༢༠༠༡ ལོ་ཙམ་ནས་བཀའ་བློན་ཁྲི་པ་དང་བཀའ་བློན་གཞན་ཚོས་འགན་ཆ་ཚང་བླངས་ཏེ་འགྲོ་བཞིན་ཡོད། འདས་པའི་ལོ་བཅུའི་ནང་འཐུས་ཤོར་གང་ཡང་ཕྱིན་མེད། ད་ལྟ་ངོས་ཀྱིས་ཡིག་ཆའི་འགྲོ་སྟངས་ཐོག་ལ་རྒན་ཡོལ་ཆ་ཚང་བྱས་པ་ཙམ་གྱིས་འཐུས་ཤོར་ལ་འགྲོ་རྒྱུ་གང་ཡང་མེད། དེའི་ཐོག་སེམས་འཁུར་རྩ་བ་ནས་བྱ་དགོས་པ་མ་རེད། ཅེས་༧གོང་ས་མཆོག་གིས་གསུངས་འདུག
གནས་མཆོག་ཝ་ར་ཎ་སི་རུ་ཉིན་ལྔའི་རིང་གི་༧གོང་ས་མཆོག་གི་བཀའ་ཆོས་ཀྱི་ཉིན་མཐའ་མ་སྟེ། ཁ་སང་ཕྱི་ཚེས་ ༡༦ ཉིན། དགེ་འདུན་པའི་དགོན་སྡེ་ཡོངས་ནས་ཐུན་མོང་ཐོག་༧གོང་ས་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད་ཅིང་། ཞོགས་པའི་ཆུ་ཚོད་ ༨ དང་ཕྱེད་ཀའི་སྟེང་ཝར་ཎ་གསུང་ཆོས་ར་བ་རུ་ལྡན་ཆོས་ཞུ་བ་སུམ་ཁྲི་ལྷག་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་སྩོལ་སྐབས ༧གོང་ས་མཆོག་གིས་ཧི་མ་ལ་ཡའི་རྒྱུ་རྒྱུད་ཀྱི་ཆོས་ཞུ་བ་ཚོར་ཁོར་ཡུག་གཙང་གཉར་བྱ་དགོ་སྐོར་དང་། དེ་བཞིན་ཁོང་ཉིད་བགྲེས་ཡོལ་དུ་ཕེབས་འདུན་ཡོད་པའི་རྒྱབ་ལྗོངས་སོགས་ཐོག་ལ་གསུངས་བཤད་གནང་ཡོད།
༧གོང་ས་མཆོག་གིས་ཧི་མ་ལ་ཡའི་རི་རྒྱུད་ཁག་ནས་ཕེབས་པའི་ཆོས་ཞུ་བ་ཚོར་དམིགས་ཏེ། ཁོར་ཡུག་སྲུང་སྐྱོབ་ཐོག་ཤུགས་རྒྱག་དགོས་སྐོར་གསུངས་དོན། ཧི་མཱ་ལ་ཡའི་མི་མང་ཚོས་ཁོར་ཡུག་ཐོག་ལ་དོ་སྣང་ཆེ་ཙམ་བྱ་རྒྱུ་གལ་ཆེན་པོ་རེད། རྒྱ་གར་ནང་གི་ཆུ་བོ་གལ་ཆེན་མང་པོ་ཞིག་བོད་ནས་ཡོང་གི་ཡོད། དེ་བཞིན་རྒྱ་ནག ཝི་ཏི་ནམ། ཁམ་པུ་ཌེ་ཡ། ལའོ་སི། དེ་དག་ལའང་བོད་ནས་ཡོང་བའི་གཙང་པོའི་ཆུ་རྒྱུན་དེ་གལ་ཆེན་པོ་ཆགས་ཡོད། བོད་ཀྱི་དོན་དག་དེ་ཁོར་ཡུག་གི་གནས་ཚུལ་དང་འབྲེལ་ནས་ཡོད་སྟབས། རྒྱ་དཀར་ནག་གཉིས་ཀྱི་འབྲེལ་བ་ཞིག་ཀྱང་ཆགས་ཡོང་གི་ཡོད། རྒྱ་དཀར་ནག་གཉིས་མི་འབོར་ཆེ་ཤོས་ཀྱི་ལུང་པ་ཞིག་ཆགས་ཡོད། དེ་གཉིས་དངོས་གནས་དམ་ཚིག་མཐུན་པོ་ཞིག་བྱུང་ན། ཡུལ་གྲུ་གཉིས་ལ་ཕན་པ་ཙམ་དུ་མ་ཟད། འཛམ་གླིང་སྤྱི་ལའང་ཕན་ཐོགས་ཡོད་པ་ཞིག་ཆགས་ཀྱི་ཡོད། ཅེས་དང་།
