ཉིན་འདི་འགར་རྒྱ་གར་རྒྱལ་ཡོངས་སློབ་མའི་ཚོགས་ཆེན་ཐེངས་ལྔ་པ་དེ་ས་རཱ་མཐོ་སློབ་ཏུ་འཚོགས་བཞིན་པ་དང་། ཐེངས་འདིའི་ཚོགས་འདུའི་སྟེང་མཐོ་སློབ་ཁག་ ༢༤ ཙམ་གྱི་མཐོ་རིམ་སློབ་མ་ ༨༢ མཉམ་ཞུགས་གནང་ཡོད་འདུག
ཟླ་འདིའི་ཕྱི་ཚེས་ ༦ ཉིན་ནས་ ༡༠ བཅུ་བར་ཉིན་ལྔའི་རིང་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་ལྔ་པ་དེ་ས་རཱ་མཐོ་སློབ་ཏུ་འཚོགས་བཞིན་ཡོད་པ་དང་། ཚེས་ ༧ ཉིན་གྱི་སྔ་དྲོར་དཔལ་རྒྱལ་པ་ཀརྨ་པ་མཆོག་དང་བཀའ་ཁྲི་ཟམ་གདོང་རིན་པོ་ཆེ་མཆོག བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་བཅས་ཚོགས་མགོན་དུ་ཕེབས་ཏེ། ས་རཱ་མཐོ་སློབ་ཀྱི་ཚོགས་ཁང་ཆེན་མོའི་ནང་ཐེངས་འདིའི་ཚོགས་ཆེན་གྱི་མཛད་སྒོ་དབུ་འཛུགས་གནང་ཡོད།
མཛད་སྒོའི་སྟེང་བྱེས་བཞུགས་བོད་རིགས་མཐོ་རིམ་སློབ་མ་ཐུན་མོང་གིས་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ལ་༼ བཀའ་དྲིན་རྗེས་དྲན་གྱི་གཟེངས་རྟགས༽ ཤིག་དང་། ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་བཀྲ་ཤིས་རབ་བརྟན་ནམ་ཐེའུ་རང་ལགས་སུ་༼ དཔའ་བོའི་སྙིང་སྟོབས་ཀྱི་རྟགས་མ།༽ ཞེས་པ་གཉིས་ཕུལ་ཏེ། བཀའ་བློན་ཁྲི་པ་མཆོག་གིས་ད་བར་བོད་ཀྱི་སྲིད་འབྱོར་རིག་གསུམ་ཐད་རླབས་ཆེའི་ཕྱག་ལས་མང་བོ་བསྐྱངས་དང་སྐྱོང་བཞིན་པར་རྗེས་དྲན་དང་། ཐེའུ་རང་ལགས་ཀྱིས་རྒྱ་ནག་གི་གནོད་ཤུགས་ལ་མགོ་བོ་མ་བསྒུར་བར་ ༢༠༠༨ ལོའི་ཞི་རྒོལ་ཆེན་མོ་དང་ད་ལྟའི་བོད་ནང་གི་དཀའ་སྡུག་མཚོན་པའི་རྩོམ་ཡིག་སྤེལ་བར་བསྟོད་བསྔགས་གནང་ཡོད།
ཉིན་དེར་༧རྒྱལ་པ་ཀརྨ་པ་མཆོག་གིས་བཀའ་སློབ་གསུང་བཤད་གནང་དོན། ཁ་སང་དགོང་མོ་ནས་ངས་སང་ཉིན་ཚིག་ཁ་ཤས་ཤིག་བཤད་རྒྱུ་མེད་ན་འགྲིག་གི་མ་རེད་བསམ་སྟེ་བསམ་བློ་བཏང་བ་ཡིན་མོད་མཐར་ཚིག་གཉིས་མ་གཏོགས་དྲན་མ་བྱུང་། ཚིག་གཉིས་དེ་ནི་ཤེས་ཡོན་ཟེར་བ་དེ་རང་རེད། ཤེས་