དགེ་ལུགས་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་དང་དགེ་བཤེས་གོ་བོ་བློ་བཟང་ཕན་བདེ་ལགས་གཉིས་ཀྱིས་ཕྱི་ཟླ་ ༡༢ ཚེས་ ༢༧ ཉིན་སྩལ་བའི་གནས་ཆུང་ཆོས་རྒྱལ་ཆེན་པོའི་བཀའ་ལུང་དགོངས་དོན་ལྟར་ཉེས་པ་ལ་ཉེས་པར་མཐོང་སྟེ། སྔར་བྱས་ལ་འགྱོད་བཤགས་དང༌། ཕྱིན་ཆད་དེ་རིགས་མི་བྱེད་རྒྱུའི་ཁས་ལེན་དམ་བཅའ་གཙང་མ་ཞུས་འདུག
ཟླ་འདིའི་ཕྱི་ཚེས་ ༩ ཉིན་གདན་ས་ཆེན་པོ་དཔལ་ལྡན་འབྲས་སྤུངས་བླ་སྤྱི་ཡིས་གནས་ཆུང་ཆོས་རྒྱལ་ཆེན་མོ་མཆོག་གི་བཀའ་ལུང་ལྟར། སྤྱི་འཐུས་ཨ་ཀྲུག་ཚེ་བརྟན་ལགས་དང་སྤྱི་འཐུས་གོ་བོ་བློ་བཟང་ཕན་བདེ་ལགས་གཉིས། ཕྱི་ ལོ་ ༢༠༢༦ ལོའི་ཟླ་ ༡ ཚེས་ ༡༩ དང༌། བོད་ ཟླ་ ༡༢ ཚེས་ ༡ ནང་ཚུན་ལ་ངེས་པར་གྲྭ་སར་འབྱོར་བ་བྱས་ཏེ། བོད་ཚེས་གཉིས་ཏེ་གནས་ཆུང་ཆོས་རྒྱལ་ཆེན་པོའི་ལྷ་ཚེས་དགེ་བའི་ཉིན་ཞོགས་པའི་ལྷ་ཚེས་ཀྱི་སྐབས་དང་བསྟུན་ནས། འབྲས་སྤུངས་ཚོགས་ཆེན་དུ་༸རྒྱལ་བའི་བཞུགས་ཁྲི་རིན་པོ་ཆེའི་སྤྱན་སྔར་མཇལ་དར་སྒྲོན་འབུལ་དང༌། འབྲས་སྤུངས་ལྷ་མོ་ཁང་དུ་ གནས་ཆུང་ཆོས་རྒྱལ་ཆེན་པོས་བཀའ་ལུང་སྩལ་བའི་དགོངས་དོན་ལྟར་ཉེས་པ་ལ་ཉེས་པར་མཐོང་སྟེ། སྔར་བྱས་ལ་འགྱོད་བཤགས་དང༌། ཕྱིན་ཆད་མི་བྱེད་པའི་ཁས་ལེན་དམ་བཅའ་གཙང་མ་འཇོག་དགོས་པའི་སྐུལ་མ་གནང་བ་བཞིན། དེ་རིང་སྤྱི་འཐུས་རྣམ་གཉིས་ཀྱིས་བྱེད་ཀྱི་གདན་ས་ཆེན་པོ་དཔལ་ལྡན་འབྲས་སྤུངས་ཀྱི་ལྷ་མོ་ཁང་དུ་འགྱོད་བཤགས་དང་ཕྱིན་ཆད་ལས་རིགས་དེ་དག་ལ་མི་གཞོལ་རྒྱུའི་དམ་བཅའ་བཞག་ཡོད་འདུག
