བོད་ནས་གསར་དུ་འབྱོར་བའི་བོད་རིགས་ན་གཞོན་གཉིས་ཀྱིས་གནའ་དེང་ཟུང་འབྲེལ་གྱི་བཟོ་ཚང་ཁང་ཞིག་བཙུགས་ཏེ། བོད་ཀྱི་སྲོལ་རྒྱུན་གྱོན་གོས་བཟོ་བཀོད་རྨང་གཞིར་བྱས་ཏེ་དེང་རབས་ཀྱི་ཁྱད་ཆོས་ལྡན་པའི་བཟོ་བཀོད་སྣ་ཁ་ལྔ་བཅུ་ལྷག་གསར་བཏོད་བྱས་པས། ཉོ་མཁན་གྱིས་དགའ་བསུ་ཆེན་པོ་ཐོབ་ཀྱིན་ཡོད་འདུག
བོད་མི་རིགས་རང་གི་ཁྱད་ཆོས་མངོན་གསལ་ལྡན་པ་དང་བལྟས་ན་མིག་ལ་མཛེས་ཤིང་གྱོན་ན་ལུས་ལ་བདེ་བའི་བོད་ཀྱི་སྲོལ་རྒྱུན་གྱོན་གོས་ནི། གནའ་ནས་ད་ལྟའི་བར་དུ་བོད་མིའི་ཡབ་མེས་ཡང་མེས་རྣམས་ཀྱིས་མེད་པ་ནས་ཡོད་པ་དང་། ཡོད་པ་ནས་ཡར་རྒྱས་གོང་འཕེལ་དུ་བཏང་སྟེ་ཡོང་བ་ཞིག་ཡིན་ལ། འདི་ལྟ་བུའི་མི་རིགས་གཞན་ལ་ངོམ་དུ་རུང་བའི་བོད་ཀྱི་སྲོལ་རྒྱུན་གྱོན་གོས་ཀྱི་བཟོ་རིག་ལག་རྩལ་འདི་མ་ཉམས་རྒྱུན་འཛིན་དང་། མ་འོངས་པའི་བོད་མི་རིགས་ཀྱི་བུ་རབས་ཚ་རྒྱུད་རྣམས་ཀྱིས་མུ་མཐུད་དེ་ལོངས་སུ་སྤྱོད་པ་དང་། ཉིན་རེའི་འཚོ་བ་དངོས་དང་ཁ་མ་འབྲལ་བར་བྱེད་པར། སྲོལ་རྒྱུན་གྱི་གྱོན་གོས་བཟོ་རྩལ་གཅིག་པུ་རྒྱུན་འཛིན་བྱས་པས་མི་ཆོག་པར་དེ་ལ་ཁ་སྣོན་དང་། གསར་བཏོད། ན་གཞོན་གྱི་བློ་ཁ་དང་དུས་རབས་ཀྱི་འཕེལ་འགྱུར་དང་བསྟུན་ཏེ་ཡར་རྒྱས་གོང་འཕེལ་དུ་གཏོང་དགོས་པ་ཡིན།
དེ་ལྟར་ན་ངྷ་ས་ཐེག་ཆེན་ཆོས་གླིང་གཙུག་ལག་ཁང་གི་སྒོ་ཆེན་གཤམ་འོག་གི་དེང་རབས་བོད་ཀྱི་མཛེས་བཟོའི་གྱོན་ཆས་བཟོ་ཚོང་ཁང་ནི། བོད་ཀྱི་སྲོལ་རྒྱུན་གྱི་གྱོན་གོས་བཟོ་རིག་ལག་རྩལ་རྨང་གཞིར་བྱས་ཏེ་ན་གཞོན་གྱི་ཁམས་དང་མོས་པ། དུས་རབས་ཀྱི་འགྲོས་དང་བསྟུན་ནས་གསར་བཏོད་ཀྱི་ལམ་སྣེ་འཚོལ་བཞིན་པའི་བཟོ་ཚོང་ཁང་ཞིག་ཡིན་ལ། བཟོ་ཚོང་ཁང་འདི་བཙུགས་ནས་ད་ལྟའི་བར་དུ་ལོ་གཅིག་དང་ཟླ་བརྒྱད་ཙམ་ལས་ཕྱིན་མེད་ཀྱང་། གནའ་དེང་གི་གྱོན་གོས་སྣ་ཁ་ ༥༠ ལྷག་གསར་བཏོད་བྱས་ཤིང་། ད་དུང་དཔལ་འབྱོར་དང་ཐོན་རྫས་རྒྱུ་ཆའི་ཕྱོགས་ནས་དཀའ་སེལ་བ་ཡིན་ན། གྱོན་ཆས་རིགས་འདྲ་མིན་བརྒྱ་ལྷག་ལས་བརྒལ་བ་གསར་བཏོད་ཐུབ་པའི་གདེང་སྤོབས་ཡོད་ཟེར།
