ཟླ་སྔོན་མའི་ཕྱི་ཚེས་ ༣༡ ཉིན་རྔ་བ་ཁུལ་འབྲིང་རིམ་མི་མང་ཁྲིམས་ཁང་གིས་༼ དུས་རབས་ཀྱི་ང་།༽ ཞེས་པའི་དུས་དེབ་ཀྱི་རྩོམ་སྒྲིག་པ་འཇང་རྩེ་དོན་ཁོ་ལ་ལོ་ ༤ དང་བུད་ངྷ་ལ་ལོ་ ༤ ། སྐལ་བཟང་སྦྱིན་པ་ལ་ལོ་ ༣ བཅས་ཀྱི་ཁྲིམས་ཐག་བཅད་ཡོད་འདུག
རྩོམ་པ་པོ་འཇང་རྩེ་དོན་ཁོ་དང་བུད་ངྷ་གཉིས་ཀྱིས་ཉིས་སྟོང་བརྒྱད་ལོའི་༼ ཤར་དུང་རི ༽ དུས་དེབ་སྟེང་ (ཕྱིར་རྟོག་དང་བསམ་གཞིག) ཅེས་པའི་རྩོམ་ཡིག་སྤེལ་བ་དང་། ༼ དུས་རབས་ཀྱི་ང་། ༽ ཞེས་པར་ཡང་ཆབ་སྲིད་གནད་དོན་ཅན་གྱི་རྩོམ་ཡིག་སྤེལ་པའི་དོགས་གཞིའི་འོག ད་ལོའི་ཕྱི་ཟླ་ ༧ ཚེས་ ༡༩ ཉིན་འཛིན་བཟུང་བྱས་ཏེ། ད་བར་རྔ་བ་ཁུལ་འབར་ཁམས་ཁྲིམས་ཁང་དུ་བཀག་ཉར་བྱས་ཡོད་ཅིང་། རྩོམ་པ་པོ་སྐལ་བཟང་སྦྱིན་པ་ལགས་ཀྱིས་ཀྱང་། ༢༠༠༨ ལོའི་༼ཤར་དུང་རི ༽ དུས་དེབ་སྟེང་(ཟུངས་ཁྲག་དང་ཚེ་སྲོག་གི་གཏུག་བཤེར) ཞེས་པའི་རྩོམ་ཡིག་སྤེལ་ཏེ། ཁོང་ཅག་གིས་རྒྱལ་ཁབ་ཁ་བྲལ་དང་། ཤེས་ཡོན་པར་ངན་སྐུལ་བྱས་པའི་ཉེས་མིང་བཏགས་ཡོད་འདུག
ཐེངས་འདིར་ཁྲིམས་ཐག་བཅད་པའི་རྩོམ་པ་པོ་གཉན་གྱི་དངོས་མིང་ལ་འཇང་རྩེ་དོན་ཁོ་ཟེར་ཞིང་། རྔ་བ་ཁུལ་ཁྱུང་མཆུ་རྫོང་ས་གནས་ལོ་རྒྱུས་ཞིབ་འཇུག་ལས་ཁུངས་ཀྱི་ལས་བྱེད་ཡིན་པར་མ་ཟད། སྤྱི་ཚོགས་ཁྲོད་ཤུགས་རྐྱེན་ཡོད་པའི་སྙན་ངག་པ་དང་འབོལ་རྩོམ་འབྲི་མཁན་འབྲི་མཁན་ཞིག་ཀྱང་ཡིན་ལ། ཁོང་གིས་སྙན་དེབ་༼རོ་ལངས་༽དང་རྩོམ་ཡིག་གང་མང་ལ་སྤྱི་ཚོགས་ཁྲོད་གདེང་འཇོག་མཐོན་པོ་གནང་སྟེ་བྱ་དགའ་མང་པོ་ཐོབ་ཡོད།
