ཟླ་སྔོན་མའི་ནང་རྒྱ་ནག་དབུས་བཟོ་ཚོང་དང་བརྡ་འཕྲིན་ལས་ཁུངས་ཀྱི་དྲ་བའི་སྟེང་། རྒྱ་ནག་ནང་ཁྲིམས་མཐུན་མ་ཡིན་པའི་དྲ་རྒྱའི་ཁ་པར་རིགས་བཀག་སྡོམ་བྱ་རྒྱུའི་གསལ་བསྒྲགས་ཤིག་སྤེལ་ཡོད་པ་དང་། ཚེས་ ༢༩ ཉིན་བརྡ་འཕྲིན་ལས་ཁུངས་ཀྱི་མགོ་གཙོ་ཞིས་ཀོ་ཧྭ་ཡིས། རྒྱ་ནག་ནང་གློག་ཀླད་དྲ་རྒྱ་བརྒྱུད་ཁ་པར་སྟེང་ཐད་ཀར་མཐུད་ཡོད་པའི་ཁྲིམས་འགལ་གྱི་བརྡ་འཕྲིན་མ་ལག་རིགས་བཀག་སྡོམ་བྱ་རྒྱུ་ཡིན་སྐོར་བསྐྱར་དུ་ནན་བཤད་བྱས་ཡོད་པར་བརྟེན། སི་ཁེབ་པི་ Skype བེད་སྤྱོད་གཏོང་མཁན་ཚོས་རྒྱ་གཞུང་གིས་ལོ་སྔོན་མར་གྷོ་གྷིལ་འཚོལ་བཤེར་དྲ་རྒྱར་གནོན་ཤུགས་སྤྲད་དེ་ཕྱིར་ཕུད་བཏང་ཡོད་པ་དང་། ད་ལོ་སི་ཁེ་ཕེ་དྲ་རྒྱའི་ཁ་པར་ཡང་ཕྱིར་འཕུད་གཏོང་སྲིད་པའི་བློ་འཚབ་ཆེན་པོ་བྱེད་ཀྱི་ཡོད་འདུག
དེང་སྐབས་འཛམ་གླིང་སྟེང་སི་ཁེབ་པི་ཁ་པར་བེད་སྤྱོད་གཏོང་མཁན་དུང་ཕྱུར་ ༡།༢༤ ལྷག་ཡོད་འདུག་ལ། རྒྱ་ནག་ནང་སི་ཁེ་ཕེ་ཁ་པར་སྤྱོད་མཁན་ཁྲི་ ༢༠༠༠ ལྷག་ཡོད་འདུག རྒྱ་ནག་ནས་རྒྱལ་ཁབ་གཞན་ལ་སི་ཁེ་ཕེ་ཁ་པར་བཏང་བ་ཡིན་ན། སྐར་མ་རེར་རྒྱ་སྒོར་ ༠་༡༩ ཡིན་པ་དང་། རྒྱ་ནག་གི་གཞུང་འབྲེལ་བརྒྱུད་ལམ་ཁག་ནས་སྐར་མ་རེར་རྒྱ་སྒོར་ ༢་༤ ཡིན་སྟབས། རྒྱ་ནག་གི་མང་ཚོགས་ཚོས་སི་ཁེབ་པི་ལ་དགའ་མོས་ཆེན་པོ་བྱེད་ཀྱི་ཡོད་འདུག ཡིན་ནའང་། རྒྱ་ནག་དབུས་གློག་འཕྲིན་ལས་ཁུངས་དང་། མཉམ་འབྲེལ་འཕྲིན་གཏོང་ལས་ཁུངས། སྒུལ་བསྐྱོད་བརྡ་འཕྲིན་ལས་ཁུངས་གསུམ་མ་གཏོགས་སྒེར་གཉེར་འཕྲིན་གཏོང་བརྒྱུད་ལམ་ཁག་ཡོངས་རྫོགས་ཁྲིམས་འགལ་གྱི་ཉེས་འཛུགས་བྱས་ཡོད་འདུག
ཉེ་སྔོན་རྒྱ་གཞུང་གིས་གསལ་བསྒྲགས་བྱས་པའི་གྲངས་འབོར་ལྟར་ན། ཕྱི་ལོ་ ༢༠༡༠ ལོར་རྒྱ་ནག་ཏུ་བརྡ་འཕྲིན་དྲ་རྒྱ་སྤྱོད་མཁན་མི་གྲངས་དུང་ཕྱུར་ ༤་༥ ཙམ་ཡོད་པ་དང་། དེས་རྒྱ་ནག་གི་སྤྱིའི་མི་འབོར་གྱི་སུམ་ཆ་གཅིག་ཟིན་ཡོད་པ་དང་། ལོ་སྔོན་མ་ལས་བརྒྱ་ཆ་ ༢༠་༣ ཙམ་ཇེ་མང་དུ་ཕྱིན་ཡོད་པ་མ་ཟད། འཛམ་གླིང་སྟེང་དྲ་རྒྱ་སྤྱོད་མཁན་གྱི་མི་གྲངས་མང་ཤོས་ཀྱི་རྒྱལ་ཁབ་དེ་ཆགས་ཡོད། ཡིན་ནའང་། རྒྱ་ནག་ནང་བརྡ་འཕྲིན་དྲ་རྒྱའི་རང་དབང་གི་གནས་སྟངས་སྔར་ལས་ཇེ་སྡུག་ཏུ་འགྲོ་བཞིན་ཡོད་པ་རེད། རྒྱལ་སྤྱིའི་སྟེང་མང་ཚོགས་ཀྱིས་དགའ་མོས་ཐོབ་བཞིན་པའི་གྷོ་གྷལ་(google)འཚོལ་བཤེར་དྲ་རྒྱ་དང་། ངོ་དེབ་ (Facebook) ། ཊི་ཝེ་ཊིར་ (Twitter) ། ཡོའུ་ཊོབ་ (youTube) སོགས་བཀག་སྡོམ་བྱས་ཡོད་པར་མ་ཟད། ཕྱི་ལོ་ ༢༠༠༥ ལོར་སི་ཁེབ་པི་ཡང་ཐེངས་གཅིག་ལ་བཀག་སྡོམ་བྱས་མྱོང་ཡོད་པ་རེད།
གསར་འགོད་པ། ཚེ་རིང་རྒྱལ།
