སྐུའི་འཕྲོད་བསྟེན་ལ་དམིཊ་བསལ་གྱི་འགན་འཁྱེར་དགོས།

བོད་ཀྱི་གསོ་བ་རིག་པའི་སྨན་པའི་ལྷན་ཚོགས་ཀྱི་ཁོངས་སུ་ཚད་ལྡན་སློབ་གཉེར་ཁང་ནས་སློབ་ཐོན་སྨན་པ་ ༢༤༦ དང་། ཚད་ལྡན་སློབ་གཉེར་ཁང་ནས་སློབ་ཐོན་བྱུང་མེད་ཀྱང་ཕ་མེས་བུ་རྒྱུད་སོགས་ཀྱི་ཡོངས་གྲགས་སྨན་པ་ ༡༣༨ བཅས་ད་བར་ཁྱོན་སྨན་པ་ ༣༨༤ ཙམ་ལ་དེབ་སྐྱེལ་གནང་ཡོད་ཟེར།

དེ་རིང་ནི་བཙན་བྱོལ་བོད་ཀྱི་གསོ་བ་རིག་པའི་སྨན་པའི་ལྷན་ཚོགས་དབུ་བརྙེས་ཏེ་ལོ་འཁོར་ཧྲིལ་བོ་ ༧ ལོན་པའི་ཉིན་མོ་ཡིན་ཞིང་། ངྷ་ས་དབུས་སྨན་རྩིས་མཐོ་སློབ་ཏུ་མཛད་སྒོ་སྟབས་བདེ་ཞིག་ཀྱང་ཚོགས་སོང་། མཛད་སྒོའི་སྐུ་མགྲོན་དུ་བོད་གཞུང་འཕྲོད་བསྟེན་བཀའ་དཔལ་འབྱོར་ཚེ་རིང་མཆོག་དང་ཁྲིམས་ཞིབ་པ་ངག་དབང་ཐུབ་བསྟན་ལགས། སྨན་རྩིས་ཁང་གི་ངེས་སྟོན་པ་རྟ་མགྲིན་ཚེ་དབང་དང་བདེ་ལེགས་སྨན་ཁང་གི་སྨན་པ་ཚེ་བརྟན་བཅས་ཕེབས་ཡོད།

མཛད་སྒོའི་སྟེང་བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་གིས་གསུང་བཤད་གནང་དོན། བོད་ཀྱི་ཆེས་མཐོའི་སྨན་པའི་ལྷན་ཚོགས་འདི་ཧ་ཅང་གི་གལ་འགངས་ཆེན་པོ་ཡིན་ལ། འདི་ནི་གཅིག་བྱས་ན་ད་ལྟའི་བར་གྱི་བོད་ཀྱི་གསོ་བ་རིག་པའི་ལོ་རྒྱུས་ནང་དུ་བོད་སྨན་ལ་སྟངས་འཛིན་བྱེད་པ་དང་རྟོག་ཞིབ་བྱེད་པའི་སྒྲིག་འཛུགས་ཐོག་མའང་ཡིན་སྲིད། དེར་བརྟེན། ང་ཚོ་ཚང་མས་སྒྲིག་འཛུགས་དེའི་དམིགས་ཡུལ་དང་བསྒྲུབ་བྱ་དེ་དག་ལམ་ལྷོངས་ཡོང་ཆེད་ཚང་མས་འཕྱར་གྲུ་མཉམ་འདེགས་གནང་དགོས། ད་ལྟའི་ཆར་བོད་ཀྱི་གསོ་བ་རིག་པ་རྒྱ་གར་གཞུང་གིས་ཁྲིམས་མཐུན་ངོས་ལེན་དང་དེབ་སྐྱེལ་བྱས་ཟིན་སྟབས། སྨན་པའི་ལྷན་ཚོགས་ཧ་ཅང་གི་གལ་ཆེན་པོ་ཆགས་ཡོད། ཅེས་གསུངས་བྱུང་།