བོད་ཀྱི་ས་ཁུལ་གང་སར་རྒྱ་ནག་གུང་ཁྲན་གྱི་དམག་མི་བཙུགས་ཏེ་མནན་ཏེ་སྡོད་དགོས་པ་ཆགས་ཀྱི་ཡོད་སྟབས། རྒྱ་གར་གྱི་ས་ཐོག་ལའང་རང་བཞིན་གྱི་དོགས་པ་དང་མི་བདེ་བ་ཡོང་གི་ཡོད། ནམ་ཞིག་བོད་ནང་གི་གནས་ཚུལ་དེ་ཞི་འཇམ་ཡག་པོ་ཞིག་བྱུང་ན། བོད་ནང་རྒྱ་མིའི་དཔོན་པོ་འཇོག་དགོས་ཀྱི་མེད་ལ། སྐབས་དེར་རྒྱ་དཀར་ནག་གཉིས་ཀྱི་འབྲེལ་བར་བརྒྱ་ཆ་བརྒྱ་ཕན་ཐོགས་ཡོང་གི་རེད། ཅེས་དང་། བོད་ནང་གི་གནས་ཚུལ་དངོས་གནས་ལྷིང་འཇགས་པོ་ཞིག་ཡོང་རྒྱུ་དེ་གཙོ་བོ་རྒྱ་ནག་གུང་ཁྲན་གྱིས་དངོས་ཡོད་ཀྱི་གནས་ཚུལ་དང་རན་པའི་སྲིད་བྱུས་ཤིག་བཟུང་སྟེ། བོད་རྒྱ་གཉིས་ཀའི་བློ་འཇོག་ས་གཉིས་མོལ་ཞིག་བྱུང་ན་དཀའ་ངལ་དེ་སེལ་ཐུབ་རྒྱུ་ཞིག་རེད། གཉིས་མོལ་མིན་པར་ཕྱོགས་གཅིག་གིས་དབང་ཤུགས་ཀྱིས་མནན་བསྡད་ན་བོད་ཀྱི་དཀའ་ངལ་སེལ་ཐབས་མེད་པ་ཞིག་རེད། འདས་པའི་ལོ་དྲུག་ཅུའི་རིང་ལ་དཀའ་ངལ་དེ་སེལ་ཐུབ་མེད་ལ། འབྱུང་འགྱུར་ལོ་དྲུག་ཅུའི་རིང་ལའང་སེལ་ཐབས་མེད། ཅེས་བཀའ་གནང་འདུག
ཡང་༧གོང་ས་མཆོག་གིས་བོད་མི་ཚོར་དཔལ་འབྱོར་གལ་ཆེན་ཆགས་ཡོད་སྐོར་གསུངས་དོན། ང་ཚོ་བོད་པ་ཚོར་དཔལ་འབྱོར་ཡར་རྒྱས་དགོས་ཀྱི་འདུག རྒྱ་གར་ནང་ནས་བོད་པ་མང་པོ་ཞིག་ཨ་རི་དང་ཁེ་ཎ་ཌ། ཡུ་རོབ་སོགས་ལ་འགྲོ་བཞིན་ཡོད། མདོར་ན་ལྐོག་ཏུ་དངུལ་སྤྲད་ནས་ཁྲིམས་འགལ་བྱས་ནས་འགྲོ་ཡི་ཡོད། དེ་ལྟར་བྱས་ནས་འགྲོ་མཁན་དེ་དག་ནུབ་ཕྱོགས་ལུང་པར་ཆོས་དོན་གཉེར་བྱེད་དུ་འགྲོ་བ་མ་རེད། ཨ་སྒོར་དོན་གཉེར་བྱེད་དུ་འགྲོ་བཞིན་ཡོད། དེས་རྟགས་ག་རེ་