཤད་སོགས་བྱས་ཡོད་པ་མ་ཟད། སྟིངས་ཆའི་སྟེང་ནས་ཆོལ་ཁ་གཉིས་ཀྱི་མི་གཉིས་ཀྱིས་ཆོལ་ཁ་གཅིག་གི་ཡུལ་སྐད་ཐོག་ནས་གླེང་མོལ་བྱེད་པ་དང་། ཆོལ་ཁ་གཅིག་གི་མི་གཉིས་ཀྱིས་ཆོལ་ཁ་གཞན་ཞིག་གི་ཡུལ་སྐད་ཐོག་ནས་གླེང་མོལ་བྱེད་པ། དེ་བཞིན། ཟུར་ཞུགས་པ་དང་དཔུང་དཔྱོད་པ་དག་གི་དྲི་བར་ལན་འདེབས་བྱེད་པ་སོགས་བརྒྱུད་དེ། ཚིག་གི་སྨྲ་དག་མིན་དང་། ལུས་ཀྱི་ཉམས་ཐོན་མིན། སྤོབས་པའི་གདེང་མཐོ་མིན་སོགས་ལ་གཞིགས་ཏེ་སྐར་གྲངས་སྤྲད་ཡོད་ཅིང་། མཐར་ཨང་རིམ་དང་པོ་དང་གཉིས་པ། གསུམ་པ་བཅས་ལ་བྱ་དགའ་ཡང་སྤྲད་ཡོད་འདུག
འགྲན་བསྡུར་དེའི་སྟེང་གི་གསར་འགོད་པའི་མཐོང་སྣང་འགའ་ཟིན་བྲིས་སུ་བཏབས་ཡོད་པའི་ནང་བཀོད་དོན། ཕ་ཡུལ་ཁྲི་ཀ་ནས་ཡིན་པའི་སློབ་གྲོགས་ཚེ་དབང་རྣམ་རྒྱལ་གྱིས། གལ་སྲིད་བོད་ལ་སྤྱི་སྐད་ཅིག་ཡོད་ན་ང་ལ་ཕན་པ་ག་རེ་འདུག་ཅེས་པའི་བརྗོད་གཞི་དང་འབྲེལ། བོད་རིགས་བུ་མོ་མང་པོ་ཞིག་དགའ་རོགས་སུ་འཚོལ་ཐུབ་པ་དང་། སློབ་མའི་ཚོགས་པའི་ནང་ནས་གོ་ས་མཐོ་ཙམ་རག་ཐུབ་པ་སོགས་ཀྱི་གནས་ལུགས་དེ་དག་ནི་སློབ་གྲོགས་མང་པོ་ཞིག་གི་བསམ་ཚུལ་དང་མཐུན་ཡང་། དེ་རིང་གི་ཚོགས་པའི་དབུས་སུ་སྨྲ་བར་མི་འོས་པ་དང་། དོན་དག་ཆོ་མེད་པར་ངོས་འཛིན་མཁན་ཡོད་སྲིད་ཀྱང་། ཞིབ་ཏུ་བསམ་ན་དོན་དག་ཆུང་ཡང་། ཡོན་ཏན་རྒྱ་ཆེན་པོ་ལྡན་པའི་གཏམ་བཤད་ཡ་མེད་ཅིག་རེད་ལ། དེར་འོས་པའི་དགའ་བསུ་ཡང་མི་དམན་པ་ཞིག་ཐོབ་སོང་།
ཡང་ཕ་ཡུལ་སྡེ་རོང་ནས་ཡིན་པའི་སློབ་གྲོགས་ཚེ་གྲུབ་ལྷ་མོ་ཟེར་བ་དེ་ནི་བདག་གིས་ད་བར་དུ་མཐོང་བའི་ཆེས་བག་ལྷོད་པའི་བོད་རིགས་བུ་མོ་དེ་རེད་ཟེར་ཆོག ཁོ་མོའི་གཏམ་བཤད་ཀྱི་མགོ་མཇུག་ཀུན་ཏུ་དལ་ཞིང་ལྷོད་ལ་སྒྲ་མཐོ་དམའ་རན་པའི་སྐད་ཅིག་གིས་རང་གི་བསམ་ཚུལ་ལྷུག་པོར་བརྗོད་ཅིང་། མཐར་དྲི་བ་དྲིས་ལན་གྱི་དུས་སུ་ཡང་ཁོང་མོ་དང་ཕ་ཡུལ་གྱི་སློབ་གསོའི་གནས་བབས་ཟུང་དུ་སྦྲེལ་ནས་བརྩོན་འགྲུས་སྐོར་གྱི་ལན་ཡག་པོ་ཞིག་བཏབས་པ་ནི་ཡིད་དུ་འོང་བ་ཞིག་རེད། ཅེས་བཀོད་འདུག
