ཕྱི་ཚེས་ ༢༥ ཉིན་བྷེ་བྷེ་སི་གསར་ཁང་རྒྱལ་སྤྱི་ཚན་པས་གསལ་བསྒྲགས་སྤེལ་བ་ལྟར་ན། མ་འོངས་པར་སྐད་རིགས་ཁག་ཅིག་གི་ལེ་ཚན་སྒོ་རྒྱག་རྒྱུ་ཡིན་པ་དང་། དེ་དག་ནི་ཨན་བྷ་ནེའུ་ཡཱ་ Albanian, དང་། མེའེ་ཌོན་ནེའུ་ཡཱ་ Macedonian, ། སེར་བྷེ་ཡ་ Serbian, ཕོར་ཆི་གྷིལ། དེ་བཞིན། ཨ་ཧྥི་རི་ཀ་གླིང་གི་ཞི་ཕན་ཡཱའི་སྐད་ Portuguese-speaking African དང་། ཁེ་རེ་བྷེན་གྱི་དབྱིན་སྐད་ Caribbean English བཅས་སྐད་རིགས་ ༥ ཡི་ལེ་ཚན་སྒོ་རྒྱག་རྒྱུ་དང་། ལས་བྱེད་ཀྱི་ས་མིག་ ༦༠༥ ཙམ་ཕྱིར་བསྡུ་བྱ་རྒྱུ་ཡིན་འདུག
བྷེ་བྷེ་སི་རྒྱལ་སྤྱིའི་ལེ་ཚན་ལ་ཉན་མཁན་མི་གྲངས་དུང་ཕྱུར་ ༡ དང་བྱེ་བ་ ༨ ལྷག་ཡོད་པ་ལས་གོང་གི་སྐད་རིགས་དེ་དག་ལ་ཉན་མཁན་བྱེ་བ་ ༣ ཙམ་ཡོད་འདུག གཞན་ཡང་། བྷེ་བྷེ་སི་རྒྱལ་སྤྱིའི་སྡེ་ཚན་གྱིས་ད་དུང་སྐད་རིགས་གཞན་ ༧ ཙམ་གྱི་ལེ་ཚན་ཕྱིར་བསྡུ་བྱ་འཆར་ཡོད་པ་དང་། དེའི་ནང་རྒྱ་སྐད་ཀྱི་རླུང་འཕྲིན་ལས་ཚན་དེ་ཕྱི་ཟླ་ ༣ པའི་ནང་གཏོང་མཚམས་འཇོག་རྒྱུ་ཡིན་འདུག
ཐེངས་འདིར་བྷེ་བྷེ་སི་གསར་ཁང་གིས་སྐད་རིགས་མང་པོ་མཚམས་འཇོག་བྱེད་དོན་ནི། ལོ་རེ་བཞིན་བྷེ་བྷེ་སི་རྒྱལ་སྤྱིའི་སྡེ་ཚན་ལ་འགྲོ་གྲོན་ཨ་སྒོར་དུང་ཕྱུར་ ༤ ལྷག་གཏོང་བཞིན་ཡོད་པ་དང་། ད་བར་མ་དངུལ་དེ་དག་དབྱིན་ཡུལ་གཞུང་ཕྱི་འབྲེལ་སྤྱི་སྤྱོད་ཚན་པས་གཏོང་གིན་ཡོད་ཀྱང་། ད་ལོ་ནས་བཟུང་དབྱིན་གཞུང་གིས་ཕྱི་འབྲེལ་སྤྱི་སྤྱོད་ཚན་པའི་གྲོན་དངུལ་ཉུང་ཏུ་གཏོང་རྒྱུ་གཏན་འབེབས་བྱས་ཏེ། འབྱུང་འགྱུར་ལོ་ ༦ ནང་བྷེ་བྷེ་སི་གསར་ཁང་ལ་མཁོ་གཏོང་བྱེད་བཞིན་པའི་མ་དངུལ་གྱི་བརྒྱ་ཆ་ ༡༦ ཙམ་ཉུང་འཕྲི་བྱ་འཆར་ཡོད་པ་ལྟར། བྷེ་བྷེ་སི་གསར་ཁང་གིས་ཀྱང་ཕྱི་ལོ་ ༢༠༡༣ ནས ༢༠༡༤ བར། སྔར་གྱི་ལོ་རེའི་གནས་འཕྲིན་དྲ་བའི་ཞབས་ཞུའི་མ་དངུལ་དབྱིན་སྒོར་དུང་ཕྱུར་ ༡་༣༧ དེ། དབྱིན་སྒོར་དུང་ཕྱུར་ ༡་༠༣ བར་ཇེ་ཉུང་དུ་གཏོང་རྒྱུ་ཡིན་འདུག
གནས་ཚུལ་དེའི་ཐད་ཁ་སང་ཕྱི་ཚེས་ ༢༦ ཉིན་ལཱོན་ཏོན་གྲོང་ཁྱེར་གྱི་བྷེ་བྷེ་སི་རྒྱལ་སྤྱིའི་སྡེ་ཚན་ལྟེ་བའི་ཐོག་ཁང་མདུན་དུ། དབྱིན་ཇིའི་རྒྱལ་ཡོངས་གསར་འགོད་མཐུན་ཚོགས་ཀྱིས་བྷེ་བྷེ་སི་གསར་ཁང་གི་འཕོ་འགྱུར་དེ་ལ་ངོ་རྒོལ་གྱི་ལས་འགུལ་ཞིག་སྤེལ་འདུག་ལ། མཐུན་ཚོགས་ཀྱི་ཚོགས་གཙོས། རྒྱལ་ནང་གི་ཞབས་ཞུའི་སྡེ་ཚན་གཙོ་གྲས་ཁག་ཕྱིར་བསྡུ་བྱ་བཞིན་པའི་གནས་བབ་འདིས། རྒྱལ་ཁབ་ཀྱི་སྤྱི་སྤྱོད་ཞབས་ཞུའི་ལས་དོན་ལམ་ལུགས་ཉམས་ཞན་དུ་འགྲོ་བཞིན་ཡོད་པ་མཚོན་ཞིང་། གྱོང་གུད་དེར་སྲིད་གཞུང་གིས་འགན་འཁུར་དགོས། ཞེས་བརྗོད་འདུག
གསར་འགོད་པ། ཚེ་རིང་རྒྱལ།
