༢༠༡༡ལོའི་ཆིབས་བསྒྱུར་ཐོག་མ།

ཕྱི་ལུགས་ཀྱི་ལོ་གསར་ལྟར་ན། ཕྱི་ལོ་ ༢༠༡༡ ལོའི་༧གོང་ས་མཆོག་གི་མཛད་འཕྲིན་གྱི་ཆིབས་བསྒྱུར་ཐོག་དེ་རིང་ནས་དབུ་འཛུགས་གནང་ཡོད་ཅིང་། དེ་ཡང་རིག་གཞུང་དང་ཆོས་ཕྱོགས་ཀྱི་ལས་དོན་ནས་མགོ་བརྩམས་ཡོད།

དེ་རིང་ཉིན་གུང་ཆུ་ཚོད་ ༡༢ ཐོག་༧གོང་ས་མཆོག་བཞུགས་སྒར་སེར་སྐྱ་མང་ཚོགས་ཀྱི་ཕེབས་སྐྱེལ་འོག་ལྡི་ལིར་ཕེབས་ཡོད་པ་དང་། ཕྱི་ཚེས་ ༩ ཉིན་༧གོང་ས་མཆོག་གིས་ལྡི་ལིའི་དེང་རབས་སློབ་གྲྭའི་ Modern School ཞེས་པའི་ཚོགས་ཁང་དུ། ཏུའུ་སི་ཊ་ནང་པའི་རིག་གཞུང་གཅེས་སྐྱོང་ཁང་དབུ་བརྙེས་ཏེ། མི་ལོ་ ༣༠ འཁོར་བའི་དུས་དྲན་མཛད་སྒོའི་སྟེང་༼བདེ་སྐྱིད་ཀྱི་གནས་རིམ་འདྲ་མིན། ༽ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་དང་། ཕྱི་ཚེས་ ༡༢ ནས་ ༡༦ བར་ཝ་རཱ་ཎ་སིར་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ཆེན་མོ་དང༌། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་བཅས་ཀྱི་གསུང་ཆོས། དེ་བཞིན་ཕྱི་ཚེས་ ༣༠ ཉིན་རྒྱ་གར་བྷང་ལོར་གྲོང་ཁྱེར་དུ་ཡོད་པའི་ཐེག་པ་ཆེན་པོའི་སྲོལ་རྒྱུན་རྒྱུད་འཛིན་ཚོགས་པའི་གོ་སྒྲིག་འོག དེ་གའི་བྷ་སི་ཎ་ཝ་གྷོ་ཊི་ Basanavagudi རྒྱལ་ཡོངས་མཐོ་སློབ་ཐང་ཆེན་དུ་མང་ཚོགས་ལ་་༼དཀའ་ཚེགས་ཆེ་བའི་དུས་ཚོད་ནང་བདེ་སྐྱིད་འཚོལ་བ། ༽ཞེས་པའི་བརྗོད་གཞིའི་ཐོག་བཀའ་སློབ་གནང་འཆར་ཡོད་འདུག  

གསར་འགོད་པ། དཔལ་ལྡན།