གསར་འགོད་པའི་མུ་མཐུད་བཀོད་དོན། ཕ་ཡུལ་ནག་ཆུ་སོག་རྫོང་ནས་ཡིན་པའི་སློབ་གྲོགས་བུ་མོ་དེས། ཡུལ་སྐད་གསུམ་ལས་རང་ཉིད་ཀྱི་ཞན་ཤོས་ནི་ཨམ་སྐད་ཡིན་ཟེར་ཞིང་། ཡང་ཆུ་ལྟར་བཞུར་བའི་ཨམ་སྐད་ལ་ས་གནས་ཀྱི་ཁྱད་ཆོས་ལྡན་པའི་དབུས་སྐད་དང་ཁམས་སྐད་བསྲེས་ནས་གཏམ་བཤད་གསོན་ཉམས་ལྡན་པ་ཞིག་སྤེལ་བ་དེས་དབུས་ཕྱོགས་ཀྱི་སློབ་གྲོགས་མང་པོ་ཞིག་གད་མོ་ཐག་གེར་བཏང་སོང་ལ། ཁོ་མོར་ཡང་གསོལ་རས་སུ་ཨང་དང་པོའི་གསོལ་རས་ཕུལ་བ་ནི་དོན་ལ་གནས་པ་ཞིག་རེད།
ད་དུང་ཕ་ཡུལ་ཨ་མདོ་ཅོ་ནེ་ནས་ཡིན་པའི་སློབ་གྲོགས་མགོན་པོ་དབང་ལྡན་གྱིས་དབུས་སྐད་གསལ་ཞིང་དག་པ་ཞིག་བཤད་པར་རྒན་ཚེ་དབང་ལྷ་མོ་ལགས་ཡིད་མ་ཆེས་པར། ཁྱོད་ཀྱིས་ཨམ་སྐད་ཅིག་གསུང་རོགས་ཞེས་པའི་དོགས་སེལ་ཞིག་ཀྱང་བྱ་དགོས་བྱུང་སོང་ལ། ད་དུང་དེ་མིན་པའི་སློབ་གྲོགས་མང་པོ་ཞིག་གི་གཏམ་བཤད་ནི་གསོན་ཉམས་དོད་ཅིང་། རྗོད་བྱེད་ཡུལ་སྐད་དེར་མ་བྱང་བའི་དགོད་བྲོ་བ་ཡང་མི་ཉུང་བ་ཞིག་བྱུང་སྟེ། ཚོགས་ར་གང་བོ་ཐལ་སྒྲ་དང་དགོད་སྒྲས་ཁེངས་པར་བྱས་སྟབས། ཆུ་ཚོད་གཉིས་ལྷག་གི་དུས་ཡུན་དེ་ནམ་རྒྱུན་ཅུང་འཁྱོལ་དཀའ་བའི་སློབ་ཁྲིད་དང་འཆད་ཁྲིད་སོགས་དང་བསྡུར་ན་སྐད་ཅིག་གི་རིང་ལ་བུད་སོང་། ཅེས་བཀོད་འདུག
གསར་འགོད་པ་དོན་འགྲུབ་བཀྲ་ཤིས་ཀྱིས་བསྡུ་སྒྲིག་བྱས།
སླར་ཡང་་ཁྱོད་རྣམས་ཀྱི་གཟིད་འོད་ལ་རེག་འདོད་་་་་་་
ཡུལ་སྐད་འགྲན་བསྡུར་གྱི་གར་སྟེགས་སྟེང་ན་བཞུགས་ཡོད་པའི་བོད་རིགས་གཞོན་སྐྱེས་འདི་ཚོའི་འདྲ་དཔར་མིག་ལམ་དུ་ཤར་མ་ཐག་སེམས་ནས་བཟོད་དཀའ་བའི་མིག་ཆུ་ཞིག་བྲང་ངོས་ནས་གྲང་ཤུར་ཤུར་བཞུར་ཐལ།
སྙིང་རྗེ་མེད་པའི་ལྕགས་ནག་གི་མཆེ་བར་ནས། སྡུག་རུས་དང་།
ལ་རྒྱས་ཁེངས་པའི་གཞོན་སྐྱེས་འདི་ཚོར་ལྷད་མེད་སྙིང་ནས་གུས་བཀུར་ཞིག་མི་ཞུ་ཐབས་མེད་ཆགས་སོང་། དེ་ནི་ང་བོད་པ་ཚང་གི་རིགས་རྒྱུད་ཡིན་པའི་རྟགས་ཡིན་པ་འདྲ། གང་ལག་ཟུང་དཔྲལ་བར་བཏེགས་ཏེ་ཕྱག་ཅིག་འཚལ་འདོད་བྱུང་།
འདི་ནི་ངའི་སེམས་གཏིང་གི་སྐད་ཆ་དམར་དམར་པོ་ཡིན། དོན་དམ་པའི་དཔའ་བོ་ཟེར་ན་མི་འདུག བོད་ནང་གི་གཞོན་སྐྱེས་ཚོས་ལས་རིག་རྒོད་ཅིག་དང་། དཔའ་བོ་ཞིག་སྒྲོན་མེ་ཁྱེར་ནས་འཚོལ་དུ་སོང་ཡང་རྙེད་པར་མི་འགྱུར་རོ༎