ཡང་ཁོང་གིས། ཆེས་མཐོའི་སྨན་པའི་ལྷན་ཚོགས་ཀྱི་ཚོགས་མི་ཐོགས་མེད་ལགས་ཀྱིས་ ༢༠༡༠ ལོའི་ལོ་འཁོར་ལས་སྡོམ་སྙན་སྒྲོན་ཞུས་སྐབས། ད་ལྟའི་ཆར་རང་གཞུང་འཕྲོད་བསྟེན་ལས་ཁུངས་ནས་ལྷན་ཚོགས་ཀྱི་གཞི་རྩའི་འགྲོ་སོང་ཆེད་ལོ་རེར་ཧིན་སྒོར་ཉིས་འབུམ་ལྔ་ཁྲི་གནང་གི་ཡོད་ཀྱང་། ལྷན་ཚོགས་ཀྱི་ཡིག་ཆ་དཔར་སྐྲུན་དང་ལས་བྱེད་ཀྱི་གླ་ཕོགས་སོགས་རྒྱུན་གྲོན་ཁྱོན་ལོ་རེར་ཧིན་སྒོར་འབུམ་ ༧ ཙམ་འགྲོ་བཞིན་ཡོད་པ་དེ་དག་ཁུངས་གཞན་ནས་འཚོལ་ཐབས་དང་ཞལ་འདེབས་བསྡུ་བཞིན་ཡོད་ཀྱང་། ད་ཆར་ཞལ་འདེབས་གནང་མཁན་ཐོག་དཀའ་ངལ་ཇེ་ཆེར་འགྲོ་བཞིན་ཡོད་སྟབས། རང་གཞུང་ནས་ལྷན་ཚོགས་འདིའི་ལས་དོན་རྣམས་སྲ་བརྟན་རྒྱུན་འཁྱོངས་དང་ཡར་རྒྱས་གོང་འཕེལ་དུ་འགྲོ་ཆེད་གཙོ་བོ་དཔལ་འབྱོར་གྱི་རྒྱབ་སྐྱོར་དང་མཐུན་རྐྱེན་རོགས་རམ་གནང་རྒྱུར་རེ་བ་ཞུས་སོང་། རེ་སྐུལ་གནང་བ་བཞིན་དུ་ཡོང་གི་རེད་ཅེས་ཞུ་ཐུབ་ཀྱི་མེད་ནའང་། འཕྲོད་བསྟེན་ལས་ཁུངས་ངོས་ནས་གང་ཡོང་ཅི་ཡོང་གིས་རྒྱབ་སྐྱོར་ཞུ་ཆོག

ད་ལྟའི་ཆར་སྨན་རྩིས་ཁང་གིས་སྨན་པའི་ལྷན་ཚོགས་ལ་རོགས་རམ་དང་རྒྱབ་སྐྱོར་ཡག་པོ་བྱེད་ཀྱི་འདུག་ལ། ད་དུང་ཚགས་ཇེ་ཚུད་དུ་ཡོང་རྒྱུ་དེ་བོད་ཀྱི་གསོ་བ་རིག་པའི་སྨན་གྱི་ནུས་རྩལ་དང་ཁྱབ་ཚད་ལ་རག་ལས་ཡོད་སྟབས། རྣམ་པ་ཚོས་རིག་པ་བསྒྲིམས་ཏེ་ཇི་ལྟར་ཚགས་ཚུད་གོང་འཕེལ་གཏོང་ཕྱོགས་ཐོག འཆར་གཞི་བསྒྲིག་པ་དང་རོགས་རམ་གན་དང་འདི་དགོས་ཀྱི་འདུག་ཅེས་པ་ལྟ་བུ་བྱུང་ན། འཕྲོད་བསྟེན་ལས་ཁུངས་བརྒྱུད་བཀའ་ཤག་ལ་སྙན་གསན་ཞུ་ཆོག་གི་རེད། གཞན་རྒྱུན་གྲོན་ལྟ་བུའི་རིགས་ལ་སྨན་པའི་ལྷན་ཚོགས་རང་ནས་དགོངས་པ་བཞེས་དགོས་པ་ཆགས་ཡོད། ལས་དོན་ཚགས་ཚུད་དང་རྒྱ་སྐྱེད། གོང་འཕེལ་བཅས་ཀྱི་ལས་དོན་རིགས་ལ་མ་དངུལ་གྱི་དཀའ་ངལ་འཕྲད་ཚེ་སྙན་གསན་ཞུ་ས་ཡོང་གི་རེད། ཅེས་གསུངས།

ཡང་ཁོང་གིས་སྨན་པའི་ལྷན་ཚོགས་ཀྱིས་ས་གནས་ཁག་ཏུ་སྨན་རྩིས་ཁང་ལྟ་བུའི་སྒྲིག་འཛུགས་ཁག་ལ་རྟོག་ཞིབ་གནང་བ་དང་། སྨན་སྦྱོར་ཁང་ཚད་ལྡན་རིགས་ལ་ཕྱག་ཁྱེར་སྤྲོད་རྒྱུ་སོགས་སྨན་པའི་ལྷན་ཚོགས་ཀྱི་ཐུགས་འགན་རེད། ཧ་ཅང་གི་གནད་འགག་ཆེན་པོ་ཡང་ཆགས་ཡོད། དེར་བརྟེན། མ་འོངས་པར་རྟོག་ཞིབ་གནང་སྐབས་ཐུགས་མཉམ་འཇོག་དགོས་ས་ནི། བོད་སྨན་ལ་ཕྱི་ལུགས་ལྟར་རྫས་སྦྱོར་ཐད་དེང་རབས་ཀྱི་འཕྲུལ་ཆས་ཀྱིས་བརྟག་དཔྱད་གཏོང་གི་མེད་ཀྱང་། བོད་སྨན་ནང་དུ་རྫས་སྔགས་ཏིང་ངེ་འཛིན་ཞེས་ཟེར་དུས་གང་ཟག་གི་རྒྱུད་དུ་ཏིང་ངེ་འཛིན་ག་ཚོད་ཡོད་པ་ང་ཚོས་བཤད་ཐུབ་ཀྱི་མེད་མོད།  སྨན་པའི་ལྷན་ཚོགས་ཀྱིས་རྫས་ལ་རྟོག་ཞིབ་གནང་བཞིན་པ་ལྟར་སྔགས་ཀྱི་རིགས་ཀྱང་ཚང་གི་ཡོད་མེད་ལ་བརྟག་རྒྱུ་གལ་ཆེན་པོ་རེད་ལ། དེ་མ་ཚང་ན་བོད་སྨན་གྱི་ཆ་ལག་གཅིག་ཚང་གི་མེད་ཅེས་གསུངས།

