ཀན་ལྷོ་བོད་རིགས་རང་སྐྱོང་ཁུལ་རྩེ་ཞིག་དགོན་པའི་བླ་མ་རྩེ་ཞིག་ཚང་ཤེས་རབ་བསྟན་པའི་ཟླ་བ་དང་ཀྲུང་དབྱང་མི་རིགས་སློབ་ཆེན་བོད་རིག་པ་ཞིབ་འཇུག་གླིང་གི་སློབ་གཙོ་ཚེ་རིང་ཐར་གཉིས་ཀྱི་སྣེ་ཁྲིད་འོག ༼གངས་ཏི་སེ་བོན་གཞུང་རིག་མཛོད༽ ཅེས་པའི་དཔེ་ཚོགས་དེ་རྩོམ་སྒྲིག་ལེགས་འགྲུབ་བྱུང་སྟེ། ཉེ་ལམ་མི་རིགས་དཔེ་སྐྲུན་ཁང་གིས་དངོས་སུ་པར་སྐྲུན་འགྲེམས་སྤེལ་བྱས་ཡོད་འདུག
རིག་མཛོད་དེ་ནི། གངས་ཏི་སེ་བོན་གཞུང་རིག་མཛོད་ལྷན་ཚོགས་ཀྱིས་ལོ་ ༣ རིང་གི་འབད་པ་བརྒྱུད་དེ་གྲུབ་པ་ཞིག་ཡིན་ཞིང་། བོད་ཀྱི་རིག་གནས་བརྩམས་ཆོས་གཅེས་བསྡུས་ཤིག་དང་ཆེས་ཐོག་མར་རྩོམ་སྒྲིག་དཔར་སྐྲུན་བྱས་པའི་གཡུང་དྲུང་བོན་གྱི་དཔེ་ཚོགས་ཤིག་ཀྱང་ཆགས་ཡོད་འདུག དཔེ་ཚོགས་དེར་གཙོ་བོ་རིག་གནས་དང་། མདོ་སྔགས་གཉིས། རྫོགས་ཆེན་བཅས་ཁག་བཞི་ཡི་གྲུབ་ཡོད་ཅིང་། ཁྱོན་བསྡོམས་དེབ་ ༢༥ ཙམ་ཡོད་པ་དག་ནི། ༡ སྟོན་པའི་མཛད་རྣམ་དང་ལོ་རྒྱུས་ཀྱི་སྐོར། ༢ བརྡ་དག་སྒྲ་སྦྱོར་གྱི་སྐོར། ༣ སྙན་ངག་མངོན་བརྗོད་ཀྱི་སྐོར། ༤ བཟོ་རིག་དང་རྩིས་ཀྱི་སྐོར། ༥ གསོ་རིག་འབུམ་བཞི། ༦ བསྡུས་ཚད་བློ་རྟགས་ཀྱི་སྐོར། ༧ བྱང་ཆུབ་ལམ་རིམ་བློ་སྦྱོང་གི་སྐོར། ༨ ཐེག་རིམ་དང་དབུ་མའི་སྐོར། ༩ ཐེག་པ་ཆེན་པོ་ས་ལམ་གྱི་སྐོར། ༡༠ ཕར་ཕྱིན་སྔ་དུམ་གྱི་སྐོར། ༡༡ ཕར་ཕྱིན་ཕྱི་དུམ་གྱི་སྐོར། ༡༢ སྣང་སྲིད་མཛོད་ཕུགས་ཀྱི་སྐོར། ༡༣ འདུལ་བ་རྒྱས་བསྡུས་ཀྱི་སྐོར། ༡༤ སྡེ་སྣོད་མཛོད་རྩ་འགྲེལ། ༡༥ སྤྱི་སྤུངས་རྩ་རྒྱུད་གསང་བ་བསེན་ཐུབ། ༡༦ ལྷོ་གཏེར་ཁྲོ་བོ་རྒྱུད་དྲུག་གི་སྐོར། ༡༧ གསང་སྔགས་བཀའ་འགྲེལ་གྱི་སྐོར། ༡༨ གསང་སྔགས་མ་རྒྱུད་ཀྱི་སྐོར། ༡༩ རྫོགས་ཆེན་ཚད་མའི་སྐོར། ༢༠ རྫོགས་ཆེན་མན་ངག་བཀའ་བརྟེན་གྱི་སྐོར། ༢༡ རྫོགས་ཆེན་སྐུ་གསུམ་རང་ཤར། ༢༢ བྱང་སེམས་གབ་པ་དགུ་སྐོར་གྱི་རྩ་འགྲེལ། ༢༣ རྫོགས་ཆེན་ཡོངས་རྩེ་ཀློང་ཆེན། ༢༤ རྫོགས་ཆེན་སྙན་རྒྱུད་བཀའ་རྒྱུད་སྐོར་བཞི། ༢༥ རྫོགས་ཆེན་ཡེ་ཁྲི་མཐའ་སེལ་བཅས་ཡིན་འདུག
གངས་ཏི་སེ་བོན་གཞུང་རིག་མཛོད་དཔེ་ཚོགས་དེ་ཕྱོགས་བསྒྲིག་བྱེད་པར་གཡུང་དྲུང་བོན་གྱི་བླ་ཆེན་སྤྲུལ་སྐུ་དང་། བོན་གཞུང་ཉམས་ཞིབ་པ། རིག་གཞུང་མཁས་དབང་མང་པོར་བསམ་འཆར་བསྡུ་ལེན་བྱས་ཏེ་བསྒྲིགས་པ་ཞིག་ཡིན་འདུག་ལ། དཔེ་ཚོགས་དེར་ལོ་རྒྱུས་སྟེང་གི་གཡུང་དྲུང་བོན་གྱི་ལག་བྲིས་དང་ཤིང་དཔར། ལྡེབས་བྲིས་སོགས་ཡིག་ཆ་རྩ་ཆེན་མང་པོ་འཚོལ་བསྡུ་དང་ལེགས་སྒྲིག་གིས་གཏན་འབེབས་བྱས་པ་ཞིག་ཡིན་འདུག
གསར་འགོད་པ། དོན་གོ
ཁྱེད་རྣམས་ཀྱིས་ཐུགས་ཁུར་ཆེ་བཞེས་ཀྱིས་བོད་ཀྱི་རིག་གནས་ལ་ཐུགས་སྣང་ཆེན་པོ་གནང་བར་ཐུགས་རྗེ་ཆེ་ཞུ།
ང་ཚོ་བོད་མི་རྣམས་ཀྱི་མྱེས་པོའི་རིགས་གཞུང་འདི་དག་ལ་སྙིང་ནས་གུས་ཞབས་བྱེད་དགོས།
དགེ་བཤེས་སྨོན་ལམ་མཐར་ཕྱིན་ལགས་ལ་ཐུགས་རྗེ་ཆེ་ཞུ། ཁྱེད་ཀྱིས་ཁོ་འདོན་གནང་བའི་དྲ་རྒྱའི་ཁ་སྦྱང་དེ་རྒྱུད་ནས་ངས་༼གངས་ཏི་སེ་བོན་གཞུང་རིག་མཛོད༽ ཅེས་པའི་དཔེ་ཚོགས་རྣམས་ལྟ་ཐུབ་ཀྱི་འདུག།
འདིའི་སྐོར་ཞིབ་ཕྲ་གཟིགས་འདོད་ཡོད་ཚེ་གཤམ་གྱི་དྲ་ཚིགས་ནས་དེབ་རེ་རེ་བཞིན་བཀླག་ཐུབ་པ་མ་ཟད་གནས་ཚུལ་ཞིབ་ཕྲ་མཁྱེན་རྟོགས་ཐུབ།
http://www.himalayabon.com/article/book/books/20100707218.html
http://www.himalayabon.com/article/news/2010070329.html
http://www.himalayabon.com/article/book/magazine/20100709229.html
བོན་བསྟན་ཡུན་བརྟན་ཤོག
གཏམ་བཟང་རེད། རྩོམ་རིག་གནང་མཁན་རྣམས་ལ་བཀའ་དྲིན་ཆེ་ཞུ།