ཡོན་ཟེར་བའི་ཚིག་དེ་ཕར་བཀྲལ་ཏེ་ཞུས་ན་ཤེས་བྱ་དང་ཡོན་ཏན་ལ་གོ་དགོས་ཤིང་། ཤེས་བྱ་ཟེར་དུས་སྤྱིར་བཏང་གི་ཤེས་བྱ་ཟེར་བ་ཧ་ཅང་རྒྱ་ཆེན་པོ་རེད་ལ། བོད་ལ་ཤེས་བྱ་རིག་པའི་གནས་ལྔ་དང་རིག་པའི་གནས་བཅུ་སོགས་མང་བོ་ཡོད། དེང་དུས་ལྟ་བུར་མཚོན་ན་ཤེས་ཡོན་ནམ་སློབ་གསོ་ཟེར་བ་སོགས་རིགས་འདྲ་མིན་སྣ་ཚོགས་ཤིག་ཡོང་གིན་འདུག་ཅེས་དང་། དེ་མིན་ཡོན་ཏན་ཟེར་དུས་སློབ་སྦྱོང་བྱས་ཏེ་རིག་པ་སྦྱོང་རྒྱུ་ཙམ་མ་ཟད། གཙོ་བོ་སེམས་རྒྱུད་ལ་འགྱུར་བ་གཏོང་རྒྱུ་དང་བཟང་ཕྱོགས་ཀྱི་ཡར་རྒྱས་གཏོང་རྒྱུ་ལྟ་བུ་ལ་ཡོན་ཏན་ཟེར་བཞིན་འདུག་སྙམ། དེར་བརྟེན། གང་འདྲ་བྱས་ཏེ་མི་ཞིག་ཆགས་ཀྱི་ཡོད་པའི་རྨང་གཞིའི་ཡོན་ཏན་དེ་ང་ཚོའི་བསམ་བློའི་ནང་དུ་དགོས་པ་གལ་ཆེན་པོ་རེད། དེ་ལྟ་བུ་ཞིག་ཡོད་པའི་ཐོག་གཞི་ནས་རིག་རྩལ་གཞན་ལ་སློབ་སྦྱོང་བྱས་ཚེ་སློབ་སྦྱོང་བྱེད་རིན་ཆོག་པ་ཞིག་ཆགས་ཀྱི་ཡོད། ཅེས་དང་།
ཁོང་གིས་མུ་མཐུད་དོན། གནའ་རབས་ཀྱི་ཨེ་ཤ་ཡའི་རིག་གཞུང་དང་སྲོལ་རྒྱུན་ནང་ཐོག་མར་མི་བཟང་བོ་ཞིག་ཆགས་རྒྱུར་སློབ་སྦྱོང་བྱས་རྗེས། གཞི་ནས་ཤེས་བྱ་ཡོན་ཏན་སྦྱོང་རྒྱུའི་ལུགས་སྲོལ་ཞིག་ཡོད་ལ། དེར་དེང་སང་འཛམ་གླིང་ནང་ཚང་མས་གལ་ཆེན་པོ་དང་དོ་སྣང་སླེབ་ཀྱིན་ཡོད། རྒྱ་ནག་ལ་མཚོན་ན་དེང་སྐབས་དཔལ་འབྱོར་དང་སློབ་གསོའི་ཐད་ནས་གང་འཚམ་ཡར་རྒྱས་འགྲོ་བཞིན་ཡོད་ནའང་། རིག་གནས་གསར་བརྗེ་ཆེན་མོས་ཤུགས་རྐྱེན་ཐེབས་པའམ། མི་ཚང་མར་སྤྱིར་བཏང་བའི་མིའི་ཀུན་སྤྱོད་ཀྱི་རྨང་གཞི་བརྟན་པོ་མེད་སྟབས། རིག་གནས་གསར་བརྗེའི་སྐབས་ཕྲུ་གུས་ཕ་མ་བཙོང་སྟེ་འཐབ་རྩོད་བཏང་བ་ལྟ་བུ་དང་། མི་ཆོས་ལས་འདས་པའི་གནས་ཚུལ་མང་པོ་ཡོང་སྟབས་དེའི་བག་ཆགས་མཐུག་པོ་ཆགས་ཏེ། དེང་སྐབས་གཞོན་སྐྱེས་མང་བོ་ཞིག་ལ་སྤྱིར་བཏང་གི་མི་ཞིག་ཡིན་པའི་བསམ་ཚུལ་དང་འགན་འཁུར། གོ་རྟོགས་མེད་པ་བཅས་ལ་བརྟེན། སློབ་སྦྱོང་གི་ཆུ་ཚད་ཐོག་མཐོ་རིམ་སློབ་གྲྭ་ཆེན་མོ་དང་ཆེད་ལས་ཀྱི་སློབ་གྲྭ་ཐོན་ནའང་། མིའི་ཆ་ནས་མི་བཟང་བོ་ཞིག་མིན་པར་སྤྱི་ཚོགས་ནང་གཏོར་བཤིག་གཏོང་མཁན་དང་། ཁྲིམས་འགལ་དང་ཉེས་ཅན་པ་མང་བོ་ཆགས་བཞིན་པ་ལྟ་བུའི་གནས་ཚུལ་མང་བོ་ཡོད་སྟབས། དེང་སྐབས་རྒྱ་ནག་ཏུའང་སྲོལ་རྒྱུན་ལྟར་ཐོག་མར་མི་ཆོས་རིང་ལུགས་ཀྱི་ཐོག་ནས་སློབ་གསོ་སྤྲོད་དགོས་པ་གལ་ཆེན་པོ་རེད་ཅེས་བཤད་མཁན་འདུག ཅེས་གསུངས་བྱུང་།
ཡང་ཁོང་གིས་སློབ་ཕྲུག་ཚོར་མི་རིགས་དང་རྒྱལ་ཁབ་ལ་ཤ་ཞེན་དགོས་སྐོར་གསུངས་དོན། ང་ཚོ་བོད་རིགས་ཤིག་ཡིན་པ་དང་བོད་མི་རིགས་ཀྱི་ཆོས་དང་རིག་གཞུང་། ཆབ་སྲིད་སོགས་གང་ཅིའི་ཐད་དུའང་ཧ་ཅང་གི་ཉམ་ཐག་པ་དང་གཉན་འཕྲང་ཅན་གྱི་དུས་ཚོད་ཅིག་ཏུ་སླེབ་ཡོད་སྟབས། ངེས་པར་དུ་ང་ཚོར་ཕྱིའི་ཤེས་བྱ་ཡོན་ཏན་གྱི་ཆུ་ཚད་མཐོན་པོ་དགོས་པ་ཙམ་མ་ཟད། རང་གི་མི་རིགས་ལ་ལྷག་བསམ་དང་ཤ་ཞེན། རང་གི་རྒྱལ་ཁབ་དང་ཕ་ཡུལ་གྱི་ཆེད་དུ་ལེགས་སྐྱེས་འབུལ་བའི་ཆོད་སེམས་བརྟན་པོ་དགོས་པ་གལ་ཆེན་པོ་རེད། ཅེས་དང་། ཕྱིའི་ཤེས་བྱ་ཡོན་ཏན་ཡོད་པ་ཙམ་གྱི་མི་ཆོག་པར་གཙོ་བོ་སོ་སོ་རང་ཉིད་ལོ་ངོ་སྟོང་ཕྲག་མང་བོའི་ལོ་རྒྱུས་ཀྱི་རྒྱབ་ལྗོངས་ཡོད་པའི་བོད་རིགས་ཤིག་ཡིན་པ་དང་། ཁོར་ཡུག་དང་རིག་གཞུང་སོགས་མདོར་ན་སོ་སོའི་མི་རིགས་ལ་བརྩེ་དུང་དང་ཤ་ཞེན་བསླེབ་དགོས་པ་གལ་ཆེན་པོར་མཐོང་གི་འདུག དེ་ཚོ་ཐུགས་ལ་འཇགས་དགོས་པ་རེད་ཅེས་གསུངས།
ཡང་ཁོང་གིས། དེང་སྐབས་དུས་རབས་ཉིར་གཅིག་པར་ཕྱི་དངོས་པོ་དང་དཔལ་འབྱོར་ཡར་རྒྱས་ཕྱིན། དེ་བཞིན་འཛམ་བུ་གླིང་དུ་ཕན་ཚུན་ཐག་ཉེ་རུ་ཕྱིན་ཏེ་ཕྱོགས་གཅིག་ནས་སྟབས་བདེ་རུ་དང་ལས་སླ་རུ་ཕྱིན་ཡོད་ནའང་། ཕྱོགས་གཞན་ནས་ཉོག་འཛིང་མང་དུ་ཕྱིན་ཡོད་སྟབས་འདི་ལྟ་བུའི་དུས་ཚོད་ནང་ང་ཚོས་ཁ་ནང་ཏུ་ཕྱོགས་ཏེ་བསམ་བློ་ནན་ཏན་ཏུ་མ་བཏང་ན། རང་ཉིད་གང་ཡིན་པ་དེའི་ངོ་བོ་བརླག་འགྲོ་བ་དང་རང་དང་རང་གི་མི་རིགས་བར་གྱི་འབྲེལ་ཐག་དེ་ཤོག་བྱའི་ཐག་པ་ཆད་པ་ལྟར་ཆད་འགྲོ་རྒྱུའི་ཉེན་ཁ་ཡོད་སྟབས། དེར་ཚང་མས་ཐུགས་བསམ་བཞེས་དགོས་པ་གལ་ཆེན་པོ་རེད་ཅེས་གསུངས།
