ཉེ་ཆེར་ཊའུ་ནེ་ཤེཡ་ Tunisia མང་ཚོགས་ཀྱི་ཡར་ལངས་ལ་རྒྱལ་ཁ་ཆེན་པོ་ཐོབ་ཡོད་པ་དེས་ཨི་ཇིབ་མི་མང་ལ་སེམས་ཤུགས་དང་སྐུལ་འདེད་ཆེན་པོ་ཐེབས་ཏེ། ཟླ་འདིའི་ཕྱི་ཚེས་ ༢༥ ཉིན་གྱི་རྒྱལ་ཡོངས་གུང་སེང་གི་གོ་སྐབས་དང་བསྟུན་ཏེ། ཨི་ཇིབ་མི་མང་སྟོང་ཕྲག་མང་པོ་རྒྱལ་ས་ཁའེ་རོ་ Cairo རུ་འཛོམས་ཏེ། སྲིད་གཞུང་གི་གཉའ་གནོན་དང་ཉེན་རྟོག་པའི་གདུག་རྩུབ། དབུལ་ཕུངས་ཚོར་བརྙེས་བཅོས་བྱེད་པའི་བྱ་སྤྱོད་ལ་ངོ་རྒོལ་གྱི་ཡར་ལངས་གཞི་རྒྱ་ཆེན་པོ་ཞིག་བྱས་ཡོད་པར་མ་ཟད། ཉིན་དེར་གྲོང་ཁྱེར་དང་ས་གནས་གཞན་དག་ཏུ་ཡང་གཅིག་མཚུངས་ཀྱིས་ཡར་ལངས་མགོ་འཛུགས་བྱས་ཡོད་འདུག
ཡར་ལངས་བྱས་ཏེ་ཆུ་ཚོད་འགའི་རྗེས་སུ་གཞུང་དམག་དང་དྲག་ཆས་ཉེན་རྟོག་པ་ཕོན་ཆེན་ཡོང་སྟེ། མང་ཚོགས་ཁྲོད་དུག་རླངས་གཏོར་བ་སོགས་དྲག་གནོན་བྱས་ཡོད་འདུག་ལ། དེ་ལ་མང་ཚོགས་རྣམས་སྔར་ལས་ཁོང་ཁྲོ་ཆེན་པོ་ལངས་ཏེ་གཞུང་དམག་དང་གདོང་ཐུག་གིས་འཐབ་འཛིང་བྱས་པར་བརྟེན་ཕན་ཚུན་ལ་ཤི་རྨས་ཚབས་ཆེན་ཐེབས་ཡོད་འདུག ཉིན་དང་པོའི་ངོ་རྒོལ་སྐབས་མི་མང་ཚོས་གཞུང་གི་ལས་ཁུངས་འགར་མེར་བསྲེག་གཏོར་སྐྱོན་བཏང་ཡོད་འདུག་ལ། ཁོང་ཅག་གི་འབོད་ཚིག་གཙོ་བོ་ནི། ལོ་ངོ་སུམ་ཅུའི་རིང་བཀས་བཀོལ་རྒྱུན་འཛིན་ལམ་ལུགས་ལག་བསྟར་བྱེད་མཁན་དང་། སྲིད་དབང་སྒེར་གཅོད་པ་མུ་བྷ་རཀ་ Mubarak སྲིད་འཛིན་ལས་གནས་ནས་གནས་དབྱུང་གཏོང་དགོས་པ་དང་། ཕྱི་ཚེས་ ༢༥ ཉིན་ནི་ “མི་མང་གྱེན་ལངས་ཉིན་མོ” ཡིན་པར་བསྒྲགས་ཡོད།
ཉིན་དེའི་གནས་ཚུལ་རྣམས་རྒྱལ་སྤྱིའི་གསར་འགྱུར་བརྒྱུད་ལམ་ཁག་དང་། ངོ་དེབ་དང་ཌི་ཝེ་ཊར་སོགས་སུ་སྤེལ་གཏོང་བྱས་ཡོད་སྟབས། ཕྱི་ཚེས་ ༢༦ ཉིན་ནས་ངོ་དེབ་སོགས་དྲ་རྒྱ་ཁག་ཅིག་ཨི་ཇིབ་གཞུང་གིས་བགག་སྡོམ་བྱས་ཡོད་འདུག དེའི་ཐད་བྷི་བྷི་སི་ས་གནས་གནས་ཚུལ་མཁོ་སྤྲོད་པ་མཱར་ཀི་ངྒིརེ་ཇོ་རའེ་ Mark Gregory ཡིས་བརྗོད་པར། ཨི་ཇིབ་གཞུང་གིས་མང་ཚོགས་ཐོག་དྲག་གནོན་བྱེད་སྐབས། གནས་ཚུལ་ཕྱི་ཕྱོགས་སུ་མི་གྱར་བའི་ཆེད་དམ་དྲག་ཤུགས་ཆེན་བྱས་ཡོད་པར་མ་ཟད། གསར་འགོད་པ་དང་གནས་ཚུལ་མཁོ་གཏོང་བ་ཚོར་ཡང་དཀའ་ངལ་དང་ཉེན་ཁ་མི་ཉུང་བ་ཞིག་འཕྲད་ཡོད་འདུག
