ཁ་སང་ཕྱི་ཚེས་ ༢༠ ཉིན་རྒྱ་གར་དབུས་སྤྱི་ཁྱབ་དམག་དཔོན་ཆེན་མོ་བེ་ཇཱཡེ་ཀོ་མར་ Vijay Kumar Singh གཙོས་དམག་དོན་འཐུས་མི་ ༦ ཙམ་བལ་ཡུལ་ནང་བསྐྱོད་དེ། བལ་ཡུལ་གྱི་དམག་སྤྱི་ཆེན་མོ་ཅཱཧ་ཊི་ར་མན་ Chhatraman Singh Gurung དང་མཇལ་འཕྲད་ཀྱིས་ཕྱོགས་གཉིས་ཀྱི་མཐའ་མཚམས་སྲུང་སྐྱོབ་དང་། རྒྱལ་དོན་བདེ་འཇགས། ཉེས་དོན་འགོག་སྲུང་བཅས་ཀྱི་སྐོར་ལ་གྲོས་མོལ་བྱེད་ཀྱིན་ཡོད་འདུག
འདིའི་སྐོར་ལ་བལ་ཡུལ་དམག་དོན་སྤྱི་ཁྱབ་ཁང་གི་མགྲིན་ཚབ་པས་བརྗོད་ན། རེས་གཟའ་ཟླ་བའི་ཉིན་ཕྱོགས་གཉིས་ཀྱི་དམག་སྤྱི་ལྷན་འཛོམས་ཐོག རྒྱལ་ཁབ་གཉིས་ཀྱི་ས་འབྲེལ་མཐའ་མཚམས་ཁག་ལ་སྲུང་སྐྱོབ་དང་། འཇིགས་སྐུལ་རིང་ལུགས་པར་འགོག་རྒོལ་གྱིས་རྒྱལ་ཁབ་ཕན་ཚུན་ནང་ཤུགས་རྐྱེན་མ་ཐེབས་པ་བྱ་རྒྱུ་དང་། རྒྱལ་སྤྱི་རང་བཞིན་གྱི་དྲག་སྤྱོད་འཇིགས་རྒོལ་པ་དང་ཁྲིམས་འགལ་ཉེས་བསགས་དོན་རྐྱེན་རིགས་ལ། བལ་ཡུལ་གཞུང་ཕྱོགས་ནས་ལས་དོན་ཇི་ལྟར་བསྒྲུབ་དགོས་པ་སོགས་ཀྱི་ཐད་གྲོས་བསྡུར་བྱས་ཡོད་འདུག
དེ་རིང་རེས་གཟའ་མིག་དམར་ཉིན་དམག་སྤྱི་ཆེན་མོ་བེ་ཇཱཡེ་ཀོ་མར་དང་། དམག་དོན་འཐུས་མི་རྣམས་བལ་བོད་ས་མཚམས་ཀྱི་གློ་མོན་ཐང་ Mustang རི་འཛེགས་སྦྱོང་བརྡར་དམག་གི་བསྟི་གནས་སུ་ལྟ་སྐོར་དུ་བསྐྱོད་ཡོད་ལ། ས་གནས་དེར་ལོ་ ༤༠ ཡར་སྔོན་དུ་བོད་ཀྱི་འཇབ་དམག་གི་རྟེན་གཞི་བྱས་ཏེ། རྒྱ་ནག་ལ་དྲག་རྒོལ་གྱིས་འཐབ་འཛིང་བྱས་ཤིང་། རྗེས་སུ་བལ་ཡུལ་དམག་དཔུག་གིས་དྲག་རྒོལ་བྱས་ཏེ་བོད་དམག་རྣམས་ཕམ་ཉེས་བཏང་ཡོད། ད་ལྟའི་ཆར་ས་གནས་དེར་བལ་ཡུལ་གཞུང་གི་བཀའ་འབྲེལ་ཐོག རྒྱ་གར་དང་དབྱིན་ཇི། ཧྥ་རན་སི། ཨི་ཊ་ལི། སིང་ངྒ་ལཱ་བཅས་ཀྱི་དམག་མིར་སྦྱོང་བརྡར་སྤྲོད་བཞིན་ཡོད་འདུག
རྒྱ་གར་དམག་དཔོན་གྱིས་གློ་མོན་ཐང་ས་ཁུལ་གྱི་བལ་ཡུལ་དམག་གི་སྒྲུག་འཛུགས་ཁག་གི་ལྟ་སྐོར་གྲུབ་རྗེས། བལ་ཡུལ་སྤོག་ར་ས་གནས་ཀྱི་རྒྱ་གར་དམག་མིའི་སྦྱོང་བརྡར་རུ་ཤོག་གི་རྟེན་གཞི་གཙོ་བོར་གཟིགས་སྐོར་དང་། བལ་ཡུལ་སྤྱི་ཁྱབ་དམག་དཔོན་གཞོན་པ་ནཱར་བྷ་ཧ་ཌོར་དང་ལྷན་དུ་བལ་ཡུལ་ནུབ་ཁུལ་དམག་སྒར་ཁག་ཅིག་ཏུའང་བསྐྱོད་འཆར་ཡོད་འདུག
དེ་བཞིན། པཱན་ཆི་ཀལ་ས་གནས་ཀྱི་བལ་ཡུལ་གཏན་སྲུང་དམག་སྒར་ལ་གཟིགས་སྐོར་གྲུབ་རྗེས་བལ་ཡུལ་གྱི་རྒྱལ་ས་ཀ་ཐཱ་མན་ཌི་རུ་ཤེ་ཊལ་ནེ་ཝ་སིའི་དུས་སྟོན་མཛད་སྒོར་ཞུགས་རྒྱུ་དང་། སྐབས་དེར་བལ་ཡུལ་གྱི་སྲིད་བློན་དང་བདེ་སྲུང་བློན་ཆེན་སོགས་ལ་ཐུག་འཕྲད་དང་། མཛད་སྒོ་དེའི་སྟེང་བལ་ཡུལ་སྲིད་འཛིན་རཱམ་བྷ་རན་ Ram Baran Yadav ལགས་ཀྱིས། ཁོང་ལ་བལ་ཡུལ་རྒྱལ་ཁབ་གྱི་དམག་སྤྱི་ཆེན་མོའི་ཆེ་བསྟོད་གཟེངས་རྟགས་ཤིག་ཀྱང་འབུལ་རྒྱུ་ཡིན་འདུག