མཇུག་མཐར་ཁོང་གིས། གོ་སྒྲིག་པ་རྣམས་ཀྱིས་ཟླ་བ་མང་བོར་དཀའ་ངལ་བརྒྱབ་སྟེ་འཚོགས་རྒྱུ་བྱུང་བའི་ཐེངས་འདིའི་མཐོ་རིམ་སློབ་མའི་ཚོགས་འདུའི་སྟེང་། ཚང་མས་ཕན་ཚུན་ལ་བརྩི་བཀུར་ཞུས་ཐོག མཉམ་མྱོང་སྤེལ་རེས་དང་བགྲོ་གླེང་ལྷུག་པོར་གནང་སྟེ་དུས་ཚོད་འཕྲོ་བརླག་ཏུ་མི་འགྲོ་བར་བྱ་རྒྱུ་གལ་ཆེན་པོ་རེད་ཅེས་གསུངས།
ཐེངས་འདིའི་མཐོ་རིམ་སློབ་མའི་ཚོགས་ཆེན་སྟེང་ཝར་ཎ་མཐོ་སློབ་དང་རཱ་མཐོ་སློབ། སྨན་རྩིས་ཁང་དང་ནོར་གླིང་མཐོ་སློབ། ས་སྐྱ་མཐོ་སློབ། སེ་ར་དང་འབྲས་སྤུངས་སོགས་བོད་ཀྱི་མཐོ་རིམ་སློབ་གྲྭ་ཁག་ཅིག་དང་། གཞན་ཡང་མེ་སོར་དང་བྷེང་ལོར། ལྡི་ལི། ཅན་ངྷི་གྷར། བྷ་རོ་ཊ་སོགས་རྒྱ་གར་གྱི་མཐོ་སློབ་ཁག་ཅིག་བཅས་ཁྱོན་བསྡོམས་མཐོ་སློབ་ཁག་ ༢༤ ཙམ་ནས་མཐོ་རིམ་སློབ་མ་ ༨༢ མཉམ་ཞུགས་གནང་ཡོད་འདུག
ཚོགས་ཆེན་གྱི་ཉིན་དང་པོར་ཚོགས་བཅར་བ་ཡོངས་བཞུགས་སྒར་ཁུལ་གྱི་གཞུང་འབྲེལ་དང་གཞུང་འབྲེལ་མ་ཡིན་པའི་ལས་ཁུངས་ཁག་ལ་གཟིགས་སྐོར་དང་། ཉིན་གཉིས་པའི་ཉིན་རྒྱབ་བོད་ཀྱི་ན་གཞོན་ཤེས་ཡོན་པའི་འགན་འཁྲི་ཞེས་པའི་བརྗོད་གཞིའི་ཐོག་བགྲོ་གླེང་། ཉིན་གསུམ་པར་བོད་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་གིས་༼ ད་ལྟའི་བཙན་བྱོལ་ནང་གི་ཤེས་ཡོན་སློབ་གསོའི་སྟོང་ཆ་དང་། དེར་ཁ་གསབ་དང་འཕེལ་རྒྱས་གཏོང་བའི་འཛིན་སྐྱོང་ཐབས་ལམ༽ ཞེས་པ་དང་། བོད་ཁྱིམ་སྤྱི་ཁྱབ་འགན་འཛིན་ཚེ་དབང་ཡེ་ཤེས་ལགས་ཀྱིས་༼ འདས་པའི་བོད་ཁྱིམ་ཤེས་ཡོན་སློབ་གསོའི་ཉམས་མྱོང་ལས་མ་འོངས་འཕེལ་རྒྱས་ཀྱི་ལས་འཆར༽ ཞེས་པའི་ཐོག་གསུང་བཤད་གནང་རྒྱུ། ཉིན་བཞི་བར་ས་རཱ་མཐོ་སློབ་ཀྱི་ལོ་རྒྱུས་དགེ་རྒན་བསོད་ནམས་རྒྱལ་མཚན་ལགས་ཀྱིས་༼ བོད་སྐད་ཡིག་གི་བྱུང་རིམ་དང་མཚོ་སྔོན་ཕྱོགས་ཀྱི་བོད་རིགས་སློབ་ཕྲུག་རྣམས་ཡར་ལངས་བྱེད་དགོས་པའི་རྒྱུ་མཚན། དེ་ལས་ངེད་ཅག་རང་དབང་ལུང་པར་ཡོད་པའི་སློབ་ཕྲུག་རྣམས་ཀྱིས་བསླབ་བྱ་ཅི་ཞིག་ལེན་དགོས ༽ ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུའི་ལས་རིམ་བསྒྲིགས་འདུག
གཞན་ཡང་མཛད་སྒོའི་ཉིན་དེར་༧རྒྱལ་པ་ཀརྨ་པ་མཆོག་གིས་རྒྱ་གར་རྒྱལ་ཡོངས་མཐོ་རིམ་སློབ་མའི་ཚོགས་ཆེན་གྱི་དབྱིན་བོད་གཉིས་ལྡན་གྱི་དྲ་རྒྱ་ཞིག་དབུ་འབྱེད་དང། མཐོ་རིམ་སློབ་མ་ནང་ཁུལ་དུ་ཆེད་རྩོམ་འགྲན་བསྡུར་བྱས་པ་ཁག་ཅིག་ལ་རྩོམ་རིག་བྱ་དགའ་གནང་ཡོད།
གསར་འགོད་པ། ཨ་རིག་འགྱུར་མེད།
དཔལ་༧རྒྱལ་དབང་ཀརྨ་པ་མཆོག་གི་གཙོའི་བགྲོ་གླེང་ཚོགས་ཕེབས་པ་ཡོངས་ལ་འཚམས་འདྲི་ཡོད་ལ། བྱ་བ་ཐམས་ཅད་དོན་དང་ལྡན་པར་སྙིང་ནས་སྨོན་ལམ་འདེབས།
གཟིངས་རྟགས་འབུལ་མཁན་བོད་ནས་ཡིན་དང་། རྒྱ་གར་ནས་ཡིན། ང་ལ་གསལ་ཁ་ཐོན་མ་སོང་། གཅིག་གིས་གསལ་བཤད་གནོངས་སང་། ཐུགས་རྗེ་གཟིགས།
བོད་མི་རིགས་ཀྱི་བདེན་དོན་འཐབ་རྩོད་ཀྱི་རྒྱུད་རིམ་ཁྲོད་ཁ་ཆར་བུ་ཡུག་དྲག་ཏུ་འཚུབ་ཀྱང་ནམ་ཡང་འཇིགས་ཞུམ་མེད་པར་རང་གི་དམ་བཅའ་ལྷོད་པ་མེད་པར་ཉིན་མཚན་དུས་དྲུག་ཏུ་སྐུ་ལས་སྐྱོན་མཁན་གྱི་སྐྱེས་ཆེན་དམ་པ་དེ་ལྟ་བུར་བཀའ་དྲིན་རྗེས་དྲན་ཞུ་འོས་པ་རང་རེད།
ཁོང་ལྟ་བུར་མཚོན་ན་བོད་ཀྱི་བླ་སྤྲུལ་གཞན་ལྟར་བླ་བྲང་རྫིག་པོ་དང་རྒྱས་སྤྲོས་ཀྱི་འཚོ་བར་ལོངས་སུ་སྤྱོད་རྒྱུའི་སྐལ་བ་ཆ་ཚང་ལྡན་ཡང་། རྩ་བའི་བླ་མའི་བཀའ་དང་རྒྱལ་སྲས་དཔའ་བོའི་མཛད་སྤྱོད་ངོ་མ་དང་ལེན་གནང་ནས་སྐུ་ཚེ་གང་པོར་བོད་ཀྱི་བསྟན་སྲིད་བདེ་དོན་ཆེད་དུ་ཕྱག་ལས་གནང་བ་དེ་ནི་བོད་མི་རྣམས་ལ་བཀའ་དྲིན་ཤིན་ཏུ་ནས་ཆེ་བ་ཞིག་ཡིན། དུས་ནས་དུས་སུ་༸གོང་ས་༸སྐྱབས་མགོན་ཆེན་པོའི་དབུ་འོག་དཔུང་འདེགས་ངོ་མ་ཞིག་གནང་བར་སྙིང་དབུས་ནས་ཐུགས་རྗེ་ཆེ་ཞུ།
