ལྕཊ་སྟག་ལོའི་བོད་ནང་གི་འགྲོ་བ་མིའི་ཐོབ་ཐང་།

རྒྱ་ནག་གཞུང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཚོགས་རྗེས། དེ་སྔོན་དགོན་སྡེ་ཁག་ཏུ་རྡུང་རྡེག་ཚ་ནན་གྱི་བྱ་འགུལ་སྤེལ་བཞིན་པ་དེའི་ཁ་ཕྱོགས་སློབ་གྲྭ་དང་ཤེས་ཡོན་པའི་ཐོག་ལ་བསྐོར་ཏེ། ༢༠༡༠ ལོ་ནི་བོད་ནང་གི་ཤེས་ཡོན་པ་དག་གི་ལོ་ནག་ཅིག་ཆགས་ཡོད།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ ༢༠༡༠ ལོའི་བོད་ནང་གི་འགྲོ་བ་མིའི་ཐོབ་ཐང་ལ་རྟོག་ཞིབ་ཕྱོགས་བསྡོམས་བྱས་ཡོད་པའི་ནང་། ༢༠༡༠ ལོའི་ཟླ་ ༡ པའི་ནང་པེ་ཅིང་དུ་༼ བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ། ༽ ཞེས་པ་ཚོགས་ཏེ། བོད་ཡུལ་ཡུན་རིང་གི་བདེ་རྩའི་ཆེད་བརྟན་ལྷིང་མེད་པའི་རྒྱུ་རྐྱེན་རྣམས་གཙང་བཟོ་བྱ་རྒྱུ་དང་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་བྱ་རྒྱུ་བཅས་དང་། ཟླ་ ༨ ནང་རྒྱ་ནག་འཐབ་ཕྱོགས་གཅིག་གྱུར་པུའུ་ཡིས་གཞིས་ཀ་རྩེར་བོད་ཀྱི་དགོན་སྡེ་ཁག་གི་འགན་འཛིན་གྱི་ཉམས་མྱོང་སྤེལ་བའི་ཚོགས་འདུ་ཟེར་བ་ཞིག་བསྐངས་ཏེ། དགོན་སྡེ་དོ་དམ་དང་སློབ་གསོའི་ལས་འགུལ་སྔར་ཤུགས་ཆེ་རུ་བཏང་ཡོད། ཅེས་བཀོད་འདུག  

