བཀའ་བློན་ཁྲི་པ་མཆོག་གིས་བོད་ནས་ཕེབས་པའི་གནས་སྐོར་བ་ཚོར། འདས་པའི་ལོ་ངོ་ལྔ་བཅུའི་རིང་གཞིས་བྱེས་རྡོག་རྩ་གཅིག་སྒྲིལ་དང་༧གོང་ས་མཆོག་ལ་དད་དམ་གཡོ་བ་མེད་པའི་ཐོག སྐད་ཡིག་རིག་གཞུང་སྲུང་སྐྱོབ་བྱས་པར་བསྔགས་བརྗོད་དང་། ད་དུང་མུ་མཐུད་དུ་འཚེ་མེད་ཞི་བའི་ཐབས་ལ་བརྟེན་ཏེ་འབད་བརྩོན་གནང་དགོས་པའི་ལམ་སྟོན་གནང་འདུག
ཁ་སང་ཕྱི་ཟླ་ ༡ ཚེས་ ༡༢ ཉིན་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཝ་ཎ་གཙུག་ལག་སློབ་ཁང་དུ་གསར་བཞེངས་བྱས་པའི་སམ་བྷོ་ཊ་ཁང་གསར་དབུ་འབྱེད་གནང་ཡོད་པ་དང་། ཉིན་དེའི་ཕྱི་དྲོའི་ཆུ་ཚོད་ ༥ དང་ཕྱེད་ཀའི་ཐོག་གཙུག་ལག་སློབ་གཉེར་ཁང་དེའི་ཨ་ཏི་ཤ་ཚོགས་ཁང་དུ་བོད་ནས་གསར་དུ་ཕེབས་པའི་ཆོས་ཞུ་བ་ ༡༨༠༠ ཙམ་ལ་འཚམས་འདྲི་དང་སྦྲགས་གསུང་བཤད་གནང་འདུག
སྐབས་དེར་བཀའ་ཁྲི་མཆོག་གིས་གཞིས་བྱེས་གཉིས་ཀྱི་འབྲེལ་བའི་སྐོར་གསུངས་དོན། དེ་རིང་ཁྱེད་ཚོར་བཀའ་མོལ་ཞུ་རྒྱུའི་གོ་སྐབས་བྱུང་བ་བསྐལ་པ་བཟང་པོར་བརྩིས་ཀྱི་ཡོད། གནས་མཆོག་ཝ་ར་ཎ་སི་ནི་སྟོན་པ་རྣམ་འདྲེན་བཞི་པ་ཤཱཀྱ་ཐུབ་པས་ཆོས་འཁོར་བསྐོར་སའི་གནས་ཁྱད་པར་ཅན་ཞིག་ཡིན་ལ། ཐེངས་འདིར་༧གོང་ས་མཆོག་ཞབས་སོར་འཁོད་དེ་འཛམ་གླིང་མི་མང་ལ་སྤྱོད་འཇུག་དང་སྒོམ་རིམ་བར་མའི་ཆོས་ཀྱི་བདུད་རྩི་སྩོལ་བཞིན་ཡོད་པའི་སྐབས་འདིར། གཞིས་བཞུགས་བོད་རིགས་སེར་སྐྱ་མང་པོ་ཞིག་ཕེབས་ཐུབ་པ་དེར་༧གོང་ས་མཆོག་ཐུགས་དགྱེས་ཚོར་ཆེན་པོ་བྱུང་པར་མ་ཟད། ང་ཚོ་ཡང་ཤིན་ཏུ་དགའ་པོ་བྱུང་ཡོད། ཚང་མའི་མཁྱེན་གསལ་ལྟར། བོད་ཆོས་ལྡན་གྱི་སྤྱི་ཚོགས་དེ་གཞིས་བྱེས་གཉིས་ལ་ཁ་གྱེས་ཏེ་ལོ་ ༥༡ ཕྱིན་པ་རེད། ལོ་ ༥༡ རིང་མི་རབས་གསུམ་ཙམ་ཕྱིན་ཡོད་ནའང་། ད་བར་གཞིས་བྱེས་བོད་མིའི་དམ་ཚིག་མ་ཉམས་པར་བསམ་བློ་ཆིག་སྒྲིལ་ངང་གནས་ཡོད་ལ། ༧གོང་ས་མཆོག་ལ་དད་པ་དམ་ཚིག་གཡོ་བ་མེད་པར་བསྡད་པ་འདི་ང་ཚོ་བོད་མི་རིགས་ཀྱི་གཟི་བརྗིད་ཅིག་ཆགས་ཡོད། ཅེས་དང་།