རིན་པོ་ཆེ། ཁྱེད་སྐུ་ཚེ་ཡུན་དུ་བརྟན་ཅིང་། མཛད་འཕྲིན་བསྟན་འགྲོའི་དཔལ་དུ་རྒྱས་པའི་གསོལ་འདེབས་ཞུ།
ད་རེས་ཀྱི་ཚོགས་ཆེན་འདི་ཧ་ཅང་ཡག་པོ་འདུག་མོད་འོན་ཀྱང་དོན་ཕན་ཞིག་གནང་རྒྱུ་གལ་ཆེན་པོ་རེད་འདུག
དེ་རིང་བཀའ་ཁྲི་ཟམ་གདོང་རིན་པོ་ཆེ་མཆོག་གིས་་་ངས་ད་བར་ལས་ཀ་བྱས་པ་དེ་མི་རིགས་དང་རྒྱལ་ཁབ་ཀྱི་ཞེན་ཁོག་གི་དབང་གིས་མིན། ང་དེའི་འདོད་པའང་མེད་གསུངས་སོང་། སྐབས་དེར་ང་རང་ཡང་ཅུང་བདེ་བོ་ཞིག་ཆགས་མ་སོང་། ཡིན་ཡང་བསམ་བློ་ཞིབ་ཏུ་བཏང་ན་དེ་ནི་དགེ་སྦྱོང་དངོས་གནས་ཞིག་གི་གསུང་དྲི་མ་མེད་པ་ཞིག་རེད། ཡིན་ནའང་མཐོ་རིམ་སློབ་མའི་ཚོགས་ཆེན་སྟེང་གི་གཟེངས་རྟགས་དེ་རིན་པོ་ཆེ་ལ་གཏན་ནས་འོས་འཚམས་ཤིག་མ་རེད། གོང་ས་མཆོག་གིས་ལོ་ངོ་སུམ་ཅུའི་རིང་འཐུས་ཤོར་ཕྱིན་པ་རེད། གསུང་བ་དེའི་གསུམ་ཆ་གཅིག་ཟམ་གདོང་རིན་པོ་ཆེ་ཡི་གཟན་གྱི་ཐུ་འོག་ནས་ཤོར་བ་རེད།
བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ནས་དེ་རིང་ཕྱི་ཚེས་༧་ཉིན་ཁོང་ནས་ད་ བར་ཕྱག་ལས་གནང་བ་དེ་བོད་མི་རིགས་དང་རྒྱལ་ཁབ་་ཆབ་སྲིད་བཅས་ཀྱི་ཆེད་དུ་མིན་ལ་ དེའི་ཐད་འདུན་པ་ཡང་མེད་ཞེས་དང་དེ་ནི་གཙོ་བོ་ཁོང་གི་བླ་མ་སྐྱབས་རྗེ་ཁྲི་བྱང་ རིན་པོ་ཆེའི་བཀའ་སྒྲུབ་རྒྱུའི་བསམ་བློ་རང་ཡིན་སོགས་གསུངས་སོང།།
མཐོ་རིམ་སློབ་མའི་ཚོགས་ཆེན་ཐེངས་བཞི་བའི་སྐབས་ཀྱི་གྲོས་ཆོད་དག་གི་གྲུབ་འབྲས་ད་ཐེངས་སྟོན་རྒྱུ་ཡོད་པའི་སྨོན་ལམ་དང་རེ་བ་ཡོད་ལ། མཐོ་རིམ་སློབ་མའི་ཚོགས་ཆེན་ཐེངས་ལྔ་བའི་སྐབས་སུ་འཇོག་རྒྱུའི་གྲོས་ཆོད་དག
ཐེངས་དྲུག་པའི་ཚོགས་ཆེན་ཚོགས་རག་བར་དུ་མཐོ་སློབ་དག་གིས་རང་ནུས་ཡོད་ཚད་ཕུལ་ཏེ་ལག་ལེན་ལེགས་འགྲུབ་ཡོང་དུ་བཅུག་ནས་སྟོན་རྒྱུ་ཡོད་པའི་རེ་སྐུལ་ཡོད།
དེ་མ་གཏོགས་ལོ་རྟག་པར་ཁ་སྟོང་ནང་ནས་ཚིག་སྟོང་བཤད་ན་རང་རོགས་གཉིས་ཀྱི་དུས་ཚོད་སྟོང་ཟད་རང་རེད་དོ།