རྩོམ་པ་པོ་ཞིག་འཛིན་བཟུང་།

བོད་རིགས་ན་གཞོན་རྩོམ་པ་པོ་གངས་དགའ་འཁྱམས་པོ་ལགས་ ༢༠༡༠ ཟླ་ ༡༢ ཚེས་ ༢༩ ཉིན་གྲོགས་པོ་ཞིག་དང་མཉམ་དུ་ལྷ་སའི་སྲང་ལམ་དུ་འགྲོ་བཞིན་པའི་སྐབས། གློ་བུར་དུ་རྒྱ་གཞུང་གི་ཉེན་རྟོག་བསླེབས་ཏེ། ཁྱོད་བསྟན་པ་བློ་གྲོས་ཡིན་ནམ་ཟེར་བཞིན་འཛིན་བཟུང་བྱས་ཡོད་པ་དང་། ཕོ་སར་དེ་ཉིན་དེའི་ཕྱི་དྲོ་ཀློད་འདུག་ཀྱང་། སྟན་པ་བློ་གྲོས་ལྷ་སའི་བཙོན་ཁང་ཞིག་ཏུ་མུ་མཐུད་བཀག་ཉར་བྱས་ཡོད་པ་མ་ཟད། ཁོང་གི་ཁྱིམ་ནས་ཁོང་གིས་རྒྱུན་དུ་བལྟ་ཀློག་བྱེད་པའི་དཔེ་ཆ་ཁག་དང་། གློག་ཀླད། ཡིག་ཆ་དང་པར་སོགས་ཉེན་རྟོག་པས་འཁྱེར་ཡོད་འདུག ཉིན་ཤས་སྔོན་ཁོང་གི་སྲིང་མོ་ངོ་ཐུག་ཏུ་ཕྱིན་སྐབས། ཁོང་གིས་ཉིན་འགའི་སྔོན་གསར་དུ་སྒོ་འབྱེད་བྱས་པའི་བོད་ཡིག་དཔར་ཁང་དེ་གཞན་ལ་བརྒྱུད་གཏོང་བྱོས། སེམས་ཁྲལ་མི་བྱེད། ང་ལ་སྐྱོན་མེད། གནས་ཚུལ་འདི་ཁྱིམ་མི་ལ་མ་བཤད། ཅེས་བརྗོད་ཡོད་འདུག

མདོ་ཁམས་ལྕགས་ར་དཔལ་འབར་རྫོང་ནས་ཡིན་པའི་རྩོམ་པ་པོ་བསྟན་པ་བློ་གྲོས་སམ། པིར་མིང་ལ་གངས་དགའ་འཁྱམས་པོ་ལགས་ནི།  སྔ་ཕྱིར་དཔལ་ཡུལ་སྔ་འགྱུར་གདན་ས་ཆེན་པོ་མ་དགོན་ནས་སློབ་མཐར་ཕྱིན་པ་དང་། མདུན་སྐྱོད་ཅེས་པའི་དུས་དེབ་ཀྱི་རྩོམ་སྒྲིག་པ་དང་། དཔལ་འབར་སློབ་སྐུལ་ཚོགས་པའི་གཙོ་གྲས། ཁམས་ཁུལ་གྲྭ་བ་ཁ་ཤས་མཉམ་རུབ་ཀྱི་གངས་རིའི་གནས་བབ་ཚོགས་པ་གསར་འཛུགས། སྒོ་ཡོན་སོགས་དང་འགྲོགས་ཏེ་༢༠༡༠ ཟླ་ ༡ ཚེས་ ༢༤ ཉིན་ཁྲིན་ཏུའུ་རུ་ ༼ རྩོམ་རིག་གི་བདག་དབང་འཚོལ་བ ༽ ཞེས་པའི་བགྲོ་གླེང་ཚོགས་ཐེངས་གཉིས་པ་སོགས་སྔ་ཕྱིར་བགྲོ་གླེང་ཚོགས་འདུ་མང་པོ་གོ་སྒྲིག་བྱས་མྱོང་བ་དང། ༢༠༡༠ ཟླ་ ༡༢ ཚེས་ ༢༠ ཉིན་དཔལ་ཡུལ་རྫོང་བཀྲ་ཤིས་བདེ་ལེགས་ཟ་ཁང་དུ་༼ གངས་རིའི་གནས་བབ་གླེང་བ ༽ ཞེས་པའི་བགྲོ་གླེང་ཚོགས་སྐོར་ཡང་ཁོང་གིས་བོད་ཕྱི་ནང་གང་སར་ཁྱབ་བསྒྲགས་གནང་ཡོད།

ཁོང་སྒེར་གྱི་རྩོམ་ཡིག་ཕྱོགས་བསྒྲིགས་༼ ང་མི་ཡུལ་འགྲོ་དུས ༽ ཞེས་པ་དང་། ༢༠༠༩ ལོར་༼ གཟན་འོག་གི་ཕྱི་མིག ༽ ཅེས་པའི་དེབ་གཉིས་བཏོན་ཡོད་པ་མ་ཟད། གཞན་བོད་ནང་གི་དྲ་ཚིགས་ཁག་ཏུ་གནད་འགག་ཅན་གྱི་རྩོམ་ཡིག་མང་པོ་སྤེལ་ཡོད་འདུག་ལ། ཉེ་ཆར་ནས་འབྲེལ་ཡོད་ལ་ཁ་པར་བརྒྱུད་དེང་སང་རྒྱ་མིས་ཁོང་ལ་སོ་ལྟ་བྱེད་བཞིན་ཡོད་ཚུལ་བཤད་འདུག

༼ བོད་མི་མང་སྤྱི་འཐུས་དགེ་བཤེས་སྨོན་ལམ་ཐར་ཕྱིན་ལགས་ཀྱི་ཟིན་བྲིས་ལས་བསྡུ་སྒྲིག་བྱས།  ༽