རིམ་པས་གནས་ཚུལ་ལ་འགྱུར་བ་ཏན་ཏན་འགྲོ་གི་རེད། ང་རང་ཚོ་ཕན་ཚུན་ལག་པ་གཏོང་རེས་དང་། ཕན་ཚུན་གྱི་གདོང་པ་མཐོང་ཞིང་སྐད་ཆ་གོ་ཐུབ་པ་ཙམ་མ་ཟད། ཕན་ཚུན་ལུས་ཀྱི་དྲི་མའང་སྣོམ་ཐུབ་པའི་དུས་ཚོད་གཅིག་ཏན་ཏན་འཆར་གི་རེད། ཅེས་༧གོང་ས་མཆོག་གིས་གསུངས་ཡོད།
ཕྱི་ཚེས་ ༤ ཉིན་༧གོང་ས་མཆོག་གིས་བཞུགས་སྒར་ཕོ་བྲང་ནས་དྲ་ལམ་བརྒྱུད་རྒྱ་རིགས་ཚོའི་དྲི་བ་ཁག་ ༨ ཙམ་ལ་ལན་འདེབས་གནང་ཡོད་པ་དག་ལས་རྒྱ་ནག་པེ་ཅིན་གྱི་ཁྲིམས་རྩོད་པ་ཅཱང་ཐན་ཡཱོང་དང་། ཧྲིན་ཀྲིན་གྱི་འགྲོ་བ་མིའི་ཐོབ་ཐང་ཁྲིམས་རྩོད་པ་ཐུན་པེའོ་གཉིས་ཀྱི་དྲི་བ་རེ་རེར་ལན་འདེབས་གནང་ཡོད། དྲི་བ་དྲིས་ལན་གྱི་ཐོག་མར་རྒྱ་རིགས་རྩོམ་པ་པོ་ཝང་ལི་ཞོང་གིས་༸གོང་ས་མཆོག་ལ་ཁོང་གཉིས་མཚམས་སྦྱོར་གནང་དོན། དེ་རིང་འདིར་རྒྱ་རིགས་ཁྲིམས་རྩོད་པ་གྲགས་ཅན་ཐུན་པེའོ་དང་ཅཱང་ཐན་ཡཱོང་གཉིས་མཉམ་བཞུགས་གནང་ཡོད་ལ། ཁོང་གཉིས་ནི་དམངས་གཙོ་དང་རང་དབང་ཆེད་དུས་ཡུན་རིང་པོར་ཁྲིམས་རྩོད་བྱེད་མྱོང་མཁན་ཡིན་པར་མ་ཟད། ༢༠༠༨ ལོར་བོད་ནང་དོན་རྐྱེན་བྱུང་སྐབས་ཐེན་པེའོ་ཡིས་ཐེངས་དང་པོར་བོད་རིགས་ལ་ཁྲིམས་རྩོད་ཀྱི་རོགས་པ་མཁན་ཡིན། ཁོང་གཉིས་ནི་བོད་ཀྱི་གནད་དོན་ཐག་གཅོད་བྱེད་རྒྱུའི་བསམ་འཆར་དོན་ཚན་བཅུ་གཉིས་འདོན་མཁན་གྲས་ཡང་རེད། ཅེས་ངོ་སྤྲོད་གནང་ཡོད།
༧གོང་ས་མཆོག་གིས་བཀའ་གནང་དོན། དེ་རིང་རྒྱ་ནག་སྐམ་ས་ཆེན་པོའི་ནང་གི་རྒྱ་རིགས་གྲོགས་པོ་རྣམ་དཔྱོད་ཅན་ལེགས་ཉེས་ཀྱི་ཆ་མཐོང་ཞིང་། ཕུགས་རྒྱང་རིང་པོའི་གནས་ཚུལ་ཡང་མཐོང་ཐུབ་མཁན་ཁྱེད་ཚོ་དང་མཉམ་དུ་སྐད་ཆ་བཤད་རྒྱུའི་གོ་སྐབས་བྱུང་བར་ངོས་རང་ཧ་ཅང་དགའ་བོ་བྱུང་། རིམ་པས་གནས་ཚུལ་ལ་འགྱུར་བ་ཏན་ཏན་འགྲོ་གི་རེད། ང་རང་ཚོ་ཕན་ཚུན་ལག་པ་གཏོང་རེས་དང་། ཕན་ཚུན་གྱི་གདོང་པ་མཐོང་ཞིང་སྐད་ཆ་གོ་ཐུབ་པ་ཙམ་མ་ཟད། ཕན་ཚུན་ལུས་ཀྱི་དྲི་མའང་སྣོམ་ཐུབ་པའི་དུས་ཚོད་གཅིག་ཏན་ཏན་འཆར་གི་རེད། ངོས་ནས་ད་ལྟ་རང་རྒྱ་ནག་སྐམ་ས་ནས་ཡིན་པའི་རྒྱ་རིགས་ནང་པའི་ཚོ་ཁག་གཅིག་ལ་ཐུག་སྟེ། ཁོང་ཚོར་འཚམས་འདྲི་དང་ནང་ཆོས་སྐོར་འགྲེལ་བཤད་བརྒྱབ་པ་ཡིན་ལ་ཁོང་ཚོ་ཡང་ཧ་ཅང་དགའ་པོ་བྱུང་སོང་། ཞེས་གསུངས་བྱུང་།