གཞིས་བཞུགས་བོད་རིགས་ཚང་མར་ང་ཚོ་བྱེས་འབྱོར་བོད་རིགས་ཚོའི་ངོས་ནས་རྗེས་སུ་ཡི་རངས་དང་དགའ་བའི་མངོན་འདོད་མ་ཉམས་པར། དུས་རྟག་ཏུ་དོན་གྱི་བདག་པོ་བོད་ནང་དུ་ཡོད་པའི་མང་ཚོགས་ཡིན་པར་ངོས་འཛིན་བྱེད་ཀྱི་ཡོད། ༡༩༥༩ རྗེས་སུ་སྐྱེས་ནས་ཚར་ལོངས་བྱུང་པའི་ན་གཞོན་ཚོས་༧གོང་ས་མཆོག་མཇལ་མྱོང་མེད་ལ། སྔ་མོའི་བོད་དུ་རང་དབང་ཡོད་སྐབས་ཀྱི་སྤྱི་ཚོགས་ཡང་མཐོང་ཐོས་གང་ཡང་མེད་ཀྱང་། བོད་མི་རིགས་ཀྱི་ལར་ཞེན་དང་༧གོང་མཆོག་ལ་ཡིད་ཆེས། བོད་ཀྱི་ཆོས་དང་རིག་གཞུང་། གོམས་གཤིས་བཅས་མི་ཉམས་རྒྱུན་འཛིན་གནང་ཡོད་ལ། འདི་ལ་དྲང་བདེན་ལ་དགའ་བའི་འཛམ་གླིང་མི་དམངས་ཀྱིས་ངོས་འཛིན་གསལ་པོ་ཐོབ་ཡོད། གནས་སྟངས་དེའི་དབང་གིས་འཇིག་རྟེན་ཡོངས་ལ་༧གོང་ས་མཆོག་གི་མཛད་འཕྲིན་ཁྱབ་ཐུབ་པ་དང་། རྒྱལ་ཁབ་མང་པོའི་ནང་བོད་ལ་ཤ་ཚ་ཡོད་པའི་རྒྱབ་སྐྱོར་བྱེད་མཁན་འབུམ་ཕྲག་མང་པོ་ཐོན་ཐུབ་པ་དེ་༧རྒྱལ་བ་རིན་པོ་ཆེ་མཆོག་གི་མཛད་འཕྲིན་དང་། གཞིས་བཞུགས་མང་ཚོགས་ཀྱིས་རང་གི་གནས་བབ་བརྟན་པོར་བཟུང་སྟེ་གནས་ཐུབ་པའི་དབང་གིས་རེད། ཅེས་གསུངས།
བཀའ་ཁྲིས་གཞིས་ལུས་མི་དམངས་ཀྱི་འཚེ་མེད་ཞི་བའི་བཟོད་སྒོམ་ལ་བསྔགས་བརྗོད་གནང་དོན། ཁྱེད་ཅག་བོད་ནང་གནས་བབ་ཧ་ཅང་ཞན་ལ། སྨྲ་བརྗོད་དང་བྱ་སྤྱོད་ཐོག་དུས་རྟག་ཏུ་ཉེན་ཁ་ཡོད་པ་དང་། བཟོད་དཀའ་བའི་གནས་ཚུལ་མང་པོ་ཡོང་གི་ཡོད་ཀྱང་། ༧གོང་ས་མཆོག་གི་བཀའ་སློབ་ལམ་སྟོན་གཞིར་བཟུང་འཚེ་མེད་ཞི་བའི་ལམ་འབའ་ཞིག་ལ་བརྟེན་ཏེ་འགྲོ་ཐུབ་པ་དེ་དམིགས་བསལ་མཛད་རྗེས་ཞིག་རེད། བཙན་གནོན་འོག་