ལྡི་ལིའི་དེང་རབས་སློབ་གྲྭའི་ཏུའུ་སི་ཊ་ཐེག་ཆེན་སྒོམ་སྒྲུབ་བསྟི་གནས་ཁང་ (Tushita Mahayana Meditation Centre) བཙུགས་ཏེ་མི་ལོ་ ༣༠ འཁོར་བའི་དུས་དྲན་མཛད་སྒོའི་སྟེང་༸གོང་ས་མཆོག་གདན་ཞུ་གནང་ཡོད་པ་ལྟར། ཕྱི་ཚེས་ ༩ ཉིན་༸གོང་ས་མཆོག་སློབ་གྲྭ་དེར་ཆིབས་བསྒྱུར་གྱིས་དགེ་སློབ་རྣམས་ལ་༼བདེ་སྐྱིད་ཀྱི་གནས་རིམ་འདྲ་མིན ༽ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་འདུག
སྐབས་དེར་༸གོང་ས་མཆོག་གིས། བདེ་སྐྱིད་ཞེས་པ་དེ་དབང་ཤེས་དང་ཡིད་ཤེས་གཉིས་ཀྱི་ཐོག་ནས་བསྒྲུབ་ཐུབ་ཀྱི་ཡོད། དབང་ཤེས་ལ་བརྟེན་པའི་བདེ་སྐྱིད་དེ་དུད་འགྲོས་ཀྱང་ཉམས་སུ་མྱོང་ཐུབ་ལ། དེ་གཟུགས་ཕུང་ལ་བརྟེན་དགོས་བའི་དབང་གིས་ཡུན་རིང་གནས་མི་ཐུབ་ཀྱང་། འགྲོ་བ་མིའི་རིགས་ཀྱི་ཡིད་ཤེས་ལ་བརྟེན་པའི་བདེ་སྐྱིད་མྱོང་ཐུབ་ཀྱི་ཡོད། ཡིད་ཤེས་ལ་བརྟེན་པའི་བདེ་སྐྱིད་དེ་མིའི་རྣམ་དཔྱོད་ཀྱིས་བསྐྲུན་ཐུབ་སྟབས། བདེ་སྐྱིད་དེ་ཡང་དག་པ་ཞིག་ཡིན། མཚམས་རེར་ཆོས་ཀྱི་སྒྲ་སྙན་པོ་དང་རྟེན་སྐུ་རྩ་ཆེན་མཇལ་སྐབས་ཀྱི་དབང་ཤེས་ཀྱི་ཚོར་བ་དེས་ཡིད་ཤེས་ཀྱི་ཚོར་བར་བདེ་བ་འདྲེན་གྱི་ཡོད། ངོས་ཀྱིས་ཕྲུ་གུ་ལག་ཏུ་འཛིན་པའི་ཡེ་ཤུའི་ཨ་མ་མེ་རིའི་སྐུ་བརྙན་ནམ་མཇལ་ཡང་སྐུ་བརྙན་དེ་བྱམས་པ་དང་བརྩེ་བའི་མཚོན་དོན་ཞིག་ཡིན་པའི་བསམ་བློ་ཤུགས་ཆེན་སླེབས་ཀྱི་འདུག ཅེས་དང་།
འཇིག་རྟེན་བཀོད་པ་པོ་འདོད་མིན་སུ་ཡིན་ཡང་། རང་གཅེས་འཛིན་གྱི་བསམ་བློ་ཤུགས་ཆུང་དུ་གཏོང་རྒྱུའི་ཐབས་འདྲ་མིན་ལག་བསྟར་བྱེད་ཀྱིན་ཡོད། འཇིག་རྟེན་བཀོད་པ་པོ་འདོད་མཁན་ཡེ་ཤུ་ལྟ་བུར་མཚོན་ན། རང་ཉིད་མཐའ་གཅིག་ཏུ་འཇིག་རྟེན་བཀོད་པ་པོའི་སྐྱབས་འོག་ཏུ་ཡོད་བསམ་པའི་བློ་དེས་ང་རྒྱལ་ཆུང་དུ་གཏོང་གི་ཡོད་ལ། འཇིག་རྟེན་བཀོད་པ་པོ་མི་འདོད་མཁན་ནང་པ་དང་གཅེར་བུ་བ་ལྟ་བུར་མཚོན་ན། ལས་འབྲས་ཀྱི་རྣམ་གཞག་ཁས་ལེན་པར་བརྟེན་ལས་བཟང་པོ་ལས་འབྲས་བུ་བཟང་པོ་ཡོང་བར་ཡིད་ཆེས་བྱེད་ཀྱི་ཡོད། ནང་པ་ལྟ་བུར་མཚོན་ན། དགེ་བའི་ལས་ལ་བརྟེན་ནས་རྣམ་སྨིན་མི་དགེ་བ་འགོག་ཐུབ་པའི་ཡིད་ཆེས་བྱེད་ཀྱི་ཡོད་པ་སོགས། བྱམས་བརྩེ་དང་གཞན་དོན་གྱི་བསམ་པ་སོགས་ནང་གི་རིན་ཐང་གོང་འཕེལ་གཏོང་བར་ཆོས་ཁས་ལེན་མིན་ལ་ཁྱད་པར་གང་ཡང་མེད་མོད། མི་ཚེ་བདེ་སྐྱིད་ལྡན་པ་ཞིག་ཡོང་བར་ནང་གི་རིན་ཐང་དེ་ཧ་ཅང་དགོས་ངེས་ཤིག་ཆགས་ཡོད། ཅེས་གསུངས་འདུག
ཕྱི་ཚེས་ ༩ ཉིན་༸གོང་ས་མཆོག་གིས་ཐེངས་འདིའི་ལྡི་ལི་ཁུལ་གྱི་མཛད་འཕྲིན་ཡོངས་སུ་གྲུབ་ཡོད་ལ། ཁ་སང་ཕྱི་ཚེས་ ༡༠ ཉིན་ལྡི་ལི་ནས་མཁའ་ལམ་བརྒྱུད་ཝར་ཎ་གནམ་ཐང་དུ་ཞབས་སོར་འཁོད་ཡོད་ཅིང་། དེར་ཡོད་ཝར་ཎ་གཙུག་ལག་མཐོ་སློབ་ཀྱི་ངེས་སྟོན་པ་དང་ཐེངས་འདིའི་གསུང་ཆོས་ཀྱི་སྦྱིན་བདག དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་ཀྱིས་དབུས་གདན་ས་ཁག་གི་མཁན་བླ་སྤྲུལ་རྣམ་པ་དང་། དེར་ཡོད་སེར་སྐྱ་མི་མང་གི་ཕེབས་བསུའི་ཁྲོད་༸གོང་ས་མཆོག་ཝར་ཎ་མཐོ་སློབ་དུ་ཞབས་སོར་བཀོད་ཡོད། དེ་རིང་༸གོང་ས་མཆོག་བསྟན་འགྱུར་བོད་སྐད་ནས་སྐད་ཡིག་གཞན་ནང་ཕབ་བསྒྱུར་ཞུ་བའི་ཚོགས་ཆེན་གྱི་མཇུག་བསྡོམས་ཐོག་ཆིབས་བསྒྱུར་གནང་སྟེ་བཀའ་སློབ་གསུང་བཤད་གནང་ཡོད་པར་མ་ཟད། སང་ཉིན་ཕྱི་ཚེས་ ༡༢ ནས་ཉིན་ལྔའི་རིང་གི་གསུང་ཆོས་དབུ་འཛུགས་ཞུ་རྒྱུ་ཡིན་འདུག
གསར་འགོད་པ། དོན་གོ
༄༅། །གོང་ས་མཆོག་གནས་དེར་ཞབས་སོར་འཁོད་པ་དང་དེ་རིང་ནས་གསུགས་ཆོས་དབུ་འཛུགས་གནང་མཚམས་འདྲི་བཀྲིས་བདེ་ལེགས་གྲངས་མེད་དང་གང་ཉིད་ཀྱི་སྐུ་ཚེ་མཛད་འཕྲིན་རྒྱས་པའི་སྨོན་འདུན་གྱངས་མེད་ཞུ།