སྐབས་དེར་ཁྲིམས་རྩོད་པ་ཐུན་པིའོ་ཡིས་༧གོང་ས་མཆོག་ལ་དྲི་བ་གནང་དོན། རྒྱ་བོད་མི་རིགས་བར་དང་རྒྱ་བོད་ཤེས་ཡོན་ཅན་བར་དུ་ཕན་ཚུན་འབྲེལ་བ་དང་ཕན་ཚུན་ཤེས་རྟོགས་བྱེད་པ་ནི། བོད་ཀྱི་གནད་དོན་ཞི་བའི་ཐོག་ནས་ཐག་གཅོད་བྱེད་པར་ཤིན་ཏུ་གལ་ཆེ་བ་ཞིག་ཡིན་ལ། ྋགོང་ས་མཆོག་ནས་འདི་འདྲའི་འབྲེལ་བ་ལ་མོས་མཐུན་ཡོད་མེད་དང་། ཇི་ལྟར་བྱས་ཏེ་འབྲེལ་བ་ཡར་རྒྱས་གཏོང་རྒྱུ། འབྲེལ་བ་དང་ཤེས་རྟོགས་འདི་ལྟ་བུའི་འགོག་རྐྱེན་གཙོ་བོ་གང་ལ་ཐུག་ཡོད་དམ། ཞེས་པའི་དྲིས་ལན་དུ་༧གོང་ས་མཆོག་གིས་བཀའ་ལན་གནང་དོན། གནམ་བདེ་སྒོ་མོ་ཆེའི་ཐང་ཆེན་གྱི་གནས་ཚུལ་མ་བྱུང་གོང་ནས་ངས་རྒྱ་རིགས་གྲོགས་པོ་ཚོར་ཐུག་རྒྱུའི་འབད་བརྩོན་བྱས་པ་ཡིན་ལ། དེ་བཞིན། ཨ་རི་དང་ཁེ་ཎ་ཌའི་ནང་ཡོད་པའི་བོད་རིགས་ཚོར་ཡང་ཁྱོད་ཚོས་རྒྱ་རིགས་གྲོགས་པོ་ཚོར་འབྲེལ་བ་བྱེད་དགོས། ཞེས་འབད་བརྩོན་བྱས་པ་ཡིན་མོད། གནམ་བདེ་སྒོ་མོ་ཆེའི་ཐང་ཆེན་གྱི་གནས་ཚུལ་མ་བྱུང་གོང་ང་ཚོའི་ངོས་ནས་ཕར་འབྲེལ་བ་ཇི་ཙམ་བྱས་ཀྱང་ཁོང་ཚོས་ཕྲན་བུ་ཐེ་ཚོམ་བྱེད་ཀྱི་འདུག གནམ་བདེ་སྒོ་མོ་ཆེའི་ཐང་ཆེན་གྱི་གནས་ཚུལ་བྱུང་རྗེས་ང་ཚོའི་བར་གྱི་འབྲེལ་བ་ཧ་ཅང་ཤུགས་ཆེ་རུ་ཕྱིན་སོང་ལ། ལྷག་པར་དུ་ ༢༠༠༨ ལོའི་དོན་རྐྱེན་བྱུང་རྗེས་རྒྱ་རིགས་ནང་ནས་ང་ཚོར་དོ་སྣང་བྱེད་མཁན་ཤུགས་ཆེ་རུ་ཕྱིན་ཡོད། འདས་པའི་ལོ་གཉིས་གསུམ་རིང་ངས་ས་ཆ་འདྲ་མིན་ནས་རྒྱ་རིགས་མཁས་དབང་ ༣༠༠ ཙམ་ལ་ཐུག་པ་ཡིན། ང་ཚོ་ཕན་ཚུན་ཐུག་རྒྱུ་ཤིན་ཏུ་གལ་ཆེན་པོ་རེད་ལ། ཕན་ཐོགས་ཀྱང་ཧ་ཅང་ཆེན་པོ་ཡོད། དཔེར་ན། ང་ཚོ་དང་པོར་ཐུག་སྐབས་ངོ་གདོང་ནག་པོ་སྟོན་མཁན་ཚོ་ཡང་སྐད་ཆ་ཕར་བཤད་ཚུར་བཤད་དང་། ཕན་ཚུན་གྱི་བསམ་ཚུལ་གསལ་པོ་ཤེས་རྗེས་གྲོགས་པོ་ཆགས་ཀྱི་འདུག