བསྟན་པ་རེད་ཅེ་ན། བོད་པ་ཚོར་དངུལ་དགོས་ཀྱི་ཡོད་པ་དེ་བསྟན་པ་རེད། དེར་བརྟེན་ང་ཚོའི་བོད་པ་ཚོར་དངོས་པོ་ཡར་རྒྱས་དགོས་ཀྱི་ཡོད། དངོས་པོ་ཡར་རྒྱས་འགྲོ་རྒྱུར་སྟོབས་ཆེན་རྒྱལ་ཁབ་ཀྲུང་ཧ་མི་མང་སྤྱི་མཐུན་རྒྱལ་ཁབ་ནང་བསྡད་ན། དཔལ་འབྱོར་ཡར་རྒྱས་འགྲོ་རྒྱུར་ང་ཚོར་ཁེ་ཕན་ཡོང་གི་རེད། ཅེས་གསུངས་འདུག
༧གོང་ས་མཆོག་གིས་ཁོང་ཉིད་བགྲེས་ཡོད་ཆ་ཚང་ཕེབས་འདུན་ཡོད་པའི་རྒྱབ་ལྗོངས་སྐོར་གསལ་བཤད་གནང་དོན། ༢༠༠༡ ལོ་ནས་བཀའ་བློན་ཁྲི་པ་དམངས་གཙོའི་ལམ་ནས་འོས་འདེམས་བྱས་པ་རེད། དེས་དངོས་གནས་ང་ཚོ་དམངས་གཙོའི་ཚད་དེ་གང་ཙམ་ཞིག་བསླེབས་པ་བསྟན་ཡོད། ངོས་རང་གིས་ནམ་རྒྱུན་༸གོང་ས་ལྔ་པ་ཆེན་པོའི་སྐབས་ནས་རྒྱལ་དབང་སྐུ་ཕྲེང་རིམ་བྱོན་གྱི་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཅེས་པའི་ལམ་ལུགས་དེ་ ༢༠༠༡ ལོ་ནས་རྫོགས་པ་རེད་ཅེས་ཤོད་ཀྱི་ཡོད། དེ་རྫོགས་རྒྱུ་དེ་དབང་ཡོད་ཀྱིས་རྫོགས་པ་ཞིག་མིན་པར་དང་བླངས་སྒོས་རྫོགས་པ་ཞིག་ཡིན། དུས་དེ་ནས་ང་ཡང་ཕྱེད་རྒན་ཡོལ་ཐོག་བསྡད་ཡོད། ད་ཆར་བཅའ་ཁྲིམས་ནང་གི་དམིགས་བསལ་གྱི་འགན་དབང་དེ་རིགས་བསྒྱུར་བཅོས་གཏོང་རྒྱུའི་མཚམས་ལ་བསླེབས་ཡོད། བར་སྐབས་ཤིག་ནས་ངོས་རང་རྒན་ཡོལ་ཆ་ཚང་ཐོག་བསམ་བློ་གཏོང་གི་ཡིན་ཞེས་ལབ་པ་ཡིན། སྐད་ཆ་དེ་བཤད་མ་ཐག་གདན་ས་ཁག་དང་གཞིས་ཆགས་ཁག ཚོགས་པ་སྐྱིད་སྡུག་ཁག སྤྱི་འཐུས། དེ་བཞིན་བོད་ནང་བཅས་ནས་སྙན་ཞུ་མང་པོ་ཞིག་འབྱོར་སོང་། དེ་ཡང་འགན་ལྕི་མོ་ཡིན་སྟབས། དེ་རིང་འདིར་སེར་སྐྱ་མི་མང་ཁྲི་ཚོ་བརྒལ་བ་ཡོད་སར་གསལ་བཤད་ཅིག་བྱས་ན་བསམ་སོང་། ཞེས་དང་།
