ཟླ་འདིའི་ཕྱི་ཚེས་ ༡༨ ཉིན་མགོ་ལོག་བོད་རིགས་རང་སྐྱོང་ཁུལ་གངས་ལྗོངས་ཤེས་རིག་ཡར་སྐུལ་ཚོགས་པས་གོ་སྒྲིག་འོག ༼ མཚོ་སྔོན་ཞིང་ཆེན་གྱི་སྐབས་དང་པོའི་བོད་ཀྱི་ཐ་སྙད་གསར་བའི་འགྲན་བསྡུར ༽ ཞུ་བ་དེ་ཟི་ལིང་གྲོང་ཁྱེར་དུ་བསྡུས་ཡོད་འདུག་ལ། ཐེངས་འདིའི་འགྲན་བསྡུར་གྱི་དཔྱད་འདེམས་པ་དང་སྐུ་མགྲོན་དུ་མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་སངས་རྒྱས་དང་སྦྲང་ཆར་རྩོམ་སྒྲིག་ཁང་གི་ཟླ་བ་བློ་གྲོས། རྩོམ་པ་པོ་འཇུ་སྐལ་བཟང་ལགས་བཅས་གཙོས། གངས་ལྗོངས་ཤེས་རིག་ནོར་བུའི་སློབ་གླིང་གི་གླིང་གཙོ་འཇིགས་མེད་རྒྱལ་མཚན་ལགས་བཅས་དང་། གཞན། ཞིང་ཆེན་དང་ཁུལ་གཞན་གྱི་བོད་རིགས་མཁས་དབང་དང་བསམ་བློ་བ། དགོན་སྡེ་ཁག་ཅིག་གི་བླ་མ་དང་དགེ་བཤེས། དབུ་ཁྲིད་ལས་བྱེད། བོད་རང་འབྲོག་མང་ཚོགས་ཀྱི་འཐུས་ཚབ་མི་སྣ་བཅས་ཀྱང་མཉམ་ཞུགས་གནང་ཡོད་འདུག
ཐེངས་འདིའི་འགྲན་བསྡུར་དེ་འདི་ལོའི་ཟླ་ ༣ གྱི་སྔོན་ནས་བཟུང་གངས་ལྗོངས་ཤེས་རིག་ཡར་སྐུལ་ཚོགས་པས་མཚོ་སྔོན་ཞིང་ཆེན་ནང་ཁུལ་གྱི་སློབ་ཆེན་དང་སློབ་འབྲིང་བར་གྱི་སློབ་གྲྭ་ཁག་ལ་གསལ་བསྒྲགས་བཏང་སྟེ། བོད་ཆོལ་ཁ་གསུམ་གྱི་མཁས་དབང་དང་ལོ་ཙཱ་བ་མཉམ་རུབ་ཀྱིས་བསྡུ་སྒྲིག་བྱས་པའི་༼ རིས་འབྲེལ་མིང་མཛོད ༽ དང༌༼ རྒྱ་བོད་དབྱིན་གསུམ་གསར་བྱུང་རྒྱུན་བཀོལ་མིང་མཛོད ༽ ནང་གི་ཐ་སྙད་དང་ཚིག་གྲུབ་ལ་རྐང་བཙུགས་ཏེ། ཕ་སྐད་འགྲན་བསྡུར་གྱི་བྱ་འགུལ་སྤེལ་ཡོད་འདུག་ལ། འགྲན་བསྡུར་རྒྱུགས་གཞི་ནི། དེང་རབས་ཀྱི་ཁྱད་ཆོས་ལྡན་པའི་བརྙན་ཡོལ་ནས་འགྲན་ཞུགས་སློབ་མ་གསུམ་རེ་བདམས་ཏེ། ཡིག་འབྲི་གང་བབས་ལྟར་ཐ་སྙད་ངོས་འཛིན་ཐུབ་མིན་གྱི་བྱེད་ཐབས་དང་དྲི་བ་བཏང་ཡོད་ཅིང་། དེ་བཞིན་མེ་ཏོག་འདབ་དྲུག་དང༌བཀྲ་ཤིས་རྟགས་བརྒྱད། གློག་འཕྲུལ་འཐེབ་གནོན་སོགས་སྔོན་མེད་གསར་གཏོད་ཀྱི་ཐ་སྙད་ལ་ཁ་གཏད་དེ། རྒྱུགས་ལེན་ནམ་འགྲན་བསྡུར་གྱི་བྱེད་ཐབས་འདྲ་མིན་གྱི་ལམ་ནས་དྲི་བ་བཏོན་མཐར། ཐེངས་འདིའི་ཕ་སྐད་ཐ་སྙད་འགྲན་བསྡུར་ཁྲོད་མགོ་ལོག་ཁུལ་བོད་ཡིག་སློབ་འབྲིང་གི་འཐུས་ཚབ་སློབ་མར་ཨང་དང་པོ་དང་། མཚོ་སྔོན་ཞིང་ཆེན་མི་རིགས་དགེ་ཐོན་སློབ་འབྲིང་གི་འཐུས་ཚབ་སློབ་མར་ཨང་གཉིས་པ། མཚོ་ལྷོ་ཁུལ་གྱི་སློབ་མའི་འཐུས་ཚབ་སློབ་མར་ཨང་གསུམ་པ་བཅས་ཐོབ་འདུག་ལ། དཔའ་ལུང་བོད་ཡིག་སློབ་འབྲིང་ལ་རྟིང་སྐུལ་གྱི་བྱ་དགའ་ཡང་གནང་ཡོད་པ་རེད།