རང་ལོ་ ༣༤ ཡིན་པའི་རྩོམ་པ་པོ་བུད་ངྷ་ལགས་ནི། རྔ་བ་རྫོན་ཁྲིན་ཀཱན་སྡེ་བ་ནས་ཡིན་ཞིང་། ཁྲིན་ཏུའུ་གྲོང་ཁྱེར་གྱི་སྨན་པའི་མཐོ་སློབ་ཞིག་ནས་མཐར་ཕྱིན་རྗེས་རྔ་བ་རྫོང་བར་མ་ཞང་བོད་སྨན་ཁང་དུ་ཕྱག་ལས་གནང་བཞིན་ཡོད། ལས་ཞོར་དུ་འབོལ་རྩོམ་སོགས་བརྩམས་ཆོས་མང་པོ་སྤེལ་ཞིང་། ༢༠༠༨ ལོའི་ཤར་དུང་རི་དུས་དེབ་སྟེང་། ཁོང་གིས་(ང་ཚོའི་ལུས་ཐོག་ན་འགྲོ་བ་མིའི་ཐོབ་ཐང་ག་འདྲ་ཞིག་ཡོད) ཅེས་པ་དང་། (ཕྱིར་རྟོག་དང་བསམ་གཞིག) ཅེས་པའི་རྩོམ་ཡིག་ཅིག་ཀྱང་སྤེལ་ཡོད།
རང་ལོ་ ༣༥ ཡིན་པའི་ན་གཞོན་རྩོམ་པ་པོ་སྐལ་བཟང་སྦྱིན་པ་འམ་པུར་མིང་ལ་མགར་མི་ཟེར་བ་ཁོང་ནི། ཙ་ཡུས་སྨད་ཀྱི་དུད་ཁ་ཤིང་སྐྱོང་ཐང་སྡེ་བ་ནས་ཡིན་ཞིང། ཆུང་དུས་ཙ་ཡུས་དགོན་པའི་གྲྭ་པ་ཡིན་པ་དང་། ༡༩༩༣ ལོར་རྒྱ་གར་དུ་ཡོང་སྟེ་སུ་ཇཱ་བོད་ཁྱིམ་དང་ཀིརྟིའི་བྱེས་པ་གྲྭ་ཚང་སོགས་སུ་སློབ་གཉེར་གནང་། ༢༠༠༨ ལོའི་ཤར་དུང་རི་དུས་དེབ་སྟེང་༼ཟུངས་ཁྲག་དང་ཚེ་སྲོག་གི་གཏུག་བཤེར༽ཞེས་པའི་རྩོམ་ཡིག་སྤེལ་ཡོད།
གསར་འགོད་པ། དོན་གོ
མི་བུའི་ལོ་རྒྱུས་འབྲི་དུས་ཁོང་ཚོ་ཁྲིམས་ཐག་བཅད་དང་མ་བཅད་རུང་། རྒྱ་གར་སོགས་ལ་ཡོང་ནས་སློབ་སྦྱོང་བྱས་མིན་དེ་ཁྱོན་ནས་མ་བཀོད་ན་མཛེས། བསམ་གཞིག་མང་ཙམ་གཏོང་རོགས།
དེ་བ་ཚང་གི་ད་མི་ཉན་ཀ ་་་་་གཞོན་ནུ་ཚོས་སྙིང་སྟོབས་ལ་ཡི་རང་བྱེད།
སྐལ་བཟང་སྦྱིན་པ ༼མགར་མི ༽ཁོང་རང་སྐྱེས་སའི་སྡེ་བའི་མིང་ལ་དུད་ཁ་ཤིང་སྐྱོང་ཐང་སྡེ་བ་ཟེར་བ་མ་རེད། ཤིང་སྐྱོག་ཐང་ཟེར་བ་རེད། ཤིང་སྐྱོག་ཐང་དང་། འབོ་རུ་ཐང་། ཨ་ལི་ནང་བཅས་སྡེ་བ་འདི་གསུམ་ལ་དུད་ཁ་བཞི་བཅུ་ཟེར་བ་རེད།
བཙན་བྱོལ་སྤྱི་ཚོགས་ཀྱི་མི་བུ་འདི་དག་གིས་དུས་ལ་མ་སླེབས་ཀྱི་གོང་ནས་སྤྱང་སྐད་འདོན་ཡ་དགའ་བོ་ཞེ་དྲག་བྱེད་ཀྱིན་འདུག ད་ཁྱོད་ཚོས་སྐད་རྒྱོབས་ཡ། རྩོམ་འཆལ་དེ་དག་ཕྲིས་དང་།
ཁྱེད་ཚོས་ག་དུས་ཡིན་ན་ཡང་གནོད་ལས་ཕན་ཐོགས་ཀྱིན་མི་འདུག
