བདེ་ས་ཞིག་ནས
སྐྱིད་ས་ཞིག་ནས
ཁུ་སིམ་ས་ཞིག་ནས
ང་ཡི་ཡོད་ཚད་ཁྱེད་ལ་དབང་བར་ཤོག
ང་ཡི་ཚེ་སྲོག་ཁྱེད་ལ་འཐིམ་པར་ཤོག
ང་ཡི་རྨི་ལམ་ཁྱེད་ལ་རྨིས་པར་ཤོག
སྐྱིད་སྡུག་ལེགས་ཉེས
དགའ་སྐྱོ་ཆགས་སྡང་
སུན་སྣང་དང་སྡུག་ཡས་མེད་ས་ནས
ང་ཡི་སྨོན་འདུན་ཁྱེད་ལ་འཕྲོད་པར་ཤོག
དུར་སྒམ་སྟོང་བ་ཞིག
རུས་ཐལ་སྤར་མོ་བཀང་
མིག་ཆུ་སྐྱོག་བཀང་
བརྩེ་བ་རུམ་བཀང་
ཚང་མ་བསྲེས་ནས
འོ་མ་ཕོར་བཀང་དེ་མ་རུལ་གོང་དེར
ང་ཁྱེད་ཀྱི་མལ་ཁྲིའི་འགྲམ་ནས
ཁྱེད་ཀྱི་མིག་མདུན་དུ
ཁྱེད་ཀྱི་ལུས་དྲོད་ལ་བརླན་ནས
ངའི་ལུས་ངག་ཡིད་གསུམ
ངའི་ཤ་ཁྲག་རུས་གསུམ
ངའི་སྐྱེ་འཆི་བར་གསུམ
ཆེས་མཐའ་མཇུག་གི་གླུ་སྐད་ཐོས་མཁན་ནི
ཁྱེད་རང་ཁོ་ནར་གྱུར་བར་སྨོན་འདུན་ཡོད
སྐོར་བ་ཞིག་བྱས་ནས་བུད་སོང་ང་།
ཁྱེད་ཀྱིས་འདི་རུ་བརྗོད་ཀྱིན་པའི་༼ ཁྱེད་༽དེ་བསོད་ནམས་ཅན་ཞིག་རེད་ཡ། གང་ལྟར་བློས་གཏོང་ལབ་ན་འདི་འདྲ་ཞིག་ཡིན་དགོས་རྒྱུ་རེད་ལ། ལྷད་མེད་ཀྱི་བརྩེ་བ་ལབ་ན་ཡང་འདི་འདྲ་ཞིག་ཡིན་དགོས་རྒྱུ་རེད། གྲོགས་པོ་ལགས། མ་མཇལ་ཡུན་རིང་སྐུ་ཁམས་བཟང།
ང་སྙན་ངག་འདི་ལ་དགའ་སྣང་སྐྱེས་སོང་། དངོས་གནས་ཡག་པོ་འདུག་བསམ་སོང་། རྒྱུ་མཚན་མང་པོ་མི་ཤེས། གང་ལྟར་དགའ་སོང་།