སྲིད་འཛིན་བར་གྱི་འཐབ་རྩོད།

ཨ་ཧྥི་རི་ཀའི་ཁོ་ཐེ་ཏི་ཝོར་སྤྱི་མཐུན་རྒྱལ་ཁབ་ ( Ivory Coast) ཀྱི་སྲིད་འཛིན་གསར་རྙིང་གི་རྙོག་གླེང་ལ་བརྟེན་ནས་ནང་ཁུལ་ཟིང་འཁྲུག་འབྱུང་ཉེན་ཡོད་འདུག

༢༠༠༠ ལོའི་སྤྱི་མཐུན་རྒྱལ་ཁབ་དེའི་སྲིད་འཛིན་འོས་འདེམས་སྐབས། སྐུ་ཞབས་བྷག་བྷོ་ Gbagbo ཟེར་བར་སྲིད་འཛིན་དུ་ཐོབ་སྟེ་ ༢༠༠༥ ལས་ཡུན་རྫོགས་ཡོད་ཀྱང་། ཁོས་སྒེར་གྱི་དམག་མིའི་དཔུང་ཤུགས་ལ་བརྟེན་ ༢༠༡༠ ལོའི་བར་སྲིད་འཛིན་བསྐྱར་འདེམས་བྱེད་བཅུག་མེད། ད་ལོའི་ཕྱི་ཟླ་ ༡༡ པའི་ནང་སླར་ཡང་འོས་བསྡུའི་ལས་རིམ་སྒྲུབ་ཐུབ་ཙམ་བྱུང་སྟེ། རྒྱལ་ཡོངས་འོས་བསྡུ་ལྷན་ཁང་གིས་འོས་ཤོག་གྲངས་བཤེར་གྱི་གྲུབ་འབྲས་གསལ་བསྒྲགས་བྱས་པའི་ནང་། སྔར་གྱི་སྲིད་བློན་ཟུར་བ་སྐུ་ཞབས་ཨ་ལཱ་སན་ Alassane Ouattara ལགས་སུ་འོས་ཤོག་བརྒྱ་ཆ་ ༥༤ ཐོབ་ཡོད་པ་དང་། ད་ལྟའི་སྲིད་འཛིན་བྷག་བྷོ་ལ་འོས་ཤོག་བརྒྱ་ཆ་ ༤༦ ལས་ཐོབ་མེད་སྟབས།  སྐུ་ཞབས་ཨ་ལཱ་སན་ལགས་ལ་ ༢༠༡༠ ལོའི་ཁོ་ཐེ་ཏི་ཝོར་སྤྱི་མཐུན་རྒྱལ་ཁབ་སྲིད་འཛིན་གསར་པར་ཁྱབ་བསྒྲགས་བྱས་ཡོད། དེ་བཞིན། མཉམ་འབྲེལ་རྒྱལ་ཚོགས་གཙོས་པའི་རྒྱལ་ཁབ་ཁག་མང་པོ་ཞིག་གིས་ཀྱང་སྐུ་ཞབས་ཨ་ལཱ་སན་ལགས་སྲིད་འཛིན་གསར་པར་ངོས་འཛིན་ཐོག་རྟེན་འབྲེལ་ཞུས་ཡོད།  

འོན་ཀྱང་། སྲིད་འཛིན་བྷག་བྷོ་ཡིས་ད་དུང་སྲིད་འཛིན་གྱི་གོ་གནས་རྒྱུན་འཛིན་བྱས་ཏེ། གསར་དུ་བདམས་ཐོན་བྱུང་བའི་སྲིད་འཛིན་ཨ་ལཱ་སན་ལ་གོ་གནས་རྩིས་སྤྲོད་བྱེད་ཀྱི་མེད་སྟབས། བྷག་བྷོའི་སྟངས་འཛིན་འོག་གི་དམག་དཔུང་དང་ཨ་ལཱ་སན་ཕྱོགས་གཏོགས་བར་ཟིང་འཁྲུག་འབྱུང་རྒྱུའི་ཉེན་ཁར་ཐུག་ཡོད་འདུག ད་ལྟའི་ཁོ་ཐེ་དི་ཝོར་སྤྱི་མཐུན་རྒྱལ་ཁབ་ཀྱི་གནས་བབ་ཛ་དྲག་ཏུ་འགྲོ་བཞིན་ཡོད་སྟབས། ཧྥ་རན་སིའི་གཞུང་གིས་གསལ་བསྒྲགས་ཤིག་སྤེལ་ཡོད་པའི་ནང་། དེར་ཡོད་ཧྥ་རན་སིའི་མི་སེར་ ༡༥༠༠༠ ལྷག་ཡོད་པ་རྣམས་ཕྱིར་རང་རྒྱལ་དུ་ལོག་དགོས་སྐོར་བརྗོད་འདུག

ཚེས་ ༢༡ ཉིན་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཀེ་མོན་གྱིས། ཁོ་ཐེ་དི་སྤྱི་མཐུན་རྒྱལ་ཁབ་ལ་སླར་ཡང་ཟིང་འཁྲུག་ཡོང་ཉེན་ཡོད་པ་དེས་མང་ཚོགས་ལ་བརྡབ་གསིག་ཆེན་པོ་ཐེབས་ཀྱི་ཡིན་པ་དང་། རྒྱལ་ཁབ་དེར་ཡོད་པའི་མཉམ་འབྲེལ་རྒྱལ་ཚོགས་ཀྱི་བདེ་འཇག་དམག་མིར་ཡང་ཉེན་ཁ་འབྱུང་སྲིད་པས། རྒྱལ་སྤྱིའི་སྲིད་གཞུང་ཁག་ནས་མགྱོགས་མྱུར་ངང་སྲིད་འཛིན་བྷག་བྷོ་ལ་གནོད་ཤུགས་སྤྲོད་དགོས་པའི་འབོད་སྐུལ་ཞུས་འདུག

དེ་བཞིན་ཨ་རིའི་ཕྱི་སྲིད་མགྲིན་ཚབ་པ་དང་ཡུ་རོ་མཐུན་ཚོགས་ཀྱི་ཕྱི་སྲིད་བདེ་དོན་ལས་ཁུངས་ཀྱི་ཚོགས་གཙོ་བཅས་ཀྱིས་ཀྱང་། ཐེངས་འདིར་མཉམ་འབྲེལ་རྒྱལ་ཚོགས་ཀྱི་ངོས་ནས་གཙོ་འགན་འཁུར་དགོས་པ་དང་། སྲིད་འཛིན་གྱི་འོས་ཤོག་ཐད་གནད་དོན་གང་ཡང་མེད་པས། གནད་དོན་གཙོ་བོ་སྲིད་འཛིན་རྙིང་པ་གོ་གནས་ནས་འབབ་རྒྱུ་དེ་ཡིན་པར་བརྗོད་འདུག

གསར་འགོད་པ། བནྡེ་སྐྱབས།