རྒྱ་ནག་གིས་ཁྲིམས་ཐག་བཅདཚར་རྗེས། ད་ཁྱོད་ཚོས་བསམ་དོན་གྲུབ་སོང་་བསམ་བསམ་བྱས་ནས་བསྡད་འདུག་ག
རླབས་ཆེ་བའི་རྩོམ་པ་པོ་ཁོང་གསུམ་ལ་གདུང་སེམས་མཉམ་སྐྱེད་ཡོད། དེའི་ནང་གི་གཉན་ལགས་ནི་བདག་ཉིད་ཆེས་དགའ་སའི་གཞོན་སྐྱེས་སྙན་ངག་པ་དེ་ཡིན།
ཁོང་དག་གི་རྨ་མེད་ཀྱི་སྙིང་སྟོབས་ལ་ཀུན་ནས་བསྔགས་སོ།།
ཨ་ཁ། ངས་འདི་ལྟ་བུའི་གནས་ཚུལ་ངན་པ་ཞིག་ཐོས་རྒྱུ་རེད་སྙམ་ནས་དུས་རྒྱུན་དུ་ཁོ་ཚོའི་ཕྱོགས་སུ་དངངས་སྐྲག་སྐྱེས་ནས་བསྡད་ཡོད། དངོས་གནས་སྤྱི་ཚོགས་ལ་ཤུགས་རྐྱེན་ཡོད་པའི་མི་འདི་དག་འདི་ལྟར་འཇོག་ག་ལ་རུང་སྟེ། ང་ཚོས་ཕྱོགས་གང་ཐད་ནས་ལས་འགུལ་མང་བོ་སྤེལ་ཏེ། ཁོ་ཚོའི་གནད་དོན་ནི་རྒྱལ་སྤྱིའི་རང་བཞིན་གྱི་གནད་དོན་ཞིག་ཏུ་འགྱུར་བར་བརྩོན་ལེན་བྱ་དགོས།
གསར་འགོད་པ་ལགས།
ང་ཚོའི་ལུས་ཐོག་ན་འགྲོ་བ་མིའི་ཐོབ་ཐང་ག་འདྲ་ཞིག་ཡོད། ཞེས་པ་རྩོམ་མཁན་གཉན་མ་ཡིན་ནམ།
༼་་་་དང་འབོལ་རྩོམ་འབྲི་མཁན་འབྲི་མཁན་ཞིག་ཀྱང་ཡིན་ལ།༽ ཞེས་པར་ལྷག་སྐྱོན་འདུག དེ་བཞིན “ཁོང་གིས་སྙན་དེབ་༼རོ་ལངས་༽དང་རྩོམ་ཡིག་གང་མང་ལ་སྤྱི་ཚོགས་ཁྲོད་གདེང་འཇོག་མཐོན་པོ་གནང་སྟེ་བྱ་དགའ་མང་པོ་ཐོབ་ཡོད།”ཞེས་པ་འདིའི་ནང་དུ་བྱེད་མི་འོས་པས་ཚིག་སྐྱོན་འདུག
“རྔ་བ་རྫོན་ཁྲིན་ཀཱན་སྡེ་བ་ནས་ཡིན་ཞིང་།”་ཞེས་པའི་ཡིག་སྐྱོན་འདི་ངོས་ཟུངས།
ཁྱོད་བོད་ཡིག་ལ་དགའ་བའི་གསར་འགོད་པ་ཞིག་གིས་དག་ཆ་དང་དོན་དག་ལ་དོན་སྣང་གནང་རོགས།
ཁོང་གསུམ་ལ་བཙན་བྱོལ་ནང་རྒྱབ་བསྐྱོར་ཡག་པོ་ཡོང་བར་རེ་བ་བརྒྱབ་ཡོད། ཡིན་ནའི། ཚིག་རྐང་གཅིག་འབྲི་མཁན་མེད་པར་ལྟ་སྐབས། སྤྱི་ཚོགས་འདི་རྙོག་དྲར་མ་གཏོགས་དོ་སྣང་མེད་པའང་གསལ་བོ་རེད། འདི་སྐྱོ་གར་རེད།