འདི་ག་གསར་ཁང་ལ་མཁོ་སྤྲོད་གནང་བའི་སྤྱི་འཐུས་རྣམ་གཉིས་ཀྱི་ཁས་ལེན་ཡིག་ཆའི་ནང་། ལྷུན་གྲུབ་ཆོས་དབྱིངས་ཕོ་བྲང་དམ་པ་ནས།། གདུག་པ་འདུལ་ཕྱིར་དྲག་མོའི་སྐུར་བསྟན་ཀྱང་། དངོས་གྲུབ་རིན་ཆེན་འདོད་དགུའི་ཆར་འབེབས་མ།། དམག་ཟོར་རྒྱལ་མོའི་ཞབས་ལ་ཕྱག་འཚལ་ལོ།། མ་མ་དཔལ་ལྡན་དམག་ཟོར་གྱི་རྒྱལ་མོ་བདག་ལ་དགོངས་སུ་གསོལ། བདག་བོད་མི་མང་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན། བོད་མི་མང་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ཞེས་བགྱི་བས། མཆོག་གསུམ་དཔང་དུ་བཙུགས་ཏེ། དུས་ད་ལྟ་པར་དུ་དྲིན་ཆེན་རྩ་བའི་བླ་མ་༸རྒྱལ་བ་རིན་པོ་ཆེ་ལ་མཚན་སྨད་ཚིག་གཅིག་ཀྱང་ཞུ་མ་མྱོང་ལ། མ་འོངས་པར་ཡང་འཆི་བ་སྲོག་ལ་ཐུག་ཀྱང་མཚན་སྨད་མི་ཞུ་རྒྱུའི་དམ་བཅའ་བརྟན་པོ་ཞུ་རྒྱུ་ཡིན། དེ་མིན་ཉེ་ལམ་ཕྱི་ཟླ་ ༡༢ ཚེས་ ༢༧ ཉིན་སྩལ་བའི་གནས་ཆུང་ཆོས་རྒྱལ་ཆེན་པོའི་བཀའ་ལུང་དགོངས་དོན་ལྟར་ཉེས་པ་ལ་ཉེས་པར་མཐོང་སྟེ། སྔར་བྱས་ལ་འགྱོད་བཤགས་དང༌། ཕྱིན་ཆད་དེ་རིགས་མི་བྱེད་རྒྱུའི་ཁས་ལེན་དམ་བཅའ་གཙང་མ་ཞུས་པ་ཡིན། ཅེས་གསལ་འདུག
ཟླ་འདིའི་ཕྱི་ཚེས་ ༩ ཉིན་འབྲས་སྤུངས་བླ་སྤྱི་ཡིས་སྤེལ་བའི་སྤྱི་མོས་ཐག་གཅོད་ཀྱིས་སྤྱི་འཐུས་རྣམ་པ་གཉིས་ལ་བསྐུར་བའི་འཕྲིན་ཡིག་ཁྲོད། ཕྱི་ཚེས་ ༢༧ ཉིན་དཔལ་ལྡན་འབྲས་དཀར་སྤུངས་པ་དང་ྋརྒྱལ་དབང་སྐུ་ཕྲེང་རིམ་བྱོན་བར་ཐུན་མིན་དམ་ཟབ་ཀྱི་འབྲེལ་བར་བརྟེན། དུས་ཚིགས་ཁྱད་པར་ཅན་འདིར་གདན་ས་འདིའི་ངོས་ནས་བསྒྲུབ་དགོས་ཀྱི་བཀའ་ལུང་ཅི་ཡོད་ཐད། སྤྱིར་གཞུང་རྟེན་དགྲ་ལྷའི་གཙོ་བོ། སྒོས་རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོས་བཀའ་ བསྒོས་གཉེར་གཏད་མཛད་པའི་ངེད་འབྲས་སྤུངས་པའི་ཐུན་མོང་མ་ཡིན་པའི་བཀའ་སྲུང་གནས་ཆུང་ཆོས་ རྒྱལ་ཆེན་པོ་སྤྱན་འདྲེན་ཞུས་པར། རྡོ་རྗེའི་བཀའ་ལུང་དུ་ “དཔལ་ལྡན་འབྲས་དཀར་སྤུངས་པའི་མཁན་བླ་འདུས་སྡེ་སྤྱི་ནས་ངོས་ཀྱི་སློབ་དཔོན་མཐོང་བ་དོན་ལྡན་མཆོག་ལ་སྐུ་ཚེ་ཞབས་པད་བརྟན་ཕྱིར་བརྟན་བཞུགས་ཟབ་མོ་ལེགས་པར་བགྱིས་པ་འདི་ནི་ཤིན་ཏུ་ལེགས་ལ། འོན་ཀྱང་ཕྱི་ཡི་རིམ་གྲོ་བསྒྲུབས་དང་སྒྲུབ་བཞིན་ནའང་ནང་དུ་དམ་ཚིག་མི་གཙང་བའི་འགལ་རྐྱེན་ཡོད་ཙ་ན། རང་ཅག་རི་བོ་དགེ་ལུགས་པའི་མགྲིན་ཚབ་མིང་ཅན་རེ་པ་གཉིས་ནས་འབྱུང་པོས་རྒྱུད་བསྐུལ་ཏེ་ངག་བློ་ཐལ་ཏེ་གང་བྱུང་བྱ་ངན་དང༌། ངོས་ཀྱི་སློབ་དཔོན་མཐོང་བ་དོན་ལྡན་མཆོག་ལ་མཚན་སྨད་ཞུ་བ་དང༌། ཁ་བའི་ལྗོངས་ཀྱི་སྤྱི་དོན་བོར་ཏེ་ཆོལ་ཁ་ཆོས་ལུགས་འཐེན་འཁྱེར་བགྱིད་པ་འདི་ནི་སྐྱེ་བོ་ཀུན་གྱི་མིག་གིས་མཐོང་བ་དེ་ཡིན་ལ། དེས་མཚོན་པས་དགྲ་བཅོམ་འཕགས་པའི་དགེ་འདུན་རྣམས་ལ་ཡང་མཚན་སྨད་ཞུ་བའི་དུས་ལ་བབས་པས་ན་འགན་འཁུར་བ་རྣམ་པས་མཚམས་འཇོག་ལེགས་པར་བགྱིད་ན་ལེགས་ སོ།” ཞེས་གསལ་རྗེན་དུ་སྩལ་འདུག་པའི་དགོངས་དོན་གྲོས་བསྡུར་གྱིས་ཐག་གཅོད་བྱུང་དོན་ནི། སྤྱི་འཐུས་ཨ་ ཀྲུག་ཚེ་བརྟན་དང་སྤྱི་འཐུས་གོ་བོ་བློ་བཟང་ཕན་བདེ་ཁྱེད་གཉིས། ཕྱི་ ལོ་ ༢༠༢༦ ལོའི་ཟླ་ ༡ ཚེས་ ༡༩ དང༌། བོད་ ཟླ་ ༡༢ ཚེས་ ༡ ནང་ཚུན་ལ་ངེས་པར་གྲྭ་སར་འབྱོར་བ་བྱས་ཏེ། བོད་ཚེས་གཉིས་ཏེ་གནས་ཆུང་ཆོས་རྒྱལ་ཆེན་པོའི་ལྷ་ཚེས་དགེ་བའི་ཉིན་ཞོགས་པའི་ལྷ་ཚེས་ཀྱི་སྐབས་དང་བསྟུན་ནས། འབྲས་སྤུངས་ཚོགས་ཆེན་དུ་༸རྒྱལ་བའི་བཞུགས་ཁྲི་རིན་པོ་ཆེའི་སྤྱན་སྔར་མཇལ་དར་སྒྲོན་འབུལ་དང༌། འབྲས་སྤུངས་ལྷ་མོ་ཁང་དུ་གནས་ཆུང་ཆོས་རྒྱལ་ཆེན་པོས་བཀའ་ལུང་སྩལ་བའི་དགོངས་དོན་ལྟར་ཉེས་པ་ལ་ཉེས་པར་མཐོང་སྟེ། སྔར་བྱས་ལ་འགྱོད་བཤགས་དང༌། ཕྱིན་ཆད་མི་བྱེད་པའི་ཁས་ལེན་དམ་བཅའ་གཙང་མ་འཇོག་དགོས་པའི་སྐུལ་མ་བྱེད་བཞིན་ཡོད། གལ་ཏེ་དེ་ལྟར་མ་བྱུང་ཚེ་དཔལ་ལྡན་འབྲས་དཀར་སྤུངས་པའི་ངོས་ནས་རི་བོ་དགེ་ལུགས་པའི་མགྲིན་ཚབ་ཏུ་ངོས་ལེན་ཞུ་ཐབས་མེད། གྲྭ་ཚང་གཉིས་ནས་ཀྱང་ཐག་གཅོད་ནན་པོ་གནང་རྒྱུའི་ཐག་གཅོད་བྱུང་ཡོད། ཅེས་གསལ་འདུག