མཇུག་མཐར་ཁོང་གིས། བཙན་བྱོལ་སྤྱི་ཚོགས་དང་སྨན་པའི་ལྷན་ཚོགས་བར་གྱི་འདས་པའི་བྱུང་རིམ་ལ་ཕྱིར་བལྟས་ཤིག་བྱས་ན། ཐོག་མར་སྨན་རྩིས་ཁང་དབུ་ཚུགས་པའི་སྐབས་སུ་སྨན་པ་དགེ་རྒན་གཅིག་ལ་དགེ་ཕྲུག་གཉིས་མ་གཏོགས་མེད་ལ། དེ་ལྟར་མགོ་བརྩམས་ཏེ་ད་ལྟ་སྨན་པའི་ལྷན་ཚོགས་ཡོད་པ་ལྟ་བུའི་བར་དུ་འཕེལ་རྒྱས་བྱུང་ཡོད། འདི་ནི་༧གོང་ས་མཆོག་གི་བཀའ་དྲན་ཉག་གཅིག་ཆགས་ཡོད། ཁོང་གི་མཛད་འཕྲིན་རྒྱས་པ་དང་སྐུའི་འཕྲོད་བསྟེན་ལ་དམིགས་བསལ་གྱིས་འགན་འཁུར་དགོས། ཞེས་ལམ་སྟོན་ཡང་གནང་སོང་།  

བཙན་བྱོལ་བོད་མིའི་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ནི་༧གོང་ས་མཆོག་གིས་ཚད་འཛིན་མཚན་རྟགས་བསྩལ་ཐོག བོད་གཞུང་འཕྲོད་བསྟེན་ལྷན་ཁང་གིས་ཕྱི་ལོ་ ༢༠༠༤ ཟླ་ ༡ ཚེས་ ༥ ཉིན་སྨན་པའི་ལྷན་ཚོགས་ཀྱི་ཚོགས་ཆེན་ཐེངས་དང་པོ་སྐོང་ཚོགས་ཀྱིས་ཁྲིམས་ཡིག་གསལ་བསྒྲགས་དང་། སྐབས་དང་པོའི་ཚོགས་མི་རྣམས་འོས་འདེམས་ཀྱིས་ལྷན་ཚོགས་འདི་ཐོག་མར་དབུ་བརྙེས་ཡོད་པ་དང་། ལྷན་ཚོགས་འདིས་བོད་གཞུང་སྨན་རྩིས་ཁང་དང་ཝར་ཎ་ཆེས་མཐོའི་གཙུག་ལག་སློབ་གཉེར་ཁང་གི་གསོ་རིག་སྡེ་ཚན། ལྕགས་པོ་རི་དྲན་རྟེན་བོད་སྨན་སློབ་གཉེར་ཁང་། ལ་དྭགས་དབུས་གཞུང་ནང་པའི་མཐོ་རིམ་སློབ་གཉེར་ཁང་གི་གསོ་རིག་སྡེ་ཚན་བཅས་ད་བར་སློབ་གཉེར་ཁང་བཞི་ལ་སྨན་པ་བཀའ་བཅུ་པའི་ཚད་ལྡན་སློབ་གཉེར་ཁང་གི་དེབ་སྐྱེལ་ཕུལ་བ་དང་། ༢༠༠༨ ནས་ ༢༠༡༡ བར་བོད་གཞུང་སྨན་རྩིས་མཐོ་སློབ་ཁང་ནི་གསོ་རིག་སྨན་པ་རབ་འབྱམས་པའི་སློབ་གཉེར་ཁང་ཚད་ལྡན་ཞིག་ཏུ་འཕྲལ་སེལ་དེབ་སྐྱེལ་ཕུལ་ཡོད་འདུག

གཞན་ཡང་ལྷན་ཚོགས་འདིའི་ཁོངས་སུ་ཚད་ལྡན་སློབ་གཉེར་ཁང་ནས་སློབ་ཐོན་སྨན་པ་ ༢༤༦ ཡོད་པ་དང་། ཚད་ལྡན་སློབ་གཉེར་ཁང་ནས་སློབ་ཐོན་མེད་ཀྱང་ཕ་མེས་བུ་རྒྱུད་སོགས་ཀྱི་ཡོངས་གྲགས་སྨན་པ་ ༡༣༨ བཅས་ད་བར་ཁྱོན་སྨན་པ་ ༣༨༤ དེབ་སྐྱེལ་གནང་ཡོད་འདུག

གསར་འགོད་པ། ཨ་རིག་འགྱུར་མེད།