གཞི་རྩའི་ཆ་ནས་ང་ཚོ་དམངས་གཙོའི་ཐོག་སྐྱོད་དོན་མི་རིགས་གྱི་ཁེ་ཕན་རེད། དུས་རབས་ཉེར་གཅིག་ནང་འཛམ་གླིང་སྤྱི་དང་མཚུངས་པ་ཞིག་དང་ང་ཚོ་མི་གྲལ་དུ་ཚུད་པ་ཞིག་དགོས་ཀྱི་ཡོད། ལོ་བརྒྱ་ཕྲག་ཁ་ཤས་ལ་ང་ཚོའི་ལུགས་སྲོལ་གཅིག་པུ་བཤད་བསྡད་ན་འགྲིག་གི་མེད། རྒྱུ་མཚན་དེ་ལ་བརྟེན་ནས་ངོས་རང་ཕྱེད་རྒན་ཡོལ་ཞེས་པ་དེ་ཕྱི་ལོ་ ༢༠༠༡ ནས་ཡིན་ལ། ད་ཆར་ད་དུང་ངོས་ཀྱིས་སྲིད་འཛིན་གྱི་མིང་འཛིན་ལྟ་བུ་བྱས་ཏེ། ཡིག་ཆ་དེ་འདྲ་ལ་མིང་རྟགས་འགོད་རྒྱུའི་མཚོན་པའི་ལས་འགན་རེ་འགའ་ཡོད་པ་དེ་དག་བསྒྱུར་བཅོས་གཏོང་དགོས་ཀྱི་འདུག ཅེས་ངོས་རང་གི་བསམ་ཚུལ་དེ་རེད། ངོས་ཀྱིས་རྒན་ཡོལ་ཟེར་བ་དེ་བོད་སྤྱི་པའི་དོན་དག་ལ་རེ་བ་བྲལ་ཏེ་སེམས་ཤུགས་ཆག་པ་ལྟ་བུ་དང་། བོད་བསྟན་སྲིད་དོན་དག་ངོས་ཀྱིས་བློས་གཏོང་བྱས་པ་དེ་འདྲ་རྩ་བ་ནས་མིན་སྟབས། ཁྱེད་རང་ཚོ་བློ་བདེ་བོ་བྱོས། ངོས་ཀྱིས་བོད་བསྟན་སྲིད་དོན་དུ་བསམ་བློའི་ཐོག་ནས་འགན་ལེན་གྱི་རེད་ལ་གནས་ཚུལ་གལ་ཆེ་བ་དེ་དག་ལ་ངོས་ཀྱིས་བསམ་བློ་གཏོང་གི་རེད། སྒྲིག་འཛུགས་ཀྱི་འགྲོ་སྟངས་ཆ་ནས་བསྒྱུར་བཅོས་གཏོང་དགོས་ཀྱི་འདུག ཅེས་འཆད་ཀྱི་ཡོད། ཞིབ་ཕྲའི་གནས་ཚུལ་ཕལ་ཆེར་ཕྱིི་ཟླ་ ༣ པའི་གྲོས་ཚོགས་ནང་ཡོང་གི་རེད། སྐབས་དེར་ངོས་ཀྱིས་ཡིག་ཐོག་ནས་གསལ་པོ་བྱས་ཏེ་ཞུ་རྩིས་ཡོད།
དེ་སྔ་ཧ་ལམ་བཀའ་བློན་ཚོ་དང་མཉམ་དུ་བདུན་ཕྲག་རེ་རེའི་ནང་ཚོགས་ཏེ་གོ་བསྡུར་བྱས་ཏེ་གཏན་འབེབས་བྱེད་ཀྱི་ཡོད། བཀའ་བློན་ཁྲི་པ་འོས་འདེམས་བྱུང་བའི་རྗེས་ལ་ང་ཚོ་བཀའ་ཤག་ལྷན་རྒྱས་མཉམ་དུ་ཚོགས་རྒྱུ་དེ་མཚམས་མཚམས་མ་གཏོགས་ཚོགས་དགོས་ཀྱི་མེད། ༢༠༠༡ ལོ་ཙམ་ནས་བཀའ་བློན་ཁྲི་པ་དང་བཀའ་བློན་གཞན་ཚོས་འགན་ཆ་ཚང་བླངས་ཏེ་འགྲོ་བཞིན་ཡོད། འདས་པའི་ལོ་བཅུའི་ནང་འཐུས་ཤོར་གང་ཡང་ཕྱིན་མེད། ད་ལྟ་ངོས་ཀྱིས་ཡིག་ཆའི་འགྲོ་སྟངས་ཐོག་ལ་རྒན་ཡོལ་ཆ་ཚང་བྱས་པ་ཙམ་གྱིས་འཐུས་ཤོར་ལ་འགྲོ་རྒྱུ་གང་ཡང་མེད། དེའི་ཐོག་སེམས་འཁུར་རྩ་བ་ནས་བྱ་དགོས་པ་མ་རེད། ཅེས་བཀའ་སློབ་བསྩལ་འདུག