ཐེངས་འདིའི་བྱ་འགུལ་གྱི་དམིགས་ཡུལ་གཙོ་བོ། རྒྱ་ནག་རྒྱལ་ཡོངས་ཀྱི་གཏན་འབེབས་དང་མཐུན་པའི་འོག་ནས་མི་རིགས་ཀྱི་སྐད་དང་ཡི་གེ་སྲུང་སྐྱོབ་གལ་གནད་དུ་བཟུང་སྟེ། འཛམ་གླིང་གི་ཐ་སྙད་གསར་བའི་འཕེལ་རྒྱས་རང་སྐད་དུ་ནང་འདྲེན་དང་བེད་སྤྱོད་བྱེད་ཐུབ་དགོས་པའི་སྐུལ་ལྕག་གཏོང་ཆེད་ཡིན་འདུག་ལ། ཐེངས་འདིར་གངས་ལྗོངས་ཤེས་རིག་ཡར་སྐུལ་ཚོགས་པས་མགོ་བོད་ཁུལ་གྱི་ས་གནས་ཁག་གི་མཁས་པ་དང་དབུ་ཁྲིད། རོང་འབྲོག་མང་ཚོགས་ཀྱི་སྐུ་ཚབ། མདོ་འཛིན་པ་དང་བརྙན་གཏོང་བ། གཞས་བ་གཞས་མ་བཅས་མི་ ༤༠༠ ལྷག་གདན་ཞུ་གནང་སྟེ་གསུང་བཤད་དང་དྲི་བ་དྲིས་ལན། ལོ་ཙཱའི་སྐོར་གྱི་འཆད་ཁྲིད་སོགས་ཀྱང་གོ་སྒྲིག་གནང་ཡོད་འདུག
གསར་འགོད་པ། དོན་གོ
ཡག་པོ་ཞེ་དྲགས་འདུག་རྒྱབ་སྐྱོར་ཡོད།
བོད་སྐད་གཙང་མ་བཤད་རྒྱུ་དང་བོད་ཡིག་ལ་གཅེས་སྐྱོང་བྱེད་རྒྱུ་ང་ཚོ་ཚང་མའི་ཕྲག་ཏུ་བབས་པའིལས་འགན་ཡིན་པས་ང་ཚོ་སོ་སོ་རང་ངོས་ནས་ཀྱང་བོད་སྐད་
གཙང་མ་དང་བོད་ཡིག་སྦྱོང་བརྡར་བྱེད་རྒྱུའི་དུས་ལ་བབས་འདུག་པས་འདི་
འདྲའི་ལས་སྤེལ་བ་ཧ་ཅང་ཡག་པོ་འདུག
ཧ་ཧ་ཐེངས་འདིའི་གོ་བསྒྲིགས་ཚོགས་མི་རྣམས་ལ་སྙིང་ཐག་པ་ནས་རྟེན་འབྲེལ་ཞུ་
མ་འོངས་པ་ནའང་རྒྱུན་སྲིངས་བྱེད་རྒྱུ་ཧ་ཅང་གལ་ཆེན་པོ་འདུག
བོད་སྐད་གཙང་མ་བཤད་རྒྱུ་དང་བོད་ཡིག་ལ་གཅེས་སྲུང་བྱེད་པ་བོད་ནང་ཁུལ་གྱི་གཞོན་སྐྱེས་ཚོས་འགན་འཁྲི་རེད། ཕྱི་སྡོད་བོད་པ་ཚོས་བོད་ཀྱི་སྲོལ་རྒྱུན་བཟང་རབ་དང་ང་ཚོ་ལ་ཐུན་མོང་མིན་རིགས་གཞུང་ཁྱད་འཕགས་ཅན་ཡོད་ཅེས་འཛམ་བུ་གླིང་ལ་སྒོར་མོ་སྤྲང་སྐབས་བསྟོད་བསྔགས་ཁོ་ན་བྱས་ན་ལས་འགན་ཡོངས་འགྲུབ་སོང་རེད།
དེ་ཧ་ཅང་ཡག་པོ་རེད། ལོ་ལྟར་འདི་འདྲར་ཡོང་ན་ཧྲ་གི ཡིན་ནའང་ཨ་རིའི་ནང་ལོ་ལྟར་ཡོད་པ་རེད། དེ་སློབ་མ་ཚོ་ཕན་ཐོག་ཆེན་པོ་འདུག
འཇིག་ལ་ཉེ་བའི་བོད་ཀྱི་ཐ་སྙད་རྣམས་འདི་འདྲའི་ལས་འགུལ་ཁ་ཤས་སྤེལ་ན་སྐྱོབས་ཐུབ་པའི་རེ་བ་ཕྲན་ཙམ་འདུག ལས་འགུལ་འདི་ལྟ་བུ་རྡ་རམ་ས་ལའི་ཀླད་པ་ནང་ལ་དུས་ནམ་ཡང་དྲན་ཐུབ་གི་མ་རེད། ཨ་ཤི་རེ་ཁོ།།
ཡག་པོ་འདུག རྒྱབ་སྐྱོར་ཡོད།