ཨ་རིའི་ནང་རྟེན་གཞི་བྱས་པའི་རྒྱལ་སྤྱི་རང་བཞིན་གྱི་ཚོགས་སྡེ་ཁག་ ༩ ཡིས་ཨ་རིའི་སྲིད་འཛིན་ཨོ་བྷ་མར་ཞུ་ཡིག་ཅིག་ཕུལ་ཏེ། རྒྱ་ནག་གི་སྲིད་འཛིན་ཧུའུ་དང་ཐུག་འཕྲད་སྐབས་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་ལ་ངེས་པར་དུ་གྲོས་མོལ་བྱ་དགོས་ཟེར།
ཟླ་འདིའི་ཕྱི་ཚེས་ ༡༣ ཉིན་ཨ་རིའི་ནེའུ་ཡོག་ཏུ་རྟེན་གཞི་བྱས་ཡོད་པའི་རྒྱལ་སྤྱིའི་ཉེས་ཡངས་ཚོགས་པ་དང་ཕྱི་འབྲེལ་སྲིད་ཇུས་ལམ་སྟོན་ཁང་། རང་དབང་མཐུན་ཚོགས། འགྲོ་བ་མིའི་ཐོབ་ཐང་རྩ་འཛིན་ཁང་། འགྲོ་བ་མིའི་ཐོབ་ཐང་ལྟ་ཞིབ་ཚོགས་པ། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ། ༢༠༤༩ ལས་གཞི་ཁང་། རྒྱལ་མཚམས་མེད་པའི་གསར་འགོད་མཐུན་ཚོགས། ཨ་རིའི་ཡུ་གུར་མཐུན་ཚོགས་བཅས་མཐུན་མོང་གིས་སྲིད་འཛིན་ཨོ་བྷ་མ་མཆོག་ལ་ཞུ་ཡིག་ཅིག་ཕུལ་ཏེ། ཉེ་ལམ་སྐུ་ཞབས་ལིག་ཞོ་པའོ་ལ་ནོ་བྷེལ་གཟེངས་རྟགས་འབུལ་བཞེས་སྐབས་ཀྱི་གཏམ་བཤད་ལ་བསྔགས་བརྗོད་དང་སྦྲགས། མི་འགྱངས་པར་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཨ་རིར་རྒྱལ་དོན་གཟིགས་སྐོར་དུ་འབྱོར་སྐབས། བོད་དང་ཤིན་ཅིང་ཚུད་པའི་རྒྱ་ནག་གི་འགྲོ་བ་མིའི་ཐོབ་ཐང་སྐོར་ལ་དོན་ཕན་ལྡན་པའི་གྲོས་མོལ་བྱ་དགོས་པའི་རེ་འབོད་ཞུས་འདུག
ཞུ་ཡིག་དེར་དོན་ཚན་འགའ་བཀོད་ཡོད་པ་དག་ནི། དང་པོ། ཨ་རིའི་ཕོ་བྲང་དཀར་པོར་སྲིད་འཛིན་རྣམ་གཉིས་ལྷན་འཛོམས་མ་གནང་སྔོན་ལ། ཕྱི་ཕྱོགས་ཀྱི་རྒྱ་རིགས་དང་བོད་རིགས། ཡུ་གུར་བ་བཅས་ཀྱི་སྐུ་ཚབ་དང་ཐུག་འཕྲད་ཀྱིས་རྒྱ་ནག་གིས་རྡོག་རོལ་གཏོང་བཞིན་པའི་འགྲོ་བ་མིའི་ཐོབ་ཐང་སྐོར་གླེང་དགོས་པ། གཉིས་པ། རྒྱ་ནག་ནང་འགྲོ་བ་མིའི་ཐོབ་ཐང་མེད་པ་དང་། ལྷག་པར་དུ་བོད་དང་ཤིན་ཅིང་གི་ཁོར་ཡུག་གི་ཉམས་རྒུད། དེ་བཞིན་རྒྱ་ནག་ནང་སྨྲ་བརྗོད་རང་དབང་ཐོག་དྲག་གནོན་བྱེད་ཀྱིན་པ། རྒྱ་གཞུང་དང་བསམ་ཚུལ་མི་མཐུན་པ་ཚོར་དྲག་ཤུགས་འོག་གར་སོང་ཆ་མེད་ཆགས་བཞིན་ཡོད་པ། རྒྱ་ནག་གི