མུ་མཐུད་དུ་བསྟན་དོན། ༢༠༡༠ ལོའི་ཟླ་ ༣ ཚེས་ ༣ ཉིན་ལྷ་ས་གྲོང་ཁྱེར་འོག་གི་རྫོང་ཁག་ཏུ་དུས་གཅིག་ལ་སྤྱི་བདེ་ཉེན་རྟོག་པ་དང༌། དྲག་ཆས་ཉེན་རྟོག་པ། གྲོང་ཁུལ་བདེ་སྲུང་མི་སྣ་བཅས་ཀྱིས་རྡུང་རྡེག་ཚ་ནན་གཏོང་བའི་ལས་འགུལ་སྤེལ་བ་དང༌། ལམ་མདོ་ཁག་ལ་ཞིབ་བཤེར་ས་ཚིགས་བཙུགས་པ་དང༌། འགྲོ་སྐྱོད་བྱེད་མིར་དམ་དྲག མགྲོན་ཁང་དང་བོགས་གཏོང་ཁང་པར་གློ་བུར་དུ་ཞིབ་བཤེར་བྱས་ཏེ་བོད་མི་མང་པོ་འཇུ་བཟུང་བྱས་ཡོད། ཅེས་དང་། ལོ་འདིར་རྒྱ་གཞུང་གིས་བོད་ནང་གཞས་པ་དང༌། རྩོམ་པ་པོ།  ཁོར་ཡུག་སྲུང་སྐྱོབ་པ། གྲགས་ཅན་མི་སྣ་སོགས་ལ་ཆབ་སྲིད་ཀྱི་དོགས་གཞིའི་འོག་འཇུ་བཟུང་དང་ཁྲིམས་ཐག་བཅད་དེ། བོད་མི་བསོད་ནམས་ཚེ་རིང་དང༌། པད་མ་ཡེ་ཤེས། བླ་མ་ལྷ་དགའ། བསོད་རྡོ་བཅས་ལ་ལོ་གཉིས་ནར་འགྱངས་སྲོག་ཁྲིམས་དང་། འབྲས་སྤུངས་དགོན་གྱི་དགེ་སྐོས་འཇམ་དཔལ་དབང་ཕྱུག་དང༌། གཡག་མགྲོན་ཁང་གི་སྦྱིན་བདག་རྡོ་རྗེ་བཀྲིས། བསོད་ནམས་མགོན་པོ། ཚེ་དབང་རིན་ཆེན་བཅས་ལ་ཚེ་བཙོན་གྱི་ཁྲིམས་ཐག་བཅད་པ་མ་ཟད། ཚེ་དབང་རྒྱ་མཚོ་དང༌། ཁོར་ཡུག་སྲུང་སྐྱོབ་པ་ཀརྨ་བསམ་གྲུབ། བཀྲ་ཤིས་རབ་བསྟན་སོགས་ལ་མི་ལོ་ ༡༦ ནས་ ༡༥ བར་གྱི་དུས་བཀག་བཙོན་འཇུག་ཁྲིམས་ཐག་སོགས་བཅད་ཡོད། བཅས་བཀོད་འདུག  

སྙན་ཐོ་དེར་བཙོན་པའི་སྐོར་གྱི་གནས་ཚུལ་ཕྱོགས་བསྡོམས་གནང་དོན། བོད་མི་མང་པོ་ཞིག་འཇུ་བཟུང་བྱས་རྗེས་གར་སོང་ཆ་མེད་དུ་གྱུར་པ་མ་ཟད། མནར་གཅོད་དབང་གིས་རྐྱེན་འདས་སུ་གྱུར་པ་དང་ནད་གཅོང༌། སེམས་ཁམས་མི་བདེ་བ་ཆགས་པ་སོགས་ཀྱི་གནས་ཚུལ་ཚབས་ཆེན་བྱུང་ཡོད། ཤེས་རྟོགས་བྱུང་བ་ལྟར་ན། ༢༠༡༠ ལོར་བོད་མི་ ༡༨༨  ཙམ་འཇུ་བཟུང་བྱས་ཡོད་པ་དང༌། མི་ ༧༡ ཙམ་ལ་ཚད་གཞི་མི་འདྲ་བའི་ཁྲིམས་ཆད་དང་། ད་ལྟ་བོད་ནང་ལྟ་སྲུང་ཁང་དང༌ངལ་གཅུན་ཁང༌། བཙོན་ཁང་བཅས་སུ་བཀག་ཉར་དང༌། བཙོན་འཇུག་བྱས་པའི་ཆབ་སྲིད་བཙོན་པ་ཁྱོན ༨༣༡  དང༌། ལོ་གཉིས་ནར་འགྱངས་ཀྱིས་སྲོག་ཁྲིམས་དང་ཚེ་བཙོན། དུས་བཀག་བཙོན་འཇུག་གིས་ཁྲིམས་ཐག་བཅད་པ་ ༣༦༠ ཡོད། ཅེས་བཀོད་འདུག