དེ་རིང་ང་ཚོ་གཟུགས་པོ་དངོས་སུ་ཐུག་མ་ཐུབ་ཀྱང་དེང་དུས་འཕྲུལ་ཆས་ཀྱི་ལམ་ནས་ཕན་ཚུན་དྲི་བ་དྲིས་ལན་བྱེད་ཐུབ་པ་དེ་ཧ་ཅང་ཕན་ཐོགས་ཆེན་པོ་རེད། གལ་ཆེ་ཤོས། ངོས་ནས་རྒྱ་རིགས་དང་ཕྱི་རྒྱལ་བ་ཚོར་ག་དུས་ཡིན་ཡང་ཕྱི་གསལ་ནང་གསལ་དགོས་རྒྱུ་ཧ་ཅང་གལ་ཆེན་པོ་རེད། ཅེས་བརྗོད་ཀྱི་ཡོད། བོད་པའི་གནས་ཚུལ་ལ་ཆ་མཚོན་ནའང་ཕྱི་གསལ་ནང་གསལ་བྱས་པ་ཡིན་ན། ང་ཚོའི་བར་གྱི་དཀའ་ངལ་བདེ་བླག་ངང་སེལ་ཐུབ་རྒྱུ་རེད། ང་ཚོས་གཉིས་མོས་ཀྱི་ཐབས་ལམ་འཚོལ་གྱིན་ཡོད་པ་ལས་རང་རྒྱལ་གཞན་ཕམ་གྱི་གནས་ཚུལ་རྩ་བ་ནས་ཤོད་ཀྱི་མེད། ཅེས་གསུངས་འདུག
ཡང་ཁྲིམས་རྩོད་པ་ཅཱང་ཐེན་ཡོང་གིས་༧གོང་ས་མཆོག་ལ་ཝིས་ཀེལ་གསང་གྲོལ་དྲྭ་གནས་སུ་ཉེ་ཆར་ཨ་རིའི་ཕྱི་སྲིད་གློག་འཕྲིན་གྱི་སྐོར་ཕྱིར་བསྒྲགས་བྱས་པའི་ནང་། ཁྱེད་ཀྱིས་རྒྱ་གར་དུ་གནས་སྡོད་ཨ་རིའི་གཞུང་ཚབ་ལ། བོད་ཀྱི་འཁྱགས་རོམ་བཞུ་བཞིན་པ་དང་། ནགས་ཚལ་མེད་བརླགས་སུ་འགྲོ་བ། གཏེར་ཁ་སྔོག་འདོན་གྱིས་གཙང་ཆུ་འབག་བཙོག་ཏུ་འགྲོ་བཞིན་པ་སོགས། གནད་དོན་འདིའི་རིགས་སྒུག་ཐབས་མེད་མོད། ཆབ་སྲིད་ཀྱི་གནད་དོན་ཐོག་ནས་བོད་མི་རྣམས་ཀྱིས་ད་དུང་ལོ་ལྔ་འམ་བཅུ་ལ་སྒུག་ཆོག་གི་རེད། ཅེས་གསུངས་པ་དེ་བདེན་པ་ཡིན་ནམ། ཡང་ན། ཐབས་ཇུས་ལ་བཅོས་སྒྲིག་བྱས་པ་ཞིག་མཚོན་གྱི་ཡོད་དམ། དངོས་ཡོད་ཀྱི་དགོངས་ཚུལ་གང་ཡིན་ནམ། ཞེས་པའི་དྲི་བའི་ལན་དུ་༧གོང་ས་མཆོག་གིས། ངོས་ནས་གོང་དུ་བཤད་པ་བཞིན། ང་ཚོས་དབུ་མའི་ལམ་ཞེས་གཉིས་སྨན་གྱི་བསམ་བློ་གཏོང་གི་ཡོད། དེ་ལ་འགྱུར་བ་གང་ཡང་མེད། ངོས་རང་སེམས་ཁྲལ་ཆེ་ཤོས་ཏེ་ཁོར་ཡུག་ཉམས་ཆག་ཕྱིན་པ་ཡིན་ན། དེ་སླར་གསོ་བྱེད་རྒྱུ་ཧ་ཅང་ཁག་པོ་ཡོད། ལྷག་པར་དུ་བོད་ཀྱི་ཁོར་ཡུག་ལ་གནོད་སྐྱོན་བྱུང་བ་ཡིན་ན་གླིང་ཆེན་ཨེ་ཤེ་ཡ་ཡོངས་ལ་འབབ་བཞིན་པའི་གཙང་པོ་མང་པོ་ཞིག་བོད་མཐོ་སྒང་ནས་འབབ་ཀྱི་ཡོད་པར་བརྟེན་མི་འབོར་བྱེ་བ་མང་པོའི་ཚེ་སྲོག་ལ་ཕན་གནོད་ཀྱི་འབྲེལ་བ་ཆགས་ཡོད། ཅེས་ཁོང་གཉིས་ཀྱི་དྲི་བ་རེ་རེ་ལ་ལན་འདེབས་གནང་ཡོད་པ་རེད།
གསར་འགོད་པ་དོན་གོས་སྐུ་སྒེར་དྲ་ཚིགས་ལས་བསྡུ་སྒྲིག་བྱས།