་ཁྲིམས་ལུགས་སྒྲོམ་གཞི་དེ་ཆབ་སྲིད་ཀྱི་ལག་ཆར་གྱུར་ཡོད་པ་དང་སྲོག་ཐོག་གི་ཉེས་ཁྲིམས་བཅས་ཀྱི་སྐོར་ལ་ཕྱི་གསལ་ནང་གསལ་ཐོག་གླེང་སློང་བྱ་དགོས་པ། གསུམ་པ། ཕྱི་སྡོད་རྒྱ་རིགས་གཙོས་པའི་ཕྱི་མི་ཚོས་རྒྱ་ནག་གཞུང་བརྒྱུད་མ་དགོས་པར་ཐད་ཀར་བརྡ་འཕྲིན་བརྒྱུད་རྒྱ་རིགས་མང་ཚོགས་ཚོར་གླེང་མོལ་དང་བསམ་ཚུལ་བརྗེ་ལེན་བྱ་ཆོག་རྒྱུ། བཞི་བ། ལིག་ཞོ་པའོ་གཙོས་ཞི་བའི་ཐོག་ནས་རྒྱ་ནག་གཞུང་ལ་སྐྱོན་བརྗོད་བྱེད་མཁན་གྱི་ཆབ་སྲིད་བཙོན་པ་རྣམས་མགྱོགས་མྱུར་ཀློད་གྲོལ་གཏོང་དགོས་པ། ལྔ་བ། རྒྱ་ནག་ནང་ཕྱི་ཕྱོགས་ཀྱི་གསར་འགྱུར་ལམ་ཁག་མང་པོ་ཞིག་བཀག་སྡོམ་བྱས་ཡོད་པ་དེ་དག་རང་དབང་ཐོག་གཏོང་སྤེལ་བྱ་དགོས་པ་བཅས་ལ་སྲིད་འཛིན་ཨོ་བྷ་མས་ཧུའུ་ལ་ནན་བཤད་བྱ་དགོས། ཞེས་བཀོད་ཡོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཨེ་ཤ་ཡ་ཚན་ཁག་གི་འགན་འཛིན་སྐུ་ཞབས་སོ་ཧྥེ་རེ་ཆར་ཌི་སན་ Sophie Richardson གྱིས། ལོ་སྔོན་མར་ཨོ་བྷ་མ་རྒྱ་ནག་ཏུ་ཕེབས་སྐབས་ནང་བཞིན་མ་ཡིན་པར། ཐེངས་འདིར་ཨོ་བྷ་མ་སྲིད་གཞུང་གིས་ཕྱི་གསལ་ནང་གསལ་ཐོག་གནད་དོན་འདི་དག་གི་ཐད་དངོས་ཐོག་བདེན་འཚོལ་གྱིས་གླེང་སློང་གྲོས་མགོ་འདོན་དགོས། གལ་སྲིད་སྲིད་འཛིན་མཆོག་གིས་དེ་ལྟར་བསྒྲུབ་མ་ཐུབ་ཚེ། རྒྱ་ནག་གི་ནག་ཉེས་འདག་ཐབས་ཀྱི་གོ་སྐབས་ཤིག་ཤོར་བཅུག་པ་དང་། ཨ་རི་རང་ཉིད་ཀྱིས་བརྗོད་བཞིན་པའི་ལངས་ཕྱོགས་ལ་སྣང་ཆུང་བྱེད་པ་ཞིག་ཀྱང་ཆགས་ཡོད། ཅེས་བརྗོད་འདུག
གསར་འགོད་པ། བནྡེ་སྐྱབས།
བོད་བོད་ཡུལ་ན་སྐྱིད།
རྒྱ་རྒྱ་ཡུལ་ན་སྐྱིད།
བོད་རེ་བས་ཕོངས།
རྒྱ་དོགས་པས་ཕོངས།
ཨ་རིའི་སྲིད་འཛིན་ལ་རེ་བ་བཟུང་ན་ཕན་པ་གང་ཡང་མེད། རང་གི་དབུ་ཁྲིད་བཀའ་བློན་ཁྲི་བས་ཀྱང་ བོད་དོན་བསམ་མྱོང་མི་འདུག་སྟེ། མི་རིགས་གཞན་གྱི་དཔོན་རིགས་ཤིག་གིས་བོད་དོན་བཤད་དགོས་དོན་ཨེ་ཡོད་ལ།
བོད་པས་རེ་བ་རྒྱག་ས་ནོར་སོང་བ་རེད། རང་དོན་བཞག་ནས་གཞན་དོན་སྒྲུབ་མཁན་ཞིག་ཡོད་ན་དཔེ་འཇོག་ས་གཅིག་ལས་མེད། སུས་ཁེབ།