ཏུ་ཉིན་རེ་བཞིན་བསམ་བློའི་ནང་བཟོད་དཀའ་བའི་ཁོང་ཁྲོ་དང་བློ་ཕམ་སྐྱེ་གཞིའི་གནས་ཚུལ་ཡོང་གི་ཡོད་ཀྱང་། འཚེ་མེད་ཞི་བའི་ཐོག་བཞུགས་ཐུབ་པ་དེ་བོད་མི་རིགས་ཀྱི་དམིགས་བསལ་གྱི་གཟི་བརྗིད་ཅིག་ཆགས་ཡོད། མ་འོངས་པར་ཡང་བྱེད་སྟངས་དེ་ཉམས་རྒྱུན་འཛིན་དགོས་པ་རེད་ལ། དེ་ནི་བོད་ཀྱི་རྩ་དོན་ཐོག་དམིགས་བསལ་གྱིས་གལ་ཆེ་བ་ཞིག་ཀྱང་ཆགས་ཡོད། ཕྱི་ལོ་ ༢༠༠༨ ལོར་སུས་ཀྱང་སྐུལ་སློང་མེད་པར་ཁྱེད་ཚོས་མ་གྲོས་བསམ་པ་གཅིག་མཐུན་གྱིས་བོད་དུ་ཡར་ལངས་དང་། རང་གི་བསམ་ཚུལ་གསལ་སྟོན་བྱ་རྒྱུའི་ལས་འགུལ་དེར་འཛམ་གླིང་ཡོངས་སུ་དོ་སྣང་ཆེན་པོ་བྱུང་ཡོད། སྐབས་དེར་ང་ཚོ་འཚེ་མེད་ཞི་བའི་ཐོག་བསྐྱོད་པ་དེ་ནི། གྲངས་ཉུང་མི་རིགས་གཞན་ལས་ལྷག་པའི་སྤྱོད་ཚུལ་འབུར་དུ་ཐོན་པའི་བྱས་འབྲས་ཤིག་རེད། ཅེས་བསྟོད་བསྔགས་མཛད་འདུག
མཐའ་མར་བཀའ་ཁྲི་མཆོག་གིས་༧གོང་ས་མཆོག་བགྲེས་ཡོལ་དུ་ཕེབས་རྒྱུའི་སྐོར་གསལ་བཤད་གནང་དོན། འབྱུང་འགྱུར་ཕྱི་ཟླ་ ༣ པའི་ནང་བགྲེས་ཡོལ་ཆ་ཚང་ཕེབས་རྒྱུ་དང་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་གནས་བབ་ཐོག་༧གོང་ས་མཆོག་མཆོག་གིས་ཐུགས་འགན་བཞེས་མི་དགོས་རྒྱུའི་བཀའ་བསྩལ་ཡོད། དེར་བརྟེན། བོད་ལ་བཞུགས་པའི་བོད་མི་མང་པོ་ཞིག་གིས་ཐུགས་འཚབ་ཆེན་པོ་དང་ཐུགས་ཁྲལ་གནང་སྟེ། ཚུར་ལན་གནང་མཁན་དང་བཀའ་འདྲི་གནང་མཁན་མང་པོ་ཞིག་བྱུང་སོང་། སྤྱིར་༧གོང་ས་མཆོག་གིས་ཉེ་ཆར་འབྲས་ལྗོངས་ཁུལ་དུ་ཆིབས་སྒྱུར་སྐབས། གནས་ཚུལ་དེའི་ཐོག་གསལ་བཤད་གནང་ཡོད། འཛིན་སྐྱོང་གི་ཉིན་རེའི་ལས་དོན་བྱེད་ཕྱོགས་ཐོག་འགྱུར་བ་གཏོང་རྒྱུ་མ་གཏོགས། བོད་མི་བརྒྱ་ཆ་ ༩༩ ང་ལ་ཡིད་ཆེས་བློས་འགལ་བྱེད་ཀྱིན་ཡོད་དུས་ང་དང་བོད་རིགས་མང་ཚོགས་གཉིས་ནམ་ཡང་བྲལ་ཐབས་མེད། རྩ་དོན་ཐོག་ཐུགས་འགན་མུ་མཐུད་དེ་བཞེས་རྒྱུ་ཡིན། ཞེས་བཀའ་སློབ་གསལ་པོ་གནང་ཡོད། དེའི་སྟབས་ཀྱིས་དམིགས་བསལ་ཐུགས་འཚབ་གང་ཡང་གནང་དགོས་དོན་མེད། ཅེས་གསུངས་ཡོད།