དོན་འགྲུབ་བཀྲ་ཤིས་ཀྱིས་བོད་གཞུང་དྲ་རྒྱ་ལས་བསྡུ་སྒྲིག་བྱས།
ང་ཚོའི་ནམ་ཡིན་ཡང་རང་གི་ཁེ་ཕན་ལས་༧གོང་ས་མཆོག་གི་ཁེ་ཕན་ལ་བསམ་བློ་གཏོང་གི་མེད།དབང་ཆེན་དང་ཚོགས་སྡེ་ཁ་ཤས་ནས་ཁང་པ་ཆུང་ཆུང་ཞིག་གསར་རྒྱག་དང་ཚོགས་འདུ་རྒྱས་བསྡུས་གང་ཡིན་ཡང་༧གོང་ས་མཆོག་གདན་འདྲེན་ཞུ་རྒྱུ་ཁོ་བ་ཚོའི་ཁེ་ཕན་ལས་ད་༧གོང་ས་མཆོག་དགོང་ན་མཐོ་བས་མང་ཙམ་སྐུ་ངལ་གསོ་དགོས་ངེས་ལ་ཁྱོན་ནས་བསམ་བློ་བཏང་མྱོང་མེད།ཕྱི་རྒྱལ་དང་རྒྱ་གར་གང་སར་ཕེབས་དགོས་པ་དམིགས་བསལ་མ་གཏོགས་བོད་པ་རྣམས་ནས་ཁོང་ལ་སྐུ་ངལ་མང་ཙམ་གསོ་འཇུག་རྒྱུར་བསམ་བློ་གཏོང་རོགས་ཞུ་རྒྱུ་ཡིན།
ཨ་རོ་དུས་བབ་ཚང། འདང་དགོང་མཚོ་སྔོན་བརྙན་འཕྲིན་ནང་ན་༼བླ་བྲང་རིག་གནས༽་ཟེར་བའི་དཔེ་ཚོགས་ཤིག་པར་དུ་བསྐྲུན་པའི་གནས་ཚུལ་འདུག་ལ། དོར་ཞི་རིན་པོ་ཆེར་བཅའ་འདྲི་ཐུང་ཐུང་ཞིག་ཀྱང་འདུག་པས་གསར་འགྱུར་དེ་ཅིག་བཙལ་ནས་ཁུངས་ལྡན་ཞིག་དགོད་ཐུབ་ན་ཕན་ས་རེད།
ཀླུ་མཁར་བྱམས་ནས༼ དེ་རིང་གི་ཏཱ་ལའི་བླ་མ་དང་། གནའ་བའི་ཕོ་བྲང་པོ་ཏཱ་ལ། ད་དུང་ཡུམ་བུ་བླ་སྒང་སོགས་ནི་ལོ་རྒྱུས་ཀྱི་སྐྱོ་གར་རམ། ཡང་ན་གཟི་བརྗིད་དུའང་དྲངས་ཆོག་པའི་དད་བརྟེན་ཙམ་ལས་སེངས་ཉིན་གྱི་རེ་བ་བརྒྱག་ སོ་མིན་སྟབས། བགྲོས་ཡོལ་གྱི་སྐད་ཆ་འདི་གསར་འགྱུར་ཙམ་ཞིག་ལས། བོད་ཀྱི་དོན་ཆེན་ཞིག་ལ་བརྩི་རིན་མི་འདུག ཡིན་ནའང་། ༸གོང་ས་མཆོག་བགྲོས་ཡོལ་ལ་ཕེབས་དགོས་ཕྱིན་བཙན་བྱོལ་བོད་མིའི་བཅའ་ཁྲིམས་པ་ འགྱུར་བ་གཏོང་དགོས་པ་ནི་སྔོན་འགྲོའི་ཆ་རྐྱེན་ཡིན་པ་དང་། བཅའ་ཁྲིམས་ནང་འཁོད་པའི་ཁོང་གི་སྐུ་དབང་ཆེན་པོ་བརྒྱད་དགུ་ཞིག་ཡོད་པ་དེ་རེ་ རེ་བཞིན་བཟོ་བཅོས་བརྒྱབས་ན་མ་གཏོགས། བླ་རྒན་ལ་བགྲོས་ཡོལ་གྱི་ལམ་ཁ་ཞིག་མེད་པ་གསལ་པོ་རེད། འོན་དེ། འུ་ཚང་གི་སྤྱི་འཐུས་ཚོའི་མཚོན་པས་ལས་ཀྱི་སྣེ་མོ་བ་རྣམས་ལ་འདིར་ལག་པ་འཆིངས་ རྒྱུའི་བློ་ཁོག་འདུག་གམ། ངས་བལྟས་ན་ཕར་རིའི་སྤང་རྒྱན་རེད་དོ་་་་་་༽ ཅེས་པ་འདི་དངོས་གནས་དྲང་གནས་གོང་ས་མཆོག་གི་དགོངས་གཞི་དངོས་ལག་ལེན་ནང་འཇུག་ཐབས་སུ་གྱུར་འདུག་པས། གོང་ས་རྒྱལ་ལོ། ཀླུ་མཁར་རྒྱལ་ལོ། བོད་རྒྱལ་ལོ།
འདི་ཡང་ཁོང་ལ་རྒྱ་ནག་པོས་གནོད་ཤུགས་ཕོགས་ཡོད་པས་རྟགས་རེད། རྒྱ་ནག་ལ་ག་ཚད་བསྟུན་ན་ཡང་བོད་ལ་རེ་བ་ཡོད་པ་མ་རེད། དེ་ལས་རྒྱལ་བ་རིན་པོ་ཆེ་བོད་རྒྱལ་ཁབ་ཀྱི་བདག་པོའི་མཚན་གནས་མཇུག་སྐྱོང་ན་ཡག་པོ་རེད། རྒན་ཁོག་དད་པ་དག་སྣང་ཡོད་མཁན་ཚོས་རྒྱལ་བ་རིན་ཆེ་མཁྱེན། ཁོང་གིས་ཅི་གསུངས་ན་དེ་ཡིན་ཟེར་གི་ཡོད་མོད། དེང་སང་གཞོན་སྐྱེས་གསར་བརྗེ་བ་ཡིན་ཟེར་མཁན་ཚོས་ཡང་རྒྱལ་བ་རིན་པོ་ཅི་གསུང་དེ་བྱེད་དགོས་ཟེར་བ་ནི་དགོད་བྲོ་བ་ཞིག་རེད།
མགོན་པོ་གང་གི་གསུང་ལ་མངོན་པར་བསྟོད་ཅིང་བཞེད་དོན་ལྷུན་གྱིས་འགྲུབ་པའི་སྨོན་འདུན་གྱི་ཐོག་དྲངས་ཏེ་ཚང་མར་ཞུ་རྒྱུར། དུས་བསྟུན་གྱི་གལ་ཆེའི་ལེགས་བཅོས་དང་འགྱུར་བ་འདི་རིགས་ལག་ལེན་བསྟར་མིན་ནི་ཐད་ཀར་བོད་དོན་དང་ཕན་གནོད་འབྲེལ་བའི་བྱ་བ་ཞིག་ཡིན་པས། བླ་མའི་བཀའ་བཞིན་སྒྲུབ་མཁན་ཚོས་ངེས་པར་ཡིག་ངག་གཉིས་ནས་ངོས་ལེན་དང་རྒྱབ་སྐྱོར་གནང་འོས། ལྷག་པར་དུ་བོད་མི་དམངས་སྤྱི་འཐུས་ནང་ནས་འདི་ཐད་ལ་དགོངས་འཆར་འདོན་གལ་ཆེ། ཆབ་བྲག་ལྷ་མོ་སྐྱབས་ལགས་མ་གཏོགས་སྤྱི་འཐུས་ནང་དགོངས་གཞི་འདི་ལ་རྒྱབ་སྐྱོར་གནང་མཁན་ཡོད་མེད་དོགས་པ་རེད། གལ་ཏེ་མེད་སོང་ན་སྤྱི་ཟླ་གསུམ་པའི་གྲོས་ཚོགས་དེ་ཡང་བླ་མའི་དགོངས་པར་འགལ་བའི་གྲོས་ཚོགས་ཤིག་ཆགས་རྒྱུ་མ་རེད་དམ།
