འཇིགས་སྐུལ་དྲག་སྤྱོད་པའི་གནད་དོན་དེའི་བྱུང་རིམ་འཇིགས་སྣང་དང་ང་རྒྱལ་ཁེངས་དྲེགས་ཀྱི་ཐོག་ནས་བྱུང་བ་ཞིག་ཡིན་སྟབས། དེ་དག་གི་དཀའ་རྙོག་སེལ་ཐབས་སུ་འཛམ་གླིང་ཡུལ་གྲུ་ཚང་མས་འཕྱར་གྲུ་མཉམ་འདེགས་ཀྱིས་འབད་བརྩོན་བྱ་དགོས་པ་རེད། ཅེས་༧གོང་ས་མཆོག་གིས་གསུངས།
ཟླ་འདིའི་ཕྱི་ཚེས་ ༧ ཉིན་༸གོང་ས་མཆོག་བཞུགས་སྒར་ནས་ཆིབས་ཐོན་གྱིས་ལྡི་ལི་ཁུལ་དུ་ཉིན་གསུམ་རིང་མཛད་འཕྲིན་བསྐྱངས་ཡོད། ཕྱི་ཚེས་ ༧ ཉིན་གྱི་དགོང་དྲོ་རྒྱ་གར་གྱི་འགྲེམས་སྟོན་ཁང་ཆེན་མོའི་ཚོགས་ཁང་དུ་ཐེངས་ ༡༨ པའི་རྒྱ་གར་གྱི་སྲི་བློན་ཟུར་བ་བྷ་རྡུར་ཤསྟི་རི་ཡི་རྗེས་དྲན་མཛད་སྒོར་ཆིབས་བསྒྱུར་བསྐྱངས་ཏེ། བྱམས་བརྩེའི་ནུས་སྟོབས་ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད། འགྲེམས་སྟོན་མཛད་སྒོ་དེའི་སྟེང་གནད་ཡོད་མི་སྣ་ ༣༠༠ ལྷག་མཉམ་ཞུགས་བྱས་ཡོད་འདུག
སྐབས་དེར་༧གོང་ས་མཆོག་གིས་བཀའ་གནང་དོན། ང་ཚོ་སྤྱི་ཚོགས་འདིའི་ནང་འཚོ་ཞིང་གཞེས་པའི་སེམས་ཅན་ཞིག་ཡིན་པའི་ཆ་ནས་སྤྱི་ཚོགས་ཀྱི་བདེ་སྡུག་ལ་དོན་སྙིང་ལྡན་པའི་ཞབས་ཞུ་བསྒྲུབ་ཐབས་བྱ་དགོས། མི་རེ་རེ་ནས་སྤྱི་ཚོགས་བདེ་སྡུག་ལ་སེམས་ཁུར་དང་དོན་སྙིང་ལྡན་པའི་ལག་རྗེས་ཤིག་འཇོག་ཐུབ་པ་ཡིན་ན། དེ་ནི་དོན་སྙིང་ལྡན་པའི་བྱམས་བརྩེའི་ནུས་པ་ཞིག་ཡིན་སྟབས། མ་འོངས་པར་ང་ཚོས་སྤྱི་ཚོགས་འདིའི་ནང་ཞི་བདེ་མཉམ་གནས་ཀྱི་ཐད་ལ་བསམ་བློ་གཏོང་དགོས་པ་དང་། དེ་ཡང་གཙོ་བོ། མིའི་སྤྱི་ཚོགས་ནང་བྱམས་བརྩེ་དང་བཟོད་སེམས་བྱ་རྒྱུ་དེ་གལ་ཆེན་པོ་རེད། ཅེས་བཀའ་གནང་འདུག
དེར་ཡོད་མི་སྣ་ཁག་ཅིག་གིས་ཁོང་ལ་ལྐོག་ཟ་རུལ་སུངས་དང་གསར་འགོད་རང་དབང་སོགས་ཀྱི་གནད་དོན་ཐོག་བཀའ་འདྲི་ཞུས་པར་༧གོང་ས་མཆོག་གིས། གནད་དོན་དེའི་རིགས་ཀྱི་ཐོག་ནས་རྒྱ་ནག་དང་པ་ཀི་སི་ཐན་ལས་རྒྱ་གར་ནང་གནས་སྟངས་ཡག་པོ་ཡོད་པ་རེད། རྒྱ་གར་ལ་མཚོན་ན། གཞུང་གི་ལས་ཁུངས་མཐོ་དམན་ཁག་ཏུ་ལྐོག་ཟའི་གནད་དོན་རིགས་བྱུང་གི་ཡོད་ཀྱང་། ལྐོག་ཟའི་གྱོད་དོན་རིགས་ཐག་གཅོད་བྱ་རྒྱུར་ཁྲིམས་འཛིན་ལམ་ལུགས་དང་གཞུང་འཛིན་ཚོགས་པས་དབང་བསྒྱུར་བྱས་པ་ཞིག་མ་ཡིན་པར། ཁྲིམས་འཛིན་གྱི་ལམ་ལུགས་ཀྱང་ཧ་ཅང་རང་དབང་ལྡན་པ་ཞིག་ཡོད་པ་རེད། གསར་འགོད་རང་དབང་ལ་མཚོན་