གསར་འགོད་པ། དཔལ་ལྡན།
བཀའ་བློན་ཁྲི་པའི། བཀའ་སློབ་གསུང་བཤད་ལ། མངོན་པར་བསྟོད་དོ། །
བཀའ་ཁྲིས་ཅིག་ཅིག་གསུངས་སོང་ཟེར་ལ་བཀའ་བློན་ཁྲི་བས་ཉུག་ཉུག་གསུངས་སོང་ཟེར། བཀའ་ཁྲི་དང་བཀའ་བློན་ཁྲི་བ་གཉིས་ཀས་སྐད་ཆ་བཤད་ཤེས་བ་ཡ་མཚན་རེད། ཕར་བལྟས་ཚོད་ཀྱིས་དེ་གཉིས་ཀའི་དབྱེ་བ་ཤེས་ཀྱི་མེད་པ་འདྲ་བས་འདིར་གོ་སླ་བའི་ཚིག་འགྲེལ་འདི་བྲིས་བ་ཡིན།
བཀའ་ཁྲི་ནི་བཀའ་བློན་ཁྲི་བའི་རྐུབ་འཛུག་སའི་ཁྲིའམ་རྐུབ་སྟེགས་དེའི་མིང་དང་། བཀའ་བློན་ཁྲི་བ་ནི་ཁྲི་ཐོག་དེར་རྐུབ་འཛུག་མཁན་གྱི་མི་དེ་ལ་ཟེར། དཔེར་ན་དགའ་ལྡན་གསེར་ཁྲི་དང་། དགའ་ལྡན་ཁྲི་བ་ལྟ་བུ་རེད།
སྤྱིར་བཏང་ཡིག་ནོར་ལ་གཟབ་དགོས་པ་ལོས་བདེན་ཡང་། གནས་ཚུལ་འདི་ལྟ་བུ་འགོར་འགྱངས་མེད་པར་དྲྭ་ཐོག་ཏུ་གཏོང་ཐུབ་པར་བཀའ་དྲིན་ཆེ་ཞུ། སྐབས་འདིར་བཀའ་ཁྲི་མཆོག་གིས་༧གོང་ས་མཆོག་བགྲེས་ཡོལ་དུ་ཕེབས་ཆར་ཐད་ལ་དམིགས་བསལ་འགྲིག་དང་མི་འགྲིག་གི་གསལ་བྱེད་གནང་མི་འདུག་མོད། གང་ལྟར་༧གོང་ས་མཆོག་བགྲེས་ཡོལ་དུ་ཕེབས་ཆར་འདི་ངོ་མ་གནད་འགག་ཡིན་པས། བོད་གཞིས་བྱེས་ཡོད་དོ་ཅོག་གིས་ཁོང་ལ་དེ་ལྟར་མི་གནང་རྒྱུའི་སྙན་གསན་མི་ཞུ་བར། ༧གོང་ས་མཆོག་དང་དེ་མིན་པའི་ཉམས་མྱོང་ཅན་གང་མང་སྐུ་འཚོ་བཞུགས་ཀྱི་གོ་སྐབས་འདི་བཟུང་ནས་འབྱུང་འགྱུར་གྱི་བཀའ་ཤག་གསར་པ་དང་སྤྱི་འཐུས་ལྷན་ཚོགས་སོགས་ལ་འགན་སྤྲོད་རྒྱུ་གལ་ཆེ་བར་མཐོང་།