ཡང་འཕྲིན་ཡིག་ནང་། ལར་ནས་དམ་ཚིག་མི་གཙང་བའི་འགལ་རྐྱེན་འདི་སེལ་དགོས་དོན་ཡང་། གནས་ཆུང་ཆོས་རྒྱལ་ཆེན་པོའི་བཀའ་ལུང་དགོངས་དོན་དང་ཡོངས་སུ་མཐུན་པར། ཆོལ་གསུམ་ཆིག་སྒྲིལ་གྱི་སྤྱི་དོན་ནུས་པ་ཉམས་དམས་དང་། དཔལ་ལྡན་འབྲས་དཀར་སྤུངས་པས་མཚོན་ཕྱོགས་བཅུའི་དགེ་འདུན་གྱི་སྡེར་ངན་སྨྲས་ཀྱི་ལས་ངན་གསོག་པ་དང༌། ཁྱད་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ལའང་གཅིག་ཏུ་གནོད་པའི་ལས་སུ་འགྱུར་བར་ངེས་པས་ན། གནད་དོན་འདི་རང་དགར་འཇོག་ག་ལ་བཟོད། དེར་བརྟེན་གོང་སྨོས་ཀྱི་ཐབས་ལམ་འདི་བཙལ་བ་ལགས་ན། ལས་དོན་འདིའི་ཐད་གྲྭ་ཚང་ཤར་ནུབ་གཉིས་ནས་ཀྱང་འགན་འཁུར་གནང་དགོས་པ་མ་ཟད། དགའ་ལྡན་ཁྲི་ཐོག་ཁང་དང་རྒྱལ་སྤྱིའི་དགེ་ལྡན་ལྷན་ཚོགས་ནས་ཀྱང་ལས་དོན་འདིའི་ཐད་ཐུགས་ཁུར་དང༌། རམ་འདེགས་གནང་སྐྱོང་ཡོང་བ་ཞེས་ཁོངས་སོ་སོར་ཞུས་ཟིན་པ་ལྟར་ཁྱེད་གཉིས་ནས་དེ་དོན་བཞིན་ཉམས་ལེན་ཚུལ་བཞིན་ཡོང་བའི་རེ་སྐུལ་བཅས། ཅེས་གསལ་འདུག
སྤྱི་ཚོགས་དྲ་ལམ་ཁག་ཏུ་སྤྱི་འཐུས་རྣམ་གཉིས་ཀྱིས་འགྱོད་བཤགས་དང་ཁས་ལེན་དམ་བཅའ་གྲུབ་རྗེས། དགེ་འདུན་པ་ཁག་ཅིག་གིས་བླ་སྤྱིའི་མདུན་ཐང་ནས་ཁ་བཏགས་འཐེན་པ་དང་། རྒྱབ་སྐྱོར་དང་དགའ་བསུ་གནང་བའི་བརྙན་དང་པར་རིས་ཁྱབ་ནས། དེར་དྲང་ལྡོག་གཉིས་ཀྱི་ཐོག་ནས་གླེང་སློང་བྱེད་མཁན་མང་དག་ཅིག་བྱུང་དང་འབྱུང་མུས་ཡིན་འདུག
གསར་འགོད་པ། དཔལ་ལྡན།
བྱེས་ཀྱི་གདན་ས་ཞེས་པར་བྱེད་ཀྱི་གདན་ས་སླེབས་ཤག
ཡ་གི་ལྟག་ལ་གནས་ཆུང་ལ་གསན་ཆུང་བྲིས་གནང་འདུག ནོར་བཅོས་བགྱིས་ན་དེ་བས་མཛེས་སྣང་ངོ།