བོད་ནང་གི་དགོན་སྡེ་ཁག་གི་སྐོར་ལ། རྒྱ་ནག་གིས་༼ དགོན་སྡེ་དོ་དམ་བྱེད་ཐབས། ༽ ཞེས་པའི་དོན་ཚན་ ༤༤ ཅན་གྱི་སྒྲིག་སྲོལ་ཞིག་ཕྱི་ཟླ་ ༡༡ ཚེས་ ༡ ཉིན་ནས་ལག་བསྟར་བྱས་ཡོད། ཟླ་ ༨ ཚེས་ ༡༤ དང་ ༡༥ ཉིན་དབུས་འཐབ་ཕྱོགས་གཅིག་གྱུར་པུའི་ཡིས་བོད་ཀྱི་དགོན་སྡེའི་དམངས་བདག་ལས་དོན་ཉམས་མྱོང་སྤེལ་རེས་ཚོགས་འདུ་གཞིས་རྩེར་ཚོགས་པ་དང༌། བོད་ལྗོངས་དང་ཞིང་ཆེན་བཞིའི་བོད་ཁུལ་གྱི་དགོན་སྡེའི་མགོ་ཁྲིད་དང༌། ས་གནས་འཐབ་ཕྱོགས་གཅིག་གྱུར་གྱི་འབྲེལ་ཡོད་མགོ་ཁྲིད་བཅས་འཛོམས་ཏེ། དགོན་པར་དོ་དམ་ལ་ཤུགས་སྣོན་རྒྱག་རྒྱུའི་ལས་དོན་བཀོད་སྒྲིག་བྱས་ཡོད། དགོན་སྡེའི་འགན་འཁུར་བར་ཟབ་སྦྱོང་ཐེངས་མང་སྤྲད་པ། དགོན་པ་ཁག་ཏུ་དུས་ཚོད་བཅད་མཚམས་མེད་པར་སློབ་གསོའི་ཚོགས་འདུ་བསྡུས་ཏེ། བཙན་ཤེད་ཀྱིས་སློབ་གསོ་དང་ལེན་བྱེད་བཅུག་པ་མ་ཟད། དགོན་སྡེ་དོ་དམ་གྱི་སྒྲིག་གཞི་མང་དག་ཅིག་བཟོས་ཏེ་གྲྭ་བཙུན་ཚོའི་འགྲོ་སྐྱོད་རང་དབང་ལ་བཙན་འཕྲོག་བྱས་པ་དང་། ཆོས་བྱེད་རང་དབང་གང་ཡང་མེད་པར་རྒྱལ་གཅེས་ཆོས་གཅེས་ཀྱི་སློབ་གསོའི་འོག་ཆོས་ལུགས་བྱེད་སྒོར་གནོད་སྐྱོན་ཚབས་ཆེན་བཟོས་ཡོད། ཅེས་དང་།

བོད་ནང་གི་ཤེས་ཡོན་སྐོར་ལ། རྒྱ་གཞུང་གིས་བོད་ནང་གི་ཤེས་ཡོན་ཐོག་སྲིད་བྱུས་གཏན་འབེབས་བྱས་དོན། ༢༠༡༠ ལོའི་ཟླ་ ༩ ཚེས་ ༡༢ ཉིན་ཟི་ལིང་དུ་མཚོ་སྔོན་ཞིང་ཆེན་གྱི་སློབ་གསོའི་ཚོགས་ཆེན་ཐོག ༼ ༢༠༡༠ ནས་༢༠༢༠ ལོའི་ཞིང་ཆེན་འབྲིང་རིང་སློབ་གསོ་བསྒྱུར་བཅོས་དང་འཕེལ་རྒྱས་འཆར་འགོད་རྩ་གནད ༽ ཅེས་པའི་རྒྱ་ཡིག་གཙོ་བོ་དང་བོད་ཡིག་ཕལ་བའི་སྲིད་བྱུས་གཏན་འབེབས་བྱས་ཏེ། མཚོ་སྔོན་ཞིང་ཆེན་རྨ་ལྷོ་ཁུལ་གཙོས་པའི་ས་གནས་མང་པོ་ཞིག་ཏུ་སློབ་ཕྲུག་ཚོས་གཞི་རྒྱ་ཆེ་བའི་རྔམ་སྟོན་ཁྲོམ་སྐོར་བྱས་ཏེ། མི་རིགས་འདྲ་མཉམ་དང༌། སྐད་རིགས་རང་དབང༌ཞེས་པའི་འབོད་སྒྲ་བསྒྲགས་ཡོད། ཅེས་མདོ་བསྡུས་སུ་བསྟན་འདུག

