ཟླ་འདིའི་ཕྱི་ཚེས་ ༢༦ ཉིན་བོད་མདོ་སྨད་མང་ར་རྫོང་ཀླུ་ཚང་དགོན་པའི་དགེ་འདུན་པ་ ༤ ཡི་ལོ་གཉིས་ཀྱི་དུས་བཀག་བཙོན་འཇུག་གི་དུས་ཡུན་རྫོགས་ཏེ་ཀློད་གྲོལ་བཏང་ཡོད་འདུག ཁོང་ཅག་ནི་ཕྱི་ལོ་ ༢༠༠༩ ལོའི་བོད་ཀྱི་ལོ་གསར་སྐབས་སུ་ཨ་མདོ་མང་ར་རྫོང་ཁོངས་སུ་ཡོད་པའི་ཀླུ་ཚང་དགོན་པའི་གྲྭ་པ་བརྒྱ་ཙམ་གྱིས་མར་མེ་ཁྲོམ་སྐོར་བྱས་ཏེ། ས་གནས་རྫོང་སྲིད་གཞུང་གི་སྒོ་ཁར་འདུ་འཛོམས་ཀྱིས་ངོ་རྒོལ་བྱས་པའི་སྐབས། རྒྱ་ནག་གཞུང་གིས་འཛིན་བཟུང་གིས་ལོ་གཉིས་ཀྱི་དུས་བཅད་བཙོན་འཇུག་གི་ཉེས་ཁྲིམས་བཅད་ཡོད་པའི་ལོ་བ་སྡེ་བའི་གྲྭ་བཟོད་པ་རྒྱ་མཚོ་དང་། རུ་མང་སྡེ་བའི་གྲྭ་ལུང་རྟོགས་རྒྱ་མཚོ་དང་སྐལ་བཟང་རྒྱ་མཚོ། བྱ་གཞུང་སྡེ་བའི་གྲྭ་བཟོད་པ་རྒྱ་མཚོ་བཅས་བཞི་ལ་དུས་བཅད་བཙོན་འཇུག་ལོངས་ཏེ་ཟླ་འདིའི་ཕྱི་ཚེས་ ༢༦ ཉིན་ཀློད་གྲོལ་བཏང་འདུག
རྒྱ་གར་དུ་ཡོད་པའི་བློ་བཟང་ལགས་ཀྱིས་ནོར་ཝེ་བོད་ཀྱི་རླུང་འཕྲིན་ཁང་ལ་གནས་ཚུལ་བརྗོད་པ་ལྟར་ན། གྲྭ་བ་དེ་དག་ལ་བཙོན་འཇུག་དུས་བཅད་ལོངས་ཏེ་ཀློད་གྲོལ་བཏང་ཟིན་ནའང་། བཙོན་འཇུག་སྐབས་གཅར་རྡུང་དང་ངལ་རྩོལ་བསྒྱུར་བཀོལ་ཤུགས་ཆེན་པོ་བྱས་པར་བརྟེན་ཁོ་ཚོའི་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་འདུག ད་ལྟ་ཁོ་སོ་སོའི་ནང་ལ་ལོགས་སུ་བཅུགས་ཡོད་ནའང་། ཕྱིར་དགོན་པར་འཛུལ་ཞུགས་ཆོག་མིན་ད་དུང་གསལ་བོ་བྱུང་མེད་སྐོར་བརྗོད་འདུག
མདོ་སྨད་ཀླུ་ཚང་དགོན་པའི་དགེ་འདུན་པ་རྣམས་ཀྱིས་ཕྱི་ལོ་ ༢༠༠༨ ལོའི་གསུམ་བཅུ་དུས་དྲན་དང་། ཕྱི་ལོ་ ༢༠༠༩ ལོའི་བོད་ཀྱི་ལོ་གསར་སྐབས་གཉིས་སུ་སྔར་རྗེས་ངོ་རྒོལ་ཁྲོམ་སྐོར་བྱས་པ་ནས་བཟུང་། རྒྱ་གཞུང་གིས་དགོན་པའི་ནང་ལྟ་རྟོག་པ་གཏན་སྡོད་བྱས་ཏེ་དགོན་པའི་ཆོས་ཕྱོགས་ཀྱི་བྱེད་སྒོ་འཐའ་དག་ལ་དོགས་ཟོན་དང་བཀག་སྡོམ་བྱེད་བཞིན་ཡོད་འདུག
གསར་འགོད་པ། ཚེ་རིང་རྒྱལ།
ཁོང་ཚོའི་སྙིང་སྟོབས་དང་ཆོད་སེམས་ལ་རྗེས་སུ་ཡི་རིངས་བྱེད། བོད་མི་རིགས་ཀྱི་དཔའ་རྒོད་ཚོ།
ཀླུ་ཚང་དགོན་པའི་ཨ་ཁུ་བཞི་བོར་དགའ་སྤྲོའི་འཚམས་འདྲི་ཞུ།