བོད་གཞུང་དམངས་ཚང་མས་༧གོང་ས་མཆོག་གི་ཐུགས་བཞེད་བཞིན་གནང་རྒྱུ་ལས་དེ་ལྟར་མི་གནང་བའི་གསོལ་འདེབས་མ་ཞུས་ན་དགའ། དྲྭ་གྲོགས་འགས་བཤད་པ་བཞིན་༧གོང་ས་མཆོག་གིས་དེ་ལྟར་ནན་གྱིས་གསུངས་པར་དགོས་པ་རྒྱུ་མཚན་ལོས་ཡོད།
གསར་འགོད་པ་ལགས།
གསར་འགྱུར་ཚིག་ཉུང་དོན་འདུས་དཔེ་མི་སྲིད་པ་ཞིག་བསྡུས་འདུག རྗེས་སུ་ཡི་རང་ཡོད།
གཤམ་གྱི་འདི་ཚོར་བཟོ་བཅོས་རེ་ཐུགས་འདོགས་འཚལ།
༡༽དེའི་ཐོག་སེམས་འཁུར་
༢༽ གསུང་ཆོས་ར་བ་རུ་ལྡན་ཆོས་ཞུ་བ་
༣༽ ཧི་མ་ལ་ཡའི་རྒྱུ་རྒྱུད་ཀྱི་
༤༽ ཁོར་ཡུག་གཙང་གཉར་བྱ་དགོ་སྐོར
༥༽ རྒྱབ་ལྗོངས་སོགས་ཐོག་ལ་གསུངས་བཤད་གནང་ཡོད།
༦༽ བོད་ཀྱི་ས་ཁུལ་གང་སར་རྒྱ་ནག་གུང་ཁྲན་གྱི་དམག་མི་བཙུགས་ཏེ་མནན་ཏེ་སྡོད་དགོས་པ་ཆགས་ཀྱི་ཡོད་
༧༽ རྒྱ་གར་གྱི་ས་ཐོག་ལའང་རང་བཞིན་གྱི་དོགས་པ་དང་མི་བདེ་བ་ཡོང་གི་ཡོད།
༨༽ བོད་རྒྱ་གཉིས་ཀའི་བློ་འཇོག་ས་གཉིས་མོལ་ཞིག་
༩༽ གཉིས་མོལ་མིན་པར་ཕྱོགས་གཅིག་གིས་དབང་ཤུགས་
༡༠༽ ༧གོང་ས་མཆོག་གིས་ཁོང་ཉིད་བགྲེས་ཡོད་ཆ་ཚང་
༧གོང་ས་མཆོག་སྐུ་ཚེ་ཡུནརིང་བརྟེན་པ་དང་ཐུགས་བྱེད་ལྷུན་འགྲུབ་ཡོངས་བ་སྨོན་་་་ཁ་བ་གངས་ཅན་པ་མྱུར་དུ་བདེ་སྐྱིད་ཐོབས་པ་ཤོག་
གསར་འགོད་པ་དོན་འགྲུབ་བཀྲ་ཤིས་ཀྱི་གནས་ཚལ་དང་པར་ཐུགས་རྗེས་ཆེ་་་་་་་དྲ་གྲོགས་མངའ་རིས་བུའི་གསུང་ནོ་དངོས་ནས་བདེན་པ་རེད་་ཕ་མ་ཡོད་པའི་དུས་སུ་བུ་ཕྲུག་གི་མི་ཚེ་སྐྱེལ་སྟངས་བཟོ་དགོས་རེད་་་ཚང་མའིཨུ་ཚུགས་མ་སྐྱོན་རོགས།
གསར་འགྱུར་འདིའི་ཁ་བྱང་ལ་ནུས་པ་ཁྱད་པར་བ་ཞིག་འདུག་ཅིང་། ཁ་བྱང་དེ་བཀླགས་ཚར་མ་ཐག་ཤ་དང་རུས་པའི་གསེང་ནས་སེམས་འཚབ་ཅིག་སློང་ཡོང་གི་འདུག ” ངོས་རང་གིས་ནམ་རྒྱུན་༸གོང་ས་ལྔ་པ་ཆེན་པོའི་སྐབས་ནས་རྒྱལ་དབང་སྐུ་ཕྲེང་རིམ་བྱོན་གྱི་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཅེས་པའི་ལམ་ལུགས་དེ་ ༢༠༠༡ ལོ་ནས་རྫོགས་པ་རེད་ཅེས་ཤོད་ཀྱི་ཡོད། ” བཀའ་གསུང་འདི་ལ་བསམ་བློ་བསྐྱར་དུ་གཏོང་དགོས་པ་ཞིག་མི་འདུག་གམ།