བོད་དོན་འདི་བོད་རིགས་རང་གི་ཤུགས་རྒྱག་ཡུལ་ཞིག་རེད་མ་གཏོགས། ཨ་རིའི་སྲིད་འཛིན་སོགས་ཀྱིས་ཆེད་ལས་ཞིག་ག་ལ་ཡིན། བོད་པ་ཚང་གི་གཞན་ལ་ལེ་ལན་འདེད་རྒྱུ་བཞག་ནས་རང་གི་རང་རྒྱལ་ཁབ་རང་གིས་འཛུགས་སྐྲུན་བྱེད་དགོས། དེ་མིན་གཞན་ལ་ཡི་ཆད་ཁང་ར་བཤད་ནས་ཉི་མ་སྟོང་ཟད་བཏང་ན་དགོས་པ་ཅི་ཡོད། གཞན་སྐྱོན་མ་རེད་རང་སྐྱོན་རེད།
ནག་རིལ་འདིས་བོད་ལ་ཅང་ཕན་གི་མ་རེད་ལ་ཕན་འདོག་དགོས་དོན་ཡང་མེད། ཨ་རྒྱ་གཉིས་ཀའི་ཚོང་འབྲེལ་ལ་འབད་པ་བྱས་ནས་རང་གི་དཔལ་འབྱོར་ལ་ཅུང་ཙམ་ཕན་ཐོག་བྱེད་ཐུབ་ན་ང་ཚོ་བོད་པ་ཚོས་རང་རང་ས་ནས་རྒྱུག་ཏེ་ཅིག་ནས་འགྲིག་འགྲོ་གི་རེད།
ད་རེའི་སྲིད་འཛིན་ཨོ་བྷ་མར་རེ་བ་འཛིན་རྒྱུ་མེད། ཨ་རྒྱ་གཉིས་ཀྱི་ཚོང་དོན་གལ་ཆེན་ཡིན། འགྲོ་མིའི་ཐོབ་ཐང་སོ་ལམ་མ་གནོར་་་་་་་་་་་་་་
རེ་བ་མེད་པའི་སྲིད་ཨོ་བྷ་མས། བོད་དོན་ལ་ཕན་ཐོག་ག་ཚོད་ཡོད་མིན་ཧ་ལམ་ཚང་མའི་མགོ་ཚོས་ས་ཡོད། གང་ཡིན་ཞེ་ན་ཁོང་སྔོན་མ་རྒྱ་ནག་བསྐྱོད་སྐབས་རྒྱ་ནག་གི་སྲིད་འཛིན་ཧུ་དང་མཇལ་འཕྲད་ཞོར་དུ་རྒྱ་ནག་ལ་ངོ་བསྟོད་དང་། བོད་ནི་རྒྱ་ནག་གི་ཆ་ཤས་རེད་ཅེས། གནའ་ནས་རང་བཙན་ཡོད་པའི་བོད་རྒྱལ་ཁབ་དེ་ཁོ་པས་སྒེར་གཅོད་ཀྱིས་གཏམ་བཤད་དེ་འཛམ་གླིང་ཀུན་ལ་ཁྱབ་ཡོད། དེ་ལྟ་བུའི་གནས་ཚུལ་ཐབས་སྡུག་གམ་ཇབ་ཆུང་དེ་ཨ་རིའི་སྲིད་འཛིན་ཁྲི་རབས་གང་གི་ནང་དུ་བྱུང་མྱོང་མེད།
རེ་བ་མེད་པའི་སྲིད་ཨོ་བྷ་མས། བོད་དོན་ལ་ཕན་ཐོག་ག་ཚོད་ཡོད་མིན་ཧ་ལམ་ཚང་མའི་མགོ་ཚོས་ས་ཡོད། གང་ཡིན་ཞེ་ན་ཁོང་སྔོན་མ་རྒྱ་ནག་བསྐྱོད་སྐབས་རྒྱ་ནག་གི་སྲིད་འཛིན་ཧུ་དང་མཇལ་འཕྲད་ཞོར་དུ་རྒྱ་ནག་ལ་ངོ་བསྟོད་དང་། བོད་ནི་རྒྱ་ནག་གི་ཆ་ཤས་རེད་ཅེས། གནའ་ནས་རང་བཙན་ཡོད་པའི་བོད་རྒྱལ་ཁབ་དེ་ཁོ་པས་སྒེར་གཅོད་ཀྱིས་གཏམ་བཤད་དེ་འཛམ་གླིང་ཀུན་ལ་ཁྱབ་ཡོད། དེ་ལྟ་བུའི་གནས་ཚུལ་ཐབས་སྡུག་གམ་ཇབ་ཆུང་དེ་ཨ་རིའི་སྲིད་འཛིན་ཁྲི་རབས་གང་གི་ནང་དུ་བྱུང་མྱོང་མེད།