ཡང་སྙན་ཐོ་དེའི་ནང་འདས་པའི་ལོ་འགའི་གོང་ནས་ལག་བསྟར་བྱེད་ཀྱིན་པའི་འབྲོག་དམངས་གྲོང་བརྡལ་ཅན་ལ་སྒྱུར་བཞིན་པའི་སྐོར་དང་། ད་ལོ་མཉམ་ལས་གཞུང་གཅིག་ཅན་གྱི་སྲིད་བྱུས་གསར་པ་གཉིས་ཕྱོགས་བསྡོམས་ཀྱི་ཚུལ་དུ་བཀོད་དོན། ༢༠༡༠ ལོའི་ཟླ་ ༡༢ ཚེས་ ༣ ཉིན་ཀྲུང་གོའི་བོད་ལྗོངས་དྲ་བའི་སྟེང་གནས་ཚུལ་སྤེལ་བར། ༢༠༠༦ ལོ་ནས་བཟུང་ཞིང་འབྲོག་པའི་བདེ་སྡོད་ལས་གཞི་སྤེལ་ཏེ་ལོ་ལྔའི་ནང་ཞིང་འབྲོག་སྡོད་ཁྱིམ་ཁྲི་ ༢༧་༤༨ དང་། མི་གྲངས་ཁྲི་ ༡༤༠ ཙམ་གནས་སྤོར་དང་། ལྔ་ཚན་བཅུ་གཉིས་ཀྱི་འཆར་གཞིའི་ནང་བོད་ལྗོངས་ཀྱི་འབྲོག་ཁྱིམ་ ༡༢༩༤༩ ལྷག་གནས་སྤོར་བྱ་རྒྱུ་ཡིན་པ་དང༌། མཚོ་སྔོན་ཞིང་ཆེན་གྱི་བོད་རིགས་རང་སྐྱོང་ཁུལ་དྲུག་ནང་ཞིང་འབྲོག་གཅིག་གྱུར་དང་། དཀར་མཛེས་ས་ཁུལ་སོགས་སུ་ཡང་གནས་སྤོར་ལས་གཞི་སྤེལ་ཡོད། ཅེས་དང་།

ལྷ་ས་སོགས་སུ་ཕྱི་ནས་ཡོང་བའི་བོད་མིར་དམ་དྲག་དང་དོ་དམ་ནན་པོ་བྱས་ཏེ་གནས་སྐབས་གནས་སྡོད་ཆོག་པའི་ལག་འཁྱེར་ཞུ་ལེན་སྒྲིག་སྲོལ་གཏན་འབེབས་བྱས་པ། བོད་ཀྱི་ས་མཚམས་དམ་དྲག་དང༌། ལྷག་པར་དུ་བོད་མི་སྐྱབས་བཅོལ་དུ་ཡོང་མཁན་ལྟེ་བའི་ལམ་བུ་བལ་བོད་ས་མཚམས་སྔར་བས་དམ་དྲག་ལ་ཤུགས་སྣོན་དང༌། བལ་ཡུལ་ཉེན་རྟོག་ཚན་པས་མཐུན་རྒྱུར་ཞུས་པ་སོགས་ལ་བརྟེན་བོད་ནས་སྐྱབས་བཅོལ་དུ་ཡོང་བར་དཀའ་ཚེགས་ཆེན་པོ་ཆགས་ཡོད་པ་དང༌། ༢༠༡༠ ལོར་བོད་མི་གྲངས་ ༧༧༠ ལས་འབྱོར་མེད། ཅེས་བཀོད་ཡོད་དུག

གསར་འགོད་པ། དཔལ་ལྡན།