ཕྱི་ཡིག་སྤྱད་ན་ཁྲིམས་ཆད་ཡོད།

ཟླ་འདིའི་ཕྱི་ཚེས་ ༢༠ ཉིན་རྒྱ་ནག་དབུས་གསར་འགྱུར་དཔར་སྐྲུན་སྤྱི་ཁྱབ་ཁང་གིས་རྒྱ་ནག་གི་ཞིང་ཆེན་དང་ཁུལ་ཐད་གཏོགས་གྲོང་ཁྱེར་བཅས་ཀྱི་གསར་འགྱུར་དཔར་སྐྲུན་ཁང་དང་། ཤིན་ཅང་འཛུགས་སྐྲུན་དམག་ཁུལ་གསར་འགྱུར་དཔར་སྐྲུན་ཁང་། བཅིངས་འགྲོལ་དམག་དཔུང་ཆབ་སྲིད་དྲིལ་བསྒྲགས་སྡེ་ཚན་བཅས་ཀྱི་ཡིག་ཆ་ཁག་ཏུ་ཕྱི་རྒྱལ་གྱི་སྐད་བརྡ་བསྲེས་སྦྱོར་བྱེད་མི་ཆོག་པའི་དོན་ཚན་དྲུག་ཅན་གྱི་བཀའ་རྒྱ་ཞིག་གསལ་བསྒྲགས་བྱས་ཡོད་འདུག   

གསལ་བསྒྲགས་དེའི་ནང་། གསར་ཤོག་ཁག་དང་དཔེ་སྐྲུན་ཁང་། སྒྲ་བརྙན་དཔར་སྐྲུན་ཁང་། གློག་རྡུལ་དཔེ་དེབ། རྒྱ་ཡིག་གི་གནས་འཕྲིན་དྲ་བ་སོགས་ནི་སྤྱི་ཚོགས་ཁྲོད་གནས་ཚུལ་མཁོ་གཏོང་བྱེད་པའི་བརྒྱུད་ལམ་གཙོ་བོ་དག་ཡིན་སྟབས། བརྒྱུད་ལམ་འདི་དག་གིས་རྒྱའི་སྐད་ཡིག་དར་སྤེལ་ཐད་ལས་འགན་ཆེན་པོ་ཡོད་འཁུར་དགོས། བརྒྱུད་ལམ་དེ་དག་གིས་རྒྱ་གཞུང་གི་༼ དཔར་བསྐྲུན་ཡིག་རིགས་བཀོལ་སྤྱོད་དོ་དམ་གཏན་འབེབས ༽ བཅའ་ཁྲིམས་ཀྱི་དོན་ཚན་ལྔ་བ་གཞིར་བཟུང་སྟེ།  ཚགས་པར་དང་། དུས་དེབ། བརྙན་དེབ།  སྒྲ་བརྙན་སོགས་སྒྲིག་སྦྱོར་དཔར་སྐྲུན་བྱེད་སྐབས་ཁ་བྱང་དང་ཕྱི་ཤོག་སོགས་ཀྱི་སྟེང་རྒྱ་ཡིག་ཁོ་ན་སྤྱོད་དགོས་པར་མ་ཟད། ཐོན་དངོས་རིགས་ཀྱི་ཕྱི་ཐུམ་མཛེས་བཟོ་དང་ཁྱབ་བསྒྲགས་ཀྱི་སྐབས་སུའང་ངེས་པར་དུ་ཚད་ལྡན་རྒྱ་ཡིག་གཙང་མ་བེད་སྤྱོད་བྱ་དགོས་པ་གཏན་འབེབས་དང་། རྩོམ་ཡིག་ནང་ཕྱི་ཕྱོགས་ནས་ཐོན་པའི་གསར་བྱུང་བརྡ་ཆད་རིགས།  དེ་བཞིན་ NBA, GDP, CPI, WTO  སོགས་ཀྱི་བསྡུས་མིང་དང་། ཕྱི་ཡིག་གི་ཕྲན་བཤད་སོགས་བཀག་འགོག་བྱས་ཏེ། མི་རིགས་རང་གི་རིག་གནས་དང་སྐད་ཡིག་དར་རྒྱས་སུ་འགྲོ་བར་སྣེ་ཁྲིད་ཀྱི་ནུས་པ་འདོན་དགོས། ལས་དོན་འདི་ནི་རྒྱལ་ཁབ་ཀྱི་གཞི་རྩའི་ལངས་ཕྱོགས་ཤིག་ཡིན་པས། གལ་སྲིད་གཏན་འབེབས་དེ་བརྩི་སྲུང་མ་བྱས་པར་རྒྱ་ནག་ཚད་ལྡན་དག་གཙང་སྤྱོད་རྒྱུར་འགོག་རྐྱེན་བཟོས་ཚེ་ཁྲིམས་ལུགས་ལྟར་ཉེས་ཆད་གཅོད་རྒྱུ་ཡིན་ཚུལ་སོགས་བཀོད་འདུག    