འདིའི་ཐད་ཨེ་བྷེ་ AP གསར་ཁང་གིས་གནས་ཚུལ་སྤེལ་གསལ་ལྟར་ན། ཐེངས་འདིར་ཁོང་ཚོའི་གསར་འགོད་པ་ཚུད་པའི་གསར་འགོད་པ་ ༨ ཙམ་གཞུང་གི་བཀག་ཉར་འོག་ཚུད་ཡོད་འདུག་ལ། ཨ་རིའི་དྲུང་ཆེ་ལྕམ་ཧེ་ལཱ་རེ་ཡིས་ཀྱང་། ང་ཚོས་ཨི་ཇིབ་གཞུང་ལ་ཞི་རྒོལ་བ་ཚོར་དམ་དྲག་མི་བྱ་བ་དང་གསར་འགྱུར་བརྒྱུད་ལམ་ཁག་ལའང་དམ་དྲག་མི་བྱ་བའི་འབོད་སྐུལ་དང་སྦྲགས། ཨི་ཇིབ་གཞུང་ལ་མཚོན་ན། ཐེངས་འདིའི་དོན་རྐྱེན་ནི་ཆབ་སྲིད་དང་དཔལ་འབྱོར། སྤྱི་ཚོགས་བཅོས་བསྒྱུར་སོགས་ཨི་ཇིབ་མང་ཚོགས་ཀྱི་དགོས་འདུན་ལྟར་ལེགས་བཅོས་བྱ་བའི་གོ་སྐབས་ཡག་པོ་ཞིག་ལ་ངོས་འཛིན་དང་ཡིད་ཆེས་བྱེད་ཀྱི་ཡོད། ཅེས་བརྗོད་འདུག
ཁ་སང་ཕྱི་ཚེས་ ༢༦ ཉིན་སྲིད་གཞུང་གི་དྲག་གནོན་ལ་མ་ལྟོས་པར་མི་མང་ཚོས་བསྐྱར་དུ་ངོ་རྒོལ་ཤུགས་ཆེན་བྱས་ཡོད་འདུག ཐེངས་འདིའི་ཨི་ཇིབ་མི་མང་གྱེན་ལངས་ཁྲོད་ཁ་ཆེ་དང་ཡེ་ཤུ་ཆོས་ལུགས་པ་གཉིས་ཀ་ཚུད་ཡོད་སྟབས། གྱེན་ལངས་ཁྲོད་ཚེ་སྲོག་ཤོར་བ་དག་ལ། གཟའ་པ་སངས་ཉིན་ཡེ་ཤུ་དང་ཁ་ཆེ་ལྷ་ཁང་ཁག་ཏུ་མཆོད་འབུལ་སྨོན་ལམ་རྒྱག་འཆར་ཡོད་ཅིང་། ཉིན་དེར་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་མཱོ་ཧམེ་ཌི་ Mohamed EIBaradei མཆོག་ཕེབས་རྒྱུ་ཡིན་པར་མ་ཟད། འདི་དང་མཉམ་དུ་མང་ཚོགས་ཕོན་ཆེན་མཉམ་ཞུགས་ཀྱིས་སླར་ཡང་གཞུང་ལ་ངོ་རྒོལ་བྱ་འཆར་ཡོད་འདུག
གཞུང་ཕྱོགས་ནས་ཟིང་འཁྲུག་འདིའི་ཁྲོད་ད་བར་མི་ ༨༠༠ ལྷག་འཛིན་བཟུང་བྱས་ཡོད་འདུག་ལ། ད་དུང་གནས་ཚུལ་ཛ་དྲག་ཆེ་རུ་འགྲོ་བཞིན་ཡོད་པར་མ་ཟད། ལྷག་པར་དུ་ནོ་བྷེལ་ཞི་བདེ་གཟེངས་རྟགས་བཞེས་མཁན་མཱོ་ཧམེ་ཌི་མཆོག་མང་ཚོགས་ནང་མཉམ་ཞུགས་བྱ་རྒྱུ་དེས་གྱེན་ལངས་བ་ཚོར་སྐུལ་འདེད་དང་སེམས་ཤུགས་ཆེན་པོ་སྤར་རྒྱུ་ཡིན་པའི་སྔོན་དཔག་བྱེད་ཀྱི་ཡོད་པ་རེད།
གསར་འགོད་པ། བནྡེ་སྐྱབས།
ཡེ་མིན་མི་དམངས་ཀྱིས་ཀྱང་གཞུང་ལ་ངོ་རྒོལ་ཛ་དྲག་བྱེད་བཞིན་འདུག ད་ཡིན་ན་ཨེ་ཤི་ཡའི་གཞུང་སྐོར་ཞིག་གིས་ཅིག་དཀའ་རྒྱུ་རེད།