འདི་གའི་གསར་འགོད་པས་བཟོ་ཚོང་ཁང་དེ་གའི་སྦྱིན་བདག་གམ་ཇུས་འགོད་པ་ཕུར་བུ་ཚེ་རིང་ལགས་སུ་བཀའ་འདྲི་ཞུས་པར་ཁོང་གིས་བཟོ་ཚོང་ཁང་འདི་ཐོག་མར་འཛུགས་པའི་དམིགས་ཡུལ་ནས་མགོ་བརྩམས་ཏེ་ངོ་སྤྲོད་གནང་དོན། སྤྱིར་ངས་རྡོ་བརྐོས་དང་ཤིང་བརྐོས་སོགས་ལག་ཤེས་མང་བོ་ཤེས་ཀྱི་ཡོད་ཀྱང་། དེ་དག་ལས་བོད་ཀྱི་གྱོན་གོས་ཐོག་བཟོ་ཚོང་ཁང་ཞིག་བཙུགས་ཤིང་། བོད་མིའི་རིག་གཞུང་གི་ཆ་ཤས་སུ་གྱུར་བའི་སྲོལ་རྒྱུན་གྱི་གྱོན་གོས་བཟོ་རྩལ་རྨང་གཞིར་བྱས་ཏེ། དེང་རབས་དང་མཐུན་པར་བྱས་ཏེ་གསར་བཏོད་ཅུང་ཙམ་བྱ་ཐུབ་ན་སྙམ་པ་དང་། མ་འོངས་པར་བོད་ཀྱི་གཞོན་སྐྱེས་རེ་ཟུང་ལ་གནའ་དེང་ཟུང་འབྲེལ་གྱི་ཁྱད་ཆོས་འབུར་དུ་ཐོན་པའི་བཟོ་རྩལ་སློབ་ཐུབ་ཀྱི་རེད་སྙམ་པས་ཡིན། དེ་ནི་བཟོ་ཚོང་ཁང་འདི་ལྟ་བུ་ཞིག་སྒོ་འབྱེད་བྱེད་དགོས་པའི་དམིགས་འདུན་གཙོ་བོ་ཡིན་ཟེར།
བཟོ་ཚོང་ཁང་འདི་བཙུགས་ཏེ་ད་ལྟའི་བར་ལོ་གཅིག་དང་ཟླ་བ་བརྒྱད་ལྷག་ཕྱིན་པའི་རིང་། དང་ཐོག་དཔལ་འབྱོར་གྱི་ཐོག་ནས་དཀའ་ངལ་མང་དག་ཅིག་འཕྲད་སྟབས་ཚོང་ཁང་ཆུང་ཆུང་ཞིག་གཉེར་ཏེ། རིམ་གྱིས་རྒྱ་ཆེ་རུ་བསྐྱེད་པ་ཡིན། འདས་པའི་ལོ་གཅིག་དང་ཟླ་བརྒྱད་རིང་ཕྱིར་ཚོང་ཡག་པོ་བྱུང་ཞེས་དང་། དེང་སྐབས་བཟོ་ཚོང་ཁང་འདི་ནས་གྱོན་གོས་ཉོ་མཁན་བོད་མི་ཙམ་མ་ཟད། ཕྱི་གླིང་ཡུལ་སྐོར་སྤྲོ་འཆམ་པ་ཡང་མང་བོ་ཡོང་གི་འདུག དེ་དག་ལས་བོད་མི་རྒན་རབས་པ་རྣམས་ཀྱིས་སྲོལ་རྒྱུན་གྱི་བཟོ་བཀོད་ལྟར་བཟོས་པ་ལེགས་པོར་མཐོང་གི་འདུག་ལ། གཞོན་སྐྱེས་རྣམས་ཀྱིས་དེང་དུས་ཀྱི་བཟོ་བཀོད་ལྟར་བཟོས་པར་དགའ་མོས་བྱེད་ཅིང་། གྱོན་ན་སྟབས་བདེ་བར་མ་ཟད་མཛེས་བཟོ་བྱས་པ་ཧ་ཅང་ལེགས་པོ་རེད་ཟེར་ནས་དགའ་མོས་ཆེན་པོ་བྱེད་ཀྱིན་འདུག་ཟེར།