ད་སྐུ་ངོ་མས་བཀའ་གནང་བ་དེར་དགོས་པ་དང་རྒྱུ་མཚན་ཆེན་པོ་ལོས་ཡོད།
དེས་ན་ད་དུང་ཨུ་ཚུགས་མ་སྐྱོན་རོགས།
ཕ་མ་ཡོད་པའི་དུས་སུ་བུ་ཕྲུག་གི་མི་ཚེ་སྐྱེལ་སྟངས་བཟོ་དགོས་རེད།
ཉིན་གཅིག་ཕ་མ་མེད་པའི་དུས་སུ་ཅི་ཡོང་མི་ཤེས།
དེས་ན་ཕ་མ་ཡོད་པའི་དུས་སུ་བུ་ཕྲུག་ལ་མི་ཚེའི་འདུན་ལམ་ཇི་ལྟར་བྱེད་མིན་སློབ་གསོ་འདྲ་གནང་ཕ་མ་ལ་འགན་དེ་ཙམ་མི་དགོས་པ་བྱེད་རྒྱུ་དེ་ནི་དུས་ལ་བབས་པའི་གནས་སྟངས་ཞིག་རེད།
༸གོང་ས་མཆོག་གི་ཞལ་སྔ་ནས་”ངོས་ཀྱིས་རྒན་ཡོལ་ཟེར་བ་དེ་བོད་སྤྱི་པའི་དོན་དག་ལ་རེ་བ་བྲལ་ཏེ་སེམས་ཤུགས་ཆག་པ་ལྟ་བུ་དང་། བོད་བསྟན་སྲིད་དོན་དག་ངོས་ཀྱིས་བློས་གཏོང་བྱས་པ་དེ་འདྲ་རྩ་བ་ནས་མིན་སྟབས། ཁྱེད་རང་ཚོ་བློ་བདེ་བོ་བྱོས། ངོས་ཀྱིས་བོད་བསྟན་སྲིད་དོན་དུ་བསམ་བློའི་ཐོག་ནས་འགན་ལེན་གྱི་རེད་ལ་གནས་ཚུལ་གལ་ཆེ་བ་དེ་དག་ལ་ངོས་ཀྱིས་བསམ་བློ་གཏོང་གི་རེད། སྒྲིག་འཛུགས་ཀྱི་འགྲོ་སྟངས་ཆ་ནས་བསྒྱུར་བཅོས་གཏོང་དགོས་ཀྱི་འདུག ཅེས་འཆད་ཀྱི་ཡོད། “ཅེས་གསུངས་སྟབས། ད་བར་གདན་ས་ཁག་དང་གཞིས་ཆགས་ཁག ཚོགས་པ་སྐྱིད་སྡུག་ཁག སྤྱི་འཐུས། དེ་བཞིན་བོད་ནང་སོགས་ཀྱི་བོད་མི་མང་པོ་ཞིག་གིས་ཐུགས་འཚབ་གནང་བཞིན་པ་དེར་བཀའ་ལན་ནན་གྱིས་བསྩལ་བ་ཞིག་མ་རེད་དམ།།
ཧི་མ་ལ་ཡའི་རྒྱུ་རྒྱུད་ཀྱི་ཆོས་ཞུ་བ་ཚོར་ཁོར་ཡུག་གཙང་དགོ་སྐོར།
ཧི་མ་ལ་ཡའི་རི་རྒྱུད་ཀྱི་ཆོས་ཞུ་བ་ཚོར་ཁོར་ཡུག་གཙང་ཉར་བྱ་དགོས་སྐོར།
རྒྱུ་རྒྱུད། རི་རྒྱུད།
གཙང་གཉར། གཙང་ཉར།
དགོ་སྐོར། དགོས་སྐོར།
གསུངས་བཤད། གསུང་བཤད།