ནའང་ཚད་ལྡན་ཞིག་ཡོད་པ་རེད། འཇིགས་སྐུལ་དྲག་སྤྱོད་པའི་གནད་དོན་དེའི་བྱུང་རིམ་འཇིགས་སྣང་དང་ང་རྒྱལ་ཁེངས་དྲེགས་ཀྱི་ཐོག་ནས་བྱུང་བ་ཞིག་ཡིན་སྟབས། དེ་དག་གི་དཀའ་རྙོག་སེལ་ཐབས་སུ་འཛམ་གླིང་ཡུལ་གྲུ་ཚང་མས་འཕྱར་གྲུ་མཉམ་འདེགས་ཀྱིས་འབད་བརྩོན་བྱ་དགོས་པ་རེད། ང་ཚོས་ཕུགས་རྒྱང་རིང་པོའི་དཀའ་རྙོག་དེ་སེལ་བའི་ཐབས་ལམ་ཡག་ཤོས་ནི། ཤེས་ཡོན་དང་གོ་རྟོགས་གོང་མཐོར་གཏོང་བའི་ཐབས་ལམ་ལ་བརྟེན་ཏེ་དཀའ་རྙོག་དེ་སེལ་ཐབས་བྱ་དགོས་པ་ལས། སྨོན་ལམ་གསོལ་འདེབས་བྱས་ནས་དུས་ནམ་ཡང་སེལ་ཐབས་མེད་པ་ཞིག་རེད་ལ། མ་འོངས་པར་རྒྱལ་ཁབ་སོ་སོའི་གཞུང་འཛིན་མི་སྣས་དམ་དོན་བྱ་རྒྱུ་དང་ཤེས་ཡོན་གོ་རྟོགས་སྤེལ་ཏེ་གནད་དོན་འདི་སེལ་ཐབས་ལ་འབད་བརྩོན་བྱ་དགོས་པ་རེད། ཅེས་བཀའ་སློབ་གསུང་བཤད་གནང་ཡོད་པ་རེད།
ཕྱི་ཚེས་ ༩ ཉིན་༧གོང་ས་མཆོག་ལྡི་ལིའི་དེང་རབས་སློབ་གྲྭའི་ Modern School ཏུའུ་སི་ཊ་ནང་པའི་རིག་གཞུང་གཅེས་སྐྱོང་ཁང་དབུ་བརྙེས་ཏེ་མི་ལོ་ ༣༠ འཁོར་བའི་དུས་དྲན་མཛད་སྒོའི་སྟེང་ཆིབས་བསྒྱུར་བསྐྱངས་ཏེ། ༼བདེ་སྐྱིད་ཀྱི་གནས་རིམ་འདྲ་མིན། ༽ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པར་མ་ཟད། ཕྱི་ཚེས་ ༡༢ ནས་བཟུང་ཝ་རཱ་ཎ་སི་རུ་གསུང་ཆོས་དང་རྒྱ་གར་བྷང་ལོར་གྲོང་ཁྱེར་གྱི་རྒྱལ་ཡོངས་མཐོ་སློབ་དུ་དགེ་སློབ་རྣམས་ལ་༼དཀའ་ཚེགས་ཆེ་བའི་དུས་ཚོད་ནང་བདེ་སྐྱིད་འཚོལ་བ༽ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད།
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ངོ་མ་ཀུན་མཁྱེན་བླ་མའི་གསུངས་ལ་སྲེད་ལྷད་དབེན།
བོད་རིགས་ཡོད་དོ་ཅོག་གིས་གང་གཟབ་གཟབ་ཀྱི་ཐོག་ནས་ཕྱག་ལས་གནང་དགོས་པ་ནི་ཧ་ཅང་གི་གནད་དུ་ཁེལ་བའི་གཏམ་དྲི་མ་མེད་ཡིན།
རྒྱལ་བའི་སྐུ་གཟུགས་རི་རྒྱལ་ལྷུན་པོ་བཞིན༎
ཡུན་ནས་ཡུན་དུ་མི་འགྱུར་རྟག་བརྟན་ཤོག།
ཐུགས་ཀྱི་བཞེད་དོན་ལྷུན་གྱི་འགྲུབ་པ་དང་༎
སྐུ་ཚེ་བསྐལ་བརྒྱར་བརྟན་པའི་སྨོན་ལམ་འདེབས༎
ངས་བསམ་ན་དེ་ནི་ཆས་གལ་ཆེ་ཤོས་རེད་བསམ་གྱིན་འདུག འཇམ་མགོན་ཁོང་སྐུ་ཚེའི་མཛད་འཕྲིན་ཡར་ནས་ཡར་ལ་དར་པར་ཤོག
འཛམ་གླིང་ཞི་བདེའི་མགོན་སྐྱབས་སྐུ་ཚེ་ཁྲི་ལོ་བརྟན་པར་ཤོག མཛད་འཕྲིན་ཟླ་བཞིན་འཕེལ་པར་ཤོག