ཡང་ཁོང་གིས་ད་ལྟ་ངེད་གཉིས་ལ་དཔལ་འབྱོར་དང་རས་ཀྱི་རྒྱུ་ཆའི་ཕྱོགས་ནས་འདང་གི་མེད་པ་མ་གཏོགས། བསམ་བློའི་ནང་དུ་གྲ་སྒྲིག་ཟིན་པ་ལྟར་ན་དེང་རབས་ཀྱི་ཁྱད་ཆོས་འབུར་དུ་ཐོན་ཞིང་། གསར་བཏོད་རང་བཞིན་གྱི་བཟོ་སྟངས་མ་འདྲ་བ་སྣ་ཁ་བརྒྱ་ལྷག་བཟོ་རྒྱུ་ཡོད། ཡིན་ནའང་། ད་ལྟའི་བར་དུ་སྔར་ན་མེད་པའི་བཟོ་རྩལ་མ་འདྲ་བ་ལྔ་བཅུ་ལྷག་གསར་བཏོད་བྱས་པ་དང་། དེང་རབས་ཀྱི་གྱོན་གོས་བཟོ་སྐབས་སྔོན་གྱི་རྨིང་གཞིའི་ཐོག དེ་ལ་གོང་བ་དང་ཕུ་ཐུང་སོགས་བཟོ་བཀོད་བྱེད་སྟངས་མ་འདྲ་བ་བྱས་པ་ཡིན་ཟེར།
གང་ལྟར་བཟོ་ཚོང་ཁང་འདིས་བོད་མདོ་དབུས་ཁམས་གསུམ་གྱི་གནའ་དེང་ཟུང་གི་གྱོན་གོས་ཕྱུ་པ་དང་འོག་འཇུག སྟོད་ཁེབས་སོགས་སྣ་ཁ་མ་འདྲ་བ་མང་བོ་འཚེམ་བཟོ་བྱེད་ཀྱིན་ཡོད་པ་མ་ཟད། ཉོ་མཁན་གྱི་འདོད་མོས་ལྟར་མངགས་བཟོ་བྱེད་ཀྱི་འདུག་ལ། གྲྭ་བཙུན་ཚོའི་གཟན་དང་ཤམ་ཐབས། སྟོད་འགག སྨད་གཡོག་སོགས་ཀྱང་འཚེམ་བཟོ་བྱེད་ཀྱིན་ཡོད་འདུག
ཡང་ཇུས་འགོད་པ་བརྩོན་འགྲུས་ལྷ་རྒྱལ་ལགས་ཀྱིས། ད་ལྟའི་ཆར་སེམས་ལ་དྲན་པ་ལྟར་བཟོ་ཐུབ་ཀྱི་མི་འདུག་མོད། གཞུག་ཕྱོགས་དཔལ་འབྱོར་དང་མཐུན་རྐྱེན། གོ་སྐབས་སོགས་རག་ཚེ་བོད་མདོ་དབུས་ཁམས་གསུམ་གྱི་ཐུན་མོང་མ་ཡིན་པའི་གནའ་དེང་ཟུང་འབྲེལ་གྱི་གྱོན་གོས་བཟོ་རྩལ་ཕྱོགས་ནས་བཟོ་གྲྭ་ཆེན་པོ་ཞིག་བཙུགས་ཏེ། ན་གཞོན་རྣམས་ལ་ལག་ཤེས་སློབ་སྦྱོང་བྱེད་པའི་གོ་སྐབས་སྤྲོད་པ་དང་ལས་ཀ་སྤྲོད་རྒྱུ་སོགས། ད་ལྟ་གཉེར་བཞིན་པའི་བཟོ་ཚོང་ཁང་ཆུང་ཆུང་འདི་དེང་རབས་ཀྱི་དཔལ་འབྱོར་ཁེ་ལས་ཅན་ལ་ཁ་ཕྱོགས་རྒྱུའི་དམིགས་འདུན་བཅངས་ཡོད་ཟེར།
ཡང་ཁོང་གིས། འདི་དང་འདི་ལྟ་བུའི་ལག་ཤེས་བཟོ་ཚོང་ཁང་མང་དུ་བྱུང་ན། དེང་སྐབས་སློབ་གྲྭར་འགྲོ་མ་ཐུབ་པ་དང་དམག་ཁོངས་སུ་འཛུལ་མ་ཐུབ་པ། ཡང་ན་གཞུང་གི་བྱ་བའི་ནང་དུ་ལས་ཀ་གཉེར་མ་ཐུབ་པར་ཁྲོམ་སྲང་ལ་དོན་མེད་དུ་འཁྱམ་ཉུལ་བྱེད་མཁན་གྱི་བོད་རིགས་ན་གཞོན་མང་བོ་ཡོད་སྟབས། དེ་དག་གིས་བོད་ཀྱི་ཐུན་མོང་མ་ཡིན་པའི་ལག་ཤེས་བཟོ་རྩལ་གྱི་ཕྱོགས་ལ་སློབ་སྦྱོང་བྱེད་ཐུབ་ཅིང་། ལག་ཤེས་ཀྱི་ཕྱོགས་ནས་ཤིང་བཟོ་དང་རྡོ་རྐོས། ལྷ་བཟོ། འཚེམ་བཟོ། དེ་མ་ཡིན་པའི་ལག་ཤེས་གཞན་མང་བོ་སྦྱོང་རྒྱུ་ཡོད་སྟབས། གཞོན་སྐྱེས་རྣམས་ཀྱིས་རང་རང་གི་ས་ནས་དེ་དང་དེ་ལྟ་བུའི་ལག་ཤེས་རིགས་ལ་འབད་བརྩོན་བྱས་ན་ཡག་པོ་རེད་བསམ་གྱིན་འདུག་ཟེར།