གསར་འགོད་པ་དཔལ་ལྡན་ལགས། གནས་ཚུལ་བཟང་པོ་འདི་བཀོད་པར་ཐུགས་རྗེ་ཆེ་ཞུ་རྒྱུ། འོན་ཀྱང་ཡིག་འབེབ་ལྔ་པའི་ཡིག་ཕྲེང་ལྔ་པའི་ནང་དུ་ཚིག་གཅིག་ཆད་ལུས་གྱུར་འདུག དེ་བཞིན་ཡིག་འབེབ་དྲུག་པའམ་མཐའ་མའི་ཡིག་ཕྲེང་གཉིས་པའི་ནང་དུ་ཚིག་གཅིག་ཉིས་ལྡབ་བྱུང་འདུག འབྱུར་འགྱུར་ཡིག་ནོར་རིགས་ལ་དམིགས་བསམ་གྱིས་ཐུགས་སྣང་གནང་རོགས།།
ཁ་སང་གསར་འགྱུར་གྱི་མགོ་བརྗོད་དུ་ “རྒྱལ་ཁབ་དང་མི་རིགས་ལ་བསམ་བློ་བཏང་མྱོང་མེད།” ཅེས་པའི་བཀའ་ཁྲིའི་གཏམ་བཤད་དེ་སྤེལ་བ་ནས་བཟུང་དུས་བབ་ཚང་གི་གསར་འགོད་པ་ཚོར་དངོས་ཤུགས་བརྒྱུད་གསུམ་ནས་སྟོད་བསྔགས་གཏོང་མཁན་མང་དུ་ཕྱིན་པ་འདྲ་པོ་མཐོང་སོང། གང་ཡིན་ནམ་???
བོད་ཀྱི་དུས་བབ་ཀྱི་རྩོམ་སྒྲིག་པ་གསར་པ་མཆོག་ལ་བཀྲ་ཤིས་བདེ་ལེགས་ཞུ་བཞིན་ཡོད། ཉེ་བའི་དུས་ནས་བཟུང་དུས་བབ་ལ་གསར་གཏོད་དང་གསོན་ཤུགས་ཀྱི་རྣམ་པ་ཁ་ཤས་མཐོང་ཡོང་གི་འདུག་ལ། གསར་འགྱུར་གྱི་སྤུས་ཚད་གྲངས་ཚད་གཉིས་ཐད་ནས་མངོན་གསལ་གྱིས་ཡར་རྒྱས་ཤིག་མཐོང་གི་འདུག མུ་མཐུད་ཤུགས་རྒྱོབས། ང་ཚོས་བར་ཐག་རིང་ས་ནས་ཡི་རངས་དང་རྒྱབ་སྐྱོར་བྱེད་ཀྱི་ཡོད།
ཟམ་གདོང་བླ་མ་སྐུ་ཚེ་བརྟན་ཅིང་། བོད་གཞིས་བྱེས་མྱུར་མཇལ་ཡོང་པར་ཤོག ཁང་སང་བོད་ཀྱི་དུས་བབ་ངོར། རྒྱ་གཞུང་ནས༌༌༌༌༌༌༌༌༌༌གཞིས་སུ་བཞུགས་པའི་བོད་མི་རྣམས། རྒྱ་གར་དུ་གཞུང་འབྲེལ་གྱིས་འཁྲིད་ཆོག ཟེར་བའི་གནས་ཚུལ་གྱི་བབ་ལ་བལྟས་སྐབས། སེམས་འཚབ་སྐྱེས་སོང་། འོན་ཀྱང་དེ་རིང་བོད་ནས་ཆོས་མཇལ་སོགས་ཀྱི་ཞལ་གྲངས་ ༡༨༠༠ ཙམ་འབྱོར་ཐུབ་པ་འདིས་རང་ལ་ངལ་གསོ་ཆུང་ཆུང་ཞིག་ཀྱང་སྟེར། འདི་ནི་གཅིག་ནས་གཞིས་ལུས་བོད་མིའི་མངོན་འདོད་དང་། གཉིས་ནས་མ་འོངས་བཙན་བྱོལ་གྱི་མི་རབས་གནས་དང་མ་གནས་ཀྱི་དཀའ་གནད་ཅིག་དང་འབྲེལ་ནས་ཡོད་པས། དེ་རིང་དུས་བབ་ངོས་ཀྱི་གནས་ཚུལ་བཟང་ཤོས་འདི་རང་ལ་ངོས་འཛིན་གྱིས་དགའ་སྤྲོ་ཡང་ངང་གིས་འཕེལ་སོང་།