རང་དབང་གི་ལུང་པ་ན་ཁྱོད་ཤི་ང་གསོད་ཀྱི་འགྲན་རྩོད་ལས་རང་དབང་འཐབ་རྩོད་ཀྱི་ཕྱོགས་ལ་སེམས་པ་རྣམ་དག་གིས་ནུས་པ་འདོན་མཁན་ཧ་ཅང་དཀོན་པོ་རེད་འདུག མི་བདེན་ན་ལྟོས་དང་། རིག་གཞུང་གི་བྱས་རྗེས་ནི་གང་ཡང་མེད། མཐུན་སྒྲིལ་གྱི་དཔུང་པ་མཉམ་གཤིབ་ནི་དེ་བས་རི་བོང་གི་རྭ་ལྟ་བུ་རེད།
ཁ་ནས་བཤད་དུས་བོད་སྤྱི་དང་། ཆོལ་ག་གསུམ་གྱི་བདེ་སྡུག་ལ་བསམ་བློ་བཏང་བ་ལས་སྒེར་གྱི་དོན་ཆེན་ས་ལ་བཞག་སྟེ་ཉིན་མཚན་ཀུན་ཏུ་སྤྱི་བའི་ཆེད་དུ་ལས་ལ་གཞོལ་གྱིན་ཡོད་བ་མ་གཏོགས། དོན་ལ་རང་ཉིད་གཅིག་བུ་མ་གཏོགས་མི་བསམ་པའི་སྐུ་ངོ་ག་ཙམ་ཡོད། བག་ལེབ་ཁ་ནས་ཟོས་ན་གྲངས་ཀ་རིམ་ལ་གསལ་བོར་ཡོད་ཅེས་པའི་དཔེ་བཞིན་རེད། འདི་ཚོ་ལ་བསམ་བློ་རེ་བཏང་ན་ཡིད་ཐང་ཆད་དགོས་པ་ཞིག་རེད།
སྐུ་ངོ་ལྐོགས་ཟ་རུལ་བསུངས་བ་དེ་ཚོ་བསམ་ན་མྱུར་ཏུ་གངས་ཅན་ཡུལ་ལ་ལོགས་ཏེ་ཕ་མ་གཉིས་ཀྱི་ཞབས་ཞུ་ཧུར་ཐག་སྒྲུབ་བཞིན་སྲིད་དོན་རྒྱབ་ཏུ་དོར་ནས་འཚོ་བ་བདེ་བའི་ངང་སྐྱེལ་བསམ་བློ་ཞིག་ངང་གིས་སྐྱེས་འོང་འདུག
འདི་ཚོ་ཚང་མ་སྐ྄ུ་ངོ་ཁ་བདེ་མགོ་བདེ་དོན་ལ་མི་གནས་མཁན་དེ་ཚོའི་བྱ་སྤྱོད་ཀྱིས་བཟོས་པ་རེད། ཁོང་ཚོས་འདས་པའི་སྐུ་དྲག་ལམ་ལུགས་དེ་དོར་ནས་གསར་བྱུང་གི་རིག་པའི་ནུས་པ་བླ་མེད་འདོན་མ་ཐུབ་པར་ལྷག་པ་རེད་བསམ་གྱིན་ཡོད། ད་རེ་འདི་ཙམ་གྱི་ཆོག་པར་བྱ་རྒྱུ་ཡིན།
བདག་ཚོའི་སྲོག་རྩ་ཚོར་བཀྲིས་ཞུ།
ང་ཚོས་དུང་ལྷང་ལྷང་གི་སྤྱི་སྐད་ཀྱི་བུ་ཆུང་དེ་གནས་འདི་ནས་ངུ་སྐད་ཐོག་མ་ཤོར། བུ་ཆུང་ལགས་ཁྱོད་ཀྱི་མཛད་པ་མདོ་དབུས་ཁམས་དུ་ཁྱབ་དགོས། ཁྱོད་འཕྲིན་ལ་དབྱར་མཚོ་བཞིན་རྒྱས་དགོས། ད་ཡིན་ན་ཕྱོགས་གང་ཐད་ནས་ང་ཚོའི་དམིགས་འབེན་དེ་འགྲུབ་འདུག་
བཙན་གནོན་འོག་ནས་གཞོན་སྐྱེས་དེ་དག་གི་རང་མི་རིགས་ཀྱི་རིགས་གཞུང་དང་གོམས་གཤིས་སོགས་མདོར་ན་མི་རིགས་འདིའི་ཆས་གོས་ཡན་ནས་གཅེས་འཛིན་འདི་ལྟར་བྱས་པར་དད་པ་བྱེད་འོས་པ་ཞིག་རེད། དེ་བརྟེན་རང་དབང་ན་འཚོ་བའི་གཞོན་སྐྱེས་ཚོའི་སྐད་པའི་ནང་ཞོ་བླུག་མེད་དམ་་་་་་་་་་་་་་་་་་་་་་་་་་་་་་་་་་་་་་་་་་་་་་་་