བཟོ་ཚོང་ཁང་འདིས་འདི་ལོའི་ཟླ་ ༡༠ ཚེས་ ༣༠ ཉིན་གྱི་དགོང་མོར་བོད་གཞུང་ཟློ་གར་ཁང་དུ་ཐེངས་དང་པོའི་ ༼ གནའ་དེང་བོད་ཀྱི་གྱོན་ཆས་འཁྲབ་སྟོན་དང་གླུ་གཞས་དགོང་ཚོགས་ཆེན་མོ་ ༽ ཞེས་པ་བསྡུས་ཡོད་འདུག
གསར་འགོད་པ། ཨ་རིག་འགྱུར་མེད།
གོས་ལོག་འདི་འདྲ་ཁྲབ་སྟོན་དེ་འདྲ་ལ་གྱོན་ན་མ་གཏོགས་རྒྱུན་དུ་གྱོན་ཐུབ་ཡས་མ་རེད། གཟུགས་པོའི་དབྱིབས་ཚང་མ་བཀག་གི་འདུག་ གཟུགས་བྱད་ཡག་པོ་ཡོད་ན་གྱོང་རང་ས་རེད།
འོ་ཡག་ཡག ཕ་བཟང་གི་བུ། སྲོལ་རྒྱུན་ལོ་གྱི་ལུས་པོར་དེང་དུས་ཀྱི་སྲོག་ཞུགས་པ་དངོས་གནས་དེ་འདི་འདྲ་བ་ཞིག་ལ་ཟེར་བས་ན། དཔྱོད་ལྡན་བོད་རིགས་གཞོན་སྐྱེས་ཟུང་ལ་སྙིང་ཐག་པ་ནས་ཐུགས་རྗེ་ཆེ་དང་བཀྲི་ཤིས་བདེ་ལེགས་ཞུ་བཞིན་ཡོད༎
དེ་མིན་ང་ཚོའི་དེང་དུས་ཀྱི་གཞོན་ནུ་རྣམས་མི་རིགས་གཞན་གྱི་དུས་ཚོད་དང་འཚམས་པའི་གྱོན་གོས་ཀྱི་རྗེས་སུ་ཤོར་བ་དེ་འགོག་མི་ཐུབ་ལ། རང་རིགས་ཀྱི་ཁྱད་ཆོས་ལྡན་པའི་གྱོན་པའི་རྒྱུན་དེ་ཁྱོང་མི་ནུས་སོ༎ དེས་ན་སླར་ཡང་བཀྲིས་བདེ་ལེགས་དང་ཐུགས་རྗེ་ཆེའོ། ལེགས་སོ། ལེགས་སོ། ཞེས་སྨྲའོ༎
ཕོ་གོས་ཕུ་ཐུང་རིང་བ་འདི་ལས་ཀ་བྱེད་མི་དགོས་པའི་རྟགས་རེད་དམ། ལས་ཀ་མེད་པའི་རྟགས་རེད།
རྣམ་པ་གཉིས་ཀྱི་ལས་དོན་ལ་རྒྱབ་སྐྱོར་དང་བཀྲིས་བདེ་ལེགས་ཞུ།།
རྣམ་པ་གཉིས་ལ་བཀྲ་ཤིས་བདེ་ལེགས་ཞུ།
མཛེས་སྡུག་ལྡན་པའི་གཞོན་སྐྱེས། གང་འདོད་ལས་ལ་བརྩོན་ན།
མཐའ་མའི་རེ་མདུན་བཟང་པོ། སྟོང་པ་ཉིད་དུ་འགྱུར་ཡུང་།
བྱ་བ་ལམ་འགྲོ་ཡོང་བའི་སྨོམ་འདུན་ཞུ།
སྲོལ་རྒྱུན་གྱི་གྱོན་གོས་གནའ་དེང་གཉིས་མཐུན་གྱི་སྲོལ་གཏོད་པ་ནི། གནའ་སྲོལ་མ་ཉམས་པར་གནས་ཐབས་ཅིག་ཡིན་པས། དགའ་བསུ་ཡོད།