གནད་དོན་དེའི་ཐད་རྒྱ་ནག་ཕྱི་ནང་གཉིས་ཀྱི་རྒྱ་རིགས་ཆེད་མཁས་པ་དང་སྤྱི་ཚོགས་དཔྱད་བརྗོད་པ་དག་གིས་ལྟ་ཚུལ་འདྲ་མིན་འདོན་བཞིན་འདུག་ལ།  རྒྱ་ནག་ཧྲང་ཧེ་སློབ་ཆེན་གྱི་དགེ་རྒན་ཆེན་མོ་ཀྲུའོ་ཞེ་ཧྥུན་ལགས་ཀྱིས། བརྡ་ཁྱབ་གསལ་བསྒྲགས་དེ་ནི་དཔོན་རིགས་ཚོས་དབང་ཤུགས་ཐལ་སྤྱོད་བྱས་པ་ཞིག་ཡིན་པར་མ་ཟད། དེ་ནི་ཁོ་ཚོས་སྐད་ཡིག་སྲུང་སྐྱོབ་ལ་ཁ་གཡར་ཏེ་ཕྱི་ཕྱོགས་ཀྱི་རིག་གནས་དང་བསམ་བློའི་ཤུགས་རྐྱེན་རྒྱ་ནག་ནང་ལོགས་སུ་ཡོང་རྒྱུར་བཀག་འགོག་བྱས་ཏེ། རྒྱ་ནག་མི་མང་གི་བསམ་བློའི་འཆར་སྒོ་དང་སྨྲ་བརྗོད་རང་དབང་ལ་ཚད་བཀག་བཟོས་པ་ཞིག་རེད་ཟེར།    

དེང་སྐབས་རྒྱ་ནག་གིས་རྒྱུན་སྤྱོད་བྱེད་བཞིན་པའི་ཚན་རིག་སྐོར་གྱི་བརྡ་ཆད་ཚིག་མཛོད་ནང་གི་ཐ་སྙད་ཀྱི་བརྒྱ་ཆའི་  ༧༠ ནི་ཉི་ཧོང་གི་བརྡ་ཆད་ཡིན་པ་དང་།  ཨ་རིའི་ཊེ་ས་སི་(Texas)མངའ་སྡེ་རུ་རྟེན་གཞི་བྱས་པའི་འཛམ་གླིང་སྐད་ཡིག་ལྟ་རྟོག་ཚོགས་ཀྱི་སྡོམ་རྩིས་ལྟར་ན། ཆ་སྙོམས་བྱས་ན་ཉིན་རེར་རྒྱ་ཡིག་བརྡ་ཆད་གཅིག་རེ་དབྱིན་ཡིག་ཁྲོད་ནང་འདྲེན་བྱེད་བཞིན་ཡོད་འདུག  དེ་བཞིན།  རྒྱ་ནག་གིས་བོད་ཁུལ་དུ་དབང་བསྒྱུར་བྱས་པ་ནས་བཟུང་། བོད་མི་རིགས་ཀྱི་སྐད་ཡིག་རིག་གནས་ཀྱི་ཁྲོད་དུའང་རྒྱ་ཡིག་གི་བཙན་འཛུལ་སླེབས་མགོ་ཚུགས་ཏེ། ད་ལྟ་བོད་མིའི་རྒྱུན་སྤྱོད་སྐད་བརྡའི་ཁྲོད་རྒྱ་ཡིག་བསྲེས་ལྷད་ཤུགས་ཆེན་པོ་བྱུང་ཡོད་པར་མ་ཟད།  བོད་ཀྱི་ས་ཁུལ་ལ་ལར་བོད་རིགས་གཞོན་སྐྱེས་ཚོས་རང་གི་བོད་སྐད་ཀྱང་བརྗོད་མི་ཤེས་པའི་ཚད་ལ་སླེབས་ཡོད།   ཡིན་ནའང་། རྒྱ་གཞུང་གིས་བོད་ཁུལ་གྱི་སློབ་གྲྭ་ཁག་ཏུ་རྒྱ་ཡིག་གཙོ་བོར་བཟུང་བའི་སྐད་གཉིས་སློབ་གསོ་སྤེལ་དགོས་པར་མ་ཟད། བྱིས་གཉོར་ཁང་དུའང་རྒྱའི་སྐད་ཡིག་སློབ་ཁྲིད་བྱ་དགོས་པའི་སྲིད་ཇུས་ལག་བསྟར་བྱེད་བཞིན་ཡོད་པ་རེད། 

གསར་འགོད་པ། ཚེ་རིང་རྒྱལ།